རྒྱ་གཞུང་གིས་རྨ་ཆུ་རྫོང་བོད་ཡིག་སློབ་འབྲིང་དང་བོད་རིགས་སློབ་ཆུང་གཉིས་སུ་༸པཎ་ཆེན་སྐུ་ཕྲེང་བཅུ་བའི་སྐུ་པར་བཤམས་མི་ཆོག་པ་དང་མ་ཎི་བགྲང་མི་ཆོག་པའི་བཀའ་རྒྱ་བཏང་ཡོད་འདུག
རྨ་ཆུའི་སྒྲོལ་དཀར་སྐྱབས་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༣ པའི་ནང་རྨ་ཆུ་རྫོང་བོད་ཡིག་སློབ་འབྲིང་དང་རྨ་ཆུ་རྫོང་སློབ་ཆུང་གི་སློབ་མ་ཚོས་རྒྱ་ནག་གཞུང་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་བར་བརྟེན། ཉེ་བའི་དུས་ནས་བཟུང་རྒྱ་གཞུང་གིས་རྨ་ཆུ་རྫོང་བོད་ཡིག་སློབ་འབྲིང་དུ་༸པཎ་ཆེན་སྐུ་ཕྲེང་བཅུ་བ་མཆོག་གཙོས། མཁས་དབང་དགེ་འདུན་ཆོས་འཕེལ་དང་དཔལ་དོན་འགྲུབ་རྒྱལ་བཅས་རླབས་ཆེན་གྱི་མི་སྣ་དག་གི་འདྲ་པར་བཤམས་པར་བཀག་འགོག་བྱས་ཡོད་པར་མ་ཟད། སློབ་གྲྭའི་ནང་མ་ཎི་འདོན་པ་དང་ཕྱག་ཕྲེང་སོགས་ཆོས་ཕྱོགས་ཀྱི་ཅ་དངོས་ཅི་ཡང་ཉར་མི་ཆོག་པའི་བཀའ་རྒྱ་བཏང་ཡོད་འདུག་ལ། དགེ་རྒན་གྱི་སློབ་གསོའི་ལས་དོན་འཐུས་ཤོར་གྱི་དབང་གིས་ཐེངས་འདིའི་ངོ་རྒོལ་གྱི་ལས་འགུལ་བྱུང་ཚུལ་བརྗོད་དེ། སློབ་གྲྭའི་དགེ་རྒན་བློ་བཟང་དར་རྒྱས་དང་པདྨ་རྡོ་རྗེ་རྣམ་གཉིས་ཀྱི་ལོ་ལྔའི་གླ་ཕོགས་གཞུང་བཞེས་དང་། གཞན་དགེ་རྒན་ཁག་ཅིག་གིས་ལོ་ ༣ གྱི་གླ་ཕོགས་གཞུང་བཞེས་བཏང་ཡོད་པ་མ་ཟད། དགེ་རྒན་ཁག་ཅིག་ལ་ཟླ་རེའི་གླ་ཕོགས་རྒྱ་སྒོར་བདུན་བརྒྱ་སྤྲོད་ཀྱིན་ཡོད་འདུག་ལ། བསྡོམས་པའི་དགེ་རྒན་ ༢༡ ལ་ཐེངས་འདིའི་ལས་འགུལ་དང་འབྲེལ་བའི་ཉེས་ཆད་བཅད་ཡོད་འདུག་ལ། གཞན། ཉེ་ཆར་ལས་སྣེ་ནས་ཕྱིར་ཕུད་བཏང་ཟིན་པའི་བོད་ཡིག་སློབ་འབྲིང་གི་སློབ་གཙོ་གཞོན་པ་ཆོས་སྐྱོང་ཚེ་བརྟན་ལགས་ད་ལྟའི་ཆར་ཡང་བཀག་ཉར་འོག་གནས་ཡོད་པ་དང་། སློབ་གཙོ་སྐྱབས་ཆེན་བདེ་གྲོལ་དང་སློབ་གཙོ་གཞོན་པ་རྡོ་རེད་གཉིས་རྨ་ཆུ་རྫོང་སློབ་གསོ་སྡེ་ཁག་ནས་རྨ་ཆུ་རྫོང་ཆུ་གློག་ས་ཚིགས་ཞིག་ཏུ་ལས་བཟོ་བ་དཀྱུས་མའི་ལས་སྣེ་སྤྲད་ཡོད་འདུག་ལ། ཉེ་ཆར་ལས་སྣེ་ལས་ཕྱིར་ཕུད་བཏང་བའི་རྨ་ཆུ་རྫོང་སྤྱི་བདེ་ལས་ཁུངས་ཀྱི་མགོ་གཙོ་ལགས་གནས་གཞན་དུ་གནས་སྤོར་བཏང་ཡོད་པའི་གནས་ཚུལ་འགྲེལ་བརྗོད་གནང་བྱུང་བར་མ་ཟད། སློབ་མའི་ངོ་རྒོལ་སྐབས་གཙོ་བོའི་སྣེ་ཁྲིད་མཁན་དངུལ་རྭ་རུ་གསར་སྡེ་བའི་དབང་ཕྱུག་ཚང་གི་ཚེ་རིང་དོན་འགྲུབ་༼དམའ་འབྲིང་གསུམ་པའི་སློབ་མ༽དང༌། མུ་ར་སྔགས་སྐོར་སྡེ་བའི་རྟམ་བྷོ་ཚང་གི་ཐུབ་བསྟན་ཉི་མ་༼དམའ་འབྲིང་གཉིས་པའི་སློབ་མ༽གཉིས་སློབ་གྲྭ་ནས་ཕྱིར་འབུད་མ་བཏང་སྔོན་ནས་བཀག་འགོག་བྱས་ཏེ། ཟ་མ་དང་ཆུ་སོགས་འཐུང་མ་བཅུག་པར་མནར་གཅོད་དང་གློག་རྒྱུགས་བཙུགས་ཏེ་གཅར་རྡུང་བྱས་ཡོད་འདུག
ད་ལྟའི་ཆར་རྒྱ་གཞུང་གིས་ཞི་བའི་ངོ་རྒོལ་གྱི་སྣེ་འཁྲིད་མཁན་མང་ཆེ་བ་བོད་སྐད་ཡིག་འཇིག་ཉེན་སླར་གསོ་ཚོགས་པའི་ཚོགས་མི་ཡིན་པ་དང་། ཕ་སྐད་ཚོགས་པ་འདི་ཉིད་ལ་ཆབ་སྲིད་ཀྱི་རྒྱབ་ལྗོངས་ངེས་ཅན་ཞིག་ཡོད་པར་འགྲེལ་བརྗོད་ཀྱིས་ཚོགས་གཙོ་ཚེ་རིང་དོན་འགྲུབ་དང་ཚོགས་གཞོན་ཐུབ་བསྟན་ཉི་མ་གཉིས་ལ་འབྲེལ་མེད་ཀྱི་ནག་ཉེས་དེ་བཙན་འགེལ་བྱེད་ཀྱིན་ཡོད་འདུག་ལ། སློབ་གྲྭའི་ནང་གོང་རིམ་ནས་བཀོད་མངགས་ལྟར་ཆབ་སྲིད་དང་ཁྲིམས་ལུགས་ཀྱི་སློབ་གསོ་ཚན་ཆུང་ཟེར་བ་ཞིག་བཙུགས་ཏེ། ཆབ་སྲིད་དང་ཁྲིམས་ལུགས་ཀྱི་སློབ་གསོ་གཏོང་མུས་སུ་ཡོད་འདུག
གསར་འགོད་པ། དོན་གོ།
མ་ཎི་ཡང་འདོན་མི་ཆོག་པ་ལ་དངོས་གནས་དགོད་སྤྱད་ཀྱི་ལས་འགུལ་ཞིག་རེད་ཨང་། སློབ་ཕྲུག་ཚོས་སེམས་ནས་མ་ཎི་བཏོན་ན་ཁོང་ཚོས་ག་འདྲ་བྱས་ནས་འགོག་ཐུབ་ཀྱི་རེད། དངོས་གནས་གླེན་པ་གླེན་ནག་རེད། རྒྱ་རྒན་དེ་ཚོ། ཉེས་མེད་ཀྱི་སློབ་ཕྲུག་དེ་གཉིས་དངོས་གནས་སྙིང་རྗེ་ཨང་།
