དབུས་འོས་བསྡུ་ལྷན་ཁང་གིས་བོད་མི་ཚོར་བཀའ་སྤྱི་གཉིས་ཀྱི་འོས་བསྡུའི་དེབ་སྐྱེལ་བྱེད་རྒྱུར། ཟླ་གཉིས་ཀྱི་དུས་ཡུན་སྤྲད་ཡོད་ནའང་། མོན་གྷོ་འདོད་རྒུ་གླིང་དུ་དེ་རིང་གཞི་ནས་ས་གནས་འོས་བསྡུའི་ཚོགས་མི་གསར་འདེམས་དང་། སྦོལ་ཀོབ་ལུགས་བསམ་གླིང་དུ་ད་དུང་ཟླ་གཅིག་གི་རྗེས་ནས་ཚོགས་མི་འཕོ་འགྱུར་འགྲོ་རྒྱུར་སྒུག་འདུག
གཞུང་འབྲེལ་གྱི་གསལ་བསྒྲགས་ལྟར་ན། དེ་རིང་ནི་ཟླ་གཉིས་རིང་གི་སྐབས་གསུམ་པའི་བཀའ་བློན་ཁྲི་པའི་འོས་བསྡུ་དང་སྐབས་བཅོ་ལྔ་བའི་བོད་མི་མང་སྤྱི་འཐུས་ཀྱི་འོས་བསྡུ་ཆེན་མོའི་ཆ་ཤས་ལེན་རྒྱུར། བྱེས་ཀྱི་བོད་མི་རྣམས་ཀྱིས་འོས་བསྡུའི་དེབ་སྐྱེལ་བྱེད་པའི་ཉིན་དང་པོ་རེད། ངྷ་སར་འོས་བསྡུའི་དེབ་སྐྱེལ་བྱེད་ས་ནི་ངྷ་ས་བདེ་དོན་ཁོར་ཡུག་ཚོགས་ཁང་ནང་ཡིན་པས། ཆུ་ཚོད་ ༩ དང་སྐར་མ་ ༣༠ ཙམ་ལ་ཕྲན་འོས་བསྡུའི་དེབ་སྐྱེལ་བྱེད་སར་ཐོན། དེ་དུས་མི་གཅིག་གཉིས་ཤིག་གིས་ཞིང་ཚད་ལ་སན་ཊི་མི་ཊར་ ༥༠་༥ དང་ཐུར་ལ་སན་ཊི་མི་ཊར་ ༣༧ ཡོད་པའི་དེབ་ལྗང་ཁུ་ཆེན་པོ་འགའ་ཡར་སྔོག་མར་སྔོག་བྱེད་ཀྱིན་འདུག་ལ། དེབ་སྐྱེལ་བྱེད་སར་དེབ་དེ་ལྟ་བུ་ ༤༠ ཡས་མས་ཤིག་འདུག
མི་དེ་དག་ནི་སྐབས་སྔོན་མ་དག་ཏུ་འོས་བསྡུའི་དེབ་སྐྱེལ་ཟིན་པ་རྣམས་ཀྱིས་རང་རང་གི་ཐོ་གཞུང་སྔོག་སྟེ་ཐེངས་འདིའི་འོས་བསྡུ་བྱ་རྒྱུར་ཐོ་འགོད་བྱེད་མཁན་རེད། ཁོང་ཚོས་སྔོག་བཞིན་པའི་དེབ་ནི་ས་གནས་འོས་འཕེན་པའི་མིང་གཞུང་མ་དེབ་ཅེས་པ་ཡིན་ལ། ངྷ་སའི་ཉེ་འཁོར་ཁུལ་དུ་བརྒྱ་ཤོག་ཀ་པ་དང་ཁ་པ། ག་པ་ལྟ་བུ་དང་གཙུག་ལག་ཁང་གི་ཉེ་འཁོར། ཁྲོམ་དཀྱིལ། ཁ་འཐོར། རྒྱ་གར་གྲོང་གསེབ། ཟློས་གར་སྡེ་ཚན། སྒྲོལ་མ་གླིང་། མཚན་ཉིད་གྲྭ་ཚང་། ཀིརྟི་གྲྭ་ཚང་། རྒན་གསོ་ཁང་། ཤེས་རབ་དགའ་ཚལ་སློབ་གླིང་། བོད་ཕྲུག་ཁྱིམ་སྡེའི་སློབ་གྲྭ་དང་བཟོ་གྲྭ། ནོར་གླིང་ལྟ་བུ་སྡེ་ཚན་ཆེན་པོ་རེ་རེར་དེབ་རེ་ཡོད་ལ། སྡེ་ཚན་རེ་ཟུང་ལ་ད་དུང་། ནོར་གླིང་ཀ་པ་དང་ཁ་པ། ག་པ་ལྟ་བུ་འདུག
