བློ་བཟང་གིས། མུན་ནག་ཁྲོད་ནས་རང་གི་ནུ་བོ་ལྷ་འབུམ་རྒྱལ་དང་། བན་སྡེ་འཚོ། ཆོས་སྒྲོན་གསུམ་ལ་ལམ་བར་ནས་དཀའ་ལས་མ་ཁག་གམ་ཟེར་ནས་ནང་དུ་བསུ་བ་བྱས། ནུ་བོ་ལྷ་འབུལ་རྒྱལ་གྱིས་ལྕགས་ཐབ་ནང་དུ་མེ་ཁ་བསྒོས་པ་དང་ཇ་བསྐོལ་རྒྱུའི་གྲྭ་སྒྲིག་བྱས།
བློ་བཟང་གིས། ཁྱེད་གཉིས་ཀྱིས་ནུབ་ཚལ་འཐུང་ཨེ་ཡོད་ཅེས་དྲིས་དུས། ནུ་བོ་ཀླུ་འབུལ་རྒྱལ་གྱིས་ཁོ་གཉིས་ཀྱིས་ནུབ་ཚལ་འཐུང་ཟེར་ནས་ཨུ་ཚུགས་བྱེད་ཀྱི་འདུག དེ་ཡིན་དུས་རྫོང་ཐོག་ནས་ངས་དོ་ནུབ་ཞོར་ཟས་ཁ་ཤས་ཤིག་མ་གཏོགས་གང་ཡང་ཉོས་མེད། གལ་སྲིད། དངོས་ནས་ནུབ་ཚལ་འཐུང་མེད་པ་ཡིན་ན། ད་འདི་ན་རྩམ་པ་མ་གཏོགས་ཟ་རྒྱུ་ཡོད་པ་མ་རེད་ཅེས་བཤད་ཞོར་དུ་ཁོ་རང་སྒོ་ཕྱི་རུ་མེ་ཤིང་ལེན་དུ་སོང་།
བློ་བཟང་གིས། དགོད་ཞོར་དུ་བན་སྡེ་འཚོ་ལ། དངོས་ནས་ཁྱེད་གཉིས་ཀྱིས་ནུབ་ཚལ་འཐུང་མེད་ན་རྩམ་པ་ཟས་ན་མར་ཕྱུར་གསར་བ་ཡིན་ནི་རེད་ཅེས་བཤད་དུས་སུ། བན་སྡེ་འཚོས། ངེད་གཉིས་ཀྱིས་ཁྱེད་རང་བསུ་རུ་ཡོང་རྒྱུ་རེད་བསམ་ནས་ནུབ་ཚལ་མ་འཐུང་བར་ཁྱེད་རང་སླེབས་ན་ང་ཚོས་ལྷན་དུ་ཟ་མ་ཞིག་ཟ་དགོས་བསམ་ནས་སྒུག་ཡོད་དུས། ཁྱེད་རང་གི་ནུ་བོ་ལྷ་འབུམ་རྒྱལ་སླེབས་ནས་ཁྱེད་རང་ཡོང་མ་ཐུབ་པའི་རྒྱུ་མཚན་བཤད་སྟབས། ངེད་གཉིས་ཀྱིས་ནུབ་ཚལ་འཐུང་མེད་ཟེར་ནས་བཤད་རྒྱུ་ངོ་ཚ་སོང་ཞེས་བཤད།
