ཕྱི་ཚེས་ ༢༥ ཀྲུང་གོའི་བོད་ལྗོངས་ཆ་འཕྲིན་ལྟེ་གནས་ཀྱི་དྲ་ཚིགས་སུ་གནས་ཚུལ་སྤེལ་བ་ལྟར་ན། ཕྱི་ཚེས་ ༢༤ ཉིན་པེ་ཅིང་ནས་ཀྲུང་གོའི་སྤྱི་ཚོགས་ཚན་རིག་གླིང་གི་དྲུང་ཡིག་ཆེན་མོ་གཞོན་པ་དང་། ཀྲུང་གོའི་མི་རིགས་རིག་པའི་སློབ་ཚོགས་ཀྱི་ཚོགས་གཙོ་ཧའོ་ཧྲི་ཡོན་གྱིས་ཏཱ་ལའི་ཡིས་བཏོན་པའི་བོད་ཁུལ་ཆེན་མོ་ཞེས་པ་དེ་སྤྱི་ཁོག་ནས་བལྟས་ན་མི་རིགས་རང་སྐྱོང་ལྟར་དུ་སྣང་ཡང་། ངོ་བོའི་སྟེང་ནས་བཤད་ན་རང་བཙན་བྱེད་འདོད་ཀྱི་རེ་ངན་བཅངས་ཡོད་པ་རེད། དེ་བས་ཀྲུང་གོའི་རྩ་ཁྲིམས་དང་མི་རིགས་ས་ཁོངས་རང་སྐྱོང་གི་ཁྲིམས་དང་འགལ་ནས་འདུག་ཅེས་དང་། ཏཱ་ལའི་ཡིས་བཏོན་པའི་བོད་ཁུལ་ཆེན་མོ་ཞེས་པའི་ལྟ་བ་དེས་བོད་ལྗོངས་དང་ཟི་ཁྲོན། མཚོ་སྔོན། ཀན་སུའུ་ཞིང་ཆེན་སོགས་ཀྱི་བོད་པ་འདུས་སྡོད་ཁུལ་དུ་རང་སྐྱོང་གཙང་མ་བྱེད་རྒྱུ་དེ་ཡིན། ཞེས་བརྗོད་འདུག
ཀྲུང་གོའི་བཅའ་ཁྲིམས་དང་མི་འགལ་བའི་སྒོ་ནས་རང་སྐྱོང་ལག་བསྟར་བྱེད་པ་ཞེས་པའི་བརྗོད་སྟངས་འདིའི་ཐད། ཧའོ་ཧྲི་ཡོན་གྱིས་ཉིན་དེར་ཚོགས་པའི་རྒྱལ་ཁབ་ཕྱི་ནང་གི་གསར་འགོད་པའི་བསམ་བློ་བརྗེ་རེས་བྱེད་སྒོའི་སྟེང་འདི་ལྟར། ཀྲུང་གོའི་མི་རིགས་ས་ཁོངས་རང་སྐྱོང་ལམ་ལུགས་ནི་མི་རིགས་ཀྱི་རྒྱུ་རྐྱེན་དང་ས་ཁོངས་ཀྱི་རྒྱུ་རྐྱེན་གཉིས་ཟུང་དུ་འབྲེལ་བའི་ལུགས་ཤིག་ཡིན་པ་ལས། མི་རིགས་རང་སྐྱོང་མ་ཡིན་ཞེས་དང་། ཏཱ་ལའི་ཡིས་བཏོན་པའི་བོད་ཁུལ་ཆེན་མོ་ཞེས་པ་ནི་ངོ་བོའི་སྟེང་རང་བཙན་བྱེད་པའི་རེ་ངན་བཅངས་ཡོད་པས། ཀྲུང་གོའི་བཅའ་ཁྲིམས་དང་འགལ་ནས་འདུག་ཅེས་སོགས་བརྗོད་ཡོད།
