རྒྱ་ནག་སྒེའུ་ཁུང་།

ཕྱི་ཟླ་ ༦ ཚེས་ ༡ ཉིན་གྱི་སྔ་དྲོར། རྒྱ་ནག་ཧའོ་ནན་ཞིང་ཆེན་ཡུང་ཀྲིག་གྲོང་ཁྱེར་ལིན་ལེན་ས་ཁུལ་སྦྲགས་སྲིད་ལས་ ཁུངས་ཀྱི་ཀྲོའུ་ཅོན་ས་གནས་ཁྲིམས་ཞིབ་ཁང་དུ་སོང་ནས་མེ་མདས་བརྒྱབ་སྟེ་ཁྲིམས་ དཔོན་གསུམ་བསད་པ་དང་ཁྲིམས་དཔོན་གཞན་གསུམ་རྨས་རྗེས་རང་ཤི་བརྒྱབ་ཡོད་པ་རེད། ཕྱི་ཚེས་ ༢ ཉིན་གྱི་ཕྱི་དྲོར་ཁོ་ལ་གདུང་སེམས་མཉམ་བསྐྱེད་བྱེད་མཁན་དང་ས་གནས་ཁྲིམས་ཞིབ་ ཁང་ལ་ཞུ་གཏུགས་ལ་ཡོང་མཁན་གྱི་མང་ཚོགས་བརྒྱ་ཁྲག་འགའ་ས་གནས་ཁྲིམས་ཁང་གི་ར་ སྐོར་དུ་འདུ་འཛོམས་ཀྱིས། ཀྲུའོ་ཅོན་ལ་མྱ་ངན་མེ་ཏོག་བཤམས་པ་དང་། “ཀྲུའོ་ཅོན་བདེ་བར་གཟིམ” སོགས་བཀོད་པའི་འཕྲེད་བྱང་ཕྱར་དེ་ “ཀྲུའོ་ཅོན་ནི་མི་དམངས་ཀྱི་དཔའ་རྒོད་རེད”  སོགས་ཀྱི་སྐད་འབོད་བྱས་ཡོད་འདུག   ས་གནས་མང་ཚོགས་ཀྱིས་གསར་འགོད་པར་བརྗོད་པ་ལྟར་ན། དོན་རྐྱེན་དེའི་འབྱུང་རྐྱེན་ནི་ས་གནས་ཁྲིམས་ཞིབ་ཁང་གི་དཔོན་རིགས་དག་གིས་ གྱོད་གཞི་སྒྲུབ་སྐབས་དུས་རྒྱུན་ལྐོག་དངུལ་དང་དཔོན་ཤུགས་ཀྱི་ངོ་སོ་ལྟར་ ཁྲིམས་ཞིབ་དྲང་བདེན་གནང་གི་མེད་པ་དང་། ཀྲུའོ་ཅོན་ལའང་ཁྲིམས་ཞིབ་དྲང་བདེན་མ་བྱུང་པས་རྐྱེན་གྱིས་འུ་ཐུག་པ་ཡིན་ལུགས་ འགྲེལ་བརྗོད་བྱས་ཡོད།

ཕྱི་ཟླ་ ༦ པའི་ཚེས་ ༤ ཉིན་བྱང་ཀོ་རུ་ཡའི་མཐའ་སྲུང་དམག་མིས་མེ་མདའ་བརྒྱབ་སྟེ་རྒྱལ་ཁབ་གཉིས་ཀྱི་ མཐའ་མཚམས་ཁུལ་གྱི་རྒྱ་ནག་གྲོང་ཁྱེར་ཏཱན་ཏུང་དུ་རྒྱ་མི་གསུམ་དམར་གསོད་དང་ གཅིག་ལ་རྨས་སྐྱོན་བཟོས་ཡོད་འདུག  དེར་རྒྱ་ནག་གི་མང་ཚོགས་ཀྱིས་བྱང་ཀོ་རུ་ཡར་ངོ་རྒོལ་གྱི་རྣམ་འགྱུར་བསྟན་ཡོད་ ནའང་། རྒྱ་ནག་གི་ཕྱི་འབྲེལ་མགྲིན་ཚབ་པ་ལིས་ཀང་གིས་བྱང་ཀོ་རུ་ཡའི་མཐའ་སྲུང་དམག་ མིས་རྒྱ་ནག་གི་མི་སེར་བཞི་ལ་མེ་མདས་བརྒྱབ་པའི་རྒྱུ་རྐྱེན་གཙོ་བོ་ནི། ཁོ་ཚོ་ཁྲིམས་འགལ་གྱིས་མཐའ་མཚམས་བརྒལ་ཏེ་ནག་ཚོང་བརྒྱག་མཁན་ཡིན་པར་དོགས་པས་ ཡིན་ལ།  པེ་ཅིན་ནི་ཕེན་རཱེང་སྲིད་གཞུང་གི་བློས་ཐུབ་གྲོགས་པོ་དང་རོགས་འདེགས་གནང་མཁན་ ཡིན་ཚུལ་དང་།  དེ་བཞིན། ན་ནིང་བྱང་ཀོ་རུ་ཡས་རྡུལ་ཕྲན་མཚོན་ཆ་ཞིབ་འཇུག་ཚོད་ལྟ་བྱས་པའི་རྗེས། མཉམ་འབྲེལ་རྒྱལ་ཚོགས་ཀྱིས་གནོན་ཤུགས་སྤྲད་ཡོད་པ་དང་། དེ་ནས་བཟུང་བྱང་ཀོ་རུ་ཡ་དཀའ་ཁག་ཅན་གྱི་གནས་སྟངས་ཤིག་ཏུ་གནས་ཡོད་པ་སོགས་ བརྗོད་ཡོད།

