རཱ་ལོ་དང་བགྲོ་གླེང་བའི་གཏམ། ཨ་རིག་འགྱུར་མེད།

དྲ་གྲོགས་རཱ་ལོ། བོད་ཀྱི་དུས་བབ་ངོས་ན་གཡག་ཞ་ར་ཡོད་མེད་དང་ཁྱོས་དེ་ཚོར་འུར་རྡོས་འཁེལ་མིན་གནད་འགག་མ་རེད། གཙོ་བོ་ཁྱེད་ཀྱིས་ཐེངས་འདིར་རང་གི་ལྟ་ཚུལ་ཅི་བཞིན་དྲང་པོ་དྲང་བཞག་གི་སྐད་ཆ་ཚིག་འགའ་བཤད་པ་དང་། བློ་དོགས་ཇི་ལྟར་མི་མང་ལ་དོགས་འདྲི་བྱས་པ་འདི་གལ་ཆེན་པོ་རེད།

སྤྱི་ཡོངས་ནས་མ་སུ་རི་བོད་ཁྱིམ་སློབ་གྲྭ་ནས་ཕྱིར་འབུད་བཏང་བའི་སློབ་མ་དེ་ཚོར་ ༼ བྱིས་པ་ ༽ ཞེས་འབོད་དོན། དེ་དག་གི་ཁྲོད་ན་རང་ལོ་ ༡༣ ཅན་ཡང་ཡོད་པས་ ༼ བྱིས་པ་ ༽ ཟེར་བའི་མིང་འདི་བཙན་གྱིས་བླངས་ས་འགྲོ་གི་མ་རེད། དེའི་ནང་གི་བུ་མོ་དེ་ལོ་ ༡༨ ཡིན་པའི་རྒྱུ་མཚན་གྱིས་བྱིས་པ་ཟེར་བའི་མིང་འདི་སློབ་ཕྲུག་སྤྱི་ཡོངས་ཀྱི་མགོ་ནས་ལེན་དགོས་པའི་ངེས་པའང་མི་འདུག ཡང་བྱིས་པ་ཞིག་གི་ངོ་བོར་བཙན་གྱིས་བཀབ་སྟེ་བཙན་བྱོལ་བོད་གཞུང་དང་མ་སུ་རི་སློབ་གྲྭ་བཅས་རང་རེའི་སྒྲིག་འཛུགས་གལ་ཆེན་པོ་འདི་དག་ལ་ནག་ཉེས་འགེལ་ཇི་ཐབས་བྱས་པའང་མ་རེད།

དེང་སྐབས་མི་ཕལ་ཆེ་བས་མ་གྲོས་བསམ་པ་གཅིག་མཐུན་གྱིས་སྐད་ཆ་གཅིག་རང་གཅིག་བཤད་ཀྱིན་པ་ནི། ཕུད་ཟིན་པའི་སློབ་ཕྲུག་དེ་དག་ཆུ་བཞུར་མཁན་ཡིན་ཡང་། དེའི་ཤུལ་གྱི་སློབ་མ་སྤྱི་བྱིངས་གྲམ་པ་འདུག་མཁན་ཡིན་པས། འབྱུང་འགྱུར་གྱི་སློབ་གྲྭའི་སྒྲིག་འཛུགས་དང་སློབ་གྲྭའི་ཆེ་མཐོང་བསམ་ན་སློབ་མ་དེ་དག་སློབ་གྲྭ་ནས་ཕུད་པ་འགྲིག་འདུག་མོད། ཕྱིར་བོད་དུ་གཏོང་རྩིས་བྱིས་པ་འགྲིག་མི་འདུག་ཟེར་བ་དེ་རེད། དེ་གཞོན་སྐྱེས་དང་མང་ཚོགས་ཤིག་གཅིག་རྒྱབ་གཅིག་ལངས་བྱས་ཏེ་བོད་གཞུང་བཀའ་ཤག་དང་བཅས་པར་གཞི་མེད་སྐྱོན་འཛུགས་བྱེད་འདོད་པ་མ་རེད། མི་ཚང་མས་གནད་དོན་འདི་དེ་ལྟ་བུ་ཞིག་ཏུ་ངོས་བཟུང་བས་རེད།

