བསྐྱར་དུ་བསམ་བློ་ཐོངས། རིག་འབྱུང་དོན་གྲུབ་བཀྲ་ཤིས།

རིག་འབྱུང་དོན་གྲུབ་བཀྲ་ཤིས། ཨ་རི།

བོད་རྒྱ་འབྲེལ་མོལ་གྱི་རིམ་པ་འདི་བྱུང་ནས། ད་ཕན་ལོ་ངོ་ ༣༠ ལྷག་འགྲོ་གི་འདུག ཐོག་མའི་ཆར་ལྟ་སྐོར་གྱི་ངོ་བོའི་ཐོག་ནས་ཕྱིན་པ་རེད། དེ་ནས་སྐུ་ཚབ་ཀྱི་མིང་ཐོག་ནས་ཕྱིན་པ་རེད།
ལྟ་སྐོར་ཚོགས་པ་དང་སྐུ་ཚབ་ཚོགས་པ་གཉིས་ཀ་བོད་ལ་ཡང་འགྲོ་ཐུབ་ཡོད་པ་རེད། བོད་ནང་གི་གནས་སྟངས་མཐོང་ཡོད་པ་རེད། དེ་དུས། རྒྱ་ནག་གཞུང་གིས་ཚུར་ལ་ཆ་རྐྱེན་མང་པོ་བཏོན་པ་རེད། ཚུར་ལ་ཆ་རྐྱེན་བཏོན་པ་ནང་བཞིན་ཕར་ལ་ཡང་ཆ་རྐྱེན་བཏོན་པ་རེད། ཕར་ལ་ཆ་རྐྱེན་བཏོན་པ་ཁ་ཤས་འགྲུབ་པ་རེད། འོན་ཀྱང་། གྲུབ་འབྲས་ཆེན་པོ་བྱུང་ཡོད་མ་རེད། གང་ལྟར། འབྲེལ་མོལ་གྱི་བརྒྱུད་ལམ་དེ་ཆད་པ་རེད། ཆད་ནས་ལོ་བཅུ་གྲངས་ཕྱིན་པ་རེད། དེའི་རྗེས་སུ་འབྲེལ་མོལ་གྱི་ལམ་ཁ་འདི་བསྐྱར་མཐུད་བྱུང་བ་རེད། དེ་ནི་ད་ལྟའི་བཀའ་ཤག་སྐབས་སྔ་མ་དེའི་སྐབས་ལ་རེད། སྐུ་ཚབ་དེ་ཡང་དམིགས་བསལ་སྐུ་ཚབ་ཀྱི་མིང་ཐོག་ནས་ཕྱིན་པ་རེད། འགྲོ་ས་དེ་ཡང་རྒྱ་ནག་ལ་ཕྱིན་པ་རེད། རིམ་པ་དེའི་ནང་ལ། རྒྱ་ནག་གཞུང་གི་ངོས་ནས་ཚུར་ལ་ཆ་རྐྱེན་མང་པོ་བཏོན་པ་རེད། ང་ཚོའི་ངོས་ནས་ཆ་རྐྱེན་མང་པོ་ཁས་ལེན་བྱས་པ་རེད། ཁས་ལེན་བྱས་པས་མ་ཚད་ཡིག་ཆའི་ནང་ལ་ཡང་བཞག་པ་རེད།

