ཁྱེད་ཀྱིས་ང་དམ་འདོགས་མ་བྱེད་རོགས། བསྟན་འཛིན་ཕན་བདེ།

ལེགས་སྤེལ་ཉེས་འགོག་དང་། ནོར་འཁྲུལ་ཡོ་སངས་བྱ་རྒྱུ་དེ་ནི་མང་གཙོའི་འཚོ་བའི་དགོས་དོན་ངོ་མ་ཞིག་མ་ཡིན་ནམ། བསམ་ཚུལ་དྲ་ཐོག་ལ་འཇོག་ན་རྩབ་ཧྲལ་བཟོ་དོགས་ལ་འཇིགས་པ་དེ་ཡང་རང་ཉིད་ཀྱི་བསམ་ཚུལ་ཡང་དག་མིན་པའི་ཉེར་ལེན་ལ་བརྟེན་ནས་བྱུང་བ་ཞིག་མ་ཡིན་ནམ།

རྒན་ལྷ་མོ་དང་བསྟན་འཛིན་ཕན་བདེ་གཉིས་ཀྱིས་རྒྱལ་དབང་བཅུ་གསུམ་ཆེན་པོ་དང་འབྲེལ་བའི་ལོ་རྒྱུས་ཀྱི་གནད་དོན་འགའ་རྒྱབ་རྟེན་དུ་བཅོལ་ནས་རང་ཉིད་ཀྱི་ལྟ་ཚུལ་ཡང་དག་ཡིན་པའི་སྒྲུབ་བྱེད་གནང་འདུག འདིར་དེ་འབྲེལ་གྱི་རང་གི་བསམ་ཚུལ་འགའ་འདོན་པར་བརྩོན།

༡༽གནད་དོན་གང་ཞིག་གི་སྐབས་ལོ་རྒྱུས་བྱུང་རབས་དྲངས་ནས་སྒྲུབ་བྱེད་དང་གསལ་བཤད་གནང་སྐབས་ལོ་རྒྱུས་རང་ལ་ཞིབ་འཇུག་གནང་ནས་གསུང་བཤད་གནང་རྒྱུ་གལ་ཆེན་རེད་འདོད། ལོ་རྒྱུས་ལ་ཞིབ་ཚགས་ཀྱི་ཞིབ་འཇུག་དང་དེ་འབྲེལ་གྱི་ངོས་འཛིན་དང་ལྟ་ཚུལ་གང་ཡང་མེད་པར་ཡོངས་གྲགས་དང་། ཟེར་སྒྲོས། ངག་རྒྱུན་ལྟ་བུ་རྒྱབ་བརྟེན་དུ་བཅོལ་ནས་གསུང་མོལ་གླེང་ན་འོས་འཚམ་ཞིག་མ་རེད་འདོད། ལོ་རྒྱུས་ཀྱི་གནས་དོན་གང་ཞིག་རྒྱུ་མཚན་དང་རྒྱབ་རྟེན་དུ་བཅོལ་སྐབས་མ་མཐར་ཡང་རང་ཉིད་ལ་དེ་སྐོར་གྱི་དངོས་ཡོད་གནས་སྟངས་དང་འབྲེལ་བའི་མཁྱེན་ཡོན་ཞིག་དགོས་ལ། དེ་ཡང་ཕྱོགས་གཅིག་བུ་མིན་པར་ཕྱོགས་མང་པོ་ནས་རྒྱུས་ལོན་དགོས་པའང་གལ་ཆེན་རེད་འདོད།

༢༽བསྟན་འཛིན་བདེ་བྱེད་ཀྱིས་སྐུ་ཕྲེང་བཅུ་གསུམ་པ་ནི་ལུང་ཤར་སོགས་གཉིད་ལས་སློང་མཁན་དང་། བོད་ལ་ཕྱི་རྒྱལ་སྐད་ཡིག་གི་སློབ་གྲྭ་ཐོག་མར་འཛུགས་མཁན། ཕྱི་རྒྱལ་ལ་བོད་པའི་སློབ་ཕྲུག་ཐོག་མར་གཏོང་མཁན། བོད་རང་བཙན་ཐོག་མར་གསལ་བསྒྲགས་གནང་མཁན་སོགས་ཡིན་པར་གསུངས་འདུག འདི་བདེན་པ་རེད་ལ། འདིའི་སྟེང་ནས་ཁོང་གིས་ལོ་རྒྱུས་ལ་ཕྱོགས་གཅིག་གི་ལྟ་ཚུལ་རྐྱང་བའི་སྒང་ནས་སྡོམ་ཚིག་བཞག་འདུག་པའང་གསལ་བོ་དང་བདེན་པར་མཐོང་ཐུབ། ལོ་རྒྱུས་ཀྱི་ཕྱོགས་ངོས་གཞན་ནས་བཤད་ན་སྐུ་ཕྲེང་བཅུ་གསུམ་པ་ནི་ལུང་ཤར་སོགས་གཉིད་ལས་བསླངས་ཤིང་སླར་ཡང་ས་འོག་ཏུ་སྦད་མཁན་དང་། བོད་ལ་ཕྱི་རྒྱལ་སྐད་ཡིག་སློབ་གྲྭ་ཐོག་མར་འཛུགས་མཁན་ནས་དེ་ཉིད་ཡང་བསྐྱར་གཏོར་མཁན། ཕྱི་རྒྱལ་ལ་བོད་པའི་སློབ་ཕྲུག་ཐོག་མར་གཏོང་མཁན་ནས་དེ་དག་བེད་མེད་དུ་འཇོག་མཁན། བོད་རང་བཙན་གསལ་བསྒྲགས་གནང་རྗེས་སླར་ཡང་རང་བཙན་ཤོར་བར་རྨང་གཞི་འདིང་མཁན་ཞིག་ཡིན་པའང་མཐོང་ཐུབ། འདིའང་ལོ་རྒྱུས་རང་སྟེང་ནས་བཤད་ན་བདེན་པ་ཆགས་ཡོད།

