ངས་བན་སྡེ་འཚོ་ལ་དྲང་མོ་བཤད་འདོད་འདུག་ཞེས་རང་གི་ཕ་རྒན་འཇིགས་གྲོལ་ལ་བཤད་དུས། ཕ་རྒན་གྱིས་དྲང་མོ་བཤད་ཉན་ནི་མ་རེད། ཁྱེད་རང་གིས་དྲང་མོ་བཤད་པ་ཡིན་ན། ཁྱེད་རང་ལ་རྙོག་དྲ་བཤད་ཁོ་ཐག་ཡིན་ནི་རེད། དེ་ལས་ཀྱང་གསང་བ་བྱོས་དེ་སོང་ན་ཡག་གི་རེད་ཅེས་བློ་བཟང་ལ་ཁ་བརྡ་མི་ཉུང་བ་ཞིག་བྱས།
བློ་བཟང་གིས་རྐང་འཁོར་ཞོན་ནས་གྲོང་ཁྱེར་ཕྱོགས་སུ་ལམ་དུ་ཆས། ལོ་མང་རིང་དུ་མ་འཕྲད་པའི་གྲོགས་པོ་གྲྭ་བ་ཞིག་ལ་ཐུག་འཕྲད་བྱེད་དུ་སོང་དུས། གྲོགས་པོ་གྲྭ་བ་དེ་ཡང་ཟླ་ངོ་ཁ་ཤས་རིང་དུ་ས་གནས་གཞན་ཞིག་ལ་སྐུ་གཉེར་དུ་སོང་ནས་ཕྱིར་འབྱོར་མ་ཐག་ཡིན་པ་དང་། ཕྱིར་ཉིན་ཡང་ཕྱིར་འགྲོ་དགོས་པ་དང་འཕྲད་ཀྱང་། ཁོང་གཉིས་ཀྱིས་ཕན་ཚུན་མ་འཕྲད་པར་མི་ལོ་མང་བོ་ཞིག་འགོར་བའི་རིང་གི་སྐད་ཆ་དག་བཤད་ཁོམ་མེད་ཀྱང་། བློ་བཟང་གིས་རང་ཉིད་ཉིན་ཁ་ཤས་ཀྱི་རྗེས་སུ་ཕྱིར་རྒྱ་གར་དུ་འགྲོ་མཁན་ཡིན་པའི་སྐོར་ཁོ་རང་ལ་ཞིབ་དུ་བཤད།
གྲྭ་བ་དེ་ནི་ཁོ་རང་ཆུང་དུས་ནས་སློབ་གྲྭ་འགྲོ་རོགས་དང་། རྗེས་སུ་གྲྭ་ས་ནས་དགེ་རྒན་གཅིག་གི་དགེ་ཕྲུག དེ་ནས་ཁོ་རང་རྒྱ་གར་དུ་ཐེངས་ངོ་མ་འགྲོ་དུས་ཀྱང་ཁོ་རང་གིས་བློ་བཟང་ལ་རོགས་མི་ཉུང་བ་ཞིག་བྱས་པ་ལ་བརྟེན་ནས་བློ་བཟང་རྒྱ་གར་ལ་ཐར་བ་རེད། ད་རེབས་ཀྱང་ཁོས་བློ་བཟང་གི་སྐད་ཆ་དེ་གོ་མ་ཐག རུམ་ནང་དུ་ལག་གཉོབ་ཅིག་བྱས་ནས་སྒོར་ཁུགས་ཕྱི་རུ་བཏོན་ནས། ནང་དུ་རྒྱ་སྒོར་བདུན་བརྒྱ་མ་ཟིན་ཙམ་ཞིག་ཡོད་པ་དེ་ཕྱིར་བཏོན་ནས། འདི་ཁྱེར་ར་སོང་། ལམ་བར་དུ་ཟ་མ་རེ་ཟ་བྱེད་བྱོས། སྤྱིར་ཡིན་ན་ད་རེབས་འུ་གཉིས་ལྷོད་ལྷོད་ཅིག་བྱས་དེ་ཟ་མ་ཞིམ་པོ་ཞིག་ཟོས་ནས་ཕན་ཚུན་ལ་ཁ་བརྡ་རེ་བྱེད་དགོས་ངེས་ཡིན་ན་ཡང་། འུ་གཉིས་ལ་དུས་ཚོད་ཀྱི་སྟབས་ཁ་མ་འགྲིག་པ་རེད།