འོན་ཀྱང་། ཕར་ལ་ཆ་རྐྱེན་མ་བཏོན་པ་རེད། ང་ཚོའི་ངོས་ཀྱི་བྱེད་སྟངས་དེ་”ཐབས་མཁས་བསྟུན་མཁས”་ཟེར་བའི་ལམ་ཐིག་དེའི་ནང་ ནས་བསྡད་པ་རེད། ཐོག་མའི་འབྲེལ་མོལ་ཐེངས་ལྔ་དྲུག་དེ་ཕན་ཚུན་ལ་གོ་བརྡ་མ་འཕྲོད་ནས་བསྡད་པ་རེད། དེའི་རྗེས་སུ་གོ་བརྡ་འཕྲོད་ཀྱི་ཡོད་པའི་རེ་བ་ཞིག་བཟུང་བ་རེད། རེ་བ་དེ་འཛིན་མཁན་ང་ཚོའི་ཕྱོགས་ནས་རེད། རེ་བ་དེ་དང་མཉམ་དུ། “བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ”་ དེ་རྒྱ་ནག་གཞུང་ལ་སྤྲད་པ་རེད། དེ་སྤྲད་པས་མ་ཚད་དེའི་འགྲེལ་བཤད་རྒྱས་པ་ཞིག་ཀྱང་སྤྲད་པ་རེད། འོན་ཀྱང་། ཐབས་སྐྱོ་བ་ཞིག་ལ། ཡིད་མུག་པ་ཞིག་ལ། རྒྱ་ནག་གཞུང་གིས་བསྐྱར་དུ། “བོད་ཆེན་པོ་དང་ཚད་མཐོའི་རང་སྐྱོང་ཟེར་བ་དེ་ནི་ཀྲུང་གོའི་རྩ་ཁྲིམས་ལས་འགལ་བ་ཡིན་པ། ཤོད་སྟངས་དེ་ཡོངས་སུ་མེད་པར་བཟོས་ན། མཇལ་འཕྲད་གྲོས་མོལ་ལ་གཞི་ནས་གཞི་ཚུགས་ས་ཞིག་ཡོད་པ་རེད་ལ། ཏཱ་ལའི་བླ་མ་སྒེར་ལ་ཡང་གཞི་ནས་མདུན་ལམ་ཡོད་པ་རེད་”ཟེར། ད་བསྐྱར་དུ་བསམ་བློ་ཐོངས། ང་ཚོས་རང་བཙན་ནས་དབུ་མའི་ལམ་ལ་མར་ཕབ་པ་རེད། དབུ་མའི་ལམ་གྱི་དགོངས་གཞི་དེ་ཡང་ཇེ་ཆུང་ལ་བཏང་ནས་བོད་རིགས་ཡོངས་ལ་མིང་དོན་ མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་ཟེར་བ་འདིའི་སྒང་ལ་བཞག་པ་ རེད། ད་ཡིག་ཆ་འདི་ཇེ་ཆུང་ལ་གཏོང་རྒྱུ་ཡོད་དམ། ཡིག་ཆ་ལ་གཅོད་གཏུབས་བྱེད་རྒྱུ་ཡོད་དམ།

བསྐྱར་དུ་བསམ་བློ་ཐོངས། ཕྱི་ལོ་ ༢༠༠༢ ནས་ད་ཕན་ཚུན་གྱི་འབྲེལ་མོལ་གྱི་རིམ་པ་འདིར་བལྟས་ན། ང་ཚོའི་ཕྱོགས་ནས་འགྲེལ་བཤད་ཟེར་བ་འདིའི་སྒང་ལ་ཆུ་ཚོད་མང་པོ་བཏང་འདུག འགྲེལ་བཤད་བརྒྱབས་ནས་རྒྱ་ནག་གཞུང་དང་མཉམ་དུ་ཡིད་ཆེས་ཀྱི་ལམ་ཁ་བསྐྲུན་རྒྱུར་རེ་བ་བརྒྱབ་འདུག ང་ཚོ་ནོར་ས་ཡང་འདི་ན་ནོར་འདུག ང་ཚོ་འཐོམས་ས་ཡང་འདི་ན་འཐོམས་འདུག ད་བསྐྱར་དུ་བསམ་བློ་ཐོངས། རྒྱ་ནག་གཞུང་གིས་བོད་ཀྱི་གནད་དོན་མཁྱེན་གྱི་མེད་པ་རེད་དམ། རྒྱ་ནག་གཞུང་གིས་ང་ཚོའི་དགོས་འདུན་མཐོང་གི་མེད་པ་རེད་དམ། རྒྱ་ནག་གཞུང་གིས་བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་ བསམ་འཆར་ཡིག་ཆ་དེའི་དགོངས་དོན་མ་རྟོགས་པ་རེད་དམ། ངེད་ཀྱིས་བསམ་ན། དེ་འདྲ་མ་རེད། ད་ཕན་རྒྱ་ནག་གཞུང་གི་བོད་ཀྱི་གནད་དོན་སེལ་འདོད་མེད་པ་དེ་ཐུག་ས་གསུམ་རེད། དེ་ནི། བདག་དབང་གི་གནད་དོན་དང་ས་ཁྱོན་གྱི་གནད་དོན། མི་འབོར་གྱི་གནད་དོན་བཅས་རེད།

