སྐྱེ་རྒུ་མདོ་རུ་ས་རྩོད་ཀྱི་དཀའ་རྙོག་ལངས་མགོ་ཚུགས།

རྒྱ་ནག་གིས་སྐྱེ་རྒུ་མདོའི་ས་ཡོམ་བྱུང་ཡུལ་གྱི་མི་མང་གི་ས་ཆ་གཞུང་བཞེས་བཏང་སྟེ་ཡུལ་སྐོར་སྤྲོ་འཆམ་གྱི་བསྟི་གནས་དང་ལས་ཁུངས། འགྲེམས་སྟོན་ཁང་སོགས་རྒྱག་རྒྱའི་བཀའ་རྒྱ་བཏང་ཡོད་ལ། བོད་མི་ཚོས་གཞུང་ལ་ངོ་རྒོལ་བྱེད་ཀྱིན་ཡོད་འདུག

ཉེ་ཆར་ནས་བཟུང་རྒྱ་ནག་གཞུང་གིས་བཀའ་རྒྱ་བཏང་སྟེ། སྐྱེ་རྒུ་མདོའི་གནོད་ཐེབས་མང་ཚོགས་ཀྱི་ས་ཆ་གཞུང་བཞེས་བྱས་ཏེ་སློབ་གྲྭ་དང་གཞུང་གི་ལས་ཁུངས། ལྡུམ་རྭ་སོགས་གསར་བསྐྲུན་བྱ་རྒྱུའི་ལས་འཆར་སོགས་ནི་ཚོགས་འདུ་རིམ་པར་འཚོགས་པའི་བརྗོད་གཞི་གཙོ་བོར་ཆགས་ཡོད་ཀྱང་། དེར་ཡོད་བོད་རིགས་མི་མང་གིས་རྒྱ་གཞུང་གི་བྱེད་སྟངས་དེ་ལ་འདོད་མོས་མེད་པའི་རྣམ་འགྱུར་བསྟན་ཏེ། རྒྱ་གཞུང་གིས་ས་ཆ་གཞུང་བཞེས་གཏོང་རྒྱུའི་ལས་གཞི་ལ་ངོས་ལེན་བྱས་མེད་པར། ས་གནས་མི་མང་གིས། གལ་སྲིད་རྒྱ་གཞུང་གིས་མ་འོངས་པར་ཁང་པ་གསར་རྒྱག་ལ་རོགས་སྐྱོར་མེད་ཀྱང་རང་ངོས་ནས་ས་ཆར་བདག་པོ་བྱས་ཏེ། ཁང་པ་གསར་རྒྱག་བྱ་རྒྱུ་ཡིན་པའི་སྐོར་གྱི་གནས་ཚུལ་ཞིག་ཨེ་ཤ་ཡ་རང་དབང་རླུང་འཕྲིན་ཁང་གིས་འགྲེལ་བརྗོད་གནང་ཡོད། 

གོང་གསལ་གྱི་གནས་ཚུལ་འདིའི་ཐད་འདི་གའི་གསར་འགོད་པས་ ༤༌༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་གི་དངུལ་གཉེར་བ་གྲྭ་བསོད་ནམས་རྒྱ་མཚོ་ལགས་སུ་ཞིབ་ཕྲའི་བཀའ་འདྲི་ཞུས་པར། ཁོང་གིས། ང་ཚོའི་ངོས་ནས་གནས་ཚུལ་འདིའི་ཐད་འབྲེལ་བ་བྱས་པ་ཡིན། ས་གནས་མང་ཚོགས་ནང་གནས་ཚུལ་འདིའི་ཐད་བཤད་ཚུལ་འདྲ་མིན་འདུག  ཡིན་ཡང་།  ཁོང་ཚོས་བཤད་པ་ལྟར་ན་སྐྱེ་རྒུ་མདོའི་བོད་མི་འདུས་སྡོད་བྱེད་སའི་ས་ཡི་ལྟེ་བ་རུ་ཁོང་ཚོས་ཡུལ་སྐོར་སྤྲོ་འཆམ་གྱི་བསྟི་གནས་དང་འགྲེམས་སྟོན་ཁང་། དམིགས་བསལ་གྱི་ལས་ཁུངས་སོགས་གསར་རྒྱག་བྱ་འཆར་བྱས་ཡོད་འདུག་ལ། དེའི་ཐད་རྒྱ་ནག་གི་མགོ་ཁྲིད་ཞིག་ཆེད་དུ་ས་གནས་ས་ཐོག་ཏུ་སླེབས་ཡོད་འདུག   སྐབས་དེར། མི་མང་གིས་ཁོང་ལ་ཁྱེད་ཚོས་ས་གནས་མང་ཚོགས་ལ་ཁང་པ་གསར་རྒྱག་བྱ་མི་ཐུབ་རུང་ས་ཆ་རང་འཇགས་སུ་འཇོག་དགོས་པ་དང་། མ་འོངས་པར་ང་ཚོ་རང་ངོས་ནས་ཡུན་གྱིས་འཛུགས་སྐྲུན་བྱ་རྒྱུ་ཡིན་པ་དང་། ད་ལྟའི་བར་རྒྱ་ནག་གི་རོགས་སྐྱོར་བྱས་ཟིན་པའི་རིགས་དེ་མ་འོངས་པར་སྐྱིན་ཚབ་སྤྲོད་རྒྱུ་ཡིན་པའི་རེ་བ་དང་འབོད་སྐུལ་ཞུས་ཡོད་པ་ལས། དམིགས་བསལ་གྱི་ངོ་རྒོལ་སྐད་འབོད་དང་མི་དགའ་བའི་རྣམ་འགྱུར་བསྟན་མི་འདུག་ཅེས་བརྗོད་བྱུང་།

