ཕྱི་ཚེས་ ༣ ཉིན་རང་དབང་གི་ཁྱིམ་གཞིས་ཞེས་པའི་ཨ་རིའི་འགྲོ་བ་མིའི་ཐོབ་ཐང་ཚོགས་པས། ༢༠༠༩ ལོའི་འཛམ་གླིང་གི་འགྲོ་བ་མིའི་ཐོབ་ཐང་སྐོར་གྱི་ལོ་འཁོར་སྙན་ཐོ་ཞིག་བཏོན་ཡོད།
སྙན་ཐོ་དེ་ཉེ་ཆར་ནས་འཚོགས་བཞིན་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆེན་ཐེངས་ཆེན་ཐེངས་ ༡༤ པའི་སྟེང་ཕུལ་ཡོད་ཅིང་། སྙན་ཐོའི་ནང་སྤྱི་དམངས་ཀྱི་ཆབ་སྲིད་རང་དབང་ཞན་པའི་རྒྱལ་ཁབ་ ༡༧ དང་ས་ཁུལ་ ༣ གསལ་འདོན་བྱས་ཡོད་པ་དང་། དེ་དག་ཨང་རིམ་ནི་འབར་མ་དང་། ཐིག་དམར་གྷི་ནི་ཡ། ལི་བྷི་ཡ། བྱང་ཀོ་རི་ཡ། སི་ཌན། ཏུར་མན་སི་ཐན། ཨུ་ཛུ་བྷེ་ཁུ་སི་ཐན། བོད་དང་ཨི་ཐོ་པི་ཡའི་མངའ་སྡེ་ཨེ་རི་ཊེ་ཡ་སོགས་སུ་བགར་ཡོད་ལ། འགྲོ་བ་མིའི་ཐོབ་ཐང་སྐྱོ་ཤོས་ཀྱི་རྒྱལ་ཁབ་བཅུའི་ཁྲོད་དུ་བྷེ་ལ་རུ་སི་དང་། ཆེ་ཌ། རྒྱ་ནག ཁུ་བྷ། གྷི་ནི། ལའོ་སྤྱི་མཐུན་རྒྱལ་ཁབ། སོ་དྷི་ཨ་རབ། སི་རི་ཡ་བཅས་ཚུད་ཡོད་པ་དང་། རྒྱལ་ཁབ་དེ་དག་གི་ཆབ་སྲིད་ཀྱི་དབང་ཆ་ནི་སྐར་མ་ ༧ དང་། སྤྱི་དམངས་ཀྱི་རང་དབང་ནི་སྐར་མ་ ༦ ཡིན་འདུག
འགྲོ་བ་མིའི་ཐོང་ཐང་ཞན་པའི་རྒྱལ་ཁབ་དག་གི་ཁྲོད་དུ་རྒྱ་ནག་དང་ཁུ་བྷ། སོ་ངྷི་ཨ་རབ་གསུམ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཞུགས་རྒྱལ་ཁབ་ཡིན་པ་རེད། དེའི་ཐད་རང་དབང་ཁྱིམ་གཞིས་ཞེས་པའི་ཚོགས་པས། “འགྲོ་བ་མིའི་ཐོབ་ཐང་ལྷན་ཚོགས་ནི་འགྲོ་བ་མིའི་ཐོབ་ཐང་ལ་སྲུང་སྐྱོབ་དང་ཡར་རྒྱས་སུ་གཏོང་མཁན་ཡིན་ནའང་། ལྷན་ཚོགས་ཀྱི་ཚོགས་ཞུགས་རྒྱལ་ཁབ་གསུམ་སྔར་བཞིན་འགྲོ་བ་མིའི་ཐོབ་ཐང་སྡུག་ཤོས་ཀྱི་མིང་ཐོའི་ཁྲོད་ཡོད་པར་མ་ཟད། འགྲོ་བ་མིའི་ཐོབ་ཐང་སྡུག་ཤོས་ཀྱི་མིང་ཐོའི་ཁྲོད་ཀྱི་ལི་བྷི་ཡ་རྒྱལ་ཁབ་ཀྱང་ད་ལོའི་ཕྱི་ཟླ་ ༦ པའི་ཚེས་ ༡༩ འགྲོ་བ་མིའི་ཐོབ་ཐང་ལྷན་ཚོགས་སུ་འཛུལ་ཞུགས་བྱ་རྒྱུར་མོས་མཐུན་བྱུང་ཡོད་པ་རེད” ཅེས་སྐྱོན་བརྗོད་བྱས་ཡོད།
