སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} རེ་བདུན།

ནུ་མོ་མཚོ་མོ་སྐྱིད་ཀྱིས་རང་གིས་ཕུ་བོས་བོས་པའི་སྐད་དེ་གོ་མ་ཐག ངུས་པ་དང་ལྷན་དུ་ཕུ་བོ་ཡོད་སར་ཡོང་ནས། སྐད་ཤུགས་ཆེན་པོས་སྒོ་ནས་ངུ་ཞོར་དུ། ངས་ཨ་མ་དང་ནང་མི་དག་ལ་བཤད་ཀྱི་ཡིན། ཁྱེད་རང་གིས་ང་འདི་ནས་སྐྱུར་བ་དེ་ཟེར་ནས་རང་གི་ཕུ་བོ་བློ་བཟང་གི་གདོང་ལ་བལྟས་དེ་ངུ་ཞོར་དུ་དེ་ལྟར་བཤད་དུས་སུ། བློ་བཟང་གིས་རང་གི་ནུ་མོ་ལྷ་སྐྱིད་ཀྱི་ངུ་ཁ་ལེན་ཞོར་དུ། ད་མ་ངུ་། ངས་ཁྱེད་རང་ལ་རྔན་པ་ག་རེ་དགོས་ཉོ་ཆོག འགྲོ་ཟེར་ནས་ཕར་ཕྱོགས་ཀྱི་ཟས་རིགས་སྣ་འཛོམས་ཀྱི་ཚོང་ཁང་དེ་ཡི་ནང་དུ་འཁྲིད་ནས་ངུ་ཁ་བླངས་ཚར་དུས་སུ། ཡིད་ལ་ཅ་ལག་དེ་དག་དང་རླངས་འཁོར་དྲན་ནས་ནུ་མོའི་ལག་འགོ་ནས་བཟུང་དེ་རྒྱུགས་ཤར་བྱས་དེ་རླངས་འཁོར་ཕྱོགས་སུ་ཕྱིན།

བློ་བཟང་དང་ནུ་མོ་གཉིས་རླངས་འཁོར་ཡོད་སའི་ས་ཚིགས་དེ་རུ་འབྱོར་དུས། ཁ་ཆེ་ཁ་ལོ་བ་དེས་བློ་བཟང་གི་ཅ་ལག་རྣམས་རླངས་འཁོར་ལས་ཕྱིར་བཏོན་ཚར་ནར་འགྲོ་གྲབས་བྱེད་བཞིན་པའི་སྒང་ཏག་ཏག་དེར་ཁོ་གཉིས་དེ་རུ་འབྱོར་བ་དང་བློ་བཟང་གིས་རླངས་འཁོར་གྱི་མདུན་ནས་བཀག་དུས། ཁ་ལོ་བའི་བློ་བཟང་མཐོང་ནས་ང་ཚོས་ཁྱེད་གཉིས་ལ་ཆུ་ཚོད་ཕྱེད་ཀའི་རིང་སྒུག་པ་ཡིན། ད་ནང་དུ་བུད། མགྱོགས་པོ་བྱོས། མེ་འཁོར་ས་ཚིགས་སུ་མི་འཚོལ་དུ་འགྲོ་དགོས་པ་རེད། མི་ཁ་ཤས་ཤིག་རེག་ན་ད་ལྟ་རང་འགྲོ་ཆོག་གི་འདུག་ཟེར་ནས་སྐད་བརྒྱབ།

བློ་བཟང་གི་ནུ་མོ་མཚོ་མོ་སྐྱིད་ནི། བོད་ཁུལ་གྱི་བྱིས་པ་གཞན་དག་དང་འདྲ་བར་ཆུང་དུས་ནས་བཟུང་དེ་མེ་འཁོར་དང་རླངས་འཁོར་སོགས་ཀྱི་ནང་དུ་ས་ཐག་རིང་དུ་འགྲོ་མྱོང་མེད་པ་ཡིན་དུས། མེ་འཁོར་ནང་དུ་འགྲོ་བ་དེ་འདྲའི་དཀའ་ངལ་མེད་ཀྱང་། རླངས་འཁོར་ནང་དུ་འགྲོ་དགོས་བྱུང་དུས་སུ། དངོས་ནས་ཡང་ཡང་སྐྱུག་པ་སྐྱུགས་པ་དང་མགོ་གཡོམ་འཁོར་གྱི་ཡོད་སྟབས་ཟ་མ་ཡང་ཡག་པོ་ཞིག་ཟ་ཐུབ་ཀྱི་མེད་པར་བརྟེན་བློ་བཟང་ལ་ལྷ་ས་བར་དུ་དངོས་ནས་དཀའ་ངལ་མི་ཉུང་བ་ཞིག་དང་སེམས་འཁྲལ་མི་ཉུང་བ་ཞིག་སྤྲད་ཀྱང་། མཐར་ཁོ་གཉིས་བདེ་ལེགས་ངང་དུ་ལྷ་སར་འབྱོར་བ་རེད།