ཁྱེད་རང་ཐུགས་སེམས་མ་འཁྲུལ་བར་བློ་བདེ་བར་བཞུགས་རོགས། རང་རེའི་དབུ་ཁྲིད་དམ་པ་མེད་དུས་ཤིག་ལ་བོད་མི་མང་སྤྱི་བྱིངས་ཀྱིས་འབངས་གྱེན་ལོག་གི་བྱ་སྤྱོད་སྤེལ་རྩིས་མི་འདུག གནས་ལུགས་དང་ལམ་ལུགས་ལ་མི་ལྟ་མི་དཔྱོད་པར། རྡོ་དང་རྒྱུགས་པ་བཟུང་ནས་ཡོང་སྟེ་གངས་ཅན་སྐྱིད་གཤོངས་འདི་ལེབ་ལེབ་མི་བཟོ་བའི་གདེང་ཚོད་ནི། ཁྱོད་རཱ་ལོའི་མིང་ཅན་པོ་མ་གཏོགས་མགོ་འཛིན་སྐྱོང་བཀའ་ཤག་ནས་འོག་ང་ལྟ་བུའི་བར་དུ་ཡོད་ཚོད་འདུག

རེད། ཁྱོད་ཀྱིས་བཤད་པ་ཇི་བཞིན། བཙན་བྱོལ་སྤྱི་ཚོགས་ཀྱི་སློབ་གྲྭ་ཁག་ནང་འབྱུང་བཞིན་པའི་འཁྲིག་སྤྱོད་སྐོར་གྱི་གནད་དོན་འདི་དེང་སྐབས་ཛ་དྲག་གི་ངོ་བར་འགྱུར་གྱིན་འདུག དེ་ཡང་སློབ་གྲྭའི་གནས་སྐབས་སུ་བུ་མོ་གཅིག་ལ་བུ་དགུས་སྤྱོད་ཀྱིན་པའི་ཛ་དྲག་གི་ངོ་བོར་འཕེལ་གྱིན་འདུག འདི་ལྟར་གནད་དོན་ཛ་དྲག་གི་ངོ་བོར་འཕེལ་དུས་མི་མང་ནང་གླེང་ཕྱོགས་འདྲ་མིན་སྣ་ཚོགས་ཡོང་བ་ཆོས་ཉིད་རེད་ལ། འདི་ལྟར་གནད་དོན་ཛ་དྲག་གི་ངོ་བོར་འཕེལ་དུས་ད་གཟོད་ཐག་གཅོད་ཀྱི་བྱ་བའང་ཏན་ཏན་ཏིག་ཏིག་གིས་གནང་དགོས་པ་གནད་འགག་རེད།

ཁྱོད་ཀྱིས་གནད་དོན་འདི་ཛ་དྲག་ཏུ་གཟིགས་པ་ལྟར་བཀའ་ཤག་དང་ཤེས་རིག་ལས་ཁུངས། མ་སུ་རི་བོད་ཁྱིམ་བཅས་ཀྱིས་ཀྱང་ཛ་དྲག་གི་ངོ་བོར་གཟིགས་ཏེ་སློབ་ཕྲུག་དེ་ཚོ་དགུ་བོ་བྱས་ཉེས་ཆེ་ཆུང་གི་གོ་རིམ་ལྟར་ཐག་གཅོད་ཀྱང་བྱས་མེད་པར། ཉེས་ཆད་གཅིག་པ་དང་སློབ་གྲྭ་ཙམ་དུ་མ་ཟད་ཕྱིར་ཕ་ཡུལ་དུ་སྐྱེལ་དགོས་པའི་ཛ་དྲག་གི་ངོ་བོར་གཟིགས་སྟབས། མེ་དམར་བོའི་སྟེང་དུ་ཤིང་བསྣན་པ་ལྟ་བུའི་ཛ་དྲག་གི་ངོ་བོར་གྱུར་སོང་བ་རེད།  ཁྱོད་ཀྱིས་བཤད་པ་ལྟར་གནས་ཚུལ་འདི་ལྟ་བུ་སུ་ཇཱ་གཙོས་འཛིན་རིམ་དམའ་ཡང་ལོ་ཚོད་མཐོ་ཞིང་བོད་ནས་ཡོང་བ་མང་བའི་སློབ་གྲྭ་ཁག་ཏུ་ཡོད་སྲིད་པ་རེད།

