དྲུག་བཞིའི་ལས་འགུལ་བྱུང་ནས་ལོ་འཁོར་ ༢༡ འདས་པའི་རྗེས་སུ། དེ་དུས་ཀྱི་སྲིད་བློན་ལི་ཕིན་གྱིས་དོན་རྐྱེན་དེ་དང་འབྲེལ་ནས་བྲིས་པའི་མི་སྒེར་གྱི་ཉིན་ཐོ་དེ་པར་བསྐྲུན་འགྲེམས་འཆར་བྱུང་འདུག ཉིན་ཐོ་དེའི་ནང་ལི་ཕིན་གྱིས་རང་ཉིད་འཆི་དགོས་ལ་ཐུག་རུང་། ༨༩ ལོའི་སྟངས་འཛིན་དཀའ་བའི་སློབ་མའི་དམངས་གཙོའི་ལས་འགུལ་ལ་བཀག་འགོག་བྱ་རྒྱུ་དང་། ཁོས་དྲུག་བཞི་དམངས་གཙོའི་ལས་འགུལ་དེ་ནི། རིག་གནས་གསར་བརྗེ་ཆེན་པོའི་ཟིང་འཁྲུགས་ལྟ་བུར་ངོས་འཛིན་བྱ་རྒྱུ་ཡིན་པ་སོགས་བཀོད་ཡོད་འདུག
ཉིན་ཐོའི་དེབ་དེ་ནི་ལི་ཕིན་གྱིས་ ༡༩༨༩ ལོའི་ཟླ་ ༤ ཚེས་ ༡༥ ནས་ཟླ་ ༦ ཚེས་ ༢༤ བར་ལ་རང་ཉིད་ཀྱིས་དངོས་སུ་ཟིན་ཐོར་བཏབས་པའི་ཉིན་ཐོ་དག་ཕྱོགས་སྒྲིག་བྱས་པ་ཞིག་ཡིན་འདུག ཧོང་ཀོང་གི་པར་སྐྲུན་ཁང་ཞིག་ལ་ད་ལོའི་ཟླ་དང་པོའི་ནང་ཉིན་ཐོ་དེའི་མ་ཕྱི་ལག་སོན་བྱུང་བ་དང་། ཟླ་འགའི་རིང་བརྟག་དཔྱད་རྩད་གཅོད་བརྒྱུད་དཔང་འཕེར་བྱུང་རྗེས་ཕྱི་ཟླ་ ༦ པའི་ཚེས་ ༢༢ ཉིན་ཧོང་ཀོང་དུ་པར་བསྐྲུན་བྱ་གཏན་འཁེལ་ཡོད་པ་རེད།
ཉིན་ཐོ་དེའི་ནང་དུ། རྒྱ་ནག་དམར་ཤོག་དཔོན་རིགས་ནང་ཁུལ་དུ་སློབ་མའི་ངོ་རྒོལ་ལས་འགུལ་ཇི་ལྟར་ཐག་གཅོད་མིན་ཐད་རྣོ་ངར་ཅན་གྱི་འགལ་ཟླ་བྱུང་བའི་སྐོར་ཞིབ་ཕྲ་བྲིས་ཡོད་པ་དང་། ལི་ཕིན་རང་ཉིད་དང་དོན་རྐྱེན་རྗེས་སུ་གོ་གནས་ཕབ་ཟིན་པའི་དེ་སྔའི་སྤྱི་ཁྱབ་སྲིད་འཛིན་ཀྲའོ་ཙི་ཡང་གཉིས་བར་བྱུང་བའི་མངོན་གསལ་གྱི་འགལ་བ་དང་། ལི་ཕིན་ཁོ་རང་ཉིད་དངོས་སུ་ངོ་རྒོལ་ལས་འགུལ་བཀག་སྡོམ་ལག་བསྟར་གྱི་ལས་གཞིའི་ནང་ཞུགས་པའི་བརྒྱུད་རིམ་དང་། དམག་མིར་བཀའ་ཕབ་སྟེ་ཐེན་ཨན་མིན་ཐང་ཆེན་གྱི་ལས་འགུལ་བ་རྣམས་ལ་དྲག་གནོན་བྱེད་མཁན་གྱི་ཏིན་ཞའོ་ཕིན་གྱི་སྐབས་དེའི་འགན་ཁུར་ལེན་གྱི་རྣམ་འགྱུར་སོགས་བཀོད་ཡོད་འདུག
