ང་ཚོའི་སྤྱོད་ཡུལ་དུ་གྱུར་པའི་དངོས་པོ་མཐའ་དག་ཚད་ཅན་གྱི་རང་བཞིན་ཡིན་ཕྱིར་བྱ་ལས་གང་ཞིག་ཡིན་ནའང་ཚོད་ཟིན་པ་ཞིག་དགོས་ཀྱི་ཡོད།
འོན་ཏེ་ང་ཚོའི་འདོད་རྔམ་ལ་འཚེངས་དུས་མེད་པ་དེས་དཔལ་འབྱོར་ཡར་རྒྱས་སུ་བསྙད་པའི་ལས་རིགས་མང་པོ་ཞིག་གིས་ཁོར་ཡུག་ཉེན་ཚབས་ཅན་དུ་བསྒྱུར་བས་འཛམ་གླིང་སྤྱི་ཡོངས་འཐོར་མི་ཡོང་ངམ་སྙམ་པའི་དངངས་སྐྲག་ནང་ང་ཚོ་སྐྱལ་ཡོད་ལ།
ལྷག་པར་བོད་ཀྱི་ས་ཞབས་སུ་ཆགས་པའི་འཁྱག་རོམ་ཞུ་ཚད་ཧ་ཅང་མྱུར་བས་རིང་མིན་སྟོད་སྨད་ཀྱི་ས་ཆ་མང་པོ་ཞིག་འཁོར་རྡིབ་ཀྱིས་སྣོད་བཅུད་གཉིས་ཀ་ཉམས་ཆག་ཏུ་འགྲོ་རྒྱུ་ཡིན་པ་ས་གཤིས་རིག་པ་བ་རྣམས་ཀྱིས་བཤད་པ་ལྟར། འདི་ལོའི་བཞི་བཅུ་བཞིའི་ཉིན་མོར་ཁམས་སྐྱེ་དགུ་མདོར་ས་ཡོམ་ཐེངས་མང་བརྒྱབས་ཏེ་མི་རྒྱུ་ཟོག་གསུམ་ལ་ཚབས་ཆེའི་ཉེན་ཁ་བྱུང་བ་ན་ཉེན་སྐྱོབ་ཀྱི་རོགས་པ་དང་པོར་སླེབས་པ་ནི་གྲྭ་བཙུན་ཚོ་ཡིན་པ་རེད།
གྲྭ་བཙུན་ཚོའི་མི་ཚེའི་སློབ་སྦྱོང་ནི་ནང་ཆོས་ལས་བྱུང་བའི་གཞན་ཕན་དང་དྲང་བདེན་གྱི་སློབ་གསོ་ཡིན་པ་དེས་སོ་སོའི་ལུས་སྲོག་ཐེད་ལ་བོར་བའི་བསམ་སྦྱོར་གྱིས་ཉིན་མཚན་ལྟོས་མེད་ངང་ཉེན་སྐྱོབ་ཀྱི་ལས་ཀར་ཧུར་བརྩོན་བྱས་པ་སྟེ། གྲྭ་བཙུན་ཚོས་ཕྱོགས་གཅིག་ནས་ས་ཞབས་སུ་ལུས་པའི་ཤི་གསོན་རྣམས་ལོན་ཐབས་བྱས་ཤིང་། ཕྱོགས་གཅིག་ནས་འཐོར་ཞིག་ཏུ་སོང་བའི་རྒྱུ་ནོར་རྣམས་དོ་བདག་སོ་སོར་འཕྲོད་ཐབས་བྱས་ཡོད་ལ། ཕྱོགས་གཅིག་ནས་གཤིན་པོ་རྣམས་བདེ་འགྲོ་འཐོབ་ཆེད་འཕོ་ལུང་དང་བསྔོ་སྨོན། རོ་སྲེག་གི་ཆོ་ག་བྱས་པ་མ་ཚད་རྨས་མ་རྣམས་མྱུར་དྲག་ཡོང་བའི་རིམ་གྲོ་དག་ཀྱང་བྱས་ཡོད། གྲྭ་བཙུན་ཚོས་འཁོར་བའི་གནས་ལུགས་ལ་ཐོས་བསམ་ཡུན་རིང་བྱས་པ་དེས་ཡ་ང་བའི་འཇིགས་སྣང་གིས་སོ་སོའི་ལུས་སེམས་ཚབ་ཚུབ་ཏུ་གྱུར་མེད་ལ།
ཤུལ་ལུས་མི་མང་རྣམས་ལ་གནད་དུ་ཁེལ་བའི་སློབ་སྟོན་བྱས་ཏེ་སེམས་ཤུགས་སྤར་ཡོད།
