སྒོམ་སྡེ་ལྷ་རམས་པ་ཐུབ་བསྟན་བསམ་གྲུབ།
མ་ཧཱ་བྷཱ་ར་ཏའི་གཏམ་རྒྱུད་ (Mahābhārata महाभारत) ཀྱི་སྐབས་སུ་བྱུང་བའི་ཀུ་རུའི་ཡུལ་གྱི་དམག་འཐབ་(कुरुक्षेत्र युद्ध Kurukshetra War ཀུ་རུཀྵེ་ཏྲ། ཡུདྡྷ)ཅེས་པ་དེ་བྱུང་བ་ནས་བཟུང་། རྩོད་དུས་ཞེས་པ་དེ་འགོ་ཚུགས་པ་རེད། འདི་ལ་ལེགས་སྦྱར་དུ་“ཀ་ལི་ཡུག”ཟེར། གཡུལ་འཐབ་དེ་ཡང་“ཀཱཽ་ར་ཝ”(कौरव)འམ་དམག་བརྒྱ་པའི་བུ་དང་། “པཱཎ་ཌཝ”(पाण्डव)འམ་སྐྱ་སེང་བུ་ལྔ་སྟེ། བུ་སྤུན་རྒན་གཞོན་གྱི་བུ་ཕྲུག་cousinsགྱི་དབར་རྒྱལ་སྲིད་ཀྱི་དོན་དུ་ཁ་མ་འཆམས་པར་རྩོད་པ་བྱུང་ངོ་། །རྩོད་ལྡན་ལ་༤༣༢༠༠༠བཞི་འབུམ་སུམ་ཁྲི་ཉིས་སྟོང་ཡོད་པར་དུས་འཁོར་ལས་གསུངས། ཞེས་མངོན་བརྗོད་མཁས་པའི་རྣ་རྒྱན་ལས་གསུངས་མོད། འདི་ནི་ཧིནྡཱུའི་ཆོས་ལུགས་སུ་འབྱུང་བའི་ཐ་སྙད་དེ་རང་ནང་པས་ཚུར་བླངས་པའོ། །ཀུ་རུའི་ཡུལ་(ཀུ་རུཀྵེ་ཏྲ)ཞེས་པ་ནི། དེང་སང་རྒྱ་གར་གྱི་མངའ་སྡེ་“ཧ་རི་ཡཱ་ཎཱ”हरियाणा Haryanaཟེར་བ་དེ་ཡིན་པར་བཤད་དོ། །ཞར་བྱུང་དུས་གཞན་གསུམ་གྱི་འགྲེལ་བཤད་ནི།
༼རྫོགས་ལྡན་དུས༽<ཀྲྀ་ཏ་ཡུ་གཾ> བསྐལ་པ་དང་པོའི་དུས་སུ། དེར་དགེ་བཅུ་རྫོགས་པར་སྤྱོད་ཅིང་སྣོད་བཅུད་ཀྱི་དཔལ་ཆ་ཙམ་ཡང་མ་ཉམས་པར་གནས་པས་རྫོགས་ལྡན་ཞེས་བྱའོ། །
དེའི་ཡུན་ཚད་ལ་མི་ལོ་༡༧༢༨༠༠༠ས་ཡ་གཅིག་དང་བདུན་འབུམ་ཉི་ཁྲི་བརྒྱད་སྟོང་པར་དུས་འཁོར་ལས་གསུངས། ཞེས་མངོན་བརྗོད་མཁས་པའི་རྣ་རྒྱན་ལས་བཤད། རྫོགས་ལྡན་གྱི་བསྐལ་པ་དང་དོན་གཅིག
༼གསུམ་ལྡན་དུས༽ <ཏྲེ་ཏཱ་ཡུ་གཾ> བསྐལ་པ་དང་པོའི་དུས་སུ་དགེ་བཅུ་རྫོགས་པར་སྤྱོད་ཅིང་སྣོད་བཅུད་ཀྱི་དཔལ་ཆ་ཙམ་ཡང་མ་ཉམས་པར་གནས་པས་རྫོགས་ལྡན་ཞེས་བྱ་ཞིང༌། དེ་ནས་མི་རྣམས་ཀྱིས་འཁྲིག་པ་སྤྱོད་ཅིང་མ་བྱིན་པར་བླངས་པས་སྣོད་བཅུད་ཀྱི་དཔལ་ཆ་བཞིར་བགོས་པའི་གཅིག་བྲི་བས་གསུམ་ལྡན་ཞེས་བྱའོ། །
