བོད་ཀྱི་དུས་བབ་སྤྱིའི་འདོན་ཐེངས་ ༤༧༥ སྟེང་གི་རྩོམ་སྒྲིག་པའི་གཏམ།
ནོ་སྦེལ་ཞི་བདེའི་གཟེངས་རྟགས་བཞེས་མཁན་སྲིད་འཛིན་ཨོ་བྷ་མ་དང་༧གོང་ས་མཆོག་རྣམ་གཉིས་ཀྱི་མཇལ་འཕྲད་དེས་དོན་དངོས་ཐོག་རྒྱ་ནག་ལ་གནོད་སྐྱོན་ཐེབས་གི་རེད་དམ། ཡང་ན། རྒྱ་ནག་ལ་གོ་སྐབས་གཞན་ཞིག་ཤར་ཡོང་གི་ཡོད།
རྒྱ་ནག་གིས་དོན་མེད་དུ་ཁ་ནུབ་ལ་འཁོར་ཏེ་ཁྱི་ཟུག་ཟུག་བྱེད་ཀྱིན་པ་མ་གཏོགས། དོན་དངོས་ཐོག་སྲིད་འཛིན་ཨོ་བྷ་མ་དང་༧གོང་ས་མཆོག་རྣམ་གཉིས་ཀྱི་མཇལ་འཕྲད་འདིས་ཨ་རྒྱ་གཉིས་ཀྱི་འབྲེལ་བར་ཤུགས་རྐྱེན་ཆེན་པོ་ཞིག་ཐེབས་དོན་མེད་ལ། ལྷག་པར་དུ་མཇལ་འཕྲད་ཀྱི་རྣམ་པ་དང་བཀའ་མོལ་གྱི་ནང་དོན་ཐད་ནས་རྒྱ་ནག་གི་སྲིད་བྱུས་ལ་འགལ་འགྲོ་རྒྱུའི་རྒྱུ་རྐྱེན་ཅི་ཡང་བསྐྲུན་མེད།
དེ་ལས་ལྡོག་སྟེ། རྒྱ་ནག་གི་ཟུག་སྐད་འདིའི་རྒྱབ་ན་གཡོ་བྱུས་གཞན་ཞིག་ཡོད་ངེས་ལ། དེ་ནི་ཕྱི་ཚེས་ ༡༩ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་ཨ་རིའི་ངོས་ནས་ཀྲུང་གོའི་ལངས་ཕྱོགས་ལ་བསམ་བློ་ནན་ཏན་བཏང་སྟེ་མགྱོགས་པོར་བྱེད་ཐབས་ནུས་ལྡན་སྤྱད་དེ་ཤུགས་རྐྱེན་ངན་པ་མེད་པར་གཏོང་དགོས་ཚུལ་དང་། བྱ་སྤྱོད་དངོས་ལ་བརྟེན་ནས་ཨ་རྒྱའི་འབྲེལ་བར་གནོད་སྐྱོན་མེད་པ་བཟོ་དགོས་པའི་ཆ་རྐྱེན་བཏོན་པའི་ཤུགས་སུ་ཡོད་པར་འདོད།
རྒྱ་ནག་གིས་མཇལ་འཕྲད་འདི་མི་ཁོག་པ་ཤེས་བཞིན་དུ་མཇལ་འཕྲད་གནང་མི་ཆོག་ཅེས་འུར་བརྒྱབས་པ་དང་། མཇལ་འཕྲད་གནང་ཚར་མ་ཐག་ད་ནི་གང་མགྱོགས་ཀྱིས་ནོར་འཁྲུལ་ཡོ་བསྲང་དང་ཤུགས་རྐྱེན་ངན་པ་མེད་པར་བཟོ་དགོས་ཞེས་བཤད་པའི་ཤུགས་ཀྱི་གོ་དོན་ངོ་མ་ནི་ཨ་རིའི་ཕྱོགས་ནས་སླར་ཡང་བོད་འདི་རྒྱ་ནག་གི་ཆ་ཤས་འཁྲུལ་མེད་ཅིག་ཡིན་པ་གསལ་གསལ་ཐིང་ཐིང་གིས་བསྒྲགས་དགོས་པའི་དོན་ཡིན། ཁོང་ཚོར་མཚོན་ན་སྲིད་འཛིན་ཨོ་བྷ་མའི་ངག་ནས་འདི་ལྟའི་ཡོངས་ཁྱབ་བསྒྲགས་གཏམ་ནི་ཐོན་ཆོག་ཆོག་ཅིག་ཡིན་པའི་ངེས་ཤེས་སྐྱེས་ཡོད་སྲིད། དེ་