དགོན་སྡེ་སོ་སོར་ཡོད་པའི་ཟ་ཆའི་རིགས་རྣམས་རླངས་འཁོར་ནང་དབོར་འདྲེན་གྱིས་ཤུལ་ལུས་མཉམ་འདུས་བྱས་པ་དང་བདག་མེད་རྩིག་ཁུག་ཏུ་ལུས་པ་ཚུན་ཆད་རྩད་འཚོལ་གྱིས་སྦྱིན་གཏོང་བྱས་པ་མ་ཚད་དཔེ་ཤག་ཡོད་དོ་ཅོག་ཀྱང་བཏང་བ་སྟེ། དཔེར་ན། གནས་ནང་དཔའ་བོ་རིན་པོ་ཆེས་དགོན་པ་ཞིག་གསོའི་ཆེད་ཞབས་འདེགས་བསྡུ་རུག་བྱས་པའི་སྒོར་མོ་ཡོངས་རྫོགས་སྐྱེ་རྒུ་མདོའི་ས་ཡོམ་གྱི་ཉེན་སྐྱོབ་ཆེད་གནང་ནས་དགོན་པ་ཞིག་གསོ་ཕྱིར་འཐེན་མཛད་པ་དང་། སྐྱོ་བྲག་དགོན་པས་རྒྱ་མིའི་སྒོར་མོ་ཁྲི་དྲུག་ཅུ་ཡས་མས་ཤིག་གི་འགྲོ་སོང་བཏངས་པ་དེས་མཚོན་ཐུབ་ཀྱི་ཡོད།
ནམ་རྒྱུན་བོད་པའི་སྤྱི་ཚོགས་ཀྱིས་གྲྭ་བཙུན་ཚོར་དམིགས་བསལ་མཐོང་ཆེན་བྱེད་པའི་རྒྱུ་མཚན་གང་ཡིན་གསལ་སྟོན་བྱུང་བ་དེས་རྒྱ་ནག་གཞུང་གི་སྙིང་ལ་ན་ཟུག་བྱིན་ཏེ་ཉེན་སྐྱོབ་ཀྱི་ལས་ཀ་མཐའ་མ་ཞོག་གོང་ནས་གཞུང་འབྲེལ་དཔོན་རིགས་ཚོས། ད་ནི་ང་ཚོའི་ཉེན་སྐྱོབ་ཀྱི་དཔུང་དམག་ཕོན་ཆེ་འབྱོར་ཟིན་པས་གྲྭ་བཙུན་ཁྱོད་རང་ཚོ་གང་མགྱོགས་སོ་སོའི་ས་གནས་སུ་རྒྱུགས་ཤིག་ཅེས་བཀའ་བཏངས་པ་དེས་ས་གནས་མི་མང་གི་སེམས་པ་ཤིན་ཏུ་སྐྱོ་ནའང་རང་དབང་མེད་པ་ཡིན།
ཉེན་སྐྱོབ་དམག་མིས་མཚོན་པའི་རྒྱ་རིགས་རོགས་སྐྱོར་བ་དེ་ཚོ་དང་ཐོག་སླེབ་མེད་ལ། བསླེབས་པ་ནའང་བོད་ཀྱི་གྲོང་ཁྱེར་ཅིག་ཤུལ་ཙམ་དུ་སོང་བའི་འཇིགས་དངངས་ཀྱིས་སེམས་ཧད་འཐོར་བ་དང་། ཁོར་ཡུག་མ་འཕྲོད་པས་གཟུགས་པོ་ཉོབ་ཏོར་གྱུར་ཅིང་། གཞུང་གི་བཀའ་མེད་པ་ལྟ་བུས་ཉི་མ་གཅིག་གཉིས་ཤིག་ལ་ཡར་མར་རོགས་རམ་བྱེད་དུ་འགྲོ་མཁན་གྱི་མི་རྣམས་བཀག་འགོག་བཟོས་པ་ཙམ་ལས་ལས་ཀ་གང་ཡང་བྱས་མེད། རྗེས་སུ་ཉེན་སྐྱོབ་ཀྱི་ལས་ཀ་གང་འཚམ་བྱས་ཡོད་ནའང་། གཞན་ཕན་དང་དྲང་བདེན་གྱིས་ཀུན་ནས་བསླངས་པའི་གྲྭ་བཙུན་ཚོ་ལྟ་བུ་མ་ཡིན་པར་སྲིད་གཞུང་གི་དགོས་དམིགས་འགྲུབ་པའི་ཁྱབ་བསྒྲགས་བྱ་རྒྱུའི་འཁྲབ་སྟོན་ལ་གཙོར་འདོན་བྱས་པ་ཞིག་ཡིན་པ་རེད།
