བོད་གཞུང་བདེ་སྲུང་ལས་བྱེད་གསུམ་བཙོན་དུ་བཀག་ཉར།

ཕྱི་ཚེས་ ༡ ཉིན་གྱི་མཚན་མོའི་ཆུ་ཚོད་དགུ་བ་ཙམ་ལ་ངྷ་ས་གངས་སྐྱིད་དུ་རྒྱ་གར་ཡུལ་མི་འགའ་དང་གངས་སྐྱིད་ཀྱི་མཚན་སྲུང་བའི་བར་དུ་ཁ་རྩོད་བྱུང་བ་དང་། སྐབས་དེར་བོད་གཞུང་བདེ་སྲུང་ལས་བྱེད་གསུམ་གྱིས་བར་འདུམ་བྱས་སྐབས་ཡུལ་མི་དང་བདེ་སྲུང་མི་སྣའི་བར་དུ་ལག་འཛིང་ཤོར་ཏེ་རྒྱ་གར་ཡུལ་མི་གསུམ་དང་། བདེ་སྲུང་མི་སྣ་གཅིག་བཅས་ལ་རྨས་སྐྱོན་བྱུང་ཡོད་འདུག་ལ། ཕྱི་ཉིན་དེར་བདེ་སྲུང་གི་མི་སྣ་དེ་གསུམ་ཀང་རཱ་རྫོང་གི་བཙོན་ཁང་དུ་བཀག་ཉར་བྱས་ཡོད་འདུག

ཕྱི་ཚེས་ ༥ ཉིན་འདི་གའི་གསར་འགོད་པས་བོད་གཞུང་བདེ་སྲུང་ལས་ཁུངས་ཀྱི་དྲུང་ཡིག་ཆེན་མོ་ཡེ་ཤེས་ཆོས་གྲགས་ལགས་སུ་བཀའ་འདྲི་ཞུས་པར་ཁོང་གིས་གསུངས་དོན། ནམ་རྒྱུན་གངས་སྐྱིད་ཀྱི་ཐང་ཆེན་དུ་རྒྱ་གར་ཡུལ་མིའི་གླ་འཁོར་འཇོག་གིན་ཡོད་པ་དང་། དེའི་སྔོན་ནས་གླ་འཁོར་གྱི་སྣུམ་རྐུ་ལ་ཤོར་བ་དང་ཤེལ་སྒོ་བཅགས་པ་སོགས་ཀྱི་རྩོད་ཉོག་ཅིག་ཡོང་བསྡད་ཡོད་ས་རེད། དེའི་དགོང་མོ་དེར་ཡང་གླ་འཁོར་ཁ་ལོ་བ་འགས་ཁོང་ཚོའི་གླ་འཁོར་གྱི་ཤེལ་སྒོའི་ཆར་ཕྱིས་ཞིག་དང་རྒྱབ་མཐོང་ཤེལ་སྒོ་གཉིས་བཅགས་འདུག་ཟེར་ནས་མཚན་སྲུང་བ་དང་མཉམ་དུ་ཉོག་དྲ་བཤད་འདུག དེའི་སྐབས་སུ་ང་ཚོའི་ལས་བྱེད་གཉིས་མེག་གྷན་ནས་མར་ཡོང་བ་དང་ཁ་ཐུག་བརྒྱབས་ཏེ། རྒྱུ་མཚན་དྲིས་སྐབས་རྒྱ་གར་ཡུལ་མི་ཚོས་ཁོང་ཚོར་ཇུས་གཏོགས་མེད་སྐོར་བརྗོད་པ་སོགས། ཕན་ཚུན་ལ་བཤད་རེས་དང་ཕུད་རྒྱག་བཏང་སྟེ་མཐར་འཁྲུག་འཛིང་ཤོར་འདུག་ཅེས་འཁྲུག་འཛིང་ཤོར་སྟངས་སྐོར་ངོ་སྤྲོད་གནང་།

