དགེ་འདུན་རབ་གསལ།
འདས་པའི་བདུན་གཅིག་ཙམ་གྱི་རིང་ལ། ངེད་ཀྱི་ཉིན་རེའི་བྲེལ་བ་ཇེ་ཆེར་ཕྱིན། དེ་ནི་༧གོང་ས་མཆོག་ཕྲན་སྡོད་སའི་ས་གནས་སུ་ཆིབས་བསྒྱུར་གནང་བ་རེད། ཆིབས་བསྒྱུར་འདི་ནི་སྐུའི་གཅེན་པོ་ལྟག་མཚེར་རིན་པོ་ཆེས་འཛུགས་གནང་མཛད་པའི་ བོད་ཀྱི་རིག་གཞུང་བསྟི་གནས་ཁང་སྟེ། ད་ལྟ་ “བོད་དང་སོག་པོའི་ཆོས་རིག་བསྟི་གནས་ཁང་”དུ་མིང་བརྗེས་པ་འདིས་སྤྱན་ དྲངས་པ་རེད། ཆིབས་བསྒྱུར་འདིའི་སྐབས་སུ་༧གོང་ས་ཆེན་པོའི་མཛད་འཕྲིན་ལ་བརྟེན་ནས་བསྟན་ འགྲོའི་དགེ་རྩ་བླ་ན་མེད་པ་ཞིག་བསྐྲུན་པ་དང་། དེ་ཡང་བོད་མི་སྤྱི་དང་ནང་པ་ཡོངས་ཀྱི་གཟི་བརྗིད་དུ་ཆེ་བ་སོགས་རླབས་ཆེན་གྱི་ ཕྱག་རྗེས་དག་ནི་ཕྱག་དང་དད་པའི་ཡུལ་ཁོ་ན་ཡིན་པ་དང་། དེ་དག་ནི་འདིར་དམིགས་བཀར་གྱིས་འབྲི་བའི་རྩོལ་བ་མ་བྱས། ཕྲན་གྱིས་ཞུ་བར་འདོད་པ་ནི། བོད་མི་ཞིག་དང་། ལྷག་པར་ས་གནས་ཀྱི་བོད་མི་ཞིག་ཡིན་པའི་ཆ་ནས་གཏམ་འགའ་གླེང་བར་འདོད་པ་ཡིན།
བོད་དུ་ནང་པའི་ཆོས་ཉམས་ལེན་བྱེད་པའི་རྩ་བའི་གནད་དོན་ཞིག་ནི་༼དད་པ་དང་དམ་ཚིག་༽”ཅེས་པ་འདི་ཡིན་པ་རེད། དེ་ཡང་བླ་མ་བསྟེན་ཚུལ་ལས་འཕྲོས་ཏེ་ཉམས་ལེན་གྱི་རིམ་པ་གསལ་པོ་ཞིག་ཡོད། རིམ་པ་འདིའི་ནང་སྐུ་ཐང་དང་སྐུ་པར་ཚུན་ནས་དད་པའི་རྟེན་དུ་བྱས་ཏེ་མཆོད་པ་བྱེད། ཕྱག་བྱེད། འོན་ཀྱང་དེང་སང་གི་འཇིག་རྟེན་ན། ༧རྒྱལ་བའི་སྐུ་པར་དག་ཚགས་པར་དང་གསལ་བསྒྲགས་སོགས་ཀྱི་སྟེང་འགོད་པ་ལ་འཛེམས་ཟོན་མེད་ཁར། དྲིལ་བསྒྲགས་ཀྱི་ཆེད་དུ་དམིགས་ཏེ་སྐུ་པར་གང་མང་བཀྲམས་པ་དང་། དེ་ཡང་ཚོང་ཟོག་དྲིལ་བསྒྲགས་ཀྱི་ཡིག་ཆ་ལྟར། མཛད་རིམ་དྲིལ་བསྒྲགས་བྱས་སྟབས། སྐུ་པར་ཁག་མཆོད་པའི་རྟེན་ལས་གོ་བབ་ཆག་སྟེ། རྐང་འོག་ཚུན་ལ་ཡང་ཁྱབ་བཞིན་འདུག ངས་རྐང་འོག་ལ་ཤོར་ཟིན་པའི་དྲིལ་བསྒྲགས་ཡིག་ཆ་ཞིག་ས་ནས་བླངས་ཏེ་ཉར་བ་ཡིན། དེ་ ཙམ་གྱིས་ཀྱང་ག་ལ་ཚད་དེ། གསུང་ཆོས་ཀྱི་མཛད་རིམ་རེ་རེ་ནི་ གློ་བུར་དུ་སྒོར་མོ་མང་པོ་བཟོ་ཐུབ་པའི་མཛད་རིམ་ཞིག་ཏུ་བསྒྱུར། དེ་ཡང་། སྦྱིན་བདག་གི་རིམ་པ་སྟེ། ཨ་སྒོར་ཁྲི་གཅིག་ཡན་འབུལ་མཁན་ནི་ “རོགས་འདེགས་སྦྱིན་བདག་Benefactor”དང་། ཨ་སྒོར་ལྔ་སྟོང་ཡན་འབུལ་མཁན་ལ་ “གསེར་གྱི་སྦྱིན་བདག Gold Sponsor”། ཨ་སྒོར་སུམ་སྟོང་ཡན་འབུལ་མཁན་ནི་ “དངུལ་གྱི་སྦྱིན་བདག་ Silver Sponsor”སོགས་སྦྱིན་བདག་ གི་རིམ་པ་བཀར་བ་དང་། སྦྱིན་བདག་དེ་དག་ལ་དམིགས་བསལ་ཞབས་སྟེགས་འབུལ་བ་ཙམ་དུ་མ་ཟད། སྐུ་མདུན་ལ་སྒེར་གྱི་མཇལ་ཁ་ཡོད་པ། སྐུ་མདུན་དང་ལྷན་དུ་གསོལ་ཚིགས་ཡོད་པ་སོགས་ཁྱབ་བསྒྲགས་བྱས་ཏེ་དངུལ་བསྡུ་ཐབས་ མཛད་འདུག (འབྲེལ་ཐག་འདི་ནས་གཟིགས་ཐུབ། ) འདི་དག་ནི་ཆིབས་བསྒྱུར་གྱི་མཛད་རིམ་གོ་སྒྲིག་ཐད་ཀྱི་འགྲོ་གྲོན་ལ་དམིགས་པ་ཡིན་ན། རྒྱུ་མཚན་ལྡན་པ་ཞིག་གིས་འཐུས་པ་ཡིན་མོད། ཐེངས་འདིའི་གསུང་ཆོས་ལ་ཁེ་བཟང་ཨ་སྒོར་འབུམ་གཅིག་ལྷག་དང་། གསུང་བཤད་ལ་ཡང་ཨ་སྒོར་འབུམ་གཅིག་ལྷག་བྱུང་བ་རེད་ཅེས་ཚགས་པར་ཁག་ཏུ་ཐོན་འདུག (འབྲེལ་ཐག་འདི་ནས་གཟིགས་ཐུབ། ) ད་ནི་དངུལ་འདི་དག་ཀྱང་དགུང་ན་བགྲེས་པོར་ཕེབས་པའི་༧རྒྱལ་བ་རིན་པོ་ཆེའི་མཚན་ ཐོག་ནས་བྱུང་བ་རེད། སྦྱིན་བདག་གི་མཛད་རིམ་མང་དྲགས་པའི་རྐྱེན་ལ་བརྟེན་ནས་༧གོང་ས་མཆོག་གིས་བོད་ མི་མང་ལ་མཇལ་ཁ་གནང་སྐབས། ད་ང་ “ཐང་ ཡང་ཆད་གི།”ཞེས་སྐུ་ཐང་ཆད་པའི་ སྐོར་ཞལ་གསོན་པོ་ནས་གསུངས་འདུག ད་དུང་ད་ལྟའི་ཆོས་ཚོགས་འདི་ད་མུས་བཞིན་གནས་ཐུབ་པའི་རྒྱུ་མཚན་ཉག་གཅིག་དེ་ཡང་ སྐུ་སྒེར་ནས་མ་དངུལ་འབོར་ཆེན་གསོལ་རས་གནང་བ་ཁོ་ན་ལས་བྱུང་བ་རེད། ལར་ནས་ཨ་སྒོར་འབུམ་གཉིས་ལྷག་ཙམ་ཞིག་བོད་མི་ས་ཡ་དྲུག་ལ་ཡོད་དང་མེད་ལ་ཁྱད་པར་ ཆེན་པོ་མི་འདུག འོན་ཀྱང་། ༧སྤྱི་ནོར་ཆེན་པོ་སྐུ་ཐང་ཆད་པ་ནི་བོད་མི་ས་ཡ་དྲུག་གིས་བཟོད་ཐབས་དཀའ་བ་ཞིག་ རེད། དེ་ཡང་བསྟན་སྲིད་ཀྱི་ཆེད་དུ་མ་ཡིན་པར་སྒོར་མོའི་ཆེད་དུ་སྐུ་ཐང་ཆད་བཅུག་ན་ དེ་ལས་ཀྱང་བཟོད་ཐབས་དཀའ་བ་ཞིག་རེད།
༧སྐུ་མདུན་ཁ་སང་ས་གནས་ནས་ ཆིབས་ཕེབས་གནང་གྲུབ་སོང་། ཁ་སང་མི་མང་ལ་གསུང་བཤད་གནང་སྐབས་ཁོང་གིས་སྐུ་རྩེད་དང་སྦྲགས་ནས་སྔོན་གཤགས་ བཅོས་གནང་བའི་སྐབས་ཀྱི་ལོ་རྒྱུས་ཤིག་གསུངས་བྱུང་། གཤགས་བཅོས་འདི་རིགས་ནམ་རྒྱུན་ཡུན་ཐུང་ཞིག་གིས་འགྲུབ་པ་ཡིན་མོད། སྐུ་མདུན་རང་ལ་གཤགས་བཅོས་འབུལ་སྐབས་ཆུ་ཚོད་གསུམ་འགོར་བྱུང་ཞེས་གསུངས་སོང་། སྐབས་འདིར་ངའི་མིག་མཐའ་ན་མཆི་མ་ཤར་སེ་འདུག ངའི་སེམས་ལ་ལྭ་དཀར་པོ་གོན་པའི་སྨན་པ་དང་སྨན་ཁང་སོགས་གཤགས་བཅོས་ཀྱི་བརྒྱུད་ རིམ་ཞིག་ཤར་བཞིན་འདུག སེམས་ཚོར་འདི་འདྲ་ནི་ང་གཅིག་པུ་ལ་ཡོང་བ་ཞིག་ག་ལ་ཡིན། བོད་མི་ཡོད་དོ་ཅོག་གིས་སྐུ་མདུན་གྱི་སྐུ་ཕྱྭ་ལ་ཐུག་སྐབས་འདི་ལྟར་མིག་ཆུ་ གཏོང་བ་རེད། ད་སྐུ་ཕྱྭའི་ སྐོར་རང་གི་ མྱོང་བ་སྦྱར་ནས་བཤད་ན། ཟླ་འདིའི་ཚེས་ ༡༡ ཉིན་སྐུ་མདུན་ཁོང་འདི་ག་ས་གནས་ལ་ཕེབས་པ་རེད། དེའི་མཚན་མོ་དེར་ང་ལ་གཉིད་མ་ཡོང་། མཚན་གང་ལ་ངང་སྒུག་ཅིག་གིས་གཉིད་ཡོངས་སུ་དཀྲོགས་བྱུང་། ངང་སྒུག་དེ་ནི་ཚེས་ ༡༢ ཉིན་གྱི་ཞོགས་ཀར་ ངས་བསྒྱུར་བའི་ “སངས་རྒྱས་ཀྱི་ དཔའ་རྟུལ་ཚོ་” ཞེས་པའི་དེབ་དེ་༧སྐུ་མདུན་ལ་འབུལ་ཆེད་རྒྱལ་སྤྱིའི་བོད་རང་བཙན་ལས་འགུལ་ཚོགས་ པ་དང་ལྷན་དུ་མཇལ་ཁ་ཡོད་ཅེས་ང་ལ་བཤད་བྱུང་། དེར་བརྟེན། དེ་ལ་ངང་སྒུག་བྱས་པ་ཡིན། ཞོགས་ཀ་སྔ་པོ་ནས་བྱིས་པ་གཉིས་ཀྱི་སློབ་གྲྭའི་གྲ་སྒྲིག་ཟིན་པ་དང་། ངེད་ཐད་ཀར་ཆོས་ཚོགས་ལ་ཕྱིན་པ་ཡིན། དེར་ངེད་ཀྱིས་ལག་འཁྱེར་ཁ་པར་དང་ལྡེ་མིག་སོགས་ཅ་ལག་ཡོད་ཚད་རླངས་འཁོར་དུ་བཞག་ ནས་ཕྱིན་པ་ཡིན། དེའི་རྒྱུ་མཚན་ནི་མཇལ་ཁ་ཡོད་སྟབས་ལུས་པོར་བརྟག་དཔྱད་བྱེད་རྒྱུ་རེད་བསམས་ བྱུང་། ཆོས་ཚོགས་སུ་ཡུད་ཙམ་སྒུག་རྗེས་ང་ཚོ་༧སྐུ་མདུན་བཞུགས་སའི་དགོན་པའི་ནང་ཁྲིད་ བྱུང་། དེ་ནས་ཁང་མིག་ཅིག་ཏུ་བསྡད་བཅུག་བྱུང་། ཡུད་ཙམ་ནས་༧སྤྱི་ནོར་ཆེན་པོ་ཆིབས་བསྒྱུར་གནང་ནས་ང་ཚོ་ལ་སྐར་མ་འགའ་ཡི་རིང་ བཀའ་སློབ་གནང་བྱུང་། དེ་ནས་༧སྐུ་མདུན་ཕེབས་གྲུབ་རྗེས་ང་ཚོ་ཡང་རང་འགུལ་གྱིས་ལོག་ཕྱིན་པ་ཡིན། གཟིགས་དང་། ང་ཚོ་འདིར་སླེབས་ནས་༧སྐུ་མདུན་ལ་མཇལ་ཁ་ཞུས་གྲུབ་པའི་བར་དུ་ང་ཚོའི་ལུས་པོར་ བརྟག་དཔྱད་བྱེད་མཁན་མི་འདུག འོ་ན། འདི་ནི་ང་ཡོད་པའི་ཚོགས་པ་འདི་ལ་འབྲེལ་ཡོད་རྣམས་ཀྱིས་ཡིད་ཆེས་བྱས་རྐྱེན་རེད་ ཅེས་བཤད་ན། ང་ཚོའི་གྲས་སུ་ཚོགས་པ་ནས་མ་ཡིན་པའི་མི་གཅིག་ཀྱང་སླེབས་འདུག སྐུ་མདུན་མ་ཕེབས་པའི་གོང་རོལ་དེ་ག་རང་ལ་ང་ཡོད་པའི་ཚོགས་པ་དེའི་ཚོགས་གཙོས་ “ཁྱེད་རང་འདིར་བསྡད་ན་འགྲིག་གི་ མ་རེད་”ཅེས་ངོ་ སྤྲོད་གནས་ལུགས་བཤད་སྟབས་ཁོང་ཡང་ཕྱིར་ལོག་སོང་། དེ་མིན་ན། ཁོང་ཡང་ཚོགས་པའི་ཁོངས་སུ་མཇལ་ཁ་ཐོབ་རྒྱུ་ལ་དྭོགས་པ་མེད། ང་ལ་ཉམས་མྱོང་འདི་འདྲ་ཐེངས་མ་གཉིས་ལ་བྱུང་། གཉིས་ཆ་ལ་ལུས་པོར་བརྟག་དཔྱད་གཏོང་བ་དང་། མིང་ཐོ་ཞིབ་བཤེར་བྱེད་པ། མིང་དང་ངོ་སྤྲོད་ལག་འཁྱེར་བལྟ་བསྡུར་བྱེད་པ་སོགས་སྣེ་གཅིག་ཀྱང་མི་འདུག སྔོན་མ་ཡིན་ན་དེ་འདྲ་ཡོད། ད་ལྟ་མེད་པ་གང་རེད་ཅེས་ས་གནས་ཀྱི་མི་ཞིག་ལ་དྲིས་པ་ཡིན། ཁོང་གིས། “སྔོན་མ་ཡིན་ན། ༧སྐུའི་གཅེན་པོ་བཞུགས་སྐབས། ཨ་རིའི་དབུས་གཞུང་གི་བདེ་སྲུང་མི་སྣ་ཡོད་ཡོད་ཐོག ས་གནས་ཀྱི་ཉེན་རྟོག་པ་དང་བདེ་སྲུང་ལས་བྱ་གླ་གི་ཡོད་པ་རེད། དེ་ཐེངས་དེ་འདྲ་མི་འདུག”ཅེས་བཤད་ བྱུང་། ད་ གོང་གི་ཨ་སྒོར་འབུམ་གཉིས་ལྷག་གི་ཁེ་བཟང་དེས་སྐུ་ཕྱྭའི་ཆེད་དུ་བདེ་སྲུང་གི་ ལས་བྱ་འཕར་མ་གླ་མི་ཐུབ་པ་གང་ཡིན་ནམ། དགོས་པ་ཞིག་ཆད་འདུག་བསམས་ནས་སེམས་ཧ་ཅང་སྐྱོ་བྱུང་། དེ་ནས་ཚེས་ ༡༣ ཉིན་དེར་བོད་མི་ཚོར་མཇལ་ཁ་དང་བཀའ་སློབ་ཡོད་པ་རེད། ཉིན་འདིའི་གནས་སྟངས་ནི་ ཁ་གདངས་ནས་སྡོད་དགོས་པ་ཞིག་འདུག་ཟེར། ང་དེ་ན་མེད། ཐོག་མའི་བོད་མི་གཅིག་པུར་མཇལ་ཁ་གནང་འཆར་དེ་འགྱུར་ནས་བོད་སོག་ཐུན་མོང་ལ་བཀའ་ སློབ་གནང་རྒྱུའི་མཛད་རིམ་ཆགས། ཐོག་མར་འདུ་ཁང་ཕྱི་རོལ་དུ་བཀའ་སློབ་གནང་རྒྱུའི་འཆར་གཞི་བྱས་ཡོད་པ་དེ་གློ་ བུར་གྱི་ཆར་ཤུགས་ཆེ་སྟབས་འདུ་ཁང་ནང་དུ་སྤོས་ནས་གནང་དགོས་ཤར། བོད་སོག་མི་རིགས་བསྡོམས་བཞི་བརྒྱ་ལྷག་ཡོད་པ་དང་། དེ་ཚོ་ཚང་མ་ལ་གཟུགས་པོར་བརྟག་དཔྱད་མེད་པར་ཐད་ཀར་འདུ་ཁང་ནང་འཚང་ཁ་བརྒྱབ། ངོ་ཤེས་དང་མི་ཤེས་པའི་མི་སྣ་སྣ་ཚོགས་སྐུ་མདུན་གྱི་མདུན་ཏག་ཏག་ལ་སླེབས་ཐུབ་པར་གྱུར། དེ་ནས། མཐའ་ན་གསུང་བཤད་གནང་རྒྱུའི་སྒྲ་འཕེལ་ཁ་པར་༼ microphone༽ཡང་གྲ་སྒྲིག་མེད་པར་༧སྐུ་ མདུན་དང་སོག་སྐད་སྐད་བསྒྱུར་གཉིས་བརྗེ་རེས་བྱེད་དགོས་པ་བྱུང་འདུག ད་སྐུ་ཕྱྭའི་གནད་དོན་དེ་གང་དུ་ཡོད། ༧རྒྱལ་བ་རིན་པོ་ཆེ་ནི་བོད་མི་ས་ཡ་དྲུག་གི་སྤྱི་ནོར་རེད། མཁྱེན་ནམ། སྲུང་སྐྱོབ་ཀྱི་གྲ་སྒྲིག་སྲ་ཐག་ཐག་ཅིག་གནང་མི་ཐུབ་པ་དེ་གང་ཡིན་ནམ། སྐུའི་མཛད་རིམ་ལས་བྱུང་བའི་ཁེ་བཟང་ཨ་སྒོར་འབུམ་གཉིས་ལྷག་ཡོད་པ་དེ་ནས་འགྲོ་སོང་བཏང་སྟེ། གསུང་ཆོས་གནང་སའི་སློབ་གྲྭའི་ཚོགས་ཁང་དུ་མི་མང་ལ་བཀའ་སློབ་གནང་མ་ཆོག་པ་གང་ཡིན་ནམ། ཚོགས་ཁང་དེར་མ་མཐའ་ལ་ཡང་གཟུགས་པོར་བརྟག་དཔྱད་བྱེད་ཀྱི་ཡོད་པ་རེད། ཆར་ཤུགས་ཆེ་ན་ཡང་༧སྐུ་མདུན་གྱི་འཁྲིས་ལ་མི་མང་འཚང་ཁ་རྒྱག་པ་ཞིག་ཡོང་གི་མ་རེད། ཐུགས་རྗེས་གཟིགས། ༧རྒྱལ་བ་རིན་པོ་ཆེའི་སྐུ་ཕྱྭ་ལ་ལྷོད་གཡེང་མ་ཤོར་པ་ཞིག་གནང་རོགས། མཐའ་དོན་ས་གནས་འདིའི་ཆོས་ ཚོགས་ཀྱི་གནས་བབ་དང་དེའི་ཕན་ཐོགས་དང་། ཆོས་ཚོགས་དང་བོད་མིའི་འབྲེལ་བ། ཆོས་ཚོགས་ཀྱི་རྒྱུན་ལྡན་མཛད་རིམ་སོགས་ཀྱི་སྐོར་ལ་བསམ་ཚུལ་འགའ་ཡོད་མོད་ཐེངས་ འདིར་བྲིས་མེད་ལ། གོང་གི་དོན་ཚན་རྣམས་འདི་ལྟར་དམར་རྗེན་དུ་བྲིས་པ་ནི། གནས་ཚུལ་འདི་དག་མཐོང་བ་དང་ཐོས་པའི་རྐྱེན་བྱས་ཏེ། “མཚམས་དང་ཚོད་ཅིག་དགོས་”ཞེས་པའི་བཤད་སྲོལ་ལྟར་བློས་མ་ བཟོད་ནས་བྲིས་པ་ཡིན། ད་དུང་སྐད་ཆ་འདི་དག་འབྲི་བའི་ཀུན་སློང་ནང་། ཕྲག་དོག་དང་ཡིད་མ་རངས་པ་སོགས་སྒེར་གྱི་གནད་དོན་སྣེ་གཅིག་ཀྱང་འདྲེས་མེད་ཅེས་ གསལ་བཤད་བྱེད་རྒྱུ་ཡིན། དེས་ན། གནས་ཚུལ་འདི་དག་ལ་འབྲེལ་ཡོད་ཁག་གིས་ཀྱང་ཞིབ་འཇུག་དང་། གསལ་བཤད། ཡར་རྒྱས་སོགས་གནང་རྒྱུའི་འབོད་སྐུལ་ཤུགས་ཆེར་ཞུ་བ་དང་ཆབས་གཅིག ངེད་ཀྱིས་མ་ཤེས་མ་རྟོགས་པའི་དབང་གིས་སྐད་ཆ་ནོར་འཁྲུལ་ཅན་བཤད་ཡོད་ཚེ། “ལྐུགས་པ། ཁྱོད་ནོར་འདུག”ཅེས་སོགས་ཀྱི་ གཤེ་ཚིག་གིས་ སྤྱོས་ན་ཡང་། ༧སྤྱི་ནོར་ཆེན་པོའི་སྐུ་དོན་ཡིན་སྟབས། ལག་གཉིས་ཐལ་མོ་སྦྱར་ཏེ་ཐུགས་རྗེ་ཆེ་ཞུ་བ་ཡིན།
ངོ་ཚ་རྒྱུ་མེད་པའི་བོད་པ་འདི་ཚོས་༧གོང་ས་མཆོག་ཚོང་རྫས་ལྟ་བུར་བེད་སྤྱོད་བཏང་བ་ནི་ད་ཐེངས་གཅིག་པོ་ག་ལ་ཡིན།དེ་མིན་ཕྱི་རྒྱལ་གྱི་ཆོས་ཚོགས་ཚོས་རང་ཉིད་ཀྱི་ཁ་རྒྱབ་ཀྱི་ཆེད་དུ་དེ་ལྟར་བྱེད་བཞིན་ཡོད་པ་མིག་མཐོང་ལག་ཟིན་རེད།ད་ནི་ངོ་མ་མཚམས་དེ་མཚམས་ཤིག་དགོས་གི་ཡ།
དེང་སང་བླ་ཆེན་མི་ཆེན་དག་གིས་སྐུ་མདུན་ཚོང་བསྒྱུར་བྱེད་པ་ནི་ཡིད་ཤིན་ཏུ་སྐྱོ་བ་ཞིག་རེད། རབ་གསལ་གྱིས་དངོས་དོན་གསུངས་བར་ཐུགས་རྗེ་ཆེ།
༧ རྒྱལ་བའི་སྐུ་ཕྱྭའི་ཐད་ལ་བོད་གཞུང་བདེ་སྲུང་གིས་འགན་གནང་དགོས་པ་ལས་ཨ་ཀྱྰ་རིན་པོ་ཆེ་མཆོག་ནས་ཁོང་བླ་རྒན་ཞིག་གིས་གོ་སྒྲིག་གནང་དགོས་པའི་ཚད་ལ་སླེབས་ཡོད་པར་སེམས་ལ་ཡང་ཨེ་ཤར་སྙམ། རིན་པོ་ཆེས་ཆོས་ཚོགས་ཀྱི་ཡོང་འབབ་ལ་དམིགས་ནས་ཞུས་ཤིང་ ༧ གོང་ས་མཆོག་ནས་ཀྱང་ཆོས་ཚོགས་ཀྱི་མ་རྩར་དམིགས་ནས་ཆིབས་སྒྱུར་གནང་བ་ཡིན་ན། སྐུ་མདུན་བེད་སྤྱོད་སྐོར་གྱི་དཔྱད་གཏམ་འདི་ཨ་ཀྱྰ་རིན་པོ་ཆེའི་བར་དུ་ལུས་དོན་མི་འདུག་སྙམ། སོག་པོ་ཞེས་པའི་ཐ་སྙད་འདི་དེ་ཙམ་རྣར་མི་སྙན་ན་རྒྱ་དམར་དགྲ་རུ་འཛིན་པའི་གཅེན་པོའི་ཆོས་ཚོགས་རྒྱ་བོད་སོག་གསུམ་གྱི་བྲོ་རར་རེ་བའི་གོང་ས་མཆོག་ལ་ཁག་འདེད་བྱས་ན་རན། དམར་པོའི་དབང་བསྒྱུར་འོག་ནས་མི་ཚེ་ཟད་པའི་མི་ཞིག་ལ་མཚོན་ན་སླད་ཅིག་ཡོད་མི་སྲིད་པ་མིན་པས། ཆུང་མའི་མདུན་ནས་བསྒམ་ཚུགས་འཛིན་འདོད་ན་འདི་ཙམ་བཟོད་པར་འོས། དགེ་འདུན་རབ་གསལ་གྱི་སྐོར་ཁག་ཅིག་གིས་ཨ་ཀྱྰ་རིན་པོ་ཆེ་ཆོས་ཚོགས་ནས་ཐོན་རྩིས་ཡིན་སྐོར་གྱི་རྫུན་གཏམ་བསྒྲིགས་ཏེ་སྐུ་སྒེར་ཡིག་ཚང་ལ་དབུ་སྐོར་བཏང་པའི་སྐད་ཆ་ཞིག་གོ་ཐོས་བྱུང་སྟེ། དཀྱུས་མ་ཞིག་གིས་རྩོད་རྙོག་གི་གཞི་བསླང་བར་མི་འདོད། དེས་ན་ཁོས་བཤད་ཚད་བདེན་པ་ཡིན་སྲིད་ཀྱང་ཆོས་ཚོགས་འདི་ཅི་ལྟར་འཚོ་ཐུབ་པ་བྱུང་པའི་མགོ་མཇུག་བར་གསུམ་ལ་རྒྱུས་མེད་པ་དག་གིས། བྱེད་རྒྱུ་༼བསམ་ཤེས་༽ཞེས་པ་ལས་གཞན་གང་ཡང་མེད་དོ།།