དེའི་ཡུན་ཚད་ནི་༡༢༩༦༠༠༠ས་ཡ་གཅིག་དང་ཉིས་འབུམ་དགུ་ཁྲི་དྲུག་སྟོང་ཡོད་པར་དུས་འཁོར་ལས་བཤད། ༼གཉིས་ལྡན་དུས༽ <དྭ་པ་ར་ཡུ་གཾ> རྫུན་སྨྲས་པས་སྣོད་བཅུད་ཀྱི་དཔལ་ཆ་གཉིས་བྲི་བས་གཉིས་ལྡན་ཞེས་བྱའོ། །དེའི་ཡུན་ཚད་ནི་གཉིས་ལྡན་ལ་༨༦༤༠༠༠བརྒྱད་འབུམ་དྲུག་ཁྲི་བཞི་སྟོང་ཡོད་པར་དུས་འཁོར་ལས་བཤད།
སྒོམ་སྡེ་ལྷ་རམས་པ་ཐུབ་བསྟན་བསམ་གྲུབ་ལགས། ཁག་གཅིག་ལ་དགེ་བཤེས་ཀྱི་གོ་མིང་ཡོད་པའི་སེར་མོ་བ་སྐྱར་བབས་རྗེས་ད་དུང་ཡང་དགེ་བཤེས་ཀྱི་གོ་མིང་དེ་རང་ཉིད་ཀྱི་མིང་གི་འགོར་སྦྱར་ཏེ་བེད་སྤྱོད་བྱེད་ཀྱི་འདུག་ན། དེའི་ཐད་ཁྱེད་ལ་དགོངས་ཚུལ་ག་འདྲ་ཡོད་དམ།
སྒོམ་སྡེ་ལགས། རྩོད་མ་རྩོད་ཀྱི་དུས་དེ་ལས་གལ་ཆེ་བ་ནི། ཕྱི་ནང་གཉིས་ཀྱི་ལུགས་སུ་མིའི་ཚེ་ལོ་དཔག་མེད་སོགས་ཡོད་པ་ལུང་རིགས་གང་གིས་སྒྲུབ་ཐུབ་བམ།
འགྲེལ་བཤད་སྣོན་མ་ཆུང་ཆུང་ཞིག་ལྷག་འདུག
རྩོད་ལྡན་དུས། རྩོད་དུས། སྙིགས་དུས། སྙིགས་མའི་དུས། སྙིགས་མ་ལྔའི་དུས། སྙིགས་མ་ལྔ་བདོའི་དུས་རྣམས་དོན་འདྲའོ། །
ཨ་འབྲུག་དཀོན་མཆོག་ལགས།
ཁྱེད་ནས་རྒྱུན་ལྡན་ལྟར་དྲི་བ་ཡག་པོ་དྲིས་འདུག
རེད་རེད། མིའི་འབྱུང་ཁུངས་ཡར་དེད་ན་དུད་འགྲོ་ཡིན་པ་ཚན་རིག་པ་སྨོས་ཅི་དགོས། ང་ཚོ་བོད་པས་ཀྱང་མི་ལོ་བརྒྱ་ཕྲག་མང་པོའི་སྔོན་ནས་བཤད་ཀྱིན་ཡོད་པ་རེད། འོན་ཀྱང་སྔོན་མ་དུད་འགྲོ་ཡིན་ཡང་ད་ལྟ་མི་རང་རེད། དེར་མ་ཟད་མི་དང་དུད་འགྲོ་ལ་རྣམ་རིག་བཀྲ་ལོས་དང་རླབས་ཆེ་ཆུང་སོགས་ཀྱི་ཁྱད་པར་ཆེན་པོ་ཡོད་པས། མི་རྩ་བ་ཆེ་བ་བརྩིས་པ་རེད།
རྫོགས་སྙིགས་ཀྱི་ལོ་ཚད་དང་འགྲེལ་བཤད་འདི་དག་ནི་གོང་དུ་བཤད་པ་ལྟར་ཧིནྡཱུའི་ཆོས་ལུགས་སུའང་རང་རེའི་ནང་ཆོས་སུ་འབྱུང་བ་ལྟར་ཇི་མ་ཇི་བཞིན་གསུངས་འདུག ཁུངས་ལྡན་ཡིན་མིན་ནི་ཤོད་དཀའོ། །
གཙང་ཕྲུག་སྟོབས་ལགས།
ཁྱེད་རང་གི་དྲི་བ་དེས་ང་ལའང་དཔེ་ཆ་ཀློག་རྒྱུར་ཕན་ཐོགས་བྱུང་སོང་བས། ཐུགས་རྗེ་ཆེ།
བདེ་བ་ཅན་གྱི་སྐོར་དེ་༼འཕགས་པ་བདེ་བ་ཅན་གྱི་བཀོད་པ་ཞེས་བྱ་བ་ཐེག་པ་ཆེན་པོའི་མདོ༽ལས་འགྲེལ་བཤད་གསལ་པོ་ཞེ་དྲག་གསུངས་ཡོད་རེད།
དུམ་བུ་ཞིག་འོག་ཏུ་དྲངས་ཡོད་པ་གཟིགས་རོགས།
