སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་བའི་སྟེང་། སྤྱི་ནོར་༧གོང་ས་མཆོག་གིས་ཆེད་དུ་གསུང་འཕྲིན་ཞིག་བསྩལ་ཡོད་པའི་ཐད། སྤྱི་འཐུས་གྲོས་ཚོགས་ནས་བགྲོ་གླེང་བ་དང་། ཟུར་དུ་ཉན་ཞིབ་ཀྱི་ཚོགས་འདུ་བསྐངས་པ་བཅས་བརྒྱུད་དེ། གནད་དོན་རྣམས་ཁ་གསལ་གཏིང་གསལ་འཁྲུན་ཐག་ཆོད་པ་ཞིག་བྱུང་མཐར། དེ་རིང་ཕྱི་ཚེས་ ༢༠ ཉིན་གྱི་སྔ་དྲོར་གཞུང་འབྲེལ་གྲོས་ཆོད་གྲོས་འཆར་ཞིག་བསྣམས་ཡོད་པ་དེ་ལ། བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཀྱིས་གཏན་འབེབས་ཐག་གཅོད་བྱུང་སོང་།
གྲོས་ཆོད་དེའི་སྔོན་གླེང་ནང་བཀོད་དོན། ཕྱི་ལོ་ ༢༠༡༠ ཟླ་ ༣ པའི་ཚེས་ ༨ འཁོད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་སྐབས་བཅུ་བཞི་བའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་ ༩ པར་གསུང་འཕྲིན་རིན་པོ་ཆེ་སྤྱི་ཕེབས་བྱུང་བར་ཐུགས་རྗེ་བཀའ་དྲིན་བླ་མེད་ཞུ་རྒྱུ་དང་། གསུང་འཕྲིན་ནང་གྲོས་ཚོགས་ཀྱི་འཐུས་མི་རྣམས་ཀྱི་བླང་དོར་ཞུ་སྒོ་སྤྱི་དང་། ཁྱད་པར་བོད་རྒྱ་འབྲེལ་མོལ་གྱི་ལས་རིམ་ནང་རྒྱ་ནག་མི་མང་སྤྱི་མཐུན་རྒྱལ་ཁབ་ལ་གནང་བའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་ “བསམ་འཆར་དང་འགྲེལ་བརྗོད་དེ་དག་གྲོས་ཚོགས་ནང་མོས་མཐུན་མ་བླངས་པའམ། གྲོས་ཚོགས་ལ་མ་བསྟན་པའི་ཡིག་ཆ་ཡིན་ཚུལ་དང་། ངོས་ཀྱི་བསམ་ཚུལ་མིན་ཚུལ་སོགས་ཀྱི་དོགས་གླེང་རིགས་ཡོང་གི་ཡོད་ཚོད་འདུག་པས། རྩ་དོན་དང་འབྲེལ་བའི་གནད་དོན་འདི་རིགས་ཕྱི་གསལ་ནང་གསལ་མ་བྱུང་བར་མང་ཚོགས་སུ་ཐེ་ཚོམ་སྐྱེ་གཞིར་གནས་པས་ད་རེས་ཚོགས་དུས་འདིའི་རིང་བགྲོ་གླེང་མཐིལ་ཕྱིན་དང་། དེ་བཞིན་བཀའ་ཤག་དང་ངོས་ཀྱི་སྐུ་ཚབ་སྦྲེལ་པོ། གཞན་ཡང་འབྲེལ་ཡོད་ཇི་འོས་རྣམས་ལ་ཉན་ཞིབ་དོགས་འདྲི་འཁྲུན་ཆོད་བྱས་ཏེ་གསལ་པོ་བཟོ་དགོས” ཞེས་སྤྱི་ཕེབས་བྱུང་བར་ད་ལམ་གྲོས་ཚོགས་སུ་བགྲོ་གླེང་དང་། འབྲེལ་ཡོད་ཡོངས་ལ་ཉན་ཞིབ་མཐིལ་ཕྱིན་བྱས་པའི་མཐའ་དོན་གྲོས་ཆོད་ཅིག་འཇོག་རྒྱུ་དུས་ཀྱི་དགོས་མཁོར་མཐོང་། ཞེས་བཀོད་འདུག
གྲོས་ཆོད་དངོས་གཞིར་དོན་ཚན་ ༤ བཀོད་ཡོད་པ་གཤམ་གསལ་ལྟར་ཡིན། དང་པོ། གྲོས་ཚོགས་ཀྱི་ལས་དོན་བྱེད་ཕྱོགས་ཀྱི་གནས་ཚད་དང་སྤུས་ཀ་གོང་སྤེལ་ཆེད་རང་ནུས་གང་ཡོད་ལྷག་བསམ་ཟོལ་མེད་ཀྱིས་འབད་འབུངས་ཞུ་རྒྱུ་དང་། ད་བར་ང་ཚོའི་བསམ་སྤྱོད་ཀྱི་ནུས་པས་མ་འདང་བས་རྟོན་བཞིའི་འཇུག་ལྡོག་ནོར་བ་ཐམས་ཅད་ལ་བཟོད་གསོལ་ཞི་བ་དང་ཆབས་ཅིག་མཐོལ་བཤགས་ཞུ་རྒྱུ་དང་། འབྱུང་འགྱུར་སྒེར་འཁོན་ཕྱོགས་འཐེན་རིགས་སྤངས་ཏེ། མང་ཚོགས་ལ་འགན་འཁུར་བའི་ཐོག་ནས་སྤང་བླངས་འཛོལ་མེད་ཞུ་རྒྱུ་ཡིན།
གཉིས་པ། བོད་རྒྱ་འབྲེལ་མོལ་ཀྱི་ལས་རིམ་ནང་རྒྱ་ནག་མི་མང་སྤྱི་མཐུན་རྒྱལ་ཁབ་ལ་གནང་བའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོངས་ཐབས་ཀྱི་བསམ་འཆར་དང་འགྲེལ་བརྗོད་ཡིག་ཆའི་ནང་དོན་རྣམས་༸གོང་ས་སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་དང་ཡོངས་སུ་མཐུན་པ་ཡིན་པར་ངེས་རྙེད་གོ་རྟོགས་གསལ་པོ་བྱུང་ལགས་པ་དང་། ཡིག་ཆ་དེ་དག་གྲོས་ཚོགས་ལ་གྲོས་བསྡུར་གནང་དགོས་མ་མཆིས་པར་གྲོས་ཚོགས་ཀྱི་སྤྱི་མོས་གྲོས་ཆོད་སྔ་རྗེས་ཀྱི་འབྲུ་དོན་ལྟར་ཕྱག་བསྟར་གནང་བར་ངོས་འཛིན་ཞུ་རྒྱུ།
