བོད་སྐད་ཡིག་སློབ་པ་ནི་ལ་རྒྱ་ཙམ་གྱི་དོན་མིན། ནགས་ཤོད་རིག་རལ།

ནགས་ཤོད་རིག་རལ།

ངས་རྟོགས་པ་ལྷ་དང་མཉམ་པ་འདྲ་བའི་རླབས་ཆེན་གྱི་སྐད་ཆ་གང་ཡང་བརྗོད་པར་མི་འདོད། ང་ལ་དེ་ལྟ་བུ་བརྗོད་པའི་སྤོབས་པའང་མེད།  ངས་འདོད་པ་ནི་རྐང་པ་གཉིས་ས་ལ་བཙུགས་ཏེ་འཇིག་རྟེན་འཁོར་བའི་ནང་གི་དོན་འགའ་གླེང་འདོད་པ་ཡིན།

དེང་གི་དུས་སུ་ང་ཚོ་བོད་པ་ཁ་ཅིག་གི་སེམས་སུ་བོད་སྐད་ཡིག་སློབ་པ་ནི་རང་ལ་མི་རིགས་ཀྱི་ལ་རྒྱ་ཡོད་མིན་གྱི་ཚད་འཇལ་བྱེད་ཅིག་ཏུ་མཐོང་བཞིན་ཡོད།  ཆུང་དུས་ནས་རང་མི་རིགས་ཀྱི་སྐད་ཡིག་མ་སྦྱངས་པའི་གཞོན་ནུ་འགའ་ཡང་ནར་སོན་རྗེས་མི་རིགས་ཀྱི་ལ་རྒྱ་རྙེད་པའམ་རང་གི་རྩ་བ་འཚོལ་འདོད་པའི་ཀུན་སློང་བཅས་རྒྱུ་མཚན་སྣ་ཚོགས་ལ་བརྟེན་ནས་བོད་སྐད་ཡིག་སློབ་འགོ་འཛུགས་བཞིན་ཡོད།  དྲོད་མ་ཡལ་བའི་ཟུངས་ཁྲག་ལང་ལོང་དུ་གཡོ་བ་དང་། ཡབ་མེས་དམ་པའི་རྗེས་ཤུལ་བསྙེགས་འདོད་པ་ལ་རྗེས་སུ་ཡི་རང་ཡོད་ལ་རྒྱབ་སྐྱོར་ཁ་ཞེ་གཉིས་མེད་ཡོད།

