ལས་འགུལ་འདི་ཐོབ་ཐང་རྩོད་པའི་ལས་འགུལ་ཞིག་མིན།

ང་ཚོས་བུད་མེད་ཀྱི་ནུས་ཤུགས་སྤེལ་དགོས་དོན་གཅིག་དེ་ས་གནས་འཐུས་མིའི་ཚོགས་འདུ་དང་གཞན་དེ་སྤྱི་འཐུས་ལྷན་ཚོགས་རེད་ཅེས་བཀའ་ཁྲི་མཆོག་གིས་བོད་ཀྱི་བུད་མེད་ཀྱི་ནུས་ཤུགས་སྤེལ་བའི་ཆེད་དོན་བགྲོ་གླེང་ཐོག་གསུངས་ཡོད།
 
ཟླ་འདིའི་ཚེས་ ༤ ནས་ཚེས་ ༥ བར་གྱི་ཉིན་གཉིས་རིང་བོད་གཞུང་དཔལ་འབྱོར་ལས་ཁུངས་ཁྱབ་ཁོངས་ཀྱི་སྤྱི་ཚོགས་ཡར་རྒྱས་ཐེབས་རྩ་ཁང་གི་གོ་སྒྲིག་འོག་བོད་ཀྱི་བུད་མེད་ཀྱི་ནུས་ཤུགས་གོང་སྤེལ་སླད་ཆེད་དོན་བགྲོ་གླེང་ཞིག་གངས་སྐྱིད་སྤྱི་ཐབ་ཐོག་ཁང་དུ་སྐོང་འཚོགས་གནང་ཡོད་ལ། བགྲོ་གླེང་དེའི་སྟེང་སྐུ་མགྲོན་གཙོ་བོ་བཀའ་ཁྲི་ཟམ་གདོང་རིན་པོ་ཆེ་གཙོས་པའི་བོད་གཞུང་དཔལ་འབྱོར་བཀའ་བློན་དང་ཤེས་རིག་བཀའ་བློན་བཅས་བཀའ་བློན་རྣམ་གཉིས་དང་། དེ་བཞིན་བོད་གཞུང་དང་ཕྱོགས་མཐའ་ཁག་ནས་ཡོང་བའི་གནད་ཡོད་མི་སྣ་ཁག་ཅིག་ཆེད་ཕེབས་ཐོག་དབུ་འཛུགས་གནང་བ་དང་། བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཐེངས་འདིའི་བུད་མེད་ཀྱི་ཆེད་དོན་བགྲོ་གླེང་དབུ་འབྱེད་དང་འབྲེལ་བཀའ་སློབ་གསུང་བཤད་གནང་ཡོད།

བཀའ་ཁྲིས་གསུངས་དོན། འདས་པའི་མི་ལོ་སུམ་སྟོང་ཡས་མས་ཀྱི་རིང་བོད་མི་རིགས་ཀྱི་ཁྲོད་དུ་མིའི་སྤྱིའི་ཚོགས་ཀྱི་དཔལ་ཡོན་དར་བ་དང་། དུས་རབས་ ༢༡ པའི་བར་ལ་ཕྱིར་བལྟས་ཤིག་བྱས་ཚེ། བོད་པའི་སྤྱི་ཚོགས་ནང་སྐྱེས་པ་དང་བུད་མེད་ཀྱི་བར་ལ་འདྲ་མཉམ་མེད་པ་དང་། གཅིག་གིས་གཅིག་ལ་གནོན་ཤུགས་དང་བཙན་དབང་བྱས་པ། ལྷག་པར་དུ་རྒྱུ་མཚན་དེ་དག་ལ་བརྟེན་ནས་སྤྱི་ཚོགས་ནང་བསམ་ཚུལ་དང་དཀའ་རྙོག་བྱུང་མ་མྱོང་ལ། འཛམ་གླིང་གི་སྤྱི་ཚོགས་གཞན་དང་མཚུངས་བསྡུར་བྱེད་སྐབས་ཀྱང་བོད་པའི་སྤྱི་ཚོགས་ཡག་པོ་རེད་བསམ་གྱིན་ཡོད།  