མཚན་མོ་དེར། བློ་བཟང་གི་ནུ་བོ་ལྷ་འབུམ་རྒྱལ་གྱིས་རྡུང་ལེན་བྱས་པ་དང་། མཚམས་རེར་ཁོང་ཚོ་ཚང་མ་དགོད་སྒྲ་དང་ལྷན་དུ་ལྕགས་ཐབ་ནང་གི་མེ་ལྕེ་ཡང་ཆེ་རུ་ཕྱིན། བློ་བཟང་གིས་ད་ང་ཚོ་ཉལ་ན་རེད། ལྷ་འབུམ་རྒྱལ་ཁྱེད་རང་སོང་ནས་མགྲོན་པོ་ཉལ་སའི་ཁང་ཆུང་དེ་རུ་ཆོས་སྒྲོན་ཉལ་ས་བཟོས། ཁྱེད་རང་ཕར་ནང་དུ་ཉལ་ན་འགྲིག་གི་རེད། ཆུ་ཚ་བོ་ཞིག་ཡོད་ན་ང་རང་ལ་སྤྲོད་དང་ངས་རང་གི་རྐང་བ་འདི་དཀྲུ་དགོས་ཀྱི་འདུག དེ་ནས་ཉལ་ན་ད་སྐྱིད་ནི་རེད་ཅེས་གདོང་ལ་འཛུམ་ཞིག་བླངས།
ལྷ་འབུམ་རྒྱལ་གྱིས་ཆུ་ཚ་བོ་ཞིག་དཀྲུས་གཤོང་ཞིག་གི་ནང་དུ་ཁུར་ནས་འོང་དེ། ཕུ་བོ་འདི་ཁྱེད་རང་གི་རྐང་བ་དཀྲུ་བྱེད་ཡིན། ལྷམ་མགོ་ང་ལ་སྤྲོད་དང་ངས་སྒོ་ཕྱི་ལ་བཞག་ཆོག་ཟེར་ནས་ལྷམ་མགོ་ཁུར་ལེན་ཞོར་དུ། ཆོས་སྒྲོན་ལ། འགྲོ་ངས་ཁྱེད་རང་ལ་ཉལ་ས་བཟོས་ཚར་བ་ཡིན་ཞེས་འགྲོ་གྲབས་བྱེད་ཀྱིན་པའི་སྐབས་དེར། བློ་བཟང་གིས་ནུ་བོ་ཀླུ་འབུམ་རྒྱལ་ལ། ཁྱེད་རང་ནངས་དུས་སྔ་བོ་ཨ་མྱེ་བདེ་ཆེན་དང་འགྲོག་ནས་སྔོན་དུ་སོང་། ཨ་མས་དྲིས་ན་ང་རང་ཅུང་ཙམ་ཉལ་ནས་ཡོང་གི་ཡིན་ཟེར་བཞིན་འདུག་ཟེར་ནས་བཤད་རོགས།
བན་སྡེ་འཚོས། བློ་བཟང་ཁྱེད་རང་གི་ནུ་བོ་དངོས་ནས་ཁྱེད་རང་ལ་བཟང་གི ལྷག་པར་དུ་ཁྱེད་ཚང་གི་ཁྱིམ་ཚང་འདི་དངོས་ནས་ཕན་ཚུན་ལ་བརྩི་བཀུར་ཆེན་པོ་ཡོད་པའི་ཁྱིམ་ཚང་ཞིག་ཡིན་ཐག་གཅོད་རེད་འདུག དངོས་ནས་ཁྱེད་རང་ང་ལ་ཐོབ་པ་ངས་བསོད་ནམ་རེད་ཟེར་ཞོར་དུ་ཉལ་ཐུལ་ནང་དུ་འཛུལ།
བློ་བཟང་གིས། དངོས་ནས་ང་རང་གི་ནུ་བོ་དང་ནང་མི་ཚོ་ངའི་སྒང་ལ་ཧ་ཅང་བཟང་བ་མ་ཟད། ངའི་སྐོར་ལ་སེམས་ཁྲལ་ཡང་མི་ཉུང་བ་ཞིག་བྱེད་ཀྱི་ཡོད་པ་རེད། ད་ཡང་ངས་ཁོང་ཚོ་ལ་དཀའ་ངལ་བཟོ་དགོས་ཀྱི་ཡོད་པ་རེད། ང་འདི་དངོས་ནས་མི་སྡུག་ཐུག་ཞིག་རེད་ཅེས་ཐ་ནག་རྐང་གཅིག་ལ་མེ་སྒྲོན།