གསུམ་པ། ཕྱི་ལོ་ ༡༩༩༧ ཟླ་ ༩ པའི་ཚེས་ ༡༨ ལ་བཞག་པའི་སྤྱི་མོས་གྲོས་ཆོད་ཀྱི་ལམ་ནས་ཇི་ལྟར་གསོལ་བ་བཏབ་པ་བཞིན་ད་ཕན་བོད་ཀྱི་རྩ་དོན་དང་དེའི་སྒྲུབ་ཐབས་བཅས་༸གོང་ས་སྐྱབས་མགོན་ཆེན་པོ་མཆོག་གིས་དུས་ནས་དུས་སུ་ཡེ་ཤེས་དབྱིངས་དཔྱད་ཀྱིས་ཐག་གཅོད་བཀྲིན་བསྐྱངས་པར་སྙིང་ནས་བཀྲིན་བསམ་ཤེས་ཞུ་རྒྱུའི་ཐོག་གོང་གསལ་གྲོས་ཆོད་ལ་བསྐྱར་དུ་མཇུག་གནོན་དང་འབྲེལ་འབྱུང་འགྱུར་ཡང་༸གོང་ས་སྐྱབས་མགོན་ཆེན་པོ་མཆོག་གིས་དུས་ནས་དུས་སུ་ཡེ་ཤེས་དབྱིངས་དཔྱད་ཀྱིས་ཐག་གཅོད་གནང་རྒྱུའི་ཐུགས་འགན་མུ་མཐུད་བཞེས་གནང་ཡོང་བ་དང་། ༸གོང་ས་སྐྱབས་མགོན་ཆེན་པོ་མཆོག་གིས་ཐག་གཅོད་དང་ཕྱག་བསྟར་གང་གནང་ལ་གྲོས་ཚོགས་ཀྱིས་མོས་མཐུན་མཐའ་གཅིག་ཏུ་ཞུ་རྒྱུ།
བཞི་བ། བར་སྐབས་ཀྱི་བྱུང་རྐྱེན་འདི་དག་གིས་སྤྱི་ནོར་༸གོང་ས་སྐྱབས་མགོན་ཆེན་པ་མཆོག་གི་ལྷ་དགོངས་འཁྲུག་གཞིའི་རིགས་ཇི་གྱུར་ལ་སྙིང་ནས་བཟོད་གསོལ་འགྱོད་བཤགས་ཞུ་རྒྱུ་བཅས། ཞེས་བཀོད་འདུག
འབྱུང་འགྱུར་སྒེར་མཁོན་མེད་པར་འདོད་ན།
འབྱུང་འགྱུར་ཆོས་ལུགས་དང་ཆོལ་ཁའི་ཕྱོགས་ཞེན་སྤངས་དགོས།
འབྱུང་འགྱུར་ལྷག་བསམ་རྣམ་དག་གིས་བོད་སྤྱི་དོན་སྒྲུབ་ན།
འབྱུང་འགྱུར་གྱི་བོད་མིའི་གནས་ཚུལ་ཡར་རྒྱས་འགྲོ་སྲིད།
ངོ་མ་བདེན་ན་ཡག་པོ་འདུག་ཀྱང་། ཨེ་བདེན་ན་ཡིན་ན། ཚང་མ་རྡོག་རྩ་གཅིག་ཏུ་སྒྲིལ། ཚང་མ་སྔོན་ཐོན་གྲལ་ལ་སྐྱོལ།
སྤྱིར་མི་ལ་ནོར་འཁྲུལ་མེད་པ་དང་། ཤིང་ལ་འཛེར་བ་མེད་པ་མེད། ཡིན་ན་ཡང་སྐྱོན་ཆ་ཡོ་བསྲང་དང་འཕགས་མཆོག་ཕྱག་ན་པདྨོའི་བཀའ་དགོངས་སྤང་བླངས་ཚུལ་བཞིན་བྱས་པར་བསྔགས་བརྗོད་དང་ཡི་རང་ཡོད།
སྤྱི་འཐུས་རྣམས་པས་ལམ་ནོར་བསྡོག་ཤེས་མནང་བར་དགའ་ཡོད། རྗེས་སུ་ཡང་སྤྱི་བསམ་སྙིང་བཅང་གིས་དགེར་མཁོན་འཐེན་ཁྱེར་རིག་ཏེན་ནས་མི་ཡོང་བ་མནང་རོག་ཞེས་བོད་འབང་ཞིག་གི་ངོས་ནས་གསོལ་བ་ལན་བརྒྱར་འདེབ་བཞིན་ཡོད།
