བློ་བཟང་དང་ཁོང་ཚོས་དཀའ་ཚེགས་ཆེས་མི་ཉུང་བ་ཞིག་བརྒྱུད་པའི་མཐར། ཤར་ཀོམ་པོའི་གངས་འདབས་སུ་སླེབས་ལ་ཉེ་བའི་སྐབས་ཤིག་གི་མཚན་མོ། ཁོང་ཚོ་དམག་སྒར་ཡོད་སའི་རི་ལུང་ཞིག་དུ་འབྱོར་ནས་ཉིན་བཀང་བོར་གོམ་པ་རྒྱག་མ་ཐུབ་པར། གྱང་ཆག་ཞིག་གི་ནང་དུ་སྐུང་ནས་བསྡད་ན་ཡང་ལམ་བྲོ་ཡང་རྫོགས་ཀྱི་ཡོད་པ་དང་། མི་རེ་ལ་རྩམ་པ་ཕོར་བ་བཀང་རེ་མ་གཏོགས་ཟ་རྒྱུ་ལྷག་མེད་པ་དེ་དག་ཆུ་འཁྱག་དང་ལྷན་དུ་བརྫུས་དེ་ཟོས་རྗེས་སུ། བློ་བཟང་གིས་རང་གི་ཕོར་བའི་ནང་ནས་རྩམ་པ་རྡོག་རྡོག་ཞིག་ལག་ནང་དུ་བཟུང་ནས་ཆུ་ཤོག་ཁུག་མ་ཞིག་གི་ནང་དུ་བསྡུ་ཞོར་དུ། ང་ཚོ་ཚང་མ་ཕོ་གསར་རྐྱང་རྐྱང་རེད། གྲོད་ཁོག་ཅུང་ཙམ་ལྟོགས་ཀྱང་སྐྱོན་ནི་མ་རེད། ངའི་ནུ་མོ་མཚོ་མོ་སྐྱིད་བྱིས་པ་ཡིན་སྟབས་གྲོད་ཁོག་ལྟོགས་མི་ཉན་ཟེར་བཞིན་ཆུ་ཤོག་ཁུག་མའི་ནང་དུ་བཅུགས།
ས་རུབ་པ་དང་ཁོང་ཚོ་རྒྱ་ནག་གིས་ཤར་ཀོམ་པོའི་གངས་འདབས་བར་དུ་གཞུང་ལམ་ཞིག་བཟོ་བཞིན་པ་དེ་ཡི་ནང་ནས་ཤར་རྒྱག་ལ་ཕྱིན་དུས་སུ། བློ་བཟང་གི་སྤུན་མཆེད་བཀྲ་ཤིས་དོན་འགྲུབ་ཀྱིས་བར་སྐབས་ཤིག་ལ། བློ་བཟང་ལ། ཕུ་བོ་ལགས། ད་ནི་ང་རང་གི་ཁ་མ་ན་ནས་གཏན་ནས་འགྲོ་ཐུབ་ཀྱི་མི་འདུག ཁྱེད་ཚོ་སོང་། ང་རང་གིས་ག་ལེར་འདི་ནས་ངལ་གསོ་ཞིག་བྱེད་ཀྱི་ཡིན། གལ་སྲིད་ང་རང་ག་ལེར་ཡོང་མ་ཐུབ་པ་ཡིན་ན་ད་འདི་ནས་ཕྱིར་ཐོན་ཐུབ་ཞིག་འགྲིག་འགྲོ་ངེས་ཡིན་ཟེར་ནས་བཤད་དུས། བློ་བཟང་གིས། དེ་འདྲ་མ་ཟེར། ཁྱེད་རང་གི་ཁ་མ་ན་བཞིན་ཡོད་པ་མ་རེད། ལྟོགས་བཞིན་ཡོད་་པ་རེད། ཤུགས་རྒྱོབས་དང་ང་ཚོ་འདི་ནས་མི་རིང་བར་ཟ་མ་ཞིག་རེག་ངེས་ཡིན་ཟེར་ནས་བཤད་པ་དེར་སྤུན་མཆེད་བཀྲ་ཤིས་དོན་འགྲུབ་ཀྱིས་ཀྱང་ཁ་རོག་གེར་ཤུ་རེ་བྱས་དེ་མུན་ནག་ཁྲོད་དུ་ཚང་མས་ལྷན་དུ་ཕྱིན།