ཡང་ཁོང་གིས་མུ་མཐུད་དེ། འཁྲུག་འཛིང་ཤོར་ཏེ་ཕན་ཚུན་གཉིས་ཀར་རྨས་སྐྱོན་བྱུང་རྗེས་ང་ཚོའི་ལས་བྱེད་དེ་ནང་དུ་སོང་ནས་སྨན་བཅོས་བྱས་བསྡད་འདུག ཉེན་རྟོག་པར་ཁ་པར་བཏང་སྟེ་ཁྲིམས་གཏུག་བྱེད་སྐབས་འགྲོ་ལ་མི་འགྲོ་ལ་བྱས་ཏེ་ནང་དུ་བསྡད་པའི་སྐབས་དེར་ཉེན་རྟོག་པ་སླེབས་པ་དང་། བདེ་སྲུང་ལས་བྱེད་ཚོ་དེ་གར་མེད་སྟབས་ཉེན་རྟོག་པས་རྒྱ་གར་ཡུལ་མི་ཚོ་སྨན་ཁང་དུ་ཁྲིད་ནས་སྨན་བཅོས་བྱས་འདུག དེ་ནས་ཉེན་རྟོག་པས་ང་ལ་ཁ་པར་འབྱོར་ཏེ་མར་ཤོག་ཟེར་གྱིན་འདུག་པས་ང་མར་ཕྱིན་པ་ཡིན། སྨན་ཁང་དུ་འབྱོར་དུས་རྨས་སྐྱོན་བྱུང་བའི་ཡུལ་མི་རྣམས་ལ་སྨན་བཅོས་བྱེད་ཀྱིན་འདུག་ལ། ཉེན་རྟོག་པས་ང་ཚོའི་མི་གང་དུ་ཡོད་ཟེར་གྱིན་འདུག ང་ཚོའི་མིར་རྨས་སྐྱོན་ཕོག་སྟེ་ནང་དུ་ཡོད་པ་རེད་ཅེས་བརྗོད་པ་ཡིན།

ནམ་དཀྱིལ་དེར་ང་ཚོ་ཡར་ཡོང་སྟེ་ཁོང་ཚོ་ཕར་ཉེན་རྟོག་ལས་ཁུངས་སུ་ཁྲིད་ནས་དྲི་བ་དྲིས་ལན་བྱས་རྗེས་སྨན་བཅོས་བྱེད་དུ་མར་ཁྲིད་རྒྱུ་ཡིན་བརྗོད་སོང་། སྨན་བཅོས་བྱེད་དུ་ཁྲིད་སྐབས་ང་ཚོའི་ལས་བྱེད་རོགས་པ་ཞིག་མཉམ་དུ་བཏང་ཡོད། མཚན་གྱི་ཆུ་ཚོད་དང་པོ་ཙམ་ལ་ཁོང་ཚོ་མར་ཕྱིན་པ་རེད། དེ་ནས་ཁོང་ཚོ་ཉིན་གཉིས་རིང་བཙོན་ཁང་དུ་བཀག་ཉར་བྱེད་ཀྱི་ཡིན་ཞེས་བརྗོད་དེ་བཀག་སྐྱིལ་བྱས་པ་དང་། ཁ་སང་ཚེས་ ༥ ཉིན་རྒྱབ་ཁྲིམས་ར་འཚོགས་རྒྱུ་བྱས་ཡོད་ཅེས་བརྗོད།

ཡིན་ནའང་། ཁ་སང་ཁྲིམས་ར་འཚོགས་རྒྱུ་བྱུང་མེད་པར་བརྟེན་འདི་གའི་གསར་འགོད་པས་ཕྱི་ཚེས་ ༦ ཉིན་ཁོང་ལ་དེའི་སྐོར་བསྐྱར་དུ་བཀའ་འདྲི་ཞུས་པར། ཁོང་གིས་ཁ་སང་ཁྲིམས་རྩོད་པ་ཁོ་རང་ཚོའི་ངོ་རྒོལ་གྱི་ཉིན་མོ་ཞིག་ལ་འཁེལ་འདུག་སྟབས། ཕྱི་ཚེས་ ༡༦ བར་དུ་འཕར་འགྱང་བྱས་པ་རེད་ཅེས་གསུངས།

