སློབ་མའི་ངོ་རྒོལ།

ཞོན་ཧྭ་བོད་ཡིག་སློབ་འབྲིང་གི་སློབ་མ་ཁག་ཅིག་གིས་འདས་སོང་དཔའ་བོ་དཔའ་མོ་རྣམས་ལ་མྱ་ངན་གྱི་མཆོད་མེ་སྒྲོན་ཏེ་རྒྱ་གཞུང་ལ་ཞི་བའི་ངོ་རྒོལ་བྱས་འདུག

དེ་རིང་ཞོགས་པར་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་བསམ་བློ་ཁང་ཚན་གྱི་གྲྭ་བཟོད་པ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། འདི་ལོ་བོད་མིའི་ཞི་བའི་སྒེར་ལངས་ཀྱི་དུས་དྲན་ཐེངས་ ༥༡ པའི་ཡར་སྔོན་སྟེ། ཕྱི་ཚེས་ ༩ ཉིན་མཚོ་སྔོན་ཞིང་ཆེན་ཞོན་ཧྭ་རྫོང་བོད་ཡིག་སློབ་འབྲིང་གི་སློབ་མ་ ༡༠༠ ལྷག་བིས་མདོ་དགོན་ཆེན་དུ་ཕྱིན་ཏེ། དགོན་པའི་གཉེར་བར་ཁོང་ཚོར་མཆོད་སྐོང་ཆིག་སྟོང་གཡར་དགོས་པའི་རེ་སྐུལ་ཞུས་ཡོད་འདུག་ལ། དགོན་པའི་གཉེར་བས་མཆོད་མེས་ཅི་བྱ་ཡི་གནས་ཚུལ་དྲིས་ཏེ་མཐའ་མཇུག་དོགས་ཟོན་འོག་སློབ་མ་ཚོར་གཡར་མི་འདུག་ཟེར། རྗེས་སུ་སློབ་མ་ཚོས་བིས་མདོ་དགོན་པའི་ཉེ་འགྲམ་གྱི་ལྷ་སྡེ་སྡེ་བ་དང་འདབས་མ་སྡེ་བ་བཅས་སྡེ་བ་ཁག་ཅིག་གི་ནང་ཕྱིན་ཏེ་མཆོད་སྐོང་ཆིག་སྟོང་ལྷག་གཡར་རྗེས་བིས་མདོ་དགོན་པའི་ཉེ་འདབས་ཀྱི་མཆོད་རྟེན་ཆེན་མོའི་གམ་དུ་མཆོད་མེ་སྒྲོན་ཡོད་འདུག  རྗེས་སུ་སློབ་མ་ཚོས་དགོན་པའི་གྲྭ་བ་ཁག་ཅིག་ལ་ལས་འགུལ་སྤེལ་དོན་ཐད་བརྗོད་དོན་ལྟར་ན། ཁོང་ཚོས་ཐེངས་འདིའི་ལས་འགུལ་དེ་ནི་རྒྱ་གཞུང་གིས། ༢༠༠༨ ལོར་བོད་ཆོལ་གསུམ་ཁྱོན་ཡོངས་སུ་ཞི་བའི་ངོ་རྒོལ་བྱས་པའི་རྒྱལ་གཅེས་དཔའ་བོ་དཔའ་མོ་མང་པོ་དམར་གསོད་བཏང་ཡོད་སྟབས། ང་ཚོས་ཁོང་རྣམ་ལ་རྗེས་དྲན་དང་མྱ་ངན་གུས་འདུད་མཚོན་ཆེད་ལས་འགུལ་འདི་སྤེལ་བ་ཡིན་ཚུལ་བརྗོད་ཡོད་འདུག   ཕྱིས་སུ་ཞོན་ཧྭ་རྫོང་དང་བིས་མདོ་ཞང་གི་ས་གནས་ཉེན་རྟོག་མི་སྣས་ཤེས་རྟོགས་བྱུང་སྟེ། ད་ལྟའི་ཆར་སློབ་མ་ཚོར་ཐེངས་འདིའི་ལས་འགུལ་གྱི་སྣེ་འཁྲིད་པ་སུ་ཡིན་དང་ལས་འགུལ་སྤེལ་དོན་གྱི་དམིགས་ཡུལ་བཅས་ཀྱི་ཐད་སློབ་མ་རེ་རེ་བཞིན་འདྲི་བརྩད་བྱེད་ཀྱིན་ཡོད་སྐོར་བརྗོད་བྱུང་ལ། འཛིན་བཟུང་གི་གནས་ཚུལ་གསལ་ཁ་མེད་ནའང་། སློབ་མ་དེ་དག་དམ་དྲག་དང་འདྲི་བརྩད་ཁྲོད་ལྷག་ཡོད་པའི་གནས་ཚུལ་འགྲེལ་བརྗོད་གནང་བྱུང་།

ཞོན་ཧྭ་བོད་ཡིག་སློབ་འབྲིང་ནི། ཕྱི་ལོ་ ༡༩༨༥ ལོར་པཎ་ཆེན་སྐུ་ཕྲེང་བཅུ་བ་བློ་བཟང་འཕྲིན་ལས་ལྷུན་འགྲུབ་ཆོས་ཀྱི་རྒྱལ་མཚན་མཆོག་གིས་ཞོན་ཧྭ་རྫོང་དང་སྤྱི་ལེ་ ༡༩ མཚམས་ཀྱི་བིས་མདོ་ཞང་ཐོག་ཏུ་གསར་འཛུགས་གནང་ཡོད་འདུག་ལ། ད་ལྟའི་ཆར་རྡོ་སྤིས་དང་བིས་མདོ། ཀ་རིང་། རྐང་ཚ་བཅས་ཞོན་ཧྭ་ཡུལ་གྱི་བོད་རིགས་ཞང་བཞིའི་སློབ་མ་གཙོས་པའི་མཚོན་སྔོན་གྱི་ས་ཁུལ་གཞན་ནས་ཕེབས་པའི་སློབ་མ་བསྡོམས་༧༡༨ དང་། དགེ་རྒན་ ༧༨ ལྷག་ཡོད་པ་དང་། ད་ལྟའི་བར་བོད་ཡིག་གཙོས་པའི་སྐད་གཉིས་སློབ་སྦྱོང་གི་བསྟི་གནས་ཤིག་ཆགས་ཡོད་འདུག