༼འཕགས་པ་བདེ་བ་ཅན་གྱི་བཀོད་པ་ཞེས་བྱ་བ་ཐེག་པ་ཆེན་པོའི་མདོ༽ལས། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ཕྲག་འབུམ་འདས་པ་ན་འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །ཤཱ་རིའི་བུ་འདི་ཇི་སྙམ་དུ་སེམས། འཇིག་རྟེན་གྱི་ཁམས་དེ་ཅིའི་ཕྱིར་བདེ་བ་ཅན་ཞེས་བྱ་ཞེ་ན། ཤཱ་རིའི་བུ་འཇིག་རྟེན་གྱི་ཁམས་བདེ་བ་ཅན་དེ་ན་སེམས་ཅན་རྣམས་ཀྱི་ལུས་ལ་སྡུག་བསྔལ་མེད། སེམས་ལ་སྡུག་བསྔལ་མེད་ཅིང་བདེ་བའི་རྒྱུ་ཚད་མེད་པར་ཡོད་དེ། དེའི་ཕྱིར་འཇིག་རྟེན་གྱི་ཁམས་བདེ་བ་ཅན་ཞེས་བྱའོ། །ཤཱ་རིའི་བུ་གཞན་ཡང་འཇིག་རྟེན་གྱི་ཁམས་བདེ་བ་ཅན་ནི་ཁ་ཁྱེར་རིམ་པ་བདུན་དང༌། ཤིང་ཏ་ལའི་ཕྲེང་བ་རིམ་པ་བདུན་དང༌། དྲིལ་བུ་གཡེར་ཀའི་དྲ་བ་རྣམས་ཀྱིས་ཀུན་ནས་ཡོངས་སུ་བསྐོར་བ། བཀྲ་བ་བལྟ་ན་སྡུག་པའོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་རིན་པོ་ཆེ་སྣ་བཞི་ལ་འདི་ལྟ་སྟེ། གསེར་དང༌། དངུལ་དང༌། བཻ་དཱུ་རྻ་དང༌། ཤེལ་དང༌། རྣམ་པ་དེ་ལྟ་བུའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་གིས་ལེགས་པར་བརྒྱན་པའོ། །ཤཱ་རིའི་བུ་གཞན་ཡང་འཇིག་རྟེན་གྱི་ཁམས་བདེ་བ་ཅན་ན་རིན་པོ་ཆེ་སྣ་བདུན་གྱི་རྫིང་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ། རིན་པོ་ཆེའི་པད་མས་ཁེབས་པ། བྱ་རོག་གིས་བཏུང་དུ་རུང་བར་ཁ༌ད་ཆད་དུ་གྱུར་པ་གསེར་གྱི་བྱེ་མ་བདལ་བ་དག་ཡོད་དེ། རྫིང་དེ་དག་གི་ཕྱོགས་བཞི་ཀུན་ན་ཐེམ་སྐས་བཀྲ་བ། བལྟ་ན་སྡུག་པ། གསེར་དང༌། དངུལ་དང༌། བཻ་དཱུ་རྻ་དང༌། ཤེལ་དང༌། རིན་པོ་ཆེ་སྣ་བཞི་ལས་བྱས་པ་བཞི་བཞི་ཡོད་དོ། །རྫིང་དེ་དག་གི་འགྲམ་ན་རིན་པོ་ཆེའི་ཤིང་ལྗོན་པ་རིན་པོ་ཆེ་སྣ་བདུན་ལ་འདི་ལྟ་སྟེ། གསེར་དང༌། དངུལ་དང༌། བཻ་དཱུ་རྻ་དང༌། ཤེལ་དང༌། མུ་ཏིག་དམར་པོ་དང༌། རྡོའི་སྙིང་པོ་དང༌། སྤུག་གི་ཤིང་བཀྲ་བ། བལྟ་ན་སྡུག་པ་དག་སྐྱེས་སོ། །རྫིང་དེ་དག་ཀུན་ནས་པད་མ་སྐྱེས་པ་འདི་ལྟ་སྟེ་གསེར་དང༌། གསེར་གྱི་ཁ་དོག །གསེར་གྱི་འོད་འབྱུང་བ། གསེར་ལྟ་བུར་སྟོན་པ། སྔོན་པོ་ཁ་དོག་སྔོན་པོ། །འོད་སྔོན་པོ་འབྱུང་བ། སྔོན་པོ་ལྟ་བུར་སྟོན་པ། སེར་པོ་ཁ་དོག་སེར་པོ། །འོད་སེར་པོ་འབྱུང་བ། སེར་པོ་ལྟ་བུར་སྟོན་པ། དམར་པོ་ཁ་དོག་དམར་པོ། །འོད་དམར་པོ་འབྱུང་བ། དམར་པོ་ལྟ་བུར་སྟོན་པ། དཀར་པོ། ཁ་དོག་དཀར་པོ། །འོད་དཀར་པོ་འབྱུང་བ། དཀར་པོ་ལྟ་བུར་སྟོན་པ། བཀྲ་བ། ཁ་དོག་བཀྲ་བ། འོད་བཀྲ་བ་འབྱུང་བ། བཀྲ་བ་ལྟ་བུར་སྟོན་པ། ཤིང་རྟའི་འཕང་ལོ་ཙམ་དག་སྐྱེས་སོ། །ཤཱ་རིའི་བུ་སངས་རྒྱས་ཀྱི་ཞིང་དེ་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། ཤཱ་རིའི་བུ་གཞན་ཡང་འཇིག་རྟེན་གྱི་ཁམས་བདེ་བ་ཅན་ན་ལྷའི་སིལ་སྙན་གྱི་སྒྲ་རྟག་ཏུ་འབྱུང་ངོ། །ས་ཆེན་པོ་ནི་གསེར་གྱི་ཁ་དོག་ལྟ་བུ་སྟེ་ཉམས་དགའ་བའོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། །ཤཱ་རིའི་བུ་གཞན་ཡང་སངས་རྒྱས་ཀྱི་ཞིང་དེ་ན་ཉིན་ལན་གསུམ། མཚན་ལན་གསུམ་དུ་ལྷའི་མེ་ཏོག་མན་དཱ་ར་བའི་ལྷའི་མེ་ཏོག་གི་ཆར་འབབ་བོ། །དེར་སེམས་ཅན་གང་དག་སྐྱེས་པ་དེ་དག་ཀྱང་སྔ་དྲོ་གཅིག་བཞིན་དུ་སངས་རྒྱས་ཀྱི་ཞིང་གཞན་དང་གཞན་དུ་དོང་སྟེ་སངས་རྒྱས་བྱེ་བ་ཕྲག་འབུམ་ལ་ཕྱག་འཚལ་ཞིང༌། དེ་བཞིན་གཤེགས་པ་རེ་རེ་ལ་ཡང་མེ་ཏོག་སྐོན་བུ་བྱེ་བ་ཕྲག་འབུམ་མངོན་པར་འཐོར་ཏེ། གཏོར་ནས་ཉིན་མོ་གནས་པའི་ཕྱིར་སླར་འཇིག་རྟེན་གྱི་ཁམས་དེ་ཉིད་དུ་འདོང་ངོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། །ཤཱ་རིའི་བུ་གཞན་ཡང་འཇིག་རྟེན་གྱི་ཁམས་བདེ་བ་ཅན་ན་ངང་པ་དང༌། ཁྲུང་ཁྲུང་དང༌། རྨ་བྱ་དག་ཡོད་པ་དེ་དག་ཀྱང་ཉིན་ལན་གསུམ། མཚན་ལན་གསུམ་འདུས་ནས་ཡང་དག་པར་བགྲོ་བར་བྱེད་དེ། རང་རང་གི་སྐད་དག་གིས་སྨྲའོ། །དེ་དག་སྨྲ་བ་ན་དབང་པོ་དང་སྟོབས་དང༌། བྱང་ཆུབ་ཀྱི་ཡན་ལག་གི་སྒྲ་དག་འབྱུང་ངོ། །སེམས་ཅན་གང་དག་དེར་སྐྱེས་པ་དེ་དག་