ངྷ་ཤོད་བོད་ཁྱིམ་སློབ་གྲྭའི་བོད་ལྗོངས་ང་ཚོའི་ཕ་ཡུལ།

བོད་ལྗོངས་ང་ཚོའི་ཕ་ཡུལ་ནི་བོད་ཕྲུག་ཁྱིམ་སྡེའི་སློབ་གྲྭ་ཁག་གི་ལོ་རེའི་དམིགས་བསལ་ལས་རིམ་ཞིག་ཡིན་ལ། གཙོ་བོ་སློབ་ཕྲུག་ཚོར་བོད་རང་གི་ཐུན་མོང་མ་ཡིན་པའི་ཆོས་དང་རིག་གཞུང་། ཡུལ་གོམས་གཤིས་ལུགས་གཙོས་བོད་རང་གི་སྐོར་ངོ་སྤྲོད་དང་དྲན་གསོའི་ཆེད་དུ་དམིགས་པ་ཞིག་ཡིན།

བོད་ཕྲུག་ཁྱིམ་སྡེའི་སློབ་གྲྭ་ཁག་ཏུ་ལོ་ལྟར་ཟླ་གཅིག་རིང་བོད་ལྗོངས་ང་ཚོའི་ཕ་ཡུལ་ཞེས་པའི་ལས་རིམ་ཞིག་གོ་སྒྲིག་བྱེད་ཀྱིན་ཡོད་ཅིང་། དེ་ལྟར་བྱེད་དོན་བཙན་བྱོལ་དུ་སྐྱེས་ཤིང་འཚར་ལོངས་བྱུང་བ་དང་། ཡང་ཕ་ཡུལ་ནས་ཡོང་ནའང་ལོ་ན་ཆུང་སྟབས་རང་གི་ཕ་ཡུལ་གྱི་ཡུལ་སྲོལ་གོམས་གཤིས་ལ་རྒྱུས་མངའ་མེད་རིགས་ལ། ཕ་ཡུལ་གྱི་ཡུལ་སྲོལ་གོམས་གཤིས་དང་ཆོས་དང་རིག་གཞུང་སོགས་ངོ་སྤྲོད་བྱེད་ཆེད་ཡིན།

དེ་ལྟར་ངྷ་ཤོད་བོད་ཁྱིམ་སློབ་གྲྭས་ཀྱང་ཟླ་སྔོན་མའི་ཕྱི་ཚེས་ ༡༢ ཉིན་ནས་མགོ་འཛུགས་ཀྱིས་དེ་རིང་ཕྱི་ཚེས་ ༡༢ ཉིན་བར་ཟླ་གཅིག་རིང་གི་བོད་ལྗོངས་ང་ཚོའི་ཕ་ཡུལ་གྱི་ལས་རིམ་དེ་གོ་སྒྲིག་གནང་ཡོད་པ་དང་། དེ་རིང་མཇུག་སྡོམ་མཛད་སྒོ་དང་སྟབས་བསྟུན་འཛིན་གྲྭ་དྲུག་པ་ནས་བཅུ་བ་བར་གྱི་སློབ་ཕྲུག་བར་ལ། འཛིན་གྲྭའི་ནང་ཁུལ་གྱི་འདྲི་རྩལ་འགྲན་བསྡུར་ཞིག་ཀྱང་གནང་ཡོད། ཉིན་དེའི་མཛད་སྒོའི་སྟེང་བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་ཚེ་དབང་ཡེ་ཤེས་མཆོག་ཕེབས་ཡོད། འཛིན་གྲྭ་དྲུག་པ་ནས་བཅུ་བ་བར་གྱི་འཛིན་གྲྭ་ཁག་ཏུ་ནང་གསེས་སྡེ་ཚན་བཅུ་གཉིས་ཡོད་པའི་ཁྲོད་ནས་མཇུག་མཐར་འཛིན་གྲྭ་བདུན་པ་བུམ་པས་ཨང་དང་པོ་བླངས་ཡོད།

