བོན་རྒྱ་བསྟན་འཛིན་རབ་རྒྱས།
ཁ་སང་སྤྱི་ཟླ་ ༠༤ ཚེས་ ༡༤ ཉིན་སྐྱེ་རྒུ་ས་ཁུལ་ལ་རང་བྱུང་ཁམས་ཀྱི་གོད་ཆག་བློ་ཡིད་ལས་བརྒལ་བ་ཞིག་བྱུང་སྟེ་སྤུན་ཟླ་ཁྲི་ཁྲག་ལྷག་ཅིག་ལ་ཤི་རྨས་དང་། འཚོ་གནས་ཁང་ཁྱིམ་དང་བཅས་པར་གཏོར་སྐྱོན་ཐེབས་པ་རེད། རྒྱུ་རྐྱེན་འདི་ལ་བརྟེན་ནས་སླར་ཡང་འཛམ་གླིང་གི་གསར་ལམ་གྲགས་ཆེན BBC སོགས་ནས་བོད་མི་རིགས་ཀྱི་སྐྱིད་སྡུག་དང་གནས་བབ་གླེང་སློང་བྱས་པ་རེད། སྐབས་འདིར་ང་ལྟ་བུའི་མི་མགོ་མཁྲེགས་ཤིག་ལ་མཚོན་ན། སེམས་ཀྱི་དམར་དམར་རོ་དེ་ནི་འཛམ་གླིང་མི་མང་དང་། ལྷག་པར་དགྲ་ནག་རྒྱ་དམར་སྲིད་གཞུང་གི་སྔུན་ནས་སྤུན་ཟླ་འདི་ཚོས་སྡར་སྐད་མི་ཤོར་རྒྱུ་དང་། མིག་སྟོན་མི་བྱེད་རྒྱུ། རབ་ཡིན་ན་འབྲོང་རྒོད་དར་མའི་རང་གཤིས་ཤིག་སྟོན་རྒྱུ་དང་བྱང་ཆུབ་སེམས་ཀྱི་དཔའ་རྟགས་ཤིག་སྟོན་རྒྱུ་ནི་སེམས་ཀྱི་རེ་བ་ཆེ་ཤོས་རེད།
བོད་ལ་རང་བྱུང་ཁམས་ཀྱི་གོད་ཆག་འདི་བྱུང་རྗེས་ནུས་པ་ཤུགས་ཆེན་འདོན་མཁན་གཙོ་བོའི་གཙོ་བོ་དེ་ནི་མཚོ་སྔོན་བོད་སྐད་སྙན་འཕྲིན་ཁང་རེད། མཚོ་སྔོན་བོད་སྐད་བརྙན་འཕྲིན་ཁང་གིས་བརྙན་འཕྲིན་ནང་གི་ལས་རྟགས་ཀྱི་ཁ་དོག་དང་དྲ་ངོས་བཅས་པ་སྐྱ་བོར་བསྒྱུར་ནས་མྱ་ངན་ཞུས་ཡོད་པ་མ་ཟད། གློག་བརྙན་དང་། རིག་རྩལ། འཆད་ཁྲིད་སོགས་ཀྱི་ལེ་ཚན་ཡོད་ཚད་ཕྱིར་བསྡུ་བྱས་ནས་དུས་ཚོད་ ༢༤ ཡོངས་རྫོགས་དོན་རྐྱེན་འདིའི་སྐོར་ལ་ཆེད་གཏོང་གནང་གིན་འདུག
ཆེད་གཏོང་བྱས་པ་དེའང་མིང་ཙམ་མིན་པར་ཧ་ཅང་ཞིབ་ཚགས་ཆེ་བ་དང་དྲིལ་བསྒྲགས་ཀྱི་ནུས་པ་ཤུགས་ཆེ་བ། མི་སེམས་གཡོ་བ། ཁྱབ་ཆེ་བ། ཟོལ་མེད་པ་ཞིག་རེད། གསར་ཁང་རང་ངོས་ནས་རྒྱང་སྒྲོག་པ་ལྷ་མོ་ཆེད་དུ་དོན་རྐྱེན་བྱུང་བའི་ས་གནས་ལ་བཏང་ཡོད་པ་དང་། ཚེ་སྒྲོན་དང་སྒྲོལ་མ་སོགས་ས་གནས་གཞན་དང་། ཟི་ལིང་གི་གནམ་ཐང་དང་། སྨན་ཁང་ཁག་བཅས་ལ་དངོས་སུ་ཆེད་བསྐྱོད་ཀྱིས་རོགས་སྐྱོར་གཞུང་སྒེར་ཁག་གི་མི་སྣ་ལ་བཅར་འདྲི་དང་ལམ་སྟོན། སྣེ་ཁྲིད་དང་རྒྱུས་ལོན། གོད་ཆག་བྱུང་བའི་སྤུན་ཟླ་ཚོའི་སྐྱིད་སྡུག་དང་དཀའ་ངལ་ངོ་སྤྲོད། དེ་དག་གི་ཚབ་བྱས་ནས་གཏོང་ཕོད་བྱམས་སེམས་ཅན་གྱི་རོགས་སྐྱོར་ཁག་ལ་བཀའ་དྲིན་ཞུ་བ་དང་། རེ་བ་འདོན་པ། འབོད་སྐུལ་ཞུ་བ་སོགས་དྲིལ་བསྒྲགས་ཧ་ཅང་གི་ཚད་མཐོན་པོ་དང་། བློ་ལས་འགོང་བ། ཉམས་དགའ་བ་། སྨོན་འདོན་པ་ཞིག་རེད།
ད་དུང་གསར་ཁང་འདིའི་གསར་འགོད་པ་ཚོས་ངལ་བ་ཡོད་ཚད་ལ་གདོང་ལེན་གྱིས་དཀའ་ལས་བསྐྱོན་སྟངས་དང་། ལན་རེར་ཁོང་ཚོས་ཀྱང་ཞེ་སེམས་གཏིང་ནས་སྐྱོ་སྟེ་ངག་མ་འཁྲོལ་བར་མིག་ཆུ་ཤར་ཤར་གཏོང་བའི་རྣམ་པ། གོད་ཆག་བྱུང་བའི་སྤུན་ཟླ་དང་། རོགས་སྐྱོར་བྱེད་མཁན་གྱི་སྤུན་ཟླ་བཅས་ལ་བརྩེ་སེམས་ཀྱི་རྣམ་འགྱུར་སྟོན་སྟངས་བཅས་ཀྱི་སྟེང་ནས། གོད་ཆག་བྱུང་བའི་སྤུན་ཟླ་འདས་གསོན་དག་ལ་ཁོང་ཚོས་སྐྱེ་བ་གཅིག་བསྡུས་ཀྱི་ཤ་ཉེ་སྤུན་ཟླའི་བརྩེ་བ་དང་། ས་ལ་བཞུར་བའི་ཟུངས་ཁྲག་ནི་ཁོ་ཚོའི་ཚོར་ཟིན་གྱི་ཟུངས་ཁྲག་ཡིན་པའི་འདུ་ཤེས་ཤིག་ཁ་མིན་སེམས་ཀྱི་གཏིང་ནས་འཛིན་གྱིན་པ་དེ་མིག་གིས་མངོན་སུམ་མཐོང་བ་ཞིག་རེད། ཤུགས་རྐྱེན་འདི་དང་འདི་འདྲའི་དབང་གིས་ཐེངས་འདིར་མདོ་དབུས་ཁམས་གསུམ་གྱི་སྤུན་ཟླ་ཚོས་ལེ་དབར་སྟོང་ཕྲག་གི་ས་མཚམས་བརྒལ་ནས་ཤ་དང་མར། གོ་རེ་དང་རྩམ་པ། ཇ་དང་ཚ་ཁུ། ཁབ་དང་སྐུད་པ་ཚུན་ཆད་བསྡུས་ནས་སྐྱེ་རྒུ་ལ་འདྲེན་གྱིན་ཡོད། ཚུལ་འདི་འདྲ་ནི་མཐོང་ན་ཉམས་དགའ་བ་དང་། བལྟས་ན་སེམས་དྲོ་བ་ཞིག་རེད་ལ། འདི་ལྟར་སྤུན་ཟླ་ལག་རྡང་སྦྲེལ་ནས་ཤི་ནའང་དོན་སྙིང་དང་གཟི་བརྗིད་ལྡན་པ་ཞིག་ཀྱང་ཅི་ལ་མིན། འདི་ལྟར་གཞིས་བཞུགས་སྤུན་ཟླ་ཚོས་རྒྱ་དམར་པོ་སྔུན་ནས་མི་རིགས་ཀྱི་ཞབས་འདྲེན་མ་བྱས་པར། “ལྷུང་ན་ཁུགས་གཅིག་དང་འབུད་ན་སྒང་གཅིག་”ཡིན་པའི་ཆིག་སྒྲིལ་གྱི་རྣམ་པ་ཞིག་མངོན་སུམ་དུ་བསྟན་ཡོད་པས་རྒྱ་དམར་སྲིད་གཞུང་ལ་སྔར་ལས་ལྷག་པའི་སེམས་འཚུབ་ལངས་ཀྱིན་ཡོད་པ་རེད།
ཡིད་སྐྱོ་བ་ཞིག་ལ་རྒྱ་དམར་སྲིད་གཞུང་གི་CC TV བརྙན་འཕྲིན་ཁང་ནས་༡༽སྐྱག་རྫུན་སྣ་ཚོགས་ཀྱི་གུང་བསྒྲིག་ཐབས་ལ་འབད་པ་ཤུགས་ཆེན་དང་། གྲ་སྒྲིག་སྣ་ཚོགས་བྱས་ནས། ༢༽ཡོད་ཚད་རྒྱ་དམར་གཞུང་གི་ཉེན་སྲུང་དམག་མིས་བསྐྱབས་རབས་དང་། ༣༽ཐོག་དང་པོར་སྲོག་སྐྱོབ་ལ་ཐོན་མཁན་གྱི་གྲྭ་བཙུན་དག་གསང་ཐབས། ༤༽ཐ་ན་ཤི་རྨས་ཀྱི་གྲངས་འབོར་ཚུན་ཆུད་གསང་བ་བྱེད་ཀྱིན་ཡོད་ལ། ད་དུང་༥༽རྒྱ་དམར་གཞུང་གི་དཔོན་རིགས་ཁ་ཤས་དངོས་སུ་ས་ཐོག་ལ་སོང་ནས། སྙིང་རྗེ་ཆེ་མདོག་དང་བརྩེ་བ་ཆེ་མདོག་གི་འཁྲབ་སྟོན་བྱས་ནས་འཛམ་གླིིང་མི་མང་གི་མཐོང་ལེན་ཐབས་དང་མགོ་སྐོར་ཐབས་སོགས་ལ་འབད་ཀྱིན་འདུག་ལ། ད་དུང་སྲིད་གཞུང་གིས་༦༽ཟ་འཐུང་གི་དཀའ་ངལ་མ་སེལ་སྔོན་ལ་རོགས་སྐྱོར་འདང་ངེས་སུ་ས་ཐོག་ལ་ཐོན་པའི་ཧམ་རྫུན་གྱི་དྲིལ་བསྒྲགས་ཤུགས་ཆེ་སྤེལ་བ། ༧༽སྐྱོབས་མཁན་ཡིན་ཟེར་བའི་སྲིད་གཞུང་མི་སྣ་དག་གི་ནང་དུ་བོད་ཀྱི་འབྲོག་ཁྱི་དང་དངོས་ཟོག་རིགས་རྐུ་འཁྱེར་བྱས་པ། ༨༽རྒྱ་གཞུང་གིས་ཆེད་ལས་ཞིབ་འཇུག་པའི་ཉེན་བརྡ་དུས་ཐོག་ཁྱབ་བསྒྲགས་བྱས་མེད་པ་མ་ཟད་དེ་དག་གསང་ཐབས་ལ་འབད་པ་ཤུགས་ཆེན་བྱེད་ཀྱིན་པར་བརྟེན། ང་ཚོས་ཀྱང་ངེས་པར་བསམ་ཞིབ་དང་ཁྱབ་བསྒྲགས་དུས་ཐོག་སྤེལ་དགོས་ངེས་ཤིག་རེད་སྙམ། དེའི་ཕྱིར་བདག་གིས་གོང་གི་དོན་ཚན་འདི་དག་མཉམ་བསྲེས་ཀྱིས་ཅུང་རྒྱས་བཤད་བྱེད་རྒྱུ་ཡིན།
༡༽ ལྷ་མེད་སྨྲ་པ་ཧུའུ་ཅིན་ཐོ་ཡིས་ཐལ་མོ་སྦྱར་ཞིང་སྲིན་པོ་བུན་ཅཱ་པོར་སྙིང་རྗེའི་མིག་མཆི་འཁྲུག་པ།
དཔེར་ན། ཧུའུ་ཅིན་ཐོ་དངོས་སུ་ས་ཐོག་ལ་སོང་ནས་རྒན་མོ་ཞིག་ལ་ཐལ་མོ་སྦྱར་བ་དང་། བུ་མོ་ཆུང་ཆུང་ཞིག་གི་མགོ་དང་ཁར་སྦྱར་བ། བྱད་དབྱིབས་དང་གཟུགས་རིས་ཚུན་ཆུད་བདུད་རྒན་ཏིན་ཞོ་ཕིན་དང་ཤིན་ཏུ་འདྲ་བའི་བུན་ཇ་པོས་སྙིང་རྗེ་ཆེ་མདོག་གིས་མིག་ལ་མཆི་མ་འཁྲུག་པའི་རྣམ་པ་བསྟན་པ། མཚོ་སྔོན་ཞིང་ཆེན་གྱི་འགོ་གཙོ་རྒྱ་དམར་ཆང་བེ་ཡིས་ཀྱང་མིག་ཆུ་གཏོང་ཁུལ་གྱིས་འབྲོག་པ་ཚོར་མགོ་ཡིས་རྒྱག་པ་སོགས་འཛམ་གླིང་མི་མང་སླུ་འགུག་ལ་འབད་ཀྱིན་འདུག་མོད་དེ་ཚོའི་སྙིང་རྗེ་དང་རྒྱུ་འབྲས་ཀྱི་བློ་མིག་ནི་འུ་ཚོར་ཧ་ཅང་རྒྱུས་ཡོད་པ་དེ་ལྟར་ཡིན་པས་འཁྲབ་སྟོན་དེ་ལ་ཡིད་ཆེས་དང་སེམས་འགུལ་ཐེབས་པ་ལྟ་ཞོག་དེ་ལས་ལྡོག་སྟེ་སྙིང་གཟེར་ལངས་པའི་ཁོང་ཁ ྲོ་སློང་གི་འདུག དེ་ལྟར་དགེ་འདུན་པ་ཞིག་ཐུགས་རྒྱལ་བཞེངས་ནས་ཐད་ཀར་ཧུའུ་ཅིན་ཐོ་ཡི་གདོང་ལ་མཛུབ་མོ་བཙུགས་ནས་སྡིགས་པའི་གནས་ཚུལ་ཞིག་ཀྱང་ཐོན་ཡོད་པ་དེ་ལྟར་རེད།
ཆང་བེ་ཡིས་ཀྱང་ང་ཅི་ལྟར་མིག་ཆུ་ཤོར་བ་མ་ཤེས་ཟེར་ཞོར་ལ་འགྲེལ་བཤད་ཏང་ཡོན་པའི་བློ་སེམས་རྦད་ཆོད་ཀྱི་སྙིང་སྟོབས་ལ་ཧང་སངས་ཤིང་སེམས་འགུལ་ཐེབས་ནས་མིག་ཆུ་ཤོར་བར་བཤད་པ་དེས་ཁོའི་མིག་ཆུ་དེའང་གཡོ་དང་སྒྱུ་ཡིས་བཏང་བའི་འཕྲུལ་ཞིག་དང་གུང་ཁྲན་ཏང་གི་ཁྲག་ཐེའུ་ཅན་གྱི་ཆབ་སྲིད་ལག་ཆ་ཞིག་མ་རེད་ཅེས་སུ་ཡིས་བཤད་ཐུབ།
༢༽ འཆར་གཞི་ཅན་གྱི་གསར་འགོད་པ་དང་ཚོད་དཔག་མ་ཐུབ་པའི་བྱིས་པ་ཆུང་ཆུང་ཞིག
འདི་ལྟར་རྒྱ་དམར་གཞུང་གིས་ད་ལྟའི་བར་དུ་མི་རིགས་གཞན་ལ་སྐྱག་རྫུན་དང་མི་རིགས་ཆུང་བར་དྲག་རྡུང་གི་འཁོར་ལོ་བསྐོར་ནས་འོངས་པ་རེད། བཀྲ་ཤིས་པ་དང་དོན་མ་འགྲུབ་པའི་གནས་སྐབས་གང་ཞིག་ཡིན་ནའང་། ཁོང་ཚོའི་སྐྱག་རྫུན་དང་འུར་སྒྲོག་ནི་འཆར་གཞི་དང་གོ་རིམ་ལྡན་པ་ཞིག་ཡོད་པ་རེད། དེ་ལྟར་གོ་རིམ་ཅན་གྱི་སྐྱག་རྫུན་དང་འུར་སྒྲོག་པ་ནི་ CC TV བརྙན་འཕྲིན་ཁང་དང་ཞིན་ཧྭ་དྲ་ཚིགས་གཉིས་གཙོ་བོའི་གཙོ་བོ་དེ་ཡིན། ཐེངས་འདིར་ཡང་དེ་གའི་གསར་འགོད་པ་ཚོས་ཕྱོགས་སྣེ་ཟ་ཟུར་གང་ས་ནས་རྒྱལ་ཁབ་ཀྱིས་མི་རིགས་ལ་བྱམས་སྐྱོར་བྱེད་ཀྱིན་པའི་བཟོ་ལྟ་དང་། དམག་མི་དང་ཏང་ཡོན་ཚོས་མི་རིགས་ཀྱི་ཆེད་དུ་ཡོད་ཚད་གཏོང་བཞིན་པ། སྲིད་གཞུང་གིས་དངོས་ཟོག་ཆེད་གཏོང་དང་དངུལ་དངོས་འབོར་ཆེན་གནང་སྦྱིན་བྱེད་ཀྱིན་པའི་རྣམ་པ་སྟོན་ཐབས་ཀྱི་ནུས་པ་ཤུགས་ཆེན་འདོན་གྱིན་པའི་ཅོལ་ཆུང་གི་རྣམ་པ་དེ་གང་སར་མངོན་ཀྱིན་འདུག
ཐ་ན་འདྲ་པར་ཞིག་ལེན་ནའང་རོགས་སྐྱོར་དམག་མི་ཡོད་ས་དང་འགོ་ཁྲིད་འགྲོ་ས། སྲིད་གཞུང་གི་རོགས་སྐྱོར་རླངས་འཁོར་སོགས་ཀྱི་ཕྱོགས་ལ་པར་བརྒྱབ་ནས་རོགས་སྐྱོར་བ་གཙོ་བོ་ཡིན་པའི་གྲྭ་བ་དང་སློབ་མ་ཚོའི་ཕྱོགས་ལ་གཏན་ནས་པར་ཆས་སྐོར་གྱིན་མི་འདུག་ལ། མདོ་དབུས་ཁམས་གསུམ་གྱི་དཔལ་འབྱོར་རོགས་སྐྱོར་ཕྱོགས་ལའང་པར་ཆས་གཏན་ནས་སྐོར་གི་མི་འདུག
དཔེར་ན། རྒྱ་ནག་གི་ CCTV གསར་འགོད་པ་ཞིག་གིས་རྒྱ་ནག་གིས་རོགས་སྐྱོར་ལ་མངགས་པའི་སྨན་པ་ཚོའི་བྱམས་སེམས་ཀྱི་བཟང་སྤྱོད་འཛམ་གླིང་ལ་སྟོན་ཆེད་ལོ་བཅུ་ཅན་གྱི་བྱིས་པ་ཞིག་ལ་མགོ་གཡོག་རྩིས་ཀྱིས་བཅར་འདྲི་བྱེད་ཀྱིན་འདུག བྱིས་པ་དེས་རྒྱ་སྐད་ཡག་པོ་བཤད་ཤེས་པའི་རྐྱེན་གྱིས་རྨས་སྐྱོན་ཚབས་ཆེན་ཐེབས་པའི་ནད་པ་སྐོར་ཞིག་ལ་སྐད་བསྒྱུར་བྱེད་ཀྱིན་འདུག གསར་འགོད་པས། བྱིས་པ་དེར་”སྨན་པ་ཚོས་ཁྱོད་ལ་ཨེ་གཅེས་ཀི་”ཞེས་དྲིས་སོང་དེ་བྱིས་པ་དེས“སྨན་པ་ཚོས་ཡག་པོ་གཅེས་གི་འདུག མཚམས་རེར་སྟབས་བདེ་ཐུག་པ་དང་མཚམས་རེར་ཆུ་གྲང་མོ་སྟེར་གི་འདུག”་ཅེས་བཤད། “དེས་ན་ཁྱོད་ཀྱིས་ང་ཚོར་གཞས་ཤིག་གཏོང་རོགས་ཞེས་”བཤད་སོང་། བྱིས་པ་དེས་སྐད་མཐོན་པོས་བྱ་དེ་ཁྲུང་ཁྲུང་དཀར་མོ་ཞེས་བླངས་སོང་། ཚིག་རྐང་བཞི་བོ་དེ་ཡང་སྐྱོར་མ་ཐུབ་པར་ཚིག་རྐང་ཕྱི་མ་གཉིས་ངུ་བཞིན་ངུ་བཞིན་དུ་མཇུག་བསྡུ་བྱས་སོང་།
འདི་ལས་ང་ཚོས་མཐོང་ཐུབ་པ་ནི་གསར་འགོད་པའི་དམིགས་ཡུལ་སྨན་པའི་བྱམས་སྐྱོར་འཇམ་པོའི་འོག་ནས་བྱིས་པ་འདིའི་སྡུག་བསྔལ་གཏན་བརྗེད་བྱས་ཡོད་པ་དེ་སྟོན་ཆེད་རེད་དེ། ཁོ་ཚོས་ཚོད་དཔག་མ་ཐུབ་པ་ཞིག་ལ་བྱིས་པ་འདིས་རྒྱལ་བ་ཚངས་དབྱངས་རྒྱ་མཚོའི་གསུང་ཚིག་ཧ་ཅང་གི་གནད་འགག་ཅན་ཞིག་བླངས་པ་དང་དེ་ཡང་མིག་ཆུ་དང་བཅས་མཇུག་བསྡུས་པ་འདིས་ཁོ་ཚོར་དོགས་མི་བདེ་བ་ཆེན་པོ་ཞིག་ལ་གཏད་པ་མ་ཟད། རང་བཞིན་གྱིས་བྲེད་ཤ་ལངས་པའི་ཚོར་སྣང་ཞིག་ཀྱང་སྤྲད་ཡོད་པ་རེད།
༣༽དགོད་བྲོ་བའི་སྐྱོབ་པ་དང་ངུ་བྲོ་བའི་སྲུང་མ།
