ཞི་མོལ་སྐོར་གྱི་ཚོགས་འདུ།

ད་གྲོས་བྱས་ཡ་གང་ཡང་ལྷག་མེད་བོད་རང་སྐྱོང་སྤྲོད་རོགས་ལབ་ཚ་རེད་དེ་ལས་ལྷག་པའི་དམིགས་གསལ་གྲོས་མོལ་གང་ཡང་བྱ་རྒྱུ་མེད་དོ།

བོད་རྒྱ་ཞི་མོལ་གྱི་ཚོགས་འདུ་ཐེངས་༢༢པ་འཚོགས་བཞིན་པ་དེར་བསྔགས་བརྗོད་དང་མོས་གུས་ཡོད།
བོད་རྒྱ་གཉིས་ཀྱི་དཀའ་རྙོག་སེལ་བ་ལ་དབུ་མའི་ལམ་གྱི་ཐབས་ཇུས་འདི་བརྒྱུད་ནས་སེལ་ཐུབ་པ་མ་གཏོགས་ཐབས་གཞན་གང་གིས་ཀྱང་སེལ་ཐབས་མེད་པ་༧གོང་ས་མཆོག་གིས་མ་འོངས་མངོན་གཟིགས་ཀྱིས་ལམ་སྟོན་གནང་བ་ཞིག་ཡིན་སྟབས་མཇུག་བསྐྱང་ཐུབ་པར་བྱ་རྒྱུ་གལ་འགངས་ཆེ་བར་མཐོང་། བཙན་བྱོལ་སྤྱི་ཚོགས་ཁྲོད་༧གོང་ས་མཆོག་གི་དགོངས་གཞི་ཟབ་མོ་རྣམས་དཔྱོད་ཤེས་ལམ་ནས་དཔོག་ཐུབ་མཁན་སློབ་དཔོན་ཆེན་མོ་མཁས་དབང་ཟམ་གདོང་རིན་པོ་ཆེ་ཉིད་ལས་གཞན་སུ་ཡང་མེད། དེ་ཙམ་དུ་མ་ཟད་འདས་མ་ད་གསུམ་གྱི་ཆབ་སྲིད་ཀྱི་འཕོ་འགྱུར་དང་། གནའ་དེང་གི་རིག་གནས་དག་ལ་རྒྱུས་མངའ་ཆེ་སྟབས་ཁོང་གིས་སྣེ་ཁྲིད་པའི་བོད་རྒྱ་ཞི་མོལ་གྱི་ལས་དོན་ཐད་སྔ་ཕྱི་ཙམ་མ་གཏོགས་གྲུབ་འབྲས་འབྱུང་བའི་ཡིད་ཆེས་ཡོད། དེར་བརྟེན་སློབ་དཔོན་མཆོག་བཀའ་ཁྲིའི་ལས་དུས་རྫོགས་མཚམས་སུ་༧གོང་ས་མཆོག་གི་དམིགས་བསལ་སྐུ་ཚབ་ཏུ་ཕེབས་ཐུབ་ན་ཕན་འབྲས་ཆེན་པོ་འབྱུང་བར་སེམས།
ང་ཚོའི་སྤྱི་ཚོགས་འདི་ལ་སྔ་མོ་ནས་ནད་ཡམས་ཤིག་གིས་བཟུང་ཡོད། གང་ཟག་ཞིག་གིས་བྱ་བཟང་པོ་ཞིག་སྒྲུབ་སྐབས་དེ་ལ་སྐྱོན་འཚོལ་བའི་མིག་ཟུང་རྣོ་ཞིང་། དོན་མཐུན་གྱི་ལས་དོན་སྒྲུབ་གང་ཞིག་སྒྲུབ་ཀྱང་ལེགས་གསོལ་བྱེད་རྒྱུའི་ཚབ་ཏུ་སོ་སོའི་ནུས་ཤུགས་ལ་དཔག་པའི་འགོག་རྐྱེན་བྱེད་པ་ནི་ང་ཚོའི་མི་རིགས་ཀྱི་ནད་རྙིང་རེད། ནད་ཡམས་དེའི་ངན་འབྲས་