འདི་གའི་གསར་འགོད་པས་སློབ་སྤྱི་ཆོས་དབྱིངས་དོན་གྲུབ་ལགས་སུ་ལས་རིམ་འདིའི་སྐོར་བཀའ་འདྲི་ཞུས་པར། ཁོང་གིས་ངོ་སྤྲོད་གནང་དོན། ང་ཚོས་ལོ་ལྟར་བོད་ལྗོངས་ང་ཚོའི་ཕ་ཡུལ་ཞེས་པ་སྲུང་གཙི་བྱེད་ཀྱིན་ཡོད་པ་དང་། བོད་ཕྲུག་ཁྱིམ་སྡེར་དགོས་དམིགས་བཞི་ཡོད་པའི་དང་པོ་ནི་བོད་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས་སོགས་ཆ་ཚང་བའི་བོད་མི་བཟང་པོ་ཞིག་སྐྲུན་ཟེར་བ་དེ་རེད། དེའི་སྒྲུབ་བྱེད་དང་པོ་ལོ་ལྟར་ཟླ་གཅིག་རིང་བོད་ལྗོངས་ང་ཚོའི་ཕ་ཡུལ་ཞེས་པའི་ལས་རིམ་འདི་ཆགས་ཡོད། ལས་རིམ་འདི་ནི་རྒྱ་གར་ནང་འཚར་ལོངས་བྱུང་བའི་བོད་ཕྲུག་རྣམས་ལ་རང་ཉིད་ཀྱི་ཕ་ཡུལ་ངོ་སྤྲོད་དང་དྲན་གསོ་གཏོང་རྒྱུ་དང་རིག་གཞུང་དང་ཡུལ་གོམས་གཤིས་ལུགས་སོགས་ངོ་སྤྲོད་བྱེད་པའི་ཆེད་དུ་རེད་ཅེས་གསུངས།

ཡང་ཁོང་གིས་དེ་རིང་འདིར་འཛིན་གྲྭ་ནང་ཁུལ་དུ་འདྲི་རྩལ་འགྲན་སྡུར་བྱེད་དོན། ༧གོང་ས་མཆོག་དགུང་གྲངས་ ༧༥ ལ་ཕེབས་པར་དགའ་སྟོན་དང་། དམིགས་བསལ་གྱིས་༧གོང་ས་སྐུ་ཕྲེང་བཅུ་བཞི་བ་མཆོག་གི་གསང་གསུམ་གྱི་མཛད་པ་འཕྲིན་ལས་ཐོག་ཏུ་སློབ་སྦྱོང་བྱ་རྒྱུ་བྱས་ཏེ། སྔོན་འགྲོའི་འཛིན་གྲྭས་༧གོང་ས་མཆོག་སྐུ་ཕྲེང་དང་པོ་ནས་བཅུ་བཞི་བར་གྱི་མཚན་བློ་འཛིན་དང་། དང་པོ་དང་གཉིས་པས་སྐུ་ཕྲེང་དང་པོ་ནས་བཅུ་བཞིའི་བར་གྱི་བསྟོད་ཚིག་བློར་འཛིན་རྒྱུ། གསུམ་པས་༧གོང་ས་སྐུ་ཕྲེང་བདུན་པའི་མཛད་རྣམ་ལ་སློབ་སྦྱོང་། བཞི་བས་༧གོང་ས་སྐུ་ཕྲེང་ལྔ་པའི་མཛད་རྣམ་སློབ་སྦྱོང་། ལྔ་པས་༧གོང་ས་སྐུ་ཕྲེང་བཅུ་གསུམ་པའི་མཛད་རྣམ་སློབ་སྦྱོང་བྱ་རྒྱུ་སོགས། སྔོན་འགྲོའི་འཛིན་གྲྭ་དང་འཛིན་གྲྭ་དང་པོ་ནས་བཅུ་བ་བར་གྱི་སློབ་མ་ཡོངས་ཀྱིས་༧གོང་ས་སྐུ་ཕྲེང་རིམ་བྱོན་དང་། དམིགས་བསལ་གྱིས་༧གོང་ས་སྐུ་ཕྲེང་བཅུ་བཞི་བ་མཆོག་གི་མཛད་རྣམ་སྐོར་ལ་སློབ་སྦྱོང་གནང་ཡོད་པ་ལྟར། དེ་རིང་༧གོང་ས་མཆོག་གི་མཛད་རྣམ་དང་འབྲེལ་བའི་འདྲི་རྩལ་འགྲན་བསྡུར་དེ་གནང་བ་རེད་ཅེས་འགྲེལ་བརྗོད་གནང་ཡོད།