བློ་བཟང་གིས། མིན་མིན། སྒོར་མོ་མི་དགོས། ཐེངས་སྔོན་མ་ཡང་ཁྱེད་རང་ལ་དཀའ་ལས་མི་ཉུང་བ་ཞིག་གཏད་པ་རེད། དངོས་ནས་མིན་ཟེར་ནས་བཤད་དུས། བློ་བཟང་གི་གྲོགས་པོ་གྲྭ་བ་སྤྱིན་པ་ལགས་ཀྱིས་ད་ དེ་འདྲ་བཤད་ཀི་མ་འདུག ང་འདུག་མཁན་རེད། ཟ་རྒྱུ་འཐུང་རྒྱུ་ཚང་མ་ནང་དུ་ཡོད་ཀི ཁྱེད་རང་འགྲོ་མཁན་རེད། ང་ལ་སང་ཉིན་ནངས་ཉིན་ཡང་སྒོར་མོ་ཡོང་རྒྱུ་འདྲ་ཡོད་པ་རེད། ཟླ་བ་ཁ་ཤས་ཀྱི་འཕོག་གསོག་ནས་བཞག་ཡོད་པ་རེད། དངོས་ནས་བཤད་ན་ལམ་འཇུག་དགའ་ཞིག་བྱེད་དགོས་པ་རེད་དེ་བྱུང་མ་སོང་ཟེར་ནས་བློ་བཟང་གི་ལག་པར་བཞག
སྐབས་དེར་བློ་བཟང་གིས་རང་གི་གྲོགས་པོ་རྙིང་བ་གྲྭ་སྤྱིན་པ་ལགས་ཀྱིས་སྤྲད་པའི་རྒྱ་སྒོར་བདུན་བརྒྱ་མ་ཟིན་ཙམ་དེ་ལེན་ཞོར་དུ། དེས་ན་བཀའ་དྲིན་ཆེ། མ་ཤི་ན་ཐུག་ཡོང་ཟེར་བཞིན་ཁོ་གཉིས་སྒོ་ལ་མཉམ་དུ་བུད།
བློ་བཟང་གིས་བསམ་པར་བན་སྡེ་འཚོ་ལ་ཁ་པར་ཞིག་མ་བརྒྱབ་ན་འགྲིག་གི་མི་འདུག་སྙམ་ཞོར། ཁ་པར་ཨང་གྲངས་དེ་ལྟར་དུ་ཁ་པར་ཞིག་བརྒྱབ་དུས་སུ། ཁ་པར་ལེན་མཁན་གྱི་མི་དེས། ད་ལྟ་མོ་རང་མི་འདུག རྗེས་སུ་མོ་རང་ཚུར་སླེབས་ན་ངས་བཤད་ཆོག ཁྱེད་རང་གི་མིང་ལ་ཅི་ཟེར་ང་ལ་ཤོད་དང་།
བློ་བཟང་ལ་ཐབས་ཤེས་མེད་པར་རྐང་འཁོར་ཞོན་ནས་རང་གི་གྲོགས་པོ་རྩོམ་པ་པོ་དེ་ཡི་ཟ་ཁང་ཆུང་ཆུང་ཞིག་གཉེར་ཡོད་པ་དེ་རུ་སོང་ནས་ཁོ་རང་དང་ལྷན་དུ་སྤྱིར་བཏང་གི་ཁ་བརྡ་འདྲ་བྱས་དེ་བསྡད་ཡོད་པའི་སྐབས་སུ། ནང་དུ་གྲྭ་བ་ཁ་ཤས་ཤིག་ཟ་མ་ཟ་རུ་སླེབས་པ་དེ་ཡི་ཁྲོད་ཀྱི་གྲྭ་བ་ཞིག་གིས། བློ་བཟང་ལ་བལྟས་ནས། ངས་ཁྱེད་རང་སྔོན་ཆད་ཅིག་ནས་རིག་མྱོང་འདུག་ཞེས་བཤད་དུས། བློ་བཟང་དགོད་ཞོར་དུ་རིག་ལོས་མྱོང་། ང་རང་ཡང་སྔོན་ཆད་དགོན་པ་འདིས་གྲྭ་བ་ཡིན་ཞེས་ལན་བཏབ། སྐབས་དེར། གྲྭ་བ་དེ་དགོད་ཀྱིན་དགོད་ཀྱིན། ཨ་དེ་ཡིན་དུས། དགོན་པ་གཅིག་གི་གྲྭ་བ་རེད་མོ་་་