ཡང་ཁོང་གིས་ད་ལྟའི་གནས་སྟངས་ཐད་བརྗོད་དོན། འདས་པའི་དུས་སུ་རྒྱ་ནག་གི་ཐེངས་འདིའི་ས་ཡོམ་ཁྲོད་འདས་གྲོངས་སུ་གྱུར་བའི་གྲངས་འབོར་ཞིག་ཁྱབ་བསྒྲགས་བྱས་ཡོད་ཀྱང་།  ཉེ་ཆར་ས་གནས་རང་དུ་མི་གྲོངས་ཟིན་པའི་སྐོར་ལ་རོགས་སྐྱོར་མ་དངུལ་སོགས་སྤྲད་ཟིན་པའི་བསྡོམས་རྩིས་ལྟར་ན་ས་གནས་རང་ནས་བོད་མི་ ༡༨༠༠༠ ལྷག་འདས་གྲོངས་སུ་གྱུར་ཡོད་པ་དངོས་ཡོད་གནས་ཚུལ་ཆགས་འདུག་ལ། དེ་མིན་ས་གནས་སུ་ཕྱོགས་གཞན་ནས་ཕེབས་པའི་མདོ་དབུས་ཁམས་གསུམ་གྱི་བོད་མི་དང་རྒྱ་རིགས་སོགས་འདུས་པའི་མི་མང་པོ་རོགས་སྐྱོར་འདིའི་ནང་ཚུད་མི་འདུག་ཅེས་དང་།  འདས་པའི་དུས་སུ་ས་གནས་ནས་ནད་པ་གང་འཚམ་ཞིག་ལ་རོགས་སྐྱོར་བྱས་ཡོད་ཀྱང་། ཉེ་ཆར་ནས་བཟུང་ནད་པ་མང་པོ་ཞིག་ལ་རོགས་སྐྱོར་གྱི་དུས་ཡུན་རྫོགས་ཡོད་པའི་སྐོར་བརྗོད་དེ་ནད་པ་མང་པོ་ཞིག་ཕྱིར་རང་ཡུལ་ཏུ་བསྐྱལ་ཡོད་པའི་གནས་ཚུལ་འདུག་ལ། སློབ་མའི་ཕྱོགས་ནས་ཀྱང་སློབ་མ་མང་པོ་ཞིག་རྒྱ་ནག་དང་བོད་ཀྱི་ས་ཁུལ་གང་སར་མངགས་གཏོང་གིས་སློབ་སྦྱོང་སྤྲོད་ཀྱིན་པའི་གནས་ཚུལ་བྱུང་ཡོད་པ་ལས། དོན་ངོ་མས་སློབ་སྦྱོང་གི་ཐད་ལ་མཐུན་རྐྱེན་དང་རོགས་སྐྱོར་གང་འདྲ་ཞིག་གནང་གི་ཡོད་མེད་གསལ་ཁ་མི་འདུག  མི་མང་ལ་མཚོན་ན་འདས་པའི་ས་ཡོམ་བྱུང་སྟེ་ཟླ་གཉིས་ལྷག་འགོར་ཡོད་ཀྱང་། ད་ལྟའི་ཆར་ཡང་མུ་མཐུད་ས་ཡོམ་རིམ་བཞིན་བྱུང་བ་དང་གནམ་གཤིས་དྲོ་གྲང་གི་འགྱུར་ལྡོག་སོགས་ཀྱི་དབང་གིས་མ་འོངས་ཇི་བྱེད་ལ་རེ་བ་མེད་པའི་གནས་སུ་ལྷག་ཡོད་འདུག ཅེས་འགྲེལ་བརྗོད་གནང་བྱུང་།

གསར་འགོད་པ་དོན་གོ