༸གོང་ས་མཆོག་ཁ་སང་ཉི་ཧོང་དུ་ཞབས་སོར་བདེ་བར་འཁོད་ཡོད་འདུག་ལ། སང་ཉིན་ནས་བཟུང་ཁོང་གིས་བདུན་ཕྲག་གཅིག་ལྷག་རིང་གི་མཛད་འཕྲིན་དབུ་འཛུགས་གནང་རྒྱུ་ཡིན་འདུག
ཉི་ཧོང་དུ་གནས་བཞུགས་སྐུ་ཞབས་ཨརྱ་ཚེ་དབང་རྒྱལ་པོ་ལགས་ཀྱིས་འདི་གར་བཏང་གནས་ལྟར་ན། ཉི་ཧོང་གི་གྲོང་ཁྱེར་ན་ག་ནོར་ (Nagano City) རུ་ཡོད་པའི་ནང་པའི་དགོན་པ་ཛེན་ཀོ་ཇི་ (Zenkoji) ཡི་དབུ་བླ་དང་མཁན་པོ་བཅས་ཀྱིས་མི་ལོ་གཉིས་ཀྱི་སྔོན་ནས་ྋགོང་ས་མཆོག་ལ་གདན་ཞུའི་གསོལ་འདེབས་གནང་ཡོད་པ་ལྟར། ཟླ་འདིའི་ཕྱི་ཚེས་ ༡༦ ཉིན་གྱི་ཞོགས་པའི་ཆུ་ཚོད་ ༡༡ དང་ཕྱེད་ཀའི་སྟེང་བཞུགས་སྒར་ཕོ་བྲང་ནས་ལྡི་ལིར་ཆིབས་ཞལ་བསྒྱུར་ཏེ། ཕྱི་ཚེས་ ༡༧ ཉིན་ཉི་ཧོང་རི་ཏྲ་གནམ་ཐང་ནས་དགོན་པ་ཛེན་ཀོ་ཇི་དགེ་འདུན་པ་གཙོས། དེར་ཡོད་བོད་མི་དང་ས་གནས་མང་ཚོགས་ཀྱི་ཕེབས་བསུའི་ཁྲོད་བཞུགས་གནས་སུ་ཞབས་སོར་བདེ་བར་འཁོད་ཡོད་པ་དང་། སང་ཉིན་ནས་བཟུང་༸གོང་ས་མཆོག་གིས་གྲོང་ཁྱེར་བཞིའི་མཛད་འཕྲིན་གྱི་ཐོག་མ་ཊོག་ཀྱོ་གྲོང་ཁྱེར་ནས་ན་ག་ནོ་རུ་ཞབས་སོར་འཁོད་དེ་ནང་པའི་དགོན་པ་ཛེན་ཀོ་ཇིའི་མཁན་པོ་བགྲེས་གཞོན་རྣམ་གཉིས་ལ་མཇལ་ཁ་དང་། བཀྲ་ཤིས་ལྷུན་པོའི་དགེ་འདུན་པ་བཅུ་དང་ལྷན་དུ་དགོན་པ་དེ་ཉིད་ཀྱིས་བཞེངས་པའི་སངས་རྒྱས་འོད་དཔག་མེད་ཀྱི་དཀྱིལ་འཁོར་རབ་གནས་མཛད་རྒྱུ་ཡིན་འདུག་ལ། ཕྱི་ཚེས་ ༢༠ ཉིན་གྱི་སྔ་དྲོ་ཆོས་པ་ ༢༠༠ དང་ལྷན་ནང་ཆོས་དང་འབྲེལ་བའི་བགྲོ་གླེང་གནང་རྒྱུ་མ་ཟད། དེར་ཡོད་མི་མང་ ༧༠༠༠ ཙམ་ལ་ཆོས་འབྲེལ་མཛད་རྒྱུ་ཡིན་འདུག་ལ། ཕྱི་ཚེས་ ༢༡ ཉིན་གྲོང་ཁྱེར་ན་ག་ནོ་རུ་ཡོད་པའི་སེལ་ཧོ་ཇི