རི་ཁྲོད་གོང་དུ་འབྱོར་ནས་བློ་བཟང་དང་། ནུ་བོ་ཀླུ་འབུམ་རྒྱལ་གཉིས་ཀྱིས་ཁོ་མོ་གཉིས་ལ་རི་ཁྲོད་པ་ཡོད་སའི་རི་འདབས་དེ་ནས་སྤང་ཐང་ཡངས་ས་ཞིག་ནས་ཅུང་ཙམ་སྒུག་དུས་སུ། བན་སྡེ་འཚོས་ངོ་གདོང་ཡོངས་སུ་འཛུམ་མདངས་ཀྱིས་འཁང་བཞིན་སླེབས་པ་དེས་བློ་བཟང་ལ་གཏམ་བཟང་ཞིག་བཤད་འདོད་ཀྱི་འདུན་པ་ལྷུག་པོ་ཞིག་ཡོད་པའི་ཚུགས་ཀ་བསྟན་དུས་སུ། བློ་བཟང་གིས་ནུ་བོ་ལྷ་འབུམ་རྒྱལ་ལ། ཁྱེད་རང་གིས་སྔོན་ལ་ཁོ་མོ་བསྐྱེལ་ནས་ངེད་གཉིས་ཕྱིར་ལེན་དུ་ཤོག ངེད་གཉིས་ག་ལེར་རྐང་འཐུང་ལ་ཐོན་ཚད་ཅིག་བར་དུ་ཡོང་ཞེས་བཤད།
བན་སྡེ་འཚོ་བློ་བཟང་གི་མཆན་ཁོང་དུ་འཇར་ནས། བློ་བཟང་དེ་རིང་རི་ཁྲོད་པ་ཚང་གིས་ཕྱག་མོ་དངོས་ནས་ཡག་པོ་འདུག་གསུངས་སོང་། ཁོང་ཚང་གིས་གསུངས་པ་ཡིན་ན། ཁྱེད་རང་གིས་ཨ་རག་མ་འཐུང་བ་ཡིན་ན་འུ་གཉིས་ཀྱི་མི་ཚེ་ནང་ལ་བདེ་སྐྱིད་འདུག་ཞེས་གསུངས་སོང་། ངས་རེ་བ་ལ་ཁྱེད་རང་གིས་ཨ་རག་མ་འཐུང་བ་ཡིན་ན་བསམ་གྱི་ཡོད། འོན་ཀྱང་། ངས་མ་བཤད་ཀྱང་ཁྱེད་རང་གིས་ཤེས་གསལ་རེད། ངས་ཁྱེད་རང་ལ་མ་འཐུང་ཟེར་ནས་ཨུ་ཚུགས་གཏན་ནས་བྱེད་འདོད་མེད། དུ་བ་འཐེན་ན་སྐྱོན་མི་འདུག་ཞེས་བཤད།
བློ་བཟང་གིས་དངོས་ནས་རི་ཁྲོད་པ་ཚང་གིས་ཁྱེད་རང་ལ་ཕྱག་མོ་ཡག་པོ་འདུག་ཟེར་གྱི་འདུག་ན་དེ་ནི་དངོས་ནས་བཟང་གི དེ་སྔོན་ངས་ཁྱེད་རང་རི་ཁྲོད་པ་ཚང་ནས་ཕྱི་ལ་ཐོན་སྐབས་དེར་ངས་ཁྱེད་རང་ལ་གཏམ་བཟང་ཞིག་ཡོད་པ་ཤེས་སོང་། ངས་ཀྱང་ཨ་རག་མི་རིང་བར་མི་འཐུང་བསམ་ནས་བསྡད་ཡོད། ལྷག་པར་དུ་ང་རང་སློབ་གྲྭ་དེར་འགྲོ་ཐུབ་སོང་བ་ཡིན་ན་ཐ་མག་ཡང་འཐེན་རྩིས་མེད་ཅེས་སྙིང་གཏམ་དག་བཤད་ཀྱིན་བཤད་ཀྱིན་འགྲོ་བཞིན་པའི་སྐབས་སུ། ཁོ་རང་གི་ནུ་བོ་ལྷ་འབུམ་རྒྱལ་ཕྱིར་འབྱོར་དུས། ཁོ་གཉིས་ཀྱིས་ཁ་གཅིག་གྲགས་ཀྱིས་ཁྱེད་རང་དངོས་ནས་མགྱོགས་པོ་འདུག་ཞེས་བཤད་དུས། ནུ་བོ་ཀླུ་འབུམ་རྒྱལ་གྱིས་དགོད་ཞོར་དུ། ང་རང་འཕུར་ནས་ཡོང་བ་ཡིན་ཞེས་བཤད།
བློ་བཟང་གིས་ཁྱེད་གཉིས་ཕྱི་དྲོ་ས་མ་རུབ་བར་དུ་རྫོང་ཐོག་འདི་ནས་བསྡོད་དང་། དེ་ནས་ང་ཚོས་དུས་ཆད་བྱས་པའི་ས་འདི་ནས་ཐུག ངེད་གཉིས་སྤག་སྤག་ཞོན་ནས་ཁྱེད་གཉིས་ལེན་དུ་འོང་ཟེར་བཞིན་བན་སྡེ་འཚོ་དང་། བན་སྡེ་འཚོའི་ཨ་ཅེ་ཆོས་སྒྲོན་གཉིས་རྫོང་ཐོག་ནས་སྐྱུར་ནས་ཁོ་གཉིས་ཕྱིར་དབྱར་སྐྱིད་གཏོང་སའི་རྩྭ་ཐང་གི་གླིང་ཕྲན་དེར་ཕྱིན། ལམ་བར་དུ་ནུ་བོ་ཀླུ་འབུམ་གྱིས་བློ་བཟང་ལ། ཕུ་བོ། དངོས་ནས་ཁྱེད་རང་གི་བུད་མེད་དེ་ཡག་མ་རེད་འདུག་པ་མ་ཟད། ཁྱིམ་ཚང་ཡང་དགའ་ཞིག་གི་ཡིན་ས་རེད། རྣ་ལུང་། སྐེ་འདོག མཛུབ་དཀྲིས་བཅས་ཚང་མ་གསེར་གྱི་གཡོགས་འདུག་ཞེས་བཤད།
བློ་བཟང་གིས། རེད་རེད། བན་སྡེ་འཚོ་མོ་རང་གི་ཁྱིམ་ཚང་དེ་ཡི་ནང་གི་གཅེས་ཕྲུག་མ་ཡིན་རབས་འདུག གང་ལྟར། ཁྱིམ་ཚང་གང་འདྲ་ཞིག་ཡིན་མིན་དེ་ནི་ང་རང་ལ་མཚོན་ན་དངོས་ནས་གལ་ཆེན་པོ་མ་རེད་ལ། གསེར་གྱི་འདོག་ཆའི་རིགས་ལ་ང་རང་གཏན་ནས་དགའ་བོ་མེད། འོན་ཀྱང་། མོ་རང་དངོས་ནས་བུད་མེད་ཡག་མ་ཞིག་རེད། དེ་བདེན་པ་རེད།
ཁོ་གཉིས་དབྱར་སྐྱིད་གཏོང་སའི་རྩྭ་ཐང་གི་གླིང་ཕྲན་དེ་ནས་ནུབ་མོ་དེར། ཨ་མྱེ་ཁྱེད་རང་ནང་དུ་འགྲོ་འདོད་མེད་པ་ཡིན་ན། ངེད་གཉིས་ཀྱིས་དོ་ནུབ་ཡར་ནང་མར་ནང་གཉིས་ཀྱི་ཁང་བ་སྲུང་ཆོག་གི་རེད་ཅེས་ཨ་མྱེ་བདེ་ཆེན་ལ་བཤད་ཀྱང་། ཨ་མྱེ་བདེ་ཆེན་གྱིས་མི་སྐྱོན། ང་རང་ནང་དུ་སོང་ནས་ཉལ་