མཛད་སྒོའི་སྟེང་ཕེབས་པའི་སྐུ་མགྲོན་གཙོ་བོ་བོད་ཕྲུག་ཁྱིམ་སྡེའི་འགན་འཛིན་ཚེ་དབང་ཡེ་ཤེས་ལགས་ཀྱིས་མཛད་སྒོའི་མཇུག་སྡོམ་སྐབས་གསུངས་དོན། ཐེངས་འདིའི་བོད་ལྗོངས་ང་ཚོའི་ཕ་ཡུལ་གྱི་ལས་རིམ་ནང་༧གོང་ས་མཆོག་གི་མཛད་རྣམ་སྐོར་བཞག་པར་དགའ་བོ་བྱུང་བ་དང་། དེ་ནི་༧གོང་ས་མཆོག་གི་རླབས་ཆེན་མཛད་འཕྲིན་ངོ་སྤྲོད་ཙམ་མིན་པར་ཁོང་གི་དགོངས་དོན་རྟོགས་པར་ཕན་འབྲས་འབྱུང་གི་ཡོད་སྟབས་ཡག་པོ་རེད་ཅེས་དང་། ༧གོང་ས་མཆོག་གིས་ད་ལྟའི་བོད་མི་རིགས་ཀྱི་བསྟན་པ་ཆབ་སྲིད་དང་འཛམ་གླིང་ཞི་བདེ། ཁོར་ཡུག་སྲུང་སྐྱོབ་སོགས་ཀྱི་ཐད་དུ་ཕྱག་ལས་གནང་སྟབས་ང་ཚོས་དྲན་གསོ་ཞུ་དགོས་པར་མ་ཟད། ཁོང་གི་མཛད་འཕྲིན་སྐྱོང་སྟངས་དང་བཀའ་སློབ་ལམ་སྟོན་ཁག་ལ་སྦྱངས་ཏེ་ཤེས་པ་བྱ་རྒྱུ་དང་། མཐའ་མར་ལག་ལེན་དུ་བསྟར་དགོས་པ་སོགས་ཀྱི་བཀའ་སློབ་གནང་ཡོད།

མཇུག་མཐར་ཁོང་གིས། སྤྱིར་བཏང་བོད་ལྗོངས་ང་ཚོའི་ཕ་ཡུལ་ཞེས་པའི་ལས་རིམ་རང་ཉིད་ལ་དགོས་པ་དང་ཕན་ཡོན་ཡོད་ནའང་། ཐེངས་འདིའི་བོད་ལྗོངས་ང་ཚོའི་ཕ་ཡུལ་སྲུང་གཙི་ཞུ་སྟངས་དང་བརྗོད་གཞི། ངོ་བོ་དེ་མི་ལྟ་བུར་མཚོན་ན་ལོ་ཚོད་དུ་སླེབས་ནས་བསམ་བློ་ནན་ཏན་ཐོག་དགོངས་པ་བཞེས་ཏེ། ཚད་གཞི་ཞིག་ཏུ་སླེབས་ཐུབ་པའི་རྣམ་པའི་ཐོག་ནས་གནང་བ་དེ་གསལ་བོ་རེད། དེར་དམིགས་བསལ་གྱིས་དགའ་བོ་བྱུང་།

ལས་རིམ་འདི་ནི་འདྲ་ཆགས་ཆགས་དང་འགྲོ་སྟངས་ཙམ་ཁྱོན་ནས་མ་རེད། དོན་དག་སྟེང་དུ་དགོངས་པ་བཞེས་དགོས་ཀྱི་ཡོད། དེ་རིང་གི་བྱེད་སྟངས་འདིས་སློབ་ཕྲུག་ཚོར་མཚོན་ནའང་སློབ་སྦྱོང་གཏིང་ཟབ་ཏུ་འགྲོ་བ་དང་ཕྱུག་ཏུ་འགྲོ་བ། ཤེས་ཡོན་གྱི་དགོས་དམིགས་ཐོག་ཁ་ཡོད་ལག་ཡོད་ཀྱི་ཕན་ཐོགས་དང་ནུས་ཤུགས་ཐེབས་པ་ཞིག་ཏན་ཏན་ཡོང་གི་རེད་བསམ་གྱི་འདུག་ཅེས་གསུངས།
ཡང་། ངྷ་ཤོད་བོད་ཕྲུག་ཁྱིམ་སྡེའི་བོད་ལྗོངས་ང་ཚོའི་ཕ་ཡུལ་གྱི་ལས་རིམ་འདི་བོད་ཕྲུག་ཁྱིམ་སྡེ་ནང་ཁུལ་ལ་མཚོན་ན་དོ་ནན་པོ་དང་ནུས་ཤུགས་འཕར་མ་ཞིག་བསྐྱོན་ཏེ། ལེགས་པ་ཡོང་དགོས་པ་ཞིག་ཆགས་བསྡད་པར་མཐོང་གི་འདུག དེ་ཞུ་དོན་སློབ་ཕྲུག་ཚོའི་རྒྱབ་ལྗོངས་ངོས་ནས་ཞུ་གི་ཡོད། འདིར་ཡོད་པའི་སློབ་ཕྲུག་ཕལ་ཆེ་བར་ཕ་མ་ཡོད་པ་གང་ཞིག་ལ་རྒྱ་གར་ནང་དུ་སྐྱེས་ཤིང་འཚར་ལོངས་བྱུང་བ་ཤ་སྟག་རེད། མང་བོ་ཞིག་གི་ཕ་མ་ས་གནས་འདྲ་མིན་ནང་ཡོད་པའམ་། ཡང་ན་ཚོང་སར་ཡོད་པ་སོགས་ས་གནས་ཁག་མང་བོ་ནས་ཡོང་བའི་སློབ་ཕྲུག་ཡོད། དེར་བརྟེན་ཕ་མ་མཉམ་དུ་བསྡད་དེ་བོད་ཀྱི་གནད་དོན་ལ་ཞིབ་འཇུག་ཡོང་རྒྱུ་ཁག་པོ་ཡིན་སྟབས། ལས་རིམ་འདི་བརྒྱུད་དེ་ཤེས་བྱ་ཡོན་ཏན་དང་མི་གཤིས་ཀུན་སྤྱོད་སོགས་བོད་མི་ཚད་ལྡན་ཡོང་བ་ཞིག་ཏུ་ཤུགས་བསྐྱོན་རོགས་ཞེས་གསུངས་ཡོད།