དངོས་གནས་སྙིང་རྗེ། བཀའ་ཤག་གསར་རྙིང་གི་འགྲན་རྩོད་ཁྲོད་ནས་སྤྱི་མཐུན་ལྷན་ཚོགས་ནི་སྤྱི་ཚོགས་མདུན་བྱིས་པ་བསམ་མེད་ལྟ་བུར་ཆགས་ཤག །ཐོག་མར་གྲོས་ཚོགས་ལ་མ་བསྟན་པའི་ཡིག་ཆ་ཟེར་མཁན་ཀྱང་སྤྱི་མཐུན་ལྷན་ཚོགས་མ་རེད་ལ། ད་ཐེངས་ཀྱི་གནོན་ཤུགས་སྤྲོད་མཁན་ཀྱང་སྤྱི་མཐུན་ལྷན་ཚོགས་མ་རེད། ཡིན་ནའང་རྒྱལ་སྤྱིའི་སྤྱི་ཚོགས་མདུན་ནག་ཉེས་ངོས་ལེན་དང་བཤགས་སྡོམ་བྱ་མཁན་ནི་སྤྱི་མཐུན་ལྷན་ཚོགས་རེད། གནས་ཚུལ་འདིས་སྤྱི་མཐུན་ལྷན་ཚོགས་ཀྱི་ཚོགས་མི་རྣམས་བཀའ་བློན་གསར་རྙིང་སོགས་ཀྱི་རྒྱུག་ཁྱི་ཙམ་ལས་སོ་སོ་རང་རང་ལ་དམིགས་འདུན་དང་ཤེས་འཇོན་གང་ཡང་མེད་པ་གསལ་སྟོན་བྱས་ཡོད།
ཕྱོགས་རིས་སྐོར། སྤྱི་ཡོངས་ནས་བཤད་ན་༧རྒྱལ་བ་རིན་པོ་ཆེའི་ཐབས་མཁས་ཐུགས་རྗེའི་བཀའ་དྲིན་དང་། བོད་མིའི་ཤེས་ཡོན་གནས་ཚད་གོང་མཐོར་ཕྱིན་པའི་ནུས་སྟོབས་ཟུང་སྦྲེལ་ལ་བརྟེན་ནས་བོད་ཀྱི་ཆོས་ལུགས་རིས་མེད་ཕན་ཚུན་གུས་བརྩི་དང་། འཆམ་མཐུན། དེ་བཞིན་བོད་རིགས་ཡོངས་རྫོགས་རྡོག་རྩ་གཅིག་བསྒྲིལ་གྱི་གནས་སྟངས་ད་ལྟ་ལས་ལྷག་པ་ཞིག་བྱུང་མྱོང་མེད་པ་ལྟ་བུ་རེད། འོན་ཀྱང་ལེགས་ཉེས་བླང་དོར་མི་ཤེས་པ་ཀླད་རྙིང་མཁྲེགས་བཟུང་ཅན་རེ་ཟུང་གིས་ལུང་ཚན་ཕྱོགས་རིས་ཀྱི་སྐད་ཆ་ཤོད་ཀྱི་ཡོད་པ་དེ་ཚོ་ནི་བོད་མི་རིགས་ཀྱི་མཐུན་བསྒྲིལ་དང་སྟོབས་ཤུགས་བསྟོར་བཤིགས་གཏོང་རྒྱུའི་དུག་རྫས་ནུས་ཤུགས་ཅན་ཞིག་དང་མཚུངས་པ་རེད། ང་ཚོར་ལུང་ཚན་རྩོད་གཞིའི་ས་ཁོངས་ལག་མཐིལ་ཙམ་ཡང་བདག་དབང་མེད་པ་དང་། དེ་བཞིན་བཙན་བྱོལ་ནང་དུ་ཡོད་པའི་བོད་མི་མང་ཆེ་བ་ནི་མི་རབས་གསར་པ་ཕ་མ་བོད་ཀྱི་ས་ཁུལ་འདྲ་མིན་སྣ་ཚོགས་ནས་ཡིན་པ་གཉེན་སྒྲིག་བྱས་པའི་བུ་་ཕྲུག་སྐྱེས་ཡུལ་རྡ་ས་དང་། ཌལ་ཧོར། ཀ་སྦུག། མའི་སོར། བལ་ཡུལ་སོགས་ཡིན་པ་ཙམ་དུ་མ་ཟད། ཁོང་ཚོ་རྡ་རམ་ས་ལས་གཙོས