འོན་ཀྱང་། དག་སྡེབ་ནོར་བའི་དབང་གིས་བརྒྱ་ཤོག་ཀ་པ་དང་ཁ་པ། ག་པ་ལྟ་བུ་བྲིས་པའི་དེབ་འགའ་དང་། རྒྱ་ཤོག་ ༡ དང་ ༢། ༣ ལྟ་བུ་བྲིས་པའང་འགའ་འདུག དེ་བཞིན་བྲོལ་སྐྱིལ་དང་ཁ་ཇོ་གི་དེབ། ཏི་ལོག་སྤུར་ལྟ་བུའི་བྲིས་ངན་མིས་མི་ཆོད་ཅིང་། ཞག་གཅིག་ལོན་རྗེས་རང་གིས་ཀྱང་མི་ཆོད་པའི་དེབ་འགའ་ཡང་འདུག་སྟབས། ཞོགས་པའི་ཆུ་ཚོད་ ༩ དང་སྐར་མ་ ༣༠ ནས་ཆུ་ཚོད་ ༡༡ བར་དུ་དེབ་སྐྱེལ་བྱེད་དུ་ཡོང་མཁན་མི་ཉི་ཤུ་ཙམ་སླེབས་སོང་མོད། གོ་སྒྲིག་མི་ལེགས་པ་དང་སྐབས་སྔོན་མ་དག་གི་དེབ་སྐྱེལ་གྱི་ཐོ་གཞུང་བཙལ་ཁག་པའི་དབང་གིས། དེབ་སྐྱེལ་བྱེད་དུ་ཡོང་མཁན་ཕལ་ཆེ་བ་ཆུ་ཚོད་གཅིག་ཙམ་རེར་དེབ་ཕར་སྔོག་ཚུར་སློག་གི་ཁྲོད་ནས་ལུས་སོང་།
སྤྱིར་ན་རང་བཙན་ལག་དེབ་ཀྱི་མདུན་ཤོག་ནང་ངོས་སུ་སྐབས་སྔོན་མར་འོས་བསྡུའི་
དེབ་སྐྱེལ་ཟིན་པ་རྣམས་ཀྱི་སྡེ་ཚན་གང་ཡིན་དང་དེབ་སྐྱེལ་ཨང་བྲིས་འདུག་ཀྱང་། རེ་ཟུང་དེབ་མིང་མི་གསལ་བ་དང་རང་བཙན་ལག་དེབ་ཀྱི་ཐོ་མིང་མ་དག་པ་གང་ཡིན་བཤད་དཀའ་ནའང་། དེབ་སྐྱེལ་བྱེད་དུ་ཡོང་བ་འགས་རང་གི་ཐོ་གཞུང་བཙལ་བཙལ་མཐར། མ་རྙེད་པར་དེ་གའི་ལས་བྱེད་བྱམས་པ་ལགས་སུ་སྐད་ཆ་དྲིས་སྐབས། ཁོང་གིས་རང་བཙན་ལག་དེབ་ངོས་ཀྱི་དེབ་སྐྱེལ་ཨང་དེར་དེ་ཙམ་ལྟ་རྒྱུ་མེད་ལ། ཐོ་གཞུང་མི་རྙེད་ན་གསར་བ་བཟོ་དགོས་ཞེས་བརྗོད་བྱུང་།
དེ་བཞིན་འདི་གའི་གསར་འགོད་པས་ཁ་པར་བརྒྱུད། དེ་རིང་ལྷོ་ཕྱོགས་སྦེལ་ཀོབ་གཞིས་ཆགས་སུ་བོད་མི་རྣམས་ཀྱིས་དེབ་སྐྱེལ་བྱེད་ཀྱིན་ཡོད་མེད་སྐོར་དྲིས། སྦེལ་ཀོབ་གཞིས་མགོ་དགྲ་འདུལ་ལགས་ཀྱིས་ད་ལྟ་ད་དུང་དེབ་སྐྱེལ་བྱེད་ཀྱིན་མེད་ཐོག ཟླ་ ༧ ཚེས་ ༡༧ བར་མགོ་འཛུགས་བྱ་རྒྱུ་མིན། དེ་ནི་ཟླ་ ༧ ཚེས་ ༡༥ ཉིན་ས་གནས་འོས་བསྡུའི་ཚོགས་མི་རྣམས་འཕོ་འགྱུར་འགྲོ་གི་ཡོད་སྟབས་རྒྱུན་ལས་གསར་རྙིང་གཉིས་ཀས་ལག་འཆང་མ་དགོས་ན་ཡག་པོ་འདུག ཡིན་ནའང་། ཟླ་ ༧ ཚེས་ ༡༧ ཉིན་ནས་མགོ་འཛུགས་ཀྱིས་ཟླ་གཅིག་ནང་དགོན་སྡེ་ཁག་དང་གཞིས་གྲོང་ཁག་ཏུ་ལས་བགོས་ཀྱིས་བོད་མི་ཚང་མར་འོས་བསྡུའི་དེབ་བྱེད་ཆ་ཚང་ཚར་ཐུབ་པ་བྱ་རྒྱུ་ཡིན་ཞེས་གསུངས།
དེ་བཞིན་མོན་གྷོ་འདོད་རྒུ་གླིང་དུ་དེ་རིང་ས་གནས་འོས་བསྡུའི་ཚོགས་མི་གསར་འདེམས་བྱས་ཏེ། ཚོགས་མི་གསར་བ་རྣམས་ཀྱི་ལོ་རྒྱུས་སོགས་དབུས་གཞུང་ལ་བཏང་འདུག་ལ། ཉིན་འགའི་རྗེས་ནས་བཟུང་དེབ་སྐྱེལ་བྱེད་མགོ་རྩོམ་རྒྱུ་ཡིན་འདུག
བཙན་བྱོལ་བོད་མི་རྣམས་ཁ་འཐོར་དུ་གནས་པ་དང་གཞིས་ཆགས་ཁག་གི་གཞིས་མི་རྣམས་ཀྱང་། ས་ཉུལ་རི་ཉུལ་བྱས་ཏེ་རང་གི་འཚོ་གོས་གནས་མལ་གྱི་ཆེད་དུ་འདུར་རྒྱུགས་བྱེད་ཀྱིན་ཡོད་སྟབས། གཞུང་འབྲེལ་གྱིས་གནང་བའི་ཟླ་གཉིས་ཀྱི་དུས་ཡུན་བལྟས་ཚོད་ཀྱིས་རིང་ནའང་། དུས་ཚོད་སྐར་ཆ་རེ་རེ་དམ་འཛིན་བྱེད་རྒྱུ་དང་ཟླ་གཉིས་ཀྱི་དུས་ཚོད་ཆ་ཚང་བེད་སྤྱད་དེ་བོད་མི་རྣམས་ལ་དེབ་སྐྱེལ་བྱེད་པའི་དུས་ཚོད་ལྡང་ངེས་འཇོག་དགོས་མོད། སང་ཉིན་ཇག་ལ་འགྲོ་ཁར་དེ་རིང་རྟ་གསོ་བའི་དཔེ་ལྟར། རི་མགོའི་སྐྱབས་བཅོལ་སྤྱི་ཚོགས་ཀྱི་མགོ་ཁྲིད་རྣམས་ཀྱིས་དུས་ཚོད་ལ་དུས་ཚོད་ཀྱི་རིན་ཐང་དང་། ལས་ཀར་ལས་ཀའི་རིན་ཐང་མེད་པར་དེབ་སྐྱེལ་བྱེད་པའི་དངོས་གཞིའི་ཉིན་མོར་གཞི་ནས་མི་སྣ་གསར་འདེམས་དང་། ཟླ་གཅིག་གི་རྗེས་ནས་ད་གཟོད་མི་སྣ་བརྗེ་སྤོར་བྱ་རྒྱུ་ཡིན་ཟེར། འདི་ནི་རི་མགོའི་མང་གཙོའི་སྤྱི་ཚོགས་ཤིག་གི་ནང་ཁོག་རྗེན་པ་དེ་རེད།
