ཞིང་བྲན་ལ་རྗེས་དྲན་ཞུ། ལྷམ་ཀོག

 
ལྷམ་ཀོག་ནི་མི་སྙིང་མེད་ཅིག་ཡིན་པས་བཤད་དགོས་སར་ སྐད་ཆ་འདི་ལྟ་བུ་རེ་ལས་ཤོད་ཀྱིན་མེད་པས་སྙིང་སྟོབས་ལྡན་པའི་ སྐྱེ་བུ་དག་གིས་བག་ཡངས་ས་ནས་འཕྱ་བར་མི་བྱའོ།།

བོད་ཞིང་བྲན་བཅིངས་གྲོལ་ བཏང་ནས་ད་ལོ་ནི་ལོ་ངོ་ལྔ་བཅུ་འགོར་བའི་མཚམས་སུ་བསླེབས་ཡོད་རྐྱེན་རྒྱལ་ཁབ་ ཀྱིས་བདེ་འཇགས་བྱ་བར་ཤུགས་བསྣོན་བྱས་ཏེ།  བོད་ས་གང་ན་ཡང་བདེ་འཇགས་མི་སྣ་རུ་དཔུང་བསྒྲིགས་ནས། དམངས་ཕལ་བ་ཚོའི་སེམས་ ངོར་རང་བཞིན་གྱིས་མི་མཐུན་པའི་ལག་པ་ཞིག་འགུལ་བར་ཡང་འཇིགས་སྣང་ཐོན་ཡོད་པའི་ སྐབས་འདིར།  ངས་རང་རིས་རླབས་ཆེ་བའི་མི་སྣ་དག་གི་སྔོན་གྱི་ཞལ་བཞེས་གནངས་པའི་ཡིག་ཆ་དག་ བསྐྱར་ཀློག་བྱེད་གྱིན་ཡོད། ༡༩༥༡ལོའི་ཟླ་བ༤ཚེས་༢༩ཉིན་ནི་ལོ་རྒྱུས་ཐོག་བརྗེད་དུ་མི་རུང་བའི་ཀྲུང་དབྱང་ སྲིད་གཞུང་དང་བོད་ས་གནས་སྲིད་གཞུང་དབར་གྱི་ཞི་བའི་གྲོས་མོལ་གྱི་ཚོགས་འདུ་ ཐེངས་དང་པོ་ཚོགས་པའི་དུས་ཡིན་ཞིང་། སྐབས་དེའི་ཀྲུང་དབྱངས་ཕྱོགས་ཀྱི་འཐུས་མི་གཙོ་བོ་ནི།ལི་ཝུའེ་ཧན་ཡིན་པ་དང་། འཐུས་མི་གཞན་དག་ནི། ཀྲང་ཅིན་ཝུའུ་དང་། ཀྲང་གོ་ཧྭ། སུན་ཀྲི་ཡོན་བཅས་ཀྲོའུ་ ཙོང་ལིས་ཐག་གཅོད་ལྟར་ཡིན་པ་མ་ཟད། ལུའུ་ཡུས་ཧུང་དང་འབའ་བ་ཕུན་ཚོགས་དབང་རྒྱལ་ གཉིས་ཀྱང་ཟུར་དུ་ཞུགས་རྒྱུ་བྱས་ཡོད་འདུག དེ་དུས་ཀྱི་བོད་ཕྱོགས་ཀྱི་འཐུས་མི་ ནི།ང་ཕོད་གཙོ་བོ་བྱས་ཐོག ཁེ་སྨད་བསོད་ནམས་དབང་འདུས་དང་། ཐུབ་བསྟན་བསྟན་དར། ཐུབ་བསྟན་ལེགས་སྨོན། བསམ་ཕོ་བསྟན་འཛིན་དོན་འགྲུབ་བཅས་ཡིན་འདུག སྐབས་འདིར་ ཀྲུའུ་ཙོང་ལི་མཆོག་གིས་ཏང་གི་མི་རིགས་སྲིད་ཇུས་དང་དེ་བཞིན་བོད་ཞི་བས་བཅིངས་ གྲོལ་གཏོང་རྒྱུའི་སྐོར་གྱི་གཏམ་བཤད་མང་དུ་གནངས་པར་མ་ཟད།  ལྷག་བསམ་ཟོལ་མེད་ཀྱི་གྲུབ་འབྲས་ཕུན་སུམ་ཚོགས་པ་ཞིག་ལེན་ཐུབ་རྒྱུའི་འབོད་ སྐུལ་ནན་ཆེར་གནངས་པ་ཡིན་འདུག   