ཁོ་གཉིས་ཉལ་སའི་ཁང་བ་དེ་ནི་ནུ་བོ་ཀླུ་འབུམ་རྒྱལ་གྱི་ཁང་བ་ཡིན་པ་དང་། ལྷག་པར་དུ་ཁང་བ་དེ་ཡི་ནང་གི་བརྩིགས་ངོས་ཡོངས་ལ་བློ་བཟང་གི་འདྲ་དཔར་གྱི་བཀང་དེ་ཡོད་པ་རེད། འདྲ་དཔར་དེ་དག་ནི་བློ་བཟང་གིས་རྒྱ་གར་ནས་སྐུར་མྱོང་བ་རྐྱང་རྐྱང་ཡིན་པ་རེད། མང་ཤོས་ཤིག་ནི། བློ་བཟང་ཁོ་རང་གི་གྲྭ་བ་ཡིན་དུས་ཀྱི་འདྲ་དཔར་རྐྱང་རྐྱང་ཆགས་ཡོད་པ་དེ་དག་ལ་བན་སྡེ་འཚོས་མཛུབ་མོ་འཛུགས་དེ། ཁྱེད་རང་དངོས་ནས་གྲྭ་བ་ཡག་པོ་ཞིག་ཡིན་ས་རེད། འདྲ་དཔར་ལ་བལྟས་དེ་འོང་དུས་སེམས་སྡུག་ནི་ཞིག་རེད།
ཞག་བཀང་བོར་བློ་བཟང་དང་བན་སྡེ་འཚོ་གཉིས་ལ་གཉིད་ཅིག་ཁུག་རྒྱུ་མ་བྱུང་བར་མ་འོངས་པའི་སྐོར་དང་ཕན་ཚུན་ལ་ཤ་མཆིན་པ་བརླན་བཞིན་འདོད་པའི་བདེ་བ་ལ་རོལ་ནས་ནམ་ཡང་སྐྱ་སིང་ངེར་སོང་བ་རེད།
ནམ་སྐྱ་སིང་ངེར་སོང་བ་དང་ལྷན་དུ་སྒྲོག་སྒྲ་ཞིག་དང་བཅས་ཁོ་གཉིས་ཡོད་སའི་ཁང་བའི་ནང་དུ་ཡོང་ནས། ཁྱེད་གཉིས་གཉིད་སད་ཡོད་དམ་ཟེར་ཞོར་དུ་ལྕགས་ཐབ་ནང་དུ་མེ་བཞག་པ་དང་། བློ་བཟང་ལ་ད་ནི་ང་རང་ཡར་ནང་དུ་སོང་ནས་ཨ་མྱེ་ཁྲིད་དེ་སྔོན་དུ་བུད་འགྲོ ཁྱེད་རང་རྗེས་སུ་ག་ལེར་ཤོག་ཟེར་བཞིན་བུད་སོང་།
མུ་འགོད།
ཨ་འཕྲིན་ལགས། སྐུ་ཉིད་ཕེབས་པ་དགའ་ཡོད། ཐུགས་ཆེ་རྗེ། རྗེས་ཕྱོགས་ཀྱང་བློ་བཟང་གི་སྒྲུང་ལ་ཁོམ་པ་བྱུང་ན་ཉན་དུ་ཤོག
བོད་ཤ་ཁྲག་རུས་གསུམ་ལགས། གནམ་ལོ་གསར་བའི་ནང་ཁྱེད་ཀྱི་བསམ་དོན་ལྷུན་གྱིས་འགྲུབ་པའི་སྨོན་འདུན་ཞུ།
ད་རེབ་དངོས་སྒྲུང་འདི་ཞིབ་ཀློག་བྱེད་ཁོམ་མ་བྱུང་ཡང་ག་ལེར་ཞིབ་ཀློག་བྱེད་རྒྱུ་ཡིན།