་པའི་བོད་ཀྱི་བུ་གསོ་ཁང་དང་། བོད་ཁྱིམ། བོད་གཞུང་སློབ་གྲ་བཅས་པའི་ནང་མཉམ་དུ་འཚར་ལོངས་བྱས་པའི་ཕ་མ་གཅིག་གི་བུ་ཕྲུག་ལྟ་བུ་རེད། བྱས་ཙང་རྒྱུ་མཚན་ག་རེའི་ཐོག་ནས་ལུང་ཚན་ཕྱོགས་རིས་ཀྱི་སྐད་ཆ་བཤད་དགོས་དོན་འདུག་གམ། རང་སྲོག་རང་གིས་གཅོད་བྱེད་ཀྱི་དུག་རྫས་དེ་རིགས་ང་ཚོའི་མི་རབས་གསར་པའི་ཁྲོད་དུ་དར་ཁྱབ་མི་ཡོང་བའི་ཆེད་དུ་ང་ཚོ་བོད་རིགས་སྤུན་ཟླ་ཚང་མས་དངོས་ཤུགས་བརྒྱུད་གསུམ་ནས་འཛེམས་ཟོན་མེད་པར་བཀག་འགོག་བྱེད་རྒྱུ་ང་ཚོའི་རྩ་དོན་འཐབ་རྩོད་ཀྱི་ཆེད་དུ་ལས་དོན་གལ་ཆེི་ཤོས་ཤིག་ཡིན་པར་ཡིད་ཆེས་བྱེད་ཀྱི་ཡོད། ཁེ་ན་ཌ་ནས།།
བོད་མི་མང་ནས་འགན་འཁུར་མ་བླངས་པ་མ་རེད། མ་འོངས་པའི་ཆེད་དུ་མང་གཙོའི་ལམ་བཟང་དུ་བསྐྱོད་རྒྱུའི་སྦྱོང་བརྡར་བྱེད་བཞིན་ཡོད་ལ་བཀའ་བློན་ཁྲི་པ་ཡང་མི་མང་གིས་ཐད་ཀར་འོས་འདེམས་བྱས་པ་རེད། ད་ལྟའི་ཆར་མི་མང་གིས་འགན་རྐང་འཁུར་བར་གནས་དུས་དབང་གིས་ནུས་པས་འདེང་གི་མེད། མི་མང་གིས་འགན་རྐང་འཁུར་བར་རང་ལ་དབང་བའི་རྒྱལ་ཁབ་དང་ཁྲིམས་སྲུང་གི་ཆ་རྐྱེན་སོགས་ཚད་ལྡན་དགོས་པ་ལས་མིའི་ལུང་པར་ཡུལ་གྱར་ནས་བསྡད་ཡོད་པའི་མི་མང་ཉུང་ཤས་ཤིག་གིས་ཚད་ལྡན་མང་གཙོའི་རྒྱལ་ཁབ་ལྟར་བྱ་རྒྱུའི་བསམ་པ་ད་ལྟ་ཆེས་སྔས་སྐྱོན་མ་ཡིན་ནམ། སྤྱི་འཐུས་འཚོགས་དུས་བརྒྱད་པར་སྤྱི་འཐུས་འགའ་ཞིག་གིས་གནད་དོན་ཆུང་ངུ་ཞིག་ལ་ག་རེ་བྱས་སྐབས་དེའི་བརྙན་འཁོར་ནང་ཐོན་པའི་དགྲ་དགའ་གཉེན་སྡུག་དེ་མ་མཐོང་ངམ། ༧གོང་ས་མཆོག་ལ་ཡར་འབུལ་གང་ཐུབ་བྱེད་པ་འདི་༧གོང་ས་མཆོག་གིས་མ་གཏོགས་འཇོན་གྱི་མེད་པས་རེད། ༧གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ནས་འཛམ་གླིང་ནང་བོད་དོན་ལ་རྒྱབ་སྐྱོར་ཇི་མང་དུ་འགྲོ་བཞིན་ཡོད་པ་འདི་ཤེས་རྒྱུ་གལ་ཆེ།
