ཁོར་ཡུག་ཚོགས་འདུ།

                       
བོད་མིའི་སྐུ་ཚབ་ཀྱིས་ཐའེ་ཝན་དུ་འཚོགས་པའི་ཁོར་ཡུག་ཚོགས་འདུའི་ཐོག་བོད་ཀྱི་ཁོར་ཡུག་གནས་སྟངས་ཐད་འགྲེལ་བརྗོད་བྱས་ཡོད་འདུག

ཕྱི་ཚེས་ ༡ ཉིན་བོད་གཞུང་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། ཟླ་ ༤ པའི་ཚེས་ ༣༠ ཉིན་ནས་ཟླ་ ༥ པའི་ཚེས་ ༢ བར་ཨེ་ཞི་ལྗང་ཁུ་དྲ་བ་ཚོགས་པས་གོ་སྒྲིག་འོག་ཐའེ་ཝན་གྱི་རྒྱལ་ས་ཐེ་པེ་རུ་ཉིན་གཉིས་རིང་འཛམ་གླིང་ཁོར་ཡུག་སྐོར་གྱི་བགྲོ་གླེང་ཞིག་འཚོགས་ཡོད་པ་དང་། ཚོགས་འདུ་དེར་རྒྱལ་ཁབ་ ༢༠ ཙམ་གྱི་ཚོགས་ཞུགས་པ་ ༢༠༠ ཡས་མས་འདུ་འཛོམས་བྱུང་ཡོད་ལ། སྐབས་དེར་བོད་ཀྱི་སྐུ་ཚབ་ཀྱང་ཚོགས་འདུ་དེར་མཉམ་ཞུགས་བྱེད་ཐུབ་ཡོད་པ་རེད། ཤེས་རྟོགས་བྱུང་བ་ལྟར་ན། ཐེངས་འདིར་གོ་སྒྲིག་བྱེད་མཁན་གྲས་སུ་ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་ལྗང་ཁུ་ཚོགས་པ་དང་། སྤྱི་ཚོགས་དང་ཁོར་ཡུག་དང་འབྲེལ་བའི་ཚོགས་པ་རྣམས་ཚུད་ཡོད་འདུག ཚོགས་པས་གདན་ཞུ་ཕུལ་བ་བཞིན་བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་སྡེ་ཚན་གྱི་ལས་བྱེད་བསྟན་འཛིན་ནོར་བུ་དང་དོན་གྲུབ་སྒྲོལ་མ་གཉིས་ཀྱང་ཚོགས་འདུར་ཆེད་ཕེབས་ཀྱིས། བོད་དེ་འཛམ་གླིང་གི་སྣེ་མོ་གསུམ་པ་ཡིན་པ་དང་། བོད་ཀྱི་ཁོར་ཡུག་གི་ཉེན་ཚབས། དེ་བཞིན་མཚོ་བོད་མཐོ་སྒང་གི་འབྲོག་པའི་འཚོ་བ་རོལ་སྟངས་སོགས་འགྲེལ་བརྗོད་བྱས་ཡོད་འདུག

ཚོགས་འདུའི་མཛད་སྒོའི་སྐབས་སུ་ཨོ་སི་ཊོ་ལི་ཡའི་གྲོས་ཚོགས་འཐུས་མི་བྷོབ་བྷུ་རོན་ Bob Brown ལགས་ཀྱིས་ ༢༠༡༠ ལོར་ APGN ལྗང་ཁུ་ཚོགས་པའི་ཚོགས་མི་ཡོངས་ནས་མཉམ་ལས་བྱས་སྟབས་གྲུབ་འབྲས་དང་ནུས་པ་གང་ལེགས་བྱུང་ཡོད་སྐོར་གསུངས་འདུག་ལ། ཡང་ཁོང་གིས་ཆབ་སྲིད་རྙིིང་པའི་ཡར་རྒྱས་དང་ལྐོག་རྔན་ཟ་བ་དང་འདོད་རྔམ་གྱི་གནས་སྟངས་སོགས་ལ་ངེས་པར་འགྱུར་བ་གཏོང་རྒྱུ་དང་། ཚོགས་འདུ་འདི་བརྒྱུད་གོ་ལའི་འབྱུང་འགྱུར་ལ་རེ་བཟང་ཕུགས་བཅོལ་དང་སྤྲོ་སྣང་ལྡན་པ་ཡོང་རྒྱུར་རེ་བ་ཡོད་ཚུལ་སོགས་བརྗོད་ཡོད་འདུག

ཉིན་གཉིས་པར་ཊོ་ཝ་ལོའི་སྲིད་བློན་དང་ཨ་པེ་སེ་ ལེ་ལེ་མི་ཡ་ Apisai Lelemia ཌོག་ཊར་ཝན་ཌ་ན་ ཤེ་ཝ་ Dr. Vandana Shiva སོགས་ཀྱིས་གཏམ་བཤད་གནང་ཡོད་ལ། སྐབས་དེར་ཌོག་ཊར་ཤེ་ཝ་མཆོག་གིས་མཚོ་བོད་མཐོ་སྒང་གི་གལ་ཆེན་རང་བཞིན་སྐོར་དང་། ཧི་མ་ལ་ཡའི་འཁྱགས་རོམ་བཞུ་བཞིན་པ་དང་། གནམ་གཤིས་འགྱུར་ལྡོག་སྔོན་འགོག་བྱ་དགོས་པའི་སྐོར་ལ་གསུང་བཤད་ཀྱང་གནང་ཡོད་འདུག

ཚོགས་འདུ་ཐེངས་དང་པོ་དེ་ ༢༠༠༥ ལོར་ཉི་ཧོང་གི་རྒྱལ་ས་ཊོག་ཀྱོར་འཚོགས་ཡོད་འདུག