སྟོན་པ་རྗེས་དྲན་གྱི་སྐྱེད་ཚལ།

རྒྱ་གར་བྷི་ཧར་མངའ་སྡེར་༧གོང་ས་མཆོག་གིས་སྟོན་པ་རྗེས་དྲན་གྱི་སྐྱེད་ཚལ་ཞིག་ལ་དབུ་འབྱེད་རབ་གནས་གནང་ཡོད་འདུག

༧གོང་ས་མཆོག་གིས་བྱང་ཨ་རིའི་མཛད་འཕྲིན་ཁག་ལེཊ་པར་གྲུབ་རྗེས་ཕྱི་ཚེས་ ༢༧ ཏེ་བོད་ལུགས་ཀྱི་ས་ག་ཟླ་བའི་ཚེས་ ༡༥ ཉིན་གནམ་གྲུ་བརྒྱུད་རྒྱ་གར་མངའ་སྡེ་བྷི་ཧར་བདེ་བར་འབྱོར་ཡོད་ལ། སྐབས་དེར་མངའ་སྡེའི་སྲིད་སྐྱོང་བ་དང་བློན་ཆེན་སོགས་འབྲེལ་ཡོད་མི་སྣས་ཕེབས་བསུ་གཟབ་རྒྱས་ཤིག་ཀྱང་ཞུས་ཡོད་འདུག མངའ་སྡེའི་གཞུང་གིས་ཇི་ལྟར་གསོལ་བ་བཏབ་པ་བཞིན་དུས་བཟང་གི་ཉིན་དེར། ༧གོང་ས་མཆོག་གིས་གྲོང་ཁྱེར་པཱ་ཊ་ནིར་ཉེ་ཆར་གསར་དུ་བསྐྲུན་པའི་སྟོན་པ་རྗེས་དྲན་གྱི་སྐྱེད་མོས་ཚལ་དེར་དབུ་འབྱེད་རབ་གནས་གནང་ཡོད་པ་རེད། གྲོང་ཁྱེར་དེར་བཞེངས་བསྐྲུན་བྱས་པའི་སྐྱེད་མོས་ཚལ་དེའི་ནང་ཉི་ཧོང་དང་ཐེ་ལན་ཌི། ཤི་རི་ལན་ཁ། འབར་མ་བཅས་ནས་གདན་དྲངས་པའི་སྟོན་པ་ཤཱཀྱ་ཐུབ་པའི་རིང་བསྲེལ་བཞུགས་འབུལ་ཞུས་ཡོད་པར་མ་ཟད། སྟོན་པའི་སྐུ་བརྙན་ཆེན་པོ་ཞིག་དང་མི་ ༡༠༠༠ ཙམ་ཤོང་བའི་སྒོམ་སྒྲུབ་བྱེད་སའི་ཚོཊ་ཁང་ཆེན་པོ་ཞིག་ཀྱང་བསྐྲུན་ཡོད་འདུག དེ་ནི་ཕྱི་ཟླ་གཉིས་པའི་ནང་བྷི་ཧར་མངའ་སྡེའི་བློན་ཆེན་མཆོག་བཞུགས་སྒར་དུ་ཆེད་བཅར་གྱིས་༧གོང་ས་མཆོག་ཁུལ་དེར་གདན་འདྲེན་ཞུས་སྟབས་ཞལ་བཞེས་ཐོབ་པ་ཞིག་ཡིན་འདུག ཐེངས་འདིར་མངའ་སྡེའི་བློན་ཆེན་ཁག་མཛད་སྒོར་ཞུགས་འདུག་ལ་སྐབས་དེར་༧གོང་ས་མཆོག་གིས། མངའ་སྡེ་བློན་ཆེན་མཆོག་ནས་ངོས་རང་སྟོན་པའི་འཁྲུངས་ལོ་ ༢༥༥༤ གྱི་དུས་དྲན་མཛད་སྒོར་མགྲོན་འབོད་གནང་བར་ཐུགས་རྗེ་ཆེ། ངོས་རང་མངའ་སྡེ་འདིར་བཅར་ཐུབ་པར་ཤིན་ཏུ་དགའ་པོ་བྱུང་ཞེས་གསུངས་འདུག་ལ། ཧིན་བོད་གཉིས་ཀྱི་འབྲེལ་བའི་ཐད་ཁོང་གིས། བོད་དང་རྒྱ་གར་གྱི་འབྲེལ་བ་ནི་དགེ་རྒན་དང་དགེ་ཕྲུག་གི་འབྲེལ་བ་ཞིག་ཡིན་ལ། རྒྱ་གར་ནི་དགེ་རྒན་དང་བོད་ནི་དགེ་ཕྲུག་རེད། ང་ཚོས་དཔལ་ནཱ་ལན་ཌའི་མཁས་པའི་གསུང་རྒྱུན་དྲི་མ་མེད་པར་ད་ལྟ་ཡང་རྒྱུན་འཛིན་གང་ལེགས་ཐུབ་ཡོད་ཅེས་གསུངས་ཡོད་ལ། སྐབས་དེར་ཁོང་གིས་སྐྱེད་ཚལ་དེར་གསར་བཞེངས་གནང་བའི་མཆོད་རྟེན་དེའི་མཚན་ལ་པཱ་ཊི་ལི་པོ་ཊི་ར་ཀཱ་རོ་ན་མཆོད་རྟེན་ Pataliputra Karuna Stupa ཞེས་མཚན་གསོལ་ཡོད་འདུག མཛད་སྒོ་གྲོལ་རྗེས་བོད་ཀྱི་གནད་དོན་ཐད་༧གོང་ས་མཆོག་གིས་གསར་འགོད་པར་ད་ལྟ་རྒྱ་ནག་ནང་འགྱུར་བ་འགྲོ་བཞིན་ཡོད་ལ། ཕྱི་ལོ་ ༡༩༥༩ ལོའི་གཉན་འཕྲང་ཅན་གྱི་དུས་སྐབས་དེའི་རྗེས་ནས་རྒྱ་ནག་ལ་འགྱུར་བ་མང་པོ་ཞིག་ཕྱིན་ཡོད་ཅེས་གསུངས་ཡོད།

ཉིན་དེའི་ཉིན་རྒྱབ་ཆུ་ཚོད་ ༣ དང་ཕྱེད་ཀ་ཙམ་ལ་༧གོང་ས་མཆོག་བཞུགས་སྒར་དུ་ཆིབས་བསྒྱུར་བསྐྱངས་ཡོད་པ་རེད།

གསར་འགོད་པ། དཔལ་ལྡན་རྒྱ་མཚོ།