མ་ཕྱི་དེར་བསྡོམས་པས་ཤོག་ངོས་ ༢༧༩ དང་། ཁ་བྱང་ལ་<<འགག་རྩའི་དུས་ཀྱི་ལི་ཕིན་གྱི་ཉིན་ཐོ>>ཞེས་བཀོད་ཡོད་འདུག ཧོང་ཀོང་དུས་གསར་པར་བསྐྲུན་ཁང་གི་དཔེ་བསྐྲུན་བ་པའོ་ཕུའུ་ནི་དེ་སྔའི་རྒྱ་ནག་ཆབ་སྲིད་ལྷན་ཁང་གི་རྒྱུན་ལས་དྲུང་ཆེ་སྟེ་ཀྲའོ་ཙི་ཡང་ལ་རྒྱབ་སྐྱོར་གནང་མཁན་གྱི་པའོ་ཏན་གྱི་བུ་ཡིན་པ་རེད། ཁོས་བར་གནས་ཀྱི་མི་ཞིག་བརྒྱུད་ནས་ཉིན་ཐོ་དེའི་མ་ཕྱི་ལག་སོན་བྱུང་བ་དང་། དེབ་དེ་རྒྱ་ནག་གི་སྲོལ་རྒྱུན་ཟོར་ཡིག་ཐོག་པར་བསྐྲུན་དང་དེབ་ཀྱི་མིང་ལ་ << ལི་ཕིན་གྱི་དྲུག་བཞིའི་ཉིན་ཐོ>> ཞེས་བཏགས་ཡོད་སྐོར་འགྲེལ་བརྗོད་བྱས་ཡོད་པ་ལས། ཉིན་ཐོའི་མ་ཕྱི་མཁོ་སྤྲོད་གནང་མཁན་དེ་སུ་ཡིན་མིན་གསལ་ཁ་བཏོད་མེད་པ་རེད།
གཞན་ཡང་ཁོས་བརྗོད་རྒྱུར། བར་གནས་མི་དེས་དེབ་དེ་བཙལ་ནས་ང་ལ་སྤྲོད་དོན་ནི། ཁོ་རང་ཉིད་ཀྱིས་སྔོན་ཆད་ཀྲའོ་ཙི་ཡང་གི་སྐོར་གྱི་དཔེ་དེབ་པར་བསྐྲུན་བྱས་མྱོང་བའི་རྐྱེན་གྱིས་ཡིན་པ་དང་། ཟླ་བ་མང་པོར་བརྟག་དཔྱད་རྩད་གཅོད་བྱས་མཐར། ཁོ་རང་ཉིད་དང་རྩོམ་སྒྲིག་པ་གཞན་པ་ཚང་མས་རྫུན་མ་མིན་པར་ཡིད་ཆེས་རྙེད་པའི་སྐོར་ཀྱང་འགྲེལ་བརྗོད་བྱས་ཡོད།
དེབ་དེའི་སྔོན་གླེང་ནི། ལི་ཕིན་གྱིས་ཕྱི་ལོ་ ༢༠༠༣ ཟླ་ ༡༢ ཚེས་ ༦ ཉིན་བྲིས་པའི། “ཐེངས་དེའི་ཟིང་འཁྲུགས་སྐབས་རང་ཉིད་ཀྱིས་ཤེས་རྟོགས་བྱུང་བའི་དོན་དངོས་དག་ཡི་གེར་བཀོད་དེ་གནད་ཡོད་ཀྱི་ལོ་རྒྱུས་ལ་བདེན་དཔང་བྱ་རྒྱུའི་འོས་འགན་དེ་ང་ལ་ཡོད་པར་སེམས། ༽ཞེས་པའི་ཚིག་དུམ་དེ་བཀོད་ཡོད་འདུག