ཚོགས་འདུ་རབས་དང་རིམ་པ་ཚོགས་པའི་རྗེས་སུ་ཀྲུང་དབྱང་གི་འཐུས་མི་གཙོ་བོ་ལི་ ཝུའེ་ཧན་གྱིས་འདི་ལྟར་བཤད་གཏམ་གནངས་འདུག      ཀྲུང་གོ་གུང་ཁྲན་ཏང་གི་མར་ཁེ་སི་རིང་ལུགས་ཀྱི་མི་རིགས་ལྟ་ཚུལ་དེ་མི་རིགས་ ཆེ་ཆུང་ལ་མ་བལྟས་པར་ཚང་མ་འདྲ་མཉམ་ཡིན་པ་དང་།  བཙན་རྒྱལ་རིང་ལུགས་ཀྱིས་བོད་ལྗོངས་ཚུད་པའི་རང་རྒྱལ་གྱི་མི་རིགས་ཁག་ལ་བཙན་ འཛུལ་དང་གཉའ་གནོན་བྱེད་པར་ང་ཚོས་ངོ་རྒོལ་མཐའ་གཅིག་ཏུ་བྱེད་གྱི་ཡོད་ལ།  ཀྲུང་གོ་རྙིང་བའི་རྒྱལ་རབས་རིམ་བྱུང་གི་དབང་བསྒྱུར་གྲལ་རིམ་དང་གོ་མིན་ཏང་ ལོག་སྤྱོད་ཤོག་ཁག་གི་རྒྱ་རིགས་ཆེན་པོའི་རིང་ལུགས་ཀྱི་གཉའ་གནོན་སྲིད་ཇུས་ལ་ འང་ངོ་རྒོལ་མཐའ་གཅིག་ཏུ་བྱེད་ཀྱི་ཡོད་ལུགས་ཡང་ཡང་ནན་བཤད་གནངས་པ་མ་ཟད།  ཀྲུང་གོ་གསར་བས་ལག་བསྟར་བྱེད་པའི་མི་རིགས་ཁག་འདྲ་མཉམ་དང་། མཐུན་ བསྒྲིལ། རོགས་རེས། ཐུན་མོང་ཐོག་གྲ་རྒྱས་སུ་བསྒྱུར་དགོས་ཞེས་དང་། ཆེ་བས་ཆུང་ བར་གཉའ་གནོན་བྱེད་པའི་མི་རིགས་མཐོང་ཆུང་དང་། དབང་དུ་འདུལ་བ།གཉའ་གནོན། རང་ འདྲར་འགྱུར་བ་བཅས་ཀྱི་ལོག་སྤྱོད་སྲིད་ཇུས་དང་མི་འདྲ་བའི་ངོ་བོ་ནན་བཤད་གནངས་ པ་རེད། འདི་ནི་མོའུ་ཀྲུའུ་ཞི་མཆོག་གིས།ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་ རིགས་ཁག་མཐུན་སྒྲིལ་གྱིས་ཤིག་ཅེས་པའི་གསུང་གི་དགོངས་པ་ལག་ཏུ་བསྟར་བའི་གཏམ་ བཤད་ཅིག་ཡིན་པ་འདྲ།  སྐབས་དེའི་གཙོ་འཛིན་དག་གི་དགོངས་ཆར་དང་སྒྲིག་གཞི་ནི་རྒྱལ་ཁབ་འདིའི་བརྟན་ བརླིང་དང་འཕེལ་རྒྱས་སུ་འབྲེལ་འདུག་པ་ཤིན་ཏུ་ནས་ཀྱང་གསལ་བོ་རེད།  འོན་ཀྱང་བར་ལམ་སྐེད་ལམ་ནས་མགོ་ཁྲིད་ངན་པས་བྱས་ཉེས་དང་དམངས་ཀྱི་མི་རེ་འགའི་ མཁྲེགས་འཛིན་གྱི་དབང་དུ་སོང་ནས།  དུས་ཟིང་ཆེན་པོ་ལངས་པར་མ་ཟད། བོད་མི་རིགས་ཀྱི་རིག་གནས་དང་རྒྱུ་ནོམ་སོགས་ ཤུལ་བཞག་རིན་ཐང་བྲལ་བ་དག་གཙང་པོའི་ཆུ་དང་།  དམར་པོའི་མེ། ཡང་མོའི་རླུང་སོགས་ཀྱི་ཁ་ནས་མི་མངོན་པའི་དབྱིངས་སུ་བཏང་བའི་ ལོ་རྒྱུས་དེ་འང་སུ་ཞིག་གིས་བསྒྱུར་ནུས།  དེང་གི་ན་གཞོན་གྱི་གྲས་སུ་གཏོགས་པ་ཁོ་བོས་འདིའི་ཐད་ལ་བསམ་བློ་ཉི་ཚེ་བ་ཞིག་ བཏང་ན་འང་།  འདི་ནི་ཏང་ཀྲུང་དབྱང་དང་མར་མེ་རིང་ལུགས་ཀྱི་དགོངས་པ་ཞིག་མ་ཡིན་པར།བར་ལམ་ གྱི་མི་འགའ་ཞིག་གིས་ཀྲུང་དབྱང་སྲིད་གཞུང་དང་ཏང་གི་སྣང་བརྙན་ལ་ནག་ཉེས་བཟོས་ པ་ཡིན་པར་འདོད།  དེའི་ཕྱིར་བཅིངས་གྲོལ་དམག་བོད་སྐྱོད་ཀྱི་ལམ་བར་ནས་བོད་མི་ཕལ་བ་མང་པོར་བཟོད་ བརླགས་མེད་པའི་དཀའ་ངལ་ཐོན་ཡོད་པ་ནི་ཏང་ཀྲུང་དབྱང་གིས་ཕལ་ཆེར་ཤེས་ཡོད་ཚོད་ མི་འདུག  གལ་ཏེ་ལམ་བར་གྱི་དམག་མི་རེ་འགས་བྱ་སྤྱོད་དེ་གཙོ་འཛིན་མོའུ་ཀྲུའུ་ཞིས་གསན་ ཡོད་རྒྱུ་ན།དེ་ལྟར་འོང་བ་ནི་གནས་མ་མཆིས་སོ། རྒྱུ་མཚན་ནི་ཁོང་གིས་རླུང་ འཕྲིན་ལས། སྐབས་དེར་དབུས་སྐྱོད་ཀྱི་དམག་མི་ཚོར་ང་ཚོས་ངེས་པར་དུ་འབད་བརྩོན་ གང་ཐུབ་ཀྱིས་གྲོས་མཐུན་དོན་ཚན་བཅུ་བདུན་ལ་སྲུང་སྐྱོབ་བྱེད་དགོས་གསུངས་པར་མ་ ཟད།  ཡང་ཁོང་གིས་བོད་ཀྱི་གནད་དོན་གང་འདྲ་ཞིག་ལ་བསམ་བློ་བཏང་རུང་དང་ཐོག་མི་རིགས་ དང་ཆོས་ལུགས་ཀྱི་དོན་དག་ཡིད་ལ་འཁོར་བ་བྱས་ཏེ་ལས་དོན་ཐམས་ཅད་བརྟན་བརླིང་གཟབ་ སྐྱོད་བྱེད་དགོས་པར་མཛུབ་སྟོན་གནངས་པ་དག་ལས་ཤེས་འདུག   དེར་མཐུད་ཀྲང་གོ་ཧྭ་སོགས་ཀྱིས་ལྷ་སར་འབྱོར་དུས་རྒྱལ་བ་རིན་པོ་ཆེ་ལ་མཎཌལ་ རྟེན་གསུམ་ཕུལ་དགོས་པ་དང་བློ་མཐུན་ཕུན་དབང་གིས་དངོས་སུ་ཕྱག་འཚལ་ནས་ཏང་གི་ སྣང་བརྙན་དམངས་ཀྱི་མིག་སྔར་ཅེ་ཡགས་སུ་བཏང་བའི་བྱེད་ཕྱོགས་དག་ལས།  ང་ཚོས་ཤེས་ཐུབ་པ་ནི་ཕྱོགས་གཅིག་ནས་ཡུལ་སྲོལ་གོམས་གཤིས་ལ་བརྩི་འཇོག་ དང་། ཕྱོགས་གཉིས་ནས་རྒྱལ་ཁབ་ཀྱི་བུ་རབས་ཚ་རྒྱུད་དག་གི་མ་འོངས་པའི་མཐུན་ སྒྲིལ་དང་བརྟན་བརླིང་ལ་དམིགས་པ་ཞིག་ཡིན་པའི་ཐོག་ནས་ར་འཕྲོད་གྱིན་ཡོད།  སྐབས་དེའི་ཀྲུང་གོ་གུང་ཁྲན་ཏང་གི་བྱེད་སྒོ་དག་ནི་ང་ཚོའི་ཡིད་ངོར་འབབ་པ་ཞིག་ ཡིན་པ་དང་། བོད་ཞིང་བྲན་ལས་བཅིངས་གྲོལ་བྱ་རྒྱུར་དམིགས་པ་ཞིག་ཡིན་པ་གསལ་ རུང་། བར་ལམ་གྱིས་བྱས་ཉེས་དག་གིས་དམངས་ལ་འཚེ་བ་དང་ཏང་ལ་གནོན་པ་སོགས་མང་དུ་ བྱས་རྐྱེན།  ནུབ་ཕྱོགས་པ་དག་གི་ཁ་རུ་ལྕེ་བཞག་པ་དང་བོད་ཀྱི་སྐུ་དྲག་རེ་འགས་ཁ་གཡོར་ས་ རྙེད་དུ་བཅུག་པ་ཡིན་འདུག དེར་བསྟུན་ནས་ང་ཚོའི་མི་མང་པོ་ཞིག་གིས་རིག་གནས་གསར་རྗེས་ཟེར་ན་སྙིང་འགས་པར་ གྱུར་བ་དང་།  ༡༩༥༠   ༡༩༦༠ ༡༩༧༠ བར་དྲན་དུས་མགོ་ན་བ་ཞིག་བྱུང་བས། མཐུན་སྒྲིལ་དང་བརྟན་ བརླིང་ལ་གནོད་པ་ཆེར་ཐེབས་ཏེ། ཁ་སང་དེ་རིང་ཡང་ལོ་ངོ་ལྔ་བཅུ་འཁོར་བའི་རྟེན་ འབྲེལ་ཞུ་མཁན་དག་ལ་སྐུ་སྲུང་བ་མང་དུ་འདུག་དགོས་བྱུང་ཡོད།  འདི་ནི་དེང་གི་ཀྲུང་གོ་གསར་བས་བོད་ལ་དཔལ་འབྱོར་གྱིས་བདག་རྐྱེན་མ་ཐོབ་པ་ཞིག་ ལས་བྱུང་བ་མ་ཡིན་པར་འདོད།  དེར་མ་ཟད་བོད་མི་དག་གི་སེམས་ངོ་ན་ཡང་བཀས་བཀོད་རྒྱུན་འཛིན་ཞིང་བྲན་ལམ་ལུགས་ ཀྱི་དུས་ལ་བལྟས་ཏེ་སྐྱིད་པར་མ་འདོད་པ་མ་རེད།  འོན་ཀྱང་བར་ལམ་གྱི་དཔོན་ངན་ཏང་དང་རྒྱལ་ཁབ་མི་སེམས་པ་དང་དམངས་དང་མ་འོངས་པ་ མི་སེམས་མཁན་ཚོས་བོད་མིའི་དུངས་ཞེན་ལ་གནོད་པ་དྲག་པོ་ཕོགས་པའི་རྐྱེན་དུ་ཤར་ ཡོད།  དཔེར་ན། ང་བརྒྱད་ང་དགུའི་ལོ་ནས་ལོ་མང་པོའི་རིང་ལ། སློབ་མས་བླ་མར་འཐབ་རྩོད་ བྱེད་དུ་བཅུག་པ་དང་། བུ་ཕྲུག་གིས་ཕ་མར་འཐབ་རྩོད་བྱེད་དུ་བཅུག་པ། རང་གི་རིག་ དངོས་རྩ་ཆེན་དང་ལྷག་པར་བོད་མིས་སྲོག་ལས་ཀྱང་འདོར་དུ་མེད་པའི་མཆོག་གསུམ་གྱི་ རྟེན་དང་དགོན་སྡེ་དག་གཏོར་བཤིགས་སུ་བཏང་བའི་ཤུགས་རྐྱེན་ངན་པ་མང་དྲག་པས་ཡིན་ འདུག  གནད་འདི་དག་ཏང་ཀྲུང་དབྱང་གིས་རྟོགས་འཕྲལ་ཆོས་དད་རང་མོས་དང་མི་རིགས་རང་ སྐྱོང་སོགས་ཀྱི་སྲིད་ཇུས་རབ་དང་རིམ་པ་གཏན་ལ་ཕབ་ནས་ད་ལྟ་མངོན་གསལ་ཡར་རྒྱས་ དང་དམངས་ཀྱི་བསམ་བློ་གཅིག་གྱུར་ལ་འགྲོ་བའི་སྒང་ཡིན་མོད།  བོད་རིགས་ཀྱི་ས་ཆ་ལ་ལ་ན་ད་དུང་མི་རིགས་དང་རིག་གཞུང་ཆོས་ལུགས་དད་མོས་སོགས་ ཀྱི་སྲིད་ཇུས་ལ་ལྷོད་ཡངས་དེ་འདྲ་ཆགས་མེད་པས།  ང་ཚོའི་གོང་རིམ་གྱིས་དེ་ལ་ཕུགས་རྒྱང་རིང་བས་ཞིབ་དཔྱོད་བྱས་ན་རེད།    ལྷག་པར་དུ་རྒྱ་རིགས་བོད་རིགས་དང་འབྲལ་ཐབས་མེད་ཅིང་བོད་རིགས་ རྒྱ་རིགས་དང་འབྲལ་ཐུབ་མེད་པ་ཞིག་དཔལ་འབྱོར་དང་རིག་གནས་ལོ་རྒྱུས་ཁྲིམས་ལུགས་ སོགས་གང་ཐད་ནས་ཡིན་ཞིང་། ནམ་རྒྱུན་གཅིག་གིས་གཅིག་ལ་མེས་རྒྱལ་ཁྱིམ་གཞིས་ཆེན་པོའི་འདིའི་ནང་སྲུང་བརྩི་ ཞུ་དགོས་པ་ནི། ཏང་ཀྲུང་དབྱང་གི་དགོངས་པ་རྨ་མེད་པ་ཡིན་རུང་།བར་གྱི་ཁེ་སྙན་དང་གོ་ཐོབ་ཁོ་ནར་ དགའ་བའི་མགོ་ཁྲིད་རེ་འགས་བྱ་ཐབས་གང་མང་ཞིག་ཡོག་ལི་བྱས་ནས་བསྒྲུབས་ཡོད་ རྐྱེན་བོད་འབངས་གང་མང་གི་སེམས་ལ་སྡུག་བཞག་ཡོད་པ་རེད། སྤྱིར་བོད་མི་དམངས་ལ་མཚོན་ན་པན་ཆེན་རིན་པོ་ཆེས་གསུངས་པ་བཞིན།ང་ཚོ་བོད་མི་ རིགས་མི་དམངས་ནི་ལས་ལ་བརྩོན་ཞིང་བབས་ཆགས་པ་དང་། བློ་གྲོས་ལྡན་ལ་དཔའ་ངར་ཆེ་བ།མེས་རྒྱལ་དང་གུང་ཁྲན་ཏང་ལ་དགའ་ཞེན་བྱེད་མཁན་ ཞིག་ཡིན་གསུངས་པ་ལྟར་དུ་གནས་པར་མ་ཟད། ལྷག་པར་དུ་ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་ པ་དང་།བློ་མཐུན་ཏེང་ཞའོ་ཕིང་གི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ ལུགས་གཞུང་ལུགས་ཀྱི་མཛུབ་ཁྲིད་དང་། སྒྱུར་བཅོས་སྒོ་འབྱེད་ལག་བསྟར་བྱས་ཚུན་བོད་ལ་གནམ་ས་བློ་འོག་བསྒྱུར་འདྲའི་ གྲུབ་འབྲས་ཐོབ་པར་བསྟུན། སྔར་ལས་མཐུན་སྒྲིལ་དང་དང་བདེ་སྐྱིད་ཀྱི་ངང་དུ་འཚོ་ མོད།ས་གནས་རྒྱ་རིགས་ལས་བྱེད་པ་དང་མིག་རྒྱང་ཐུང་བའི་བོད་ཀྱི་མགོ་ཁྲིད་པ་རེ་ འགས།ཏང་གི་དགོངས་དོན་ལྟར་གྱི་བོད་ནང་གི་མཐུན་སྒྲིལ་ལ་ཤུགས་སྣོན་དང་། མཐུན་ པ་ཆེ་གྲས་མཉམ་སྡེབ། མི་མཐུན་པ་ཆུང་གྲས་སོར་བཞག་གིས་བྱ་བ་སྒྲུབ་དགོས་པའི་ དགོངས་དོན་རྒྱབ་ཀྱིས་བསྐྱུར་ནས། རང་ཤེད་དང་བཀའ་འབེབ། ཕྱོགས་རེ་བ།སྤྱིར་བཏང་བ།བཙན་ཤེད།གཞན་འགན་འཕྲོག་སྒྲུབ་ བཅས་བྱས་པར་བསྟུན། རྒྱལ་ཁབ་ཀྱི་བརྟན་བརླིང་དང་མཐུན་སྒྲིལ་ལ་གནོད་པ་མང་དུ་བྱས་ཡོད་པ་རེད། དཔེར་ ན་བོད་ཀྱི་ལོ་རྒྱུས་དང་།  བོད་ཁུལ་གྱི་འཕེལ་རྒྱས་སོགས་འཁྱོག་སྒྱུར་བྱེད་པ། བོད་ས་རང་ན་བོད་ཀྱི་སློབ་ གྲྭ་མང་ཡང་། བོད་ཡིག་སྦྱངས་པའི་སློབ་མ་དག་གི་མདུན་ལམ་སྲིད་གཞུང་ན་ཆུང་དུ་ འགྲོ་བ།  བོད་ཀྱི་གཞི་རིམ་མང་ཚོགས་ཀྱི་མདུན་སར་གཏམ་བཤད་རིང་ཐུང་ཅི་བྱེད་ཀྱང་རྒྱ་སྐད་ རྐྱང་བ་ལས་བོད་སྐད་ཀྱི་གཏམ་བཤད་སྤེལ་གྱིན་མེད་པ། བོད་ཀྱི་དགོན་སྡེ་ཁག་ལ་དམངས་ཀྱི་ལྟ་སྟངས་དང་མི་མཚུངས་པའི་བྱེད་སྒོ་སྤེལ་ཏེ་ ཆོས་ལུགས་ལས་རིགས་ལ་ཕྱི་ཡི་རྣམ་པ་ཙམ་ལས་ ལྟ་སྟངས་ལེགས་པོ་མིན་པ། སོགས་ཀྱིས་རྐྱེན་པའི་ང་ཚོའི་གཞི་རིམ་ཚོགས་ཀྱི་མིག་ སྔར་སྣང་བརྙན་ལེགས་པོ་ཞིག་བཞག་མེད་པ་འདིས་ཏང་གི་མཚན་སྙན་ལ་གནོད་པར་མ་ཟད།  སྔོན་གྱི་ལོག་སྤྱོད་པ་དག་གིས།  ཆེད་མངགས་རྫུན་བཟོའི་དཀྲོག་གཏམ་བཟོས་པ་སྟེ། བཅིངས་གྲོལ་དམག་བོད་ལ་ཡོང་ན་མི་ཕོ་མོ་རྒན་གཞོན་ཚང་མ་བསོད་རྒྱུ་རེད་ཟེར་བ།  རྒྱུ་དངོས་ཡོད་པའི་ས་ནས་རྒྱུ་དངོས་འཕྲོག་བཅོམ་དང་།  མི་དྲག་རྣམས་སྡོད་བཟོད་མི་བདེ་བ་བཟོ་གི་རེད་ཟེར་བ།  མི་རིགས་གོམས་གཤིས་དང་ཆོས་ལུགས་རྩ་མེད་བཟོ་གི་རེད།  དགོན་པ་གྲྭ་ཚང་མེད་པར་བཟོ་གི་རེད་ཟེར་བ་སོགས་མང་དུ་བསྒྲགས་པ་དག་ལ་གོ་སྐབས་ སྤྲད་པ་ལྟ་བུ་བཟོ་ཡི་འདུག་པ་སོགས་ལ་ཐུགས་མཉམ་འཇོག་དགོས་གི་རེད།དེ་ལས་གཞན་ གྱི་དཀའ་ངལ་མང་དག་ཅིག་ད་དུང་སེལ་གིན་མི་འདུག  འདི་ནི་ཏང་ཀྲུང་དབྱང་གི་སྲིད་ཇུས་མ་འགྲིག་པ་ཅིག་རེད་ཅེས་ཤོད་གྱིན་མིན། བར་ གྱི་ཁེ་བཟང་དང་བྱས་རྗེས་ལ་རྔམ་པའི་དཔོན་པོ་ངན་རུལ་བ་དག་གིས་བྱས་ཉེས་སུ་ འཁུམས་པས། ནམ་རྒྱུན་སྲིད་ཇུས་བཟང་པོ་རི་གྲོང་དུ་བསླེབ་རྒྱུའི་རེ་བ་ཡོད།     ང་ཚོའི་མི་མང་གི་རེ་འདུན་ནི་སྐབས་ཀྱི་གནངས་སྦྱིན་ཙམ་དང་འཛུག་སྐྲུན་ཐོར་བུ་ ཡིས་བསྐང་ཐུབ་གིན་མེད་པ་རེད །། མུ་འགོད།