བར་སྐབས་ཤིག་ལ་བློ་བཟང་གིས། གན་ཕྱོགས་སུ་འབྲོག་པ་ཁ་ཤས་ཤིག་ཡོད་ས་རེད། འདི་ནས་ལྕི་བའི་དྲི་མ་བྲོ་བཞིན་འདུག་ཞེས་བཤད་དེ། ཁོང་ཚོ་དེ་ཡི་ཕྱོགས་སུ་ག་ལེར་སོང་དུས། དངོས་ནས་དེ་རུ་ཁོང་ཚོ་ཉེ་སྔོན་ལམ་བར་དུ་མི་ཞིག་དང་འཕྲད་པ་དེ་ཡི་རང་གིས་ཚོང་གྲོགས་ཚོ་ཁྲིད་དེ་གཡག་ལ་ཅ་ལག་བཀལ་ནས་ཚོང་དུ་འགྲོ་བཞིན་པ་དེ་ཡིན་སྟབས། ཁོས་ཀྱང་བློ་བཟང་དང་ཁོང་ཚོ་ལ་ངོ་ཤེས་ཤིག་གི་ཚུལ་དུ་གུར་ཆུང་ཆུང་དེ་ཡི་ནང་དུ་སྣེ་ལེན་བྱས་པ་མ་ཟད། ཇ་ཚ་བོ་བླུད་པ་དང་རྩམ་ཁུག་ཁ་ཕྱེ་ནས་རྩམ་པ་ཟ་རོགས་ཟེར་ནས་ཁོང་ཚོ་ལ་སྣེ་ལེན་བྱས་དུས་སུ། ཚང་མས་རྩམ་པ་གཉིས་རེ་ཟོས་པ་དང་ཁོང་ཚོ་དེ་ནས་འགྲོ་ཁར་ཁོང་ཚོས་ལག་པ་ནས་རྩམ་པ་རས་ཁུག་བཀང་ཉོས་པ་དང་ཆུ་མངར་མོ་ཁ་ཤས་ཤིག་དང་བཅས་ཉོས་དེ་ཁོང་ཚོ་མུ་མཐུད་དུ་ལམ་ལ་ཆས་པ་རེད།
ཟླ་བ་ཇེ་གསལ་དུ་འགྲོ་བཞིན་པ་དང་། ཁོང་ཚོས་མིག་ལམ་དུ་ཤར་ན་འོང་བ་དེ་ནི་གངས་རི་མཐོན་པོ་ཞིག་ཡིན་སྟབས། བློ་བཟང་གིས། གངས་རི་འདི་ནི་ཤར་ཀོམ་པོ་རེད། ད་ང་ཚོ་འདི་ནས་ངལ་གསོ་བྱས་དེ་སང་ཞོགས་སྔ་བོ་ལམ་ལ་ཆས་པ་ཡིན་ན་མ་གཏོགས། དོ་ནུབ་སོང་ན་གངས་རིའི་ནང་ནས་ཉེན་ཁ་ཆེན་པོ་ཡོད་པ་རེད། གངས་ཆག་བར་དུ་ལྷུང་ན་རོ་ཡང་རེག་མི་སྲིད་པ་ལྟ་བུ་ཡིན་ཞེས་བཤད་དུས། ཁོང་ཚོ་དགོད་ཞོར་དུ་ད་རེབས་ཀྱི་འདི་ནི་དངོས་ནས་ཤར་ཀོམ་པོ་རེད་དམ་ཟེར་ནས་ལན་བཏབས་པ་རེད།
ཞོགས་པ་གནམ་མ་བླངས་སྔོན་ཙམ་དེར་ཁོང་ཚོ་ཡར་བླངས་དེ། གངས་རི་སྙེགས་ནས་མདུན་ཕྱོགས་སུ་བསྐྱོད་བཞིན་པའི་ལམ་བར་དུ་འགྲུལ་བ་ཁ་ཤས་ཤིག་དང་འཕྲད་ཀྱང་། ཁོང་ཚོས་སུས་ཀྱང་ཁོང་ཚོ་གང་དུ་འགྲོ་མཁན་ཡིན་མིན་མི་འདྲི་ལ། ཁོང་ཚོས་ཀྱང་ཕར་ལ་སྐད་ཆ་གང་ཡང་མ་བཤད་པར་རང་རང་གི་ལམ་ཁ་དེད་ནས་གང་ཐུབ་ཅི་ཐུབ་ཀྱིས་འགྲོ་བཞིན་ཡོད་པའི་སྐབས་ཤིག་ལ། ཕོ་གསར་ལོ་ན་ཉི་ཤུ་ཟིན་མི་ཟིན་ཙམ་ཞིག་དང་འཕྲད་པ་དེས་ཁོ་རང་རི་བོ་ཕར་ཕྱོགས་ནས་ཡོང་བ་ཡིན་པ་དང་། ལོ་རྟག་པར་བལ་ཡུལ་ནས་གུང་གསེང་སྐབས་སུ་འདི་ལྟར་ཡུལ་ལ་ཡོང་གི་ཡོད་ཅེས་བཤད་དུས། བློ་བཟང་གིས་གོང་དུ་དམག་མི་སྲུང་མཁན་འདུག་གམ་ཟེར་ནས་དྲིས་དུས་སུ།
