ཁྱོད་ལྟར་ན་འདི་རང་དབང་རེད་དམ་གུས་མེད་རེད།

དྲ་ཚིགས་གཞན་དང་སྤྱི་ཚོགས་གཞན་པ་ཞིག་ན་བགྲོ་གླེང་འདི་འདྲ་ཞིག་འགྲོ་གིན་འདུག དཔེར་ན། ཉེ་ཆར་ནེའུ་ཛི་ལན་ཌིའི་གྲོས་ཚོགས་འཐུས་མི་ཌོག་ཊར་ རུ་སལ་ནོར་མན་ ལགས་ཀྱིས་རྒྱ་ནག་གི་སྲིད་འཛིན་གཞོན་པ་ཞི་ཅིན་ཕིན་ལ་ངོ་རྒོལ་བྱས་པ་དེ་གུས་མེད་རེད་དམ། ཡང་ན། རང་དབང་གི་ཆེད་དུ་རེད་ཟེར།

བདུན་ཕྲག་སྔོན་མའི་གཟའ་པ་སངས་ཉིན་ཌོག་ཊར་ནོར་མན་ལགས་ཀྱིས་ནེའུ་ཛི་ལན་ཌིའི་གྲོས་ཚོགས་ཁང་ནས་བོད་ཀྱི་རྒྱལ་དར་ཞིག་བསྣམས་ཏེ། རྒྱ་ནག་གི་སྲིད་འཛིན་གཞོན་པ་ཞི་ཅིན་ཕིན་ལ་ངོ་རྒོལ་བྱས་སྐབས། རྒྱ་ནག་གི་སྲིད་འཛིན་གཞོན་པའི་སྐུ་སྲུང་བ་དང་ཁོང་གི་བར་རྙོག་གླེང་ཡང་བྱུང་ཡོད་པ་རེད།

རྗེས་སོར་ནེའུ་ཛི་ལན་ཌིའི་སྲིད་བློན་ རྗོན་ཁེ་ མཆོག་གིས་རྒྱ་ནག་གི་སྐུ་མགྲོན་རྣམ་པར་དགོངས་དག་ཀྱང་ཞུས་ཡོད་ལ། ཌོག་ཊར་ནོར་མན་གྱིས་དེ་ནི་བྱབ་ཆུང་གི་བྱེད་སྟངས་ཤིག་རེད་ཅེས་བཤད་འདུག

ཕྱི་ཚེས་ ༢༢ ཉིན་ནས་བཟུང་ནེའུ་ཛི་ལན་ཌིའི་གསར་ཤོག་དྲ་ངོས་ nzherald.co.nz ཞེས་པར་གནད་དོན་དེའི་ཐད་བསམ་ཚུལ་ ༣༠༠ ལྷག་བཏོན་ཡོད་པ་དང་། ཕྱོགས་གཅིག་གིས་ཞི་བའི་ངོ་རྒོལ་ཙམ་ལ་ནེའུ་ཛི་ལན་ཌིའི་སྲིད་བློན་མཆོག་གིས་དགོངས་དག་ཞུ་དགོས་དོན་ཡོད་པ་མ་རེད་ཟེར་ལ། ཕྱོགས་གཞན་པ་དེས་ཌོག་ཊར་ནོར་མན་གྱིས་གལ་ཆེའི་མགྲོན་ལ་ཞེད་སྣང་བསྐུར་རྩིས་བྱས་པ་རེད་ཟེར།

ནེའུ་ཛི་ལན་ཌིའི་རྒྱ་རིགས་སྤྱི་ཚོགས་ཀྱི་རྒྱལ་ཡོངས་ཚོགས་གཙོ་ སི་ཊི་ཝིན་ཡང་ གིས་བཤད་དོན། རྒྱ་རིགས་སྤྱི་ཚོགས་དང་ལྷག་པར་དུ་གནས་འདིར་ཡུན་རིང་འགོར་ཞིང་། འདི་ནས་སྐྱེས་ཤིང་འཆར་ལོངས་བྱུང་བ་དག་གིས་སྨྲ་བརྗོད་རང་དབང་ནི་ཇི་འདྲའི་གལ་ཆེན་པོ་ཞིག་ཡིན་པ་ཤེས་ཀྱི་ཡོད་པ་རེད། དེ་ལ་ངོས་ལེན་བྱེད་གི་རེད། དེ་དང་དུས་མཚུངས་སུ། རྒྱ་རིགས་མི་དམངས་ཀྱིས་སྤྱིར་བཏང་ནས་མགྲོན་པོ་དང་ལྟ་སྐོར་བ་རྣམས་ལ་གུས་བརྩི་བྱེད་རྒྱུ་ནི་གལ་ཆེན་པོ་ཡིན་པར་བརྩི་གི་ཡོད་པ་རེད་ཅེས་དང་། གྲོས་ཚོགས་འཐུས་མི་ཞིག་ཡིན་པའི་ཆ་ནས་ཌོག་ཊར་ནོར་མན་ལགས་ལ་འོས་འགན་དང་ཁེ་དབང་ཆེན་པོ་ཞིག་ཡོད་པ་རེད། ཡིན་ཡང་ཁོང་གིས་རང་ཉིད་གྲོས་ཚོགས་འཐུས་མི་ཞིག་ཡིན་པའི་སྤྱོད་པར་བདག་པོ་བརྒྱབ་ཡོད་པ་མ་རེད་ཅེས་ཟེར།