ལྷ་སར་འབྱོར་ནས་ཉིན་མ་གཅིག་གཉིས་ཤིག་གི་རྗེས་སུ་ཁོ་གཉིས་ཀྱིས་རྒྱ་གར་དུ་འགྲོ་བའི་ལམ་ཆས་སོགས་གྲྭ་སྒྲིག་མ་བྱས་པའི་གོང་དེར། བློ་བཟང་ཁོ་གཉིས་ཀྱི་སྤུན་མཆེད་ཅིག་ཟླ་གཅིག་གི་ཡར་སྔོན་དེར་གྲོགས་མོ་ཞིག་དང་འགྲོགས་ནས་ལྷ་སར་བྲོས་ཡོང་ཡོད་པ་དེ་དང་འཕྲད་ནས། བློ་བཟང་གིས་ཁོ་རང་གི་སྤུན་མཆེད་བཀྲ་ཤིས་དོན་འགྲུབ་ལ་རང་ཉིད་ཕྱིར་རྒྱ་གར་དུ་འགྲོ་བཞིན་ཡོད་པ་དང་ནུ་མོ་མཚོ་མོ་སྐྱིད་ཀྱང་འཁྲིད་དེ་འགྲོ་རྩིས་ཡོད་པའི་སྐོར་སོགས་ཞིབ་དུ་བཤད་དུས་སུ། སྤུན་མཆེན་བཀྲ་ཤིས་དོན་འགྲུབ་ཀྱིས་ཀྱང་རང་ཉིད་ལྷ་སར་བསྡོད་འདོད་མེད་པ་དང་རང་གི་གྲོགས་མོ་དེ་ཡང་ཕྱིར་རང་ཡུལ་དུ་ལོག་རྩིས་འདུག་ན་ཡང་། ཁོ་རང་མོ་དང་འགྲོགས་ནས་ཕྱིར་འགྲོ་རྩིས་མེད་རབས། བློ་བཟང་ལ་ཁོ་རང་ཡང་ལྷན་དུ་འཁྲིད་རོགས་ཟེར་ནས་ཞུ་བ་དང་ཁས་ལེན་མི་ཉུང་བ་ཞིག་བྱས་སྟབས། བློ་བཟང་གིས་དངོས་ནས་ཁྱེད་རང་ལ་དེ་འདྲའི་འདོད་པ་ཆེན་པོ་ཞིག་དང་མདུན་པ་ཆེན་པོ་ཞིག་ཡོད་པ་ཡིན་ན་ནི། ང་དང་ལྷན་དུ་སོང་ན་འགྲིག་གི་རེད། འོན་ཀྱང་། ང་ཚོ་ལ་ལམ་ཁྲིད་མེད་པ་དང་ལམ་ཁྲིད་ང་རང་བྱེད་དགོས་ཀྱི་ཡོད་པ་རེད་ཅེས་བཤད།

ཉིན་མ་ཁ་ཤས་རིང་དེར་བློ་བཟང་གིས་རང་གི་སྤུན་མཆེད་བཀྲ་ཤིས་དོན་འགྲུབ་ལ་རང་གི་ལག་དངུལ་གྱི་མང་ཉུང་སོགས་ཞིབ་དུ་བཤད་པ་དང་། ལྷག་པར་དུ་ལྷ་ས་ནས་ཡུན་རིང་བསྡོད་ཁག་པོ་ཆགས་ཡོད་པ་སོགས་བཤད་ནས་ཉིན་གྲངས་རེ་གཉིས་ཤིག་གི་རྒྱབ་དེར་ཁོང་ཚོ་ལྷན་དུ་ལམ་ལ་ཆས་རྒྱུའི་སྐོར་ཞིབ་དུ་ཐག་བཅད་པའི་མཚན་མོ་དེར། བཀྲ་ཤིས་དོན་འགྲུབ་ཀྱིས་རང་་གི་གྲོགས་པོ་ཞིག་ཀྱང་ང་ཚོ་དང་ལྷན་དུ་འགྲོ་འདོད་ཆེན་པོ་འདུག་པ་མ་ཟད། ཁོ་རང་ཐེབས་ཁ་ཤས་ཤིག་ལ་ཚོད་ལྟ་བྱས་ཀྱང་ལམ་འགྲོ་བྱུང་མི་འདུག ད་རེབས་ཁྱེད་རང་གི་ལྷན་དུ་ཁྲིད་རོགས་ཟེར་ནས་ཞུ་བ་བྱེད་ཀྱི་འདུག་ཞེས་བློ་བཟང་ལ་བཤད།