ཧ་ཅང་དགོད་བྲོ་བ་ཞིག་ལ། རྒྱ་དམར་གཞུང་གིས་མངགས་པའི་ཉེན་སྲུང་དམག་མི་ཚོ་ནི། ཉིན་གཉིས་པ་གསུམ་པ་ཞིག་ལ་མ་གཏོགས་ས་ཁུལ་ལ་མ་ཐོན་པ་དང་། ས་ཁུལ་ལ་ཐོན་དུས་མང་པོ་ཞིག་གིས་གཞན་སྐྱོབ་པ་ཕར་ཕྱོགས་ཁོ་རང་ཚོ་རྫ་དུག་རྒྱབ་ནས་གཡས་ལོག་གཡོན་ལོག་གིས་སྨན་ཁང་ལ་འཁྲིད་ཀྱིན་པ་དེ་ལྟར་རེད་དེ། ད་དུང་ཁོ་ཚོས་ཐེངས་འདིར་སྐྱོབ་མཁན་ཚོ་ནི་ཁོ་ཚོ་ཡིན་པར་ཤུགས་ཆེ་བསྒྲགས་ཀིན་འདུག དོན་ལ་ཐེངས་འདིར་ཤི་བོ་ཚོའི་རོ་བདག་དང་གསོན་པོ་ཚོའི་སྐྱོབ་པ་མྱུར་ཤོས་དངོས་དེ། ཐག་ཉེ་ཕྱོགས་ཀྱི་རྫ་ཆུ་ཁ་བ་དང་ཆབ་མདོ་ངོ་ཕྱོགས་ཀྱི་གྲྭ་བཙུན་རྣམས་ཡིན་འདུག དགོན་པ་གཅིག་གི་ནང་དུ་གྲྭ་བཙུན་ཚོས་ས་འོག་ནས་བླངས་པའི་བེམ་རོ་བཞི་སྟོང་བརྩེགས་ཡོད་པ་བརྒྱུད་ལམ་ཁག་ཏུ་ཐོན་ཡོད་ནའང་CC TV ཚང་གིས་མི་ཉིས་སྟོང་ཙམ་ལས་རྐྱེན་འོག་ལ་ཤོར་མེད་པར་གླེང་གིན་ཡོད། སྐྱག་རྫུན་འདི་འདྲ་ནི་ངེས་པར་ཏུ་འཛམ་གླིང་ལ་ཤེས་བར་བྱེད་དགོས་པའི་གནས་ཚུལ་ཤ་སྟག་རེད།
ཡང་སྐྱུག་བྲོ་བ་ཞིག་ལ། སྲིད་གཞུང་རང་གིས་མངགས་པའི་ཉེན་སྲུང་མི་སྣས་འདས་པོ་ཚོའི་རོ་ལ་བདག་མི་བྱེད་པར་ཅ་ལག་བཏུས་ནས་རྐུ་འཁྱེར་བྱེད་ཀྱིན་པའི་གསར་འགྱུར་མང་དུ་ཡོད་པ་མ་ཟད་། མེ་གསོད་རུ་ཁག་གི་སྒྲིག་ཆས་སེར་བོ་ཅན་གྱི་མི་གསུམ་གྱིས་བོད་ཀྱི་འབྲོག་ཁྱི་ཞིག་རླངས་འཁོར་ནས་འཇུག་པ་པར་བརྒྱབ་ནས་ཕྱི་ལོགས་ཀྱི་དྲ་ཐོག་ཀུན་ལ་ཁྱབ་ཡོད་པ་དེ་རེད། ཡང་དེ་འདྲའི་མི་བདུན་གྱིས་སྒྲིག་ཆས་ཀྱང་མ་ཕུད་པར་ཁྱི་ཕྲུག་ཅིག་ལག་འགྲིལ་བྱེད་ཀྱིན་པ་ལ་ཉེན་རྟོག་པ་ཞིག་ཉེ་འཁྲིས་ན་བགད་ནས་ཁ་ཡང་ཀྱོག་བསྡད་ཡོད་པའི་པར་ཞིག་དྲ་ལམ་ཀུན་ལ་ཐོན་ཡོད། འདི་འདྲའི་སྲིད་གཞུང་སྐྱོ་བོ་ཞིག་འདི་འདྲའི་མི་གཞི་རྩ་བྲལ་གྱི་རུ་དཔུང་ཞིག་དངོས་གནས་སྙིང་རྗེ་དགོས་པ་རང་ལས་མེད་ནའང་། འདི་ཚོ་ལ་དོགས་ཟོན་ཆེན་པོ་བྱེད་དགོས་པའང་འདི་དག་གིས་ཀྱང་དཔོག་ཐུབ་པ་ཞིག་རེད།
༤༽ ཟ་འཐུང་དཀའ་ངལ་གྱི་གནས་སྟངས་དང་བསྐྱར་གསོ་ལེགས་གྲུབ་ཀྱི་དྲིལ་བསྒྲགས།
ཟ་འཐུང་གི་དཀའ་ངལ་མ་སེལ་སྔོན་དུ་རྒྱ་གཞུང་གིས་ཧམ་རྫུན་ཆེན་པོས་ཏང་ཀྲུང་དབྱང་གི་ཐུགས་ཁུར་དང་ཕོན་ཆེ་བའི་གཏོང་ཕོད་ཀྱི་སྐུ་དྲིན་ལས་ད་ནི་གནོད་འཚེ་ཐེབས་པའི་ས་ཁུལ་ལ་རོགས་སྐྱོར་འདང་ངེས་སུ་ཐོན་པ་དང་། ད་ནི་ཁང་བ་གསར་རྒྱག་དང་སློབ་གྲྭ་གསར་འཛུགས། ལས་ཁུངས་གསར་རྒྱག་སོགས་ཀྱི་འཆར་གཞི་འདིང་གིན་ཡོད་རབས་ཀྱི་དྲིལ་བསྒྲགས་བྱེད་ཀྱིན་ཡོད། དོན་ལ་དེ་འདྲ་ཞིག་གཏན་ནས་མིན་པར་ད་དུང་ཟ་རྒྱུ་གོན་རྒྱུའི་དཀའ་ངལ་འཕྲད་དེ་ཉིན་གཅིག་གཉིས་རེ་ལ་ཟ་མ་མ་ཟོས་ཟེར་མཁན་འདུག་ལ། གཙབ་ཧྲིལ་གྱི་ལྭ་བ་བརྗེ་རྒྱུ་མེད་མཁན་དང་། འདུག་ས་འཆག་སའི་སྦྲ་གུར་ཚུན་ཆད་ཀྱི་དཀའ་ངལ་འཕྲད་བཞིན་པ་ང་ཚོས་མིག་གིས་དངོས་སུ་མཐོང་བ་དེ་ལྟར་རེད། དཔེར་ན། ཁྲ་འགུ་དགོན་པའི་དགེ་འདུན་པ་ཞིག་གིས་དགོན་པ་ལ་ཟ་རྒྱུ་དང་སྦྲ་གུར་མ་འདང་བའི་དཀའ་ངལ་ཡོད་རབས་བཅར་འདྲིའི་བརྒྱུད་ལམ་ནས་དངོས་སུ་བཤད་པ་དང་། ཐ་ན་ཟི་ལིང་ལ་ཐོན་ཚར་བའི་ནད་པ་རྣམས་ལའང་ཟ་འཐུང་དང་གོན་རྒྱུའི་དཀའ་ངལ་འཕྲད་དེ་སློབ་ཆེན་སློབ་མ་ཚོས་རང་རང་གི་ཉལ་ཁང་ནང་ལ་སོང་ནས་འོག་འཇུག་ཚིལ་ལེན་དང་ལྷམ་སོགས་བསྡུས་ནས་ནད་པ་ཚོར་རེ་རེར་བཞིན་སྐྱེལ་བཞིན་ཡོད་པ་དང་། བོད་ནང་གི་ཤེས་ཡོན་པ་ཚོས་ཀྱང་ད་ནི་དགོན་སྡེ་ཁག་གིས་ཟ་མ་དང་གོན་རྒྱུའི་རིགས་བསྡུ་རུབ་ཀྱིས་ས་ཁུལ་ལ་དངོས་སུ་འབྱོར་ཐབས་བྱེད་རྒྱུ་ཧ་ཅང་གལ་ཆེ་རབས་བརྒྱུད་ལམ་ཁག་ན་ཤུགས་ཆེན་པོས་བཤད་ཀྱིན་པ་ནི་གཞི་འཛིན་ས་མེད་པ་ཞིག་གཏན་ནས་མ་རེད།
༥༽རྡིབ་སླ་བའི་ཁང་བ་དང་གསང་དཀའ་བའི་འཐུས་ཤོར།
སྤྱི་ལོ་༢༠༠༨ ལོར་ས་ཡོམ་ཞིབ་འཇུག་པ་ཧྲང་ཌི་ལང་གིས་སྔོན་བརྡ་སྣང་མེད་བཏང་སྟེ་གཞུང་གི་དུས་ཐོག་ཁྱབ་བསྒྲགས་མ་བྱས་པ་བཞིན་ཐེངས་འདིར་གུང་ཁྲན་ཏང་གིས་བསམ་བཞིན་ནམ་འཐུས་ཤོར་གང་ཡིན་ཐག་གཅོད་དཀའ་མོད། ད་ལོར་ཡང་རྒྱ་ནག་གི་ས་ཡོམ་ཞིབ་འཇུག་པ་ཡཱུས་ཤན་ཀོང་གིས་ཚེས་༡༣ཉིན་རྒྱ་ནག་ས་ཡོམ་ལྷན་ཚོགས་དང་། ས་ཡོམ་དྲ་བ་གཉིིས་ཀར་ཚེས༡༣ནས་༡༧བར་སྐྱེ་རྒུ་ལ་ས་ཡོམ་རྒྱག་སྲིད་པའི་སྔོན་བརྡ་བཏང་སྟེ་འབྱོར་ལན་ཚུན་ཆད་བཏང་ཡོད་ནའང་གཞུང་གིས་དུས་ཐོག་ཁྱབ་བསྒྲགས་བྱས་མེད་པ་དེ་རེད། ས་ཡོམ་རྒྱག་ཉེན་གྱི་སྔོན་བརྡ་རྒྱ་ནག་གཞུང་དང་ས་ཡོམ་ལྷན་ཚོགས་ནས་ཁྱབ་བསྒྲགས་མ་བྱས་ན་མི་སྒེར་གྱིས་རང་འདོད་ཁྱབ་བསྒྲགས་བྱས་མི་ཆོག་པ་རྒྱ་ནག་རྩ་ཁྲིམས་ཀྱི་ཐམ་ཀ་ཡིན་པ་བཅས་ཀྱི་སྟེང་ནས་ཐེངས་འདིར་རྒྱ་ནག་ལ་ལན་པ་ཡོད། གཞན་ཁང་བ་ཡིི་སྤུས་ཀ་ཞན་པ་དེའང་ཕྱོགས་གཅིག་རེད་དེ། དེ་ནི་ཁང་བ་དམིགས་བསལ་བ་ཁ་ཤས་མ་གཏོགས་རྒྱ་ནག་གི་ས་ཁུལ་སྤྱི་ཡོངས་ལ་དེང་སང་ཁང་བ་རྒྱག་ལུགས་དེ་འདྲ་རེད། གནའ་བོའི་བོད་ཁང་ཡིན་ན་ཤིང་གི་འཕལ་ཁ་སྒྲོག་ཡོད་པའི་ཆ་ནས་མགྱོགས་པོར་རྡིབ་ཐུབ་ཀྱི་མེད། དེང་སང་གི་ཨར་འདམ་གྱི་ཁང་བར་རྩིག་གསེང་ལ་ལྕགས་དང་ཁང་ཀླད་ལ་ཨར་འདམ་བླུགས་པའི་རིགས་མགྱོགས་པོར་རྡིབ་ཐུབ་ཀྱི་མེད་ནའང་། དེང་སང་རྒྱ་ནག་གི་ཁང་བ་མང་པོ་ཞིག་རྩིག་པ་ཁཱོང་ཧྥང་ཀྲིན་ཟེར་བའི་ཨར་འདམ་བླུགས་མ་ཁོག་སྟོང་ཞིག་་དང་། ཁང་ཀླད་དུའང་ཨར་འདམ་བླུགས་མའི་རྡོ་ལེབ་དེ་འཕྲེད་འཇོག་བྱས་ཡོད་པའི་ཆ་ནས་ལོག་ཆོག་ཆོག་དང་བསད་ཆོག་ཆོག་ཅིག་ཡོད་པ་རེད། དེ་ནི་སྤྱིར་ཁང་བ་དེ་དག་མི་སེར་གྱི་བདེ་སྐྱིད་དང་ཚེ་སྲོག་ཆེད་དུ་མིན་པར་སྒོར་མོའི་ཆེད་དུ་བཟོ་ཐུབ་བྱེད་ཀྱིན་པ་ལ་ཐུག་འདུག་མོད་སྐབས་འདིར་དེ་ཙམ་འབྲེལ་མེད་པ་འདྲ།