ཡིན་ནའང་། ཁྱོད་ཀྱིས་མ་བརྗེད། སློབ་གྲྭ་གང་ཞིག་ནས་འཁྲིག་སྤྱོད་ཀྱི་གནད་དོན་བྱུང་སྟེ། སློབ་མ་ཕྱིར་ཕ་ཡུལ་བར་དུ་བསྐྱལ་བའི་གནས་ཚུལ་བྱུང་འདུག ལྷག་པར་དུ་བཙན་གྱིས་བསྐྱལ་བ་དང་རང་འགུལ་གྱིས་འགྲོ་མཁན་ལ་ལམ་འཇུག་བྱས་པ་གཉིས། གཏན་ནས་ངོ་བོ་གཅིག་ས་འགྲོ་གི་མ་རེད། དེར་བརྟེན་མང་ཚོགས་ཀྱིས་ཁེ་བཟང་དེ་སྤྱད་ནས་བོད་གཞུང་ལ་འཇིགས་སྐུལ་བྱེད་ཀྱིན་ཡོད་པ་རེད་ཅེས་པ་ཁྱོད་ཀྱི་རྫུན་གཏམ་རེད། སྒྲོ་འདོགས་རེད། བསྐུར་བ་བཏབས་པ་རེད། འདི་བོད་གཞུང་གིས་ཀྱང་གསལ་བོར་མཁྱེན་གི་རེད་འདོད།

ཡང་ཁྱོད་ཀྱིས། གནད་དོན་གཞན་ཞིག་ནི། སྤྱིར་རྒྱལ་སྤྱིའི་ཁྲིམས་ལུགས་ལྟར་ན་བཙན་བྱོལ་དུ་ཡོང་བའི་མི་རྣམས་བཙན་གནོན་བྱེད་མཁན་དེ་ལ་བཙན་ཚུགས་ཀྱིས་ཕྱིར་རྩིས་སྤྲོད་བྱེད་པའི་ལུགས་སྲོལ་མེད་ལ། དེ་ནི་བྱིས་པ་ཙམ་དུ་མ་ཟད། མི་རྒན་ཚོར་ཡང་དེ་འདྲའི་བྱ་བ་ལག་བསྟར་བྱེད་ཆོག་གི་མ་རེད། ཅེས་དང་། ཡང་གཅིག་བཤད་ན། རྒྱལ་སྤྱིའི་ཁྲིམས་དང་འགྲོ་བ་མིའི་ཐོབ་ཐང་གི་རྩ་དོན་ལྟར་ན། བྱིས་པ་ལ་རྒྱལ་མཚམས་ཡོད་པ་མ་རེད། ཁོང་ཚོ་གང་དུ་འགྲོ་ན་རང་དབང་རེད། དེར་བརྟེན་བོད་རིགས་བྱིས་པ་ཚོ་ཕྱིར་རང་གི་ཕ་མའི་འགྲམ་དུ་ལོག་བཅུག་པ་འདི་རྒྱལ་སྤྱིའི་ཁྲིམས་ཐོག་ནས་འགྲིག་བསྡད་ཡོད་པ་རེད། ཅེས་ཟེར།

གོང་གི་དུམ་ཚན་ཐུང་ངུ་དེར་བསམ་ན་སྤྱིར་ཁྱོད་ཀྱིས་འགྲོ་བ་མིའི་རིགས་ཀྱི་གཞི་རྩའི་བསམ་བློ་མཚོན་མི་ཐུབ་པའི་ཁར། རྒྱལ་སྤྱིའི་ཁྲིམས་ལུགས་བཤད་དུས་མུན་ནག་མདའ་འཕེན་གི་སྐད་ཆ་བཤད་ཀྱིན་འདུག ངས་གཅིག་གཅིག་གཉིས་གཉིས་བྱས་ཏེ་འདི་འདི་རེད་དང་གན་གན་རེད་ཟེར་མི་དགོས་པར། ཁྱོད་རཱ་ལོའི་མིང་ཅན་པོས་རང་མཚང་རང་གིས་བྲུས་འདུག

