སྤྱི་ཡོངས་ཀྱི་ཐོག་ནས་ཐེངས་འདིར་༧གོང་ས་མཆོག་གི་གསུང་འཕྲིན་ཐོག་ལ་སྤྱི་མོས་ཀྱིས་གྲོས་ཆོད་འཇོག་ཐུབ་པ་དེ་ཧ་ཅང་གི་གཟི་བརྗིད་དང་ལྡན་པ་ཞིག་བྱུང་སོང་སྙམ་ཡོད། མ་འོངས་པར་ཡང་གྲོས་ཆོད་ཀྱི་ཚིག་གི་འབྲི་དོན་གཞིར་བཟུང་གྲོིས་ཚོགས་ནང་དག་དག་འགྲོ་ཐུབ་པ་བྱ་རྒྱུ་གལ་ཆེན་པོ་རེད། འོན་ཀྱང་གྲོས་ཆོད་དེས་སྨྲ་བརྗོད་རང་དབང་འགོག་གིན་ཡོད་པ་མ་རེད། དེ་གསལ་བོ་བཟོ་རྒྱུའི་འདོད་པ་བྱུང་སོང་། ཞེས་སྤྱི་འཐུས་ཚོགས་གཙོ་མཆོག་གིས་གསུངས་ཡོད།
དེ་རིང་སྔོ་དྲོའི་ཆུ་ཚོད་ ༡༢ སྟེང་སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་བ་རྒྱལ་ཁའི་ནང་མཇུག་སྒྲིལ་ཡོད། ཐེངས་འདིའི་གྲོས་ཚོགས་སྟེང་བཙན་བྱོལ་བོད་གཞུང་གི་ཕྱི་ལོ་ ༢༠༡༠ ནས་ ༢༠༡༡ བར་གྱི་སྔོན་རྩིས་གཏན་འབེབས་ཀྱི་ཞོར་དུ་བཅའ་ཁྲིམས་དང་སྒྲིག་གཞི་ཁག་ཅིག་བསྐྱར་བཅོས་དང་སྣོན་འབྲི་ལེགས་པར་གྲུབ་ཡོད་ལ། དེ་མིན། གྲོས་ཚོགས་ཚོགས་དུས་བརྒྱད་པར་མཇུག་སྐྱོང་མ་ཐུབ་པའི་ལས་འཕྲོ་རིགས་ཀྱང་ཐག་གཅོད་ཟིན་ཡོད། སྐབས་དེར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མཇུག་སྡོམ་གསུང་བཤད་གནང་དོན། ན་ནིང་ཕྱི་ཟླ་ ༨ པའི་ནང་ཚོགས་གཙོ་ལ་མཇུག་སྡོམ་གཏམ་བཤད་བྱ་རྒྱུའི་གོ་སྐབས་བྱུང་ཡོད་པ་མ་རེད། ཐེངས་འདིར་གོ་སྐབས་གནང་བར་ཐུགས་རྗེ་ཆེ་ཞུ་རྒྱུ་ཡིན། ད་རེབ་ཚོགས་གཙོ་ཡར་བཞེངས་ཏེ་འཛུམ་དམུལ་ལེར་འདུག་ཐུབ་པ་འདི་གྲོས་ཚོགས་ཀྱི་གཟི་བརྗིད་རེད། ད་རེབ་ཀྱི་ཚོགས་འདུའི་ལས་རིམ་གཙོ་བོ་བཙན་བྱོལ་བོད་གཞུང་གི་ཕྱི་ལོ་ ༢༠༡༠ ནས་ ༢༠༡༡ བར་གྱི་སྔོན་རྩིས་གཏན་འབེབས་རེད། དེར་སྤྱི་འཐུས་རྣམ་པས་འགན་འཁུར་བའི་ཐོག་ནས་ལས་ཁུངས་རེ་རེ་བཞིན་ཐག་གཅོད་གཏན་འབེབས་ཡག་པོ་བྱུང་སོང་ལ། དཔལ་འབྱོར་བཀའ་བློན་མཆོག་གི་སྔོན་རྩིས་གསུང་བཤད་ཀྱང་སྔར་དང་མི་འདྲ་བར་རྒྱས་པོ་བྱུང་སོང་། དེ་ལ་ཚོགས་གཙོའི་ངོས་ནས་བསྔགས་བརྗོད་ཞུ་རྒྱུ་ཡིན། ཞེས་དང་
