སྔགས་རྒྱུགས་ཆེན་མོ།

ཟླ་འདིའི་ཚེས་ ༡༢ ཉིན་ནས་བཞུགས་སྒར་ངྷ་སའི་ཉེ་འགྲམ་དཔལ་ལྡན་རྒྱུད་སྟོད་གྲྭ་ཚང་དུ་སྔགས་ཀྱི་རྩོད་རྒྱུགས་ཆེན་མོ་འཚོགས་པ་དང་། འདི་ནི་བཙན་བྱོལ་ནང་སྔགས་རྒྱུགས་ཆེན་མོ་བསྐྱར་གསོ་གནང་སྟེ་རྒྱུགས་རྩོད་གནང་བ་ཐེངས་གསུམ་པ་ཆགས་ཡོད་པ་རེད།

རྩོད་རྒྱུགས་དེའི་ཐོག་མའི་བྱུང་རིམ་ནི་རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་སངས་རྒྱས་ཀྱི་བསྟན་པ་དག་ཐེར་དང་ཡོང་སླད། རྨད་དུ་བྱུང་བའི་མཛད་རྗེས་རླབས་པོ་ཆེ་ཇི་སྙེད་ཅིག་མཛད་ཡོད་པ་ལས་གདན་ས་ཆེན་པོ་སེ་འབྲས་དགའ་གསུམ་གྱི་དགེ་བཤེས་ལྷ་རམས་པ་རྣམས་སྔགས་ཀྱི་རྩོད་རྒྱུགས་བཞེས་ཏེ། ཨང་རིམ་དང་པོ་དང་གཉིས་པ་སོན་པ་རྣམས་རྒྱུད་གྲྭ་སྟོད་སྨད་གཉིས་ཀྱི་མཁན་བླ་དང་ཤར་བྱང་ཆོས་རྗེ། དགའ་ལྡན་ཁྲི་བ་རིན་པོ་ཆེར་རིམ་པ་ཕེབས་རྒྱུའི་སྔོན་འགྲོར་སྔགས་ཀྱི་རྩོད་རྒྱུགས་ཆེན་མོ་གསར་འཛུགས་གནང་བ་དང་། བཙན་བྱོལ་དུ་༧གོང་ས་མཆོག་གིས་བཞུགས་སྒར་དུ་གདན་སའི་དགེ་བཤེས་བགྲེས་གྲས་རྣམས་རྩོད་རྒྱུགས་བཞེས་གནང་མཛད།  ཕྱི་ལོ་ ༢༠༠༤ ལོ་ནས་ལོ་གསུམ་རེའི་མཚམས་རྩོད་རྒྱུགས་རེ་གནང་རྒྱུ་གཏན་འཁེལ་མཛད་པ་ནས་དེ་གའི་ལོ་མཇུག་ཏུ་༧གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་སྔགས་ཀྱི་རྩོད་རྒྱུགས་ཐེངས་དང་པོ་གནང་། ༢༠༠༧ ལོར་ཐེངས་གཉིས་པ་དང་། འདི་ལོ་རྩོད་རྒྱུགས་ཐེངས་གསུམ་པ་གནང་ཞིང་། ཕྱི་ཚེས་ ༡༢ ནས་དབུ་འཛུགས་ཀྱིས་དཔལ་ལྡན་སྟོད་རྒྱུད་གྲྭ་ཚང་གི་གཙུག་ལག་ཁང་དུ་སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གི་དབུ་བཞུགས་འོག་གདན་ས་སེ་འབྲས་དགེ་གསུམ་གྱི་མཁན་རིན་པོ་ཆེ་རྣམ་པ་དང་། རྒྱུད་པའི་མཁན་བླ་བཅས་ཀྱི་རྩོད་པ་དང་གདན་ས་གསུམ་གྱི་དགེ་བཤེས་ལྷ་རམས་པ་ ༣༠ ནས་སྔགས་ཀྱི་རྩོད་རྒྱུགས་ཆེན་མོ་རྒྱུགས་འབུལ་ཞུས།

ཉིན་མཐའ་མའི་མཛད་སྒོར་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དང་དཔལ་ལྡན་སྟོད་རྒྱུད་གྲྭ་ཚང་གི་མཁན་རིན་པོ་ཆེ་རྣམ་གཉིས་ནས་ལེགས་གསོའི་བཀའ་སློབ་གནང་། འདི་ལོའི་སྔགས་རྒྱུགས་ཆེན་མོའི་ཨང་དང་པོ་སེར་སྨད་དགེ་བཤེས་ཧར་ཤན་སྤྲུལ་སྐུ་དང་། ཨང་གཉིས་པ་དགའ་ལྡན་ཤར་རྩེ་དགེ་བཤེས་བྱང་ཆུབ་སངས་རྒྱས། ཨང་གསུམ་པ་དགའ་ལྡན་ཤར་རྩེ་དགེ་བཤེས་བྱམས་པ་བློ་བཟང་བཅས་ལ་གྲུབ་འབྲས་རྩེ་ཕུད་སོན་པའི་གསལ་བསྒྲགས་དང་འབྲེལ་བཙན་བྱོལ་བོད་གཞུང་ཆོས་རིག་ལས་ཁུངས་དང་། དཔལ་ལྡན་སྟོད་རྒྱུད་གྲྭ་ཚང་ནས་རྒྱུགས་སྤྲོད་པ་ཡོངས་ལ་ལེགས་སྐྱེས་གསོལ་རས་དང་དགེ་བཤེས་སྔགས་རམས་པའི་ཕྱག་འཁྱེར་ཡང་གསོལ་སྩལ་གནང་འདུག