བདུན་ཚིགས་བདུན་འཚོགས་སྟངས།

ཀཾ་ཚང་གི་དགོན་པ་ཆེ་ཁག་ ༣༡ གིས་ས་ཡོམ་ཁྲོད་རྐྱེན་འདས་སོང་བ་རྣམས་ཀྱི་བདུན་ཚིགས་འཚོགས་སྟངས་གསལ་བསྒྲགས་གནང་ཡོད་པ་རེད།

ཀརྨ་པའི་སྤྱི་ལས་ཁང་གིས་དེ་རིང་གསལ་བསྒྲགས་སྤེལ་དོན། འདི་ལོའི་བཞི་བཅུ་བཞིའི་ཉིན་མོར་ཁམས་སྐྱེ་རྒུ་མདོར་ས་ཡོམ་རྒྱུག་སྟེ་བོད་ཀྱི་གྲོང་ཁྱེར་མི་ཆུང་བ་ཞིག་རྗེས་ཤུལ་ཙམ་དུ་གྱུར་པ་དེར་ཕྱི་ནང་གི་མི་རིགས་མང་པོས་གདུང་སེམས་མཉམ་བསྐྱེད་གནང་བའི་ཆ་ཤས་ཤིག་ལ། དཔལ་རྒྱལ་དབང་ཀརྨ་པ་མཆོག་གིས་གསོན་པོ་རྣམས་ལ་ཉེན་སྐྱོབ་ཀྱི་རོགས་རམ་དང་སྐྱབས་དམིགས། གཤིན་པོ་རྣམས་ལ་བསྔོ་སྨོན་གང་ཟབ་བགྱིས་ཤིང་། ལྷག་པར་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་སོགས་ཀཾ་ཚང་གི་དགོན་པ་ཆེ་ཁག་ ༣༡ ལ་བདུན་ཚིགས་དང་པོ་སྟེ། ༢༠༡༠ ལོའི་ཕྱི་ཟླ་ ༤ ཚེས་ ༢༤ ཉིན་མི་འཁྲུགས་པའི་ཆོ་ག བདུན་ཚིགས་གཉིས་པ་སྟེ་ ༢༠༡༠ ལོའི་ཕྱི་ཟླ་ ༥ ཚེས་ ༡ ཉིན་འོད་ཆོག བདུན་ཚིགས་གསུམ་པ་སྟེ་ ༢༠༡༠ ལོའི་ཕྱི་ཟླ་ ༥ ཚེས་ ༨ ཉིན་རྡོར་སེམས། བདུན་ཚིགས་བཞི་པ་སྟེ། ༢༠༡༠ ལོའི་ཕྱི་ཟླ་ ༥ ཚེས་ ༡༥ ཉིན་ཀུན་རིག བདུན་ཚིགས་ལྔ་པ་སྟེ་ ༢༠༡༠ ལོའི་ཕྱི་ཟླ་ ༥ ཚེས་ ༢༢ ཉིན་ཞི་ཁྲོ། བདུན་ཚིགས་དྲུག་པ་སྟེ། ༢༠༡༠ ལོའི་ཕྱི་ཟླ་ ༥ ཚེས་ ༢༩ ཉིན་པདྨ་བཛྲ། བདུན་ཚིགས་བདུན་པ་སྟེ། ༢༠༡༠ ལོའི་ཕྱི་ཟླ་ ༦ ཚེས་ ༥ ཉིན་རྒྱལ་བ་རྒྱ་མཚོ་འཚོགས་དགོས་པའི་བཀའ་ངག་གནང་སྟེ་རོགས་སྐྱོར་ཞབས་འདེགས་ཀྱང་ཕུལ་ཡོད། སྤྱིར་བདུན་ཚིགས་ལ་ངན་སོང་སྦྱོང་རྒྱུད་ལས། ལྷ་ཡི་བུ་ནོར་བུ་དྲི་མ་མེད་པ་ཤི་ནས་ཞག་བདུན་ནས་ངན་སོང་དུ་སྐྱེ་བར་གསུངས་པ་ཁུངས་སུ་དྲངས་ཏེ་ཤི་ནས་ཞག་བདུན་གྱི་ཚེ་བདུན་དང་པོ་སོགས་རིམ་པར་འཛིན་པའི་ལུགས་ཤིག་དང་། གཞན་དག་ཤི་ནས་ཞག་གསུམ་བར་རྣམ་ཤེས་ཕུང་པོར་གནས་པས་བདུན་ཚིགས་ཀྱི་མགོ་ཞག་བཞི་པ་ནས་འཛིན་པའི་ལུགས་ཤིག་སྟེ་གཉིས་སུ་ཡོད་པ་ལས་འདི་ནི་ལུགས་ཕྱི་མ་ལྟར་དུ་བྱས་པ་ཞིག་ཡིན། བདུན་ཚིགས་བཟུང་སྟེ་ལམ་བསྟན་ན་རྡོ་རྗེ་སློབ་དཔོན་རབ་ཀྱིས་གྲོལ་བར་ནུས་པ་དང་། འབྲིང་གིས་ངན་སོང་གི་སྐྱེ་བ་ལས་ལྡོག་པར་འགྱུར་བ་དང་། ཐ་མས་ཀྱང་ཆོ་ག་ཚུལ་བཞིན་དུ་བྱས་པས་ཅི་རིགས་པའི་སྨན་ཡོན་དུ་འགྱུར་བས་ན་ཧ་ཅང་གལ་འགངས་ཆེ་བ་ཡིན་ཟེར།