ཁོང་གིས་ད་དུང་ཐེངས་འདིའི་ཡུལ་མི་དང་བདེ་སྲུང་མི་སྣའི་བར་འཁྲུག་རྩོད་ཤོར་བའི་ཐད་དུ། ང་ཚོའི་ལས་ཁུངས་ཀྱི་ངོས་ནས་ཁྲིམས་ཐོག་ནས་ག་རེ་བྱས་པ་ཡིན་ནའང་། དེ་ལས་ལྷག་པ་ཞིག་བྱེད་ཐུབ་ཀྱི་མི་འདུག ཁྲིམས་ཐོག་ནས་ཁྲིམས་རྩོད་པ་གླ་རྒྱུ་སོགས་ག་རེ་བྱ་རྒྱུ་ཡོད་ན་དེ་བྱས་བསྡད་ཡོད། ཅེས་བདེ་སྲུང་མི་སྣ་གསུམ་འཇུ་བཟུང་བྱས་པར་གཞུང་འབྲེལ་ངོས་ནས་གང་ཡང་གནང་གི་མེད་པར་གཙོ་བོ་ཁྲིམས་རྩོད་པར་བརྟེན་རྒྱུ་ཡིན་སྐོར་གསུངས་ཡོད།

ད་ལྟ་འཛིན་བཟུང་བཀག་ཉར་བྱས་པའི་བདེ་སྲུང་ལས་བྱེད་རྣམས་ནི་ཚེ་རིང་རྒྱལ་མཚན་དང་ཚེ་རིང་དར་རྒྱས། ཚེ་དབང་སོགས་ཡིན་འདུག་ལ། ཁོང་ཚོ་ཉེས་དོན་གཏུག་བཤེར་གྱི་བཅའ་ཁྲིམས་དོན་ཚན་ ༣༠༧ དང་ ༣༢༤། ༣༢༣ ། ༣༤ བཅས་སུ་ཐོ་འགོད་བྱས་ཡོད་འདུག ཁོང་ཚོ་མུ་མཐུད་ནས་བཙོན་ཁང་དུ་བཀག་ཡོད་འདུག་ལ། རྒྱ་གར་དེ་ངྷ་ཤོད་རྒྱ་གར་གཞུང་གི་སྨན་ཁང་དུ་ཡོད་འདུག

