ནོ་སྦེལ་རྟགས་མ་འབུལ་རོགས།

རྒྱ་ནག་གི་འགྲོ་བ་མིའི་ཐོབ་ཐང་ལས་འགུལ་བ་ཁྲིན་ཀུང་ཁྲིན་དང་།  ཀོ་ཀྲུ་ཁྲིན། ལིག་ཞོའོ་པའོ་གསུམ་ནོ་སྦེལ་ཞི་བདེ་གཟེངས་རྟགས་ཀྱི་འོས་འདེམས་མི་སྣའི་གྲས་སུ་འོས་འདོན་བྱས་ཡོད་པ་རེད།

ཕྱི་ཚེས་ ༣ ཉིན་ཨ་རིའི་གྲོས་ཚོགས་ཀྱི་འཐུས་མི་བདུན་གྱིས་མཉམ་འབྲེལ་གྱི་མཚན་ཐོག་ནས་ནོ་སྦེལ་ཞིའི་བདེ་གཟེངས་རྟགས་ལྷན་ཚོགས་ཀྱི་ཚོགས་གཙོ་ལ་ཡི་གེ་ཕུལ་ཏེ། རྒྱ་ནག་གི་འགྲོ་བ་མིའི་ཐོབ་ཐང་ལས་འགུལ་བ་ཁྲིན་ཀུང་ཁྲིན་དང་།  ཀོ་ཀྲུ་ཁྲིན། ལིག་ཞོའོ་པའོ་གསུམ་ནོ་སྦེལ་ཞི་བདེ་གཟེངས་རྟགས་ཀྱི་འོས་འདེམས་མི་སྣའི་གྲས་སུ་འོས་འདོན་བྱས་ཡོད་པ་རེད། ཁོང་ཚོས་ཕུལ་བའི་སྙན་ཞུའི་ནང་དུ་འགྲོ་བ་མིའི་ཐོབ་ཐང་དོན་གཉེར་ལས་འགུལ་བ་དེ་གསུམ་གྱིས་རྒྱ་གཞུང་གི་འགྲོ་བ་མིའི་ཐོབ་ཐང་ཡར་རྒྱས་ཡོང་བར་ནུས་བ་གལ་ཆེན་བཏོན་ཡོད་པ་གསལ་འདོན་བྱས་ཡོད།

ཨ་རིའི་རྒྱ་ནག་རོགས་སྐྱོར་ཚོགས་པའི་ཚོགས་གཙོ་བྷོབ་ཧྥུ་ Bob Fu ལགས་ཀྱིས་བརྗོད་དོན། དུས་ཡུན་རིང་པོའི་ནང་། ཨ་རིའི་གྲོས་ཚོགས་ཀྱི་ཚོགས་མི་བདུན་པོ་འདིས་ཐོག་མཐའ་བར་གསུམ་དུ་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཐུགས་ཁུར་གནང་བཞིན་ཡོད། ང་ཚོ་རྒྱ་ནག་རོགས་ཚོགས་ཀྱི་ངོས་ནས་ཀྱང་དམངས་གཙོ་དོན་གཉེར་ལས་འགུལ་བ་དེ་གསུམ་ནོ་སྦེལ་ཞི་བདེའི་གཟེངས་འོས་མིའི་ཁྲོད་འོས་འདེམས་ཡོང་བར་ནུས་ཤུགས་གང་ཡོད་འདོན་རྒྱུ་ཡིན་ལ།  ང་རང་སྒེར་ངོས་ནས་གྲོས་ཚོགས་ཀྱི་འཐུས་མི་དང་ཨ་རིའི་རྒྱལ་སྲིད་སྤྱི་ཁྱབ་ཁང་གི་དཔོན་རིགས་དག་ལ་མཇལ་འཕྲད་ཀྱིས་དམངས་གཙོ་དོན་གཉེར་བ་དེ་དག་གི་གནས་སྟངས་ལ་ཐུགས་བཞེས་ཡོང་བའི་སྙན་ཞུ་འབུལ་བཞིན་ཡོད་ལ། ཕྱི་ཟླ་ ༢ པའི་ཚེས་ ༤ ཉིན་ཏེ། ཀོ་ཀྲི་ཁྲིན་རྒྱ་ནག་གིས་འཛིན་བཟུང་གིས་གར་སོང་ཆ་མེད་དུ་གྱུར་དེ་མི་ལོ་ཧྲིལ་བོ་གཅིག་འཁོར་བར་མྱ་ངན་རྗེས་དྲན་ཞུ་ཆེད།  རྒྱལ་སྤྱིའི་སྒང་ཤུགས་རྐྱེན་ལྡན་པའི་གནས་འཕྲིན་དྲ་བ་ drudgereport.com སྟེང་ཁོང་གི་གནས་ཚུལ་གསལ་རྟོགས་ཡོང་བར་མི་དམངས་ལ་རེ་སྐུལ་དང་།  དེ་བཞིན། ཨ་རིའི་ཁྲིམས་རྩོད་པའི་སྡེ་ཁག་གིས་མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁེ་མོན་ལགས་སུ་རྒྱ་ནག་གི་འགྲོ་བ་མིའི་ཐོབ་ཐང་ཐད་ལྟ་རྟོག་དང་། འགྲོ་བ་མིའི་ཐོབ་ཐང་དོན་གཉེར་ལས་འགུལ་བ་ཁོང་གསུམ་ལ་ནོ་སྦེལ་ཞི་བདེའི་གཟེངས་རྟགས་ཐོབ་རྒྱུར་རྒྱབ་སྐྱོར་ཡོང་བའི་རེ་སྐུལ་ཞུ་བཞིན་ཡོད་ཅེས་བརྗོད་འདུག

གཞན་ཡང་། མའོ་ཙེ་ཏུང་གི་དྲུང་ཡིག་ཟུར་བ་ལིས་ཐའོ་དང་། རྒྱ་གཞུང་གསར་འགྱུར་པར་སྐྲུན་ཁང་གི་མགོ་གཙོ་ཟུར་བ་ཏའོ་ཀྲིན། རྒྱ་ནག་ཁྲིམས་སྲིད་སློབ་གྲྭ་ཆེན་མོའི་སློབ་སྤྱི་ཅང་ཕེན། རྒྱ་ནག་དམར་ཤོག་སློབ་གྲྭའི་དགེ་རྒན་ཆེན་མོ་ཏུའུ་ཀུང་སོགས་དམར་ཤོག་མཐོ་རིམ་དཔོན་རིགས་ཟུར་བ་ ༢༠ ལྷག་གིས་ཀྱང་རྒྱ་ནག་དབུས་གཞུང་ལ་ཡི་གེ་ཕུལ་ཏེ་ལིག་ཞའོ་པའོ་ལ་ཁྲིམས་ཐག་བཅད་པར་ཡི་མ་རང་བའི་རྣམ་འགྱུར་བསྟན་ཡོད་པ་རེད།