དེ་རིང་རྡ་རམ་ས་ལར་རྟེན་གཞི་བྱས་པའི་བོད་ཀྱི་དུས་བབ་གསར་འགྱུར་ལས་ཁང་དབུ་བརྙེས་ནས་ལོ་ངོ་སུམ་ཅུ་འཁོར་གྱི་ཡོད་པའི་སྐབས་དོན་དང་། དེ་བཞིན་དུ་འགྲེམས་སྟོན། བགྲོ་གླེང་བཅས་གནང་འཆར་ཡོད་པའི་མཛད་སྒོའི་སར་ཚོགས་བཅར་གནང་མཁན་ཚང་མ་ལ་མཛའ་ཞིང་བརྩེ་བའི་འཚམས་འདྲི་དང་འབྲེལ་བའི་ཐོག་ནས་བཀྲ་ཤིས་བདེ་ལེགས་ཡོད་ཅེས་ཞུ་ཡ་ཡིན།
གསར་འགྱུར་བརྒྱུད་ལམ་ཁག་དེ་ང་ཚོའི་དམངས་གཙོའི་སྤྱི་ཚོགས་ནང་ལ་དཔེ་མི་སྲིད་པའི་གལ་ཆེན་པོ་ཆགས་བསྡད་ཡོད་རེད། གང་ཡིན་ཟེར་ན། དམངས་གཙོའི་ཀ་བ་བཞི་བ་དེ་གསར་འགྱུར་བརྒྱུད་ལམ་ཁག་རེད་ཅེས་ཟེར་གྱི་ཡོད་རེད། དེ་འདྲ་ཡིན་དུས། གསར་འགྱུར་ལབ་དུས་རྒྱལ་སྤྱིའི་གསར་འགྱུར་རེད། ཁྱིམ་མཚེས་རྒྱལ་ཁབ་རེད། བོད་ནང་གི་གནས་ཚུལ་རེད། ཚང་མ་དུས་ཐོག་དུས་ཐོག་ལ་དྲང་པོ་དང་། བདེན་པ་དང་། ཕྱོགས་ལྷུང་མེད་པའི་ཐོག་ནས་དྲང་པོ་དྲང་བཞག གནས་ཚུལ་ངོ་མ་ཁག་ཇི་བཞིན་དུས་ཐོག་ལ་སྤེལ་དགོས་པ་ཡ་དེ་དཔེ་མི་སྲིད་པའི་གལ་ཆེན་པོ་རེད། གང་ཡིན་ཟེར་ན། དེ་འདྲ་བྱུང་བ་ཡིན་ན། མི་ཚོས་ལམ་སེང་གནས་ཚུལ་གང་ཡིན་ལམ་སེང་ཤེས་རྟོགས་ཐུབ་པ་ལ་བརྟེན་ནས་ཕན་ཐོགས་ཆེན་པོ་ཡོང་གི་ཡོད་རེད། ང་རང་ཡང་གསར་འགྱུར་ལ་ལྟ་ཡ་དགའ་པོ་ཡོད། ང་བོད་ནས་རྒྱ་གར་ལ་ཡོང་ཐུབ་པ་དེ་ཡང་གསར་འགྱུར་གྱི་ཐོག་ནས་རེད། གཞན་ང་ཚོའི་བོད་དེ་ས་ཁུག་ལུང་དཀྱོག་ནང་ལ་སྡོད་མཁན་རེད། མི་ཚོས་གནས་ཚུལ་ཧ་གོ་ཐུབ་ཡ་ཡོད་མ་རེད། སྐབས་དེར་ང་ཚོར་རླུང་འཕྲིན་(Radio)ཆུང་ཆུང་ཞིག་ཡོད། རྒྱ་གར་སྐད་དང་། དབྱིན་ཇི། རྒྱ་སྐད་ཟེར་བ་དེ་འདྲ་ཤེས་ཀྱི་ཡོད་མ་རེད། རྒྱ་གར་གྱི་ All India Radio