བོད་མིའི་སེམས་ཁམས་རེ་འགའ་སྔོགས་ན།
ལྷམ་ཀོག
ཡུན་ནས་ཡུན་ཏུ་མི་ཟས་སུ་རོལ་ནས་ལོ་ངོ་སུམ་ཅུ་ཕར་བསྐྱལ་ཟིན་པའི་རིང་འདི་ལ། རང་སེམས་ལས་ཁོར་ཡུག་དང་ཁོར་ཡུག་ལས་རྒྱང་རིང་དུ་མིག་ཤེས་གློད་པའི་སྟངས་ཀ་ཙམ་བྱས་པ་ཡིན། འོན་ཀྱང་ཅི་ཙམ་འགུལ་ཀྱང་རང་གི་གྲིབ་མ་ཙམ་ལས་འདའ་འགོངས་བྱ་མི་ནུས་པའི་ལྟ་ཚུལ་ཞིག་གིས་བཅུམས་ཤིང་བསྡམས་ལ། གཞན་གྱི་ལྟ་ཚུལ་མཁྲེགས་པོ་ཞིག་གིས་ནི་དེད་ཅིང་ཕུད་དེ། ཅི་ཞིག་བྱ་དགོས་པ་ཡང་མི་ཤེས་པའི་ན་ནིང་དང་ད་ལོའི་ཉི་མ་རེ་རེ་ནི་བཟང་དགུས་བསུས་པ་ཡིན་ནམ། ངན་དགུས་ལྷུང་བ་གང་ཡིན་མི་ཤེས་པའི་གྱ་ཚོམ་དུ་ལུས་ཏེ། སྡར་མའི་མིག་ཤེས་ལྷེམ་གྱིན་ལྷེམ་གྱིན་ཨམ་འབྱོག་སྲབ་མོ་འདི་འདར་གིན་འདར་གིན་ཡོད་པའི་སྐབས་སུ། རྒྱ་བོད་གྲོས་མོལ་སྐབས་དགུ་བ་ཉེ་བར་མཐུད་པའི་གསར་འགྱུར་ཞིག་སྒེའུ་ཁུང་ལས་ཚུར་འཕོ་བ་དང་། དེ་དང་དེའི་རྒྱུ་རྐྱེན་ལ་དཔྱོད་ཅིང་རྒྱ་ནག་གི་སྐབས་ལྔ་བའི་བོད་དོན་ཚོགས་འདུ་ལ་སྐྲག་ཅིང་སྐྲག་པའི་ངང་དུ་གྱི་ནར་ཡོད་དུས་ཤིག་ལ། རང་སེམས་གཡེངས་སྤྱད་ཀྱི་དེབ་གཉིས་ལག་ཏུ་རེག་པ་ནི། འོད་ཟེར་ལགས་ཀྱི་གངས་སེང་གི་ངར་སྒྲ་དང་། ཞོགས་དུང་ལགས་ཀྱི་གནམ་ས་གོ་འབྱེད་ གཉིས་ཀྱི་དེབ་དེ་གསར་དུ་ཀློག་སྐལ་བྱུང་སོང་། དེབ་དང་པོ་དེ་ནི་རྩོམ་པ་པོས་གཅེས་སྲོག་ཐེད་དུ་བོར་ནས་ན་ནིང་གི་ཉིན་ཐོ་རེ་རེ་བྲིས་ཏེ་མི་བུ་ནི་འདིའོ།། གསར་བརྗེ་ནི་འདིའོ། དཔའ་བོ་དང་དཔའ་མོ་ནི་འདིའོ།། ཁྱིམ་ཚང་གཅིག་གི་རུས་གཟེར་ནི་འདིའོ་ཞེས་དངོས་སུ་རྣ་སྒོར་སྒྲོག་པ་དང་མཚུངས་ལ། འདི་ནི་བརྗེད་དུ་མི་རུང་བའི་དྲན་ཐོ་རྡོ་རིང་མ་ཁྲག་གི་ཐམ་ཀ་ཅན་ཞིག་ཡིན་པའི་ སྣང་བརྙན་དེ་གནམ་ལ་ཀ་བ་བཞིན་དུ་བསླངས་པའི་ཚོར་བ་ཞིག་ནི་རི་རབ་ཉིལ་བ་དང་རྒྱ་ མཚོ་སྐྱོམས་པ་ལྟར་སྐྱེས་འོང་། རེ་ཞིག་དེབ་དེའི་ མཇུག་རྫོགས་ནས་དངན་པ་ཡིད་ཚིམས་པ་ཞིག་གིས་ངོ་གདོང་དྲོད་ལམ་ལམ་དུ་བཏང་ནས་ངལ་ གསོས་པ་ཡིན། སྐབས་དེར་རང་སེམས་འདི་གྲོག་མ་ནག་པོ་ ཞིག་ལྕགས་ཐབ་ཚ་བོ་སྟེང་ན་འགྲེ་ལྡོག་རྒྱག་པ་ལྟ་བུའི་ངང་ནས་འཚུབ་འཚུབ་བྱེད་ གྱིན་ཡོད། དེ་མུར་མདུན་ཅོག་སྟེང་ལ་གསར་དུ་བཞག་ཡོད་པའི་དེབ་གཉིས་པ་དེ་བློ་རྩེ་ཆིག་ བསྒྲིམས་ཀྱིས་བལྟས་གིན་བལྟས་གིན། དེབ་ངོས་སུ་ཡིག་འབྲུ་རེ་རེ་གཡོ་གིན་འདུག་པའི་ཞེ་སྣང་ཚ་བོ་ཞིག་བྱིན་ཅིང་། ཡང་སྐབས་ལན་རེར་ལྷ་མེད་འདྲེ་མེད་སྨྲ་བའི་རྩོམ་པ་པོ་ འདིས་ལྷ་ཀླུའི་དཔུང་མཐུག་པའི་ཡུལ་གྲུ་འདི་ཡི་ཆེད་དུ་འཇིགས་པ་དང་སྐྲག་པ་ དངངས་པ་དང་འདར་བ་བཅས་ཀྱི་ངང་དུ་འདི་ལྟ་བུ་ཞིག་འབྲི་དགོས་པ་ག་རེ་ཡིན་ནམ་སྙམ། ད་དུང་དཔེ་དེབ་འདི་ནི་ས་གནས་ག་གེ་མོ་ནས་དོན་དག་འདི་བྱུང་སོང་། མི་ཆེ་གེ་མོ་ལ་དོན་དག་འདི་བུད་ཐལ་ཞེས་པ་ལྟ་བུའི་སྐད་སྒྲ་ མཐོ་འང་སྲོག་དབང་ཕྲ་བའི་ཚུལ་དུ་མ་ལུས་ཤིང་། འདི་ནས་ ཞབས་བརྟན་འདི་སྒྲུབ་གིན་ཡོད། གན་ལ་ཡར་ཞུ་འདི་བྱས་ཡོད། ཅེས་ པ་ལྟ་བུའི་སྙན་སྙན་འདྲ་ཡང་རེ་འབྲས་མི་རྙེད་པའི་གཡས་སུ་མ་ལྷུང་། འཇིགས་སྐུལ་ལ་ངོ་རྒོལ། ཁ་བྲལ་ལ་ ངོ་རྒོལ། ཞེས་པ་ལྟ་བུའི་གཡོན་དུ་མ་ལྷུང་བའི་ངང་ནས། དོན་ལ་རྐང་འཁྱིལ་བ། ཚིག་ལ་སྣུམ་འཁོལ་བའི་མཚམས་སྦྱོར་དང་འགྲེལ་བཤད། ལྟ་ཚུལ་བཅས་འཁོད་འདུག་པས་ངོ་མ་རྗེས་སུ་ཡི་རངས་འབུལ་འོས་ པ་ཞིག་ཏུ་མཐོང་། འདི་ལ་བལྟས་གྱིན་ནམ་ཞིག་གི་དུས་སུ་ཞི་བའི་སྦྱོར་བ་ལ་བརྩོན་ནུས་པའི་མི་བུ་ རེ་ཡོད་ན། ཐོག་མའི་འཆར་གཞི། བར་གྱི་བློ་བཀོད། མཇུག་གི་རྩོད་ལེན་གྱི་ཕྱོགས་ལ་གོ་སྐོན་བློ་འགུགས་མི་ཉུང་ བ་རེ་འདུག་པས་དགའ་བ་སྐྱེས་ཡོད། གལ་ཏེ་ཞི་བ་ནི་ཞི་བ་རང་ཡིན་པས་ཐོག་མཐའ་བར་དུ་ཞི་བའི་ངོ་བོ་དང་སྦྱོར་བ་མཇུག་ འབྲས་ལེགས་པར་རབ་ཏུ་རྟོགས་པ་ཞིག་བྱུང་ན། ཚེ་སྲོག་གི་འགྲོ་གྲོན་ཇེ་ཉུང་དང་།མནར་གཅོད་ཀྱི་འཚོག་རྡུང་ཇེ་ཆུང་། ཁ་རྡུང་གི་དམོད་ཚིག་ཇེ་ཞན་དུ་འགྲོ་བ་ཞིག་ལོས་ཡིན་སྙམ་ པའི་བསམ་བློ་རྒྱ་ཡན་པ་ཞིག་ང་ལ་བཅོས་མིན་དུ་སྐྱེས་འོང་བས། མི་ ཚང་མས་དེབ་ཆུང་འདི་ལྟ་བུ་རེར་ཟུར་ལྟ་དང་ཉམས་མྱོང་གི་ཚོར་བའི་སྣོན་པ་བྱས་ན་ ཨང་སྙམ། དེ་ལྟ་མོད། ཞོགས་དུང་ཞེས་ན་རྭ་འདར་ཞིང་མིག་རྩ་འཁྲིགས་པ་རེ་ཡང་ཁེག་མེད་དུ་སྲིད་ན་ཐང་ མོད། དེ་ནི་རང་གི་རིག་གནས་ཀྱི་ལྟ་ཚུལ་གཞན་ཞིག་ལགས་པས་དུས་ཚིགས་འདི་འདྲ་ལ་བཏང་ སྙོམས་སུ་བསྐྱུར་ན་མཛེས་ཨང་། མཐུན་པ་མཉམ་གནས་ཤིག་ འུ་ཅག་སྤྱི་བོ་གནམ་བསྟན་ཚང་མར་ཡོད་པ་ནི་སྒེར་གཅོད་ལ་དཔུང་བ་མཉམ་བསྡོངས་ ཀྱིས་རྒོལ་བ་དེ་ག་ལགས་ན། རེ་ཞིག་སྔར་གྱི་མི་མཐུན་པ་ དེ་ཞོག་ལ་དཔེ་དེབ་འདིར་གཟིགས་ཤིག་དང་བག་ཕབ་པོ་མ་རེད་དམ།
ངས་ནི་དེ་ལྟ་བུ་ཞིག་ཏུ་ སེམས་ནས་དཔེ་དེབ་འདི་མཆན་དུ་བཙིར་ནས་ཀུན་པོར་བལྟ་རྒྱུའི་རེ་བ་འདོན་གིན་ཡོད། དཔེ་དེབ་འདི་རྩོམ་མཁན་གྱི་སྐུ་ཞབས་ཞོགས་དུང་ནི་ང་ཚོས་མགོན་དང་སྐྱབས་སུ་ བཀུར་ཞིང་། ཐེད་ཀྱི་སྔོ་ས་དང་ལོ་མའི་སེར་ས་མ་འཕུལ་ བར་བཅུད་དང་ཉིང་ཏིག་གི་དྭངས་མ་ཅི་ཡོད་འདོད་རྒུར་མཆོད་མྱོང་བ་དེ་ཀོའི་གྲས་ སུ་མེད་ལ། དམངས་ཀྱི་འཐུས་ཚབ་པར་བཞག་ནས་དམངས་དོན་ཁ་ ལ་ཁྱེར་ཏེ་མགོ་བདེ་ལྕེ་དམར་གྱི་རྩོལ་བས་རང་དོན་དམར་དམར་བོ་དཀོར་མཛོད་དུ་ སྤུངས་ཡོད་པའི་སྐུ་ངོ་དེ་རིགས་ཀྱང་མ་རེད། ཁོ་ནི་ མདོ་དབུས་ཁམས་གསུམ་གྱི་མགོ་ཡོད་ཡོད་ཚང་མས་རྡུང་འདོད་སྐྱེས་ཤིང་། ལག་ཡོད་ཡོད་ཚང་མས་གཅར་འདོད་ཤོམ་མྱོང་བའི་ལྟ་ལོག་པ་ཞིག་སྟེ། ཁྱེད་ཀྱི་ཞེ་འདོད་དང་ཀུན་ནས་མི་མཐུན་པ་ཞིག་རེད་མོད། ཁོའི་དེབ་ཆུང་དེས་ཐེག་ཚད་ཅིག་ཁུར་ནས་ནུས་ཚོད་ཅིག་ཤོད་གྱིན་བསླེབས་སོང་བས། རེ་ཞིག་སྐུ་ངོ་རྒྱགས་པ་འགའི་ཐོད་ལ་གཏར་ཁ་དང་། ན་ གཞོན་མགོ་གཡེངས་འགའི་སེམས་ལ་ཙག་ཤེད་སློང་གིན་མཇལ་ཐུབ་པ་བྱུང་བས་ང་རང་དགའ་ ཡོད། འོན་ཀྱང་ངས་ནི་ཞོགས་དུང་ཚད་མར་ཁས་བླངས་པ་དང་ ཞོགས་དུང་ གི་རྒྱབ་རྩར་བསྙེས་འདོད་པ་དེ་མིན་ཡང་། ཞོགས་དུང་གིས་འཚོ་གནས་སྨྲ་བ་ཞིག་གིས་ཨམ་ཚུགས་བསྡམས་ཏེ་རང་གི་འགན་འཁྲི་བར་མ་ དོ་རུ་མ་བཞག་པར་ཐོན་པ་དེའི་ཕྱིར་རོ། དེ་ལས་གཞན་ནང་ ཆོས་དོགས་སློང་དང་ནང་ཆོས་བསྐྱར་ཞིབ་སོགས་ཀྱི་ཐད་ནས་ནི་ངེད་གཉིས་ལུག་སྤང་ འདོད་པ་སྤང་དང་། ར་བྲག་འདོད་པ་བྲག་རེད། དེ་ལྟ་མོད། ང་རང་ཉིད་ཀྱི་ལྟ་བར་མི་མཐུན་པ་ཙམ་གྱིས་ངས་ནི་ཁོ་དང་ཁོ་སོགས་ལ་དགག་པ་གཏོང་ གི་ནམ་ཡང་མིན། རྒྱུ་མཚན་ནི་ཡོད་དེ་འཇིག་རྟེན་གྱི་ རིག་པ་ནི་ང་ལས་ཁོ་དང་ཁོ་ཚོར་ཟབ་པས་སོ།།
ནམ་ནམ་ཞར་ཞར་ལ་རང་ལས་གཞན་ དག་ཟོག་པར་བརྩི་ཞིང་འཚེངས་པ་དང་ངོམས་པ་ནི་རང་ཉིད་ཁོ་ནའོ་སྙམ་པའི་འདུ་ཤེས་ མེ་ལྟར་མཆེད་པའི་བསམ་བློ་རིང་དུ་བཏང་ཞིང་། གནས་ ལུགས་ཀྱི་ཤན་འབྱེད་པའི་གཏམ་འབེལ་བོར་ལབ་ཀྱང་རྒྱང་ཆད་དུ་དོར་ནས་གཞུང་ལུགས་ ཤིག་གི་རྩིས་རྩོད་པའི་མཁས་མིང་འཛིན་པ་ནི་མར་མེ་གཅིག་ལས་གཉིས་མཆེད་ཀྱི་ཚུལ་ དུ་སོང་བ་དག་གིས་ཀྱང་། ཆེས་མཐུན་ས་དང་མི་མཐུན་སའི་དབྱེ་འབྱེད་ལ་ཡིད་རྟོན་པ་བྱས་ན་ནི་མཚམས་རེར་སྐུ་ ཞབས་ཞོགས་དུང་གི་དེབ་འདི་ལས་ཀྱང་བདེན་པའི་རང་ཞལ་རྗེན་པ་རེ་གསལ་སྟོན་བྱ་ངེས་ རེད། འདི་ནས་གསལ་བཤད་བྱ་འདོད་པ་ཞིག་ནི་རྒྱ་གར་གྱི་མེས་པོ་གནྔྷེ་ཡི་འཚེ་མེད་ཞི་ བའི་ལམ་ཁ་དེར་སྐད་ཆ་འགའ་རེ་ལབ་པའི་ཐད་ནས་ཡིན། བོད་བྱིངས་ཀྱི་གནྔྷེར་བལྟ་ཚུལ་དང་སྐུ་ཞབས་ཁོས་བལྟ་ཚུལ་གྱི་བར་དུ་ཧེ་བག་ཅུང་ འདུག་པས་ཀུན་གྱིས་དཔྱོད་པར་བྱས་ན། གནད་ཀྱི་དོན་པོ་རེ་ཡང་རེག་འོང་སྙམ་པའི་སྐད་ཆ་ཞིག་ཀྱང་ཤོད་འདོད་སྐྱེས་སོང་། དམངས་གཙོ་མ་ཎི་བཞིན་བཟློ་འང་མ་ཎིའི་གོ་དོན་བཞིན་ལྐོག་ ཏུ་གྱུར་བའི་དཔྱོད་མིང་ཁུར་བ་དག་གིས་ནི་གནྔྷེ་ནི་སྐྱེ་བུ་དམ་པ་ཆེ་གེ་མོས་ ཐུགས་རྩིས་གནངས་པ་དེའི་ཕུགས་ཨེ་གོ་ཙམ་ལ་ཡང་མི་དཔྱོད་པར་ཤ་གཟུགས་ཟ་རྐྱང་ བྱེད་པ་དེར་ཡང་དྲི་བ་ཞིག་ཞོར་ན་བཏོན་འདུག་པས། ཀུན་གྱིས་ཞིབ་ཏུ་གཟིགས་པར་འཚལ་ལོ། སྤྱིར་ཡང་ཆོས་ སྲིད་གང་ཡིན་རུང་ཤེས་རབ་ཀྱི་སྒོ་ནས་བཞག་པ་ཞིག་ཡིན་པའི་ཧ་མ་གོ་དུས་མི་དཔྱོད་ ཤེས་པ་ཞིག་འཁྱོངས་པར་ཤིན་ཏུ་རབ་ཏུ་ཐག་རིང་བར་སྙམ་མོ། དེ་ལས་གཞན་སྒེར་གྱི་དུངས་ཀ་དང་གནས་ལུགས་ཀྱི་ངོ་གདོང་དགེ་བའི་ཁྱད་པར་དག་ལ་ དབྱེ་འབྱེད་བྱ་མི་ནུས་པའི་ཚུལ་དུ་ཡོད་ན་ནི་མི་དེ་ལ་རེ་བས་སྟོངས་ཤིང་། མཁྲེགས་འཛིན་དང་དུངས་ཀས་སྨྱོ་བར་བྱེད་པ་ཞིག་ཡིན་པར་སོམ་ཉི་ཡང་མེད་དོ།། དེ་ནི་ངས་དཔེ་དེབ་འདི་གསར་དུ་ཉོ་བའི་སྐབས་སུ་གྲྭ་རྒན་རང་གི་གྲིབ་མ་དང་རང་ ཉིད་ནོར་ཉེན་ཡོད་པ་ཞིག་གི་སྐད་ཆ་ཐོས་འཕྲལ་མང་པོ་ཞིག་གི་བསམ་བློ་ཡང་ཟུར་ནས་ གོ་བ་ན་ཞོར་འཕྲོས་ཙམ་ལ་བཤད་པ་ཡིན། 【གྲྭ་རྒན་དེ་ན་རེ། ཞོགས་དུང་ཟེར་བས་ཕེ་ཡང་གཙང་མ་ཞིག་འདོན་ཤེས་གྱིན་མི་འདུག་པས་སྙིང་མ་རྗེ་ཟེར 】སྐུ་ ཞབས་ཁོང་གི་དཔེ་དེབ་དེར་བཀླགས་བྱང་ཕྲན་བུ་ཞིག་གཞན་དུ་བཀོད་འདོད་ཡོད་པས་ འཐུས་པར་བྱའོ།། འདི་ནི་དཔེ་དེབ་དེ་ཡིས་བྱིན་པའི་མྱོང་བ་གསལ་རིག་གི་བརྡ་ཙམ་མམ་ཀློག་པ་པོ་དག་ ལ་རང་སེམས་དྲང་བོར་བཅོས་ནས་ཀློག་པ་པོ་ཞིག་ཏུ་འགྱུར་བར་བྱ་བཏང་བའོ།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
རྩོམ་ཡག་གི འདི་རུ་མཇལ་བ་སྤྲོ།
དྲ་གྲོགས་ལྷམ་ཀོག་གི་རྩོམ་ཡིག་བཀླགས་ཟིན། ཡག་པོ་འདུག ས་ཐག་རིང་ནས་ཡོང་ནི་རེད་ང་ཚོ་བཙན་བྱོལ་བ་ཚོས་སྣེ་ལེན་གང་ལེགས་བྱེད་དགོས་ཡ།
དྲ་ངོས་འདི་ནས་བོད་ཕྱི་ནང་གཉིས་ཀའི་བསམ་ཚུལ་རྩོམ་ཡིག་བཀླག་རྒྱུ་འདུག་པས་དགའ་སྣང་ཞིག་འདུག ཡིན་ཡང་། བོད་ཕྱི་ནང་གཉིས་ཀ་ད་དུང་གསལ་བོ་ཞིག་གོ་ཐུབ་གི་མི་འདུག
གསུང་འཕྲིན་དང་གསལ་བཤད། བགྲོ་གླེང་། དེ་དག་གི་སྐོར་ལ་བྲིས་པའི་གསར་འགྱུར། དེ་དག་གི་སྟེང་སྤེལ་བའི་ཟིན་བྲིས། དེ་དག་གི་རྗེས་སུ་བཏབས་པའི་མཆན་བུ། འདི་དག་ཡོད་ཚད་རང་གི་ཁ་འདོན་ལྟར་ཆག་མེད་དུ་བཀླགས་པ་ཡིན།
རེ་རེ་བཀླགས་རྗེས་སེམས་འདི་ཁ་ལོ་སྣ་ལོ་མེད་པར་གང་སར་ཤོར་འགྲོ་གི་འདུག ཕྱོགས་གཅིག་ནས། དམངས་གཙོ་འདི་གལ་ཆེན་པོ་རེད་དྲན། དམངས་གཙོ་འདི་དགོས་པ་ཞིག་མ་རེད་དྲན། དམངས་གཙོ་འདི་ཡ་ང་བ་དང་འཇིགས་སུ་རུང་བ་ཞིག་རེད་དྲན། དམངས་གཙོ་ནི་མེད་ཐབས་མེད་པ་ཞིག་རེད་དྲན། དམངས་གཙོ་འདི་ང་ཚོར་མ་རན་པ་ཞིག་དྲན། དམངས་གཙོ་འདིས་ང་ཚོ་སྐྱོབ་ས་རེད་དྲན། དམངས་གཙོ་འདིས་ང་ཚོ་གསོད་ས་རེད་དྲན།
