དེ་རིང་ཞོགས་པའི་ཆུ་ཚོད་ ༨ སྟེང་བཞུགས་སྒར་ངྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། ཉེ་ཆར་ཕྱི་ཟླ་ ༤ ཚེས་ ༡༤ ཉིན་ཡུལ་ཤུལ་སྐྱེ་རྒུ་མདོར་ས་ཡོམ་གོད་ཆག་ཁྲོད་མི་མང་པོ་རྐྱེན་ལམ་དུ་ཕྱིན་ཏེ། ད་ཆར་ཉིན་ཞག་ཞེ་དགུ་ཚང་བའི་བསྔོ་སྨོན་མཆོད་འབུལ་རྒྱ་ཆེན་ཞིག་གནང་ཡོད། མཆོད་འབུལ་གྱི་ཚོགས་དབུར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་ཏེ། བོད་གཞུང་གི་བཀའ་བློན་རྣམ་པ་དང་སྤྱི་འཐུས་རྣམ་པ། གཞུང་ཞབས་ལས་བྱེད་རྣམ་པ། དེ་བཞིན་བཞུགས་སྒར་གཡས་གཡོན་གྱི་དགོན་སྡེ་ཁག་གི་གྲྭ་བཙུན་དང་མི་དམངས་བཅས་འདུ་འཛོམས་ཀྱིས་འདས་པོ་དག་གི་ཆེད་དུ་བསྔོ་བ་སྨོན་ལམ་དང་། ཤུལ་ལུས་རྨས་མ་མྱུར་དུ་དྲག་སྐྱེད་ཡོང་བ། དྭ་ཕྲུག་དང་དབུལ་ཕོངས་སུ་འགྱུར་བའི་ཉམ་ཐག་རྣམས་དཀའ་སྡུག་ལས་ཐར་ཏེ། གོད་ཆག་ཉམས་གསོ་དང་ཁྱིམ་གཞི་བསྐྱར་འཛུགས་བྱས་ཏེ། སྔར་ལས་ལྷག་པའི་བདེ་སྐྱིད་ཀྱི་འཚོ་བ་གསར་པ་ཞིག་ལ་རོལ་ཐུབ་པར་ཐུགས་སྨོན་དང་གསོལ་འདེབས་ཞུས་ཡོད།
སྐབས་དེར་བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་གསུངས་དོན། ཉེ་ཆར་ཕྱི་ཟླ་ ༤ ཚེས་ ༡༤ ཉིན་གྱི་སྔ་དྲོའི་བོད་ནང་གི་ཆུ་ཚོད་ ༧ སྐར་མ་ ༤༩ ཐོག་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ། བོད་མདོ་ཁམས་སྐྱུ་རྒུ་མདོར་ས་ཡོམ་འགུལ་ཚད་རིམ་པ་ ༦ དང་ཚེག་ ༩ ཅན་ཞིག་བརྒྱབས་ཏེ། མི་ཉིས་སྟོང་ལྷག་འདས་གྲོངས་ཕྱིན་ཡོད། དེ་བཞིན་དགོས་མཁོའི་ཡོ་བྱེད་རྩ་བརླག་ཏུ་ཕྱིན་པ་སོགས་ཀྱི་དཀའ་སྡུག་བསམ་ཡུལ་ལས་འདུས་པ་མྱང་དང་མྱོང་བཞིན་ཡོད། དེ་རིང་རྐྱེན་འདུས་སུ་སོང་བ་དེ་རྣམས་ཀྱི་ཞེ་དགུའི་དུས་ཚིགས་ཁྱད་པར་ཅན་འདི་ལ། ཆོས་རིགས་ལས་ཁུངས་ནས་ཐེག་ཆེན་ཆོས་གླིང་གཙུག་ལག་ཁང་དུ་སྣང་གསལ་མར་མེ་སྟོང་ཚར་དང་དགེ་འདུན་འདས་པ་རྒྱ་མཚོར་སྐུ་འགྱེད་བསྙེན་བཀུར་སོགས་ཀྱི་དགེ་སྒྲུབ་བྱེད་ཀྱིན་ཡོད། བཅས་གསུངས་སོང་།
རྒྱ་
གསར་འགོད་པ། དོན་གྲུབ་བཀྲ་ཤིས།
སྤུན་ཟླ་དེ་དག་གིས་ཚེ་རབས་ནས་བྱས་བསགས་སྡིགས་སྟུང་དག་ནས་རྣམ་མཁྱེན་རྒྱལ་བའི་གོ་འཕང་རིན་པོ་ཆེ་འཐོབ་ཐུབ་པའི་ཐུགས་སྨོན་གནང་རོགས་ཞུ།
འབྱུང་བའི་རྐྱེན་གྱིས་འདས་གྲོངས་སུ་ཕྱིན་པའི་བོད་རིགས་སྤུན་ཟླ་རྣམས་སླར་ཡང་༸རྒྱལ་ཀུན་སྙིང་རྗེའི་རང་གཟུགས་འཕགས་མཆོག་ཕྱག་ན་པདྨོའི་གདུལ་ཞིང་དམ་པར་འགྱུར་བའི་བསྔོ་སྨོན་བྱེད།