འོན་ཀྱང་ངའི་ཀླད་པའི་སྦུག་དང་། རུས་པའི་གསེང་། ཁྲག་གི་བར། རྣམ་ཤེས་ཀྱི་གསལ་ཕྱོགས་གང་ཞིག་ནས་བརྗོད་འདོད་པ་ནི།  རང་རེ་རྣམས་ཀྱིས་བོད་སྐད་ཡིག་སློབ་པ་ནི་ལ་རྒྱ་འཛིན་ཆེད་ཙམ་དུ་ག་ལ་ཡིན།  མཐོ་སྒང་འདི་རུ་བོད་སྐད་ཡིག་གི་ལམ་ནས་བྱ་བ་དང་ལས་དོན་མཐའ་དག་བསྒྲུབ་ཆོག་པའི་ཁོར་ཡུག་ཅིག་ང་ཚོས་བརྩོན་ལེན་བྱེད་ཐུབ་ན།  ཁེ་ཕན་དེ་སུ་ལ་ཐོབ་སྲིད་དམ།  ཁེ་ཕན་དེ་ནི་ང་ཚོ་བོད་པ་དང་བོད་པའི་བུ་རབས་ཚ་རྒྱུད་ལ་ཐོབ་སྲིད།  བོད་སྐད་ཡིག་གི་ལམ་ནས་ལས་དོན་བསྒྲུབ་པ་ལ་བོད་པ་ལས་ལྷག་པ་འཛམ་གླིང་འདིར་རྙེད་མི་སྲིད།  དེ་ནི་ང་ཚོ་བློ་རིག་བཀྲ་བའི་དབང་གིས་མ་ཡིན། རྒྱུ་མཚན་ནི་ང་ཚོ་མེས་པོའི་ཕྲག་པའི་སྟེང་དུ་འཛེགས་ཡོད་པའི་དབང་གིས་རེད།  གལ་སྲིད་བོད་སྐད་ཡིག་གི་ལམ་ནས་ལས་དོན་ཐམས་ཅད་བསྒྲུབ་སའི་ཁོར་ཡུག་དེ་ཡོད་པ་ཡིན་ན། བོད་ཀྱི་སྲིད་དཔལ་རིག་གསུམ་གྱི་ལས་རིགས་གལ་ཆེན་དག་གི་ལས་གནས་ཚང་མ་ཡང་བོད་པ་རྣམས་ལ་ཐོབ་སྲིད་པ་མ་ཚད། བོད་པ་སྤྱི་རྣམས་སྐད་ཡིག་གཉིས་པ་ཞིག་ཨ་ན་ཨུ་ཚུགས་ཀྱིས་སྦྱངས་ནས་མི་རིགས་གང་དེའི་ཁྱུ་རུ་ཚུད་ཐབས་ཀྱི་ངལ་བ་དེ་དག་དེ་བས་བསྟེན་མི་དགོས།  རྒྱུ་མཚན་ནི་ང་ཚོས་རང་གི་སྐད་ཡིག་ལ་བརྟེན་ནས་རང་གི་ཕ་སར་འཚོ་གནས་ལེགས་པོ་ཞིག་ཐུབ་པའི་རྐྱེན་གྱིས་རེད། དེ་ལྟ་བུའི་ཁོར་ཡུག་ཅིག་ཡོང་དང་མི་ཡོང་ནི་ང་ཚོ་བོད་པ་རྣམས་ཀྱི་གོ་རྟོགས་དང་། བརྩོན་འགྲུས།  དཔའ་སྟོབས། མིག་རྒྱང་བཅས་ལ་རགས་ལུས་ཡོད།

མི་ཞིག་གི་མི་ཚེའི་ལམ་བུར་དཀའ་ཚེགས་མང་པོ་འཕྲད་སྲིད་པ་བཞིན་མི་རིགས་ཤིག་གི་མདུན་ལམ་ཡང་དེ་ལས་མ་འདས།  དེང་གི་དུས་སུ་ང་ཚོའི་མི་རིགས་འདི་ཉིད་བཙན་པོའི་དབང་འོག་ཏུ་ཚུད་ནས་མི་ལོ་དྲུག་བཅུ་ཙམ་ཕྱིན་ལ།  ང་ཚོའི་སྐད་ཡིག་ཡང་ཉིན་རེ་བཞིན་དུ་དབང་བསྒྱུར་བའི་མཆེ་བའི་བར་དུ་ཟད་བཞིན་ཡོད་པ་རེད།  ཁྲག་དམར་ཤར་རེར་འཛར་བའི་སྐད་ཡིག་ཅིག་རེད།  བོད་སྐད་བོད་ཡིག་ཟུར་དུ་ཕུད་པའི་ཉིན་མོ་དེ་ནས་བཟུང་ང་ཚོའི་མི་རིགས་འདི་ཉིད་གཞན་གཡོག་ཏུ་ཚུད་ཡོད།  རྒྱ་ཡིག་ཆུ་ཚད་དམན་པ་ཁ་རུ་གཡར་ནས་ང་ཚོའི་མི་དམངས་རྣམས་སྤྱི་ཚོགས་ཀྱི་རྐང་མཐིལ་དུ་བསྐྱུར་ཡོད་པ་རེད།  རང་གི་སྐད་ཡིག་གཞན་གཡོག་ཏུ་ཚུད་པའི་དུས་འདིར་བོད་གངས་ཅན་ཕྱི་ནང་ཡོངས་སུ་༸གོང་ས་གཙོས་པའི་ཆོས་ཕྱོགས་ཀྱི་སྐྱེས་བུ་འགའ་ཞིག་ཕུད། ཚན་རིག་དང་། རིག་གནས། དཔལ་འབྱོར་སོགས་ནས་བོད་པའི་ཁྲོད་དུ་གྲགས་ཅན་མི་སྣ་ཐོན་རྒྱུ་ནི་ཉིན་མོའི་སྐར་མ་ལྟར་དུ་གྱུར་ཡོད།  རྒྱུ་མཚན་ནི་བོད་འདི་རྒྱ་འོག་ཏུ་ཚུད་པ་དང་། བོད་པ་རྣམས་ཀྱིས་བོད་ཀྱི་སྐད་ཡིག་གི་ལམ་ནས་འཚོ་གནས་བྱེད་དབང་མེད་པའི་རྐྱེན་གྱིས་རེད།