ཤེས་རྟོགས་བྱུང་བ་ལྟར་ན། མ་གཞི་ལི་ཕིན་གྱི་དེབ་དེ་ཕྱི་ལོ་ ༢༠༠༤ ལོར་དྲུག་བཞི་དམངས་གཙོའི་ལས་འགུལ་ལ་ལོ་འཁོར་ ༡༥ འཁོར་བའི་སྐབས་དང་བསྟུན་ནས་པར་བསྐྲུན་བྱ་འཆར་ཡོད་འདུག རྒྱུ་མཚན་ནི་ཕྱིའི་རྒྱལ་ཁབ་དག་ཏུ་ལི་ཕིན་ནི་དམག་མིར་བཀའ་མངགས་བཏང་སྟེ་ལས་འགུལ་ལ་དྲག་གནོན་གྱིས་མང་ཚོགས་དམར་གསོད་གཏོང་མཁན་གྱི་བྱེད་གཏེ་དེ་ཡིན་པར་སེམས་ཀྱིན་ཡོད་པར་བརྟེན། ལི་ཕིན་གྱིས་ཁོ་རང་ཉིད་ཀྱི་དེབ་དེ་སྔ་མོ་ནས་འདོན་ཐུབ་རྒྱུར་རེ་བ་འཆང་ཡོད་ནའང། ཧའོ་ཅིན་ཐའོ་དང་ཝུན་ཇ་པའོ་ཡིས་བཀག་འགོག་བྱས་པའི་རྐྱེན་གྱིས་འདོན་ཐུབ་མེད་པ་རེད། ད་ལྟ་ལོ་ ༨༡ ལ་སོན་ཡོད་པའི་ལི་ཕིན་གྱིས་མཚོ་འགག་གསུམ་གྱི་ལས་གཞི་འཛུགས་བསྐྲུན་ཐད་ཀྱི་ཉིན་ཐོ་ཞིག་དེ་སྔོན་པར་བསྐྲུན་བྱས་ཟིན་པ་རེད།
གསར་དུ་འདོན་འཆར་གྱི་དེབ་དེའི་ཁྲོད། ལི་ཕིན་གྱིས་ཕྱི་ལོ་ ༡༩༨༩ ལོའི་ཟླ་ ༥ ཚེས་ ༢ ཀྱི་ཉིན་ཐོའི་ནང་དུ། “ཟིང་འཁྲུག་བྱུང་མགོ་བརྩམས་པ་ནས་བཟུང་། ངས་ཆེས་སྡུག་ས་ནས་འཆར་གཞི་བཏང་ཟིན་པ་ཡིན། རང་ཉིད་དང་ནང་མི་ཡོངས་ཀྱི་ཚེ་སྲོག་བློས་གཏོང་དགོས་ནའང་། ངེས་པར་དུ་རྒྱ་ནག་ལ་ཡང་བསྐྱར་རིག་གནས་གསར་བརྗེ་ལྟ་བུའི་སྐྱོ་གར་ཅིག་འབྱུང་རྒྱུ་བཀག་སྡོམ་བྱ་རྒྱུ་ཡིན།” ཞེས་དང་། ཡང་ཕྱི་ཟླ་ ༤ པའི་ཚེས་ ༢༧ གྱི་ཉིན་ཐོའི་ནང་དུ། “ངའི་རླངས་འཁོར་རང་ཁྱིམ་དུ་ལོག་པའི་ལམ་བར་དུ་ངོ་རྒོལ་བྱེད་མཁན་གྱི་སློབ་མ་དག་གིས་བཀག་འགོག་བྱས་བྱུང་། སྟབས་ལེགས་པ་ཞིག་ལ་རླངས་འཁོར་ཁ་ལོ་བ་དང་ཉེན་སྲུང་པ་གཉིས་ཀྱིས་རླངས་འཁོར་ཁ་ཕྱིར་བསྐོར་ནས་ལས་འགུལ་གྱི་ཡུལ་དངོས་དང་རང་དུ་གྱེས་ཐུབ་པ་བྱུང” ཞེས་བྲིས་ཡོད།
