ཕྱི་ཚེས་ ༣ ཉིན་ཤིན་ཧྭ་བོད་ཡིག་དྲ་བས་གནས་ཚུལ་སྤེལ་བ་ལྟར་ན། བོད་ལྗོངས་སུ་གློག་དམར་འཁྱུག་པ་དང་ཐོག་རྒྱག་མང་བའི་དུས་སུ་སླེབས་པ་དང་བསྟུན་ནས། ཐོག་གིས་མང་ཚོགས་ཀྱི་ཐོན་སྐྱེད་དང་འཚོ་བར་གནོད་འཚེ་བཟོ་རྒྱུ་སྔོན་འགོག་བྱ་ཆེད། ཐོག་སྔོན་འགོག་ལྟེ་གནས་ཀྱིས་ཕྱི་ཟླ་དྲུག་པ་ནས་བཟུང་ཐོག་གི་སྔོན་བརྡ་གཏོང་རྒྱུ་རེད་ཅེས་དང་། བོད་རང་སྐྱོང་ལྗོངས་ཐོག་སྔོན་འགོག་ལྟེ་གནས་ཀྱི་འགན་འཁུར་མི་སྣས་ངོ་སྤྲོད་བྱས་པར་གཞིགས་ན། ཐོག་སྔོན་འགོག་ལྟེ་གནས་ཀྱིས་བོད་རང་སྐྱོང་ལྗོངས་གནམ་གཤིས་ལས་ཁུངས་དང་མཉམ་ལས་བྱས་ཏེ། ཐོག་གི་གནོད་འཚེའི་སྔོན་བརྡ་བཏང་ནས་ཞིང་འབྲོག་མང་ཚོགས་ཚོས་ཐོག་གི་སྔོན་བརྡ་མཐོང་རྗེས་དུས་ཐོག་ཏུ་བྱ་ཐབས་བཟུང་ནས་ཐོག་གི་གནོད་འཚེ་སྔོན་འགོག་བྱེད་ཐུབ་པ་བྱེད་རྒྱུ་རེད་ཅེས་གསལ་འདུག
གནས་ཚུལ་དེའི་ནང་མུ་མཐུད་དེ་བཀོད་དོན། ད་ལྟ་ཐོག་སྔོན་འགོག་ལྟེ་གནས་ཀྱིས་ལྗོངས་ཡོངས་སུ་ཐོག་སྔོན་འགོག་ཚོད་ལྟའི་ཡོ་ཆས་བཅོ་བརྒྱད་སྒར་ཡོད་པ་དང་། སྔོན་འགོག་ཚོད་ལྟའི་ཡོ་ཆས་དེ་ཚོས་ཐོག་གི་གནོད་འཚེ་ཐོན་སའི་ས་ཆ་སྤྱི་ལེ་ཁྲི་ལྔའི་ནང་ཚུན་དུ་ཚད་ལེན་ཐུབ་ཀྱི་ཡོད་ཟེར།
ཡང་བོད་ལྗོངས་ཀྱི་དམིགས་བསལ་གནམ་གཤིས་ཁོར་ཡུག་གི་རྐྱེན་པས་ཐོག་གི་གནོད་འཚེ་ཡང་ཡང་ཐོན་གྱི་ཡོད་པ་དང་། ད་ལོའི་ཕྱི་ཟླ་ལྔ་པ་ཁོ་ནར་ལྷོ་ཁ་གོང་དཀར་རྫོང་ལ་ཐོག་ཐེངས་གཉིས་ལ་བརྒྱབས་ཡོད། རིགས་གཅིག་མཁས་པས་ད་ལྟ་རང་ལྗོངས་སུ་ཐོག་རྒྱག་མང་བའི་དུས་སུ་སླེབས་ཡོད་པས་ཚན་རིག་ལ་བརྟེན་ནས་ཐོག་སྔོན་འགོག་བྱ་རྒྱུ་དེ་གལ་ཆེན་པོ་ཡིན་པ་དང་། ལྷག་པར་དུ་འབར་གས་བྱེད་སླ་བའི་ཁུལ་དང་གྲོང་ཁྱེར་ནང་ཁུལ་གྱི་ཐོག་བརྩེགས་ཁང་ཆེན། སློབ་གྲྭ་སོགས་མི་མང་འདུ་འཛོམས་ཆེ་སར་མི་མངོན་པའི་ཉེན་ཁ་ལས་སེལ་རྒྱུར་དོ་སྣང་བྱེད་དགོས་པའི་དྲན་སྐུལ་བྱས་ཡོད་ཅེས་གསལ་འདུག
