སོ་སོར་ཐོབ་དགོས་པ་དེ་རང་བཞིན་གྱིས་སླེབས་འོང་གི་རེད།

བཙན་བྱོལ་བོད་གཞུང་གིས་ད་ལྟའི་བར་སྐྱབས་གནས་དགེ་འདུན་གྱི་སྡེ་ལ་ཞབས་ཕྱི་གང་བསྒྲུབ་པ་དེ་བཞིན་ཇོ་ནང་བར་ཡང་བསྒྲུབས་པ་ཡིན་ལ། མ་འོངས་པར་ཡང་ཇོ་ནང་བར་ཞབས་ཞུ་བསྒྲུབ་ངེས་ཡིན་ཞེས་ཆོས་རིག་བཀའ་བློན་མཆོག་གིས་གསུངས་ཡོད།

ཕྱི་ཚེས་ ༢༩ ཉིན་གྱི་ཞོགས་པར་འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་གོ་སྒྲིག་འོག་གངས་སྐྱིད་སྤྱི་ཐབ་ཚོགས་ཁང་དུ་སྐུ་མགྲོན་གཙོ་བོ་བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་གཙོས་བཀའ་ཟུར་རྣམ་པ། འཕགས་ཡུལ་ཇོ་ནང་དགོན་གྱི་བླ་ཆེན་དང་ཆོས་རྒྱུད་ཁག་གི་སྤྱི་འཐུས། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་ཚོགས་མི་འདུ་འཛོམས་ཐོག་འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཞེས་པའི་ཚོགས་པ་གསར་འཛུགས་དབུ་འབྱེད་གནང་ཡོད་ལ། མཛད་སྒོའི་སྟེང་ཇོ་ནང་འགྲོ་ཕན་ལྷན་ཚོགས་ཀྱི་སྐབས་དང་པོའི་རྒྱུན་ལས་ཚོགས་གཙོ་ཚང་དབྱངས་རྒྱ་མཚོ་ལགས་ཀྱིས་ལྷན་ཚོགས་འདི་དབུ་འཛུགས་ཀྱི་རྒྱུ་རྐྱེན་དང་དམིགས་ཡུལ། བྱུང་རིམ་སོགས་ཀྱི་སྐོར་ངོ་སྤྲོད་གནང་བ་དང་འབྲེལ་ལྷན་ཚོགས་འདིའི་སློབ་སྟོན་པ་མཆོག་སྤྲུལ་འོད་ཟེར་རིན་པོ་ཆེ་ལགས་ཀྱིས། དཔལ་དུས་ཀྱི་འཁོར་ལོའི་དབང་ལུང་འཁྲིད་གསུམ་མན་ངག་དང་བཅས་པ་གཙོ་བོ་དཔལ་རྒྱལ་བ་ཇོ་ནང་བ་མ་གཏོགས་མེད་པ་དང་། དེ་དག་འཛིན་སྐྱོང་སྤེལ་གསུམ་བྱ་བར་བོད་གཞུང་གི་རྒྱབ་སྐྱོར་མེད་དུ་མི་རུང་བས། མ་འོངས་ཕུགས་རྒྱང་རིང་བོར་དམིགས་ཏེ་ཇོ་ནང་པའི་ཆོས་ལུགས་ཀྱི་ཐོབ་ཐང་ཐད་བཀའ་སྤྱི་གཉིས་ལ་འབོད་སྐུལ་ཡང་གནང་བྱུང་ལ། དེ་བཞིན་འཕགས་ཡུལ་ཇོ་ནང་མ་དགོན་གྱི་རྡོ་རྗེ་སློབ་དཔོན་མཁན་ཟུར་མཆོག་སྤྲུལ་ཆོས་ཀྱི་སྣང་བ་མཆོག་གིས་ཚོགས་པ་འདིའི་འགན་འཛིན་ལྷན་ཚོགས་ཀྱི་རེ་བ་དང་། སྐྱབས་རྗེ་ཁལ་ཁ་རྗེ་བཙུན་དམ་པ་མཆོག་གིས་ཐེངས་འདིའི་འགན་འཛིན་ལྷན་ཚོགས་ལ་བསྩལ་བའི་བཀའ་སློབ་སྒྲོག་སྦྱོང་གནང་རྗེས།དཔལ་རྒྱལ་བ་ཇོ་ནང་བའི་བསྟན་པའི་འཛིན་སྐྱོང་སྤེལ་གསུམ་བྱས་དང་བྱེད་བཞིན་པའི་ཡུལ་གྲུ་ཁག་ངོ་སྤྲོད་དང་། ཇོ་ནང་བའི་བསྟན་པས་བོད་བསྟན་པ་ཆབ་སྲིད་ལ་ཕན་འབྲས་གང་འདྲ་བྱུང་ཡོད་མེད་དང་མ་འོངས་བོད་རང་དབང་དང་ཆོས་སྲིད་གཉིས་ལ་ཕན་འབྲས་ལ་ནུས་པ་གང་འདྲ་ཞིག་ཐོན་མིན་ལ་དམིགས་ཏེ་ཇོ་ནང་བའི་བསྟན་པར་རྒྱབ་སྐྱོར་དང་ཐུགས་འཁུར་གནང་དགོས་པའི་རེ་བ་དང་འབོད་སྐུལ་གནང་བྱུང།  