དེབ་དེའི་ནང་དྲུག་བཞི་སློབ་མའི་དོན་རྐྱེན་ཇི་ལྟར་ཐག་གཅོད་མིན་ཐད་རྒྱ་ནག་གི་དམར་ཤོག་མགོ་ཁྲིད་རིམ་པའི་བར་བྱུང་བའི་འགལ་ཟླའི་སྐོར་དང་། ལྷག་པར་དུ་ལི་ཕིན་དང་ཀྲའོ་ཙི་ཡང་གི་འགལ་ཟླའི་སྐོར་བརྗོད་དོན། ཕྱི་ཟླ་ ༤ པའི་ཚེས་ ༡༨ ཉིན། དེ་སྔའི་སྤྱི་ཁྱབ་སྲིན་འཛིན་ཧའོ་ཡའོ་པང་འདས་ཀྲོངས་སུ་གྱུར་རྗེས་ཀྱི་ཉིན་གསུམ་པར་སློབ་མའི་ངོ་རྒོལ་དོན་རྐྱེན་བྱུང་བ་དང་། ལི་ཕིན་དང་ཀྲའོ་ཙི་ཡང་གཉིས་ཀྱིས་ཆབ་སྲིད་ལྷན་ཁང་དང་ཆབ་སྲིད་རྒྱུན་ལས་འཐུས་མིའི་ཚོགས་ཐོག་ཏུ་ཕན་ཚུན་ལ་ཁ་ལན་སློག་དགོས་བྱུང་ཞིང་། ལི་ཕིན་གྱིས་ངོ་རྒོལ་ལས་འགུལ་འདིའི་དམིགས་ཡུལ་ནི་དམར་ཤོག་སྲིད་དབང་མགོ་རྟིང་སློག་རྒྱུ་དེ་ཡིན་པས། གསར་བརྗེ་ངོ་ལོག་གི་རང་བཞིན་ཏུ་གཏན་འཁེལ་བྱེད་རྒྱུ་དང་། ཀྲའོ་ཙི་ཡང་གིས་སློབ་མ་རྣམས་ནི་མེས་རྒྱལ་ལ་དགའ་ཞེན་ཡོད་ངེས་ཡིན་པས། ཞི་འཇམ་གྱི་སྒོ་ནས་ཐག་གཅོད་བྱེད་རྒྱུའི་ལངས་ཕྱོགས་འཛིན་དགོས་པ་བརྗོད་པའི་སྐོར་བཀོད་ཡོད།
པེ་ཅིན་མཁར་དུ་དམག་མི་འགྲེམས་གཏོང་སོགས་གནད་འགག་གི་ཐག་གཅོད་མཐའ་དག་ནི་ཏིན་ཞའོ་ཕིན་གྱི་བཀོད་མངགས་ཡིན་པའི་སྐོར་ཉིན་ཐོའི་ནང་བྲིས་དོན། ཏིན་ཞའོ་ཕིན་གྱིས་དམག་དཔུང་པེ་ཅིན་མཁར་དུ་འཛུལ་རྒྱུའི་ཐག་གཅོད་དེ་ནི། ཕྱི་ཟླ་ ༥ ཚེས་ ༡༧ ཉིན་ཏིན་ཞའོ་ཕིན་གྱི་ཁྱིམ་དུ་ཚོགས་འདུ་ཞིག་སྐོང་འཚོགས་བྱས་ཏེ། ཚོགས་འདུའི་སྟེང་ལི་ཕིན་སོགས་ཆབ་སྲིད་ལྷ་ཁང་གི་རྒྱུན་ལས་མགོ་ཁྲིད་ ༥ དང་། སྐབས་དེའི་རྒྱལ་ཁབ་ཀྱི་སྲིད་འཛིན་ཡཱང་ཧྲང་ཧོང་ཡང་ཞུགས་ཡོད་ལ། སྐབས་དེར་ཀྲའོ་ཙི་ཡང་མ་གཏོགས་གཞན་ཚང་མས་ཏིན་ཞའོ་ཕིན་ལ་རྒྱབ་སྐྱོར་བྱས་ཡོད་པར་མ་ཟད། ཀྲའོ་ཙི་ཡང་གིས་སྐད་ཆར་སྤྱི་ཡོངས་ཀྱི་ངོས་ནས་ལྟ་སྟངས་ལོག་པ་བསྟན་ཡོད་ནའང་གནད་དོན་མཇུག་འབྲས་ལ་སེམས་ཁུར་ཆེན་པོ་བྱུང་ལུགས་དང་། ཁོ་ཚོ་ཏིན་ཞའོ་ཕིན་གྱི་ཁྱིམ་ནས་ཕྱིར་ཐོན་སྐབས་ལི་ཕིན་རང་ཉིད་ལ་ངར་སེམས་དང་བློ་སྟོབས་ཆེན་པོ་སྐྱེས་ཡོད་ནའང་། ཀྲའོ་ཙི་ཡང་བློ་ཕམ་ཡིད་ཆད་གྱི་གནས་སུ་ལྷུང་ཡོད་ཚུལ། དེ་བཞིན་ཕྱི་ཟླ་ ༥ ཚེས་ ༡༩ ཡི་ཉིན་ཐོའི་ནང་དུ། ཏིན་ཞའོ་ཕིན་གྱིས་དམག་མིས་དྲག་གནོན་སྐབས་ཅི་ཡོང་གང་ཡོང་གིས་གནོད་ཚབས་ཉུང་དུ་གཏོང་དགོས་མོད། ཡིན་ནའང་། ཁྲག་བཞུར་རྒྱུར་སྟ་གོན་བྱེད་དགོས་ཞེས་བརྗོད་ཡོད་ཚུལ་དང་། ཡང་ཉིན་དེའི་ཉིན་ཐོའི་ནང་དུ་ལི་ཕིན་གྱིས་གསལ་འདོན་བྱས་དོན། ཅང་ཙེ་མིན་ཉིན་དེར་སྲིད་འཛིན་གསར་བར་བསྐོ་འཇོག་བྱ་རྒྱུར་མིང་འདོན་བྱས་པ་ཡིན་པ་དང་། ཚོགས་འདུ་མ་ཚོགས་སྔོན་ལ་ཏིན་ཞོའོ་ཕིན་གྱིས་ལི་ཕིན་ལ་ཁྱེད་ཀྱིས་མུ་མཐུད་སྲིན་བློན་གྱི་འགན་འཁུར་དགོས་རྒྱུ་དང་། ཅང་ཙེ་མིན་སྲིད་འཛིན་གསར་བར་སྐོ་འཇོག་ཐད་བསར་འཆར་དྲིས་པར། ལི་ཕིན་རང་ནས་ནུས་བ་གང་ཡོད་ཀྱིས་རྒྱབ་སྐྱོར་བྱ་རྒྱུ་ཡིན་པ་བསྟན་ཚུལ་དང་། ཐེངས་དེའི་ཚོགས་འདུའི་སྟེང་ཏིན་ཞའོ་ཕིན་གྱིས་དངོས་སུ་ལི་ཕིན་དང་མགོ་ཁྲིད་གཞན་དག་ལ་ཅང་ཙེ་མིན་སྲིད་འཛིན་གསར་བར་བསྐོ་འཇོག་བྱས་པ་ཁྱབ་བསྒྲགས་བྱས་པའི་སྐོར་བྲིས་ཡོད་ལ། དེ་རྗེས་ཅང་ཙེ་མིན་ཟླ་ ༥ པའི་ཚེས་ ༣༡ ཉིན་གནམ་གྲུར་བསྡད་དེ་པེ་ཅིན་དུ་ཐོན་པ་དང་། ཏིན་ཞའོ་ཕིན་གྱིས་ཉིན་དེ་རང་ལ་ཁོ་རང་སྲིད་འཛིན་གསར་བར་བསྐོ་འཇོག་དང་འབྲེལ་བའི་ཐག་གཅོད་ཀྱི་སྐོར་ཅང་ཙེ་མེན་ལ་བརྗོད་པར། ཅང་ཙེ་མིན་གྱིས་ལས་འགན་དེ་འཁུར་རྒྱུར་ཕྱི་བྱོལ་གྱིས་ཏང་གི་རྩ་འཛིན་ཡིག་ཆའི་གཏན་འབེབས་ལྟར་སྲིད་གཞུང་དང་ཏང་གི་འོས་འདེམས་བྱས་རྗེས་ད་གཟོད་ལས་འགན་དེ་ཁུར་རྒྱུ་ཡིན་ཚུལ་དང་། མ་མཐར་ཡང་ལི་ཕིན་གྱིས་ཟླ་ ༦ པའི་ཟླ་དཀྱིལ་བར་དུ་མུ་མཐུད་སྲིད་ཀྱི་འགན་དབང་འཁུར་དགོས་ཚུལ་བརྗོད་སྐོར་བྲིས་ཡོད་ལ། ཟླ་ ༦ པའི་ཚེས་ ༣ གྱི་དགོང་མོར་ལི་ཕིན་རང་ཉིད་ཀྱིས་མི་དམངས་ཚོགས་ཁང་ཆེན་མོའི་ནང་དུ་དམག་དཔུང་མངགས་གཏོང་རྩ་འཛུགས་ཀྱི་ཚོགས་འདུ་གཙོ་སྐྱོང་གནང་བཞིན་ཡོད་ལ། སྐབས་དེར་ཅང་ཙེ་མིན་གྱིས་ཉེ་འཁྲིས་ཀྱི་བཟོ་བསྐྲུན་ཐོག་ཁང་ཞིག་གི་བཞི་ཐོག་ཏུ་ཐེན་ཨན་མེན་ཐང་ཆེན་གྱི་གནས་ཚུལ་དངོས་ལ་ལྟ་ཞིབ་བྱེད་ཀྱིན་ཡོད་པའི་སྐོར་བཅས་བྲིས་ཡོད་འདུག
གཞན་ཡང་། དྲུག་བཞི་སློབ་མའི་ལས་འགུལ་ལ་ཁྲག་དྲི་བྲོ་བའི་དམར་གསོད་དྲག་གནོན་བྱས་ཏེ་ལོ་འཁོར་ ༢༡ འཁོར་བའི་དུས་དྲན་གྱི་སྐབས་དང་བསྟུན་ནས། རྒྱལ་ཁབ་ཕྱི་ནང་གི་རྒྱ་རིགས་གཙོས་པའི་དམངས་གཙོ་དོན་གཉེར་བ་དག་གིས་འཛམ་གླིང་ཡུལ་ཕྱོགས་གང་སར་རྗེས་དྲན་གྱི་ལས་འགུལ་འདྲ་མིན་སྣ་ཚོགས་སྤེལ་བཞིན་ཡོད་པ་དང་། དེ་བཞིན་དམངས་གཙོ་ལས་དོན་ལ་བློ་མོས་ཅན་གྱི་འཛམ་གླིང་གི་གནད་ཡོད་མི་སྣ་དག་གིས་ཀྱང་རྣམ་པ་འདྲ་མིན་གྱི་ལམ་ནས་དམངས་གཙོ་འཐབ་རྩོད་བ་དག་ལ་རྒྱབ་སྐྱོར་གྱི་རྣམ་པ་བསྟན་ཡོད་པ་རེད།
