རྒྱ་ནག་ནག་ནང་གི་ཤེས་ལྡན་པ་མང་པོས་ད་ལྟའི་བོད་ཀྱི་གནས་སྟངས་ཐོག་སེམས་ཁུར་བྱེད་ཀྱིན་ཡོད་སྟབས། བོད་རྒྱའི་དཀའ་རྙོག་སེལ་ཐུབ་པར་ངོས་རང་གིས་ཀྱང་ཡིད་ཆེས་བྱེད་ཀྱིན་ཡོད་ལ། མ་འོངས་པར་བོད་རྒྱའི་དཀའ་རྙོག་མགྱོགས་མྱུར་སེལ་ཐབས་སུ་བོད་མི་ཚོས་རྒྱ་རིགས་མི་དམངས་ལ་འབྲེལ་བ་བྱ་དགོས་པ་རེད་ཅེས་༸གོང་ས་མཆོག་གིས་ཨ་རིར་གནས་སྡོད་བོད་མི་ཚོར་གསུངས་ཡོད།
ཟླ་འདིའི་ཕྱི་ཚེས་ ༡༦ ཉིན་༧གོང་ས་མཆོག་གིས་ཨེན་ཌི་ཡཱ་ནའི་མཛད་འཕྲིན་ཡོངས་སུ་གྲུབ་སྟེ། ཨ་རིའི་མངའ་སྡེའི་ཝིན་སི་ཀོན་སིན་གཙུག་ལག་སློབ་གཉེར་ཁང་ནང་ཆོས་འབྲེལ་གྱི་མཛད་འཕྲིན་ཆེད་ཆིབས་སྒྱུར་གྱིས་གཙུག་ལག་སློབ་གཉེར་ཁང་དེའི་ནང་གསར་དུ་བཞེངས་པའི་སེམས་ཁམས་འཕྲོད་བསྟེན་ཉམས་ཞིབ་བསྟི་གནས་ཁང་ཞེས་པ་དབུ་འབྱེད་གནང་བ་དང་། དེར་ཡོད་དགེ་སློབ་ཡོངས་ཀྱིས་དགའ་བསུ་དང་ཕེབས་བསུ་གཟབ་རྒྱས་གནང་ཡོད་པ་རེད། གཙུག་ལག་སློབ་གྲྭ་དེ་ཉིད་ཀྱི་མཛད་འཕྲིན་ཡོངས་སུ་གྲུབ་རྗེས་༸གོང་ས་མཆོག་གིས། མངའ་སྡེ་མེ་ཌི་སོན་དང་མི་ནེ་སོ་ཌ། ཆི་ཀ་གྷོ་བཅས་ནང་གནས་སྡོད་བོད་མི་སྟོང་ཕྲག་བརྒལ་བར་བཀའ་སློབ་གནང་ཡོད་པ་རེད། ༸གོང་ས་མཆོག་གིས། གངས་ཅན་པ་ཞེས་འབོད་པའི་བོད་མི་ཚོ་ནི་ས་ཁམས་ཀྱི་ཆ་ནས་འཛམ་གླིང་གི་ཡང་སྟེང་དུ་གནས་ཡོད་ཅིང་། ཤར་ཕྱོགས་ཡུལ་གྲུ་ཁག་གི་ཆུའི་འབྱུང་ཁུངས་དང་རིག་གཞུང་ཐོག་ནང་ཆོས་ཀྱི་རྩ་བ་ལྟ་བུ་ཆགས་ཡོད་སྟབས། རྒྱ་རིགས་མཁས་དབང་ཁག་ཅིག་གིས་ཀྱང་བོད་མིའི་ཆོས་དང་རིག་གཞུང་གི་སྙིང་བོ་དེས་མ་འོངས་པར་རྒྱ་ནག་གི་སྤྱི་ཚོགས་ཡར་རྒྱས་ལ་ཕན་ཐོགས་ཆེན་པོ་ཡོད་སྐོར་བརྗོད་ཡོད་ལ། དེ་བཞིན་དུ། འཛམ་གླིང་ནང་དེང་སྐབས་སེམས་ཀྱི་ཞི་བདེ་དང་བདེ་སྐྱིད་འབྱུང་རྒྱུར་གལ་ཆེན་དང་ངོས་འཛིན་གསར་བ་ཞིག་སླེབས་ཏེ་དོ་སྣང་བྱེད་མཁན་ཇེ་མང་དུ་འགྲོ་གིན་ཡོད་པ་དང་བསྟུན། བོད་ཀྱི་ཆོས་དང་སྐད་ཡིག་གིས་དེ་རིགས་གསལ་སྟོན་བྱེད་ཐུབ་ཀྱི་ཡོད་པ་ནི་བོད་མི་རིགས་ཀྱི་གཟི་བརྗིད་ཅིག་རེད་ཅེས་གསུངས་ཡོད། ཡང་༧གོང་ས་མཆོག་གིས། བོད་རིགས་གཞོན་སྐྱེས་ཚོས་བོད་ཡིག་དང་ནང་ཆོས་ལ་ཧུར་བརྩོན་བྱ་རྒྱུ་དེ་ཧ་ཅང་གལ་ཆེན་ཡིན་པ་དང་། ལྷག་པར་གཞོན་སྐྱེས་ཚོས་ནང་ཆོས་སློབ་གཉེར་དང་ཆོས་ཀྱི་སྙིང་བོ་ཕན་ཆུན་བགྲོ་གླེང་སོགས་ཀྱི་ཐོག་ནས་སྦྱང་བརྩོན་བྱ་དགོས་པའི་བཀའ་སློབ་གནང་བར་མ་ཟད། རྒྱ་ནག་ནག་ནང་གི་ཤེས་ལྡན་པ་མང་པོས་ད་ལྟའི་བོད་ཀྱི་གནས་སྟངས་ཐོག་སེམས་ཁུར་བྱེད་ཀྱིན་ཡོད་པ་དང་། ༢༠༠༨ ལོ་ནས་བཟུང་རྒྱ་ཡིག་གི་ལམ་ནས་བོད་དོན་དང་འབྲེལ་བའི་རྩོམ་ཡིག་ ༩༠༠ ལྷག་སྤེལ་ཡོད་པས། བོད་རྒྱའི་དཀའ་རྙོག་ངེས་པར་སེལ་ཐུབ་པར་༸གོང་ས་མཆོག་སྐུ་ཉིད་ནས་ཀྱང་ཡིད་ཆེས་གནང་གི་ཡོད་པ་དང་། མ་འོངས་པར་བོད་རྒྱ་གཉིས་ཀྱི་དཀའ་རྙོག་མགྱོགས་མྱུར་སེལ་ཐབས་སུ་རྒྱ་རིགས་མི་དམངས་དང་འབྲེལ་བ་བྱ་དགོས་པ་རེད་ཅེས་བཀའ་སློབ་གནང་ཡོད་འདུག
ཕྱི་ཚེས་ ༡༧ ཉིན་༸གོང་ས་མཆོག་ཝི་སི་ཀོན་སིན་མངའ་སྡེའི་རྒྱལ་ས་མེ་ཌི་སོན་གྱི་ནང་ཨ་རིའི་གྲགས་ཅན་སེམས་ཁམས་རིག་པའི་ཚན་རིག་པ་རི་ཆར་ཌི་ཌེ་ལྦི་ཌི་སོན་དང་ལྷན་དུ་སེམས་བདེ་ཐང་ལ་དཔྱད་པ་ཞེས་པའི་བགྲོ་གླེང་ཐོག་མཉམ་ཞུགས་གནང་སྟེ། ནང་ཆོས་ཀྱིས་འགྲོ་བ་མིའི་ནང་བསམ་བློར་ཞི་བདེ་བསྐྲུན་ཐུབ་པ་དང་། དེས་རང་བཞིན་གྱིས་ཕྱིའི་ཀུན་སྤྱོད་དང་རང་ཉིད་ཀྱི་གཟུགས་གཞིའི་འཕྲོད་བསྟེན་ལའང་ཕན་ཐོགས་ངེས་ཅན་ཞིག་ཡོང་བ་དང་། བསམ་བློའི་འཁྱེར་སོ་རང་འདོད་ཅན་དེ་འདྲའི་རིགས་ཡོད་པ་ཡིན་ན། བསམ་བློའི་འཁྱེར་སོ་ཡག་པོ་མིན་པའི་བཀའ་སློབ་གནང་འདུག་ལ། ཐེངས་འདིའི་ཚན་རིག་པའི་བགྲོ་གླེང་འདི་བརྒྱུད་དེ་ཝིན་སི་ཀོན་སིན་མངའ་སྡེའི་སྤྱི་ཁྱབ་པ་སྐུ་ཞབས་ཇོམ་ཌོ་ཡེལ་མཆོག་ནས་༸གོང་ས་མཆོག་ནི་ཝིན་སི་ཀོན་སིན་མངའ་སྡེའི་གྲོགས་པོ་བཟང་པོ་ཞིག་ཡིན་པ་ངོ་སྤྲོད་གནང་ཡོད་པར་མ་ཟད། ཐེངས་འདིའི་བགྲོ་གླེང་གི་ལས་འཆར་དེ་ཉིད་མངའ་སྡེའི་འབྱུང་འགྱུར་དང་འཛམ་གླིང་སྤྱི་ལ་ཕན་ནུས་སྤྲོད་ཐུབ་པའི་ཞབས་འདེགས་ཀྱི་དཔེ་མཚོན་གསལ་པོ་ཞིག་ཡིན་ཚུལ་གསུངས་ཏེ། ༸གོང་ས་མཆོག་གི་ཐེངས་འདིའི་མཛད་འཕྲིན་ལ་བསྔགས་བརྗོད་གནང་ཡོད་འདུག་ལ། བྱང་ལོ་ཝ་ཆེས་མཐོའི་གཙུག་ལག་སློབ་གཉེར་ཁང་གིས་ཇི་ལྟར་གསོལ་འདེབས་ཞུས་པ་ལྟར། ཡུལ་དེར་ཆིབས་བསྒྱུར་དང་འབྲེལ་ལོ་ཝར་གནས་སྡོད་རྒྱ་རིགས་ཚོགས་པའི་སྐུ་ཚབ་དང་སློབ་མ་བཅས་མི་སྣ་ཁག་ཅིག་ལ་མཇལ་འཕྲད་ཀྱིས་བོད་རྒྱའི་འབྲེལ་ལམ་སྐོར་གྱི་གནད་དོན་ཐད་བཀའ་སློབ་གནང་ཡོད་པ་དང་། དེ་བཞིན་གནད་ཡོད་མི་སྣར་མཇལ་འཕྲད་གནང་ཡོད་པར་མ་ཟད། ལོ་ཝ་གཙུག་ལག་སློབ་ཆེན་དུ་འཚེ་མེད་ཞི་བའི་འབྱུང་ཐབས་དང་ཤེས་ཡོན་སློབ་སློབ་གསོ་ཞེས་པའི་བརྗོད་གཞིའི་ཐོག་བགྲོ་གླེང་ལྷན་ཚོགས་ཤིག་གནང་ཡོད་པ་དང་། ཉིན་རྒྱབ་དུ་མང་ཚོགས་ ༦༠༠༠ ལྷག་ལ་ཤེས་ཡོན་གྱི་ནུས་པ་ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་པ་རེད། ཕྱི་ཚེས་ ༢༠ ནས་བཟུང་༸གོང་ས་མཆོག་གིས་ཉིན་གྲངས་བཞིའི་རིང་ནེའུ་ཡོག་གྲོང་ཁྱེེར་དུ་མཛད་འཕྲིན་བསྐྱངས་འཆར་ཡོད་པ་རེད།
བོད་རྒྱ་མི་རིགས་གཉིས་ཀྱི་འབྲེལ་ལམ་བཟང་འགྱུར་ཅིག
རྒྱ་ནག་ནག ཅེས་པའི་དོན་གང་ཡིན་ནམ
ཕལ་ཆེར་རྒྱ་ནག་ཡིན་རྒྱུ་རེད།
བོད་རེ་བས་ཕོངས།་རྒྱ་དྭོགས་པས་ཕོངས།
གནའ་མི་རྒན་པོའི་ཁ་རྒྱུན་འདི་དངོས་གནས་འཚམས་པོ་འདུག
དང་པོ་རང་བཙན་ལ་རེ་བ་རྒྱབ་ནས་ད་བར་གཅིག་ཕམ་གཉིས་ཕམ་བྱུང་སོང།
ད་ནི་ལམ་ཀ་གཅིག་ཡོད་པ་ནི་རྒྱ་ནག་མི་དམངས་ལ་རེ་བ་བྱེད་པ་དེ་རང་རེད།འོན་ཀྱང་ཕམ་ཐག་ག་དུས་ཆོད་དམ་སྙམ་བཞིན་ཞེད་སྣང་གིས་ཁེངས་ནས་ཡོད།
ང་ཚོ་ལ་རེ་བ་བྱེད་རྒྱུའི་ལམ་ག་འདི་གཅིག་བུ་ལས་མེད་པ་ཡིན་ན་བོད་འདི་སྣུམ་ཟད་ཀྱི་མར་མེ་ལྟར་གྱུར་ཚར་མ་རེད་དམ།