ཡང་ཁོང་གིས། ནེའུ་ཛི་ལན་ཌིའི་རྒྱ་རིགས་སྤྱི་ཚོགས་ནང་གི་མི་ཕལ་ཆེ་བ་ནི་ཌོག་ཊར་ནོར་མན་ལགས་ཀྱི་ངོ་རྒོལ་དེ་ལ་ཧང་སང་གི་ཡོད་པ་མ་རེད་ལ། དེ་ནི་ཇ་ཕོར་ནང་གི་ཆར་རླུང་ལྟ་བུ་རེད་ཟེར།

ནེའུ་ཛི་ལན་ཌིའི་བོད་ཀྱི་གྲོགས་པོའི་ཚོགས་པའི་འགན་འཛིན་ཐུབ་བསྟན་སྐལ་བཟང་ལགས་ཀྱིས། འཛམ་གླིང་སྟེང་སྟོབས་ཤུགས་ཆེ་ཤོས་སུ་འགྱུར་རྒྱུའི་མི་ཞིག་འདིར་འགྲོ་གིན་ཡོད་པ་རེད་དེ། ཡིན་ཡང་། ཁོང་གིས་རྒྱལ་དར་ཞིག་གི་ཁ་གཏད་ནས་གདོང་བ་བཀྱགས་ནས་འགྲོ་ཐུབ་གི་ཡོད་པ་མ་རེད་ཅེས་དང་། རྒྱ་ནག་གི་སྲིད་འཛིན་གཞོན་པར་མཚོན་ན་ཁོ་ལ་སྐད་འབོད་བྱས་པ་ཙམ་གྱིས་འཇིགས་སྐུལ་བྱས་པ་ནི་མ་རེད། ཁོང་ཚོའི་མིག་ལམ་ནས་རྒྱལ་དར་ཞིག་མཐོང་བ་ཙམ་གྱིས་ན་ཟུག་འདང་ངེས་ཤིག་སྐྱེས་ཡོད་པ་རེད་ཟེར།

སྐལ་བཟང་གིས་མུ་མཐུད་ནས་བཤད་དོན། བརྩི་བཀུར་ནི་ཕྱོགས་གཉིས་ཀར་འགྲོ་དགོས་པ་རེད། རྒྱ་ནག་གི་སྐུ་ཚབ་ཚོགས་པ་དེས་ནེའུ་ཛི་ལན་ཌིའི་བདག་དབང་ལ་ཡང་བརྩི་བཀུར་བྱ་དགོས་པ་རེད། ཁོང་ཚོའི་མི་ཞིག་གིས་ང་ཚོའི་གྲོས་ཚོགས་འཐུས་མི་ཞིག་ལ་ཚུར་རྒོལ་བྱས་པ་རེད། དེས་རྒྱལ་ཁབ་ཀྱི་བདག་དབང་ལ་རྡོག་རོལ་བཏང་བ་རེད་ཟེར།

གལ་སྲིད་ཌོག་ཊར་ནོར་མན་གྱིས་ངོ་རྒོལ་འདི་རྒྱ་ནག་ནས་བྱས་ཡོད་པ་ཡིན་ན་ཁོང་བཙོན་ཁང་དུ་བཅུག་ཚར་ཡོད་པ་ནི་ནེའུ་ཛི་ལན་ཌིའི་རྒྱ་རིགས་སྤྱི་ཚོགས་ཀྱི་མི་ཕལ་མོ་ཆེས་ཤེས་ཡོད་པ་རེད་ཅེས་ཀྱང་བཤད་འདུག

རྒྱ་ནག་དང་ནེའུ་ཛི་ལན་ཌིའི་ཚོང་དོན་ཚོགས་པའི་ཚོགས་གཙོ་ལིན་ཌ་ཀྲང་ཞེས་པའི་བུད་མེད་ཅིག་གིས། ཌོག་ཊར་ ནོར་མན་གྱི་ངོ་རྒོལ་དེས་རྒྱལ་ཁབ་འདི་གཉིས་བར་ཇེ་ལེགས་དང་ཇེ་ཉེར་འགྲོ་བཞིན་པའི་གྲོགས་འབྲེལ་དེ་ལ་གནོད་སྐྱོན་ངེས་ཅན་ཞིག་ཐེབས་སྲིད་སྐོར་བཤད་ཡོད་པ་རེད།

གོང་གསལ་དྲ་ངོས་སུ། ནེའུ་ཛི་ལན་ཌིའི་སྲིད་བློན་གྱིས་རྒྱ་ནག་གི་གཟིགས་སྐོར་ཚོགས་པ་དེར་དགོངས་དག་ཞུས་པ་འགྲིག་ཡོད་མེད་སྐོར་ལ་བསམ་ཤོག་ཅིག་བསྡུས་ཡོད་ལ། ཕྱི་ཚེས་ ༢༣ གྱི་ཞོགས་པ་བར་དུ་བསམ་ཤོག་འཕེན་མཁན་གྱི་བརྒྱ་ཆའི་ ༥༨ ཀྱིས་འགྲིག་འདུག་པར་འདོད་ལ། བརྒྱ་ཆའི་ ༤༢ གཉིས་ཀྱིས་འགྲིག་མེད་པའི་བསམ་ཤོག་འཕངས་ཡོད་པ་རེད།

གསར་འགྱུར་སྤེལ་མཁན། ལུང་རིགས་རྒྱལ།