དྲང་པོ་བཤད་ན་དང་པོ་ནི་༧གོང་ས་མཆོག་ཀྱང་ཆོས་ལུགས་བྱེ་བྲག་པ་ཞིག་ལ་ཐུགས་འཁུར་གནང་ཆེ་བའི་ལན་ཡིན།
གཉིས་པ་ནི་ཨ་ཀྱ་བླ་མ་ལགས་ལ་ད་སྔོན་གློག་འཕྲིན་ཁང་རྣམས་ཀྱི་བཟང་ངན་ཚང་མ་མ་དྲི་པའི་ལན།
གསུམ་པ་ནི་བོད་སོག་གཉིས་གི་མཉམ་དུ་ཡིན་ན་དེ་ལ་བོད་ཀྱི་ཆོས་བརྒྱུད་བཞི་པོ་ཡང་རེས་མོས་གནང་ནས་བསྡད་ན་ཡག།
བཞི་པ་ནི་དེ་སང་མིང་གསར་པ་དེ་གཏན་ནས་བཏགས་མི་ཆོག་ཟེར་དགོས་།།
༧གོང་ས་མཆོག་གི་མཛད་རིམ་གོ་སྒྲིག་གནང་ཕྱོགས་ལ་འགྱུར་བ་ཞིག་བྱུང་ཡོད་པ་རེད། ཕྱི་རྒྱལ་ལ་ག་དུས་ཕེབས་ནའང་སྔ་དྲོ་མ་གཏོགས་ཕྱི་དྲོ་གསུང་ཆོས་དང་བཀའ་སློབ་སོགས་ཀྱི་མཛད་རིམ་མེད་པ་བཟོས་ཡོད་པ་རེད། མི་སྒེར་མི་ཤེས་མ་གཏོགས། མི་དམངས་ཀྱི་མཇལ་ཁའང་འདིའི་ནང་དུ་ཚུད་ཀྱི་ཡོད་སྙམ། འདིའི་ཕྱོགས་ནས་གནས་ཚུལ་འདྲ་ཡོད་དམ།
མ་གཞི་༧གོང་ས་མཆོག་ང་ཚོའི་རྩ་བའི་བླ་མ་ཡིན་རུང་ཁོངཡང་མི་སྒེར་ཞིག་རེད། ཁོང་ལའང་ཁོང་ཉིད་ཀྱི་དགོངས་གཞི་དང་ཐུགས་སྣང་ཡོད་པ་རེད། མཚམས་རེར་ཁོང་གི་ཐུགས་འདོད་ལྟར་མཛད་རིམ་ཐག་གཅོད་པའི་སྐབས་ཀྱང་ཡོད་སྲིད་པ་རེད། འདིའི་ཐད་ལ་དགོངས་ཚུལ་ཅི་ཡོད།
ཁ་བརྡའི་ཐོག་རྨ་ཆུའི་རླབས་སྒྲ་མཚན་ཅན་གྱིས་སྐབས་འབྲེལ་གྱི་དོན་ཚན་གསལ་པོ་འགའ་བཀོད་འདུག་པ་འདིར་ལུང་དྲངས་ཡོད།
—————————–
༤༤༽ རྨ་ཆུའི་རླབས་སྒྲ་ནས།
སྤྱི་ལོ་ ༢༠༡༠ ཟླ་ ༥ ཚེས་ ༢༠ གི་ཆུ་ཚོད་ ༢༢ སྐར་མ་ ༢༢
དྲ་ གྲོགས་རྣམས། གནས་ཚུལ་འདི་ངས་ཀྱང་མི་དམངས་ལ་གོ་བརྡ་འཕྲོད་ཙམ་ཞིག་འབྲི་དགོས་བསམ་ཡོད་ཀྱང། དགེ་འདུན་རབ་གསལ་ནས་དོན་ཚང་ལ་གནད་ལ་འཁེལ་པ་ཞིག་བཤད་འདུག་པས།
ང་གཉིས་ས་གནས་དེར་དངོས་སུ་ཡོད་པས་མིག་མཐོང་ལགས་ཟིན་གྱི་གནས་ཚུལ་རེད།
ཧེ་བག་ཅི་ཡང་མི་འདུག། ངས་ཧང་སང་བ་གཉིས་ཞུ་འདོད་ཅུང། བོད་མིའི་བཀའ་སློབ་དང་དགོན་པའི་རབས་གནས་གཉིས་ལའང་ང་དངོས་སུ་སོང་ཡིན་སྐབས་ དུས་གནས་ཚུལ་ནི་དངོས་གནས་ཧ་སང་དགོས་པ་ཞིག་རེད།བདག་ས་མཐར་ཉུལ་ནས་མི་ལོ་ ཉིཤུའི་རང་༸གོང་ས་མཆོག་ཕེབས་སར་ཧ་ཅིང་མང་པོ་གཅར་མྱོང་ཡང་ད་ཐང་ལས་བློ་ཕམ་པ་ ཞིག་ཅུང་མ་མྱོང།བོད་མིའི་བཀའ་སློབ་སྐབས་དང་པོ་ས་ཆ་གཏན་མ་ཁེལ་བར་
༸གོང་ས་མཆོག་ཆར་བའི་ནང་ ནས་མི་དམངས་མཉམ་དུ་དབུ་ལ་ཆར་གདུགས་ཆུང་ཆུང་ཞིག་ཕུབ་ནས་སྐར་ཆ༥ཙམ་ལ་བཞུག་སོང། དེ་ནས་བཀའ་སློབ་གནང་སྐབས་བོད་མི་ནི་བཞེས་གཏོང་མཁན་བུ་ཕྲུག་ཆུང་ཆུང་བཅུ་ གཉིས་དང་གཞན་གསར་འགྱུར་གཏོང་མཁན་ཁ་ཤས་དང་སྐུ་ངོ་དོན་གཅོད་སྐུ་འཁོར་ལས་གཞན་ འདུ་ཁང་ནང་གི་མི་རྒྱ་ཆའི་གོ་དགུ་སོག་པོ་རེད། སྒོ་སྲུང་མང་ཆེ་བ་སོག་པོ་ཡིན་པས་བོད་པ་ཚང་མ་སྤྱི་ནས་མ་བཏང་བ་དངོས་སུ་མཐོང། སྐབས་དེར༸གོང་ས་མཆོག་བོད་པའི་ཕྲུག་གི་རྣམས་གྱིས་མདུན་དུ་མར་ཕེབས་ནས་བཀའ་ འདྲི་འགའ་གནང་སོང།ངའི་ཁྲིས་ནས་སྐྱེ་དམན་རྒས་སོང་ཞིག་གིས་ཁྱོད་རང་མོན་གྷོ་ ལེ་ཡིན་ནམ་ཟེར།