སྤྱི་ཚོགས་ཀྱི་དཔལ་ཡོན་དར་བ་ནས་བཟུང་ཕོ་མོ་འདྲ་མཉམ་དང་ཕོ་མོའི་མཐུན་ལམ་གྱི་གནས་བབས་དེ་ཡག་པོ་ཡོད་བསྡད་པ་ཞིག་རེད། བོད་པའི་སྤྱི་ཚོགས་ཁྲོད་བུད་མེད་ཀྱི་ནུས་ཤུགས་སྤེལ་བའི་དགོས་མཁོ་གང་འདྲ་བྱས་ཏེ་ཆགས་པ་རེད་ཅེ་ན། ༡༩༥༩ ལོར་ང་ཚོ་བཙན་བྱོལ་ཏུ་འབྱོར་བའི་སྐབས་བོད་མི་ཁྲི་ ༨ ཙམ་ཡོད་པའི་ཁྲོད་དུ་བུད་མེད་ཀྱི་གྲངས་འབོར་ཧ་ཅང་ཉུང་ཉུང་རེད། གང་ཡིན་ཞེ་ན། ནང་ཆ་ཚང་རུབ་རུབ་བྱས་ཏེ་ཡོང་མཁན་གཅིག་ཀྱང་བྱུང་མེད་པ་དང་། སྐབས་དེར་སྡེ་བ་གཞུང་གི་སྐུ་དྲག་དག་ལ་ཆ་མཚོན་ནའང་ལྕམ་དང་ཨ་རག་མཉམ་དུ་སླེབས་མཁན་མི་ཚང་གཉིས་མ་གཏོགས་མེད་ལ། མང་ཆེ་བ་ཧྲེང་ཧྲེང་བྱས་ཏེ་ཡོང་བ་ཡིན་པས་ང་ཚོའི་སྤྱི་ཚོགས་ནང་ལ་གྲངས་འབོར་མང་ཉུང་གི་ཁྱད་པར་ཞིག་སྐབས་དེ་ནས་ཆགས་བསྡད་ཡོད། དེར་བརྟེན། ད་ལྟ་ཆ་སྙོམས་ཡོང་བ་དང་ནུས་ཤུགས་སྤེལ་བའི་ཐབས་ལམ་ཞིག་བསམ་བཞིན་དུ་འདུ་ཤེས་དང་ལྡན་པའི་ཐོག་ནས་མ་གནང་ཚེ། ག་དུས་ཡིན་ཡང་མང་ཉུང་དང་ཁྱད་པར་འགྲོ་བའི་གནས་ཚུལ་ཞིག་ཡོང་སྲིད། ད་ལྟ་ང་ཚོའི་གནས་སྟངས་ཞེ་དྲག་སྐྱོ་བོ་དེ་འདྲ་མ་རེད། བཙན་བྱོལ་བོད་གཞུང་གི་ད་ལྟའི་གཞུང་ཞབས་པ་ ༤༦༤ ཡོད་པའི་ཁྲོད་དུ་བུད་མེད་ ༡༥༥ ཡོད་ལ། བརྒྱ་ཆ་དམའ་བོ་ཆགས་མེད་བསམ་གྱིན་ཡོད། གཞུང་ཞབས་པའི་གྲངས་འབོར་ནང་མ་ཚུད་པའི་ས་གནས་མགོ་འཛིན་ལས་ཁུངས་ཁག་ཏུ་སྐྱེས་པ་ ༤༤༦ དང་བུད་མེད་ ༢༧༡ ཡོད། དབུས་ཀྱི་གཞུང་ཞབས་ས་གནས་རང་ཁོངས་ལས་བྱེད་ནང་བུད་མེད་ཀྱི་བརྒྱ་ཆ་དེ་མཐོ་བོ་ཡིན་ནའང་། ས་གནས་འཐུས་མིའི་ཁྲོད་ཉུང་ཉུང་ཞེ་དྲག་རེད། ས་གནས་འཐུས་མི་ ༣༤༠ ཡོད་པའི་ཁྲོད་བུད་མེད་ ༣༧ མ་གཏོགས་མེད་སྟབས། ང་ཚོས་ནུས་ཤུགས་སྤེལ་དགོས་པའི་ས་ཆ་གཅིག་དེ་ས་གནས་འཐུས་མིའི་ཚོགས་འདུ་དང་སྤྱི་འཐུས་ལྷན་ཚོགས་གཉིས་རེད་བསམ་གྱིན་འདུག  