ད་རེབ་ཀྱི་གྲོས་ཚོགས་ཉིན་གཉིས་པའི་སྟེང་༧གོང་ས་མཆོག་གི་གསུང་འཕྲིན་བསྩལ་ཅིང་། དེ་ལ་ཐུགས་རྗེ་ཆེ་ཞུའི་གྲོས་འཆར་ཐོག་སྤྱི་འཐུས་ཚང་མས་དགོངས་འཆར་ཕེབས་པ་རེད། དགོངས་ཚུལ་གསུང་སྐབས་ཐལ་ཆ་ཕྲན་བུ་རེ་བྱུང་ཡོད་ཀྱང་། སྤྱི་འཐུས་མང་ཆེ་བས་བགྲོ་གླེང་གི་ཆ་ཤས་བླངས་སོང་། བཀའ་ཤག་གིས་གསུང་འཕྲིན་ཐད་གསལ་བཤད་ཁ་གསལ་བོ་དང་གཏིང་ཟབ་པོ་གནང་བར་བཀའ་བློན་ཁྲི་པ་མཆོག་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། གསུང་འཕྲིན་ནང་བསྟན་པ་ལྟར། ཉན་ཞིབ་ཀྱི་ལས་དོན་གོ་སྒྲིག་ཞུས་པ་རེད། དེ་ཡང་ལོ་རྒྱུས་དང་ལྡན་པའི་ཉན་ཞིབ་ཅིག་ཆགས་ཡོད། ཉན་ཞིབ་རང་གི་ཐོག་ལ་འགྲོ་ཐུབ་ཡོད་མེད་ཁ་ཁ་རེད། ཉན་ཞིབ་ཀྱི་ཆ་ཤས་བཞེས་མཁན་ཚོས་གསུང་འཕྲིན་གྱི་ནང་དོན་གཅིག་པུ་མ་ཡིན་པར་གནད་དོན་གཞན་དག་ཀྱང་ཁ་གསལ་བོ་ཞེ་དྲག་བཟོ་ཐུབ་པ་བྱུང་སོང་། ཉན་ཞིབ་འདིའི་ཐོག་རྒྱ་བལ་འབྲུག་གསུམ་ནང་གི་བཀའ་ཟུར་ ༡༠ ཙམ་ཕེབས་ཐུབ་པ་བྱུང་ཞིང་། བཀའ་ཟུར་ ༨ ཀྱིས་ཉན་ཞིབ་སྐབས་དགོངས་ཚུལ་གསུངས་སོང་། འདི་བརྒྱུད་དེ་བར་སྐབས་ཤིག་ལ་སྤྱི་ཚོགས་ནང་བཀའ་ཟུར་ཚོ་འཛོམས་ཏེ་གནས་ཚུལ་མང་པོ་ཆགས་སོང་ཟེར་བའི་གླེང་སློང་དེ་ཁ་གསལ་བོ་ཆགས་སོང་། ཞེས་གསུངས་སོང་།
