རྒྱ་ནག་སྒེའུ་ཁུང་།

རྒྱ་ནག་གི་འཕྲོད་བསྟེན་ལྷན་ཁང་གི་ཞིབ་འཇུག་སྙན་ཐོའི་ནང་གསལ་དོན། རྒྱ་ནག་ཏུ་ཁང་ཁྱིམ་ནང་རོལ་གྱི་བཙོག་རླུང་གནོད་འཚེ་ཡི་རྐྱེན་གྱིས་ལོ་ལྟར་མི་ཁྲི་ ༢༢༠ ལྷག་གི་ཚེ་སྲོག་དུས་མིན་འཆི་བས་འཕྲོག་བཞིན་ཡོད་པ་དང་། དེའི་ཁྲོད་མི་ཁྲི་ ༡༠༠ ལྷག་ནི་ལོ་ ༥ ལ་སོན་མེད་པའི་བྱིས་པ་ཡིན་འདུག 
དེང་སྐབས་རྒྱ་ནག་གི་བཟོ་གྲྭ་ཁག་གིས་དུག་རླངས་ཕྱིར་གཏོང་གི་ཚབས་ཧ་ཅང་ལྕི་བས་རང་བྱུང་མཁའ་དབུགས་བཙོག་བསྒྱུར་གྱི་གནོད་ཚབ་ཚད་མཐོན་པོར་སླེབས་ཡོད་མོད། ད་ལྟ་རྒྱ་ནག་ཏུ་ཁྱིམ་ཚང་གི་རྒྱུན་སྤྱོད་ཅ་དངོས་དང་ཁང་ཁྱིམ་མཛེས་བཟོའི་རྒྱུ་ཆའི་ཁྲོད་དུ་དུག་ལྡན་གྱི་སྐྱེ་ལྡན་འདྲེས་སྦྱོར་རྫས་འགྱུར་དངོས་པོ་ཅཱ་ཆོན་ (R-CHO) དང་། པཱིན་ (C6H6) ཨན་ (NH3) ཏུན་ (Rn) སོགས་ཀྱི་རྫས་སླད་མང་པོ་འདྲེས་ཡོད་པ་དང་། རྫས་འགྱུར་དངོས་རྫས་དེ་དག་གིས་དུས་རྒྱུན་མིའི་ལུས་ཕུང་ལ་གནོད་པའི་བཙོག་རླུང་ཕྱིར་གཏོང་བྱེད་ཀྱིན་ཡོད་པར་བརྟེན། ཁང་ཁྱིམ་ནང་རོལ་གྱི་དུག་རླངས་བཙོག་རླུང་གི་ཚད་ནི་ཕྱི་རོལ་ཁོར་ཡུག་གི་བཙོག་རླུང་ལས་ཀྱང་ལྡབ་ ༥ ནས་ ༡༠ བར་བརྒལ་ཡོད་པ་རེད། མི་རྣམས་ཀྱིས་ཁང་ཁྱིམ་ནང་རོལ་གྱི་དུག་རླངས་བཙོག་རླུང་འབྱིན་རྔུབས་བྱས་པ་བརྒྱུད་གློ་སྦུགས་ལ་རྨ་རྒྱག་པ་དང་། འབྲས་སྐྲན། དབང་བོ་མ་དྭངས་བ་བཅས་ཀྱི་ན་ཚའི་རིགས་བྱུང་སྟེ་མི་མང་པོ་རྐྱེན་འདས་སུ་འགྲོ་བཞིན་ཡོད་ལ། དུག་རླངས་བཙོག་རླུང་དེ་ནི་ལོ་ཆུང་བྱིས་པ་དང་། མངལ་དུ་སྦྲུམ་པའི་ཕྲུ་གུ། ལོ་ལོན་རྒན་རྒོན་བཅས་ཀྱི་ཚེ་སྲོག་ལ་དེ་བས་ཀྱང་གནོད་ཚབས་ཆེ་བ་ཡོད་འདུག