ངས་ང་བོད་པ་ཡིན་ཞེས་བཤད་སྐབས་གསུངས་སྐད་ཅུང་མཐོ་ཙམ་བྱས་ཏེ་ག་རེ་དེ་རིང་བོད་པར་བཀའ་སློབ་
གནང་ཡ་མ་རེད་པས།འདི་ཚང་མ་སོག་པོ་རེད་འདུག་ག་རེ་བྱས་རེད་ཞེས་དྲིས་སོང་།
ཕྱིས་སུ་སྐྱེ་དམན་དེ་ཞིང་གཤེགས་དམ་པ་༸སྐུའི་གཅེན་པོ་སྟག་མཚེར་རིན་པོ་ཆེས་ཡུམ་རེད་འདུག།
ངའི་བསམ་པར་ཆོས་ཚོགས་འདི་སྐུ་འབུམ་བྱམས་བརྩེ་གླིང་ཡིན་པ་དང་ཁོ་མོ་ནི་ཆོས་ཚོགས་འདིས་དོན་གྱིས་
བདག་པོ༸སྐུའི་གཅེན་པོ་མཆོག་གི་ཤུལ་ལྷག་ནང་མི་ཡིན་པའི་ཆ་ནས་ཁོང་ལ་བཞུགས་ས་དམིགས་བསལ་བ་
ཞིག་ཡོད་དགོས་ངེས་ཡིན་ཀྱང་།དྲིན་ལན་དང་སྒོར་མོ་ལས་སྒོར་མོ་གལ་ཆེན་དུ་རྩི་བའི་སྐྱེས་ཆེན་ཁོང་ནི་
གསེར་དང་དངུལ་གྱིས་སྤྱིན་བདག་གིས་བསྐོར་ནས་བྲེལ་པའི་ངང་དོན་སྣང་ཙམ་ཡང་མི་འདུག།
སྲས་ཀུན་དགའ་དང་ཡུམ་གཉིས་ནི་ང་ཚོ་དང་མཉམ་དུ་སོག་རྒན་རྣམས་ཀྱི་གསེབ་དྲི་ལ་སྣུམ་བཞིན་མི་ཚོགས་
གི་འཚང་གའི་དཀྱིལ་ནས་ འདུག་དགོས་བྱུང་སོང།ཧང་སང་དགོས་བ་གཞན་ཞིག་ནི་༸གོང་མཆོག་ཆིབ་སྒྱུར་གནང་པའི་ ཉིན་གཉིས་བ་རེད།ཞོག་ག་དེར་འདུ་ཁང་ནང་དུ་རབས་གནས་བྱེད་རྒྱུ་རེད་ཞེས་ཐོས་སོང་ པའི་འགོག་མཁན་དང་བལྟ་མཁན་ནི་མེད་པས་ང་སྔ་པོ་ནས་འགྲོ་ཡིན་༸གོང་ས་མཆོག་གིས་ ཆོས་ཚོགས་གི་དམིགས་ཡུལ་དང་མ་འོངས་པའི་ལམ་སྟོན་ད་དུང་སྐུའི་གཅེན་པོའི་ཡང་ སྲིད་བསྐོར་བཀའ་སློབ་འགའ་གནང་ནས་ཨ་ཀྱྭ་ལ་༸སྟག་མཚེར་རིན་པོ་ཆེ་སྐུ་ཕྲེང་ག་ ཚོད་རེད་ཞེས་གསུངས་སྐབས་ཡར་ཚིག་གཅིག་ཀྱང་ཞུ་ཡ་མི་འདུག། ང་དངོས་གནས་ཧང་སང་སོང་།ཨ་ཀྱྭ་ནི་རྗེ་སྐུ་འབུམ་དགོན་པའི་དགོན་བདག་ལྟ་བུའི་ བླ་ཆེན་ཞིག་ཡིན་པར་དུས་ཀུན་བསྒྲགས་བཞིན་ཡོད་ལ་ད་དུང་༸སྐུའི་གཅེན་པོ་མཆོག་ གིས་བཀའ་བ་བརྒྱ་ཕྲག་གི་འབད་པ་ལས་བྱུང་པའི་ཆོས་ཚོགས་འདིས་ཤུལ་འཛིན་ཡིན་ལ།༸ སྟག་མཚེར་རིན་པོ་ཆེ་ནི་སྐུ་འབུམ་དགོན་པའི་ཁྲི་ཟུར་དང་ཆོས་ཚོགས་འདིས་དོན་ གྱི་བདག་པོ་ཡིན་པས།ཁོང་གི་ཡང་སྲིད་བསྐོར་ལ་ཐུགས་བསམ་འདི་འདྲ་ཞིག་ཀྱང་ཨ་ ཀྱྭའི་གཏོང་མ་མྱོང་བ་ཡ་མཚན་རེད། རབ་གནས་གྲོལ་ནས་༸གོང་ས་མཆོག་ཕེབས་སྐབས་གྲལ་བཞུགས་ན་རྒྱ་དང་སོག་པོ་གང་ཡིན་མ་ ངེས་པའི་གཟའ་ཚང་གཉིས་ལག་ལ་ཁ་བཏགས་བཟུང་ནས་སྡད་འདུག་༸གོང་ས་མཆོག་དེ་གཉིས་ གྱི་ཁྲིས་ལ་ཕེབས་ཚེ་ཨ་ཀྱྭའི་ཁོ་གཉིས་ཁོ་ལ་དྲིན་ཅན་ཡིན་པའི་འགྲེལ་བཤད་རྒྱབ་ སོང། ༸གོང་ས་མཆོག་གིས་ཡག་པོ་རེད་གསུངས་བཞིན་ཕྱག་གིས་འཇལ་ཁ་བཞག་ཏེ་ཁ་བཏགས་སྐེར་ གཡོག་སོང་སྐབས་དེར་ཡང་ཨ་ཀྱྭའི་མཉམ་དུ་སྐུ་པར་ལེན་དགོས་པའི་རེ་བ་ཞུས་སོང་དེ་ ལ་༸གོང་ས་མཆོག་གིས་ཞལ་ནས་སུན་སྣང་ཞིག་མངོན་བཞིན་ད་འགྲིག་གི་མ་རེད་པས་གསུང་ སོང་ཡང། སྐབས་དེར་ཨ་ཀྱྭའི་སྐྱེ་དམན་དེས་ལག་གི་པར་ཆས་བླང་ཏེ་འུ་ཚུག་མཐའ་སྐྱེལ་གི་ཁོ་ རང་རང་གི་པར་ཁ་ཤས་རྒྱབ་ནས་འགྲོ་སོང།
གནས་ཚུལ་དངོས་བྱུང་དེ་དག་མཐོང་སྐབས་ངའི་བསམ་པར་ཆོས་འབྲེལ་ཅི་ཡང་མེད་པའི་ཕྱི་གླང་བ་རྣམས་