གནད་དོན་ཕྱི་མ་གཉིས་ལ་རྒྱ་ནག་གཞུང་གི་ངོས་ནས་གདོང་ལེན་བྱེད་རྒྱུའི་བློ་སྤོབས་མེད། གནད་དོན་སྔ་མ་དེ་ལ་གདོང་ལེན་བྱེད་ཐབས་རག་གི་མེད། དེ་ནི་གཞུང་གི་ཆབ་སྲིད་ཀྱི་སྒྲིག་འཛུགས་དང་སྒྲོམ་གཞིའི་གནད་དོན་རེད། གནད་དོན་འདིའི་སྒང་ན་བོད་ཀྱི་གནད་དོན་ཡང་ལྷག་ནས་ཡོད། ད་ནི། ང་ཚོས་བསམ་བློ་གཏོང་དགོས་བའི་དུས་ཚོད་རེད།

བསྐྱར་དུ་བསམ་བློ་གཏོང་དགོས་པའི་དུས་ཚོད་རེད། གྲོས་མོལ་དངོས་ཀྱི་རྨང་གཞི་མེད་ས་ཞིག་གི་སྒང་ལ་མུ་མཐུད་དུ་དུས་ཚོད་གཏོང་མིན་ལ་བསམ་བློ་ཐོངས།

ཡིག་ཆའི་དོན་ཚན་ཁག་ལ་བསྐྱར་དུ་མཆན་འགྲེལ་རྒྱག་མིན་ལ་བསམ་བློ་ཐོངས། ངེད་རང་སྒེར་གྱི་རྨོངས་འཆར་ལ། ད་ནི་ང་ཚོས་འགྱུར་བ་ནས་བསམ་བློ་གཏོང་། འགྱུར་ནས་འགོ་འཛུགས། དེ་ཡང་། ད་ལྟའི་འབྲེལ་མོལ་གྱི་བརྒྱུད་ལམ་ལ་འགྱུར་བ་གཏོང་དགོས། ད་ལྟའི་འབྲེལ་མོལ་གནང་མཁན་གྱི་སྐུ་ཚབ་ལ་འགྱུར་བ་གཏོང་དགོས། འབྲེལ་མོལ་གྱི་མཐུད་རྒྱག་སྟངས་ལ་ཡང་འགྱུར་བ་གཏོང་དགོས། འགྱུར་བ་གཏོང་དགོས་བ་འདི་ལ་ཡང་རྒྱབ་ལྗོངས་རྒྱུ་མཚན་འགའ་མཐོང་། ད་ཡོད་ཀྱི་བརྒྱུད་ལམ་འདི་ལ་བརྟེན་ནས། ཕྱི་ལོ་༢༠༠༢ནས་ད་ལྟ་ཚུན་ལ་གནས་སྟངས་འགྲེལ་བཤད་དང་ཡིག་ཆ་འགྲེལ་བཤད་བྱས་ནས་ བསྡད་འདུག ད་ནི་བརྒྱུད་ལམ་འདིའི་སྒང་ན་འགྲེལ་བཤད་ལྷག་མ་བྱེད་རྒྱུ་ཅང་ལྷག་མེད། ད་ཡོད་ཀྱི་བརྒྱུད་ལམ་འདི་ལ་བརྟེན་ནས་། ང་ཚོའི་གཞུང་གི་ངོས་ནས། “༧གོང་ས་མཆོག་གི་དམིགས་བསལ་སྐུ་ཚབ”་དང་”རྒྱ་ནག་གཞུང་གི་ངོས་ནས་ཏཱ་ལའི་བླ་ མའི་སྐུ་ཚབ་”ཟེར་བ་འདིའི་སྒང་ན་བསྡད་འདུག