སྐབས་དེར་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་ལགས་ཀྱིས་གསུང་བཤད་གནང་དོན།དཔལ་ཇོ་ནང་བར་བོད་མི་མང་སྤྱི་འཐུས་ལྷན་ཚོགས་ནང་ཆོས་རྒྱུད་གཞན་ལ་ཡོད་པའི་ཐོབ་ཐང་དགོས་པའི་ཐད་ལོ་བཞི་ལྷག་གི་སྔོན་ནས་ཞུ་གཏུག་བྱེད་མཁན་བྱུང་བ་རེད། ཕྱོགས་གཅིག་ནས་སྤྱི་འཐུས་ལྷན་ཚོགས་ཀྱི་བྱེད་བདེ་བོ་ཞིག་ཏུ་སྣང་བས་མ་རེད་ཅེས་བཤད་ཁག་པོར་གྱུར་ཡོད། སྤྱི་འཐུས་ལྷན་ཚོགས་དེ་བོད་མི་མང་གི་འོས་འདེམས་བྱས་པའི་འཐུས་མི་ཡིན་པ་དང་འོས་འདེམས་ཀྱི་དུས་ཡུན་དེའི་རིང་ཁྲིམས་དང་སྒྲིག་གཞི། བཅའ་ཁྲིམས་བསྐྱར་བཅོས་བཟོ་བཅོས་བྱ་རུང་བའི་སྐུ་དབང་ཡོད་པ་གསལ་བོ་རེད།ཡིན་ཡང་། ད་ལྟའི་བར་སྤྱི་འཐུས་ལྷན་ཚོགས་ཀྱིས་ཁྲིམས་དང་སྒྲིག་གཞི་བསྐྱར་བཅོས་ཀྱི་སྐབས་སུ་སྤྱི་འཐུས་མི་རེ་ངོ་རེ་ཡིས་གནད་དོན་གསལ་བོ་རྟོགས་པའི་ཐོག་གཏན་འབེབས་བྱེད་ཀྱིན་པར་ངོས་འཛིན་བྱེད་ཀྱིན་ཡོད། དཔལ་ཇོ་ནང་བའི་སྐུ་ཚབ་འཐུས་མི་ཆོས་རྒྱུད་གཞན་ལྟར་ཐོབ་ཐང་དགོས་སྐོར་ཞུ་སྐབས། ང་ཚོའི་ངོས་ནས་བདག་པོ་རྩ་བ་ནས་མ་བརྒྱབ་པ་མ་ཡིན་པར། སྤྱི་འཐུས་ཀྱི་ཚོགས་འདུ་སྐབས་སུ་བཀའ་མོལ་མང་པོ་བྱུང་ཡོད།ཡིན་ཡང་། སྤྱི་འཐུས་ལྷན་ཚོགས་ནང་བསྐྱར་བཅོས་ཡིག་ཆ་སླེབས་ཐུབ་པ་ཙམ་གྱི་འགྲིག་གི་མེད་པར།གལ་སྲིད། བསྐྱར་བཅོས་བྱ་དགོས་བྱུང་ཚེ་སྤྱི་འཐུས་གསུམ་ཆ་གཉིས་དང་སྤྱི་འཐུས་ ༤༢ ལས་ ༢༨ ཀྱིས་རྒྱབ་སྐྱོར་ངེས་པར་དུ་དགོས་ཀྱིན་ཡོད་སྐོར་གསུང་བྱུང་ལ།ཡང་ཁོང་གིས། མ་འོངས་ཇོ་ནང་འགྲོ་ཕན་ལྷན་ཚོགས་ཀྱི་ངོས་ནས་རིམ་པར་ཕྱག་ལས་གནང་བ་ཡིན་ན། རིམ་བཞིན་ཡག་པོ་ཆག་པའི་རེ་བ་དང་འབྲེལ་བོད་གཞུང་ཆོས་རིག་ལས་ཁུངས་ལ་མི་འགྱངས་པར་ཇོ་ནང་བའི་གནད་དོན་དང་འབྲེལ་བའི་གནས་ཚུལ་ཡིག་ཐོག་ནས་སྤྱི་འཐུས་ལྷན་ཁང་ལ་ཕུལ་དགོས་པའི་འབོད་སྐུལ་ཡང་གནང་བྱུང་།