ཀྱིས་ཀྱང་༸གོང་ས་མཆོག་ལ་འདི་འདྲའི་གུས་མེད་དང་སྐུ་ཕྱྭ་ལ་སྣང་མེད་མི་བྱེད་པས། ཨ་ཀྱྭ་ནི་བཟང་ན་ངན་
ནའང་བོད་པའི་བླ་མ་ཞིག་ཡིན་ཀྱང་དེ་ལྟར་སྣང་མེད་བྱེད་དགོས་པའི་རྒྱུ་མཚན་ཅི་ཡིན་ནམ་སྙམ།
དེ་ལྟར་བསམ་བཞིན་བསམ་ བཞིན་ཨ་ཀྱྭ་དང་བོད་གཞུང་སྐུ་ཚབས་སོགས་ཀྱིས་ཐོག་ཁོང་ཁྲོ་གཏང་ནས་ལང་བཞིན་མིག་ ནས་ཞེ་སྡང་གི་མཆི་མ་བཞུར་ཏེ་མཚན་མོ་གཉིད་ཀྱང་ཁུག་མ་སོང།
མཐའ་དོན་གཞུང་དམངས་སུ་ཡིན་ཀྱང་ཐུགས་རྗེ་གཟིགས་༸གོང་ས་མཆོག་ལ་ཁ་ཙམ་མ་ཡིན་པར་དོན་གྱིས་
གཅེས་སྤྲེས་བྱེད་རོགས་ཞུ་ཞེས་ལག་གཉིས་སྙིང་གར་ཟིམ་ཏེ་གསོལ་བ་འདེབས་ཀྱི་ཡིན།
ཏཱ་ལའི་བླ་མས་རྒྱ་མི་གསར་འགོད་པར་གསུང་ཆོས་འཛིན་བྱང་གོང་ཚད་མཐོ་དོན་ཐད་གསུང་དོན། ༼གསུང་ཆོས་འཛིན་བྱང་གོང་ཚད་རྩ་འཛུགས་བྱེད་མཁན་གྱིས་གཏན་འཁེལ་བྱས་པ་རེད་ལ། ངོས་རང་ལ་དངུལ་ལོ་གཅིག་ཀྱང་རེག་གི་མེད། མང་ཆེ་བ་རོགས་བསྐྱོར་ལས་རིགས་ལ་གཏོང་གི་ཡོད་པ་རེད།༽(达赖喇嘛在纽约有一系列讲座。当有人问他为什么听他教导的票子在网上卖价很高时，他说，听讲座的票价是组织者定的，没有任何钱归他个人。他还说，有些钱是给慈善事业的。/2010年 5月 20日/美国之音 )
དགེ་འདུན་རབ་གསལ་ལགས་ཀྱི་རྩོམ་རྩལ་འདི། དགེ་འདུན་རབ་གསལ་ལགས་ཀྱི་སྤོབས་པ་འདི། གནས་ལུགས་དང་རྒྱུ་མཚན་བསྟར་བའི་གཏན་ཚིགས་འདི། སུས་སྒུལ་ཐུབ་བམ། སྨོན་པ་འཆོར་བ་ཞིག་གནང་འདུག ཐུགས་རྗེ་ཆེ་ཞུའོ།། རྗེས་སུ་ཡི་རང་ཞུའོ།། ཁྱེད་ཀྱི་སྟངས་སྟབས་འདིར་ལྷག་བསམ་ལྷད་མེད་ཀྱིས་རྒྱབ་སྐྱོར་ཞུའོ།།
ཞྭ་ནག་བློ་གྲོས་ལགས། དྲན་སྐུལ་དེར་ཐུགས་རྗེ་ཆེ་ཞུ།
ང་ཚོའི་ཤེས་ཡོན་པ་ཚོ་ནི་ཤེས་ཡོན་མེད་མཁན་ཚོ་དང་འདྲ་གི་མ་རེད། དུས་ཚོད་ཀྱིས་ལྕོགས་ན་ཁོང་རྣམ་པ་འདིར་ཕེབས་གི་རེད། དགོས་གལ་ལ་ཐུག་དུས་བསམ་ཚུལ་རྣོ་ངར་ཅན་གྱི་རྩོམ་ཡིག་རེ་སྤེལ་གི་རེད། དུས་ཚོད་ཀྱིས་འདང་གི་མེད་དུས་ང་ཚོས་དམིགས་བསལ་གྱི་ས་ཆ་ཞིག་གོ་སྒྲིག་བྱས་ཀྱང་ཕན་ཐོགས་གི་མ་རེད། ཁོང་ཚོར་ཡང་རང་རང་གི་མཛད་བྲེལ་ཆེ་སྐོར་ནམ་རྒྱུན་ནས་གསུང་གི་ཡོད་སྟབས། ནན་སྐུལ་བྱས་ན་ཡག་པོ་ཡོད་པ་མ་རེད།
མཆན་འདེབས་སྟངས་ཀྱི་ཕྱོགས་ལ་བསམ་བློ་གཏོང་བཞིན་ཡོད། གྲོས་བསྡུར་ཡང་བྱེད་གིན་ཡོད། ༼ཐང་གི་རྡོ་ཡང་ལེན་ཐུབ་པ། རུམ་གྱི་བྲོ་ཡང་མི་ལྷུང་བ་༽ཞིག་གི་ཐབས་ཤེས་འཚོལ་གིན་ཡོད།
དྲ་གྲོགས་ཚོས་རྗེས་མ་རྩོམ་པ་པོ་སུ་ཞིག་གིས་བརྗོད་གཞི་ག་རེ་ཁྱེར་ཡོང་ན་བརྗོད་གཞི་དེ་རང་གི་ཐོག་ལ་རང་རང་གི་རིག་པ་སྤུངས་རོགས། འདི་ནི་དྲ་ཐོག་གི་སྤྱི་དོན་ཉག་གཅིག་ཡིན།
གནས་སྐབས་འདི་ཙམ་ཡིན།
དུས་བབ་རྩོམ་སྒྲིག་པ་ལགས།
དགེ་འདུན་རབ་གསལ། ཧོར་གཙང་འཇིགས་མེད། རབ་འབྱོར། སྤོབས་པ་མཐའ་ཡས། ཁང་གསར། ཆག་བྲག་ལྷ་མོ་སྐྱབས་སོགས་ཤེས་ཡོན་ཅན་རྒན་པ་ཚོར་དུས་བབ་དྲ་ངོས་འདི་ནས་བཙན་ས་ཞིག་བཀོད་སྒྲིག་གནང་ན་འགྲིག་གི འདི་ཚོས་དྲ་ངོས་འདིའི་རྩོམ་བྲིས་པ་ཚོར་ལམ་སྟོན་གནང་ཐུབ་ཀྱི་རེད། མགོ་འདྲེན་བྱེད་ཐུབ་ཀྱི་རེད།