ཚོགས་གཙོ་མཆོག་གིས་ཐེངས་འདིའི་གྲོས་ཚོགས་ནང་ལེགས་འགྲུབ་བྱུང་བའི་གནད་དོན་ཁག་ཅིག་ངོ་སྤྲོད་གནང་དོན། སྔར་ལོ་གྲོས་ཚོགས་མཇུག་བསྡོམས་རྒྱག་མ་ཐུབ་པ་དེ་སྤྱི་འཐུས་སྒེར་གྱི་གྲོས་ཆོིད་གྲོས་འཆར་ཞིག་གི་དབང་གིས་བྱུང་བ་རེད། ཐེངས་འདིའི་གྲོས་ཚོགས་མ་ཚོགས་གོང་ལ་ད་ཐེངས་གྲོས་ཚོགས་ནང་གང་འདྲ་ཆགས་ཡོང་ངམ་སྙམ་སྟེ་སེམས་འཚབ་བྱུང་སོང་། གྲོས་ཚོགས་དངོས་སུ་ཚོགས་པའི་རིང་ལ་སྤྱི་འཐུས་སྒེར་གྱི་གྲོས་ཆོད་དེ་དང་འབྲེལ་བའི་ཐོག་ལ་སྒྲིག་གཞི་བསྐྱར་བཅོས་ཕེབས་ཤིང་། སྒྲིག་གཞི་བསྐྱར་བཅོས་ལ་བགྲོ་གླེང་གནང་བའི་སྐབས་སུ་ཚང་མས་དགོངས་པ་ཆེ་བཞེས་ཀྱིས་གང་ཟག་ལ་མི་རྟོན་ཆོས་ལ་རྟོན་པའི་ཐོག་ནས་སྒྲིག་གཞི་གཏན་འབེབས་ཡག་པོ་བྱུང་སོང་། རྙོག་གླེང་གང་ཡང་མེད་པའི་ཐོག་ནས་གནས་ཚུལ་དེ་གསལ་བོ་བཟོས་པ་མ་ཟད། སྤྱི་འཐུས་སྒེར་གྱི་གྲོས་ཆོད་གྲོས་འཆར་དེ་ཡང་གྲོས་ཚོགས་ནང་བསྐྱར་དུ་སླེབས་མི་དགོས་པ་ཆགས་དེ་སོང་། ཞེས་དང་། སྤྱི་ཡོངས་ཀྱི་ཐོག་ནས་ཐེངས་འདིར་༧གོང་ས་མཆོག་གི་གསུང་འཕྲིན་ཐོག་ལ་སྤྱི་མོས་ཀྱིས་གྲོས་ཆོད་འཇོག་ཐུབ་པ་དེ་ཧ་ཅང་གི་གཟི་བརྗིད་དང་ལྡན་པ་ཞིག་བྱུང་སོང་སྙམ་ཡོད། མ་འོངས་པར་ཡང་གྲོས་ཆོད་ཀྱི་ཚིག་གི་འབྲི་དོན་གཞིར་བཟུང་གྲོིས་ཚོགས་ནང་དག་དག་འགྲོ་ཐུབ་པ་བྱ་རྒྱུ་གལ་ཆེན་པོ་རེད། འོན་ཀྱང་གྲོས་ཆོད་དེས་སྨྲ་བརྗོད་རང་དབང་འགོག་གིན་ཡོད་པ་མ་རེད། དེ་གསལ་བོ་བཟོ་རྒྱུའི་འདོད་པ་བྱུང་སོང་།
ཡང་ཚོགས་གཙོ་མཆོག་གིས་ཐེངས་འདིའི་གྲོས་ཚོགས་ནང་མ་འགྲུབ་པ་དང་། ཆེད་དུ་མ་བསྒྲུབས་པའི་གནད་དོན་ཁག་ཅིག་གི་སྐོར་གསུངས་དོན། གནས་ཚུལ་གཞན་ཞིག་ལ། མི་དམངས་ནང་བཀའ་བློན་ཁྲི་པས་ཐེངས་གསུམ་ལ་བསྐྱར་དུ་འགན་བཞེས་དགོས་པའི་ཐད། བཅའ་སྒྲིག་བསྒྱར་བཅོས་ཀྱི་དགོངས་ཚུལ་ཞིག་བྱུང་ཡོད། མི་གྲངས་ལྟར་བྱས་ན་དགོངས་ཚུལ་སླེབས་མཁན་ཉུང་ཉུང་ཡིན་ཡང་། དེ་དག་གིས་ཅི་ཙམ་གྱི་ངོ་ཚབ་མཚོན་ཐུབ་ཀྱིན་ཡོད་མེད་བཤད་ཐུབ་པ་མ་རེད། གང་ལྟར་མི་དམངས་ནང་། ང་ཚོས་འབོད་སྐུལ་ཞུས་ཡོད་པ་དེ་གང་འདྲ་ཆགས་ཡོད་དམ་སྙམ་པའི་ཐུགས་འཚབ་ཡོང་སྲིད་སྟབས། སྤྱི་འཐུས་ནང་ཁུལ་ལྷན་ཚོགས་བསྐྱངས་ཏེ། བཀའ་བསྡུར་བྱས་མཐར་བཞུགས་མོལ་ཚོགས་འདུའི་ནང་འཁྱེར་མི་དགོས་པའི་ཐག་གཅོད་བྱུང་ཡོད། གནད་དོན་དེ་ཐེངས་འདིའི་གྲོས་ཚོགས་ནང་འཁྱེར་མེད་པའི་གནས་སྟངས་དེ་རེད།
ཁོང་གིས་མུ་མཐུད་དུ་གསུངས་དོན། ད་རེབ་ཀྱི་ལས་རིམ་མང་ཆེ་བ་ལེགས་འགྲུབ་དང་འདོད་པ་ཁེངས་པ་བྱུང་སོང་། འོན་ཀྱང་དོན་དག་མ་འགྲུབ་པ་ཞིག་ནི། བྱང་ཨ་རིའི་སྤྱི་འཐུས་ཀྱི་གྲངས་ཀ་སྤར་མ་ཐུབ་པ་དེ་རེད། བྱང་ཨ་རི་ཁུལ་དུ་མི་འབོར་ ༡༥༠༠༠ ཙམ་ཡོད་ལ། དཔྱ་ཁྲལ་འབུལ་མཁན་ ༧༠༠༠ ཙམ་ཆགས་འདུག ཐེངས་འདིར་ཚོགས་གཙོའི་བསམ་ཚུལ་ལྟར་བྱས་ན། བྱང་ཨ་རིར་སྤྱི་འཐུས་གཅིག་དང་། རྒྱ་བལ་འབྲུག་གསུམ་དང་ཨ་རི། ཁེ་ན་ཊ། ཡུ་རོབ་བཅས་ཕུད་པའི་རྒྱལ་ཁབ་གཞན་དག་ནང་སྤྱི་འཐུས་གཅིག་བཅས་སྤར་ཐུབ་ན་བསམ་སྟེ་རེ་བ་བརྒྱབས་ཀྱང་སྤར་ཐུབ་མ་སོང་། དེ་ནི་བྱུང་རིམ་ལོ་རྒྱུས་ལ་ཞིབ་ཚགས་མེད་པ་དང་། བཅའ་ཁྲིམས་དང་སྒྲིག་གཞིར་གོ་བ་ལེན་སྟངས་མ་འདྲ་སོགས་ཀྱི་དབང་གིས་རེད། དེ་ནི་གྲོས་ཚོགས་ཀྱིས་མ་འཇོན་པའི་ལས་ཀ་ཞིག་ལ་ངོས་ལེན་གནང་དགོས་པ་རེད་སྙམ། འོན་ཀྱང་འབྱུང་འགྱུར་ཕྱི་ཟླ་ ༩ བའི་ནང་སྤྱི་འཐུས་སྤར་ཐུབ་པ་བྱུང་ཡང་མ་འགྲིག་པ་ཡོད་པ་མ་རེད། ཅེས་དང་། ཕྱི་ཟླ་ ༩ ནང་གྲོས་ཚོགས་བསྐྱར་དུ་ཚོགས་དགོས་པ་རེད། དེའི་སྔོན་ལ་ཕྱི་ཟླ་ ༨ ནང་བོད་གཞུང་དམངས་རྒྱལ་ཡོངས་ཚོགས་ཆེན་ཚོགས་དགོས་པ་རེད། སྐབས་དེར་ང་ཚོ་རྒྱ་གར་ལྷོ་ཕྱོགས་བྷེལ་ཀོབ་ནས་སླར་ཡང་མཇལ་ཐུབ། སྐབས་དེར་བོད་མི་མང་སྤྱི་འཐུས་ལྷན་ཚོགས་ཀྱིས་བོད་གཞིས་བྱེས་གཉིས་ཀྱི་ཚབ་བྱས་ཏེ། ཕྱི་ཟླ་ ༩ ཚེས་ ༡ ཉིན་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུར་༧གོང་ས་མཆོག་གིས་ཐུགས་དགྱེས་པའི་ངང་ཞལ་བཞེས་ཐོབ་ཡོད། ཅེས་གསུངས་བྱུང་།