འདི་འདྲའི་འཇིགས་སུ་རུང་བའི་གོད་ཆག་ནི་ང་ཚོ་ཙམ་མིན་པར་ང་ཚོའི་མི་ཐོག་འདི་ལའང་རྒྱལ་ཁབ་གཞན་དང་མི་རིགས་གཞན་ལ་མང་དུ་བྱུང་ཡོད། དཔེར་ན། ཨ་རི་ལ་ཁང་བ་བརྡབས་སྐྱོན་བྱུང་བ་དང་། བུན་ཁྲན་ལ་ས་འགུལ། ཐེ་ཝན་ལ་ཆུ་ལོག་བཅས་ཀྱི་གནོད་འཚེ་བྱུང་བ་རེད། དེ་དག་ཡོད་ཚད་ཀྱང་བརྙན་འཕྲིན་བརྒྱུད་ནས་ང་ཚོའི་མཐོང་ལམ་ལ་བརྒྱུད་མྱོང་བ་རེད་དེ། དེ་དག་གི་མི་སེར་ཚོ་ཕོ་མོ་དབྱེ་བ་མེད་པར་ངུ་འབོད་བྱེད་པ་སོགས་ལུས་ངག་ཡིད་གསུམ་གྱི་རུས་པ་འཐོར་ཞིང་དྲང་ཚུགས་ཀྱི་ནུས་པ་བྲལ་བའི་ངང་ཚུལ་ནི། བལྟས་བསྡད་ན་ཡིད་འཁུལ་འཁུལ་གྱི་སྙིང་རྗེ་དང་སེམས་རློང་རློང་གི་སྙིང་ནད་སློང་བ་ཞིག་རེད་ལ། ཚུལ་དེར་ཕྱོགས་གཅིག་ནས་བསམ་བློ་བཏང་ན་ཚོར་བ་ཅན་གྱི་ཡན་ལག་ཤ་ཉོག་རུས་ཉོག་དང་། བརྩེ་བ་ཅན་གྱི་ཕུ་ནུ་བཅད་གཏུབ་གཅུར་གསོད། དྲོད་ཁུལ་ཆེ་བའི་རང་ཁྱིམ་གཞི་མེད་རྩ་བྲལ་བྱས་པ་རེད།
ཡང་ཕྱོགས་གཅིག་ནས་བལྟས་ན་རིག་གནས་ཀྱི་ཤུགས་རྐྱེན་དང་སྙིང་ཁུང་གི་རུས་པ་ལའང་འབྲེལ་བ་དམ་ཟབ་ཡོད་ཚོད་འདུག དེ་དག་ནི་དེ་རིང་གི་ང་ཚོའི་འདས་གསོན་སྤུན་ཟླ་ཚོར་སྦྱར་ནས་བལྟས་ན་རིག་གནས་ཀྱི་ཧེ་བག་དང་དེའི་གཙོ་སྐྱོང་འོག་གི་མིའི་འདུ་ཤེས་དང་སྙིང་སྟོབས་མི་འདྲ་བ་ཧ་ཅང་གི་གསལ་བོ་ཞིག་རེད། ཆག་སྒོ་འདིའི་འཇིགས་རུང་གི་དོན་རྐྱེན་ཁྲོད་དུ་པར་ཆས་བརྒྱ་ཕྲག་བརྒལ་བའི་སྒེའུ་ཁུང་ཉིན་མཚན་དབྱེ་མཚམས་མེད་པར་གནམ་ས་གཉིས་ནས་འདི་ཚོར་གཏད་དེ་ཡོད་ལ། ལྷག་པར་རྒྱ་དམར་གཞུང་གིས་ཆེད་མངགས་གསར་འགོད་པ་དག་གིས་ང་ཚོའི་སྡར་གཤིས་རེ་ཨེ་མཐོང་གི་འབད་པ་ལྷུར་ལེན་གྱིན་ཡོད་མོད། བྱིས་པ་དང་བུད་མེད་གཅིག་གཉིས་རེ་ལས་མིག་ཆུ་འཆོར་བའི་སྐྱེས་པ་ཞིག་གཏན་ནས་མཐོང་རྒྱུ་མེད་པ་མ་ཟད། ད་དུང་འཛུམ་ཆུང་གྲོལ་བཞིན་རོགས་སྐྱོར་གནང་མཁན་གྱི་སྤུན་ཟླ་ལ་”ཐུགས་རྗེ་ཆེ་”ཞུ་མཁན་དང་། ཡན་ལག་བཅད་ནས་ས་ལ་དྲུད་ཡོད་ནའང་བཟོད་བསྲན་ཆེན་པོས་”གཞན་དག་ལ་རོགས་སྐྱོར་རེ་བྱེད་ཐུབ་ན་ང་ལ་སྐྱོན་མི་འདུག་”ཅེས་སྨྲ་མཁན་བརྒྱ་ཁ་གཅིག་གྲགས་ཀྱི་ཚུལ་དུ་ཡོད་པ་ནི་བློ་ཡིད་ལས་བརྒལ་བའི་དཔའ་རྟགས་འགྲན་ཟླ་མེད་པ་ཞིག་རེད།
ཆག་སྒོ་འདི་འདྲ་བྱུང་ནའང་ང་ཚོའི་སྤུན་ཟླ་ཚོའི་ད་དུང་གདོང་གི་འཛུམ་ཞིག་གི་མེད་པ་དང་། སྐྱོ་བའི་མིག་ཆུ་འཐོར་གི་མེད་པ་ནི་ང་ཚོའི་མི་རིགས་ལ་ཚོར་བ་མེད་སོང་བ་མིན་པར་གནད་འགག་གི་སྐབས་ཀྱི་མི་རིགས་འདིའི་འབྲོང་གི་གཤིས་ཀ་དང་། གནད་འགག་གི་སྐབས་ཀྱི་མི་རིགས་འདིའི་བྱང་ཆུབ་སེམས་ཀྱི་དཔའ་རྟགས་ཤིག་སྟེ། ཆོས་རྒྱལ་བཀའ་དྲིན་ཅན་དག་གི་གསེར་དངུལ་རིན་ཆེན་དང་། ཚོར་བཅས་ཟུངས་ཁྲག་ཕངས་མེད་དུ་བཏང་སྟེ་ནང་འདྲེན་བྱས་པའི་རིག་གནས་ཤིག་གི་ཆེས་རྩ་ཆེ་བའི་བླ་དང་སྲོག་ལོས་ཡིན། འདི་ནི་ངའི་མི་རིགས་ཀྱི་ཤེས་རབ་ཀྱི་ཟབ་ཚད་དང་མི་གཞིའི་བཟང་ས་ལོས་རེད། སྐབས་འདིར་ང་སྔོན་ཆད་གད་མོ་བགད་མྱོང་བའི་དོན་རྐྱེན་ཞིག་སྟེ། ཕྱི་རྒྱལ་གྱི་ཚིག་མཛོད་ཅིག་གི་ནང་དུ་མི་ཟེར་བའི་རིན་ཐང་བཤད་བཤད་པའི་མཐར། དེ་འདྲའི་མི་ནི་དཔེར་ན་བོད་མི་ལྟ་བུའོ་ཞེས་བཤད་པ་དེའང་གཞི་འཛིན་ས་ཞིག་འདུག་སྙམ་པའི་སེམས་ཚོར་བྱུང་།
རྒྱ་འདི་བ་ཚང་གིས་ད་ལྟ་བར་ཏུ་གཉོམ་པོ་ལ་དྲག་རྡུང་དང་། བཙན་པོ་ལ་སྐྱག་རྫུན་གྱི་གོང་བསྒྲིགས་ནས་ཡར་ལངས་པ་ཡིན་པ་ཤེས་གསལ་བཞིན་ང་ཚོས་འདི་དག་གི་གཡོ་བྱུས་ལ་བསམ་རྟོག་ནན་མོ་བྱས་ཏེ་ཐེངས་འདིའི་དོན་རྐྱེན་ཆབ་སྲིད་ཀྱི་དགོས་མཁོ་ཞིག་དང་རྩེད་མོ་ཞིག་ལ་མི་འགྱུར་བའི་ཐབས་བྱུས་ངེས་པར་བསྒྲིག་དགོས་ཀྱི་འདུག གནའ་ནས་ད་ལྟའི་བར་གྱི་རྒྱ་ནག་སྲིད་གཞུང་གི་རློམ་རྒྱུ་མེད་པའི་བྱ་བྱེད་ལུས་གསུམ་ལ་ཕྱིར་འདང་དང་། ན་ནིང་བུན་ཁྲོན་ལ་ས་ཡོམ་གྱི་ཚ་ཚ་འུར་འུར་གྱི་གནས་ཚུལ་མཇུག་མ་སྒྲིལ་སྔོན་ལ་སྲིད་གཞུང་རང་གིས་རོགས་སྐྱོར་དངུལ་རྐུ་འཁྱེར་བྱས་པའི་གནས་ཚུལ་ཐོན་པ་དང་། རོགས་དངུལ་དག་ཁག་ཡར་དཀྲི་མར་དཀྲི་བྱས་ནས་ཆ་ཚང་ས་གནས་ལ་མ་བཏང་བའི་སྟེང་བུན་ཁྲོན་གྱི་མི་སེར་ཚོ་སློང་མོར་སོང་ནའང་སྲིད་གཞུང་གི་མཚན་སྙན་ལ་གནོད་པར་དོགས་ནས་ཆད་པ་བཅད་པ་ལྟ་བུ་ནི་ང་ཚོས་ངེས་པར་འདང་རྒྱག་དགོས་པ་ཞིག་རེད། ལྷག་པར་ཐེངས་འདིའི་སྲིད་གཞུང་གི་ཞལ་འདེབས་འབུལ་ཡུལ་གྱི་རྩ་འཛུགས་མི་སྣའི་ཁྲོད་ན་ལི་ཡེས་ཧྲིན། ལོ་ཨེ་ཕིན། མོ་ཁྲུང་ལོ། མ་ཀོས་ཡིན། ཧོང་ལིས་མིན། ཚོ་པིན་ཟེར་བ་སོགས་རྒྱ་མི་ཤ་སྟག་ལས་བོད་པ་གཅིག་ཀྱང་མེད་པ་དེ་དོགས་པའི་གནས་ཆེན་པོ་ཞིག་རེད།
སྤྱིར་ཡིན་ན་རྒྱ་ནག་གཞུང་གིས་ཐེངས་འདིར་༸གོང་ས་མཆོག་ས་ཐོག་ལ་ཕེབས་ཆོག་མི་ཆོག་གི་སྐད་ཆ་ཞིག་གང་ན་ཡོད། བརྡབས་སྐྱོན་ཆག་སྒོ་བྱུང་བའི་མི་རིགས་དེ་ཏཱ་ལའི་བླ་མའི་མི་རིགས་ཡིན་པ་དང་། མི་རིགས་དེ་འཇིགས་སྐྲག་གི་སྐབས་སུ་གློ་སྙིང་བྲང་གསུམ་གཏོད་ས་༸གོང་ས་མཆོག་གཅིག་པུ་ཡིན་པ་སོགས་ཀྱི་ཆ་ནས༸གོང་ས་མཆོག་ལ་ཐུགས་གསོ་ཤིས་འཕྲིན་འབུལ་དགོས་པ་རེད། དེ་ལྟར་ཕུལ་ན་མི་རིགས་ཀྱི་སེམས་གསོ་ངོ་མར་འགྱུར་བ་ལས་གཞས་པ་གཞས་མ་སྐྱ་སྟོང་ཚོ་བོས་ནས་གཞས་གཏོང་གི་འཇུག་པ་དང་། དམར་ཕྱོགས་དཔོན་པོ་ཚོ་སོང་ནས་ཐལ་མོ་སྦྱོར་བ་སོགས་ཆོས་ལུགས་ཀྱི་ཆོ་ག་འཁྲབ་ན་རིག་གནས་སེམས་ཁམས་དབང་གིས་སྤུན་ཟླ་ཚོའི་ཐུགས་ཕམ་པ་ལས་ཐུགས་གསོ་བའི་ཆ་རྐྱེན་ཞིག་ལ་གཏན་ནས་འགྱུར་མི་སྲིད། དེའི་ཕྱིར་སྤྱོད་ཚུལ་འདི་དག་ནི་དཀའ་ངལ་ཁ་སྣོན་བྱས་པ་ཞིག་ལས་དཀའ་ངལ་མཉམ་སེལ་བྱས་པ་ཞིག་ག་ལ་ཡིན།