གིས་སྒྲ་དེ་ཐོས་ནས་སངས་རྒྱས་ཡིད་ལ་བྱེད་པ་སྐྱེ། ཆོས་ཡིད་ལ་བྱེད་པ་སྐྱེ། དགེ་འདུན་ཡིད་ལ་བྱེད་པར་སྐྱེའོ། །ཤཱ་རིའི་བུ་འདི་ཇི་སྙམ་དུ་སེམས། སེམས་ཅན་དེ་དག་དུད་འགྲོའི་སྐྱེ་གནས་སུ་གྱུར་པ་ཡིན་སྙམ་དུ་སེམས་པ་ལྟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཤཱ་རིའི་བུ་སངས་རྒྱས་ཀྱི་ཞིང་དེ་ན་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དུ་སྐྱེ་བའི་མིང་ཡང་མེད་དོ། །བྱའི་ཚོགས་དེ་དག་ནི་དེ་བཞིན་གཤེགས་པ་ཚེ་དཔག་མེད་དེ་ཉིད་ཀྱིས་ཆོས་ཀྱི་སྒྲ་དབྱུང་བའི་ཕྱིར་སྤྲུལ་པ་དག་གོ༌། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། །ཤཱ་རིའི་བུ་གཞན་ཡང་སངས་རྒྱས་ཀྱི་ཞིང་དེའི་ཏ་ལའི་ཕྲེང་བ་དེ་དག་དང༌། དྲིལ་བུ་གཡེར་ཀའི་དྲ་བ་དེ་དག་ལ་རླུང་གིས་ཕོག་ཅིང་རླུང་གིས་བསྐྱོད་ན་སྒྲ་སྙན་པ་ཡིད་དུ་འོང་བ། ཉམས་དགའ་བ་འབྱུང་སྟེ། འདི་ལྟ་སྟེ་དཔེར་ན། རོལ་མོ་མཁན་གྱིས་ཡན་ལག་བྱེ་བ་འབུམ་དང་ལྡན་པའི་ལྷའི་སིལ་སྙན་བླངས་པ་བཞིན་ནོ། །དེར་མི་དེ་དག་གིས་སྒྲ་དེ་ཐོས་ནས་སངས་རྒྱས་རྗེས་སུ་དྲན་པ་དང༌། ཆོས་རྗེས་སུ་དྲན་པ་དང༌། དགེ་འདུན་རྗེས་སུ་དྲན་པ་ལུས་ལ་གནས་སོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པའི་རྒྱན་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། །ཤཱ་རིའི་བུ་འདི་ཇི་སྙམ་དུ་སེམས། ཅིའི་ཕྱིར་དེ་བཞིན་གཤེགས་པ་ཚེ་དཔག་ཏུ་མེད་ཅེས་བྱ་ཞེ་ན། ཤཱ་རིའི་བུ་དེ་བཞིན་གཤེགས་པ་ཚེ་དཔག་མེད་དེའི་ཚེའི་ཚད་དཔག་ཏུ་མེད་དེ། དེའི་ཕྱིར་དེ་བཞིན་གཤེགས་པ་ཚེ་དཔག་མེད་ཅེས་བྱའོ། །ཤཱ་རིའི་བུ་གཞན་ཡང་ཅིའི་ཕྱིར་དེ་བཞིན་གཤེགས་པ་དེ་འོད་དཔག་མེད་ཅེས་བྱ་ཞེ་ན། ཤཱ་རིའི་བུ་དེ་བཞིན་གཤེགས་པ་འོད་དཔག་མེད་དེའི་འོད་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་དེ། དེའི་ཕྱིར་དེ་བཞིན་གཤེགས་པ་འོད་དཔག་མེད་ཅེས་བྱའོ། །བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་བསྐལ་པ་བཅུ་ལོན་ནོ། །ཤཱ་རིའི་བུ་གཞན་ཡང་བཅོམ་ལྡན་འདས་དེའི་ཉན་ཐོས་ཀྱི་དགེ་འདུན་དག་པ་དགྲ་བཅོམ་པ་ཤ་སྟག་ཚད་མེད་དེ། དེ་དག་གི་ཚད་བརྗོད་པར་སླ་བ་མ་ཡིན་ནོ། །ཤཱ་རིའི་བུ་གཞན་ཡང་སངས་རྒྱས་ཀྱི་ཞིང་དེར་སྐྱེས་པའི་སེམས་ཅན་དག་ནི་ཕྱིར་མི་ལྡོག་པ། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དག་པ་ཤ་སྟག་གོ༌། །ཤཱ་རིའི་བུ་བྱང་ཆུབ་སེམས་དཔའ་དེ་དག་གི་ཚད་ནི་བརྗོད་པར་སླ་བ་མ་ཡིན་ཏེ། གཞན་དུ་ན་ཚད་མེད་གྲངས་མེད་ཅེས་བྱ་བའི་གྲངས་སུ་འགྲོའོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། ཤཱ་རིའི་བུ་དེ་ལྟ་བས་ན་རིགས་ཀྱི་བུའམ་རིགས་ཀྱི་བུ་མོས་སངས་རྒྱས་ཀྱི་ཞིང་དེར་སྐྱེ་བར་བྱ་བའི་ཕྱིར་དགེ་བའི་རྩ་བ་རྣམས་གུས་པར་ཡོངས་སུ་བསྔོ་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་སྐྱེས་བུ་དམ་པ་དེ་ལྟ་བུ་དག་དང་ཕྲད་པར་འགྱུར་བའི་ཕྱིར་རོ། །ཤཱ་རིའི་བུ་དགེ་བའི་རྩ་བ་ངན་ངོན་ཙམ་གྱིས་ནི་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེའི་ཞིང་དུ་སྐྱེ་བར་མི་འགྱུར་རོ། །སོགས་གསུངས་སོ། །
དོན་ལ་རྣམ་ཤེས་ཀྱི་རིགས་ལམ་འདི་བཞིན་གྲུབ་མཐའ་གཅེར་བུ་བས་གངས་རིན་པོ་ཆེ་ནས་ཁུར་ཡོང་བ་ཞིག་ཡིན་ཞིང་། དེ་ནས་ནང་བས་བེད་སྤྱོད་བཏང་ཡོད། དེ་བས། བོད་ཀྱི་བྱུང་བ་རྒྱ་གར་ལས་འཕྱི་མེད་པའི་ཁར། རྣམ་ཤེས་ཀྱི་རིགས་ལམ་བོད་ནས་རྒྱ་གར་ལ་དར་བ་ཞིག་ཡིན་པས། རྫོགས་ལྡན་རྩོད་ལྡན་སོགས་ཀྱི་བྱུང་བའང་ཤེས་རིག་ལ་འབྲེལ་བ་དམ་ཟབ་ཡོད་ལ། སྐྱ་སེང་བུ་ལྔ་སོགས་བོད་ལ་སྐྱབས་བཅོལ་དུ་ཡོང་མཁན་ལས་བོད་ཀྱི་མི་རྒྱུད་ཀྱི་འབྱུང་ཁུངས་མིན་པ་དང་རྩོད་ལྡན་ལ་སོགས་ཀྱི་དུས་བབས་ཤིག་གི་ཚུར་སྣང་ལས་ལྷ་སྒྲུང་དུ་སྦྱར་མི་རུང་། དཔེར་ན། བོད་མི་ཚོ་ཕྱི་ལོ ༡༩༥༨ལོར་སྐྱབས་བཅོལ་དུ་ཡོང་སྐབས། རྒྱ་གར་གྱི་གྲོང་གསེབ་ཁག་ནས་ལྷ་ཡུལ་ནས་ཡོང་བར་ངོས་འཛིན་གནང་སྟེ་གུས་བཀུར་བླ་མེད་བྱས་ཡོད་ནའང་། རྗེས་སོར་གླང་ཤ་བཟའ་བ་ཤེས་འཕྲལ་འདྲེ་རེད་ཅེས་འགྱུར་བ་ཐེབས་ཡོད། གང་ལྟར་འདི་ལས་ཤེས་ཐུབ་པ་ནི་བོད་འདི་རྒྱ་གར་གྱིས་ལྷ་ཡུལ་ལ་ངོས་འཛིན་གནང་ཡོད་པར་ལྟ་སྐབས། རྣམ་ཤེས་ཀྱི་རིགས་ལམ་འདི་བཞིན་བོད་ནས་རྒྱ་གར་ལ་དར་བའི་མཚོན་པའི་བོད་ཀྱི་ཤེས་རིག་གིས་རྒྱ་གར་ལ་ཤུགས་རྐྱེན་ངོས་ཅན་ཞིག་ཐེབས་མྱོང་བ་མཚོན་བཞིན་ཡོད། དེ་ལྟ་ཞིག་མ་རེད་དམ།
གསང་མིང་འོག་གི་འཇབ་རྒོལ་བ་དང་རྨས་མ་ཚོ།
འདོན་སྤེལ། ༢༠༡༠/༠༥/༣༡
ཞེས་པའི་གསར་འགྱུར་འདིའི་ཐད་ལ་བགྲོ་གླེང་བྱེད་པར་ཕེབས་ཤོག
སྡོམ་སྡེ་ལྷ་རམས་པ་ལགས། ཁྱེད་ལ་དྲི་བ་ཞིག་ཡོད། བདེ་བ་ཅན་གྱི་ཞིང་བཀོད་དེ་ཆོས་གཞུང་ནས་ཇི་ལྟར་གསུང་ཡོད་དམ།
རྩོད་དུས་དང་རྫོགས་ལྡན་ཞེས་པ་འདི་ཚོ་ཚིག་ངོས་ནས་འདི་ལྟར་ཡར་འདེད་བྱས་པ་ཞིབ་འཇུག་གི་གཞི་ལེགས་པོ་ཞིག་རེད།། འོན་ཀྱང་ལོ་གྲངས་འདི་འདྲ་མང་པོ་ཞིག་གི་ཡར་སྔོན་གྱི་ལོ་རྒྱུས་དེ་ཚོད་དཔག་ཆེན་པོ་ཞིག་ཡིན་རུང་ཁུངས་སྐྱེལ་བཙན་པོ་ཞིག་ནི་མེད་པ་འདྲ། རྒན་སྒོམ་སྡེ་བས་འདི་ཚོའི་སྐོར་འཚོལ་ཞིབ་གནང་བཞིན་པ་ལེགས་པོ་རེད།
དེ་མིན་སྒོམ་སྡེ་བ་ལ་དྲི་བ་ཞིག་ཡོད། ང་ཚོས་དུད་འགྲོའི་སྐྱེ་གནས་ཀྱི་སྡུག་བསྔལ་དེ་གཅིག་ལ་གཅིག་གིས་གནོད་འཚེ་བྱེད་པ་དེ་གཙོ་བོར་འཇོག་གི་ཡོད། འཕེལ་འགྱུར་རིག་པའི་ལྟ་ཚུལ་བྱས་ན་འགྲོ་བ་མིའི་ཐོག་མའི་མེས་པོ་དེ་མཐར་གཏུགས་ན་དུད་འགྲོ་ཡིན་པ་འདྲ། དེ་བས་ན་ང་ཚོས་རྫོགས་སྙིགས་ཀྱི་ལྟ་ཚུལ་འདི་ཨུ་ཚུགས་ཙམ་ལས་ལོ་རྒྱུས་ཀྱི་ཁུངས་ལུང་ལྡན་པ་ཞིག་ཡིན་ནམ།
རྫོགས་ལྡན་སོགས་དུས་བཞིའི་སྐོར་དང་ལོ་ཚད་རྣམས་ཧིནྡཱུའི་གཞུང་ལུགས་སུ་ནང་པ་མ་བྱུང་གོང་ལོ་ངོ་སྟོང་ཕྲག་མང་པོའི་སྔོན་ནས་བྱུང་ཞིང་། ཕྱིས་སུ་ནང་པས་ཐ་སྙད་དེ་རང་ཚུར་བླངས་སོ། །
མདོར་ན་རྩོད་དུས་ནི་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་མ་བྱོན་གོང་མི་ལོ་ཉིས་སྟོང་ལྔ་བརྒྱ་ཙམ་གྱི་སྔོན་རོལ་ནས་བྱུང་ངོ་། །