ཁོས་ད་དུང་། ཀྲུང་གོར་མི་རིགས་ས་ཁོངས་རང་སྐྱོང་ལམ་ལུགས་ལག་བསྟར་བྱས་པར་ལོ་རྒྱུས་ཀྱི་རྨང་གཞི་བརྟན་པོ་ཡོད་ཅིང་། ལམ་ལུགས་འདི་ལག་བསྟར་བྱས་ནས་ལོ་ ༦༠ འཁོར་བའི་རིང་མི་རིགས་སོ་སོའི་འདྲ་མཉམ་ཁེ་དབང་ལ་སྲུང་སྐྱོབ་དང་གྲངས་ཉུང་མི་རིགས་ས་ཁུལ་གྱི་སྤྱི་ཚོགས་དང་དཔལ་འབྱོར་གོང་དུ་སྤེལ་བའི་ཐད་བྱེད་ནུས་གལ་ཆེན་ཐོན་ཡོད་པའི་སྐོར་བརྗོད་པ་དང་། བོད་ལྗོངས་དང་ཞིན་ཅང་སོགས་ཀྱི་ས་ཆར་གནད་དོན་རེ་འགའ་ཡོད་མོད། འོན་ཀྱང་དེ་དག་ནི་ཀྲུང་གོའི་མི་རིགས་གནད་དོན་གྱི་ཕྱོགས་གཙོ་བོར་འགྱུར་མི་སྲིད་ལ། གནད་དོན་དེ་དག་ནི་ཀྲུང་གོའི་ཁེ་ཕན་གཙོ་བོ་དང་འབྲེལ་བ་ཆེ་ན་ཡང་། ཀྲུང་གོའི་མི་རིགས་གནད་དོན་གྱི་བརྗོད་བྱ་གཙོ་བོར་འགྱུར་མི་སྲིད་ཅེས་དང་། ཡང་ཅིག་བརྗོད་ན། ཀྲུང་གོའི་མི་རིགས་ཀྱི་གནད་དོན་གཙོ་བོ་ནི་སྤྱི་ཚོགས་དང་དཔལ་འབྱོར་འཕེལ་རྒྱས་ཀྱི་གནད་དོན་ཡིན་པ་ལས་ཁ་བྲལ་བའི་གནད་དོན་མིན་ཞེས་བཤད་པ་རེད། ཁོས་མི་རིགས་ས་ཁུལ་གོམ་གང་མདུན་སྤོས་ཀྱིས་གོང་དུ་འཕེལ་བར་སྐུལ་འདེད་གཏོང་བའི་བྱེད་ཐབས་བཏོན་ནས། སྤྱི་ཚོགས་དང་དཔལ་འབྱོར་གྱི་འཕེལ་རྒྱས་དེ་མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བའི་དངོས་པོའི་འགན་སྲུང་དུ་འགྱུར་བ་བྱེད་དགོས་པའི་བསམ་འཆར་བཏོན་པ་རེད་ཅེས་བཀོད་འདུག
དེང་གི་ཏང་ལགས་སུ། ༸ཏྰ་ལའི་ཡིས་བཏོན་པ་དེ་བོད་མི་བརྒྱ་ཆ་ ༩༩ ས་རྒྱབ་སྐྱོས་ཡོད་རེད། དེ་ལ་འཁྱོག་བཤད་མ་གནང་རོགས་གནོངས།
རྒྱ་གཞུང་གི་མཁས་པ་འདིའི་མཁས་རྟགས་སྟོན་རྒྱུ་མང་དྲགས་སོང་། ཀྲུང་གོའི་ཁེ་ཕན་གཙོ་བོ་དང་འབྲེལ་བ་ཆེ་ན་ཡང་། ཀྲུང་གོའི་མི་རིགས་གནད་དོན་གྱི་བརྗོད་བྱ་གཙོ་བོ་མིན། ཅིའི་ཕྱིར།
རྒྱ་ནག་གི་རྒྱལ་རབས་ལོ་རྒྱུས་ཕལ་ཆེ་བ་གཡོ་སྒྱུའི་བྱུང་རབས་ཡིན་ཅིང་། ལྷག་པར་གུང་ཁྲན་དམར་གཞུང་ནི་ངན་པ་ལང་ཤོར་རྐྱང་ཡིན་པས་བདེན་པའི་ར་སྤྲོད་བྱ་ས་རྩ་བ་ནས་མེད། བོད་དོན་བདེན་མཐའ་གསལ་བ་ཡང་ཁོ་ཚོ་ཉམས་གུད་དང་འཐོར་ཞིག་ཏུ་འགྲོ་བའི་ཐབས་ཇུས་འདོན་ཐུབ་ན་མ་གཏོགས། སྐད་ཆ་བདེན་པ་བཤད་པ་ཙམ་གྱིས་ཕན་ཐོགས་གང་ཡང་མི་ཡོང་བ་ཡིན།