ཡང་དེང་སང་གསར་ལམ་ཁག་ལ་ཐོན་པའི་གནས་ཚུལ་ཞིག་ལ། སྐྱེ་རྒུ་མདོ་དང་སྐྱེ་རྒུའི་ཉེ་འགྲམ་གྱི་ས་གནས་གང་སར་དམག་མི་བཀྲམ་ནས་རོགས་སྐྱོར་གནང་མཁན་གྱི་དགེ་འདུན་པ་ཚོ་ཕྱིར་འབུད་བྱེད་ཀྱིན་པ་མ་ཟད། དེ་ཡང་དོ་ནན་གྱི་སྒོ་ནས་”ཁྱོད་ཚོས་ག་རེ་ཡིན་ན་བྱས་སོང་། ཧ་ཅང་གི་ཐལ་དྲགས་པ་རེད། ད་མྱུར་མགྱོགས་ཀྱིས་སོ་སོའི་ས་གནས་སུ་ལོགས་རྒྱུགས དེ་མིན་ན་རྙོག་དྲ་ཡོང་གི་རེད”སོགས་འཇིགས་སྐུལ་གྱི་བཀའ་ཀྱོན་དང་བཅས་ཕྱིར་འབུད་གཏོང་བཞིན་པ་ནི་སྤུན་ཟླ་ཚོའི་སེམས་ལ་སྐྱོ་བ་བརྩེགས་མར་བྱས་པ་ཞིག་ཡིན་པ་ནི་སྨྲ་མ་དགོས་པ་ཞིག་སྟེ། དཔེར་ན། ཨ་མ་ལོ་ལོན་ཞིག་གིས་གྲྭ་བ་ཚོར་ཐལ་མོ་སྦྱར་ནས”གསོལ་བ་སྨོན་ལམ་འདེབས་ཡུལ་གྱི་སྐྱབས་གནས་ཚོ་དུས་ཚོད་ཏག་ཏག་ལ་སླེབས་སོང་། ཁྱོད་ཚོས་འདི་ཕྱི་གང་དུའང་མི་བསླུ་གི”ཞེས་དང་”ས་ཡོམ་ལ་སྐྲག་གི་འདུག ད་དུང་དམག་མི་རིག་ནའང་སྐྲག་གི་འདུག ཡིན་ནའང་། དམག་མི་འདི་ཚོའི་ལག་ན་མེ་མདའ་མི་འདུག ”ཅེས་བརྗོད་པ་སོགས་ལས་ཀྱང་རྒྱ་ནག་བྱེད་སྟངས་དེས་སེམས་ལ་ཕོག་ཐུག་གཏོང་བ་ནི་སྨྲ་མ་དགོས་པ་ཞིག་རེད། སེམས་ཀྱི་འདུ་ཤེས་ལ་གནོད་པའི་བྱེད་སྟངས་འདི་དག་ནི་འབྲོང་གི་གཤིས་རྒྱུད་ཅན་གྱི་བོད་པ་ཚོར་མཚོན་ན། ཡན་ལག་བཅད་པ་ལོས་ཀྱང་ཟུག་གཟེར་ཆེ་བ་དང་བཟོད་དཀའ་བ་ཤ་སྟག་སྟེ། ན་ནིང་ ༢༠༠༨ ལོར་བཙོན་ཁང་ལ་སོང་བའི་བོད་པ་ཁ་ཤས་ཀྱིས་ཆེས་བཟོད་པར་དཀའ་བའི་སྡུག་བསྔལ་ནི་ལུས་པོར་མནར་གཅོད་བཏང་བ་དེ་མ་ཡིན་པར་མིའི་འདུ་ཤེས་ཀྱི་སྟེང་ལ་བཙན་འཛུལ་བྱས་པ་དེ་རེད་”ཅེས་ཉམས་མྱོང་དམར་རྗེན་ལ་བཤད་པ་ལྟར་འདི་དག་ནི་མིག་མདུན་དཀའ་ངལ་སེལ་བྱེད་མིན་པར་ལྐོག་ཇུས་ཀྱིས་སྤུན་ཟླ་ཚོ་སྡུག་ལ་གཏོད་བྱེད་ཅིག་ཡིན་པ་ངེས་པར་ཤེས་དགོས་ཀྱི་འདུག།
གང་ལྟར་ཡང་དོན་རྐྱེན་ནི་བྱུང་ཚར་བ་ཞིག་རེད་དེ། ང་ཚོ་ནི་ཤི་བོ་རྗེས་ཀྱི་གསོན་པོ་ཡིན་པས། ང་ཚོས་ཤི་བོ་ཚོར་ཆོས་ཀྱི་རྫོང་བ་ཡིད་ཚིམ་པ་ཞིག་བྱེད་རྒྱུ་དང་། རྨས་སྐྱོན་བྱུང་བ་དང་ཁྱིམ་གཞི་རྩ་འཐོར་བྱུང་བའི་སྤུན་ཟླ་ཚོའི་འཚོ་བ་ལ་ཁག་ཐེག་བྱེད་རྒྱུ་སྟེ་ཕྱོགས་འདི་གཉིས་ནི་འུ་ཅག་ཚང་མས་གཡོལ་མི་རུང་བའི་འགན་འཁྲི་དང་། རྒྱ་གཞུང་གིས་ཀྱང་གཡོལ་མི་རུང་བའི་གནས་ཚུལ་ཞིག་རེད། ཕྱོགས་དང་པོ་དེ་ལ་རྒྱ་གཞུང་གིས་དངོས་སུ་རོགས་རམ་ཞིག་བྱེད་ན་༸གོང་ས་མཆོག་གདན་ཞུས་ཀྱིས་བསྔོ་སྨོན་གསུངས་རྒྱུ་དང་། དེ་མ་བྱུང་ན་བོད་ཆོལ་ཁ་གསུམ་གྱི་ནང་གནས་པའི་གཡུང་དྲུང་བོན་དང་བཅས་པའི་ཆོས་བརྒྱུད་རིས་སུ་མ་ཆད་པའི་བླ་གྲྭ་ཡོངས་རྫོགས་ས་ཐོག་ལ་དངོས་སུ་གདན་ཞུས་ཀྱིས་མ་མཐའ་ཡང་ཟླ་ཕྱེད་ཙམ་ལ་བསྔོ་སྨོན་ཞུ་རྒྱུ་དེ་རེད། རྒྱ་གཞུང་གིས་དེ་ལྟར་མ་བྱས་ན་གྲྭ་བཙུན་ཡོངས་སུ་རྫོགས་པས་རང་བྲོ་རུམ་ལ་བཟུང་ནས་དེ་རུ་མཉམ་འཛོམས་ཀྱིས་སྨོན་ལམ་གསུངས་ཏེ་གསོན་པོ་ཚོ་སེམས་ན་འཁུ་མེད་པ་ཞིག་བྱེད་རྒྱུ་དེ་རེད།
ཕྱོགས་གཉིས་པ་དེར་རྒྱ་དམར་སྲིད་གཞུང་ཁ་བཤད་དོན་ལ་གནས་ན། རོགས་དངུལ་ཁག་གནམ་གྲུའི་གླ་ཆ་ཞེས་ཡར་དང་། ཞབས་ཞུའི་གླ་ཆ་ཞེས་མར་མི་འཐེན་པར་རྒྱལ་ཁབ་ཕྱི་ནང་དང་ཆོལ་གསུམ་ས་ཁོངས་ཡོངས་སུ་རྫོགས་པས་ཞལ་འདེབས་གང་འབྱོར་བ་རྣམས་ས་གནས་ས་ཐོག་ལ་ཆད་ལྷག་མེད་པར་གཏོང་རྒྱུ་དེ་རེད། དེ་ལྟར་བྱས་ན་སྐྱེ་དགུའི་དཔལ་འབྱོར་གྱི་གནས་བབ་སྔར་ལས་ཚད་མཐོ་བོར་མ་སོང་ན་དམའ་བར་མི་འགྱུར་བ་ཐག་གཅོད་ཐུབ་པ་ཞིག་རེད། ཕྱོགས་འདི་ལ་འབྲེལ་ཡོད་ཀྱི་རང་རིགས་་ཤེས་ཡོན་པ་དང་ལས་བྱེད་ཀྱིས་འགན་ཆེན་པོ་མ་ཁུར་ན་རྒྱ་དམར་སྲིད་གཞུང་གིས་ད་ལྟ་ནས་འཆར་གཞི་སྒྲིག་གིན་པའི་རྣམ་པ་ཕྱོགས་གང་ས་ནས་མཐོང་གིན་འདུག་པ་དེ་ལྟར་རེད།
བོད་དང་བོད་ཀྱི་ས་དག་ལ་ས་ཡོམ་བྱུང་བ་ལོ་རྒྱུས་ཡིག་ཆ་ཁག་ལས་རྩར་ཆོད་པ་ཞིག་ལ། སྤྱི་ལོ་ ༦༤༢ ནས་ད་ལོ་ ༢༠༡༠ བར་ཏུ་ཚད་རིམ་བཞི་ཡན་གྱི་ས་ཡོམ་ ༦༡༧ བྱུང་ཡོོད་པ་དང་། སྐྱེ་རྒུ་མདོ་གཅིག་པོར་སྤྱི་ལོ ༡༧༣༡ ལོར་ཚད་རིམ་ ༦ ཅན་གྱི་ས་ཡོམ་ཞིག་བརྒྱབ་པ་དང་། སྤྱི་ལོ ༡༩༧༩ ལོའི་ཟླ་ ༣ ཚེས་ ༢༩ ཉིན་ཚད་རིམ་ ༦.༤ ཅན་ཞིག་བརྒྱབ་པ་དང་། སྤྱི་ལོ་ ༡༩༨༢ ལོའི་ཟླ ༣ ཚེས་ ༧ ཉིན་ཚད་རིམ་ ༥.༢ ཅན་གྱི་ས་ཡོམ་ཞིག་བརྒྱབ་འདུག་མོད། སྤྱི་ལོ ༢༠༡༠ ལོའི་ཟླ་ ༤ ཚེས་ ༡༤ ཉིན་ནས་ཚེས་ ༡༩ བར་ཏུ་ཚད་རིམ་ ༧.༡ ཅན་ཞིག་དང་། ཚད་རིམ་ ༦.༩ ཅན་གཅིག ཚད་རིམ་ ༤.༩ ཅན་གསུམ། ཚད་རིམ་ ༣.༩ བར་ཅན་བརྒྱད། དེ་ལས་དམའ་བའི་ས་ཡོམ་ཆུང་བ་ ༡༡༨༢ བྱུང་ཡོད་འདུག
སྔོན་གྱི་དུས་སུའང་ས་ཡོམ་སྟོང་ཕྲག་ཁྲི་ཕྲག་བརྒྱབ་ཡོད་ཚོད་རེད། ད་ལྟ་ལོ་རྒྱུས་ཡིག་ཚགས་ལས་གསལ་ཁ་ཅན་གྱི་ས་ཡོམ་ཆེ་བ་ ༦༡༧ བརྒྱབ་ཡོད་པའི་ནང་དུའང་ཚད་རིམ ༨ ཅན་དང་ ༨.༧ ཅན་པའང་ཐེངས་ཁ་ཤས་ལ་བྱུང་ཡོད་ནའང་འདི་འདྲའི་མི་ཤི་རྟ་འགྱེལ་གྱི་གནས་ཚུལ་འཇིགས་སུ་རུང་བ་བྱུང་ཡོད་ཚོད་མི་འདུག དེ་ནི་གནའ་མིའི་འཚོ་བ་རོལ་སྟངས་སྟབས་བདེ་བ་དང་། ང་ཚོའི་གཡུ་སྦྲ་སྨུག་ཆུང་གི་ཆེས་ཆེ་བའི་དགེ་མཚན་ཞིག་ལས་གཞན་ཞིག་ལ་བདག་གིས་ངོས་འཛིན་མ་ཤེས་ཐལ། ཡིན་ནའང་། ཁ་སང་གི་ས་ཡོམ་དེར་སྲིན་པོ་ངོ་མ་ཞིག་གཤིས་ཀ་འདུག་ལ་བྱེད་ལས་ཀྱང་ལྡན་པ་དེ་ལྟར་རེད། ང་ཚོ་ལ་འདས་ལོར་མགོ་ཐོག་ནས་མཚོན་གྱི་ཆར་བ་བབ་པ་རེད། ད་ལོ་ཡང་ས་འོག་ནས་ས་ཡི་དུག་མདའ་གཡོས་པ་རེད། ཚུལ་འདི་དག་ལ་ཧོབ་སྟེ་བསམ་ན་ཟས་ཕུད་ཆང་ཕུད་ཀྱིས་བཀུར་བའི་ཡུལ་ལྷ་གཞི་བདག་ཚོར་ཚོགས་གཏམ་གཏོང་འདོད་པ་མ་ཟད། བསླུ་མེད་དཀོན་མཆོག་དང་ལས་འབྲས་ལའང་འཁང་ར་བཤད་འདོད་པ་ཞིག་རེད། ཡིན་ནའང་། ཁ་ཤས་ཀྱིས་གུང་ཁྲན་ཏང་གིས་ཁང་བའི་ནང་དུ་འདུག་པར་བཅུག་པ་མ་འགྲིག་པ་རེད་ཅེས་ངོས་འཛིན་བྱེད་ཀྱིན་འདུག་མོད། གུང་ཁྲན་ཏང་མེད་ནའང་དུས་རབས་ཀྱི་འགྱུར་བའི་དབང་གིས་ད་ལྟ་ནི་ང་ཚོ་ཁང་བའི་ནང་དུ་བསྡད་ལོས་ཡོད། དེའི་ཕྱིར་སྐད་ཆ་དེར་གནས་ལུགས་འདུག་ཅེས་བདག་གིས་བཤད་མ་སྤོབས་ཐལ།
བདུན་པ། ལྷ་བདུད་དུ་བབ་པ་རེད་དམ། ས་ཁོང་ཁྲོ་ལངས་པ་རེད།
ཡང་ཁ་ཤས་ཀྱིས་ས་རྐོ་རྡོ་སློག་བྱས་པ་ལས་རང་བྱུང་ཁམས་ཁོང་ཁྲོ་ལངས་པ་ཞིག་བཤད་ཀྱིན་འདུག་མོད་ཚོར་བ་མེད་པའི་ས་སློག་པ་དང་། ཚོར་བ་མེད་པའི་རྡོ་བཅག་པ་ལས་སྲོག་དབུགས་མེད་པའི་རང་བྱུང་ཁམས་ཁྲོས་པ་རེད་ཟེར་ན་ཧ་ཅང་གི་དགོས་བྲོ་བ་ཞིག་རེད། ས་བདག་གནས་བདག་ཚོ་ཁོང་ཁྲོ་ལངས་པ་རེད་ཟེར་ན་བཤད་སྟངས་ཤིག་ཡོད་པ་རེད་དེ། ་དོན་དངོས་དེ་ལྟར་ཡིན་ན་མི་རབས་ནས་མི་རབས་ལ་ཟས་ཕུད་ཆང་ཕུད་ཀྱིས་བཀུར་བའི་ཁྱི་སྐྱག་དེ་ཚོར་རྒོལ་གཏོང་དྲག་པོ་གཏོང་དགོས་པ་མ་ཟད། དེ་དག་ལ་རྒྱ་དམར་གུང་ཁྲན་ཏང་དང་བྱེད་ལས་དང་ཁོང་ཁྲོ་གཉིས་ཐད་ནས་ཤིན་ཏུ་འདྲ་བོ་མ་རེད་དམ། །
དཔྱད་གཞི: རང་བྱུང་གནོད་འཚེའི་སྐོར་གྱི་བོད་ཀྱི་ལོ་རྒྱུས་ཡིག་ཚགས་དང་། མཚོ་སྔོན་བརྙན་འཕྲིན་དང་དྲ་བ། ཁ་བརྡ་དྲ་དེབ། དུས་བབ་དང་བང་ཆེན་དྲ་བ། འོད་ཟེར་ཟིན་བྲིས། ས་གནས་ལ་རྒྱུས་ཡོད་མི་ཁ་ཤས་ཀྱི་ངག་བརྒྱུད་གླེང་མོལ།
ཀློག་ཁོམ་མ་བྱུང་མོད་་་ཡག་པོ་ཞེ་དྲག་བྲིས་ཡོད་པ་འདྲ།
སྣང་རྒྱལ་ཤེར་དགེ་ལགས། ད་བླ་རྒན་ངས་ཁྱེད་དང་ལྷན་དུ་དོན་མེད་མང་པོ་ཞིག་བརྩད་ན་མི་འདོད་ཀི། དགོངས་དག དེ་ལས་མ་ཎི་རེ་འདོན་པའམ་གསར་འགྱུར་རེ་ཉན་པ་དགའ། ཁྱེད་ཀྱང་དེ་ལྟར་ཡིན་ངེས། སྐབས་གཞན་ཞིག་དང་གྲོས་གཞན་ཞིག་ནས་མཇལ་ཡོང་། བདེ་མོ།
བློ་དབང་ལགས། འདྲ་པར་དེ་དག་མཁོ་ནས་ངས་ཁྱེད་ལ་བསྐུར་ཆོག སྐུ་ཉིད་ཀྱི་གློག་འཕྲིན་ཁ བྱང་གནང་རོགས།
རྭ་རྒྱ་བློ་དབང་ལགས། དྲ་ཚིགས་དེ་དག་གི་ནང་དུ་འདྲ་པར་བདུན་ལས་མེད་ཅེས་མ་བཤད་རོགས། བོད་ཀྱི་དུས་བབས་སོགས་སུ་བཀོད་པའི་འདྲ་པར་རང་གི་ཟུར་དུའང་ཁ་བྱང་དེ་ག་རང་བཀོད་མི་འདུག་གམ། རྒྱ་དམག་གཅིག་ཀྱང་མེད་པའི་འདྲ་པར་དེ་དག་གི་འགྲེལ་བཤད་དུ་རྒྱ་དམག་གིས་རོགས་སྐྱོར་བྱེད་བཞིན་ཡོད་ཚུལ་འབྲི་མི་སྲིད་པ་ནི་རྒྱ་གཞུང་ལྐུགས་པ་མིན་པས་ཀྱང་ཤེས་ཐུབ། གང་ལྟར་ངས་བཤད་འདོད་པ་ནི་གྲྭ་བ་ཚོས་རོགས་སྐྱོར་བྱེད་བཞིན་པའི་འདྲ་པར་ཁྱབ་བསྒྲགས་བྱས་འདུག་པ་དང་། དེ་དག་ནི་མཚོ་སྔོན་བརྙན་འཕྲིན་་དང་རླུང་འཕྲིན་གང་གི ་ཀྱང་ཡན་ལག་མ་རེད། ཕྱོགས་གཞན་ཞིག་ནས་བཤད་ན་མཚོ་སྔོན་བརྙན་འཕྲིན་དང་རླུང་འཕྲིན་གཉིས་ཀྱང་རྒྱ་གཞུང་གི་ལས་ཁུངས་མ་རེད་དམ།
སྐུ་ཞབས་སྣང་རྒྱལ་ལགས། ང་རང་དབྱིན་ཡིག་གི་ཆུ་ཚད་ཧ་ཅང་སྐྱོ་ན་ཡང་། ཁྱོད་ཀྱིས་ངོ་སྤྲོད་བྱས་པའི་དབྱིན་ཡིག་དྲ་ཚིགས་དེར་གྲྭ་བ་ནང་དུ་གསལ་བའི་འདྲ་པར་བདུན་ཡོད་ལ། དེའི་ནང་དུ་སྐུ་རིམ་སྒྲུབ་བཞིན་པའི་འདྲ་པར་དེར་འགྲེལ་བཤད་དང་པར་རིས་གཅིག་མཚུངས་དང་། མི་སྐྱོབ་བཞིན་པའི་པར་གཉིས་ཡོད་པར་འགྲེལ་བཤད་རྒྱག་སྐབས་ཟིན་ཁྲོན་གྱི་དམག་མི་དང་། ས་གནས་ཉེན་རྟོག་པས་མི་བསྐྱབ་ཚུལ་བྲིས་འདུག ཐེངས་འདིར་ས་གནས་མི་གྲངས་སྟོང་དུ་མའི་ཚེ་སྲོག་བསྐྱབས་པའི་དགེ་འདུན་པ་ཚོ་སྲིད་གཞུང་གིས་འགྲེལ་བཤད་འདི་འདྲ་ཞིག་ལས་མེད་པ་ཧ་ཅང་སྐྱོ། ཕྱི་ལོགས་སུ་འབྱོར་བའི་འདྲ་པར་ཕལ་ཆེ་བ་དྲ་ཚིགས་འདི་ནས་འབྱོར་བ་རེད་ཅེས་པ་ནི། དོན་མེད་སར་སྐུ་ཉིད་ཀྱིས་འུད་ཤོབ་ཆུང་ཆུང་གསུངས་འདུག་མོད་སྐྱོན་མི་འདུག རེད་དེ་རྫུན་གྱི་གོམས་གཤིས་དེ་ཆུང་ས་ནས་མ་བཀག་ན་ངན་ལོབས་སུའང་འགྲོ་ངེས། ངས་བལྟས་ན་ཕྱི་ལོགས་སུ་འབྱོར་བའི་པར་མང་ཆེ་བ་མཚོ་སྔོན་རླུང་འཕྲིན་དྲ་བ་གཙོས་པའི་བོད་ཡིག་གི་དྲ་བ་ཁག་ཅིག་དང་། དེ་ལས་ཀྱང་འབྲེལ་ཡོད་སྒེར་གྱི་གློག་འཕྲིན་བརྒྱུད་ནས་འབྱོར་གྱི་ཡོད། ངས་ཀྱང་རྒྱ་གཞུང་གིས་ཐེངས་འདིར་རྒྱབ་ལྗོངས་ཤིག་ནས་ཇུས་ངན་སྦས་འདུག་ཅེས་བཤད་མ་མྱོང་། རྒྱ་གཞུང་གིས་བྱེད་བཞིན་པ་མཐའ་དག་མངོན་གསལ་དོད་པོ་ཤ་སྟག་རེད་ཅེས་ཞུ་འདོད་བྱུང་
རྭ་རྒྱ་བློ་དབང་ལགས། ངས་ཁྱེད་ལ་མཚོ་སྔོན་བརྙན་འཕྲིན་དང་རླུང་འཕྲིན་གྱི་དྲ་ཚིགས་མིན་པའི་དྲ་ཚིགས་ཤིག་ངོ་སྤྲོད་བྱེད། china.org.cn china.com chinanews.com སོགས་ལ་གཟིགས་པར་འཚལ། ཉིད་ཀྱིས་སྐབས་འདིར་བོད་མི་དམངས་ཀྱིས་ཕན་ཚུན་རོགས་སྐྱོར་བྱས་ཚུལ་གསལ་བའི་བརྒྱུད་ལམ་ནི། མཚོ་སྔོན་བོད་སྐད་བརྙན་འཕྲིན་གྱི་ལེ་ཚན་རེ་གཉིས་དང་། རླུང་འཕྲིན་ཁང་གི་རྒྱང་སྒྲོག་དང་དྲ་བ་ཙམ་ཡིན་ཟེར། དེར་བརྟེན་ངས་བོན་བརྒྱ་པ་ལ་བཤད་པ་བཞིན་ཁྱེད་ལའང་འདི་ལྟར་བཤད་འདོད་བྱུང་། ཕྱོགས་ཡོངས་ལ་བལྟས་ཏེ་དངོས་ཡོད་ཀྱི་རྩོམ་ཡིག་སྤེལ་རྒྱུ་གལ་ཆེ་ལ་དེས་ང་ཚོ་ལ་གྱོང་གུད་གང་ཡང་སྤྲོད་མི་སྲིད། ད་ལྟ་ཕྱི་ཕྱོགས་ཀྱི་དྲ་ཚིགས་ཁག་ཏུ་གྲྭ་བ་ཚོའི་གནས་ཚུལ་བཀོད་པའི་པར་ཕལ་མོ་ཆེའི་འབྱུང་ཁུངས་དྲ་ཚིགས་འདི་དག་རེད།