སུ་འདི་ལྟ་བུའི་གོད་ཆག་བྱུང་དང་འབྱུང་བཞིན་ཡོད། འདི་ནི་གང་ཟག་དེའི་ལས་ཀའི་ངོ་བོ་དང་གྲུབ་འབྲས་བཟང་ངན་མི་དཔྱོད་པར་གང་ཟག་སྒེར་ལ་སྐྱོན་ཕྲན་བུ་རེ་ཡོད་ན་ཁ་སྣོན་འདེབས་ཅི་ཐུབ་དང་སྐྱོན་མེད་ཀྱང་སྒྲོ་འདོགས་སྣ་ཚོགས་ཀྱི་ལམ་ནས་ནུས་མེད་དུ་གཏོང་གིན་པ་འདི་མི་རིགས་ཀྱི་སྐྱོ་གནས་ཉམ་ང་བ་ཞིག་ཅི་ལ་མིན།
ཉེ་རབས་ལོ་རྒྱུས་ཁྲོད་ལམ་དབུ་མ་ལ་གྲུབ་འབྲས་མེད་རབས་དང་། ཞི་མོལ་ལ་དོན་སྙིང་དབེན་ཚུལ་སྣ་ཚོགས་ཤིག་ཤོད་ཀྱིན་འདུག་ནའང་། ལས་དོན་འདི་ནམ་ཡང་འཐུས་ཤོར་བཏང་མི་ཉན། གལ་སྲིད་བོད་རྒྱ་ཞི་མོལ་གྱི་ལམ་བུ་འགག་པ་ཡིན་ན་ང་ཚོས་ནུས་པ་ཅི་ཡང་འདོན་མི་ཐུབ་ལ། དེ་ལས་ལྷག་པའི་ཐབས་ཤེས་གང་ཡང་རེག་གི་མ་རེད་འདོད། དེ་ནི་སྔ་ལོ་དང་འདི་ལོི་གཉིས་ཀར་མང་མོིས་ཀྱི་ལམ་དབུ་མ་བདམས་པ་དང་། ནམ་རྒྱུན་སྤྱི་ཚོགས་ནང་དུ་སྐད་ཆ་འདྲ་མིན་སྣ་ཚོགས་ཤོད་མཁན་དག་དང་། སོ་སོའི་ལངས་ཕྱོགས་གཞི་འཛིན་ས་མེད་ཀྱང་གཡམ་རྒྱུག་ཟེར་ཟློས་པ་དག་གིས་ཀྱང་ཅི་ཡང་བཤད་དུ་མ་སྤོབས་པས་སོ། གཞུང་འབྲེལ་མིན་པའི་ཚོགས་པ་ཁག་ཅིག་ལ་སོ་སོའི་ལངས་ཕྱོགས་བརྟན་པོ་ཡོད་པ་དང་། མི་རིགས་ཀྱི་ཆེད་དུ་དཀའ་ངལ་ཁྱད་བསད་ཀྱིས་ལས་འགུལ་རབ་དང་རིམ་པར་སྤེལ་བ་ལ་དགའ་སྤོབས་བྱེད་འོས་ཀྱང་། སོ་སོའི་གནས་བབ་དང་། དུས་ཚོད་ཀྱི་འཕོ་འགྱུར་སོགས་ལ་ཞིབ་ཏུ་བསམས་ནས་ལངས་ཕྱོགས་མ་ནོར་བར་བྱེད་རྒྱུ་ནི་གལ་ཆེན་ནང་གི་དོན་ཆེན་རེད། མི་རིགས་ཤིག་གི་ཆག་འཇིགས་ཐོག་ཏུ་འབབ་འོང་དུས་དངོས་ཡོད་ཁེ་ཕན་ལ་གཞིགས་པ་མ་གཏོགས་རིགས་ཞེན་དང་སེམས་ཤུགས་ཙམ་གྱིས་དུས་དང་འཚམས་པའི་གྲུབ་འབྲས་ཐོན་པར་དཀའ། དཀའ་རྙོག་འདི་རྒྱལ་ཁབ་དང་མི་རིགས་ཀྱི་འཐབ་རྩོད་ཅིག་ཡིན་སྟབས་དུས་ཚོད་ནར་འགྱང་འགྲོ་སྲིད་མོད། ཡིན་ནའང་ང་ཚོའི་ངོས་ནས་རེ་བ་མ་ཟད་པ་དང་ཡིད་ཆེས་མ་བརླགས་པའི་ངང་ནས་ལས་འགུལ་མཇུག་བསྐྱང་ངེས་པར་བྱ་དགོས། ང་ཚོས་རྒྱ་ནག་མི་དམངས་སྤྱི་འཐུས་རྒྱལ་ཁབ་ཀྱི་རྩ་ཁྲིམས་ནང་དུ་འཁོད་ཀྱིན་པའི་མི་རིགས་ས་ཁོང་རང་སྐྱོང་གི་ཐོབ་ཐང་རྩོད་ཀྱིན་ཡོད་སྟབས་སྔ་ཕྱི་ཙམ་ལས་གྲུབ་འབྲས་ངེས་པར་འབྱུང་བར་སེམས། ཁྲིམས་ཀྱི་དབང་བསྒྱུར་བྱེད་ཀྱིན་པའི་རྒྱལ་ཁབ་ཞིག་ཡིན་ཕྱིན་རྩ་ཁྲིམས་ནང་དུ་འཁོད་ན་སྔ་ཕྱི་མ་གཏོགས་ལག་བསྟར་བྱེད་པར་ངེས། དེ་ལྟར་མ་བྱས་ཚེ་འཛམ་གླིང་སྟོབས་ཆེན་རྒྱལ་ཁབ་དང་མི་མང་གི་མདུན་དུ་དཔུང་པ་མཉམ་གཤིབ་ཀྱིས་ལངས་པའི་སྤོབས་པ་ཡལ་རྒྱུ་ལས་གཞན་གང་ཡང་མེད། དེའི་གནས་ལུགས་རྣམས་རྒྱ་ནག་དཔོན་རིགས་ཀྱིས་མཐོང་ཡང་ཧན་མི་རིགས་ཀྱི་བསམ་བློ་བ་དང་རྩོམ་པ་པོ་རྣམས་ཀྱིས་ཤེས་དང་ཤེས་མུས་ཡིན་པ་གསལ་པོ་རེད།
ད་ཆ་ང་ཚོར་ཡོད་འོས་པ་དང་མེད་དུ་མི་རུང་བ་ནི་ཆིག་སྒྲིལ་གྱི་སྟོབས་ཤུགས་ཡིན། དེས་ན་མི་རེས་སྐད་ཆ་རེ་དང་ཟློག་ཕྱོགས་ཀྱི་བསམ་བློ་མི་འཁྱེར་བར་ཚང་མས་བློ་སེམས་གཅིག་མཐུན་གྱིས་ལམ་དབུ་མར་ཤར་བསྐྱོད་བྱས་པ་ཡིན་ན་དཀའ་རྙོག་འདི་མྱུར་དུ་སེལ་ཐུབ། དེའི་རྒྱུ་མཚན་གང་ཡིན་ཞེ་ན། བོད་རྒྱའི་དཀའ་རྙོག་སེལ་བ་ལ་ངེས་པར་གྲོགས་གཞན་ལ་བརྟེན་དགོས། དེ་ཡང་རྒྱ་མི་རིགས་ལ་མ་བརྟེན་པར་དཀའ་རྙོག་འདི་ནམ་ཡང་སེལ་མི་ཐུབ། དེའི་སྟབས་ཀྱིས་རྒྱ་མི་རིགས་དང་མཐུན་ལམ་ཇེ་བཟང་ཐོག་ནས་ཞི་མོལ་རྒྱུན་བསྐྱང་བྱས་པ་ཡིན་ན་བོད་རྒྱ་མི་རིགས་གཉིས་ཀྱི་མཛའ་མཐུན་གྱི་སྒུལ་ཤུགས་ལས་གཉིས་སྨན་དབུ་མའི་ལམ་གྱི་ཕུགས་བསམ་མངོན་འགྱུར་ཐུབ་པ་གདོན་མི་ཟའོ།

