ཐོན་མིའི་གླིང་ག

ཀྲུང་གོའི་རླུང་འཕྲིན་དྲ་བ་ཞེས་པས་གནས་ཚུལ་སྤེལ་བ་ལྟར་ན། རྒྱ་ནག་གིས་ ༼ བོད་ལྗོངས་ཀྱི་མངོན་མིན་ཤུལ་བཞག་རིག་གནས་གླིང་ག་ཐོག་མ་སྟེ་ཐོན་མི་གླིང་། ༽ ཞེས་པའི་གླིང་ག་གསར་བ་ཞིག་འཛུགས་སྐྲུན་བྱེད་མགོ་བརྩམས་འདུག

ཕྱི་ཚེས་ ༢༧ ཉིན་ལྷ་ས་གྲོང་ཁྱེར་སྟག་རྩེ་རྫོང་དུ། རྒྱལ་ཁབ་རིག་གནས་ཐོན་ལས་དཔེ་སྟོན་རྟེན་གཞི་སྟེ་ཐོན་མི་གླིང་བོད་ཀྱི་སྒྱུ་རྩལ་རིག་གནས་བཤམས་སྟོན་གླིང་ག་འཛུགས་སྐྲུན་བྱེད་མགོ་བརྩམས་ཡོད་འདུག འཆར་གཞི་ལྟར་ན་གླིང་ག་དེ་ལོ་ལྔའི་འཛུགས་སྐྲུན་བརྒྱུད་བོད་ལྗོངས་ཀྱི་མངོན་མིན་ཤུལ་བཤག་རིག་གནས་བཤམས་སྟོན་དང་། བོད་ཀྱི་སྒྱུ་རྩལ་ལ་ཉམས་སུ་མྱོང་བ། ཁྱད་མཚར་ཐོན་ལས་སྐྱེད་སྲིང་སོགས་ཕྱོགས་གཅིག་ཏུ་འདུས་པའི་མངོན་མིན་ཤུལ་བཞག་རིག་གནས་རྒྱུ་རྫས་བརྗོད་བྱར་བྱས་པའི་གླིང་ག་ཞིག་ཏུ་འཛུགས་སྐྲུན་བྱ་རྒྱུ་ཡིན་འདུག

དྲ་རྒྱ་དེའི་ནང་མུ་མཐུད་དེ་གནས་ཚུལ་སྤེལ་དོན། ཡུལ་སྐོར་བ་དང་ལྷ་སའི་ཡུལ་མི་རྣམས་ཀྱིས་གླིང་ག་དེའི་རིག་གནས་ཉམས་སུ་མྱོང་བར་དེ་གར་བོད་ཀྱི་ས་གདན་དང་། བོད་སྤོས། བོད་ཤོག བོད་ཀྱི་རྒྱན་ཆའི་བཟོ་རྩལ་སོགས་དམངས་ཁྲོད་བཟོ་ལས་ཐོན་རྫས་བཟོ་ཐབས་ཀྱི་གོ་རིམ་ཡོངས་མཐོང་ཐུབ་པ་དང་། གླིང་ག་འདི་ནི་ལྷ་སའི་བོད་ཀྱི་རིག་གནས་བཤམས་སྟོན་དང་ཉམས་སུ་མྱོང་བ་གཉིས་མཉམ་གཅིག་ཏུ་འདུས་པའི་ཕྱོགས་བསྡུས་རང་བཞིན་གྱི་རིག་གནས་ཡུལ་སྐོར་ཐོན་ལས་ལས་གཞི་ཐོག་མ་རུ་འགྱུར་རྒྱུ་ཡིན་སྐོར་བཀོད་འདུག

གླིང་ག་དེའི་རྒྱ་ཁྱོན་ལ་མུའུ་ ༡༠༠༠ ཡོད་ཅིང་། མ་དངུལ་སྒོར་དུང་ཕྱུར་ ༤་༨ བཏང་ཡོད་ལ། ༢༠༡༤ ལོའི་ལོ་མཇུག་ཏུ་ལེགས་འགྲུབ་ཡོང་བ་བྱ་རྒྱུ་ཡིན་འདུག

གསར་འགོད་པ། ཨ་རིག་འགྱུར་མེད།