ངས་བོན་བརྒྱ་བས་རྒྱ་ནག་གིས་བོད་ཀྱི་གྲྭ་བཙུན་ཚོས་ས་གནས་སུ་རོགས་སྐྱོར་བྱས་པའི་པར་ཁྱབ་བསྒྲག་བྱེད་ཀྱིན་མི་འདུག་ཅེས་པར་གསལ་བཤད་བྱས་པ་ཙམ་ལས། རྒྱ་ནག་གི་རོགས་སྐྱོར་དང་ཁྱབ་བསྒྲག་གཞན་ཁག་གི་རྒྱབ་ལྗོངས་སུ་སྲིད་ཇུས་གང་ཞིག་སྦས་ཡོད་པ་སོགས་མིན།
དེ་རིང་ཞིན་ཧྭ་གསར་ཁང་གིས་བཤད་དོན། སྲིད་གཞུང་གི་ངོས་ནས་དགེ་འདུན་པ་ཚོ་སྐྱེ་རྒུ་མདོའི་རོགས་སྐྱོར་ལས་དོན་ཐད་ལ་དམ་དྲག་བྱས་མེད་ལ། དགེ་འདུན་པ་ཚོ་ས་ཡོམ་བརྒྱབ་སའི་ས་གནས་ནས་ཕྱིར་ལོག་དགོས་པའི་བཀའ་མངགས་ཡང་བྱས་མེད་ཟེར།
ཨེ་པེ་གསར་ཁང་གིས་བཤད་ན། རྒྱ་ནག་གཞུང་གི་མགོ་ཁྲིད་ཚོས་དགེ་འདུན་པ་ཚོ་ས་ཡོམ་བརྒྱབ་ས་ནས་ཕྱིར་ལོག་དགོས་པའི་བཀའ་མངགས་བྱས་ཡོད། དེའི་རྒྱུ་མཚན་ནི། བསྐྱར་གསོའི་ལས་དོན་སྒྲུབ་པ་ལ་ཆེད་ལས་མི་སྣ་ཡོང་དགོས་ཀྱི་འདུག་ཅེས་བཤད་སོང་ཟེར།
གསར་འགྱུར་འདི་གཉིས་ཀ་ས་གནས་ས་ཐོག་ནས་ནང་འགལ་དུ་གྱུར་འདུག
ཐོག་མར་གྲོགས་པོ་བོན་རྒྱ་ལགས་ཀྱི་རྩོམ་ཡིག་ཡག་པོ་ཞིག་བྲིས་འདུག་པར་དགའ་བསུ་དང་འབྲེལ། ནད་མིང་ཅན་དང་སྣང་རྒྱལ་ཤེར་དགེ་གཉིས་ལ་ཞུ་འདོད་པ་ནི། གོད་ཆག་བོད་ལ་བྱུང་། གོ་སྐབས་དམ་འཛིན་གྱིས་དམངས་སེམས་འགུགས་ཐབས་བྱེད་པ་ནི་ཆབ་སྲིད་པ་ཚོའི་གཤིས་ཁམས་དང་། ཁྱད་པར་དུ་དམངས་གཙོ་དང་འགྲོ་མ་མིའི་ཐོབ་ཐང་གི་གནད་དོན་ཧ་ཅང་ཆེ་བའི་རྒྱ་གཞུང་ལ་མཚོན་དམངས་སེམས་འགུགས་པའི་གོ་སྐབས་ཡག་ཤོས་ཤར་པ་ཞིག་རེད། ཡིན་ན་ཡང། རྒྱ་གཞུང་གིས་ད་རེས་བོད་མི་རིགས་ཀྱི་རིག་གནས་སེམས་ཁམས་དང་། དད་མོས་འདུ་ཤེས། དྲང་ལྡོག་གི་རྣམ་དབྱེ་བཅས་ལ་གཏན་ནས་མི་འཕྲོད་པའི་བྱ་བ་མང་དག་ཅིག་སྒྲུབ་ཡོད་པ་སྟེ། ས་འགུལ་བྱུང་མཚམས་ཡས་མས་ནས་ས་གནས་ས་ཐོག་གི་མི་དམངས་ཚོས་མི་ཅི་འདྲ་བསྐྱབས་པ་དང་། སེར་ཤུལ་སོགས་དགོན་སྡེ་སོ་སོས་མི་ཇི་འདྲ་བསྐྱབས་པ་སོགས་གཏན་ནས་སྒྲོག་གི་མེད། དམག་མིའི་རུ་ཁག་ག་གེ་མོས་མི་གཉིས་བསྐྱབས་པ་དང་། ཏང་ཡོན་ཚོས་དཀའ་ངལ་མྱངས་ཚུལ་རྒྱུན་མ་ཆད་པར་སྒྲོག་གི་ཡོད། སྐབས་འདིར་བོད་མི་དམངས་ཀྱིས་ཕན་ཚུན་རོགས་སྐྱོར་བྱས་ཚུལ་གསལ་བའི་བརྒྱུད་ལམ་ནི། མཚོ་སྔོན་བོད་སྐད་བརྙན་འཕྲིན་གྱི་ལེ་ཚན་རེ་གཉིས་དང་། རླུང་འཕྲིན་ཁང་གི་རྒྱང་སྒྲོག་དང་དྲ་བ་ཙམ་ཡིན། ད་ལྟའི་བར་ཡུའུ་ཧྲུའུ་ནས་གསེར་དང་དངུལ་སོགས་ཀྱི་ཐོན་ཁུངས་བསྔོགས་བཤེར་ཀྱིས་ཏུན་འབུམ་ཕྲག་མང་པོ་རྒྱ་གཞུང་གིས་སྤྱད་ཡོད་པས། ཐེངས་འདིར་ཁོ་ཚོས་བྱིན་པའི་ཐུག་སྐམ་དང་། འགྱིག་ཤོག་གི་སྦྲ་གུར་དེ་ཚོར་དེ་ལྟའི་ངོ་སོ་ཞིག་གཏན་ནས་སྟེར་ཐུབ་བྲལ། གང་ལྟར་རང་ཅག་གི་ནང་མི་འདས་སོང་ཚོ་ཡང་འདི་ལྟར་ཆབ་སྲིད་ཀྱི་གཡོ་འགུགས་ལ་ཅི་ཐུབ་ཀྱིས་དཀྲི་བ་འདི་ནི་རོ་ཐོག་རྟ་རྒྱུག་གི་དཔེ་ལས་མ་འདས།
དྲ་གྲོགས་ནད་པའི་མིང་འཛིན་ཅན་ལགས། ཉིད་ཀྱི་བསམ་ཕྱོགས་ལ་གུ་ཡངས་གཏོང་ཐུབ་ཀྱི་མི་འདུག རྒྱུ་མཚན་ནི། ང་ཚོ་བོད་མི་རིགས་ལ་རྒྱ་མི་རིགས་དང་སྲིད་གཞུང་གིས་རོགས་སྐྱོར་བྱས་པ་དང་གནོད་སྐྱོན་བཟོས་པ་གཉིས་བསྡུར་བ་ཡིན་ན་གནམ་སའི་བར་གྱི་ཁྱད་པར་ཡོད་པ་ལོ་རྒྱུས་དང་ད་ལྟའི་གནས་བབ་ཀྱི་ཐོག་ནས་དངོས་ར་འཕྲོད་པ་ཞིག་ཡིན་དུས། ད་དུང་རྒྱ་ནག་གི་བྱ་སྤྱོད་ཡག་རབས་དང་རྒྱན་རབས་ཟེར་དགོས་དོན་གང་ཡིན་ནམ། དཔེ་ཆུང་ངུ་ཞིག་གི་ཐོག་བལྟས་པ་ཡིན་ན་གསལ་ཐིང་རེད། གང་ཡིན་ཟེར་ན། ང་ཚོ་བོད་མི་རིགས་ཀྱི་བདེ་སྡུག་གི་བརྟེན་གཞི་དང་སྲོག་ཤིང་དུ་གྱུར་པའི་༸གོང་ས་མཆོག་ལ་དེ་བ་ཚང་གིས་མཚན་སྨད་བྱས་པ་ཁོ་ནས་སོས་ཐབས་མེད་པའི་བོད་མི་མང་གི་སེམས་ཁམས་རྨ་ཁ་བཟོས་པ་གྲངས་མེད་ཅིག་རེད་ལ། ང་ཚོའི་རང་དབང་དང་ཐོབ་ཐང་ཅིའི་བཙན་འཕྲོག་བྱས་པ་རེད་དམ། གང་ལྟར་འདི་དང་འདི་ལྟ་བུའི་གནས་ཚུལ་དེ་ང་ཚོའི་བདེ་སྐྱིད་ལ་ངོས་འཛིན་དགོས་པ་རེད་དམ་ཡང་ན་སྡུག་བསྔལ་ལ་ངོས་འཛིན་དགོས་པ་རེད།
དྲ་གྲོགས་ནད་པའི་མིང་འཛིན་ཅན་ལགས། ཉིད་ཀྱི་བསམ་ཕྱོགས་ལ་གུ་ཡངས་གཏོང་ཐུབ་ཀྱི་མི་འདུག རྒྱུ་མཚན་ནི། ང་ཚོ་བོད་མི་རིགས་ལ་རྒྱ་མི་རིགས་དང་སྲིད་གཞུང་གིས་རོགས་སྐྱོར་བྱས་པ་དང་གནོད་སྐྱོན་བཟོས་པ་གཉིས་བསྡུར་བ་ཡིན་ན་གནམ་སའི་བར་གྱི་ཁྱད་པར་ཡོད་པ་ལོ་རྒྱུས་དང་ད་ལྟའི་གནས་བབ་ཀྱི་ཐོག་ནས་དངོས་ར་འཕྲོད་པ་ཞིག་ཡིན་དུས། ད་དུང་རྒྱ་ནག་གི་བྱ་སྤྱོད་ཡག་རབས་དང་རྒྱན་རབས་ཟེར་དགོས་དོན་གང་ཡིན་ནམ། དཔེ་ཆུང་ངུ་ཞིག་གི་ཐོག་བལྟས་པ་ཡིན་ན་གསལ་ཐིང་རེད། གང་ཡིན་ཟེར་ན། ང་ཚོ་བོད་མི་རིགས་ཀྱི་བདེ་སྡུག་གི་བརྟེན་གཞི་དང་སྲོག་ཤིང་དུ་གྱུར་པའི་༸གོང་ས་མཆོག་ལ་དེ་བ་ཚང་གིས་མཚན་སྨད་བྱས་པ་ཁོ་ནས་སོས་ཐབས་མེད་པའི་བོད་མི་མང་གི་སེམས་ཁམས་རྨ་ཁ་བཟོས་པ་གྲངས་མེད་ཅིག་རེད་ལ། ང་ཚོའི་རང་དབང་དང་ཐོབ་ཐང་ཅིའི་བཙན་འཕྲོག་བྱས་པ་རེད་དམ། གང་ལྟར་འདི་དང་འདི་ལྟ་བུའི་གནས་ཚུལ་དེ་ང་ཚོའི་བདེ་སྐྱིད་ལ་ངོས་འཛིན་དགོས་པ་རེད་དམ་ཡང་ན་སྡུག་བསྔལ་ལ་ངོས་འཛིན་དགོས་པ་རེད།