གསར་འགོད་པ། ཨ་རིག་འགྱུར་མེད།
ཐོག་སྔོན་འགོག་གི་ལེགས་འཆར་ཞིག་བོད་ནང་སྤེལ་བཞིན་ཡོད་པར་རིང་ཐང་ཇི་ཙམ་ཡོད་པ་དང། དེ་ལ་ནུས་པ་ཇི་ཙམ་ཡོད། དེ་སྔ་སྤྱི་ལོ་ 1988 འམ་ 1989 ནང་རྒྱ་གཞུང་ནས་སེར་བ་སྔོན་འགོག་གི་ལས་འགུལ་ཞིག་སྤེལ་ཡོད། དེ་ནི་སྤྲིན་ནག་འཁྲིགས་ས་དེར་འཕེན་བྱེད་ཀྱི་མེ་མགྱོགས་འདྲ་བོ་ཞིག་ཡོད། གྲོང་པ་རེ་ལ་མེ་མགྱོགས་འདྲ་བོ་དེ་འདྲ་གསུམ་རེ་དང་མདེའུ་བཅུ་རེ་སྤྲད་ཡོད། མེ་མགྱོགས་འདྲ་བོ་དེར་རིན་གོང་རྒྱ་སྒོར་ཉིས་སྟོང་དང་མདེའུ་རེ་རྒྱ་སྒོར་བཅུ་རེ་རེད་དེ་དག་ཚང་མ་ཞིང་པ་རྣམས་ཀྱི་སར་ནས་བསྡུས་ཡོད། དེ་བེད་དཔྱོད་བཏང་ནས་སེར་ར་བཀག་པའི་མི་ཚད་ཆར་པ་ཡང་བཀག་ནས་ཐན་པའི་རྐྱེན་གྱིས་ཞིང་པ་རྣམས་ལ་དཀའ་ངལ་སྣོན་མ་ཞིག་སྤྲད་ཡོད། ད་རེས་ཀྱི་ཐོག་སྔོན་འགོག་གི་ལས་འཆར་དེ་ཡང་ཞིང་འབྲོག་མི་མང་རྣམས་ཀྱི་དྲུང་ནས་དཔལ་འབྱོར་བསྡུ་རུབ་བྱེད་པའི་ལས་འགུལ་ཞིག་ལས་མི་མང་ལ་ཕན་པའི་ལས་དོན་ཞིག་ག་ལ་ཡིན་སྙམ།
ས་ཡོམ་སོགས་ཀྱང་འགོག་ཐུབ་ན་ཇི་འདྲའི་བཟང་བ་ལའང་།
མི་ལ་རྒོལ་བ། ས་ལ་རྒོལ་བ། གནམ་ལ་རྒོལ་བ་གསུམ་ནི་བོད་བཙན་འོག་ནས་གཏོང་འདུན་མེད་པའི་ལག་ཆ་རྣམ་གསུམ་ཡིན་པས། འདིའི་ཐད་ཤེས་ཡོན་པ་ཚོར་གྲགས་འགུལ་མེད་དོན་ཅི་ཡིན་ནམ། ༼མི་ཤེས༽ཞེས་པའི་མིང་ཚིག་དེ་ཡུལ་གྱར་བོད་པའི་སྤྱི་ཚོགས་ནང་ཧ་ལམ་བོར་ཟིན་པར་ངོས་འཛིན་བྱེད་ཆོག་མོད། དེ་རིང་ཡིན་ན་ཕྱིར་ཕེབས་ཟིན་པ་འདྲ།