སྐྱབས་མཆོག་མཚུར་ཕུ་གོ་ཤྲི་རྒྱལ་ཚབ་རིན་པོ་ཆེས་སྐྱེ་རྒུ་མདོའི་ས་ཡོམ་གོད་ཆག་བྱུང་མཁན་ཚོར་ཐུགས་གསོ་དང་སྨོན་ལམ་གནང་ཡོད་འདུག
བདེ་ཆེན་ལྷུན་གྲུབ་ལགས་ཀྱིས་སྒང་ཏོག་ནས་འདིར་བཏང་དོན་ལྟར་ན། སྐྱེ་དགུ་མདོར་ས་ཡོམ་གྱི་གོད་ཆག་ཕོག་པའི་ཡིད་སྐྱོའི་གནས་ཚུལ་ཐོས་མ་ཐག་༧རྒྱལ་ཚབ་རིན་པོ་ཆེ་མཆོག་ནས་ཐུགས་ཕམ་ཚད་མེད་དང་འབྲེལ། འཕྲལ་མར་རྒྱང་འཕོ་དང་བསྔོ་སྨོན་གསུང་སྟེ། གདན་ས་དཔལ་ཆེན་ཆོས་གླིང་གི་བླ་སྤྲུལ་དགེ་འདུན་མང་ཚོགས། དེ་གའི་སྒྲུབ་སྡེ་ཆོས་སྐུའི་འབྱུང་གནས། བཙུན་དགོན་བཅས་སུ། ཉིན་ལྟར་འདས་སོང་རྣམས་ཀྱི་ཆེད་དུ་བསྔོ་སྨོན་དང་། རྨས་མ་དང་ཤུལ་ལུས་རྣམས་ཀྱི་ཆེད་དུ། རྐྱེན་སེལ་རིམ་གྲོར། བར་བསམ་སྒྲོལ་གསུམ། སྨན་གཟུངས་སོགས་གང་མང་བསགས་དགོས་པའི་བཀའ་ཕེབས་ཡོད་འདུག ཐེངས་འདིའི་ས་ཡོམ་གྱི་གོད་ཆག་བྱུང་མཁན་རྣམས་ལ་དམིགས་ཏེ། བོད་ཟླ་ ༣ ཚེས་ ༡ ཉིན་༧རྒྱལ་ཚབ་རིན་པོ་ཆེ་མཆོག་དབུ་བཞུགས་ཐོག་གདན་ས་དཔལ་ཆེན་ཆོས་གླིང་བླ་གྲྭ་ཡོངས་ནས་སྤྱན་རས་གཟིགས་འཁོར་བ་དོང་སྤྲུགས་གི་སྒོ་ནས་ཉིན་གཅིག་རིང་བྱང་ཆོག་དང་བསྔོ་བ་གནང་རྒྱུ། བོད་ཟླ་ ༣ ཚེས་ ༤ རེས་གཟའ་ཉི་མའི་ཉིན་བཀའ་བརྒྱུད་བསྟན་པའི་མངའ་བདག་༧དཔལ་རྒྱལ་དབང་ཀརྨ་པ་མཆོག་གིས་བཀའ་ཕེབས་པ་ལྟར་༧རྒྱལ་ཚབ་རིན་པོ་ཆེ་དབུ་བཞུགས་ཐོག་གདན་ས་དཔལ་ཆེན་ཆོས་གླིང་བླ་སྤྲུལ་དགེ་འདུན་མང་ཚོགས་ནས་གནམ་ཆོས་འོད་ཆོག་གི་སྒོ་ནས་བྱང་ཆོག་གསུང་རྒྱུ་ཡིན་འདུག
མི་ཤི་གྲངས་༢༠༠༠༠ལས་བརྒལ་སོང་ཟེར།
ད་ལམ་སྐྱེ་རྒུ་མདོའི་ས་འགུལ་གོད་ཆག་དེའི་གནས་སྟངས་བརྙན་འཕྲིན་སོགས་ཀྱི་བརྒྱུད་ལམ་ནས་མཐོང་དུས་སྐྱོ་སྣང་ཧ་ཅང་བྱུང་། འོན་ཀྱང་རང་ཉིད་རྒྱང་གྲགས་ལེའུ་མང་པོའི་མཚམས་སུ་གནས་པའི་ཐོག་གནས་སྟངས་གཞན་གྱི་རྐྱེན་པས་བྱ་ཐབས་བྲལ། གོད་ཆག་བྱུང་ས་དེར་༸གོང་ས་མཆོག་ཞབས་སོར་འཁོད་ཐུབ་ན་ཚེ་འདས་རྣམས་ལ་ཕན་པ་སྨོས་མེད་ཐོག་མང་ཚོགས་སྐྱོ་གདུང་སངས་ངེས་ཡིན།
ལས་སྨོན་བྱམས་བརྩེའི་སྲོག་གིས་འབྲེལ་བའི་བོད་རིགས་ཚོ།
མི་ཚེ་གཅིག་ལ་སྐྱིད་སྡུག་སྣ་ཚོགས་ཡོང་སྲིད་པས།
སྐྱིད་དུས་ང་རྒྱལ་མ་བྱེད་བོད་ཀྱི་སྤྱི་དོན་སྒྲུབས།
སྡུག་དུས་སེམས་ཕམ་མ་བྱེད་གཅིག་ཕན་གཅིག་རོགས་བྱོས།
རྐྱེན་ཆག་སྒོ་བྱུང་བའི་ཛ་དྲག་དུས། སེམས་སྐྱོ་བ་ཙམ་ཀྱིས་མི་ཕན་པས།