བོད་རྒྱ་ཞི་མོལ་བྱུང་སྟེ་མི་རིགས་འདྲ་མཉམ་བྱུང་ན་དགའ་འོས་མོད། ཉེ་སྔོན་ཧོང་ཀོང་གི་ཏའོ་ཝེ་གསར་ཁང་གིས་༸གོང་ས་མཆོག་ལ་བཅར་འདྲི་གནང་སྐབས། གསར་འགོད་པ་དེས། རྒྱ་ནག་གི་མི་རིགས་རང་སྐྱོང་སྲིད་ཇུས་ནི་མི་རིགས་ས་ཁོངས་རང་སྐྱོང་མ་ཡིན་པར། འཚོ་བའི་དགོས་མཁོ་དང་བསྟུན་ནས་མི་རིགས་སོ་སོ་གཞི་སྤོ་འཁོར་བསྐྱོད་ཀྱིས་གྲུབ་པའི་འདུས་བསྡོད་ཁོར་ཡུག་དང་བསྟུན་ནས་འགྱུར་འགྲོས་རང་བཞིན་དང་འཁོར་བསྐྱོད་ཀྱི་རང་ཅན་དེ། མི་རིགས་ཀྱི་འགུལ་བསྐྱོད་དང་འགྲོགས་ནས་འགྲོ་བཞིན་པའི་མི་རིགས་རང་སྐྱོང་ཞིག་ཡིན་པའི་སྐོར་འགྲེལ་བརྗོད་བྱས་སོང་ལ། དེ་བཞིན་དུ་ཉེ་སྔོན་བོད་ལྗོངས་ཆ་འཕྲིན་གྱི་རྒྱ་ཡིག་དྲ་ངོས་སུའང་རྒྱ་ནག་གི་མི་རིགས་རང་སྐྱོང་ཟེར་བ་གང་འདྲ་ཞིག་ཡིན་མིན་སྐོར་ལ་དེར་མཚུངས་ཀྱི་འགྲེལ་བརྗོད་རྩོམ་ཡིག་ཅིག་ཀྱང་སྤེལ་འདུག ༼དཔེར་ན། བོད་པ་གང་མང་ཞིག་རྒྱ་ནག་གི་ས་གནས་གང་རུང་ཞིག་ཏུ་འཚོ་བའི་དགོས་མཁོས་དབང་གིས་རིམ་བཞིན་མཉམ་འདུས་བྱུང་སྟེ་ཚད་ངེས་ཅན་གྱི་མི་རིགས་འདུས་སྡོད་ཚོགས་སྡེ་ལྟ་བུ་ཞིག་ཏུ་གྲུབ་རྗེས་དེ་གར་མི་རིགས་རང་སྐྱོང་སྲིད་ཇུས་ལག་སྟར་བྱེད་དགོས་པ་དང་། དེ་བཞིན་དུ། གལ་སྲིད་མི་རིགས་གཞན་ཞིག་བོད་ཀྱི་ས་ཆ་གང་རུང་ཞིག་ཏུ་གནས་སྤོ་མཉམ་འདུས་བྱུང་ཚེ་དེ་གར་མི་རིགས་དེར་རང་སྐྱོང་སྲིད་ཇུས་འཛུགས་དགོས་པ་ལྟ་བུ་རེད། ༽ འདི་ནི་ཁ་རྒྱུན་ལ༼གནམ་གུང་ཁྲན་ཏང་དང་ས་གུང་ཁྲན་ཏང་༽ཟེར་བ་ལྟར་རེད། འདིས་གཙོ་བོ་གྲངས་ཉུང་མི་རིགས་ས་ཁུལ་དུ་རྒྱ་རིགས་གནས་སྤོ་བྱས་ཏེ་མི་སེར་སྤེལ་ཡུལ་ཏུ་སྒྱུར་བར་མྱུར་བསྐྱོད་གཞུང་ལམ་ཡངས་མོ་ཞིག་ཕྱེ་ཡོད་པ་མ་ཡིན་ནམ། གལ་སྲིད་རང་སྐྱོང་འདི་འདྲ་ཞིག་ངོས་ལེན་གནང་བ་ཡིན་ན། མི་འགྱངས་པར་བོད་ཀྱང་ནང་སོག་ལྟར་འགྱུར་རྒྱུ་གདོན་མི་ཟའོ། བཙན་བྱོལ་བའི་ཁ་རྒྱུན་ལྟར་༼སྤྱང་པོ་བྱས་༽ན་མ་གཏོགས་གཡོ་བསླུ་མི་འབྱུང་པའི་ངེས་པ་མི་འདུག་པས་ན། གཞུང་དམངས་གཉིས་ཀྱིས་བློ་གཟུ་བོར་གནས་རྒྱུ་གལ་ཆེ་གི།