ཕྱོགས་གཞན་ཞིག་ནས། རྒྱལ་བ་རིན་པོ་ཆེའི་སྐུ་དྲིན་དྲན། ཁོང་གི་དགོངས་གཞི་དྲན། བཀའ་ཁྲིའི་མཛད་རྗེས་དྲན། བོད་དོན་གྱི་ཛ་དྲག་དྲན། གང་ཡིན་འདི་ཡིན་མེད་པར་གྱུར།
ང་ཚོས་གྲོས་ཚོགས་ཚོགས་ཐེངས་རེ་རེའི་སྐབས་བློ་འགྱོད་དང་ལེགས་ཉེས་རྒྱལ་ཕམ་གྱི་སྐོར་ཡུན་རིང་གླེང་སྲོལ་ཡོད་པ་ལྟར། བོད་ནང་དུའང་ལྟ་སྤྱོད་ཀྱི་སྐོར་ལ་བཤད་ཡན་ཤིན་ཏུ་མང་།
གང་ལྟར། ཞི་རྒོལ་ཆེན་མོའི་རྗེས་ནས། མི་ཤི་རྟ་འགྱེལ་བྱུང་ཚར་བའི་ཕྱི་ཉིན་དེར་ཞོགས་དུང་འབོད་པ་དེས་སླར་ཡང་ཀི་རིང་ཞིག་བཏབས་ཡོད་ས་རེད། ཀི་རིང་དེའི་བྲག་ཅ་ཐུང་ངུ་རེ་རྡོ་ལ་རྡར་གྱི་རི་འདབས་ནས་ཀྱང་གོ་ཐུབ་གི་འདུག ཅི་ཡིན་གང་ཡིན་མ་ཤེས་པར་བསྡད་ཡོད།
ཡ་ཡ། ལྷམ་ཀོག་གིས་བཤད་སྟངས་ལ་བལྟས་ན། ཞོགས་དུང་གིས་ཅིག་བཤད་ཡོད་ས་ཀ
རང་ཉིད་ཀྱི་བསམ་བློ་གུ་དོག་པོ་དེ་ལས་གཞན་གྱི་ལྟ་གྲུབ་འབུར་འཇོམས་བྱེད་་པ་ནི་འུ་ཚང་གི་མང་མང་གི་བསམ་བློའི་གསེང་ན་ཟུངས་ཁྲག་བཞིན་ཁྱབ་ཚར་ཡོད་པས་ད་དེ་ལ་བསྒྱུར་བཅོས་ཤིག་དགོས་ཀྱི་འདུག་ཟེར་ན་དཀའ་ཚོད་རེད།
ལྷམ་ཀོག་གི་བསམ་བློའི་དཔུང་བཙན་སེ་འདུག་གཱ། བཙན་བྱོལ་ཁྲོད་དུ་འདི་ལྟའི་ཉམས་མྱོང་དང་ཤེས་ཚད་རང་སྐྱ་འཕེར་བ་ག་ཚད་ཡོད་དམ། ཁོང་དང་ཁོང་ལྟ་བུའི་མི་བུ་སྙིང་སྟོབས་ཅན་རེ་གཉིས་ཡོད་ན། སྤྱི་ཚོགས་ཆུང་ཆུང་འདི་ལ་གཤགས་བཅོས་ཤིག་བྱེད་རྒྱུ་ལས་སླ་བོར་མཐོང་ངོ།།
ཞིབ་ཏུ་བཀླགས་ཟིན་སྐུ་ཞབས་ལྷམ་ཀོག་ལགས།