གྲྭ་བ་དེ་ཚོ་ནི་དངོས་ནས་རྩེད་དགའ་ཅན་ཤ་སྟག་ཡིན་པ་མ་ཟད། བློ་བཟང་དང་ཁོས་གྲོགས་པོ་གཉིས་ལ་ཁ་བརྡ་དམིགས་བསལ་འདྲ་བྱེད་དབང་ཡང་གཏན་ནས་མ་སྤྲད་པར་རྩེད་མོ་འདྲ་གླེང་དེ་ཅུང་ཙམ་མི་བསྡོད་ཐབས་མེད་བྱུང་བ་རེད། བློ་བཟང་གིས་ད་བདེ་མོ་བྱོས། ངས་གོང་དུ་བཤད་པ་དེ་ཡིན། ང་རང་གཅིག་བྱས་ན་ཟླ་བ་གཅིག་འགོར་འགྲོ་ན་ཐང་། གཅིག་བྱས་ན་ལོ་གཅིག་འགོར་འགྲོ་ན་ཐང་། དེ་ཡི་ནང་དུ་ཕྱིར་ཐོན་ན། དེ་ནས་ངེད་གཉིས་ཀྱིས་བལྟས་ཆོག འབྲོག་ས་ནས་ཚོང་ལམ་འགྲོ་འདྲ་བྱུང་སོང་ན། ངས་ཁྱེད་རང་ལ་ཁ་པར་གཏོང་་ཞེས་རང་ཉིད་ཕྱིར་ལམ་དུ་ཆས་པའི་ཡུལ་དངོས་དེ་གྲོགས་པོ་དེར་གཏན་ནས་མ་བཤད་པ་རེད།
བློ་བཟང་རང་ཉིད་སྔོན་ཆད་གྲྭ་བ་བྱེད་སའི་རང་གི་ཞང་བོ་གྲྭ་བ་དེ་ཡི་སར་སོང་ནས་རང་གི་གནས་ཚུལ་དག་ཞིབ་དུ་བཤད་དུས། ཞང་བོས། སྔོན་མ་ཁྱེད་རང་ཕྱིར་ཡོང་གི་རེད་ཟེར་ནས་གོ་མ་ཐག ངས་མ་ཡོང་ན་བསམ་སོང་། རེད་དེ། ཁྱེད་རང་ཕྱིར་སླེབས་པ་རེད། ད་ཡང་ས་ཐག་རིང་དེ་འདྲ་ཞིག་ལ་ཕྱིར་འགྲོ་རྒྱུ་ཡིན་ཟེར་ན་དཀའ་ཁག་མང་བོ་ཡོད་ངེས་རེད། འདི་ན་རྒྱ་སྒོར་གཅིག་སྟོང་ཞིག་ཡོད། འདི་ཁྱེད་རང་གི་ལམ་ཁ་ནས་ཟ་མ་རེ་ཟ་བྱེད་ཅིག་བྱོས། དེ་མིན་ངས་ཀྱང་རོགས་པ་འདྲ་བྱེད་ཐུབ་ཀྱི་མི་འདུག ད་ལོ་ངས་སླར་ཡང་དགོན་པ་ལ་མང་ཇ་ཞིག་བསྐོལ་རྒྱུའི་ཉིན་མ་བླངས་ཚར་བ་ཡིན། དེ་ཡིན་དུས་ང་རང་ལ་ཡང་འགྲོ་སོང་ཆེན་པོ་ཡོད་ཅེས་བློ་བཟང་ལ་རྒྱ་སྒོར་གཅིག་སྟོང་སྤྲད།
དངོས་ནས་མི་ལམ་འགྲོ་ཅན་ལ་རེ་བ་ཡོད་ཟེར་བ་ལྟར། བློ་བཟང་ལ་ཉིན་མ་དེ་གཅིག་པོར་རྒྱ་སྒོར་གཅིག་སྟོང་ལྷག་ཞིག་རེག་པ་དང་། ཕྱིར་རང་གི་སྡེ་བའི་ཕྱོགས་སུ་འགྲོ་བའི་ལམ་ཕྲན་བརྒྱུད་དེ་འགྲོ་བའི་ལམ་བར་དུ། ཟླ་ངོ་གཅིག་ཏག་ཏག་གི་ཡར་སྔོན་གྱི་གནས་ཚུལ་དག་མིག་ལམ་དུ་ཤར་དུས་སུ། སེམས་པ་དངོས་ནས་སྐྱོ་བཞིན། སྐད་ངག་མེད་ཀྱང་རྐང་འཁོར་སྟེང་ནས་སྣུམ་ནག་གི་གཞུང་ལམ་དུ་བསྐྱོད་ཞོར་དུ།
སེམས་པ་དགའ་སའི་བུ་མོ།། ཐག་རིང་ཕྱི་ན་ལུས་ཡོད།། མཛའ་བརྩེ་ཟབ་པའི་རོགས་ལོ།། མི་འདོད་བཞག་ནས་འགྲོ་དགོས།། ལས་ངན་བུ་ཆུང་ང་ལ།། སུ་ཡིས་བཀའ་ཆད་འཕོག་རེད།།
མུ་འགོད།
སྤུན་ཟླ་ཚོ་ཁྱེད་ཅག་དུས་རྒྱུན་དུ་ཕེབས་པ་དགའ་ནས་ཡོད། ནམ་རྒྱུན་དུ་བལྟས་དེ་འདུག ཡོང་གི་འདུག འུ་ཅག་ཚང་མའི་བློ་བཟང་གི་མ་འོངས་པའི་སྐོར་ལ་ག་ལེར་བལྟ་ཡ་་ མཉན་གཅིག་དུ། བློ་བཟང་འདིས་སེམས་ཁོང་གི་དཀའ་ངལ་དག་ཡང་ག་ལེར་ཞིབ་འབྲི་བྱེད་ཨེ་ཐུབ་ཅིག་ལྟ་ངེས་ཡིན། དེ་དག་གི་ཁྲོད་དུ་མ་འགྲིག་པ་དང་མ་འོས་སོགས་གང་ཞིག་ཡོད་ན་ནི། དེ་ནི་བློ་བཟང་གི་ནོར་འཁྲུལ་མིན་པར། ང་རང་གིས་འབྲི་རྩལ་གྱིས་མ་འདང་བ་ཡིན་དུས། ལེ་བདའ་ཡོད་ན་ང་ལ་བྱེད་རོགས་གནོང་།
གཡག་རང་ཡིན་སྐུ་ཚབ་གཡུག་ཞོག
བན་སྡེ་མཚོ་མངལ་སྦྲུམ་པ་བདེན་ན་དེའི་ཕྱོགས་ལ་ཆི་ཟིག་བྱེད།
བསམ་བློ་རེ་ཐོང་ར
ཀློག་རྒྱུ་སྐྱིད་པོ་འདུག་་་་་་་་་་་ཐུགས་རྗེ་ཆེ
ཡག་པོ་བྲིས་བཀླགས་ཟིན།
ཨ་ཁུ་ ཁྱེད་འདི་རིང་དྲགས་སོང་ཟིག་
ང་འདྲ་སྒོར་མོ་མེད་ནི་ཚོ་སྡུག་ལ་སྤྱར་ནི་རེད་ལ
འཛིན་གྲྭ་ལ་འགྲོ་དགོས་དུས་ཚོད་མི་རག་གི
ཐུང་ཐུང་སྙན་པོ་ཞིག་བྲིས་ན་མི་བཟང་ངམ།
ཨ་རོ
སྐུ་ཚབ་ཀྱིས་གང་ཡང་འཇོན་མེད་གཱ
ད་དེའི་སྐོར་ལ་ཡང་བསམ་བློ་རེ་གཏོང་རན་མ་རེད་དམ་