ལམ་འགྲོ་བ་ཕོ་གསར་དེས་དམག་མི་ཡོད་ས་ད་དུང་ཐག་ཅུང་རིང་བོ་འདུག ཡིན་ཡང་། ཁྱེད་ཚོ་མགྱོགས་པོ་སོང་བ་ཡིན་ན་གངས་འཛེགས་བྱེད་མཁན་གྱི་ཕྱི་རྒྱལ་བ་སྐོར་ཞིག་གི་རས་གུར་ཆུང་ཆུང་རེ་ཕུབ་ནས་ཡོད་པ་དེ་འདྲ་ཞིག་ལ་ཐུག་ངེས་ཡིན། དེ་ཡི་གོང་དུ་འགྲོ་མི་ཉན། དེ་ནས་ཐད་ཀར་གངས་རིའི་ཕྱོགས་སུ་ལམ་ཁ་ཨེ་ཟིན་ལ་བལྟ་དགོས་ཀྱི་ཡོད་པ་རེད་ཅེས་ལན་བཏབ་པ་དེས་ཁོང་ཚོ་ལ་དགའ་སྤྲོ་དང་སེམས་འཚབ་གཉིས་ཀ་སྐྱེ་སུ་བཅུགས་པ་རེད།
ཕྱི་རྒྱལ་བ་རི་འཛེགས་རུ་ཁུག་དེ་ཡི་རས་གུར་འགྲམ་དུ་འབྱོར་ནས་ཁོང་ཚོས་ཇ་ཞིག་སློང་དུས། དེ་ཡི་ནང་དུ་བོད་མི་མ་བྱན་གཅིག་་གཉིས་ཤིག་ཡོད་པ་དེ་དག་གི་སྐད་སྒྱུར་འོག་ཁོང་ཚོ་ལ་ཇ་ཚ་བོ་འཐུང་རྒྱུ་རེག་པའི་སྒང་ལ་མངར་ཟས་ཀྱི་རིགས་མི་ཉུང་བ་ཞིག་ཀྱང་སྤྲད་པ་རེད། སྐབས་དེར་བོད་པ་མ་བྱན་དེ་གཉིས་ཀྱིས། ཁོང་ཚོ་ལ་ཁྱེད་ཚོ་ཕྱིར་ལོག་ན་ཡག་པོ་འདུག དེང་སང་གངས་བཀས་དེ་ཁ་སང་འདི་ནས་ཕར་འགྲོ་མཁན་གྱི་བུ་མོ་ལོ་ན་བཅུ་བདུན་ཅན་ཞིག་གངས་གསུབ་དུ་ཤོར་ནས་ང་ཚོས་རོགས་བྱས་དེ་སྲོག་སྐྱོབས་ཨེ་ཐུབ་བལྟས་ཀྱང་། ཐར་སྲོག་སྐྱོབས་ཐུབ་མ་སོང་ཟེར་ནས་བློ་བཟང་དང་ཁོས་འགྲོ་རོགས་ཚང་མ་ལ་དེ་ལྟར་བཤད་པ་རེད།
མུ་འགོད།
ཇིང་སྲས་མིག་གསུམ་པ་ལགས། ང་ཚོ་མ་བྱན་ཟེར་བའི་མིང་ཚིག་ཡོད་པ་རེད་འདུག སྤྱིར་ན་འདི་ནི་ཟས་གཡོས་སྤྱོར་བྱེད་མཁན་གྱི་ཕོ་མོ་གཉིས་ཀ་ལ་གོ་བ་བླངས་ན་འགྲིག་གི་འདུག བུད་མེད་ལ་བྱན་མོ་དང་བུ་ལ་བྱན་ཕོ་ཟེར་སྲོལ་ཡང་འདུག
བྱན་ཟེར་བ་ནི་སྤྱིར་བཏང་བྱང་དུ་ཆུབ་པའི་དོན་དང་འདྲ་བ་བོ་རེད།
བོད་པ(མ་བྱན)འདིས་དོན་ཅི་རེད་ལགས་རྩ་བ་ནས་གོ་མྱོང་མེད་པར་བསམ།