རིག་པ་འདོན་མཁན་ཁག་ཅིག་གིས་ད་རེབ་ཅེས་པའི་ཚིག་འདི་མ་དག་ཚུལ་གླེང་འདུག ཡང་མ་དག་པ་ཡིན་མིན་དྲིས་འདུག
ངས་ཁྱེད་རྣམ་པ་ཚོར་དེ་དག་པ་རེད་ཟེར་རྒྱུ་ཡིན། དག་གསར་ནང་དུ་ད་རེབ་བྲིས་ཡོད་ལ། སྤྱིར་བཏར་རེབ་ཅེས་པར་ང་ཚོས་རེབ་ཅིག་ལ་ལས་ཀ་གན་དང་འདི་བྱས། རེབ་ཅིག་ལ་ཁྱོད་གང་ལ་སོང་། རེབ་ཅིག་ལ་བོད་ཀྱི་དུས་བབ་དྲ་ཤོག་ཐོག་ཡིག་ནོར་མང་བོ་འདུག་ཅེས་བརྗོད་ཆོག་ལ། རེབ་ཅེས་པའི་ཚིག་གི་སྔོན་དུ་ད་རྐྱང་ཞིག་བཞག་སྐབས། ད་ཐེངས་ཀི་རེབ་འདིར་སྤྱི་འཐུས་ཚོ་འཆམ་ཐག་ཆོད་བྱུང་འདུག་ཅེས་བརྗོད་ཆོག་གི་རེད་སྙམ།
གལ་སྲིད་ད་དུང་འཁྲུལ་གཞི་ཡོད་ན་ད་དུང་དཔྱད་གླེང་བྱོས། ཡིག་ནོར་ཡིན་ན་འདི་ལྟར་བྲིས་པ་མ་རེད། ནོར་བ་རེད། དེའི་ཚབ་ཏུ་འདི་དང་གན་འབྲི་དགོས་པ་རེད། ནོར་སྟངས་ནོར་ལུགས་འདི་དང་གན་རེད་ཅེས་ཟེར་དགོས་པ་རེད།
དེ་མིན་ཉེ་སྔོན་ཞིག་ལ་བོད་ཀྱི་དུས་བབ་དྲ་ངོས་སུ་འཕྲུལ་རྟ་ཞེས་པའི་ཚིག་ཅིག་བྲིས་པར་མ་དག་ཚུལ་རིག་པ་འདོན་མཁན་མང་བོ་བྱུང་། མཐར་དེད་དུས་མ་དག་ཚུལ་ཁོང་ཚོས་མ་རིག་སྟབས་རེད་ཟེར། དེ་གནས་ལུགས་ལ་འགྲོའམ།
སྔར་ཁྱོད་ཀྱིས་མ་རིག་པའི་ཐ་སྙད་ཡོངས་མ་དག་པ་ཆགས་དགོས་ན་བོད་ཀྱི་བརྡ་སྤྲོད་པའི་གཞུང་དང་ལྷག་པར་དུ་གསར་དུ་གཏན་འབེབ་བྱེད་ཀྱིན་པའི་ཐ་སྙད་ནང་དུ་མ་དག་པ་རྐྱང་གིས་ཁེངས་ཡོད། ཡིན་ནའང་། དེ་འགྲེལ་སྟངས་ཤིག་མ་རེད།
འགོ་འཛུགས་ཐུབ་པ་དང་འཇུག་བསྡུ་ཐུབ་པ་ཙམ་གྱིས་གྲུབ་འབྲས་དང་དགོས་མཚན་ཆེན་པོ་བྱུང་ཡོད་པའི་ངོས་འཛིན་དེ་འུ་ཐུག་གིས་ངོས་འཛིན་མ་རེད་དམ།
ཨ་རིའི་བོད་ཀྱི་རླུང་འཕྲིན་ཁང་ལ་རེ་བསྐུལ་ཞུ་རྒྱུ། རླུང་འཕྲིན་ཁང་གི་ལས་བྱེད་ཡོངས་ལ་འཚམས་འཚམས་འདྲི་དང་བཀྲ་ཤིས་བདེ་ལེགས་ཡོད། སྤྱིར་ན་ཁྱེད་རྣམས་པའི་ལྷག་བསམ་དང་ཤེས་འཇོན་ལ་ང་ཚོས་རྗེས་སུ་ཡི་རིང་དང་སྔགས་བརྗོད་བྱེད་ཀྱིན་ཡོད། འོན་ཀྱང་ཁྱེད་ལས་ཁུང་གི་ལས་བྱེད་རྣམས་པའི་བོད་ཆས་གྱོན་མི་ཐུབ་པ་གནད་འགག་གང་ལ་ཐུག་ཡོད་དམ། ང་ཚོས་ངོས་ཤུགས་རྒྱུད་གསུམ་ནས་ཁྱེད་ལས་ཁུང་ལ་ཐང་མང་རེ་བསྐུལ་ཞུས་ཡོད་མེད། དེང་སང་བོད་ནང་གི་རླུང་འཕྲིན་ཁང་དང་ཡུལ་ཁ་སོ་སོས་མཛད་སྒོ་ཆེ་ཆུང་ག་འདྲ་ཞིག་འཚོགས་རུང་གཙོ་བོ་བོད་རང་གི་ཐུན་མོང་ཡིན་པའི་བོད་ཆས་གྱོན་དགོས་པ་རྩ་འཛིན་གནང་གི་ཡོད་པ་ཁྱེད་ལས་ཁུང་གི་མ་ཤེས་པ་མིན་ནམ། བཙན་བྱོལ་བོད་གཞུང་གི་དྲ་བརྙན་ཁང་དང་ཨ་ཤེ་རང་དབང་རླུང་འཕྲིན་ཁང་གི་ལས་བྱེད་རྣམས་པར་གཟིགས་དང་ཆོག
དྲ་ངོས་འདིར་ཡིག་ནོར་ལ་དོ་སྣང་བྱེད་མཁན་རྒྱུན་ཆད་མེད་པར་ཡོང་གིན་འདུག་པ་དེ་ནི་དགའ་འོས་པའི་གནས་ཤིག་རེད། འདི་ནི་བོད་མི་རིགས་ཀྱི་སྐད་ཡིག་ལ་སྲུང་སྐྱོབ་དང་འགན་ཁུར་གྱི་བཀའ་མོལ་རེད། ཚང་མས་ཐུགས་སྣང་གནང་བར་རྗེས་སུ་ཡི་རངས་ཡོད།།
དགུ་ཚིགས་སྐྱ་མོ་མ་ལགས། ད་རེས་དག་པ་རེད། ད་རེབ་དག་པ་རེད།
སྤྱི་འཐུས་ནི་མི་མང་གི་ངོ་ཚབ་ཡིན་པས། མི་མང་གི་མངོན་འདོད་གང་ཡིན་ལྟ་དགོས་རྒྱུ་ཤིན་ཏུ་གལ་ཆེ་བར་སེམས།
སྤྱི་འཐུས་གྲོས་ཚོགས་ནས་འཇུག་བསྡོམས་ཡང་དག་པ་ཞིག་གནང་འདུག་སྙིང་ཁོང་རུས་པའི་གཏིང་ནས་ཐུགས་རྗེ་ཆེ་ཞུ།
གྲོས་ཚོགས་ཚོགས་དུས་བརྒྱད་པ་དེ་ཐག་གཅོད་གང་འདྲ་ཞིག་གནང་ཡོད་ན་
karma dorje དྲ་གྲོགས་དབྱིན་མིང་ཅན། ཚིགས་གྲུབ་འདི་དབྱིན་སྐད་རེད་དམ་བོད་སྐད་རེད།