ཡང་སྐུ་ཚབ་ཚོ་འགྲོ་རྒྱུ་ཡིན་ནི་མིན་ནམ།

༸ གོང་ས་སྐྱབས་མགོན་ཆེན་པོའི་བླ་ན་མེད་པའི་དབུ་ཁྲིད་འོག་བཙན་བྱོལ་བོད་གཞུང་ཁཀའ་ཤག་ནས་འཛིན་སྐྱོང་འོག་བོད་རྒྱ་ཞི་མོལ་གྱི་ལས་དོན་ཚོགས་ཆུང་ཞིག་གསར་འཛུགས་བསྐྱངས་གནང་མཛད་པ་དེ་ཧ་ཅང་གི་གལ་གནད་ཆེ་བ་རྩ་དོན་ཞིག་རེད།

དཔལ་ལྡན་མི་དབང་བཀའ་ཁྲི་ཟམ་དོང་རིན་པོ་ཆེ་མཆོག་གིས་ཚོགས་འདུའི་གཙོ་སྐྱོང་གི་ཐུགས་འགན་བཞེད་ནས་ཚོགས་གཙོ་ལྷན་རྒྱས་མཉམ་འཛོམས་གནང་ནས་གྲོལ་མོལ་མཛད་བཞིན་ཡོད་པ་དེ་གཏམ་བཟང་པོ་ཞིག་རེད།

ང་ཚོར་ཁ་གསབ་བྲལ་བའི་ཕམ་ཉེས་ཚབས་ཆེན་ཞིག་ཤོར་བ་དེ་ཡང་ཆབ་སྲིད་ཀྱི་ལོ་རྒྱུས་ཁྲོད་ཤོར་བའི་སྐྱོན་གནད་ཅིག་ཡིན་ལ་ད་ལྟ་ང་ཚོས་བློ་རིགས་དྭངས་མོས་གཟབ་ནན་བྱས་ཏེ་གང་མགྱོགས་ཅི་མགྱོགས་སུ་བོད་རྒྱ་ཞི་མོལ་ཡོང་རྒྱུར་གཙོ་གནད་དུ་བཟུང་དགོས།

དེ་ཡང་༸ གོང་ས་མཆོག་གི་ཐུགས་དགོངས་དང་། བཙན་བྱོལ་བོད་གཞུང་གི་མཛད་ཇུས། བོད་རྒྱ་ཞི་མོལ་གྱི་ཁོར་ཡུག་བཅས་ལ་འགལ་རྐྱེན་དང་གེགས་བར་མི་ཡོང་སླད་ཚང་མས་ཆབ་སྲིད་ཀྱི་དཀྱིལ་འཁོར་གཅིག་གི་ནང་དུ་རྒྱ་བོད་མཐུན་སྒྲིལ་གྱི་འབྲེལ་ལམ་རྩ་བར་འཛིན་ཏེ་རང་གཞན་ཚང་མས་དགོངས་པ་ཡིད་གཟབ་གནང་གལ་ཆེ་བའི་དུས་བབ་ཅིག་རེད།

དེ་འདྲ་ཞིག་བྱུང་ཚེ་དེ་ནི་རྒྱ་ནག་མི་དམངས་སྐྱི་མཐུན་རྒྱལ་ཁབ་ཀྱི་སྟོབས་ཤུགས་དང་རྒྱལ་ཁ་ཞིག་ཡིན་ལ་བོད་མི་རིགས་ཀྱི་བདེ་སྐྱིད་དང་རྒྱལ་ཁ་ཞིག་ཀྱང་ཡིན།