བློ་རིག་པའི་ཐབས་ཇུས་གྲོས་བྱས་ནས། ལས་དེ་འདྲ་མི་བྱེད་འདི་འདྲ་བྱེད།
ཚེ་འདས་རྣམས་ལ་ཕན་པའི་ཕྱིར། སྐྱ་སེར་ཕོ་མོ་ཐམས་ཅད་ཀྱིས།
བདུན་ཕྲག་བདུན་ཀྱི་དུས་ཡུན་ལ། ཆོས་ལ་ཐོས་བསམ་སྒོམ་པར་མཛོད།
གསོན་པོ་རྣམས་ལ་ཕན་པའི་ཕྱིར། སོ་སོའི་རང་ནུས་གང་ཡོད་ཀྱིས།
དངུལ་གྱིས་ཞབས་འདེགས་འབུལ་བའམ། ལུས་ངག་ཡིད་ཀྱིས་འབད་པར་འཚལ།
ཤུལ་ལུས་དྭ་ཕྲུག་སྐྱབས་མེད་རྣམས། ཐབས་དང་ཇུས་ཀྱིས་མ་སྐྱབས་ན།
བོད་ཕྲུག་རྒྱ་ལ་བསྒྱུར་ངེས་པས། ས་ཡོམ་ངན་འབྲས་ཅི་བས་སྡུག
རྒྱ་མིའི་གཡོ་འཕྲུལ་བྱམས་ན་ཡང་། དེ་ལ་བློ་གཏད་བྱེད་མི་རུང་།
ཤིན་ཏུ་ཉམ་ཐག་གྱུར་ན་ཡང་། རང་དབང་རྩོད་ལེན་བརྗེད་མི་རུང་།
རེད་ཡ། ཞལ་འདེབས་ཕུལ་ས་ག་པར་ཡོད་དམ། བོད་གཞུང་དང་དེ་མིན་ཚོགས་པ་ཁག་གིས་ཞལ་འདེབས་བསྡུ་རུབ་ཀྱིས་ལས་འགུལ་གནང་ན་ཡག་པོ་ཡོད་ས་རེད།
སྐྱབས་རྗེ་རྒྱལ་ཚབ་རིན་པོ་ཆེ་འདི་ཉིད་ཆབ་སྲིད་སོགས་ལ་ཐེ་ཇུས་གང་ཡང་མི་གནང་མཁན་ཆོས་ཕྱོགས་ཀྱི་བླ་མ་ཡག་པོ་ཞིག་ཡོད་པར་ཐོས།
བླ་ཆེན་རྣམས་ཀྱི་འཆི་ཟིན་པ་རྣམས་ལ་འདི་ལྟར་ཐུགས་སྨོན་གནང་བ་དང་འབྲེལ་གསོན་པོ་རྣམས་ལ་བཟས་གོས་གནས་མལ་ཆེད་དཔལ་འབྱོར་ཞལ་འདེབས་རྒྱ་མི་ཆུང་གསོལ་རྩལ་གནང་རྒྱུའི་ཡིད་ཆེས་དང་རེ་བ་ཡོད། ད་ཆ་གལ་ཆེས་ཤོས་ནི་རྨས་མ་རྣམས་ལ་སྨན་བཅོས་དང་། འཚོ་བཞིན་པ་རྣམས་ལ་བཟས་གོས་སྡོད་ཁང་གི་མཐུན་རྐྱེན་དགོས་པས་གཞི་བྱེས་བོད་ཡོངས་ནས་རྒྱབ་བསྐྱོར་དང་དུང་སེམས་མཉམ་བསྐྱེད་བྱ་རྒྱུ་ཁ་ཚ་དགོས་གཏུགས་ཡིན་ནོ།
ང་ཚོ་བོད་མི་རིགས་ཚང་མས་འུ་ཐུག་ན་སྐྱབས་དང་རེ་ས་ལྷ་དང་བླ་མ་མ་གཏོགས་མེད་པས། ཤི་ཟིན་པ་རྣམས་ངན་སོང་གི་གཡང་ས་སྐྱོབས་ཐབས་དང་། རྨས་མ་རྣམས་སྲོག་ཉེན་ལས་གཅིག་ནས་ཀྱང་ཐར་བ་ཞིག་ཐུགས་རྗེ་རྒྱ་མི་ཆུང་བར་གནང་རོགས་ཞུ།
བོད་མིར་འདི་འདྲའི་ཤི་སྐྱོན་གུད་ཆགས་ཡོང་བར་ཧ་ཅང་གི་བློ་ཕམ་དགོས་པའི་གནས་ཤིག་རེད། བཙན་བྱོལ་དུ་བླ་ཆེན་རྣམས་གཙོས་པའི་དགེ་འདུན་པ་སོགས་ནས་ཐུགས་སྨོན་གང་དྲག་གནང་བར་དགའ་གུས་ཡོད། འོན་ཀྱང་གནས་ཚུལ་འདིའི་ཐད་ཆབ་སྲིད་མི་སྣ་དག་ལས་བོད་ཀྱི་བླ་ཆེན་རྣམས་ལ་འགན་ཆེ་བར་མཐོང་།
ཁྱད་མཚར། བཙན་བྱོལ་དུ་ས་གནས་སོ་སོར་བཀའ་ཤག་དང་སྤྱི་འཐུས་གཉིས་ཀྱིས་བཀའ་བཏང་དགོས་རྒྱུ་ལས། ཆོས་ལུགས་ཀྱི་བླ་མ་སོ་སོས་བཀའ་ཁྱབ་བཏང་འདུག
བོད་ཀྱི་བླ་ཆེན་རྣམས་ཀྱི་འདི་ལྟར་ཐུགས་སྨོན་དང་རིམ་འགྲོ་བྱས་ན་ཤིན་ཏུ་ཕན་ངེས།།