རྒྱ་ནག་ནི་འཛམ་གླིང་སྟེང་གནས་འཕྲིན་དྲ་བ་མཛད་སྤྱོད་བྱེད་མཁན་གྱི་མི་གྲངས་ ཆེས་མང་པོའི་རྒྱལ་ཁབ་དེ་ཆགས་ཡོད་ལ། རྒྱ་གཞུང་གིས་བརྙན་རླུང་འཕྲིན་གསར་ལམ་ཡོད་ཚད་སྒེར་གཅོད་བཀག་སྡོམ་བྱས་པའི་ གནས་སྟངས་འོག གནས་འཕྲིན་དྲ་བ་ནི་རྒྱ་ནག་མི་མང་གིས་རྒྱལ་ཁབ་ཕྱི་ནང་གི་གནས་ཚུལ་རྒྱུས་ལོན་ བྱ་སའི་བརྒྱུད་ལམ་གཅིག་པུ་དེའང་ཆགས་ཡོད།
   
ཕྱི་ཚེས་ ༨ ཉིན། རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགོད་གཞུང་ལས་ཁང་གིས་ཡིག་འབྲུ་ཆིག་ཁྲི་ སུམ་སྟོང་ཅན་གྱི་ <<རྒྱ་ནག་གི་གནས་འཕྲིན་དྲ་བའི་གནས་སྟངས>>ཞེས་པའི་ཉམས་ཞིབ་ཀྱི་ རྒྱབ་ཤ་དཀར་པོའི་དེབ་ཅིག་བཏོན་ཡོད་པ་དང་། དེབ་དེའི་ནང་རྒྱ་ནག་གི་དྲ་བ་མཛད་སྤྱོད་མཁན་གྱི་གྲངས་འབོར་ནི་དུང་ཕྱིར་ ༣་༨༤ སླེབས་ཡོད་པ་དང་། ༩༧ ལོ་དང་བསྡུར་ན་ལྡབ་ ༦༠༠ འཕར་ཡོད། ལོར་རེའི་འཕར་ཚད་ཀྱི་མི་གྲངས་ནི་ཁྲི་ ༣༠༠༠ ལྷག་ཡིན་ལ།  གཞན་ཡང་། དྲ་བ་མཛད་སྤྱོད་མཁན་ཕལ་ཆེ་བས་གནས་འཕྲིན་དྲ་བ་བརྒྱུད་གནས་ཚུལ་མཁོ་གཏོང་དང་ འཚོལ་ཞིབ་བཞིན་པ་དང་།  མི་གྲངས་དུང་ཕྱུར་ ༢་༤ ཡིས་བརྡ་འཕྲིན་མ་ལག་སྤྱད་དེ་སྤྱི་གནད་ཕན་ཚུན་གླེང་མོལ་བྱེད་བཞིན་པར་མ་ཟད། ཉིན་རེར་གནས་འཕྲིན་དྲ་བའི་སྟེང་སྤེལ་བཞིན་པའི་གསར་འགྱུར་དཔྱད་བརྗོད་དང་། ཟིན་བྲིས་སོགས་ཁྲི་ ༣༠༠ ལྷག་ལ་བུད་ཡོད།    དེར་བརྟེན། ཉེ་ལམ་རྒྱ་ནག་གིས་རྒྱལ་ཁབ་ཀྱི་བདེ་འཇགས་ལ་ཁ་གཡར་ཏེ་གནས་འཕྲིན་དྲ་བར་བཀག་ སྡོམ་གྱི་ཁྲིམས་གཞི་སྣ་ཚོགས་གཏན་འབེབས་བྱེད་བཞིན་པར་མ་ཟད། པེ་ཅིན་སྲིད་གཞུང་གིས་ཕྱིའི་རྒྱལ་ཁབ་ཀྱི་ཡུལ་མི་རྣམས་ཀྱིས་གནས་འཕྲིན་དྲ་ བའི་ལྕགས་རིར་བརྩི་སྲུང་བྱེད་དགོས་ལུགས་ཀྱང་བརྗོད་ཡོད་པ་རེད།