གང་ལྟར་ཡང་། དེ་རིང་ངས་ཐོ་འགོད་བྱས་མ་ཐག་པའི་མི་ཞིག་གི་རང་བཙན་ལག་དེབ་ནང་ལྟ་སྐབས། དེའི་ནང་དུ་ས་གནས་དང་དེབ་སྐྱེལ་ཨང་། དེབ་སྐྱེལ་བྱས་ཉིན་གྱི་དུས་ཚེས་དང་དེབ་སྐྱེལ་བྱེད་མཁན་ལས་བྱེད་ཀྱི་མིང་རྟགས། ས་གནས་འོས་བསྡུ་ལྷན་ཁང་གི་ཐམ་ཀ་བཅས་བཀོད་འདུག་ལ། དེ་དག་ནི་བཀའ་སྤྱི་གཉིས་ཀྱི་འོས་ལྡུག་རྒྱུར་ཆ་རྐྱེན་ཡོངས་སུ་ཚང་པའི་ངོ་རྟགས་གསལ་ཤོས་དེ་རེད།
སྐབས་དང་པོའི་བཀའ་བློན་ཁྲི་པའི་འོས་འདེམས་སྐབས་དེབ་སྐྱེལ་བྱེད་མཁན་མི་ ༦༧༣༧༦ བྱུང་བ་དང་། དངོས་གཞིའི་འོས་འཕེན་མཁན་མི་ ༣༥༡༨༤ དང་བརྒྱ་ཆ་ ༥༣་༢༢ ཙམ་ལས་མེད་པ་དང་། དེ་བཞིན་སྐབས་གཉིས་པའི་བཀའ་ཁྲིའི་འོས་འདེམས་སྐབས་དེབ་སྐྱེལ་བྱེད་མཁན་མི་ ༧༢༧༧༡ བྱུང་བ་དང་། དངོས་གཞིའི་འོས་འཕེན་མཁན་མི་ ༣༢༢༠༥ དང་བརྒྱ་ཆ་ ༤༤་༢༦ ཙམ་ལས་བྱུང་མེད་པས། འོས་བསྡུའི་དེབ་སྐྱེལ་བྱས་པ་དང་དངོས་སུ་འོས་ལྡུག་མཁན་གྱི་གྲངས་ཀའི་བར་ན་ཧེ་བག་ཆེན་པོ་ཤོར་ཡོད་མོད། དེ་རིང་ངྷ་སའི་བདེ་དོན་ཚེ་རིང་ཕུན་ཚོགས་ལགས་ཀྱིས། དེབ་སྐྱེལ་བྱེད་མཁན་དང་དངོས་སུ་འོས་བསྡུའི་ཆ་ཤས་ལེན་མཁན་གཉིས་ལ་ཁྱད་པར་ཆེན་པོ་འཆོར་དོན། སྔོན་མ་དེབ་སྐྱེལ་ཟིན་ནའང་ཕྱི་རྒྱལ་དུ་སོང་བ་དང་འདས་གྲོངས་སུ་ཕྱིན་པ་རྣམས་ཀྱི་ཐོ་གཞུང་གསུབ་མེད་ཐོག གསར་དུ་དེབ་སྐྱེལ་བྱས་པ་སྣོན་མར་ཆགས་ཏེ། དངོས་སུ་འོས་འཕེན་སྐབས་མི་ཉུང་ཉུང་ཆགས་དགོས་པའི་རྒྱུ་མཚན་འདི་རེད། དེར་བརྟེན་ངྷ་ས་ལྟ་བུར་མཚོན་ན་ཕྱི་རྒྱལ་དུ་འགྲོ་མཁན་མང་བོ་ཡོད་སྟབས། ཐེངས་འདིར་ང་ཚོས་ཆ་ཚང་ཞིབ་འཇུག་བྱས་ཏེ་དེབ་སྐྱེལ་མ་བྱས་པ་རྣམས་གསར་དུ་དེབ་སྐྱེལ་དང་རྙིང་པ་རྣམས་ཀྱི་དེབ་སྐྱེལ་ཨང་དེབ་གསར་བའི་ནང་བཀོད་པ། ཕྱི་རྒྱལ་དུ་ཕྱིན་པ་དང་འདས་གྲོངས་སོང་བ་རྣམས་དེབ་སྐྱེལ་གྱི་ཐོ་གཞུང་ནང་མེད་པར་བཟོ་བཞིན་ཡོད་ཅེས་གསུངས།