ཐུགས་རྗེ་གཟིགས། འབྱུང་འགྱུར་སྒེར་འཁོན་ཕྱོཊ་འཐེན་མི་བྱེད་པའི་དམ་བཅའ་དེ་མ་བརྗེད་པ་གནང་རོགས། ཐུགས་རྗེ་ཆེ།
ད་བར་དུ་དུས་བབ་ཚང་གི་ལྡེ་མིག་འདི་འདྲར་ཆག་པ་ཡང་མ་ཚོར།
ལུས་པོ་རྙིང་པར་ལྟ་བ་གསར་པ་བླུག་པའི་ཐུགས་དགོངས་དེ་དངོས་ནས་རྗེས་སུ་ཡིད་རང་དང་རླབས་ཆེན་གྱི་བྱ་གཞག་ཅིག་ཀྱང་རེད།
དེས་ན་མཆོག་ཏུ་བཀུར་འོས་ཀྱི་སྤྱི་འཐུས་ལྷན་རྒྱས་ལ་འབངས་ཀྱི་གྲལ་མཐར་གནས་པ་བདག་གིས་སྙིང་ཐག་པ་ནས་ཐུགས་རྗེ་བླ་མེད་དུ་ཆེ་ཞུ་རྒྱུ་ཡིན།
སྤྱི་འཐུས་གྲོས་ཚོགས་ཀྱིས་བོད་མི་རིགས་ཀྱི་རྩ་དོན་འགན་ཁུར་ལེན་མ་ཐུབ་པ་དེར་ད་ལན་གསལ་པོ་བྱུང་སོང་། བོད་མི་རིགས་ཀྱི་རྩ་དོན་དེར་སྤྱི་འཐུས་རྣམས་ཀྱི་འགན་ལེན་མ་ཐུབ་པ་འདིས་བོད་མི་རིགས་ཀྱི་རྩ་དོན་དེར་བོད་མི་རིགས་ཀྱིས་འགན་ཁུར་ཐུབ་ཀྱིན་མེད་པར་མཚོན་གྱི་འདུག
སྔར་ནས་ད་ལྟར་བར་དུ་བོད་མི་རིགས་ཀྱི་རྩ་དོན་འདི་༧གོང་ས་མཆོག་ལ་ཡར་ཕུལ་གང་ཐུབ་བྱས་པ་ལས་བོད་མི་མང་གི་འགན་ཁུར་ཡག་པོ་ལེན་ཐུབ་མེད་པར་གསལ་པོ་ཆགས་འདུག
སྤྱི་འཐུས་གྲོས་ཚོགས་ནས་འཇུག་བསྡོམས་ཡང་དག་པ་ཞིག་གནང་འདུག་སྙིང་ཁོང་རུས་པའི་གཏིང་ནས་ཐུགས་རྗེ་ཆེ་ཞུ། འདིས་ཐ་མའི་རྒྱལ་ཁ་བདེན་པར་ཐོབ་ཟེར་བར་ངེས་ཤེས་འཕར་མ་ཞིག་ལོས་སྐྱེ། དེ་དོན་ཁུངས་མེད་སྐྲོག་རྐྱེན་བཟོ་མཁན་ཚོས་བསམ་ཤེས་ཀྱིས་བླང་དོར་འཇུག་ལྡོག་ཚུལ་བཞིན་ཡོང་བའི་རེ་བ་ཡོད། ༧གོང་ས་སྐྱབས་མགོན་ཆེན་པོ་མཆོག་སྐུ་ཚེ་སྲིད་མཐར་བརྟན་པ་དང་། རླབས་ཆེན་དགོངས་བཞེད་མཐའ་དག་འབད་མེད་ལྷུན་གྱིས་བསྒྲུབ་པར་ཤོག བཀའ་བཞིན་སྒྲུབ་པའི་མཛད་གཙོ་རྣམས་སྐུ་ཚེ་བརྟན་ཅིང་མཛད་པ་མཐར་ཕྱིན་ཡོང་བར་བསྟན་སྲུང་བརྒྱ་ཚོས་སྐྱབས་དང་མགོན་མཛོད་ཅིག བོད་རྒྱལ་ལོ༎