མཐའ་མར་སྐུ་མགྲོན་གཙོ་བོ་བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས། སྤྱིར་ཇོ་ནང་གི་སྐོར་དེ་ང་ཚོའི་མཁྱེན་དགོས་པ་ཞིག་རེད་ལ། ལྷག་པར་དུ་ང་ཚོའི་གཞོན་སྐྱེས་ཚོས་ནང་པ་སངས་རྒྱས་པ་སྤྱི་དང་ལྷག་པར་ཇོ་ནང་པའི་སྐོར་ལ་མཁྱེན་རྟོགས་བྱ་རྒྱུ་དེ་གལ་ཆེན་པོ་རེད། ལུང་པ་སོ་སོའི་ནང་མི་མང་ཉུང་དང་གྲྭ་པ་མང་ཉུང་ཏན་ཏན་ཡོད་ཀྱང་། མང་པ་དེ་ཡག་པོ་དང་ཉུང་པ་དེ་སྡུག་པོ་ཡིན་པ་ཞིག་ལ་ང་རང་གི་ངོས་འཛིན་བྱེད་ཀྱིན་མེད། ད་ལྟ་ཡོད་བཞིན་པའི་ཆོས་བརྒྱུད་ཆེན་པོ་བཞི་གཙོས་གཡང་དྲུང་བོན་དང་བཅས་པའི་བསྟན་པའི་ནང་དུའང་གྲྭ་བ་མང་ཉུང་གི་གནས་སྟངས་དེ་ཡོད་པ་རེད། ང་ཚོ་སུ་ཡིན་ཡང་ད་ལྟའི་དུས་སྐབས་འདིར་ཕྱག་ལས་གནང་སྟངས་ཀྱི་ཐོག་ནས་རང་ཉིད་ལ་དཀའ་ངལ་ཡོད་བཞིན་པ་དེ་འབུར་ཏུ་བཏོན་ནས་འཁྲུག་པ་དང་རྩོད་པ་རྒྱག་བཞིན་མི་འདུག་པར། ཇོ་ནང་པ་རང་ངོས་ནས་སོ་སོའི་རྐང་པའི་ཐོག་སོ་སོ་ལངས་ཐུབ་པ་ཞིག་དང་། སོ་སོའི་ཞན་ཆ་དང་ཡར་རྒྱས་གཏོང་དགོས་པའི་ཐད་འབད་བརྩོན་བྱས་པ་ཡིན་ན། སོ་སོར་ཡོད་བསྡད་པ་དང་ཐོབ་དགོས་པ་དེ་ཐོབ་ངེས་པ་ཞིག་རེད་ལ། ཉིན་ཞིག་རང་བཞིན་གྱིས་སླེབས་འོང་གི་རེད་ཅེས་གསུང་བྱུང་ལ།

ཡང་ཁོང་གིས།ད་ལྟའི་ཆར་ཇོ་ནང་པ་བཙན་བྱོལ་བོད་མིའི་གཏན་འབེབ་བྱས་པའི་བོད་མི་དམངས་སྤྱི་འཐུས་དང་དེ་དང་འབྲེལ་བའི་ཚོགས་འདུ་ཁག་ཁ་ཤས་ལ་འགྲོ་ཐུབ་མ་ཐུབ་ཙམ་ལས། བཙན་བྱོལ་བོད་གཞུང་ཆོས་རིག་ལས་ཁུངས་ཀྱི་ངོས་ནས།བཙན་བྱོལ་ནང་ཡོད་པའི་དགེ་འདུན་གྱི་སྡེ་ལ་ཞབས་ཞུ་གང་གནང་དགོས་པ་དང་བསྒྲུབ་དགོས་པ་ལས་ཇོ་ནང་ལ་དམིགས་བཀར་གྱི་ལས་དོན་བསྒྲུབ་ཀྱིན་ཡོད་པ་མ་རེད། མ་འོངས་པར་ཡང་བཙན་བྱོལ་བོད་གཞུང་གི་ཞབས་ཞུ་གང་ཡོད་བསྒྲུབ་ངེས་ཚུལ་དང་འབྲེལ། འཆད་རྩོད་རྩོམ་གསུམ་དང་ཐོས་བསམ་སྒོམ་གསུམ་ཐད་འབད་པ་བྱ་དགོས་པའི་རེ་བ་དང་གྲྭ་བའི་ཀུན་སྤྱོད་དང་ཉམས་ལེན་ལ་འབད་བརྩོན་བྱ་དགོས་པའི་སྐོར་གྱི་ལམ་སྟོན་བཀའ་སློབ་གནང་བྱུང་།