༼ད་རེབ་ཀྱིས་ད་རེས་ཚིག་གི་རང་དབང་མ་འཕྲོག་རོགའ་གནོངས།༽ ཁྱེད་ཀྱིས་བོད་ཡིག་འབྲི་མི་ཤེས་བཞིན་དུ་བོད་ཀྱི་དྲ་ངོས་བརྫད་དོན་ཅི་ཡིན། བྲིས་ངན་བསྟན་པའི་དགྲ་བོ་ཟེར་བ་དེ་གོ་ཨེ་མྱོང་།
ད་རེབ་ཀྱིས་ད་རེས་ཚིག་གི་རང་དབང་མ་འཕྲོག་རོགའ་གནོངས།
གསར་འགྱུར་སྤེལ་མཁན་མཆོག་ལ་གུས་པ་དང་སྦྲགས་ཞུ་རྒྱུར།
ཐེངས་འདིར་ཞེས་པའི་གོ་དོན་ཅན་གྱི་ཚིག་ད་རེས་ཞེས་པའི་ཚབ་ཏུ་སྐུ་ཉིད་ཀྱིས་ད་རེབ་ཅེས་ལན་བཞི་ཙམ་བྲིས་འདུག འདི་ལྟར་འབྲི་སྲོལ་ཡོད་དམ། ཕལ་ཆེར་ཡིག་ནོར་ཡིན་གྱི་རེད། གལ་ཏེ་ནོར་བ་ཡིན་ན་མ་འོངས་པར་འདིའི་རིགས་ཐུགས་གཟབ་གནང་རོགས།
གང་ལགས་ཤེ་ན་དེང་ང་ཚོ་བཙན་བྱོལ་ནང་རང་སྐད་ཀྱི་ཤེས་ཚད་ཞན་པས་གསར་བུ་བ་རྣམས་ཀྱིས་དག་ཆ་ངོ་མ་ངོས་མ་ཟིན་པར་ལད་མོ་བྱ་ཉེན་ཆེ་བ་དང་། དེ་ལྟར་བྱས་ཚེ་སླད་མ་དག་རྒྱུན་འབྱམས་སུ་འགྲོ་ཉེན་ཆེའོ༎
དེ་བཞིན་གྲོས་ཚོགས་ཀྱི་འབྲི་དོན་ཞེས་པ་ཞིག་འདུག་ དེ་ཡང་ཕལ་ཆེར་འབྲུ་དོན་ཡིན་གྱི་རེད་སེམས།
ཐུགས་རྗེ་ཆེ།
སྤྱི་འཐུས་གྲོས་ཚོགས་ནས་འཇུག་བསྡོམས་ཡང་དག་པ་ཞིག་གནང་འདུག་སྙིང་ཁོང་རུས་པའི་གཏིང་ནས་ཐུགས་རྗེ་ཆེ་ཞུ། འདིས་ཐ་མའི་རྒྱལ་ཁ་བདེན་པར་ཐོབ་ཟེར་བར་ངེས་ཤེས་འཕར་མ་ཞིག་ལོས་སྐྱེ། དེ་དོན་ཁུངས་མེད་སྐྲོག་རྐྱེན་བཟོ་མཁན་ཚོས་བསམ་ཤེས་ཀྱིས་བླང་དོར་འཇུག་ལྡོག་ཚུལ་བཞིན་ཡོང་བའི་རེ་བ་ཡོད། ༧གོང་ས་སྐྱབས་མགོན་ཆེན་པོ་མཆོག་སྐུ་ཚེ་སྲིད་མཐར་བརྟན་པ་དང་། རླབས་ཆེན་དགོངས་བཞེད་མཐའ་དག་འབད་མེད་ལྷུན་གྱིས་བསྒྲུབ་པར་ཤོག བཀའ་བཞིན་སྒྲུབ་པའི་མཛད་གཙོ་རྣམས་སྐུ་ཚེ་བརྟན་ཅིང་མཛད་པ་མཐར་ཕྱིན་ཡོང་བར་བསྟན་སྲུང་བརྒྱ་ཚོས་སྐྱབས་དང་མགོན་མཛོད་ཅིག བོད་རྒྱལ་ལོ༎