རྒྱ་ཡིག་དང་དབྱིན་ཡིག་སོགས་ཡིག་རིགས་གཞན་གྱི་ལམ་ནས་འཚོ་ཐབས་འཚོལ་བཞིན་པའི་བོད་པ་རྣམས་ཀྱི་ཁྲོད་དུ་ཡང་རང་ཉིད་ཀྱི་ནུས་པ་སྤྱི་ཚོགས་ནང་འབུར་དུ་ཐོན་ཐུབ་མཁན་གཅིག་ཀྱང་མ་ལུས་པ་བོད་ཀྱི་རིག་གནས་ལ་ཁ་བསྙེས་ལག་བསྙེས་བྱས་ནས་བྱུང་བ་མ་གཏོགས།  རང་གི་རྩ་བ་མི་རིགས་ཀྱི་རིག་གནས་དང་ཡོངས་སུ་ཁ་བྲལ་བ་ཡིན་ན།  སྲོག་གི་སྙིང་པོ་ཤོར་བ་བཞིན་ཕྱི་རོལ་གྱི་འཇིག་རྟེན་ནང་དུ་འོད་མདངས་གང་ཡང་འཚེར་མི་ཐུབ་པ་ནི་དངོས་ཡོད་གནས་ཚུལ་རེད།   དེ་ལྟར་ན་དྲང་ལྡོག་གང་གི་ཆ་ནས་མིང་དང་གྲགས་པ་རྟ་རྔ་ཙམ་ཁྱེར་རྒྱུ་ཡོད་མཁན་བོད་པ་སུ་ཞིག་ཡིན་ཡང་བོད་དང་འབྲེལ་བ་མེད་པ་གཅིག་ཀྱང་མེད་པ་དང་།  བོད་ཅེས་པའི་ཆ་དེ་ཡོད་པའི་རྐྱེན་གྱིས་དེ་ལྟ་བུའི་ཁེ་ཕན་ཞིག་ཐོབ་པ་ལོས་ཡིན་ལ། བོད་ཅེས་པའི་ཆ་དེ་བོར་ན་ཁོང་ཚོ་ཡང་མི་རིགས་གཞན་གྱི་ཁྲོད་དུ་ཆེས་དཀྱུས་མའི་ནང་གི་དཀྱུས་མ་ཞིག་ཡིན་སྲིད།

ད་ལྟའི་དུས་སུ་ནི་ཕྱི་རུ་༸གོང་ས་མཆོག་གིས་དབུ་འཁྲིད་པའི་ཡུལ་གྱར་སྲིད་གཞུང་དང་བོད་མིའི་ཚོགས་པ་ཡོད་པའི་དྲིན་གྱིས་རྒྱ་ནག་གཞུང་ནས་ཀྱང་བོད་ལ་དམིགས་བསལ་གྱི་སྲིད་ཇུས་དེ་དག་ལག་ལེན་མི་བསྟར་དཀའ་མེད་དུ་ཤར་ཡོད།  ཡིན་ན་ཡང་ང་ཚོ་བོད་པ་རྣམས་ལ་ཉེན་ཁའི་ཚོར་བ་ཞིག་ནི་ངེས་པར་དུ་དགོས་འདུག  ང་ཚོ་འདི་ལྟར་མུ་མཐུད་གཞན་གྱི་ཁུ་ཚུར་གཟེད་ནས་སྡོད་པ་ནི་མཐའ་མ་ལུས་ཤུགས་རྫོགས་པའི་རྒྱུ་ལོས་ཡིན།  དེ་ལས་ང་ཚོས་རང་མི་རིགས་ཀྱི་སྐད་ཡིག་སློབ་པ་ནི་རང་དང་བུ་རབས་ཚ་རྒྱུད་ཀྱི་ཁེ་ཕན་དང་འབྲེལ་བའི་འདུ་ཤེས་དེ་ཁོག་ཏུ་བཟུང་ནས་དབང་བསྒྱུར་བའི་སྲིད་ཇུས་ལ་རྒོལ་ལན་སློག་དགོས་འདུག