༣༽ང་ཚོས་དད་འདུན་དང་དྲིན་གཟོའི་བསམ་བློའི་དོར་ནས་སྐུ་ཕྲེང་བཅུ་གསུམ་པར་ལྟ་སྐབས་འདི་འདྲ་ཞིག་མཐོང་ཐུབ། ཁོང་ནི་ཁ་ཐུག་གི་ཉམས་མྱོང་དང་སློབ་གསོ་རྙེད་ཐུབ་མཁན་གྱི་དབུ་ཁྲིད་ཅིག་ཡིན་ནའང་། བསམ་བློའི་ནང་འགལ་ཟླ་མང་པོ་ཡོད་མཁན་གྱི་དབུ་ཁྲིད་ཅིག་ཡིན་པ་དེ་རེད། དབུ་ཁྲིད་ཅིག་དང་དབང་བསྒྱུར་བ་ཞིག་གི་ངོས་ནས་ཁ་ཐུག་ལ་ཉམས་མྱོང་དང་སློབ་གསོ་རྙེད་ཐུབ་རྒྱུ་ལས་དབང་བསྒྱུར་གྱི་སྲིད་བྱུས་གཙོས་པའི་ལས་དོན་ཆེ་མ་ཆུང་གསུམ་ལ་བསམ་བློའི་འགལ་ཟླ་མི་ཉར་རྒྱུ་གལ་ཆེན་པོ་ཆགས་ཡོད། སྐུ་ཕྲེང་བཅུ་གསུམ་པའི་རླབས་ཆེན་དགོངས་གཞི་ཁག་དུས་སྐབས་སོ་སོར་ཕམ་ཉེས་བསྟུན་མར་བྱུང་བའང་ཁོང་གི་བསམ་བློའི་འགའ་ཟླ་འདིའི་རྨང་གཞི་སྒང་ནས་ཡོང་ཡོད། དེ་ཐད་ཀྱི་ཁོང་ལ་དཔེ་མཚོན་ཡག་ཤོས་ནི་མན་ཇུའི་དུས་མཇུག་གི་རྒྱལ་མོ་ཚི་ཞི་བཞག་ནས་བལྟས་ཆོག མན་ཇུའི་དུས་མཇུག་ཏུ་ཕྱིའི་བཙན་གནོན་དང་ནང་གི་ངོ་རྒོལ་ཡང་ཡང་བྱུང་སྐབས་རྒྱལ་མོ་ཚི་ཞིས་ཀྱང་སྲིད་སྐྱོང་གུང་ཆིན་ཝང་དང་མཉམ་དུ་ཁ་ཐུག་གི་ཉམས་མྱོང་དང་སློབ་གསོ་གཞིར་བཞག་ནས་རླབས་ཆེ་བའི་བསྒྱུར་བཅོས་ལས་འགུལ་སྤེལ་མྱོང་། རྒྱ་ནག་ཏུ་ཕྱི་རྒྱལ་སྐད་ཡིག་སློབ་གྲྭ་བཙུགས་ཤིང་། ཕྲུ་གུ་གང་མང་ཞིག་དངོས་སུ་འདེམས་སྒྲུག་གིས་ཕྱི་རྒྱལ་ཏུ་སློབ་སྦྱོང་ལ་བཏང་བ། རྒྱ་ནག་ཏུ་ཐོག་དང་པོར་ལྕགས་ལམ་བཟོས་ཤིང་། ཕྱི་རྒྱལ་ནས་ཡར་ཐོན་ཅན་གྱི་དམག་ཆས་ཉོ་སྒྲུབ། དམག་གི་སྒྲིག་འཛུགས་ལ་དེང་དུས་དང་མཐུན་པའི་སྦྱོང་བརྡར་སོགས་སྤྲད་པ་རེད། འོན་ཀྱང་། བསྒྱུར་བཅོས་གྱི་རིམ་པ་འདིའི་རྒྱབ་ལོགས་ནས་ཁོ་མོ་དང་ཁོ་མོས་དབང་བསྒྱུར་བའི་མན་ཇུའི་སྲིད་གཞུང་གི་དབང་བསྒྱུར་སྲ་བརྟན་ལ་དོ་ཕོག་ཡོང་བའི་རྣམ་འགྱུར་ཐོན་སྐབས་སློབ་གྲྭ་གཏོར་ཞིང་། སློབ་ཕྲུག་ཕྱིར་འགུག ལྕགས་ལམ་བཟོ་མཚམས་བཞག་ཅིང་། དམག་ཆས་ཉོ་མཚམས་བཞག་པ། དམག་གི་སྒྲིག་འཛུགས་སྲ་བརྟན་གཏོང་མཚམས་བཞག་པ་མ་ཟད་། དེ་འབྲེལ་གྱི་གུང་ཆིན་ཝང་གནས་བྱུང་དང་། མི་བུ་གང་མང་ཞིག་ལ་སྲོག་ཁྲིམས་བཏང་བ། ཁོ་མོའི་ཚ་བོ་གོང་མ་བཀང་ཤི་ཡང་བཟང་བཙོན་དུ་བཅུག་ནས་མངའ་ལམ་དུ་བརྫིངས་པ་སོགས་བྱས་ཡོད། སྐུ་ཕྲེང་བཅུ་གསུམ་པའི་སྐབས་དབྱིན་ཇི་དང་མན་ཇུའི་བཙན་འཛུལ་བྱུང་སྐབས་ཁོང་གིས་ཀྱང་སྐབས་ཐོག་དེའི་ཉམས་མྱོང་དང་སློབ་གསོ་རྙེད་ནས་ཕྱོགས་ཡོངས་ནས་བསྒྱུར་བཅོས་ཡོང་ཐབས་ཀྱི་ཕྱག་ལས་གནང་བ་རེད། འོན་ཀྱང་ཕྱག་ལས་དེ་དག་གི་རྒྱབ་ནས་བོད་ཀྱི་དབང་བསྒྱུར་བ་མཐོ་ཤོས་སྐུ་དྲག་དང་སེར་མོ་བའི་སྡེའི་ཁེ་ཕན་ལ་གནོད་པའི་ལས་གཞི་ཡོང་བ། ལྷག་པར་དུ་ཁོང་གི་དབང་བསྒྱུར་རྒྱབ་བརྟེན་སེར་མོ་བའི་སྡེ་ལ་གནོད་གཞི་ལས་འགུལ་ཡོང་སྐབས་ཁོང་ཀྱང་ཕྱིར་བསྡུ་ནང་ཕེབས་པ་མ་ཟད། ཁོང་གི་བསྒྱུར་བཅོས་ལས་འགུལ་ནང་ནུས་པ་འདོན་མཁན་གྱི་གྲས་སྤོམ་མདའ་དང་། ཚ་རུང་བ། ལུང་ཤར་བ། སྤྱན་གསལ་ཀུན་ཕན་སོགས་ཀྱང་གནས་དབྱུང་དང་རྒྱང་ཕུད། ཐ་ན་སྡུག་རྩུབ་ཆེ་བའི་མནར་གཅོད་འོག་སྐུ་སྲོག་ཤོར་བའི་གནས་སྟངས་ཀྱང་བྱུང་ཡོད།