ཡང་ཁོང་གིས། བཀའ་བློན་ཁྲི་པའི་འོས་བསྡུ་དེ་ ༢༠༡༡ ལོའི་ཟླ་གསུམ་པའི་ནང་ཡིན་སྟབས། ༡༩༩༣ ལོའི་ཟླ་ ༣ ཙམ་ལ་སྐྱེས་པའི་ཕྲུ་གུ་རྣམས་ཀྱིས་ད་ལྟ་ནས་དེབ་སྐྱེལ་བྱེད་ཆོག དེ་ནི་ཁོ་ལ་བཀའ་སྤྱི་གཉིས་ཀྱི་དངོས་གཞིའི་འོས་བསྡུའི་སྐབས་སུ་འོས་འཕེན་པའི་ཆ་རྐྱེན་ཚང་ཡོང་གི་ཡོད་ཅེས་དང་། ཟླ་བདུན་པ་ནས་བཟུང་ས་གནས་འོས་བསྡུའི་ཚོགས་མི་རྣམས་ངྷ་ས་ཁུལ་གྱི་སྡེ་ཚན་ཁག་ཏུ་ཕར་བསྐྱོད་དེ། བོད་མི་ཚོར་འོས་བསྡུའི་ཆ་ཤས་ལེན་རྒྱུ་དང་དེབ་སྐྱེལ་བྱེད་རྒྱུའི་བསྐུལ་མ་གཏོང་གི་ཡིན་ལ། ཕྱི་ཟླ་ ༧ ནང་ཆ་ཚང་ཚར་ཐུབ་པ་བྱ་རྒྱུ་དང་། ད་ལོ་གློག་ཀླད་དུ་བཅུག་སྟེ་མ་འོངས་པར་ལོ་ལྔ་ལ་རེ་རེ་བཞིན་ལས་ཀ་བྱེད་མི་དགོས་པ་བཟོ་གི་ཡིན་ཟེར།
རོབ་རྩིས་ལྟར་ན། ད་ལོར་ངྷ་ས་ཁུལ་དུ་རང་ལོ་བཅོ་བརྒྱད་ཟིན་པ་དང་འོས་བསྡུའི་ཆ་ཤས་ལེན་ཆོག་པའི་མི་ ༨༠༠༠ ནས་ ༩༠༠༠ བར་ཡོད་འདུག
གསར་འགོད་པ། ཨ་རིག་འགྱུར་མེད།
དེབ་སྐྱེལ་དེ་ཙམ་བྱེད་དགོས་གལ་མེད་གི
་འོས་བསྡུས་ལྷན་ཁང་ལ་དྲན་བསྐུར་ཞུ་རྒྱུ། རྒྱ་གར་ནང་ལོག་ན་བོད་ཕྲུག་མཐོ་སློབ་འདོན་མཁན་ཁག་གཅིག་ལ་ཐབས་ལམ་ཞིག་མ་གནང་ན་དེབ་སྐྱེལ་དང་དངོས་གཞི་གང་ཡིན་རུང་ཆ་ཤས་ལེན་ཐུབ་མིན་དཀའ་མོ་རེད། ངེས་པར་དུ་ཁོང་ཚོས་ཆ་ཤས་ལེན་ཐུབ་པའི་འཆར་གཞི་དང་གོ་བསྒྲིག་དམིགས་བསལ་པ་ཤིག་ཡོད་ན་ཡག་ས་རེད།
ད་ལྟའི་དུས་ཕྲང་འདིར་དྭངས་བླང་དཔྱ་དངུལ་མ་ཕུལ་ན། དངུལ་འགྲོ་སོང་མེད་པའི་སྟེང་དུ། རང་མིང་ཐོ་འགོད་ལ་འགྲོ་མི་དགོས། འོས་ཤོག་བླུག་ལའང་འགྲོ་མི་དགོས་པ་ཁེ་སང་གསུམ་ཡོད་པ་མཐོང་མཁན་མེད་པ་མ་རེད། འདི་གང་གིས་ལེན་པ་རེད།
དེབ་སྐྱེལ་ཡག་པོ་འདུག ཡིན་ནའི། གདམ་བྱ་ག་རེ་རེད་དམ། བཙན་བྱོལ་གཞུང་མེད་པ་བཟོས་པའི་རྗེས་སུ་གདམ་བྱ་སྐྱབས་བཅོལ་ཚོགས་གཙོ་མ་རེད་དམ། ཚོགས་པ་ཞིག་ལ་ཚོགས་འཐུས་ལས་སྤྱི་འཐུས་ཡོད་སྲིད་ཀྱི་མ་རེད། དེ་འདྲ་ཞིག་རེད་དམ། ཤི་བོ་ཚོ།