འདི་ནས་ཡར་འཕགས་ས་དེ་འགག་ནས་ བསྡད་འདུག ད་ཡོད་ཀྱི་བརྒྱུད་ལམ་འདི་ལ་བརྟེན་ནས། བྱེད་དགོས་བའི་ལས་ཀ་ཕལ་ཆེ་བ་བྱས་ཚར་འདུག དེ་ནི་བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་ ཡིག་ཆ་དེ་རྒྱ་ནག་གཞུང་གི་མདུན་ལ་འཇོག་རྒྱུ་དེ་རེད། དེ་བཞག་པས་མ་ཚད་དེའི་འགྲེལ་བཤད་རྒྱས་པ་དེ་ཡང་སྤྲད་ཚར་ཡོད། བརྒྱུད་ལམ་འདི་ལ་དེ་ལས་ལྷག་པའི་ལས་ཀ་བྱེད་རྒྱུ་ཅང་ལྷག་མེད། བརྒྱུད་ལམ་གཅིག་པོ་མ་ཡིན་པར་དེའི་སྟེང་དུ་བསྐྱོད་མཁན་གྱི་སྐུ་ཚབ་ལ་ཡང་ འགྱུར་བ་ཅིག་གཏོང་དགོས་བར་མཐོང་། དེ་ནི།
སྐུ་ཚབ་ཀྱི་དུས་ཡུན་དང་སྐུ་ཚབ་ ཀྱི་དགུང་ལོའི་བབ་གཉིས་ཀྱི་སྒང་ནས་ཡིན། ད་དུང་། འབྲེལ་མོལ་མཐུད་རྒྱག་སྟངས་ལ་འགྱུར་བ་གཏོང་དགོས་ཟེར་དོན་ནི། ད་ལྟའི་འབྲེལ་མོལ་མཐུད་རྒྱག་སྟངས་ནི་། ཡིག་ཆ་འགའ་མཐུད་རྒྱག་པ་དང་ཡིག་ཆ་དེ་ཚོ་ཡང་གྲོས་མོལ་དངོས་ཀྱི་རྨང་གཞི་མེད་ པའི་ཐོག་ནས་མཐུད་རྒྱག་བཞིན་ཡོད། མཐུད་དེ་ཡང་མཐུད་ཀྱི་སྣེ་མོ་འཇུ་ས་མེད་ས་ཞིག་ལ་རྒྱག་བཞིན་ཡོད། ད་ནི་འགྱུར་བ་ནས་འགོ་འཛུགས་དགོས་ཀྱི་འདུག བསྐྱར་དུ་བསམ་བློ་ཐོངས། འོ་ན། འགྱུར་བ་ཇི་ལྟར་གཏོང་དགོས་སམ། འགྱུར་བ་གཏོང་སའི་ལམ་ཁ་ཡོད་དམ། ཐབས་ལམ་ཡོད་དམ། ངེད་ལ་ཡོད། ྐློག་མཁན་ཁྱེད་ལ་ཡོད་དམ། བསྐྱར་དུ་བསམ་བློ་ཐོངས། ངེད་ཀྱིས་འདི་འདྲ་བསམ།

ཐབས་ལམ་གཅིག་ནི། ད་ལྟའི་བཀའ་ཤག་གི་ངོས་ནས་བོད་རིགས་མི་མང་ཡོངས་ལ་ཁ་བསངས་རྒྱུ་དེ་རེད། བརྒྱུད་ལམ་འདིའི་སྒང་ནས་གྲ་སྒྲིག་པའི་འབྲེལ་མོལ་གྱི་རིམ་པ་དེར་གྲུབ་འབྲས་མ་ བྱུང་བ་དེ་ཁ་བསངས་དགོས། འབྲེལ་མོལ་ལ་གྲུབ་འབྲས་མ་བྱུང་བ་ཁ་བསངས་དགོས། ཁ་བསངས་ནས་མཚམས་འཇོག་དགོས། བོད་རྒྱ་འབྲེལ་མོལ་གྱི་རིམ་པ་འདི་ང་ཚོའི་འཛིན་སྐྱོང་གི་སྐབས་སུ་མཐུད་བརྒྱབ་པ་རེད། འོན་ཀྱང་། བཀའ་ཤག་སྐབས་རྗེས་མ་དེ་ཚོས་ཡོང་མ་སོང་ཟེར་བའི་སྐད་ཆ་དེའི་རིགས་མ་འོངས་བའི་ལོ་རྒྱུས་ཁྲོད་ལྷག་གཞི་ཡོད་པ་བཟོ་མི་ཉན། ལྷག་པར་དུ། རེ་བ་ཡོད་མདོག་དང་གྲུབ་འབྲས་ཡོང་མདོག་གི་རྣམ་འགྱུར་བསྟན་ཏེ་བོད་ནང་གི་བོད་མི་རྣམས་རེ་སྒུག་གི་ཁྲོད་ནས་འཆི་རུ་འཇུག་མི་ཉན། གྲུབ་འབྲས་མ་བྱུང་བ་དེ་ཁ་བསངས་ཐུབ་པ་ཡིན་ན། གང་བྱུང་བ་དང་གང་མ་བྱུང་བ་དེ་ཁ་བསངས་ཐུབ་པ་ཡིན་ན། གསལ་བོ་བཟོ་ཐུབ་པ་ཡིན་ན། མ་འོངས་བའི་བྱེད་ཕྱོགས་གསལ་བོ་བཟོ་ཐུབ་པ་ཡིན་ན། བོད་ནང་གི་བོད་མི་རྣམས་ཀྱང་འགྲོ་བ་མི་རེད། བསམ་བློ་གཏོང་ཐུབ་པའི་འགྲོ་བ་མི་རེད། ཀླད་པ་དཀྲུགས་རྒྱུ་ཡོད་པའི་འགྲོ་བ་མི་རེད། ཁོང་ཚོས་ཀྱང་ཏན་ཏན་བསམ་བློ་གཏོང་གི་རེད། ལས་གཞི་རྩོམ་གི་རེད། ཐབས་ལམ་གཞན་ཞིག་ནི། ད་ལྟའི་བརྒྱུད་ལམ་གྱི་ཡིག་ཆའི་གནད་དོན་དང་འགྲེལ་བཤད་དེ་ཚོ་གནས་སྐབས་རིང་ཕར་ཞོག ང་ཚོའི་གཞུང་གི་ངོས་ནས་རྒྱ་ནག་གཞུང་ལ་ཕར་ཆ་རྐྱེན་འདོན་དགོས། ལོ་ཟླ་དུས་བཀག་གི་སྒོ་ནས་ཆ་རྐྱེན་འདོན་དགོས། བོད་མིའི་ཁོག་པའི་སྙིང་དང་དཔྲལ་བའི་མིག་ལྟ་བུའི་༧གོང་ས་མཆོག་ལ་མཚན་སྨོད་ཞུ་བ་དེའི་རིགས་མཚམས་འཇོག་མ་བྱས་བར་དུ་གྲོས་མོལ་གྱི་ལམ་ཁ་མེད་པའི་ཆ་རྐྱེན་ འདོན་དགོས། ཆ་རྐྱེན་དེ་ཡང་ལོ་ཟླ་དུས་བཀག་བཟོས་ནས་འདོན་དགོས།