Saihoji ཞེས་པའི་དགོན་རྙིང་དུ་ཆིབས་སྒྱུར་གྱིས་དགོན་པ་དེའི་ཕི་ཁྲི་ ༨ ཅན་གྱི་བོད་ལུགས་དང་མཐུན་པའི་སྐུ་འདྲ་ཆེན་པོ་ཞིག་བཞེངས་ཡོད་པ་དེར་རབ་གནས་དང་ལྷན་དད་ལྡན་མ་ཚོགས་ལ་བདེན་བཞིའི་བཀའ་ཁྲིད་དང་། ཉིན་རྒྱབ་ཏུ་བྷ་ཤུ་ཁ་ཡི་ཞེས་པའི་ཆོས་ཚོགས་ཀྱི་གོ་སྒྲིག་འོག་ཁ་ན་ཛ་ཝའི་ནང་ཤེས་རབ་སྙིང་པོའི་བཀའ་ཁྲིད་གནང་རྒྱུ་ཡིན་པ་དང་། ཕྱི་ཚེས་ ༢༤ ཉིན་གྲོང་ཁྱེར་ཡོ་ཀོ་ཧ་མར་ཆིབས་བསྒྱུར་གྱིས་དེར་ཡོད་མཐོ་སློབ་ ༡༥ ནས་སླེབས་པའི་སློབ་ཆེན་པ་ ༡༠༠ ལྷག་དང་མཉམ་དུ་ད་ལྟའི་འཛམ་གླིང་གི་གནད་དོན་གང་མང་ཐད་བསམ་ཚུལ་བརྗེ་རེས་དང་འབྲེལ་བཀའ་སློབ་གསུང་བཤད་གནང་རྒྱུ་ཡིན་འདུག
ཕྱི་ཚེས་ ༢༥ ནས་ ༢༧ ཉིན་བར་སོ་ཏོ་ Soto ཆོས་ལུགས་ཀྱིས་གོ་སྒྲིག་འོག་སློབ་ཕྲུག་རྣམས་ལ་ཆོས་འབྲེལ་གྱི་བཀའ་སློབ་དང་། རྟེན་འབྲེལ་བསྟོད་པ་དང་སེམས་བསྐྱེད་བཀའ་འཁྲིད་གནང་བ་དང་འབྲེལ། མི་མང་ལ་ནང་སེམས་ཀྱི་བདེ་སྐྱིད་དང་ཕན་ཚུན་འཆམ་མཐུན་མཉམ་གནས་ཞེས་པའི་བརྗོད་གཞིའི་ཐོག་བཀའ་སློབ་སྩལ་གནང་མཛད་རྒྱུ་ཡིན་འདུག་ལ། སྐབས་དེར་ནང་པའི་རྒྱལ་ཁབ་ཁག་བཞི་ཀོ་རི་ཡ་དང་སོག་པོ། ཨུ་རུ་སུ་བཅས་ཀྱི་སྐད་རིགས་ཐོག་ཤེས་རབ་སྙིང་པོ་བཀའ་ཁྲི་བསྒྲགས་འཆར་ཡོད་པ་དང་། ཁྱོན་བསྡོམས་མི་གྲངས་ ༡ ཁྲི་ཚོགས་རྒྱུའི་ཚོད་དཔག་བྱས་ཡོད་འདུག ཐེངས་འདིའི་གོ་སྐབས་བརྒྱུད་སོ་ཏོ་ཆོས་ལུགས་ཀྱི་མ་དགོན་གནས་གཞན་ནས་སྤོས་ཏེ་ལོ་ ༡༠༠ འཁོར་བའི་དུས་ཆེན་ཐོག་ྋགོང་ས་མཆོག་ཆིབས་སྒྱུར་གྱིས་ཚོགས་མི་ ༢༠༠༠ ལྷག་ཆོས་འབྲེལ་བཀའ་སློབ་དང་། དེ་བཞིན་རྒྱ་རིགས་གསར་འགོད་པ་དང་མཁས་པ་ཁག་གཅིག་དང་ཀོ་རི་ཡའི་མི་ ༦༠༠ ཙམ་ཞིག་ལ་མཇལ་འཕྲད་གནང་རྒྱུ་དང་། ཕྱི་ཚེས་ ༢༨ ཉིན་གྱི་སྔ་དྲོ་དེར་ཡོད་བོད་མི་ཚོར་མཇལ་ཁ་གནང་རྗེས་སིང་གྷ་པུར་བརྒྱུད་རྒྱ་གར་དུ་ཆིབས་ཞལ་བསྒྱུར་གནང་རྒྱུ་ཡིན་འདུག
གསར་འགོད་པ་དོན་གོ
ཕན་བདེ་འབྱུང་ནས་བསྟན་པ་དར་ཞིང་རྒྱས། །
བསྟན་འཛིན་སྐྱེས་བུ་ཐམས་ཅད་༧སྐུ་ཁམས་བཟང་། །
ལུས་ཅན་ཀུན་ལ་བདེ་སྐྱིད་འབྱུང་བའི་གནས། །
སངས་རྒྱས་བསྟན་པ་རྟག་ཏུ་རྒྱས་འགྱུར་ཅིག །
གང་གི་ཐུགས་རྗེ་ཉི་མའི་འོད་སྣང་གིས།།ཤར་ནུབ་རྒྱལ་ཁབ་ཀུན་ན་ལྷང་ངེ་བ།།ཞི་བདེའི་དར་ཆེན་སྐྱོད་པའི་སེམས་དཔའ་ཆེ།།ཉི་ཧོང་བཞུགས་པ་དེ་ལ་ཕྱག་འཚལ་ལོ།།
སྐུ་ཚེ་ཁྲི་ཕྲག་ནས་ཁྲི་ཕྲག་བར་དུ་རྟེན་པར་ཤོག།
བླ་མ་ལ་སྐྱབས་བསུ་མཆིའོ།དད་ལྡན་སེར་སྐྱ་ཡོངས་ཀྱི་མགོན་དུ་སྐུ་ཚེ་ཁྲི་ཕྲག་ནས་ཁྲི་ཕྲག་བར་དུ་བཞུགས་པར་སྐྱབས་སུ་མཆི།པར་ཁ་ཤེས་ཞིག་ཡོད་ན་མི་ལེགས་སམ།སྐུ་ངོ་ལུང་རིགས་རྒྱལ་ལ་ཐུགས་རྗེ་ཆེ།གནས་ཚུལ་གལ་ཆེན་ཡོད་ན་པར་དང་མཉམ་དུ་ཡོད་ན་བཟང་གང་ཡིན་ཟེར་ན་བདག་གིས་རང་ངོས་ནས་རྒྱལ་སྤྱིའི་གནས་ཚུལ་གལ་ཆེན་རིགས་མར་བཤུས་ནས་མི་དམངས་སྟོང་ཕྲག་མང་པོའི་མཐོང་སར་སྦྱར་གི་ཡོད།དེ་སྔོན་ཐེངས་གང་མང་ཞིག་སྦྱར་མྱོང་མུ་མཐུད་དུ་གནས་ཚུལ་གལ་ཆེན་རིགས་དང་དུ་ལེན་གི་ཡིན་ཕན་ཐོག་ཡང་ཁ་ཡོད་ལག་ཡོད་ཀྱི་འདུག།མི་མང་ཆེ་བས་དྲ་ལམ་གྱི་གནས་ཚུལ་མཐོང་གི་མེད་ཙང་ཁོང་ཚོས་མགྱོགས་པོ་མཐོང་ཐུབ་ན་སེམས་ལ་དགའ་བ་དང་བསམ་བློ་ཡང་ཡར་རྒྱས་ཀྱི་རྣམ་པ་ཞིག་ཐོན་གི་འདུག།བདག་གིས་བསམ་ན་ཡར་ཐོན་གྱི་རྣམ་པ་ཞིག་ལ་ངོས་འཛིན་ཞུ་གི་ཡོད་།