བདུན་ཚིགས་གསུམ་པ་སྲུང་གཙི།

༧གོང་ས་མཆོག་དབུ་བཞུགས་ཐོག་བཙན་བྱོལ་བོད་གཞུང་དམངས་ཡོངས་ཀྱིས་སྐྱེ་རྒུ་མདོའི་ས་ཡོམ་གོད་ཆག་ཐེབས་པའི་མང་ཚོགས་ཀྱི་ཆེད་དུ་བདུན་ཚིགས་གསུམ་པ་སྲུང་གཙི་བྱས་ཡོད།

དེ་རིང་ཞོགས་པའི་ཆུ་ཚོད་ ༧ དང་སྐར་མ་ ༤༩ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་མཆོག་དབུས་བཙན་བྱོལ་བོད་གཞུང་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་། བཀའ་ཟུར་དང་སྤྱི་འཐུས་རྒྱུན་ལས་རྣམ་པ། བཞུགས་སྒར་དུ་གནས་སྡོད་དགོན་སྡེ་ཁག་གི་གྲྭ་བཙུན་དང་སློབ་གྲྭ་ཁག་གི་དགེ་སློབ། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་མི་དང་ངྷ་ས་མི་མང་བཅས་འདུ་འཛོམས་ཐོག་ཉེ་ཆར་ཡུལ་ཤུལ་སྐྱེ་རྒུ་མདོའི་ས་ཡོམ་གྱི་གོད་ཆག་ཁྲོད་འདས་གྲོངས་སུ་ཕྱིན་པ་རྣམས་ཀྱི་ཆེད་དུ་ངག་བཅད་སྐར་མ་གཅིག་རིང་གནང་རྗེས། བསྔོ་བ་སྨོན་ལམ་དང་གསོལ་འདེབས་གནང་སྟེ་བདུན་ཚིགས་གསུམ་པ་སྲུང་གཙི་གནང་སོང་། སྐབས་དེར། བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། ཐེངས་འདིའི་ས་ཡོམ་གྱི་འཇིགས་པ་ཆེན་པོ་དེའི་དབང་གིས་གཞུང་འབྲེལ་གྱིས་གསལ་བསྒྲགས་བྱས་པ་ལས་ཀྱང་མི་མང་པོའི་ལུས་སྲོག་ཤོར་བ་དང་། མི་མང་ཁྲི་ཕྲག་མང་པོར་རྨས་སྐྱོན་དང་སྡོད་ཁང་ལ་སོགས་པའི་དཀའ་ངལ་ཁྲོད་འཚོ་བ་དེ་དག་གི་ཆེད། བཙན་བྱོལ་བོད་མི་ཚོས་གདུང་སེམས་མཉམ་བསྐྱེད་དང་སྐྱིད་སྡུག་མཉམ་མྱོང་མཚོན་ཆེད། ས་ཡོམ་བྱུང་བའི་ཉིན་མོ་ཕྱི་ཚེས་ ༡༤ ཉིན་༧གོང་ས་མཆོག་གིས་ཐུགས་སྨོན་བདེན་ཚིག་རླབས་ཆེན་གནང་བ་མ་ཟད། ཕྱི་ཉིན་ཡང་གཞུང་འབྲེལ་གྱི་ཐོག་ནས་སྨོན་ལམ་འཚོགས་ཡོད་ལ། བདུན་ཕྲག་གཉིས་པའི་སྐབས་སུའང་༸གོང་ས་མཆོག་ཞབས་སོར་བཀོད་དེ་སྨོན་ལམ་རྒྱས་པ་ཞིག་འཚོགས་པ་རེད། དེ་རིང་བདུན་ཚིགས་གསུམ་པར་འཁེལ་ཡོད་སྟབས། རྒྱ་བལ་འབྲུག་གསུམ་གྱིས་མཚོན་པའི་ཕྱི་རྒྱལ་ཡུལ་གྲུ་ཁག་དང་།  བོད་མི་འདུས་སྡོད་ཀྱི་ས་གནས་ཡོངས་སུ་ཉིན་གཅིག་དུས་གཅིིག་ཏུ་ཡུལ་ཤུལ་གནོད་ཐེབས་ས་ཁུལ་གྱི་འདས་པོ་རྣམས་ལ་སྨོན་ལམ་དང་ཤུལ་ལུས་རྣམས་ལ་གདུང་སེམས་མཉམ་སྐྱེད་ཆེད་ངག་བཅད་སྐར་མ་གཅིག་རིང་གནང་གི་ཡོད། འདི་ལྟར་གནང་དགོས་པའི་དགོངས་འཆར་ཕྱོགས་མང་པོ་ནས་བྱུང་བ་ཡིན་སྟབས། བཀའ་ཤག་གིས་གོ་སྒྲིག་གནང་བ་ཡིན་ཞེས་གསུངས་བྱུང་།

དེ་རིང་བདུན་ཚིགས་གསུམ་པ་སྲུང་གཙི་སྐབས་༧གོང་ས་མཆོག་དབུས་བཙན་བྱོལ་བོད་མི་ཡོངས་ཀྱིས་ངག་བཅད་སྐར་མ་གཅིག་རིང་གནང་རྗེས། དགེ་འདུན་པ་དང་སེར་སྐྱ་མི་མང་ཡོངས་ཀྱིས་དུས་ཡུན་ཆུ་ཚོད་ ༡ དང་ཕྱེད་ཀའི་རིང་བསྔོ་སྨོན་གསོལ་འདེབས་གནང་སོང།