འདི་གའི་གསར་འགོད་པས་ལས་རིམ་འདི་དང་འབྲེལ་སློབ་ཕྲུག་འགར་བཅར་འདྲི་ཞུས་པར། འཛིན་གྲྭ་ལྔ་བའི་སློབ་ཕྲུག་བསྟན་འཛིན་རྒྱལ་མཚན་གྱིས། ངས་ལས་རིམ་འདི་བརྒྱུད་དེ་ཀློག་སྟངས་དང་སྦྱང་སྟངས་ཤེས་སོང་། དེ་མིན་༧གོང་ས་སྐུ་ཕྲེང་བཅུ་གསུམ་པའི་མཛད་རྣམ་སྐོར་སྦྱངས་པ་ཡིན་ཟེར། ཡང་འཛིན་གྲྭ་བདུན་པའི་སློབ་ཕྲུག་བསྟན་འཛིན་རྡོ་རྗེས། ངས་ལས་རིམ་འདི་བརྒྱུད་ནས་སྔོན་མར་བོད་ལ་ག་རེ་བྱེད་ཀྱིན་ཡོད་མེད་སྐོར་ཚང་མ་ཤེས་སོང་། ང་ཚོའི་འཛིན་གྲྭས་ཕྱི་ལོ་ ༡༩༥༢ ནས་ ༡༩༥༨ བར་གྱི་༧གོང་ས་མཆོག་གི་མཛད་རྣམ་མདོར་བསྡུས་ཤིག་ལ་སྦྱངས་པ་ཡིན་ཟེར། འཛིན་གྲྭ་གསུམ་པའི་སློབ་ཕྲུག་བསྟན་འཛིན་བདེ་སྐྱོང་གིས་ང་ཚོས་༧གོང་ས་སྐུ་ཕྲེང་བདུན་པའི་སྐོར་སྦྱངས་ཡིན། ཡིན་ནའང་དེ་ཙམ་གྱི་ཡག་པོ་ཞིག་ཤེས་མ་སོང་ཟེར། དེ་བཞིན་ཕ་ཡུལ་དུ་ག་རེ་ཡོད་མེད་སྐོར་དྲིས་པར་ཤེས་གི་མེད་ཟེར།  འཛིན་རིམ་དགུ་བ་བུམ་པའི་བུ་མོ་བདེ་སྐྱོང་གིས་བོད་ལྗོངས་ང་ཚོའི་ཕ་ཡུལ་ཞེས་པའི་བྱ་འགུལ་འདི་ལོ་ལྟར་སྤེལ་གྱིན་ཡོད་ཀྱང་། སོ་སོས་དོ་སྣང་མ་བྱས་སྟབས། དམིགས་བསལ་ཤེས་རྒྱུ་མི་འདུག ཡིན་ནའང་།  ང་རང་ལ་མཚོན་ན་ཐེངས་འདིའི་བྱ་འགུལ་བརྒྱུད་བོད་ནང་བྱུང་ཟིན་པའི་ལོ་རྒྱུས་དང་དེའི་ཁྲོད་ཀྱི་མི་སྣ་སྙན་གྲགས་ཅན་ཁག་ཅིག་ཤེས་སོང་ཟེར། འཛིན་རིམ་བཞི་པ་བུམ་པའི་སློབ་གྲོགས་བསྟན་འཛིན་ཐབས་མཁས་ཀྱིས། ངས་ཐེངས་འདིར་༧གོང་ས་ལྔ་པ་ཆེན་པོའི་ཡབ་ཡུམ་གཉིས་ཀྱི་མཚན་དང་། ཁོང་གིས་བོད་ལ་སྔར་མེད་ཀྱི་གསར་གཏོད་གང་འདྲ་གནང་ཡོད་མེད། དེ་བཞིན་ཁོང་གིས་བོད་ཁྱོན་ཡོངས་རྡོག་རྩ་གཅིག་སྒྲིལ་དང་དགའ་ལྡན་ཕོ་བྲང་གསར་འཛུགས་གནང་བ་སོགས་ཀྱི་མཛད་འཕྲིིན་ཁག་ཤེས་རྟོགས་བྱུང་སོང་ཟེར།