མཉམ་འབྲེལ་འགན་འཛིན་ལྷན་ཚོགས་ཀྱི་ཚོགས་མི་ ༡༥༤ ཡོད་པའི་ནང་བུད་མེད་ ༢༥  མ་གཏོགས་མི་འདུག་ལ།  རང་དབང་ལྡན་པའི་ལས་འགུལ་ཚོགས་ཆུང་ཁག་ཏུ་ཡང་བུད་མེད་ཞེ་དྲག་དཀོན་པོ་རེད། རང་དབང་ལྡན་པའི་ལས་འགུལ་ཁག་གི་ཚོགས་མི་ ༢༠༦ ཡོད་པའི་ནང་ ༡༩༠ སྐྱེས་པ་དང་ ༡༦ བུད་མེད་རེད།  ས་གནས་ཁག་གི་བརྒྱ་དཔོན་ ༢༠༦ ཡོད་པའི་ནང་བུད་མེད་ ༢༤ མ་གཏོགས་མི་འདུག འདི་ཚོར་བལྟས་འོང་དུས་ང་ཚོས་ངེས་པར་དུ་བུད་མེད་ཀྱི་ནུས་ཤུགས་སྤེལ་བའི་ལས་འགུལ་ཞིག་བསམ་བཞིན་དུ་མ་བྱས་པར་ཁྱད་པར་ཡོད་པ་མ་རེད་ཅེས་བཞག་ན། གཅིག་བྱས་ན་མང་ཉུང་འཆོར་བའི་ཉེན་ཁ་ཡོད་པ་རེད། དེའི་ཕྱིར། ག་དུས་ཡིན་ཡང་འབད་བརྩོན་བྱས་ཏེ་འགྲོ་དགོས་པ་གལ་ཆེན་པོ་རེད། ང་ཚོས་འབད་བརྩོན་བྱེད་པར་གཞི་རྩ་ཡོད་པ་རེད། དེ་ག་འདྲ་བྱས་ནས་ཡོད་པ་རེད་ཅེ་ན། གལ་ཆེ་ཤོས་དེ་གཞོན་སྐྱེས་ཚོའི་མི་འབོར་ལ་བལྟ་དགོས་པ་རེད། བཙན་བྱོལ་བོད་གཞུང་གིས་འབྲེལ་བ་བྱེད་དགོས་ས་དང་ཁྱབ་ཁོངས་སུ་ཡོད་པའི་སློབ་གྲྭ་ཁག་ཡོངས་རྫོགས་ནང་ ༢༠༠༩ ལོའི་ལོ་མཇུག་ཏུ་འཛིན་གྲྭ་བཅུ་གཉིས་མན་ཆད་ཀྱི་སློབ་གྲྭ་འགྲིམས་བཞིན་པ་ ༣༨༣༤༧ འདུག དེའི་ཁྲོད་བུ་མོ་  ༡༨༨༠༥  དང་། བུ་༡༩༥༥༢  བཅས་གྲངས་འབོར་མང་ཉུང་ཆེན་པོ་བྱུང་ཡོད་པ་མ་རེད། དེར་བརྟེན།  མ་འོངས་པར་སྤྱི་ཚོགས་ཀྱི་ལས་དོན་ཚང་མའི་ནང་ལ་གཅིག་མཚུངས་ཀྱིས་ཆ་ཤས་ལེན་ཐུབ་རྒྱུའི་གོ་སྐབས་ཡོད་པ་རེད། ཅེས་གསུངས།

ཡང་བཀའ་ཁྲི་མཆོག་གིས་མུ་མཐུད་དོན། ད་ལྟའི་ང་ཚོའི་ལས་འགུལ་གྱི་ངོ་བོ་ངོས་འཛིན་སྟངས་མ་ནོར་བ་ཞིག་གནང་དགོས་པ་བཀའ་ཤག་གི་བསམ་ཚུལ་ནང་ཡོད་པ་དང་། ལས་འགུལ་འདི་ཐོབ་ཐང་རྩོད་པའི་ལས་འགུལ་ཞིག་མ་རེད། སྤྱིར་བཏང་ང་ཚོ་ནང་བ་དང་བོད་པ་ཚོས་ཐོབ་ཐང་གི་སྐོར་ལ་ཞེ་དྲག་སྐད་ཆ་བཤད་ཀྱིན་མེད་པར་ལས་འགན་གྱི་སྐོར་ལ་སྐད་ཆ་བཤད་ཀྱིན་ཡོད་པ་རེད། སོ་སོས་སྒྲུབ་དགོས་པའི་ལས་འགན་དང་ལྷག་པར་དུ་འཇིག་རྟེན་སྤྱི་ཡོངས་ལ་འཁྲི་བའི་ལས་འགན་དེ་ཞེ་དྲག་གལ་ཆེན་པོར་བརྩི་བཞིན་ཡོད་སྟབས། སོ་སོའི་ལས་འགན་སྒྲུབ་པར་རྗེས་ལུས་མ་ཐེབས་པ་དང་། ལྷག་པར་དུ་བུད་མེད་ཀྱི་ལས་འགན་སྒྲུབ་པར་བུད་མེད་རྗེས་ལུས་མ་ཐེབས་པ་ཞིག་ཡོང་རྒྱུར་ཆེད་དུ་དམིགས་པའི་ལས་འགུལ་ཞིག་རེད་མ་གཏོགས། བུད་མེད་ཀྱི་ཐོབ་ཐང་ཤོར་འགྲོ་གིན་འདུག ཐོབ་ཐང་དེ་རྩོད་ཀྱིན་ཡོད་ཟེར་བའི་རྩོད་པ་རྒྱག་པའི་ལས་འགུལ་ཞིག་རྩ་བ་ནས་མིན་པར། དེ་ནི་བུད་མེད་ཀྱི་ལས་འགན་སྒྲུབ་པར་རྗེས་ལུས་མ་ཐེབས་པ་ཇི་ལྟར་བྱ་རྒྱུའི་དོན་ལ་བརྩམས་པའི་ལས་འགུལ་ཞིག་ཡིན། ཞེས་གསུང་བྱུང།

ཐེངས་འདིའི་ཆེད་དོན་བགྲོ་གླེང་འདི་ནི། བོད་གཞུང་དཔལ་འབྱོར་ལས་ཁུངས་ཁྱབ་ཁོངས་ཀྱི་སྤྱི་ཚོགས་ཡར་རྒྱས་ཐེབས་རྩ་ཁང་ social and Resource Develepment Fund ཞེས་པའི་སྡེ་ཚན་གྱིས་བཙན་བྱོལ་ནང་མི་ལོ་ལྔ་བཅུ་འགོར་བའི་བུད་མེད་ཀྱི་ནུས་ཤུགས་སྤེལ་བའི་ཆེད་དོན་བགྲོ་གླེང་ཐོག་མ་དེ་ཆགས་ཡོད་པ་དང་། དེའི་སྟེང་བཀའ་ཁྲི་མཆོག་གཙོས་པའི་དཔལ་འབྱོར་བཀའ་བློན་དང་ཤེས་རིག་བཀའ་བློན། དེ་བཞིན་སྐུའི་གཅུང་མོ་རྗེ་བཙུན་པདྨ་མཆོག་དང་བཀའ་ཟུར་རིན་ཆེན་མཁའ་འགྲོ་མཆོག  བོད་གཞུང་ལྷན་ཁང་ཁག་ཡོངས་ཀྱི་དྲུང་ཆེ། བདེ་ལེགས་སྨན་ཁང། སྨན་རྩིས་ཁང། གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་མི། ངྷ་ས་ཉེ་འགྲམ་གྱི་བཙུན་དགོན་ཁག་གི་བཙུན་མ། རྒྱ་གར་བྱང་ཕྱོགས་དང་ལྷོ་ཕྱོགས་བཅས་བོད་མི་འདུས་སྡོད་ཁག་གི་བུད་མེད་ཀྱི་སྣེ་འཁྲིད་མི་སྣ་བཅས་མི་སྣ་ ༧༦ ལྷག་འདུ་འཛོམས་ཀྱིས་ཉིན་གཉིས་རིང་བགྲོ་གླེང་གནང་ཡོད།