ཁང་ཁྱིམ་མཛེས་བཟོའི་ཆེད་ལས་པ་རབ་འབྱམས་པ་ཀྲུའུ་ཞའོ་ལགས་ཀྱིས། ད་ལྟའི་རྒྱ་ནག་གི་ཁང་ཁྱིམ་ནང་རོལ་གྱི་དུག་རླངས་བཙོག་རླུང་གི་ཚད་ནི་གསར་ལམ་ཁག་ཏུ་ཐོན་པ་ལས་ཀྱང་ཚབས་ཆེ་བ་ཡོད་པ་དང་།  མ་གཞི་མིའི་ཚེ་སྲོག་ལ་གནོད་པ་མི་འབྱུང་བའི་བདེ་ཐང་ཚད་ལྡན་གྱི་ཁང་ཁྱིམ་ཞིག་འཛུགས་སྐྲུན་དགོས་རྒྱུ་ནི་འགྲོ་བ་མིའི་གཞི་རྩའི་ཐོབ་ཐང་ཞིག་ཡིན་ཚུལ་བརྗོད་ཡོད་ལ། ཧྥ་རན་སིའི་གསར་སྤེལ་ཁང་གིས་ཀྱང་དེའི་སྐོར་གྱི་གནས་ཚུལ་སྤེལ་བའི་ནང་། འདས་པའི་ལོ་ ༣༠ རིང་རྒྱ་ནག་གི་དཔལ་འབྱོར་འཕེལ་ཚད་ཇེ་མགྱོགས་སུ་སོང་བ་དང་བསྟུན་ནས་ཁོར་ཡུག་ལ་གནོད་སྐྱོན་ཤུགས་ཆེན་བྱུང་ཡོད། འཛམ་གླིང་གི་ཁོར་ཡུག་བཙོག་བསྒྱུར་གྱི་གནོད་ཚབས་ཆེས་ཆེ་བའི་གྲོང་ཁྱེར་ ༢༠ ཡི་མིང་ཐོའི་ནང་།  གྲོང་ཁྱེར་ ༡༦ ནི་རྒྱ་ནག་གི་གྲོང་ཁྱེར་ཡིན་འདུག

ཧོང་ཀོང་ནས་ཁེ་ན་ཌ་ཝན་ཁའོ་ཝེར་ (Vancouver) གནམ་ཐང་དུ་འཕུར་བསྐྱོད་བྱེད་བཞིན་པའི་ཁ་ཐེ་ (Cathay) འགྲིམ་འགྲུལ་གནམ་གྲུ་ཞིག་གི་ནང་འགད་རྫས་བཞག་ཡོད་པའི་རྫུན་སྒྲོག་འཇིགས་སྐུལ་ལ་བརྟེན་ནས། ཁེ་ན་ཌའི་དམག་དཔུང་གིས་རོགས་འདེགས་སྲུང་སྐྱོབ་ཀྱི་གྱེན་འཕུར་གནམ་གྲུ་གཉིས་ཆེད་གཏོང་དང་། གནམ་ཐང་ཧྲིལ་བོར་མེ་གསོད་ཉེན་སྐྱོབ་ཀྱི་ལས་གཞི་ཚགས་སྒྲིག་བྱས་ཏེ་འགྲིམ་འགྲུལ་གནམ་གྲུ་དེ་ཝན་ཁའོ་ཝེར་གནམ་ཐང་དུ་བབ་ཡོད་པ་དང་། གནམ་གྲུའི་ནང་གི་མགྲོན་པོ་དང་དངོས་ཟོག་ཚང་མར་ཞིབ་བཤེར་བྱས་རྗེས་འགད་རྫས་རིགས་ཅི་ཡང་རྙེད་སོན་བྱུང་མེད་པ་རེད། ཁེ་ན་ཌའི་རྒྱལ་སྲུང་ལྷན་ཁང་གིས་གསར་ལམ་ཁག་ཏུ་གནས་ཚུལ་སྤེལ་དོན། མི་ཞིག་གིས་ཁ་པར་བཏང་སྟེ་རྒྱ་ནག་ཧོང་ཀོང་ནས་ཁེ་ན་ཌར་འཕུར་བསྐྱོད་བྱེད་བཞིན་པའི་ཨང་རྟགས་ cx838 ཅན་གྱི་འགྲིམ་འགྲུལ་གནམ་གྲུའི་ནང་འགད་རྫས་བཞག་ཡོད་ལུགས་བརྗོད་པར་བརྟེན། ཁེ་ན་ཌའི་གཞུང་གིས་ F-18 རྟགས་ཅན་གྱི་གྱེན་འཕུར་གནམ་གྲུ་གཉིས་ཆེད་གཏོང་གིས་བར་སྣང་ནས་འགྲིམ་འགྲུལ་གནམ་གྲུ་དེར་སྲུང་སྐྱོབ་བྱས་ཏེ། ཕྱི་ཚེས་ ༡༥ ཉིན་གྱི་ཕྱི་དྲོའི་ཆུ་ཚོད་ ༡ དང་སྐར་མ་ ༤༠ སྟེང་གནམ་ཐང་གི་བདེ་འཇགས་སྲུང་སྐྱོབ་ས་ཚིགས་སུ་བབས་ཡོད་པ་དང་། མགྲོན་པོ་ཚང་མར་ཞིབ་བཤེར་ནན་མོ་བྱས་རྗེས་ད་གཟོད་གནམ་གྲུ་ལས་འབབ་ཏུ་བཅུག་ཡོད་ནའང་། འགད་རྫས་རིགས་ཅི་ཡང་ལག་སོན་མ་བྱུང་ཚུལ་འགྲེལ་བརྗོད་བྱས་ཡོད། གནམ་གྲུ་དེའི་ནང་གི་མགྲོན་པོ་ཞིག་གིས་ཀྱང་། དངོས་ཟོག་ཡོད་ཚད་གནས་སྐབས་རིང་རྩིས་ལེན་བྱས་ཏེ་ཞིབ་བཤེར་བྱ་རྒྱུ་ཡིན་ལུགས་གསལ་བསྒྲགས་བྱས་པ་ཙམ་ལས། དོན་དག་ཅི་ཞིག་བྱུང་མིན་གསལ་བོར་བརྗོད་མ་སོང་ཟེར།

དབྱིན་ཇིའི་མཐོ་རིམ་སློབ་གསོའི་ཚགས་པར་ (British Times Higher Education) དང་དབྱིན་ཇིའི་སྙན་གྲགས་ཅན་གྱི་མཐོ་རིམ་སློབ་གསོའི་ཞིབ་འཇུག་རྩ་འཛུགས་ QS གཉིས་ཀྱིས་ཉམས་ཞིབ་འདེམས་ཐོན་བྱས་པའི་༢༠༡༠ ལོའི་ཨེ་ཤ་ཡའི་སློབ་ཆེན་ཁག་གི་ཨང་རིམ་དེ་ཕྱི་ཟླ་ ༥ པའི་ཚེས་ ༡༢ ཉིན་ཕྱིར་བསྒྲགས་བྱས་ཡོད་པ་དང་། རྒྱ་ནག་ཏུ་མིང་གྲགས་ཆེ་བའི་པེ་ཅིན་སློབ་ཆེན་དང་ཆིན་ཧཱ་སློབ་ཆེན་གཉིས་ཨེ་ཤ་ཡའི་སློབ་ཆེན་ཨང་རིམ་རྩེ་གྲས་བཅུའི་ཁྲོད་སླེབས་ཐུབ་མེད་པ་རེད། ཨེ་ཤ་ཡའི་གླིང་གི་སློབ་ཆེན་རྩེ་གྲས་ ༢༠༠ བདམས་ཐོན་བྱུང་བའི་ནང་ཉི་ཧོང་གི་སློབ་ཆེན་ ༥༧ ཚུད་ཡོད་པས་ཨེ་ཤ་ཡའི་སློབ་ཆེན་རྩེ་གྲས་ཀྱི་རྒྱལ་ཁབ་དེ་ཆགས་ཡོད། པེ་ཅིན་བཟོ་སྐྲུན་སློབ་ཆེན་གྱི་དགེ་རྒན་ཆེན་མོ་ཧའོ་ཞིན་ཏཱིག་གིས་བརྗོད་དོན། པེ་ཅིན་སློབ་ཆེན་དང་ཆིན་ཧཱ་སློབ་ཆེན་གཉིས་ཨེ་ཤ་ཡའི་སློབ་ཆེན་རྩེ་གྲས་བཅུའི་ཁྲོད་སླེབ་མ་ཐུབ་པ་ནི་བློ་ཡིད་ལས་འགོངས་དགོས་པའི་དོན་ཞིག་མ་རེད། ངས་བསམ་ན་སློབ་ཆེན་ཞིག་གི་ལེགས་ཉེས་ཨང་རིམ་དེ་གཙོ་བོ། གཅིག སློབ་ཆེན་དེ་ཉིད་འཛམ་གླིང་ཁྱབ་ཁོངས་སུ་གོམ་པ་སྤོས་པའི་ཁྱབ་རྒྱ་དང་།  གཉིས། སློབ་ཆེན་དེ་ཉིད་ལ་འཛམ་གླིང་སྤྱི་མོས་ཀྱི་ངོས་ལེན་གྱི་ཚད་རིམ།  གསུམ། རིག་གཞུང་རང་དབང་ཀྱི་མཐོ་ཚད།  བཞི། དགེ་རྒན་ཆེན་མོ་བའི་གཙོ་སྐྱོང་གི་ཆུ་ཚད་བཅས་ཀྱིས་ཐག་གཅོད་དགོས་པར་འདོད། དེར་བརྟེན་རྒྱ་ནག་གི་སློབ་ཆེན་དག་གི་ཞན་ཆ་ཆེ་ཤོས་ནི་རིག་གཞུང་རང་དབང་གི་རྒྱ་ཧ་ཅང་དོག་པ་དེ་རེད། གལ་སྲིད་རིག་གཞུང་ཐད་ཀྱི་རང་དབང་མེད་སོང་ན། འཛམ་གླིང་གི་ཁྱབ་ཁོངས་སུ་གོམ་པ་འཇོག་ཐུབ་རྒྱུ་ཕར་ཞོག   ཐ་ན་སྤྱིར་བཏང་གི་སློབ་ཆེན་ཞིག་གི་ཚད་གཞིའང་ལོན་རྒྱུ་ཧ་ཅང་ཁག་པོ་རེད་ཅེས་བརྗོད་ཡོད། དེ་སྔོན་པེ་ཅིན་སློབ་གྲྭ་ཆེན་མོ་ནས་སློབ་མཐར་ཕྱིན་ཞིང་། ད་ལྟ་ཨ་རིའི་ནེའུ་ཡོག་ཏུ་༼པེ་ཅིན་གྱི་དཔྱིད་ཀ༽ཞེས་པའི་རྒྱ་ཡིག་དུས་དེབ་ཀྱི་རྩོམ་སྒྲིག་པ་གནང་བཞིན་པའི་ཧའོ་ཕེན་གྱིས་ཀྱང་། ད་ལྟའི་པེ་ཅིན་སློབ་ཆེན་གྱི་རིག་གཞུང་སློབ་གསོའི་རང་དབང་གི་མཁའ་དབུགས་ནི་ལོ་རབས་ ༨༠ པ་ལས་ཀྱང་སྐྱོ་བོ་འདུག  དེ་ནི་གཙོ་བོ་དམར་ཤོག་གཅིག་སྡུད་པའི་སྲིད་དབང་ལམ་ལུགས་ཀྱི་རྐྱེན་པས་སློབ་གྲྭའི་རིག་གཞུང་གི་ཁྱབ་ཁོངས་མཐའ་དག་ལ་ཚད་བཀག་ཆེན་པོ་ཐེབས་པའི་རྐྱེན་གྱིས་རེད་ཅེས་བརྗོད་ཡོད། 

གསར་འགྱུར་འབྲི་མཁན། ཚེ་རིང་རྒྱལ།