ཐེངས་འདིའི་ཤི་གྲངས་རྒྱ་ནག་གཞུང་གིས་ཉིས་སྟོང་ལྷག་ཙམ་ཡིན་པའི་ཁྱབ་བསྒྲགས་བྱེད་ཀྱི་ཡོད་ནའང་། གསེར་རྟ་བླ་རུང་ལྔ་རིག་ནང་བསྟན་སློབ་གླིང་དུ་གཤིན་པོ་ཆིག་ཁྲི་ལྷག་གི་བསྔོ་ཞུས་བསླེབས་པ་བདེན་ངེས་སུ་འདུག་སྟེ། སྐྱེ་རྒུ་ཁུལ་གྱི་འོག་ཏུ་རྫོང་ཁག་དྲུག་ཡོད་པ་ལས་ནང་ཆེན་རྫོང་ལ་ཤང་བཅུ་ཡོད་པའི་ནང་ཚན་སྐྱོ་བྲག་ཤང་གཅིག་པུ་ནས་མི་གྲངས་ཆིག་བརྒྱ་ང་བདུན་འདས་གྲོངས་སོང་ཡོད་པ་རེད།
འདི་དག་ནི་ང་རང་གི་རོགས་པ་ཚོས་ས་གནས་ས་ཐོག་ཏུ་ལས་ཀ་བྱེད་ཀྱིན་པའི་སྐབས་ན་ཁ་པར་བརྒྱུད་ནས་ར་སྤྲོད་གནང་བ་དག་ཡིག་ཐོག་ཏུ་ཕབ་པ་ཙམ་ཡིན་ཕྱིར་རྒྱ་ཆེའི་གློག་པ་པོ་རྣམས་ཀྱིས་དངོས་ཡོད་གནས་ཚུལ་དུ་བཟུང་ན་ཆོག་ས་ཡོད།
སྐབས་འདི་དང་འབྲེལ་བ་དེ་ཙམ་མེད་པ་ཞིག་སྟེ། བོད་པའི་གཞས་པ་གྲགས་ཅན་བཀྲས་ཆུང་ལགས་ནས་གཙོ་ཁྲིད་བྱས་པའི་བོད་པའི་ལོ་རྒྱུས་སྟེང་གི་བོད་རིགས་བྱིས་པའི་གླུ་གཞས་ཆེད་བསྒྲིགས་འོད་སྡེར་སེམས་གཞས་ཞེས་པ་དེ་མི་འགྱངས་པར་བྱང་ཨ་རིའི་བོད་རིགས་འདུས་སྡོད་ས་ཁུལ་གྱིས་གཙོས་པའི་སྤྱི་ཚོགས་སྟེང་འགྲེམ་སྤེལ་དང་སྐོར་སྐྱོད་བྱེད་རྒྱུ་རེད། གནས་ཚུལ་གསལ་བོ་གཤམ་གྱི་དྲ་རྒྱ་ལས་ཤེས་ཐུབ།
http://www.semshae.org
རྒྱ་ནག་གི་མགྲིན་ཚབ་པ།
བོད་ལྗོངས་ཆ་འཕྲིན་ལྟེ་གནས་ལས་དྲངས།
གློ་བུར་དུ་ས་ཡོམ་ཆེན་པོ་ཞིག་བྱུང་བ་དེས་མཚོ་སྔོན་ཡུལ་ཤུལ་ཀྱི་མིའི་ཚེ་སྲོག་དང་རྒྱུ་ནོར་ལ་གྱོང་གུད་ཚབས་ཆེན་ཞིག་བཟོས་སོང་། རྒྱལ་ཡོངས་མི་དམངས་ཀྱི་སེམས་པ་གནོད་འགོག་རྒུད་སྐྱོབ་ཀྱི་བྱ་བར་ཕྱོགས་ཤིང་། ཤི་རྨས་བྱུང་བའི་གནད་འགག་གི་དུས་དེར། ནུབ་ཕྱོགས་རྒྱལ་ཁབ་ཀྱི་མཚམས་སྦྱོར་ཚན་པ་འགས་ཁོ་ཚོས་ནམ་རྒྱུན་དུ་སྒྲོག་བཞིན་པའི་མི་ཆོས་རིང་ལུགས་དང་། མི་ཆོས་རོགས་སྐྱོར་གྱི་དོ་ཁུར་མི་བྱེད་པ་མ་ཟད། ཁོ་ཚོས་ངན་སེམས་གཞན་ཞིག་བཅངས་ཏེ། ཁོ་ཚོའི་བསམ་པར་རྫི་གསང་དོད་པོའི་གནད་དོན་ཞིག་ཡིན་པར་སེམས་བཞིན་ཡོད་པའི་རྒྱ་བོད་འབྲེལ་བའི་ཐོག་ནས་དཀྲུགས་ཤིང་བཟོ་འདོད་པ་རེད།“ཤ་རུས་འབྲེལ་ཞིང་སྐྱིད་སྡུག་གཅིག”པའི་དོན་དངོས་གང་ཡིན་པ་དེ་ཡིག་འབྲུ་ཙམ་ཡང་མི་གླེང་བར། ཡོམ་འགོག་གེགས་སེལ་ཁྲོད་ཀྱི་མི་འདང་བའི་ཆ་ཞིབ་འཚོལ་གྱིས་འུད་ཤོབ་ཅི་ཐུབ་བྱས་ནས་རྒྱ་བོད་མི་རིགས་ཀྱི་འབྲེལ་བར་དཀྲུག་ཤིང་བཟོ་བར་བརྩོན་བཞིན་ཡོད་པ་རེད།
བསམ་ཡུལ་ལས་འདས་པ་ཞིག་ནི། ཨ་རིའི《ཉུག་ཡུའེ་ཚགས་པར་》གཙོ་བྱས་པའི་ནུབ་ཕྱོགས་མཚམས་སྦྱོར་ཚན་པས་ཐེངས་འདིའི་ཡུལ་ཤུལ་ས་ཡོམ་ཐད་ཀྱི་གསར་འགྱུར་འཁྱོགས་བརྗོད་བྱས་ཡོད་དེ། མིང་དུ་གྲགས་པའི་ཚགས་པར་འདིས་ཀྱང་ཐེངས་འདིར་ཚགས་པར་ཆུང་ཤོས་དག་གི་རྗེས་དེད་དེ་ཀྲུང་གོའི་ཡུལ་ཤུལ་གྱི་ས་ཡོམ་ལ་མིག་མདངས་གཞན་ཞིག་གི་སྟེང་ནས་ལྟ་ཞིབ་བྱས་ཡོད། ཚགས་པར་དེས་ཁ་བྱང་ལ《ས་ཡོམ་གྱི་རྗེས་སུ་བོད་མིས་ཀྲུང་གོའི་རོགས་སྐྱོར་ལ་ཡིད་ཆེས་མེད》ཅེས་པའི་གསར་འགྱུར་སྤེལ་དེ། ནུབ་ཕྱོགས་སྤྱི་ཚོགས་གདོད་མ་ནས་གོམས་ལོབས་སུ་སོང་ཡོད་པའི་ཕྱོགས་རིས་ཅན་གྱི་འཁྱེར་སོ་ཡིས་བོད་ལྗོངས་དང་ཀྲུང་གོའི་བར་ལ་འགལ་ཟླ་བཟོ་འདོད་པ་རེད། གསར་འགྱུར་དེའི་ནང་བཀོད་དོན། ཀྲུང་གོའི་དམག་མི་གྲྭ་པ་རྣམས་ཀྱིས་མི་བསྐྱབས་རྗེས་སུ་ད་གཟོད་སླེབས་ཤིང་། དེ་ནས་གྲྭ་པ་རྣམས་ལོགས་ཤིག་ཏུ་དེད་དེ་ཁོ་ཚོས་སྲོག་ཉེན་ལས་ཐར་བ་རྣམས་བསྐྱབས་ཚུལ་པར་དུ་ལེན་པར་སྟབས་བདེ་བཟོས་ཞེས་བཀོད་ཡོད།
ལོ་རྒྱུས་ཀྱིས་ཐེངས་མང་པོར་ར་སྤྲོད་བྱས་དོན། འཇིགས་ཉེན་གྱི་གནད་འགག་གི་སྐབས་སུ་ཀྲུང་གོའི་མི་དམངས་རྣམས་མཐུན་སྒྲིལ་དམ་པོ་ཡིན་ཞིང་། འདི་འདྲའི་ཕྱོགས་རིས་དང་འཁྱེར་སོ་ཅན་གྱི་གསར་འགྱུར་ཇི་ལྟར་མང་ན། མངོན་གསལ་དུ་དཀྲུག་ཤིང་འཕེན་པའི་སྐད་ཆ་དེ་དག་གིས་དེ་འདྲར་ས་འཛིན་མི་ཐུབ་པའོ།
མཁན་པོ་དགའ་དབང་དྲ་ཐོག་ཏུ་ཕེབས་པར་རྟེན་འབྲེལ་ཞུ།