ང་ཚོས་བོད་ཁམས་ཡོངས་སུ་ལས་ཁུངས་ཚང་མར་བོད་ཡིག་སྤྱོད་ཆོག་པར་སྐད་འབོད་བྱེད་དགོས་པ་དང་། དམིགས་ཡུལ་དེ་ལྟ་བུ་སྒྲུབ་པར་ཚོགས་པ་དང་སྡེ་ཚན་མི་འདྲ་བ་སྣ་ཚོགས་འཛུགས་དགོས་འདུག  མི་རིགས་རང་སྐྱོང་ས་ཁུལ་དུ་མི་རིགས་རང་གི་སྐད་ཡིག་བེད་སྤྱོད་པ་ནི་རྒྱ་ནག་གི་ཁྲིམས་ལུགས་དང་མཐུན་ཡོད།  གལ་སྲིད་བོད་ཁམས་ཡོངས་སུ་ལས་ཁུངས་ཚང་མར་བོད་ཡིག་བེད་སྤྱད་པ་ཡིན་ན་བོད་པ་ཇི་ཙམ་གྱི་ལས་ཀ་ཐག་གཅོད་བྱེད་ཐུབ་བམ།  དེ་ནི་ཐད་ཀར་ང་ཚོའི་ཁེ་ཕན་དང་འབྲེལ་བ་ཡོད་པ་ཞིག་རེད།

གལ་སྲིད་བོད་ཀྱི་སྐད་ཡིག་དང་རིག་གནས་བོར་བའི་མུན་ནག་གི་མཚན་མོ་དེ་མདུན་དུ་ལྷགས་པ་ཡིན་ན། བོད་པ་རྣམས་ཀྱི་ལས་དབང་གང་འདྲ་ཞིག་ལ་སླེབས་སྲིད་པ་ང་ཚོས་ཚོད་དཔག་བྱེད་ཕོད་དམ།

མདོར་ན། ད་ལྟ་བར་དུ་བོད་པ་རྣམས་ཀྱི་གདོང་ལས་སྣུམ་ཞག་ཅུང་ཟད་ཙམ་ཞིག་མངོན་རྒྱུ་ཡོད་པ་འདི་ནི་བོད་ཀྱི་སྐད་ཡིག་དང་། རིག་གནས། ཆོས་ལུགས་རྣམས་ཀྱི་དྲིན་ཉག་ཅིག་ཡིན་ལ། རྩ་ཆེའི་ནོར་བུ་འདི་དག་བོར་བ་ཡིན་ན་བོད་མིའི་བུ་རབས་ཚ་རྒྱུད་དག་རྒྱ་མི་དང་མགོ་སེར་བ་སོགས་སྟོབས་ཆེན་མི་རིགས་གཞན་གྱི་རྐང་འོག་ཏུ་འཚོ་བཞིན་དུ་སྲོག་གི་རྩ་བ་རུལ་ཟད་དུ་འགྲོ་ངེས་ན།  བོད་སྐད་བོད་ཡིག་སློབ་རྒྱུ་ནི་ལ་རྒྱ་ཁོ་ན་ཙམ་གྱི་དོན་ཞིག་ག་ལ་ཡིན།