༤༽ད་ལྟའི་དམངས་གཙོ་གསོལ་རས་གནང་བའི་སྐོར་ལ་ཞུ་རྒྱུ་ཞིག་འདུག རྒྱལ་བ་རིན་པོ་ཆེས་གནས་དུས་ལ་དཔག་པའི་བོད་མི་ཚོར་དམངས་གཙོ་གསོལ་རས་གནང་བ་རེད། བོད་མི་ཚོས་འདི་བཀའ་དྲིན་ཆེན་པོར་བསམ་གི་ཡོད། དངོས་ཡོད་ཐོག་ནས་ཀྱང་བཀའ་དྲིན་ཆེན་པོ་རེད། འོན་ཀྱང་གསོལ་རས་ནི་གསལ་རས་རང་རེད། མར་གནང་ཆོག་ཆོག་འདུག་ལ། ཕྱིར་ལེན་ཆོག་ཆོག་ཀྱང་འདུག ད་ལྟ་དམངས་གཙོ་ཕྱིར་བསྡུ་གནང་ནས་རྒྱ་ནག་གུང་ཁྲན་ཏང་གི་འོག་ནས་སྤྱི་ཚོགས་རིང་ལུགས་ཀྱི་ལམ་ལུགས་ལག་བསྟར་བྱས་ན་ཆོག་གསུངས་ཀི་ཡོད་མ་རེད་དམ། དང་པོ་བཀའ་དྲིན་རྩིས་རྒྱུ་ལ་མ་བྲེལ་བར་གནས་སྟངས་བཤད་རྒྱུ་འདི་ཡང་གལ་ཆེན་པོ་རེད་འདོད།

ཁ་སང་དེ་རིང་གི་བོད་ནང་ས་ཡོམ་གོད་ཆག་འདིའི་སྐབས་སྐད་ཆ་འདིའི་རིགས་བཤད་རྒྱུར་བདེ་བོ་མི་འདུག་པས་འདི་ནས་གནས་སྐབས་རིང་མཚམས་འཇོག་རྒྱུ་ཡིན།

འདི་ན་མི་རིགས་ཀྱི་ཉམས་རྒུད་རིགས་ཤིག་མངོན་འོང་བའི་སྐབས་སུ་མིང་ཚིག་ཁ་ཤས་རེའི་སྟེང་ལ་ཚོར་བ་རྣོན་པོས་རྩོད་པ་བརྒྱབ་ནས་འདུག་ཁོམ་ཞིག་ཁྱོད་ཚོར་སུས་སྤྲད་སོང་ཨ།

དེ་བས་རུས་རྒྱུད་གཅིག་པའི་སྤུན་ཟླ་ཚོའི་དཀའ་ངལ་ལ་བཙན་བྱོལ་ནས་གདུང་སེམས་མཉམ་སྐྱེད་བྱེད་རྒྱུའི་ལས་ཀ་ག་རེ་ཡོད་མིན་གྱི་ཐད་ལ་བགྲོ་གླེང་ཞིག་གནོངས་དང་།

ལྷ་མོ་སྐྱབས་དང་ཁང་གསར་རྡོ་རྗེ་ཁྱོད་ཚོའི་ཁ་རྒྱགས་རྩོད་པ་གནས་སྐབས་རིང་མཚམས་འཇོག་རོགས་ཀྱིས། ང་ཚོ་འདི་ན་སྐྱེ་རྒུ་མདོའི་ས་ཡོམ་གྱིས་ཧོན་འཐོར་སོང་ནས་ཁ་རྒྱགས་ལ་ཉན་པའི་འདུན་པ་མི་འདུག

ཚག་ཐེབས་པ་དང་གཏགས་ནོར་ཤོར་འདུག་པ་བཅོས་རོགས།