དམངས་ཁྲོད་ནས་ཡུལ་ཤུལ་དུ་རོགས་སྐྱོར་གུར་མང་པོ་ཞིག་སྤྲད་པ་དང་། གུར་གྱི་གྲངས་ཚད་ཀྱང་མི་ཚང་རེར་གུར་རེ་འདང་ལྷག་ཡོད་མོད་ད་ལྟ་སྐྱེ་རྒུ་མདོར་གུར་མེད་པའི་མི་གང་སར་མཐོང་རྒྱུ་ཡོད་སྐད། ཡུལ་ཤུལ་དུ་ཕྱིན་པ་འགས་འབོད་སྐུལ་འདི་འདྲ་བྱེད་པ་སྟེ། ཆུ་ཕོར་པ་གང་ལས་རོགས་པ་མེད་ཀྱང་དེ་ཉིད་ཡུལ་ཤུལ་གྱི་ས་ཐོག་ཏུ་འབོ་བ་ལས་སྲིད་གཞུང་གི་ལག་ཏུ་མ་སྤྲོད་ཟེར་གྱི་འདུག དེས་ན་སྐུ་ཚབ་རྣམ་པ་ཕེབས་ཐུབ་ན་རོགས་དངུལ་དེ་དག་ས་གནས་ས་ཐོག་གི་མི་ལ་འཕྲོད་པར་བྱེད་གལ་ཆེ། ཡུལ་ཤུལ་དུ་གདུང་སེལ་ཚོགས་ཆུང་ཕེབས་ཐུབ་པ་དང་གང་ཅིར་ལམ་ལྷོང་ཡོང་བའི་སྨོན་འདུན་ཞུ།
མ་ཎི་འདོན་ན་རྒྱ་ལ་གནོད་བགྱིད་ཡོད་ན། གཤམ་འདི་འདོན་བཅུག་རོགས། འདི་ནི་རྒྱ་ནག་གི་ཆོས་ཀྱང་རེད།
གང་གིས་ཐུགས་བརྩེ་ཉེར་ བཟུང་ནས། །
ལྟ་བ་ཐམས་ཅད་སྤངས་པའི་ ཕྱིར། །
དམ་པའི་ཆོས་ནི་སྟོན་མཛད་ པ། །
གོའུ་ཏམ་དེ་ལ་ཕྱག་འཚལ་ལོ། །
ཨོཾ་མུནི་མུནི་མཧྰ་མུནཡེ་སྭྰཧྰ། །
དགེ་བ་འདི་ཡིས་མྱུར་དུ་བདག །
ཤྰཀྱའི་རྒྱལ་པོ་འགྲུབ་གྱུར་ནས། །
འགྲོ་བ་གཅིག་ཀྱང་མ་ལུས་པ། །
དེ་ཡི་ས་ལ་འགོད་པར་ཤོག །
ད་དངོས་གནས་བོད་པ་ལ་ཐབས་ག་རེ་ཡོད་དམ།
ཏང་དང་རྒྱལ་ཁབ་ཀྱིས་ཆོས་དད་རང་དབང་ཡོད་ཅེས་ས་གྲགས་གནམ་གྲགས་བྱས་ན་ཡང་།
བོད་མི་ཚོར་ལག་ཏུ་ཕྲེང་བ་ཙམ་ཡང་ཉར་མི་ཆོག་པའི་ཁྲིམས་ལུགས་སུ་ཞིག་གིས་བཟོས་སམ།
ཐ་ན་བཙོན་ཁང་ནང་དུའང་ཆོས་དད་རང་དབང་ཡོད་སྐོར་འུད་སྒྲོག་བྱེད་ཀྱིན་ཡོད། འོན་ཀྱང་། ཁ་བཤད་དོན་ལ་མི་གནས་པའི་རྒྱ་ནག་ཁྲིམས་འོག་ནས་བོད་མི་ཚོར་བདེ་སྐྱིད་ཅིག་ནམ་ཞིག་འབྱུང་སྲིད་དམ། །
༄༅། ། འཁྲེལ་མེད་ལུགས་མེད་རང་རེད། པཎ་ཆེན་སྐུ་འཕྲེང་བཅུ་པ་མཆོག་དང་མཁས་དབང་དགེ་འདུན་ཆོས་འཕེལ། དོན་འགྲུབ་རྒྱལ་སོགས་ནི་རྒྱ་མིའི་འདོད་ཚུལ་ལྟར་ན། ཀྲུབ་ཧྭ་མི་མང་སྤྱི་མཐུན་རྒྱལ་ཁབ་ཀྱི་མི་སེར་འཁྲུལ་མེད་ཡིན་པས། ཁོང་དག་གི་པར་བཤམས་མི་ཆོག་ཟེར་བ་ནི། མི་གསོན་པོ་རྒྱལ་ཁབ་ཏུ་འདུག་ཆོག་ལ་པར་ཤོག་གུ་རྒྱལ་ཁབ་ཏུ་འདུག་མི་ཆོག་ཟེར་བ་མ་རེད་དམ།