ནི་ལོ་སྔོན་མ་སྲིད་འཛིན་ཨོ་བྷ་མས་པེ་ཅིན་ནས་འདི་ལྟའི་བསྒྲགས་གཏམ་སྤེལ་ཡོད་པ་དང་། དེ་བཞིན་དུ་ཨ་རིས་མགོ་ཁྲིད་དེ་འཛམ་གླིང་དཔལ་འབྱོར་ཉམས་རྒུད་ཀྱི་སྐབས་སུ་ཨོ་བྷ་མར་མེད་ཐབས་མེད་པའི་བསྟེན་ས་གཅིག་ནི་རྒྱ་ནག་ཡིན་པ་ཤེས་ཡོད་སྟབས། ཁོང་ཚོས་ཐེངས་འདིའི་གོ་སྐབས་ལ་བསྟུན་ནས་ཨོ་བྷ་མའི་ངག་ནས་རྒྱ་ནག་གི་སྲིད་བྱུས་བསྒྲགས་འཇུག་འདོད་ཡིན་ལ། ཁོང་ཚོས་བཤད་པ་ལྟར། རྒྱལ་ཁབ་གཞན་པ་རྣམས་ཀྱང་རྗེས་མ་རང་བཞིན་དེ་ལས་མི་འདའ་བ་ཞིག་སྟོན་ཆེད་ཡིན། དེ་བས་རྒྱ་ནག་གིས་རང་ཉིད་ལ་གོ་སྐབས་ཤིག་བསྐྲུན་བཞིན་ཡོད་ལ། ང་ཚོས་གཟབ་དགོས་ས་ཡང་འདི་ཡིན།
དེ་མ་གཏོགས་ཨ་རྒྱ་གཉིས་ལ་མི་མཐུན་ས་མང་རུང་། ཕན་ཚུན་གྱི་རྨ་ཁ་གསོ་ས་དང་ཕྱག་འཇུ་བྱ་སའི་སྡིངས་ཆ་ཡང་མང་། དཔེར་ན། འབྱུང་འགྱུར་གྱི་ལས་རིམ་སྒྲིག་པ་ལྟར་ན། ཉིས་སྟོང་བཅུ་ལོ་གཅིག་པུར་སྲིད་འཛིན་ཨོ་བྷ་མ་དང་ཧུའུ་ཅིན་ཐོ་གཉིས་ལ་ཉུང་མཐར་ཡང་སྔ་ཕྱི་ཐེངས་ ༥ ལ་ཐུག་འཕྲད་ཀྱི་གོ་སྐབས་ཡོད་ལ། གོ་སྐབས་འདི་དག་གིས་ཨ་རྒྱ་གཉིས་ཀྱི་གཞི་རྩའི་ཁེ་ཕན་བསྐྲུན་གྱི་ཡོད་སྟབས། ཕྱོགས་གཉིས་ཀྱི་གང་ཡིན་རུང་འགལ་བ་ཆུང་ངུའི་རིགས་སེམས་ལ་ཉར་ཏེ་གཏན་དུ་ཞེ་ཁྲེལ་ནས་སྡོད་ལོང་མེད་པ་ནི་མངོན་གསལ་ཡིན་ནོ།།
དུས་བབ་ནང་གི་དྲ་གྲོགས་ཚང་མ་ཁ་བརྡའི་ནང་དུ་བོད་རང་བཙན་གྱི་ཆེན་དུ་འོས་ཤོག་བླུགས་པར་ཕེབས་རོགས། དྲ་ཐག་འདི་ཡིན།
http://www.khabdha.org/?p=6688&cpage=1#comment-23383
དྲ་གྲོགས་ཚོ། མགྱོགས་པོར་འོས་བླུགས་པར་ཕེབས་རོགས། གོང་གི་དྲ་ཐག་ནང་དུ་དྲ་ཤར་གསུམ་ཡོད་པའི་དཀྱིལ་མ་དེ་ལས་དབྱིན་ཡིག་གི་Quick Vote ཞེས་པ་ལས་yes སྟེང་གནོན་དགོས་པ་ཡིན།
རྒྱ་གར་གྱི་ཉིན་གུང་དུས་ཚོད་༡།༤༥་ཐོག་བོད་རང་བཙན་ལ་རྒྱབ་སྐྱོར་བྱེད་མཁན་བརྒྱ་ཆའི་༩་དང་། ཁ་གཏད་བརྒྱ་ཆའི་༩༡་རེད་འདུག འགྱོགས་པོར་འོས་བླུགས་པར་ཕེབས་རོགས། ཕན་ཚུན་ལ་བརྡ་ལན་སྤྲོད་རོགས།