སུད་སི་རུ་བོད་དོན་ལས་འགུལ།

སུད་སི་དང་ལེག་ཊེན་སྤྲ་ཡན་བོད་རིགས་མི་མང་གིས་བོད་དོན་གདུང་འབོད་ཅེས་པའི་ལས་འགུལ་དེ་ཐེངས་གསུམ་པར་སྤེལ་འདུག

ཟླ་འདིའི་ཚེས་ ༡ ཉིན་སུད་སི་དང་ལེག་ཊེན་སྤྲ་ཡན་བོད་རིགས་མི་མང་སྒྲིག་འཛུགས་ཀྱི་གོ་སྒྲིག་འོག སུད་སི་ཇི་ནི་ཝར་རྒྱལ་སྤྱིའི་ལྷན་ཚོགས་ཀྱི་མདུན་ཐང་ ༼ Broken Chair ) ཞེས་པའི་ནང་། བོད་དོན་གདུང་འབོད་ཅེས་པའི་བརྗོད་ཚིག་འོག་ལས་འགུལ་ཞིག་སྤེལ་འདུག་ལ། ལས་འགུལ་འདི་ནི་རེབ་ཐེངས་གསུམ་པ་དེ་ཡིན་འདུག ལས་འགུལ་འདི་ལོ་ལྟར་དུས་ཚེས་འདི་དང་བསྟུན་ཏེ་རྒྱལ་སྤྱིའི་ལྷན་ཚོགས་ཀྱི་ཚོགས་ཆེན་ཞིག་མགོ་འཛུགས་ཀྱི་ཉིན་མོར་གོ་སྒྲིག་གནང་ཡོད། དེ་བཞིན་དུས་ཚེས་འདི་དང་བསྟུན་འདས་པའི་ལོ་གཉིས་ནང་ཞི་བའི་གོམ་འགྲོད་ཀྱི་ལས་འགུལ་ཡང་སྤེལ་འདུག ད་ལན་གྱི་ལས་འགུལ་འདིའི་ནང་བོད་མི་ཉིས་བརྒྱ་ལྷག་དང་ཕྱི་གླིང་བའི་བོད་ཀྱི་གྲོགས་པོ་མི་ཉུང་བ་ཞིག་ཀྱང་མཉམ་ཞུགས་ཀྱིས་གདུང་སེམས་མཉམ་སྐྱེད་བྱས་འདུག
མཇུག་མཐར། སྐྱེ་རྒུ་མདོའི་ས་ཡོམ་དང་འབྲེལ་བའི་སྐར་མ་བཅུའི་གློག་བརྙན་ཞིག་གཟིགས་འབུལ་ཞུས་པ་དང་རི་ཀོན་ཆོས་འཁོར་དགོན་གྱི་དགེ་འདུན་པ་རྣམ་པས་དབུ་ཁྲིད་དེ། མི་མང་རྣམས་ཀྱིས་སྐྱེ་རྒུ་མདོའི་ས་ཡོམ་གྱི་གོད་ཆག་ནང་འདས་གྲོང་ཕྱིན་པའི་སྐྱེ་འགྲོ་རྣམས་ཀྱི་ཆེད་དུ་བསྔོ་བ་སྨོན་ལམ་གསུངས་འདུག

གསར་འགོད་པ། ཨ་རིག་འགྱུར་མེད།