བློ་བཟང་གིས་སྒོར་མོ་མེད་ཀྱང་འགྲིག་གི་རེད། ང་ཚོ་མ་ཤི་ན་ཁོ་རང་རང་ལྟོགས་ཤི་ཐེབས་མི་སྲིད་པ་རེད། འོན་ཀྱང་། ཁོ་རང་ལ་ཡིད་ཆེས་བྱེད་ཆོག་མིན་དེ་ཁྱེད་རང་གིས་ཐག་གཅོད་བྱོས། ལྷག་པར་དུ་འདི་ན་ཁོ་རང་ལ་ཉེ་འབྲེལ་འདྲ་ཡོད་པ་དེ་འདྲ་ཡིན་ན། དེ་དག་གི་བཀག་འགོག་ཡོད་མེད་སོགས་གསལ་བོ་རྒྱུས་ལོན་བྱོས་ཞེས་རང་གི་སྤུན་མཆེད་བཀྲ་ཤིས་དོན་འགྲུབ་ཀྱི་གྲོགས་པོ་རྡོར་སྐྱབས་ཀྱང་ལྷན་དུ་འཁྲིད་རྒྱུར་ཁས་ལེན་བྱས་པ་རེད།

ལམ་ལ་མ་ཆས་པའི་ཉིན་གཉིས་ཀྱི་སྔོན་དེར་བློ་བཟང་གིས་རང་གི་ངོ་ཤེས་གྲྭ་བ་ཞིག་དང་ལྷ་ས་ནས་མར་ཕ་ཡུལ་དུ་འགྲོ་ཁར་འཕྲད་པ་དེར་སླར་ཡང་འཕྲད་པ་དང་ཁོས་རང་ཉིད་ལམ་འགྲོ་མ་བྱུང་བའི་སྐོར་སོགས་ཞིབ་དུ་བློ་བཟང་ལ་བཤད་དུས་སུ། བློ་བཟང་གིས། དེ་འདྲ་ཞིག་ཡིན་ན་ནི། ངས་ཁྱེད་རང་ལ་དངོས་ནས་རོགས་ཆེན་པོ་དེ་འདྲ་གང་ཡང་བྱེད་ཐུབ་ཀྱི་མི་འདུག གལ་སྲིད། ཁྱེད་རང་ཕྱིར་ཕ་ཡུལ་དུ་ལོག་འདོད་ཡོད་ན། ངས་ཁྱེད་རང་ལ་ནང་དུ་སླེབས་རེག་བར་དུ་འགྲོ་བྱེད་ཀྱི་དངུལ་ཞིག་གི་རོགས་རམ་བྱེད་ཆོག དེ་མིན་ན། ང་རང་ཕྱིར་རྒྱ་གར་དུ་འགྲོ་བཞིན་ཡོད། ལམ་ཁྲིད་ཀྱང་གཞན་མེད། རང་གིས་ལམ་ཁྲིད་དེ་འགྲོ་བཞིན་ཡོད། ཁྱེད་རང་ང་དང་ལྷན་དུ་འགྲོ་འདོད་ཡོད་ན་འགྲོ སླེབས་པ་ཡིན་ན་ཚང་མ་སླེབས་ངེས་རེད་ཅེས་བཤད།

བློ་བཟང་གི་གྲོགས་པོ་གྲྭ་བ་ཤེས་རབ་རྒྱ་མཚོས་རང་གི་གྲོགས་པོ་བློ་བཟང་གིས་སྐད་ཆ་དེར་གོ་བ་དང་སེམས་གཏིང་ནས་དགའ་བ་དང་བཅས། དེ་ལས་ལྷག་ཞིག་དངོས་ནས་དགོས་དོན་མི་འདུག ང་རང་ཁྱེད་རང་དང་ལྷན་དུ་འགྲོ་རྒྱུ་ཡིན་ཞེས་སེམས་ཐག་བཅད།

བློ་བཟང་གི་སྤུན་མཆེད་བཀྲ་ཤིས་དོན་འགྲུབ་ཀྱི་གྲོགས་པོ་རྡོར་སྐྱབས་ལ་ལྷ་སར་ཨ་ཅེ་ཞིག་ཡོད་པ་དེ་ཡི་ཁོ་རང་ལ་རྒྱ་སྒོར་ལྔ་བརྒྱ་སྤྲད་ཡོད་པ་དང་དེ་ལས་ཁོ་རང་ལ་སྒོར་མོ་མེད་ཀྱང་། བློ་བཟང་གིས་ང་ཚོ་ཐོན་ས་ནས་ཁྱེད་རང་གིས་ཀྱང་སེམས་འཁྲལ་བྱེད་མི་དགོས་ཟེར་ནས་ཚང་མ་ལྷན་དུ་ལྷ་སའི་ཁྲོམ་སའི་སྒང་དུ་ལམ་བར་དུ་དགོས་འཁོ་ཆེ་བའི་ལྷམ་མགོ་དང་ཉལ་ཆས་རིགས་ཉོ་རུ་ཕྱིན་པ་རེད།