ལོ་འདིའི་ཕྱི་ཟླ་ ༦ ཚེས་ ༣ ཉིན་ཨ་རིའི་གྲོས་ཚོགས་ཀྱི་ཚོགས་གཙོ་ནེན་སེ་ཕེ་ལའོ་སེ་མཆོག་གིས་ཡིག་ཐོག་ནས་གསལ་བསྒྲགས་སྤེལ་དེ། ལོ་ངོ་ ༢༡ གི་ཡར་སྔོན་གྱི་དེ་རིང་། རྒྱ་ནག་གི་སློབ་མ་དང་བཟོ་བ། གྲོང་མི་སྟོང་ཕྲག་མང་པོ་ཐེན་ཨན་མེན་ཐང་ཆེན་དུ་འདུ་འཛོམས་ཀྱིས། སྲིད་གཞུང་གི་རུལ་སུངས་དག་ཐེར་དང་དམངས་གཙོ་བཅོས་བསྒྱུར་ཐད་རྒྱལ་ཁབ་ཀྱི་མགོ་ཁྲིད་དང་ཐད་ཀར་གླེང་མོལ་བྱ་རྒྱུའི་རེ་འདུན་བཏོན་ཡོད། འོན་ཀྱང་། སྲིད་གཞུང་གིས་དམག་དཔུང་ལ་བཀའ་མངགས་བཏང་སྟེ་རང་ཉིད་ཀྱི་མི་དམངས་ལ་དྲག་གནོན་བྱས་པ་རེད། ང་ཚོས་ད་དུང་སྐྱོ་གར་དེ་བརྗེད་མེད། དྲུག་བཞིའི་སྙིང་སྟོབས་དེ་སྐུ་ཞབས་ལིག་ཞའོ་པའོ་སོགས་མི་མང་པོའི་སེམས་ཁོང་དུ་གསོན་པོར་གནས་ཡོད་པར་མ་ཟད། ཁོ་ཚོས་བློ་སྤོབས་ཆེན་པོའི་རང་དབང་གི་སྐད་སྒྲ་བསྒྲོག་བཞིན་ཡོད། ཉེ་ལམ་ཧོང་ཀོང་གི་དམག་མིས་དམངས་གཙོའི་ལས་འགུལ་བ་རྣམས་འཇུ་བཟུང་བྱས་ཡོད་པར་མ་ཟད་རང་དབང་ལྷ་མོའི་སྐུ་བརྙན་དེ་བཙན་འཕྲོག་བྱས་ཡོད། ཨ་རི་ནི་ངེས་པར་དུ་དམངས་གཙོ་དང་། སྨྲ་བརྗོད་རང་དབང་། འདུ་འཛོམས་རང་དབང་བཅས་རྩོད་ལེན་བྱེད་མཁན་གྱི་ཧོང་ཀོང་མི་དམངས་ཀྱི་ཕྱོགས་སུ་ལངས་དགོས” ཞེས་བརྗོད་ཡོད་པ་རེད།
གསར་འགྱུ་རའབྲི་མཁན། ཚེ་རིང་རྒྱལ།
ལིའི་ཕུན་ནི་མི་གསོད་ཁྲག་བཞུར་བྱེད་མཁན་གྱི་ལག་དམར་ཞིག་རེད།
ལི་ཕིན་གྱི་ཉིན་ཐོ་འདི་པར་འགྲེམས་བྱས་པ་ཙམ་གྱིས་ལི་ཕིན་དཀར་པོ་ཡིན་པ་སྒྲུབ་དཀའ་མོད། ཡིན་ནའང་། ཉིན་ཐོ་འདི་ལི་ཕིན་མ་ཤི་སྔོན་ལ་ས་ཁར་བུད་པ་འདིས་རྒྱ་ནག་དཔོན་རིགས་ཚོའི་ནང་འགལ་ཇེ་ཆེ་རུ་སོང་སྟེ་ཛ་དྲག་གི་གནས་སྟངས་ལ་གྱར་ཡོད་པ་མཐོང་ཐུབ་པར་སེམས། འདིས་རྒྱ་ནག་གཞུང་དམངས་གཉིས་ཀ་གཅིན་བྱེད་ཀྱི་ཏང་གི་སྒྲིག་གཞི་དང་། ཏང་གི་དམ་བཅའ། ཏང་གི་རྩ་འཛུགས་ཡོད་ཚད་ནུས་མེད་དུ་གྱུར་ཏེ་འཐོར་ལ་ཉེ་ཞིང་། ཐ་ན། ཏང་ནང་ཁུལ་གྱི་དཔོན་རིགས་མཐོན་པོ་རྣམས་ཀྱིས་ཀྱང་གཅིག་སྐོང་གཅིག་གིས་བྲིས་ཏེ་རང་མགོ་གང་ཐོན་བྱེད་བཞིན་པའི་སྣང་ཚུལ་དེ་ཇེ་གསལ་ཏུ་གྱུར་ཡོད།
་་་ལས་འགུལ་ལ་དྲག་གནོན་གྱིས་མང་ཚོགས་དམར་གསོད་གཏོང་མཁན་གྱི་བྱེད་གཏེ་དེ་ཡིན་པར་སེམས་ཀྱིན་ཡོད་པར་བརྟེན། ལི་ཕིན་གྱིས་ཁོ་རང་ཉིད་ཀྱི་དེབ་དེ་སྔ་མོ་ནས་འདོན་ཐུབ་རྒྱུར་རེ་བ་འཆང་ཡོད་ནའང། ཧའོ་ཅིན་ཐའོ་དང་ཝུན་ཇ་པའོ་ཡིས་བཀག་འགོག་བྱས་པའི་རྐྱེན་གྱིས་འདོན་ཐུབ་མེད་པ་རེད། །་་་་
ཚེ་རིང་རྒྱལ་ལགས་ཀྱིས་གནས་ཚུལ་འདི་ཞིབ་ཚགས་ངང་མཁོ་སྤྲོད་གནང་བར་ཐུགས་རྗེ་ཆེ། ཚེས་བཞིའི་ཉིན་གནས་ཚུལ་འདི་བྷིས་བྷིས་སིས་ནས་སྤེལ་བ་དང་ལས་ཞོར་ནས་བདག་གི་ཟིན་བྲིས་སུ་ངོ་སྤྲོད་ཐུང་ངུ་ཞིག་སྤེལ་ཡོད་ཀྱང་མང་པོ་དོ་སྣང་བྱུང་མི་འདུག རྒྱུ་མཚན་ང་ཚོའི་ཟིན་བྲིས་བའི་ནང་བརྒྱུན་པར་དྲ་ཚིགས་གཞན་བསྔོགས་ད་དུང་ཉུང་ངུ་ཡིན་པ་འདྲ། གོང་གི་གནས་ཚུལ་འདིའི་སྟེང་ནས་ང་ཚོས་ང་ཕོད་འདས་བོ་ལ་ཕྱིར་དྲན་ཐེངས་གཅིག་བྱས་ན་འོས། ལིས་ཕིན་ལོ་གྱ་གཅིག་ལ་སླེབས་རྗེས་མཐར་གནས་ཚུལ་གལ་ཆེན་ཞིག་ཕྱི་ལ་བཏོན་པ་རེད། འོན་ཀྱང་ང་ཕོད་ལོ་བཅུ་དགུ་ཡིས་མང་བར་བསྡད་པའི་རིང་བོད་གནས་ཉམ་ཞིབ་པ་ཚོས་རེ་བ་ཞིག་བཅིངས་བ་རེད། འོ་ལིས་ཕིན་ད་དུང་འཆི་ཡོད་པ་མ་རེད། སྨན་ཁང་ཞིག་ཏུ་ཡོད་འདུག
ཨ་མའི་བུ་ཞིག་གིས་ཉིན་ཐོ་འདི་ཡང་བོད་ཡིག་ལ་བསྒྱུར་ཐུབ་སོང་ན་ངས་ཀྱང་ཀློག་ཐུབ་རྒྱུ་རེད། ཧ་ཅང་བཟང་གི ཐུགས་རྗེས་ཆེ།