གོད་ཆག་འདིའི་ཁྲོད་དུ་རྒྱ་ནག་དབུས་གཞུང་གི་རོགས་རམ་མེད་ན་ང་ཚོའི་ནུས་པས་འདས་སོན་ཡོངས་ལ་ཇི་ཙམ་གྱིས་རོགས་རམ་བྱེད་བམ། གནད་དོན་འདི་ཆབ་སྲིད་ཅིག་མ་ཡིན་པར་རང་བྱུང་ཁམས་ཀྱི་ཆོས་ཉིད་དང་ལས་འབྲས་ལས་བྱུང་བ་ཞིག་རེད།
དེར་བརྟེན་ང་ཚོས་ད་ཐེངས་རྒྱ་ནག་དབུས་གཞུང་གིས་འདས་སོན་ཡོངས་ཀྱི་ཆེད་དུ་ཕྱོགས་གང་ས་ནས་རོགས་རམས་ཚད་མེད་གཅིག་གནང་བཞིན་ཡོད་པ་དེར་ང་ཚོས་སེམས་ཀྱིས་གཏིང་ནས་རྗེས་སུ་ཡི་རངས་དང་འབྲེལ་ཐུགས་རྗེ་ཆེ་ཞུ་དགོས།
རྒྱ་ནག་དབུས་གཞུང་གིས་བོད་རིགས་ཚོའི་ཆེད་དུ་ཤེས་ཡོན་དང་། སྐད་ཡིག རིག་གཞུང་། སྤྱི་ཚོགས། དཔལ་འབྱོར། འཕྲོད་བསྟེན། ཞིང་ལས། འབྲོག་ལས། ནགས་ཚལ། གནམ་གཤིས། རྩ་ཐང་། རྩེ་ཤིང་། ཚོང་ལས། ཡུལ་བསྐོར། འགྲིམ་འགྲུལ་སོགས་ཕྱོགས་གང་སར་བོད་དེང་རབས་ཅན་གྱི་ཡར་རྒྱས་ཅན་ཞིག་ཏུ་བསྒྱུར་རྒྱུའི་སླད་དུ་ལོ་རེར་རྒྱ་ནག་དབུས་གཞུང་ནས་སྒོར་དུ་ཕྱུར་མང་པོ་མཐོ་སྒང་གི་ཡུལ་དུ་གཏོང་བཞིན་ཡོད་པ་དག་ཧ་ཅང་གི་རྩ་བ་ཆེན་པོ་རེད།
ད་རེས་གོད་ཆག་ཁྲོད་དུའང་མི་རྒྱུ་སོགས་ཕྱོགས་གང་ས་ནས་རོགས་རམ་འདི་འདྲ་གནང་བཞིན་ཡོད་པ་དེར་ང་ཚོས་ཐུགས་རྗེ་ཆེ་ཞུ་དགོས་པ་ལས་དམའ་འབེབ་བྱེད་རྒྱུའི་གནད་དོན་ཞིག་གཏན་ནས་མ་རེད།
བཀུར་འོས་རྩོམ་པ་པོ་བོན་རྒྱ་བསྟན་རབ་ལགས། ཁམས་བཟང་། དངོས་གནས་ཉིད་ཀྱིས་གནད་ལ་འཁེལ་ཞིང་ཕྱོགས་བསྡོམས་རང་བཞིན་གྱི་ཆེད་རྩོམ་ཞིག་སྤེལ་འདུག་པ་ཡི་རངས་དང་དགའ་བ་འཕེལ་བསྐྱེད་བྱུང་། ལྷག་པར་དུ་མཚོ་སྔོན་བརྙན་འཕྲིན་ཁང་གི་འགོ་འཛིན་ལས་བྱེད་ཡོངས་རྫོགས་ཀྱིས་ཐེངས་འདིའི་དོན་རྐྱེན་སྐབས་འདིར་ཉིན་མཚན་ལྟོས་མེད་ངང་ལས་དོན་སྒྲུབ་ཕྱོགས་ལ་ཚད་མཐོའི་ངོས་འཛིན་གནང་བ་ནི་དེ་བས་ཀྱང་གློ་བ་དགའ། གཞན་ཡང་རྒྱ་གཞུང་གིས་གཡོ་སྒྱུ་འཁྲབ་གསུམ་གྱིས་རྣམ་འགྱུར་སྟོན་སྟངས་དང་དོན་དངོས་རོགས་སྐྱོར་ག་འདྲ་ཞིག་བྱས་ཡོད་མེད་གསལ་གསལ་ཐིང་ཐིང་གི་ཕྱིར་སྟོན་བྱས་པ། ད་དུང་བོད་རང་གི་གྲྭ་བཙུན་རྣམ་པའི་གཞན་ཕན་དང་རིགས་མཐུན་སྤུན་ཟླ་རྣམ་པའི་དཀའ་སྡུག་ལག་ལེན་གྱི་ཐོག་ནས་སེལ་ཐབས་སུ་འབད་བརྩོན་བྱས་པའི་སྐོར་ཞིབ་འབྲི་བྱས་ཡོད་པ། གང་ལྟར། སྐུ་ཉིད་ཀྱིས་གནས་ཚུལ་ཕྱོགས་སྒྲིག་བགྱིས་ཏེ་ཆེད་རྩོམ་སྤེལ་པ་ནང་བཞིན་བོད་གཞུང་བདེན་སྲུང་ལས་ཁུངས་ཀྱིས་གཙོས་བྱས་པའི་ཐེངས་འདིའི་ས་འགུལ་དོན་རྐྱེན་ཁྲོད་ལ་ཞིབ་འཇུག་དང་གནས་ཚུལ་ཕྱོགས་བསྡོམས་བྱེད་མཁན་དོན་དངོས་ཀྱི་ག་ཚོད་ཡོད་དམ་སྙམ་པའི་དོགས་འདྲི་ཞིག་རང་ཤུགས་ཀྱིས་ཤོར་སོང་།
བྲེལ་འཚུབ་ཆེ་བའི་བར་གསེང་དུ་རྩོམ་ཡིག་འདིའི་ཕྱེད་ཙམ་བཀླགས་པ་ཡིན། འདིའི་ནང་དུ་རྒྱ་ནག་གཞུང་གིས་བོད་ཀྱི་གྲྭ་བ་ཚོས་ས་ཡོམས་ཀྱི་གོད་ཆག་བྱུང་བའི་ས་གནས་སུ་རོགས་སྐྱོར་བྱས་པའི་གནས་ཚུལ་ཁྱབ་བསྒྲག་བྱེད་ཀྱིན་མེད་པར་བཤད་འདུག དེ་ནི་བདེན་པ་མ་རེད། ཁོ་བོས་གནས་ཚུལ་འདིའི་ཐད་རྒྱ་ནག་གཞུང་གི་དྲ་ཚིགས་ཁག་ལ་དོ་སྣང་ཆེན་པོ་བྱས་པ་ཡིན། དེ་དག་གི་ནང་དུ་གྲྭ་བ་ཚོས་ས་རོ་གཤོངས་བཞིན་པ་དང་བེམ་རོ་ལེན་བཞིན་པ། ཕུང་པོ་མེར་བསྲེག་གཏོང་བཞིན་པ། སྨོན་ལམ་འདོན་བཞིན་པ། སྦྱིན་པ་གཏོང་བཞིན་པ་སོགས་ཀྱི་འདྲ་པར་ཧ་ཅང་མང་པོ་འདུག དེར་མ་ཟད་བོད་དུ་ཁ་པར་བཏང་སྟེ་གནས་ཚུལ་ཤེས་རྟོགས་བྱུང་བར། རྒྱ་ནག་གཞུང་འབྲེལ་གྱི་བརྙན་འཕྲིན་བརྒྱུད་ལམ་ཁག་ཏུ་གྲྭ་བ་ཚོར་བསྔགས་བརྗོད་ཀྱང་བྱེད་ཀྱིན་འདུག་ཟེར། རང་ཉིད་ཕ རོལ་པོར་མི་དགའ་བ་རྒྱུ་མཚན་དུ་བྱས་ནས་ཕ་རོལ་པོར་བསྙོན་འདིང་བ་དང་། ཕ་རོལ་པོའི་བྱ་སྤྱོད་བཟང་ངན་ཀུན་ལ་མི་དགའ་བའི་ཕྱོགས་ངོས་ནས་སྡང་མིག་གིས་བལྟ་བ་ནི་དྲང་བདེན་ཞིག་མ་རེད། ལྷག་པར་དུའང་རྩོམ་པ་པོ་ཞིག་གི་གཤིས་ཀ་མ་རེད། སྡུག་ས་ནས་བཤད་ན་བྱ་ཐབས་འདི་རིགས་གཞན་གྱི་ལག་ཆར་གྱུར་ཏེ་རང་མགོ་གཅོག་པའི་ཐོ་བ་རུ་འགྱུར་ཉེན་ཡོད་ལ། ང་ཚོའི་དཔེ་མཚོན་དུ་འཇོག་པའི་ཉེན་ཁའང་ཡོད། དེར་བརྟེན་ཕྱོགས་ཡོངས་ལ་བལྟས་ཏེ་དངོས་ཡོད་ཀྱི་རྩོམ་ཡིག་སྤེལ་རྒྱུ་གལ་ཆེ་ལ་དེས་ང་ཚོ་ལ་གྱོང་གུད་གང་ཡང་སྤྲོད་མི་སྲིད།
བོན་རྒྱ་ལགས་ཐུགས་རྗེ་ཆེ།མ་གོ་མ་ཤེས་པ་མང་པོ་ཞིག་ཤེས་སོང་།ལྷག་པར་དུ་བྱིས་པ་དེས་རྒྱལ་བ་ཚང་དབྱངས་རྒྱལ་ཚོའི་མགུལ་གླུ་ལེན་པ་ལ་ང་རང་ཡང་བླ་ོབདེ་བ་ཞིག་ངུས་པ་ཡིན།ང་ས་མཐའ་ཡོད་མི་ཞིག་གིས་བྱེད་ཡག་དེ་ལས་མི་འདུག།གཞིས་བཞུགས་བོད་རིགས་སྤུན་ཟླ་སྐྱིད་སྡུག་མཉམ་མྱོང་བྱེད་མཁན་ཚོ་ལ་བསྐྱར་དུ་ཐུགས་རྗེ་ཆེ་ཞུ་རྒྱུ་ཡིན།
བོན་རྒྱ་ལགས། འདི་འདི་ཀློག་གིན་ཀློག་གིན་ས་འགུལ་བྱུང་རྗེས་བདུན་ཕྲག་གཅིག་རིང་གི་ལས་བསྡོམ་འདྲ་བོ་ཞིག་འདུག ཡིན་ནའང་ཞིབ་ཚགས་པོ་དང་དོ་སྣང་ཡག་པོ་གངནང་འདུག དེ་དང་མཉམ་རྐྱེན་ངན་འདིས་བསྐྲུན་པའི་དྲང་ཕྱོགས་དང་ལྡོག་ཕྱོགས་ཀྱི་ནུས་གང་ཐོན་ཡོད་པ་ཁ་གསལ་འབྲི་ཐུབ་ན་ཡག་ས་རེད།
བསམ་བློ་ཞིབ་མོས་དཔྱད་འདུག
དོན་དག་ཞེ་དྲག་རང་མེད་པ་གང་ཞིག་ལ་ཚིག་རྙོག་མང་པོ་མང་པོ་ཞིག་བྲིས་འདུག དམིགས་བསལ་ཁྱད་ཆོས་འདྲ་ཞིག་མིན་ནམ།