དེ་བཞིན་ཕྱི་ཚེས་ ༦ ཉིན་འདི་གའི་གསར་འགོད་པས་གངས་སྐྱིད་ཀྱི་མཚན་སྲུང་བ་པདྨ་ཚུལ་ཁྲིམས་ལགས་སུ་གནད་དོན་འདིའི་སྐོར་བཀའ་འདྲི་ཞུས་པར་ཁོང་གིས་གསུངས་དོན། རྒྱ་གར་གྱི་གླ་འཁོར་ཞིག་གི་ཆར་ཕྱིས་དང་རྒྱབ་མཐོང་ཤེལ་སྒོ་གཉིས་བཅགས་འདུག སྤྱིར་བཏང་རྒྱ་གར་དེ་ནམ་རྒྱུན་ནས་མཚན་མོར་ར་བཟི་ནས་ཡོང་གི་རེད་ལ། ང་ཚོ་མཚན་སྲུང་བ་ཚོར་ཐེངས་མང་བོར་བརྙས་བཅོས་བྱས་པ་རེད། དེར་བརྟེན་གླ་འཁོར་གྱི་ཆར་ཕྱིས་དང་རྒྱབ་མཐོང་ཤེལ་སྒོ་བཅགས་དུས་ཁོས་མཚན་སྲུང་བར་ཡ་ལན་སྤྲད་པ་རེད། ངའི་གླ་འཁོར་བཅགས་འདུག ཁྱེད་ཚོས་ག་རེ་བྱས་ནས་བལྟས་མེད་ཟེར་ནས་ཉོག་དྲ་བཟོས་པར་བརྟེན་ང་ཚོས་མཚན་སྲུང་མགོ་པ་ཚེ་རིང་དོན་གྲུབ་ལགས་སྐད་བཏང་སྟེ། ཁོང་ཕེབས་ནས་མཚན་སྲུང་བ་ཚོ་ནི་གངས་སྐྱིད་ཀྱི་ལས་ཁུངས་ཁག་སྲུང་མཁན་ཡིན་པ་ལས་ཁྱོད་ཚོའི་གླ་འཁོར་སྲུང་མཁན་མ་རེད་ཅེས་སོགས་བརྗོད། སྐབས་དེར་མི་མང་བོ་སླེབས་སོང་། བར་སྐབས་དེར་བདེ་སྲུང་གི་མི་གཉིས་ཀྱིས་འཕྲུལ་རྟ་ཞོན་ནས་སླེབས་པ་དང་ཁ་ཐུག་བརྒྱབས་སོང་ལ། ཁོང་གཉིས་ཀྱིས་ཡུལ་མི་ཚོར་སྐད་ཆ་བཤད་པ་དང་འགྲེལ་བཤད་བྱས་ནའང་། རྒྱ་གར་བས་ཁྱོད་ལ་ག་རེ་ཇུས་གཏོགས་འདུག ང་ཚོས་ང་ཚོའི་སྐད་ཆ་བཤད་ཀྱིན་ཡོད་ཅེས་སོགས་བརྗོད་དེ་བདེ་སྲུང་མི་དེའི་བྲང་ཁོག་ནས་འཇུས་བར་བརྟེན། ཁོང་གཉིས་བར་འཁྲུག་འཛིང་ཤོར་སོང་། 

ང་བདེ་ལེགས་སྨན་ཁང་ནས་ཕྱིར་ཐོན་དུས་རྒྱ་གར་གྱི་ཡུལ་མི་ཚང་མས་ཚལ་གྲི་སོགས་བཟུང་ནས་སྒུག་འདུག ང་ལ་ཁྱོད་རང་གསོད་ཀྱི་ཡིན་ཟེར་ནས་ངའི་ཐོག་ཏུ་བརྒྱུགས་སླེབས་པས་ང་བྲོས་ཕྱིན་པ་ཡིན་ཞེས་བརྗོད།

ཡིན་ནའང་། ཁོས་དང་ཐོག་བདེ་སྲུང་གི་མི་གཉིས་མ་གཏོགས་མེད་མོད། དེའི་དཀྱིལ་དུ་བདེ་སྲུང་ལས་བྱེད་གཞན་ཞིག་སླེབས་འདུག་པ་ཇི་ལྟར་སླེབས་མིན་དང་གང་ནས་ཡོང་མིན་སོགས་ཤེས་རྟོགས་གང་ཡང་མ་བྱུང་ཟེར།

མཇུག་མཐར་ཁོས། ཕྱི་ཉིན་ང་ཚོ་མཚན་སྲུང་བ་ཚང་མ་བདེ་སྲུང་དྲུང་ཡིག་ཆེན་མོ་དངོས་གྲུབ་རྡོ་རྗེ་ལགས་ཀྱི་དྲུང་དུ་བཅར་ནས། ང་ཚོ་ཉེན་རྟོག་པའི་སར་ཁྲིད་དང་ང་ཚོས་རྩོད་ཉོག་འདིའི་སྐོར་དཔང་པོ་བྱ་རྒྱུ་ཡིན། ང་ཚོ་ལ་དུས་རྒྱུན་བརྙས་བཅོས་བྱས་པ་སོགས་བཤད་རྒྱུ་ཡིན་ཞེས་བརྗོད་ཀྱང་། ཕར་ཁྲིད་མ་སོང་ལ་ད་ལྟའི་བར་ཉེན་རྟོག་པ་ཚུར་སྐད་ཆ་འདྲི་རུའང་ཡོང་མ་སོང་ཟེར།