ཁ་སང་ངས་ཁང་གསར་རྡོ་རྗེས་སྤེལ་བའི་མཆན་ཐུང་ངུ་དེ་བཀླགས་པ་ཡིན། ད་ནི་རྒན་པ་ཚོས་དྲང་བཤད་གནང་མ་སོང་བསམ་ནས་ཡིད་མུག་པ་ཞིག་བྱུང༌། ད་ནངས་བསྐྱར་དུ་བལྟས་པར། ཁང་གསར་ལགས་ནས། རང་ཉིད་ཀྱིས་ཞིབ་ཚགས་པོས་མ་བཀླགས་པ་དང༌། ཞིབ་ནན་མ་བྱས་པ་ལས་མཆན་དེ་འདྲ་འབྲི་ཐལ་ཤོར་བ་ཞིག་བྲིས་འདུག དགའ་བསུ་ཡོད། ང་ཚོས་གཤིས་ཀ་འདི་འདྲ་སྦྱོང་དགོས་ཀྱི་འདུག
རབ་གསལ་ལགས་ཀྱིས་བོད་མིའི་བླ་ན་མེད་པའི་༸ གོང་ས་སྐྱབས་མགོནཡིད་བཞིན་ནོར་བུའི་སྐུ་ཕྱྭའི་སྐོར་གྱི་མྱོང་འཚོར་ཆེན་ཁ་གསལ་པོ་ཞིག་གནང་འདུག་པར་དགའ་པོ་བྱུང་།
༸ གོང་ས་སྐྱབས་མགོན་ཆེན་པོའི་སྐུ་ཕྱྭར་སྲུང་སྐྱོབ་དང་དོ་སྣང་ཆེན་པོ་བྱེད་དགོས་པ་དེ་ཆེས་ཤིན་ཏུ་ནས་གལ་གནད་ཆེ་བའི་གནད་དོན་གཅིག་རེད། དེ་ནི་དཔལ་ལྡན་སྐུ་སྒེར་ཡིག་ཚང་དང་། བོད་གཞུང་བདེ་སྲུང་ལས་ཁུངས། ས་གནས་ས་ཐོག་ཏུ་གཞུང་དང་། ཚོགས་པ། དད་ལྡན་མི་དམངས་བཅས་ཚང་མར་འགན་འཁྲི་ཡོད་པ་ཞིག་རེད།
གནད་དོན་དེར་རབ་གསལ་ལགས་ཀྱིས་གཙོས་ང་ཚོ་བོད་རིགས་འབྲེལ་ཡོད་ཚང་མས་འགན་འཁུར་ཡག་པོ་གནང་དགོས་པའི་རེ་བསྐུལ་ནན་མོ་ཞིག་ཞུ་དགོས་འདུག
ངས་ཀྱང་༸ རྒྱལ་བའི་སྐུ་ཕྱྭའི་སྲུང་སྐྱོབ་དེ་ཆེས་ཧ་ཅང་གི་གལ་གནད་ཆེ་བ་ཞིག་ཡིན་པར་བརྟེན་ཕྱི་ལོ་ ༢༠༠༠ ལོར༸ གོང་ས་མཆོག་གིས་གནས་མཆོག་རྡོ་རྗེ་གདན་དུ་དུས་འཁོར་དབང་ཆེན་སྩལ་རྒྱུའི་སྐབས་དེར་ངས་བོད་གཞུང་བདེ་སྲུང་ལས་ཁུངས་ཀྱི་བཀའ་བློན་མཚན་ཐོག་ཏུ་༸ སྐུ་ཕྱའི་སྲུབ་སྐྱོབ་ཐད་ཐུགས་སྣང་ཆེན་པོ་གནང་དགོས་པའི་སྙན་ཞུ་དང་སྦྲགས་རང་མིང་ཁ་བྱང་གསལ་འཁོད་བཅས་ཕུལ་བ་ཡིན་ལ་བཀའ་ལན་ཡང་ཕེབས་བྱུང་།
མ་ཟད་ལོ་སྔོན་མའི་ནང་༸ གོང་ས་མཆོག་རྒྱ་གར་བྱང་ཤར་ས་ཁུལ་ཨ་རུང་ན་ཅལ་མངའ་སྡེའི་ནང་མ་ཕེབས་པའི་སྔོན་ཚུད་ཟླ་བ་གསུམ་ཙམ་གྱིས་གོང་ནས་༸ རྒྱལ་བའི་སྐུ་ཕྱར་སྲུང་སྐྱོབ་ཆེད་རྒྱ་གར་དབུས་གཞུང་དང་བོད་གཞུང་གཉིས་ལ་ཐུགས་སྣང་གཞན་བསྐུལ་གྱིས་ཚུལ་དུ་དཔལ་ལྡན་མི་དབང་བཀའ་ཁྲི་ཟམ་གདོང་རིན་པོ་ཆེར་སྙན་ཞུ་ཞིག་ཀྱང་ཕུལ་བ་ཡིན།
དེ་ནི་ངས་རང་ཉིད་སོ་སོས་གང་ཐུབ་ཅི་ཐུབ་ཀྱིས་འགན་འཁྲི་ཞིག་བླངས་ཏེ་ལྷག་བསམ་རྣམ་དག་གིས་རང་ཉིད་བོད་རིགས་གཅིག་དང་ནང་པ་ཞིག་ཡིན་པའི་ཆ་ནས་རྒྱུན་དུ་བསམ་བློ་དེ་འདྲ་ཞིག་གཏོང་གི་ཡོད།
དེ་བཞིན་ཕྱིས་འབྱུང་ང་ཚོ་བོད་རིགས་ཚང་མས་༸ རྒྱལ་བའི་སྐུ་ཕྱྭའི་ཆེད་དུ་དོ་སྣང་གནང་དགོས་པ་དེ་གཞུང་དང་ཚོགས་པ་ཙམ་མ་ཟད་ང་ཚོ་ཚང་མར་འཁྲི་བའི་ལས་འགན་ཞིག་ཀྱང་རེད།
རྩོམ་པ་པོ་རྒན་གྲས་དགེ་འདུན་རབ་གསལ་དང་ཧོར་གཙང་འཇིགས་མེད། ཆབ་བྲག་ལྷ་མོ་སོགས་ཀྱིས་ཉེ་ལམ་རྩོམ་ཡིག་ཡག་པོ་འགའ་སྤེལ་སོང་། དེར་ཐུགས་རྗེ་ཆེ་ཞུ། ཡིན་ནའང་ད་དུང་མུ་མཐུད་དུ་དྲ་པ་བྱིངས་ལ་ལམ་སྟོན་གྱི་ཚུལ་དུ་འདི་འདྲའི་རྩོམ་ཡིག་གང་མང་མང་སྤེལ་བའི་རེ་བ་ཡོད།
དྲ་སྐྱག་འགའ་རེས་ཆེད་དུ་དམིགས་ནས་ཁ་བརྡུང་བ་དང་བསམ་ཚུལ་ལྡོག་ཕྱོགས་ནས་བཤད་པར་ཆ་འཇོག་རྒྱུ་མེད། དེ་ནི་སྤྱི་ཚོགས་ལ་འགན་མ་འཁུར་བའི་རྟགས་ཁོ་ན་རེད། དེར་ཆ་བཞག་ནས་འབྲི་མཚམས་མི་འཇོག་རྒྱུ་ང་གནམ་ལྕགས་ཀྱི་ལྷག་བསམ་རྣམ་དག་གི་རེ་སྐུལ་ཡིན།