ན་ཉལ་ས་བདེ་བོ་འདུག་ཟེར་ནས་ཁོ་གཉིས་དང་ལྷན་དུ་ལམ་དུ་ཆས། ཁོ་གཉིས་ཀྱིས་ཨ་མྱེ་བདེ་ཆེན་ལྷན་དུ་མ་ཡོང་བ་ཡིན་ན། ཁང་བ་ཡར་ནང་ནས་ཕ་རྒན་འཇིགས་གྲོལ་གྱིས་སྤག་སྤག་བཏང་ནས་ཁོ་གཉིས་ཀ་རྫོང་ཐོག་དུ་བན་སྡེ་འཚོ་དང་ཆོས་སྒྲོན་གཉིས་ལེན་དུ་འགྲོ་བསམ་པ་ཡིན་ཡང་། ཨ་མྱེ་བདེ་ཆེན་ཁོ་གཉིས་ཀྱིས་ལྷན་དུ་ཡོང་ཡོད་སྟབས། ཕ་རྒན་འཇིགས་གྲོལ་གྱི་སྤག་སྤག་ལག་དུ་མ་རེག་ནས། བློ་བཟང་གིས། ཁྱེད་རང་གཅིག་པོ་སོང་ན་འགྲིག་གི་རེད། ཁོ་གཉིས་ལ་ནུབ་ཚལ་འཐུང་ཡོད་མེད་སྐད་ཆ་དྲིས། འཐུང་མེད་ན། རྫོང་ཐོག་ནས་ནུབ་ཚང་ཞིག་འཐུང་ནས་ཤོག་ཞེས་རྒྱ་སྒོར་ཉི་ཤུ་ཞིག་ཁོ་ལ་སྤྲད།
ཆུ་ཚོད་ཕྱེད་ཀ་ཙམ་གྱི་རྗེས་སུ་བློ་བཟང་གིས་ཕྱི་རོལ་ནས་སྤག་སྤག་གི་སྒྲ་ཞིག་གྲགས་ཀྱིན་པ་ཐོས་ནས་ག་ལེར་སྒོ་ཕྱེ་ནས་ཕྱི་རུ་འབུད།
མུ་འགོད།
སྤུན་ཟླ་ཁྱེད་གཉིས་འདི་རུ་ཕེབས་ན་དགའ་ཡོད། ལྷག་དུ་ཇིང་སྲས་ཁྱེད་རང་གིས་བདག་ལ་འཚམ་འདྲི་དང་ཁ་གཡང་བོས་པ་དེར་བཀའ་དྲིན་ཆེ། ཡིན་ཡང་། བདག་གི་སེམས་ཁོང་དུ་ནམ་ཡང་ས་མཐའ་ནས་ལོ་གསར་ཟེར་བའི་སྤྲོ་སྣང་དེ་ཡོང་མ་མྱོང་ལ། ཉིས་སྟོང་བརྒྱད་ནས་བཟུང་དེ་རང་ཉིད་བོད་མི་ཞིག་གི་ངོས་ནས་བོད་ལ་ལོག་རྒྱུ་མ་བྱུང་བར་དུ་ལོ་གསར་ཞེས་པ་ཞིག་གཏོང་རྒྱུ་ཡོད་པར་གཏན་ནས་རང་གིས་རང་ལ་ཡིད་ཆེས་བྱེད་ཀྱི་མེད།
ལོ་གསར་ལ་བཀྲ་ཤིས་བདེ་ལེགས་ཞུ་བ་དང་ཆབས་གཅིག་ལོ་གསར་བ་འདིའི་ནང་སྐུ་ཉིད་ཀྱི་རླུང་རྟ་ཡར་རྒྱུག་དང་བྱ་བ་ཡར་འགྲོ་ཡོང་པའི་སྨོན་ལམ་ཞུ།
གསལ་བཤད་བྱེད་རྒྱུ་ཞིག་ལ་མི་སྒེར་གྱི་ལོ་གསར་ལག་སྐྱེས་ཕུལ་ཆོག་པ་ཞུས།
ཨོ་ཡཡཡཡ་དེ་ནས་་་་་ད་དུང་མུ་འཐུད་ནས་ཉན་ས་ཡོང་གི་ཡིན་