བོད་ནང་གི་ཆབ་སྲིད་བཙོན་པ་དག་གློད་གྲོལ་མ་ཐོབ་བར་དུ་གྲོས་མོལ་གྱི་སྒོ་མི་ཕྱེས་བའི་ཆ་རྐྱེན་འདོན་དགོས། ལོ་ཟླ་དུས་བཀག་བཟོས་ནས་ཆ་རྐྱེན་འདོན་དགོས། ལོ་ཟླ་དུས་བཀག་དེའི་ནང་གི་རྒྱ་ནག་གི་རྣམ་འགྱུར་ལ་བལྟ་དགོས། ཆ་རྐྱེན་བཏོན་ནས་བོད་ནང་གི་ཆབ་སྲིད་བཙོན་པ་གཅིག་ཡིན་རུང་གློལ་གྲོད་ཐུབ་པ་བྱེད་དགོས། ཆ་རྐྱེན་བཏོན་ནས་བོད་ནང་གི་བོད་མི་གཅིག་གི་སྲོག་ཡན་ཆད་ནས་སྐྱོབ་ཐུབ་པ་བྱེད་དགོས། ཆ་རྐྱེན་བཏོན་ནས་ལས་ཀ་བྱེད་རྒྱུ་དེ་གནད་འགག་རེད། ད་དུང་གཞན་ཞིག་ནི། ༧གོང་ས་མཆོག་དང་རྒྱ་ནག་མི་མང་གི་དབར་ལ་ལམ་་ཁ་བསྐྲུན་རྒྱུ་དེ་རེད། ༧གོང་ས་མཆོག་དང་རྒྱ་ནག་མི་མང་གི་དབར་ལ་གོ་རྟོགས་བསྐྲུན་སའི་ལམ་ཁ་་བཙལ་རྒྱུ་དེ་རེད། ༧གོང་ས་མཆོག་གི་དགོངས་གཞི་དང་རྒྱ་ནག་མི་མང་གི་དབར་ལ་ཡིད་ཆེས་བསྐྲུན་ཐབས་ ཀྱི་ལམ་ཁ་་བཙལ་དགོས། ང་ཚོས་བཤད་སའི་ཡིད་ཆེས་ཡིད་ཆེས་ཟེར་བ་དེ་ཡང་། འགག་ས་གཅིག་འདི་ན་འགག་འདུག

ད་བསྐྱར་དུ་བསམ་བློ་ཐོངས། བོད་ཀྱི་གནད་དོན་འདིར། བོད་མིའི་གནད་དོན་འདིར། མ་འོངས་བའི་ལོ་ལྔའི་ནང་ལ་འགྱུར་བ་ཞིག་ཡོང་གི་རེད་དམ། ལོ་བཅུའི་ནང་ལ་འགྱུར་བ་ཞིག་ཡོང་གི་རེད་དམ། བསྐྱར་དུ་བསམ་བློ་ཐོངས།