ཡི་བོད་སྐད་སྡེ་ཚན་གྱི་གསར་འགྱུར་དེ་ཉིན་རྟག་པར་ཉན་གྱི་ཡོད། དེའི་ཐོག་ནས་ལྷ་སར་ཟིང་འཁྲུག་བྱུང་བ་དང་། ༧ གོང་ས་སྐྱབས་མགོན་ཆེན་པོ་མཆོག་ལྷ་ས་ནས་ཆིབས་བསྒྱུར་ཟིན་པའི་གནས་ཚུལ་ཐོས་པར་བརྟེན་ནས། རྒྱ་གར་ལ་ཡོང་ཐུབ་པ་རེད།
སྟབས་ལེགས་པ་ཞིག་ལ། ང་ཚོའི་སྡོད་ས་ནས་རྒྱ་གར་གྱི་ས་མཚམས་ཐག་ཉེ་པོ་ཞེ་དྲག་རེད། ཏན་ཏན་ཧ་གོ་གི་ཡོད་མ་རེད། ཧ་ལམ་ཀི་ལོ་མི་ཊར་དྲུག་ཅུ་ཙམ་མེད་འགྲོ་བསམ་བསམ་ཞིག་རེད། ཡིན་ནའང་། འཁོར་ལོའི་ལམ་ཁ་མེད་ཙང་རྟ་བཞོན་ནས་ཡོང་དུས་ཉི་མ་གསུམ་འགོར་གྱི་ཡོད་རེད། དེ་འདྲ་བྱས་ནས་རྒྱ་གར་ལ་སླེབས་ཐུབ་པ་བྱུང་བ་རེད། བྱས་ཙང་དེ་འདྲ་ཡིན་དུས། གསར་འགྱུར་དྲང་པོ་དང་། བདེན་པ་དང་། ཕྱོགས་ལྷུང་མེད་པའི་ཐོག་ནས་དུས་ཐོག་ལ་བཏོན་དགོས་ཡ་དེ་དཔེ་མི་སྲིད་པའི་གལ་ཆེན་པོ་རེད། དེ་འདྲ་མ་ཡིན་པར།ཡང་གཅིག་དྲང་པོ་མིན་པ་དང་། གནས་ཚུལ་ངོ་མ་མིན་པ་དང་། ཕྱོགས་ལྷུང་སུ་གྱུར་བ་དེ་འདྲའི་གནས་ཚུལ་ཁྱབ་སྤེལ་བྱུང་བ་ཡིན་ན། ཕན་ལས་གནོད་ཆེ་བ་ཞིག་ཡིན་པ་རེད།
བྱས་ཙང་དེ་འདྲ་ཡིན་དུས། ད་ལན་ཕ་གིར་ཚོགས་འདུའི་གསར་འགྱུར་བརྒྱུད་ལམ་དེ་འདྲ་ཚགས་ཚུད་པོ་དང་།ཕན་ཐོགས་ཡོད་པ། རྒྱུ་མཚན་ཡོད་པ། དེ་འདྲ་ཞིག་བྱུང་བ་ཡིན་ན། དཔེ་མི་སྲིད་པའི་དགེ་མཚན་ཆེན་པོ་ཡོང་གི་རེད།
མཐའ་དོན་སྨོན་ཚིག་ཞུ་རྒྱུར། ༧སྤྱི་ནོར་གོང་ས་སྐྱབས་མགོན་རྒྱལ་བའི་དབང་པོ་མཆོག་སྐུ་ཚེ་ཞབས་པད་རྒྱལ་བ་ཚེ་མཐའ་ཡི་ངོ་བོར་བརྟན་པ་དང་། ཐུགས་ཀྱི་བཞེད་དོན་མཐའ་དག་གེགས་མེད་ལྷུན་གྱིས་གྲུབ་པ་དང་། དེ་ག་ནང་བཞིན་གསར་འགྱུར་ལས་ཁང་ཡང་གང་ཅིའི་ལས་དོན་ཡར་རྒྱས་ཕུན་སུམ་ཚོགས་པ་ཡོང་བའི་སྨོན་འདུན་ཞུ་གི་ཡོད།