དྲ་ཐོག་ཏུ་རྩོམ་ཡིག་སྤེལ་ན་བློ་ཁོག་ཡངས་དགོས་བ་དང་།་བཟོད་བསྒོམ་ཆེ་དགོས་པ་སྔོན་འགྲོའི་ཆ་རྐྱེན་ལྟ་བུ་ཡིན།
མཁན་པོ་ཚང་གི་ཟིན་བྲིས་ཤིག་ཀྱང་སྒོ་ཕྱེས་བའི་རེ་བ་ཡོད།
བཀྲིས་བདེ་ལེགས།
གནམ་ལྕགས་ལགས།ལྡོག་ཕྱོགས་གཅིག་པུ་ནས་གོ་བ་བླངས་བས་ག་ལ་འགྲིག་་་་ངས་འདིར་ཟེར་དོན་ནི་གོ་བ་ལྡོག་ཕྱོགས་ནས་བླངས་བ་གཅིག་པུ་མ་ཡིན་པར་ཉམས་ཞིབ་ཚད་ལྡན་ཞིག་བྱེད་དགོས་ཀྱི་འདུག་ཟེར་གྱི་ཡོད་ལ་ཟེར་སྒྲོས་ཙམ་ཀྱིས་ག་ལ་འགྲིག་ཟེར་གྱི་ཡོད།
ཤི་གྲངས་ཀྱི་ཐོ་གཞུང་ངོ་མ་རེག་ཐབས་དང་།ཡང་ན་ཁྱིམ་མི་རེ་རེ་རྩིས་ཞིབ་ཀྱིས་ཤི་གྲངས་ཀྱི་ཐོ་གཞུང་བཟོ་བ་སོགས་བྱས་ཏེ་ས་ས་རྡོ་རྡོ་བྱས་ན་རེད།
གྲོགས་པོ་ལགས་དགྲ་ནག་གི་གསར་འགྱུར་དང་སྐད་ཆ་དག་ལ་དགྲ་མི་ཁོང་རང་
ཚོས་ཀྱང་ཡིད་ཆེས་བྱེདཀྱི་་མེད་ནསུས་ཀྱང་ཡིད་ཆེས་དཀའོ
ཡིད་སྐྱོ་བའི་གནས་ཚུལ་དེའི་འོག་ནས་ཆོལ་གསུམ་སྤུན་ཟླའི་བརྩེ་སེམས་ཤུགས་
ཆེན་པོ་མངོན་ཐུབ་སོང་པས་དགྲ་ནག་འདི་བ་ཚང་ལ་གསལ་བཤད་ཅིག་ཀྱང་བྱས་
ཡོད་པར་འཁུམས།
ཨོ་ཕུན་ཚོགས་ལགས། དགྱ་ནག་གིས་ཡིན་གཅིག་མིན་གཉིས་ལ་གསར་འགྱུར་ངོ་མ་དེ་རྫུན་དུ་གཏོང་དགོས་པ་མ་ཤེས་སམ། དཔེར་ན་ད་རེར་མི་མང་བོ་ཤི་མེད་ན། ཡང་ཤི་འདུག་ཟེར་ངེས་ལ། མི་མང་བོ་ཤི་བས་ཡང་ཤི་མ་སོང་ཞེས་བརྗོད་པ་ལྟར་རེད། དེ་ནི་དགྱ་གི་གསར་འགྱུར་གྱི་ཁྱད་ཆོས་ཨང་དང་བོ་དེ་རེད། ང་ཚོས་ཀྱང་དགྱ་ནག་གི་གསར་འགྱུར་ལ་ལྡོག་ཕྱོགས་ནས་གོ་བ་ལེན་དགོས།
ཤི་གྲངས་ཀྱི་ཆ་ནས་རྦད་དེ་མི་མཐུན་པ་འདི་ལ་ང་ཚོ་ཚང་མས་རྟོག་དཔྱོད་བྱེད་དགོས་ཀྱི་འདུག་་ངའི་ཕ་ཡུལ་ཀྱི་གྲོགས་པོ་ཞིག་གིས་ཀྱང་དེ་ལྟར་ཟེར་གྱི་འདུག་་ངོ་མ་དེ་འདྲའི་གནས་ཚུལ་བྱུང་ཡོད་ན་།རྒྱ་ནག་གིས་ཅི་ཞིག་ལ་ཤི་གྲངས་ཉུང་རུ་གཏོང་དགོས་པ་དང་།དེ་ལྟར་གཏོང་བའི་རྒྱབ་ལྗོངས་དང་གཡོ་ཇུས་འོག་གི་ངོ་གདོང་སོགས་ལ་ང་ཚོས་འཚང་འབྱིན་བྱེད་ན་རེད།