རྒྱ་ནག་གི་སྨན་ཁང་དང་སྨྱོ་ནད་འཕྲོད་བསྟེན་ཁང་འགས་མཉམ་རུབ་ཀྱིས་རྒྱ་ནག་གི་ གཞོན་སྐྱེས་ཀྱི་བརྒྱ་ཆའི་ ༡༢ ལྷག་ལ་ཞིབ་འཇུག་བྱས་པར། སེམས་ཁམས་མི་དྭངས་པའི་གཞོན་སྐྱེས་ཀྱིས་བརྒྱ་ཆའི་ ༡༧་༥ ཟིན་ཡོད་པ་དང་། དེའི་ཁྲོད་འདུ་ཤེས་འཛིན་སྟངས་ཐད་གནོད་ཤུགས་ཐེབས་པ་བརྒྱ་ཆ་  ༦་༡ དང་། སེམས་ཁམས་སུ་དཀའ་ངལ་ཅན་བརྒྱ་ཆ་ ༥་༦། ལྟོ་གོས་མཛད་སྤྱོད་ཀྱི་དཀའ་ངལ་ཅན་བརྒྱ་ཆ་ ༥་༩ བཅས་འདུག 


དགེ་རྒན་ཆེན་མོ་ཧའོ་ཞིན་ཏིག་གིས་གཞོན་སྐྱེས་ཚོའི་སེམས་ཁམས་ སྨྱོ་ནད་སྔོན་འགོག་འབྱུང་ཐབས་ལ།  གཅིག ཞི་བའི་སྒོ་ནས་སྤྱི་ཚོགས་འགལ་བ་སེལ་ཐབས་དང་། གཞི་རིམ་མི་སེར་གྱི་སེམས་ནང་གི་སྐད་ཆ་དག་བཤད་ས་ཡོད་པ་ཞིག་གམ། གསར་འགྱུར་བརྒྱུད་ལམ་ལ་རང་དབང་སྤྲོད་དགོས། གཉིས། མི་དམངས་འཐུས་མིའི་ལམ་ལུགས་ལ་བསྒྱུར་བཅོས་བཏང་སྟེ།  མི་དམངས་ཀྱིས་རང་དབང་གི་སྒོ་ནས་རང་ཉིད་ཀྱི་འཐུས་ཚབ་ཐུབ་པའི་འཐུས་མི་འདེམས་ ཐོན་ཡོང་བྱེད་དགོས།  གསུམ། ཁྲིམས་འཛིན་སྡེ་ཁག་རང་དབང་གི་ངོ་བོར་གནས་ཐུབ་པ་བྱས་ཏེ་ཁྲིམས་ཞིབ་དྲང་བདེན་ ཡོང་བ་བྱེད་དགོས། ཞེས་བརྗོད་ཡོད། 


རྒྱ་ནག་ཞིན་ཧྭ་ གསར་ཁང་གིས་དེའི་ཐད་ལ། གཅིག དྲིལ་བསྒྲགས་ལ་ཤུགས་བསྣན་ཏེེ་ངེས་ཤེས་ཇེ་མཐོར་གཏོང་རྒྱུ། གཉིས། དེ་དང་འབྲེལ་ཡོད་ཀྱི་ཤེས་བྱ་ཁྱབ་བརྡལ་དུ་གཏོང་རྒྱུ།  གསུམ། དེ་དང་འབྲེལ་ཡོད་ཀྱི་སྨན་བཅོས་རུ་ཁག་རྩ་འཛུགས་བྱ་དགོས་ལུགས་བཀོད་ཡོད།

གསར་འགྱུར་བསྡུ་མཁན། ཚེ་རིང་རྒྱལ།