ད་ཐེངས་བཀུར་འོས་སྤྱི་འཐུས་རྣམ་པ་ཁག་ཅིག་གིས་ཚོགས་གཙོ་མཆོག་ལ་འཛིན་པའི་རྣམ་འགྱུར་ཐད་ནས་སྐྲག་སྣང་མི་ཉུང་བ་ཞིག་བྱུང་ཡོང་། ད་ལྟ་ཡོངས་སུ་ལེགས་པར་མཇུག་སྒྲིལ་བར་དགའ་སྤྲོ་བྱུང་། བཀུར་འོས་སྤྱི་འཐུས་རྣམ་པ་ཚོར་ཐུགས་རྗེ་ཆེ་ཞུ་རྒྱུ་ཡིན། སྤྱིར་ཡིན་ན་མི་མང་གི་རེ་འདུན་སྟོང་ཟད་དུ་གཏོང་མཁན་གྱི་སྤྱི་འཐུས་ཚོ་གྲོས་ཚོགས་སུ་མིག་ཉུལ་ཞིག་བྱས་པས་ཤེས་ཐུབ་པ་འདུག་པས། ཁ་སང་དགོང་མོར་ཨ་རིའི་རླུང་འཕྲིན་ཁང་གི་ཀུན་གླེང་ལེ་ཚན་སྐབས་སུ་ཁག་ཅིག་གིས་ཁ་པར་ལམ་ནས་བགྲོ་གླེང་གི་སྐུ་མགྲོན་དུ་གདན་ཞུ་བྱས་པའི་བཀུར་འོས་སྤྱི་འཐུས་ཀརྨ་ཡེ་ཤེས་ལགས་ལ་སྐྱོན་བརྗོད་བྱས་པ་ཅུང་ཙམ་ནོར་ཡོད། དེ་ནི་ཕོག་དགོས་པའི་སྒལ་བར་མ་ཕོག་པར་ཕོག་མི་དགོས་པའི་སྣ་མགོར་ཕོག་པ་ལྟ་བུ་རེད། ཁོང་ནི་ངས་བླ་མེད་ཀྱི་གོང་བཀུར་ཞུ་ཡུལ་དང་གནད་དོན་གཏིང་ཟབ་མཁྱེན་རྟོགས་ཆེ་བའི་སྤྱི་འཐུས་ཤིག་ཡིན།
སྐབས་འདིར་ངས་བཀུར་འོས་སྤྱི་འཐུས་རྣམ་པ་ཚོར་རེ་སྐུལ་ཞུ་རྒྱུར། ཐེངས་འདིར་རྣམ་པ་ཚོས་སྤྱི་འཐུས་གྲོས་ཚོགས་ཀྱི་བགྲོ་གླེང་ཡིག་ཆ་ཁག་དང་ཐད་གཏོང་བྱས་པའི་བརྙན་འཕྲིན་བཅས་ལ་གཟིགས་ཏེ། རང་ཉིད་གྲོས་ཚོགས་ར་བའི་ནང་དུ་ཡོད་སྐབས་བོད་མི་རིགས་དང་རྩ་དོན་ཆེད་གསུང་མོལ་ཇི་ལྟར་གནང་བ་དང་། རང་ཉིད་ཀྱི་དགའ་སྐྱོ་ཆགས་སྡང་གི་དབང་དུ་ཅི་ཙམ་ཤོར་བ། དགོས་མེད་ཀྱི་ཀི་ཅོ་གང་དང་གང་བཏོན་པ་བཅས་ལ་བསྐྱར་གཟིགས་ཤིག་གནང་བའི་རེ་བ་ཞུ།
ཡིན་ནའང་། ངས་གཏམ་འདིས་སུས་རང་སྐྱོན་ངོས་ཟིན་གྱིན་མེད་པར་ངའོ་སྙམ་པ་ཅན་ཚོའི་ཕན་ནས་བཀུར་འོས་སྤྱི་འཐུས་ཡོངས་ལ་མི་གནོད་པའི་རེ་བ་སྙིང་ནས་ཞུ།
གུས་ཞབས་བཅས། ཨ་རིག་འགྱུར་མེད་ཀྱིས།