༢༠༠༦ ལོར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དེ་དབུ་བརྙེས་ཡོད་པ་དང་། ལྷན་ཚོགས་དེར་ཁྱོན་རྐུབ་སྟེགས་ ༤༧ ཡོད་པ་ལས་ཨེ་ཤ་ཡར་ས་མིག་ ༡༣ དང་། ཨ་ཧྥི་རི་ཁར་ ༡༣། ཤར་ཡུ་རོབ་ལ་ ༦། ལ་ཊིན་ཨ་མེ་རི་ཁ་དང་གྷི་རི་བྷིན་ས་ཁུལ་དུ་ ༨། ནུབ་ཡུ་རོབ་དང་ས་ཁུལ་གཞན་ལ་ ༧ བཅས་གཏན་འབེབས་བྱས་ཡོད། ལོ་རེར་འོས་ཤོག་བརྒྱུད་ཚོགས་མིའི་སུམ་ཆའི་གཅིག་བརྗེ་བཞིན་ཡོད་པ་རེད།
གཞན་ཡང་། རྒྱལ་ཚོགས་ཀྱི་ཚོགས་ཆེན་ཐེངས་ ༦༤ པ་དེ་ཟླ་ ༥ པའི་ཚེས་ ༡༣ ཉིན་འཚོགས་ཡོད་ལ། སྐབས་དེར་རྒྱལ་ཁབ་ ༡༤ ཙམ་གསར་དུ་ཚོགས་ཁོངས་སུ་འཛུལ་ཞུགས་བྱ་ཐུབ་ཡོད་ཅིང་། ལས་འཁུར་དུས་ཡུན་ལོ་ ༣ ཡིན་འདུག
གསར་འགོད་པ། དཔལ་ལྡན་རྒྱ་མཚོ།
ལགས་གསོལ་་་་་་ལན་གནང་བ་ལ་ཐུགས་རྗེ་ཆེ
ཀློག་པ་པོ་ཅོ་རི་ཉི་མ་ལགས། ཁྱེད་ཀྱིས་དགོངས་ཚུལ་གསུངས་བར་ཐུགས་རྗེ་ཆེ། ཡིན་ནའང་། གོང་གི་རྒྱལ་ཁབ་འདི་དག་གི་མིང་གུས་པས་བྱུང་རྒྱལ་དུ་བྲིས་པ་ཞིག་གཏན་ནས་མིན་པར་བོད་གཞུང་གིས་གཏན་འབེབས་བྱས་པའི་རྒྱལ་ཁབ་ཁག་གི་ཐོ་གཞུང་དེར་རྩ་འཛིན་ཞུས་པ་ཡིན། སླར་ཡང་ཐུགས་རྗེ་ཆེ་ཞུ།
བཀུར་འོས་དཔལ་ལྡན་རྒྱ་མཚོ་ལགས།
རྒྱལ་ཁབ་འདི་དག་གི་མིང་བྲིས་དུས་སྔགས་ཡིག་ལྟ་བུ་དང་ཡི་གེ་ཕྱི་ལོག་མ་བྲིས་ན་བོད་ཡིག་གི་འདང་གི་མི་འདུག་གམ།
གལ་སྲིད་མིང་ཚིག་གི་ཐ་སྙད་གསར་པ་ཡོད་ཚོད་སྔགས་ཡིག་ལྟ་བུ་དང་ཕྱི་ལོག་ཤ་དག་བྲིས་བསྡད་པ་ཡིན་ན་ནམ་ཞིག་བོད་མི་རྣམས་ཀྱིས་ཀློག་མི་ཐུབ་པ་ཡོང་གི་མ་རེད་པས།
མཁས་དབང་དུང་དཀར་མཆོག་གིས་སྒྲ་གདངས་ཅི་འདྲ་ཞིག་འབྲི་དགོས་ཀྱང་བོད་ཡིག་འདི་ཕུལ་དུ་བྱུང་བ་ཞིག་ཡིན་གསུངས་འདུག་གོ
དེང་སང་སྔགས་ཡིག་ལྟ་བུ་བྲིས་མཁན་ཚོའི་བསམ་བློ་གཏོང་དགོས་པའི་གནད་དོན་རེད་སྙམ།