དངོས་གནས་བཤད་ན་སྐད་ཆ་འདི་ཁ་སང་དེ་རིང་གི་གླེང་ཕྱོགས་ངོ་མ་དེ་ཡིན་ཡང་། ཁྱོད་ཀྱིས་གླེང་དགོས་པ་ངོ་མ་དེ་འདི་ལྟར་སྟབས་བདེ་མོ་བདེ་མོ་ཞིག་གིས་འགྲེལ་འདུག སྤྱིར་བཀའ་ཤག་གིས་བྱིས་པ་འདི་ཚོ་ཕ་མའི་འགྲམ་དུ་ལོག་འཇུག་གི་ཡིན་ཟེར་གི་ཡོད་ལ། མང་ཚོགས་ཀྱིས་བྱིས་པ་འདི་ཚོ་རྒྱ་ལག་ལ་བཞག་སོང་ཟེར་གྱིན་ཡོད། མང་ཚོགས་ཀྱིས་བཀའ་ཤག་ལ་ཁོང་ཚོ་ལམ་བར་ནས་བདེ་འཇགས་ངང་ཕ་མའི་འགྲམ་དུ་སྐྱེལ་ཐུབ་པའི་གདེང་ཚོད་ཡོད་མེད་ཚ་འདྲི་ཡང་འདྲི་བྱེད་ཀི་ཡོད་ལ། ད་བར་བཀའ་ཤག་གིས་ཁག་ཐེག་འོག་ཕ་མའི་འགྲམ་དུ་བསྐྱལ་བའི་བྱིས་པ་ཞིག་མེད་ཚོད་ཡིན། དེས་ན་བཀའ་ཤག་གིས་བྱིས་པ་འདི་ཚོ་ཕ་མའི་གམ་དུ་བསྐྱལ་བ་འགྲིག་པའི་དབང་དུ་བཏང་རུང་། ཁྱོད་རཱ་ལོ་གཙོས་པའི་བཙན་བྱོལ་གྱི་རྒན་མགོ་དཀར་ནས་གཞོན་སོ་དཀར་ཚུན་གྱི་བོད་མི་ཚང་མར། བྱིས་པ་འདི་ཚོ་ལམ་བར་ནས་རྒྱ་ལག་ཏུ་མི་འཆོར་བའི་གདེང་ཚོད་མེད་པས་ན། བྱིས་པ་ཚོ་རྒྱ་ལག་ལ་བསམ་གཟས་ནས་བཞག་པ་མིན་ཡང་། རང་ཤུགས་ཀྱིས་ལག་ཏུ་ཤོར་འགྲོ་བའི་སྡུག་སྐད་རྒྱག་མགོ་ཚུགས་པ་རེད། ཆོ་ངེ་ཤོར་བ་རེད། ཁེངས་ཚིག་བོར་བ་རེད། དེ་མ་བརྗེད།

ཁྱོད་ལྟར་ན།  བོད་གཞུང་གིས་བོད་ནས་ཡོང་བའི་གཞོན་སྐྱེས་ཚང་མ་ཕྱིར་རྒྱ་ནག་ལ་རྩིས་སྤྲོད་བྱས་ཡོད། དཔེར་ན། གསོག་སྒར་སློབ་གྲྭའི་སློབ་མ་དང་འཛིན་གྲྭ་ཁུངས་མ་འཁྱོལ་མཁན་བོད་ཁྱིམ་གྱི་བྱིས་པ་ཚང་མ་ཕྱིར་བོད་དུ་ལོག་དགོས་པའི་སྲིད་བྱུས་བཟུང་ཡོད་པ་མ་ཟད། ད་བར་དུ་བོད་གཞུང་གིས་བྱིས་པ་དེ་དག་ལ་སོ་སོའི་ཕ་ཡུལ་བར་དུ་འདང་ངེས་པའི་ལམ་གྲོན་ཡང་སྤྲོད་ཀྱི་ཡོད། འདི་དག་ཀྱང་བཤད་ཕྱོགས་བརྗེ་ན་རྒྱ་ནག་ལ་རྩིས་སྤྲོད་བྱས་པ་ཡིན་པས་ཁྱབ་དགོས་ཟེར་མོད། གོང་ཞུས་ལྟར་རང་ངོས་ནས་འགྲོ་འདོད་ཡོད་མཁན་ཞིག་བཙན་བྱོལ་བོད་གཞུང་གི་ལངས་ཕྱོགས་ལྟར། ལམ་མཇུག་གནང་བ་དང་འགྲོ་འདོད་མེད་མཁན་ཞིག་སློབ་གྲྭ་ནས་ཕུད་པའི་མ་ཚད། ཕྱིར་བོད་དུ་སྐྱེལ་རྒྱུ་ཟེར་བ་འདི་གཉིས་ངོ་བོ་གཅིག་གི་སྟེང་ལ་འཇོག་སྟངས་མེད་པས། ཁྱོད་ཀྱིས་ཁྱབ་མཐའ་ཡང་ལས་སླ་བོར་འཆོར་དུ་དོགས་པའི་གནས་སོ། །

ལྷག་པར་དུ་སྐབས་འདིར་ངས་ཁྱོད་ལ་གསལ་འདེབས་ཤིག་བྱེད། ང་སློབ་གྲྭར་ཡོད་སྐབས་འཁྲུག་འཛིང་བྱས་པ་དང་རྐུན་མ་བརྐུས་པ་སོགས་སློབ་གྲྭའི་སྒྲིག་གཞི་དང་འགལ་བའི་བྱིས་པའམ། སློབ་མ་བསྡོམས་པས་དྲུག་ཙམ་སློབ་གྲྭ་ནས་ཕྱིར་འབུད་བཏང་སོང་ཡང་། སློབ་གྲྭ་ནས་ཕུད་ཉིན་ནས་བཟུང་ ༼ ཕྱིར་འབུད་ ༽ ནི་ཕྱིར་འབུད་ཡིན་སྟབས། ཉལ་ཆས་དང་ཕོར་བ་རྩིས་སྤྲོད་བྱས་རྗེས་རྡོག་ཁྲེས་ཁུར་ནས་འགྲོ་རྒྱུ་ལས། དེ་ནས་བཟུང་རྒྱ་བལ་འབྲུག་གསུམ་གྱི་ས་གནས་གང་དུ་ཕྱིན་ནས་འདུག་མིན་དང་། འཚོ་བ་ཇི་ལྟར་རོལ་མིན་སོགས་ཀྱི་ཐད་ལ་སློབ་གྲྭས་སྟངས་འཛིན་བྱེད་ཀྱི་མེད་པ་དེ་རེད།

མཇུག་གི་ཁྱོད་ཀྱི་དྲི་བ་དེ་ཚོར་ལན་སྟབས་བདེ་རེ་བཏབས་ན། བུ་མོ་དེ་བུད་མེད་ཅིག་རེད་ཟེར་ཆོག་ཡང་། མོ་དང་མཉམ་དུ་ཉལ་མཁན་ནང་རང་ལོ་ ༡༣ ཅན་གྱི་བྱིས་པ་འདུག་ལ། དེ་ལྟ་བུའི་བྱིས་པ་བསམ་མེད་ཅིག་ཕྱིར་ཕ་ཡུལ་དུ་ལམ་བར་གྱི་དཀའ་ཁག་དང་། རྒྱ་ལག་ཏུ་མི་འཆོར་བའི་གདེང་ཚོད་མེད་བཞིན་དུ་ཕ་ཡུལ་དུ་སྐྱེལ་རྒྱུ་ཟེར་ན་ལུགས་མཐུན་མ་རེད།

བཙན་བྱོལ་བོད་གཞུང་གིས་ལམ་མཇུག་བྱས་པ་རེད་ཟེར་དུས་ཁོང་ཚོ་རང་རང་གི་འདོད་བློ་བཞིན་ལམ་འཇུག་བྱས་པ་ཞིག་ལ་གོ་དགོས་མོད། ད་བར་བྱིས་པ་ཚོས་ཁ་ནས་ཁོང་ཚོ་ཕྱིར་རང་ཡུལ་དུ་ལོག་འདོད་ཡོད་སྐོར་ཞིག་མ་གོ་བའི་ཐོག ངས་དེ་སྔོན་ནས་དོགས་འདྲི་བྱས་པ་བཞིན་བྱིས་པ་ཚོར་རང་རང་གི་བསམ་ཚུལ་རྗེན་པ་བཤད་རྒྱུའི་གོ་སྐབས་བྱུང་ཡོད་མེད་དེ་རེད།

མཇུག་ཏུ་ངས་རཱ་ལོའི་མིང་ཅན་པོར་རེ་སྐུལ་ཞུ་རྒྱུ་ཞིག་ལ། ངས་ཁྱེད་དང་དངོས་ཡོད་གནས་ཚུལ་གྱི་སྟེང་ནས་བགྲོ་གླེང་ཙམ་བྱེད་འདོད་པ་ལས། དམིགས་འདུན་གཞན་ཅི་ཡང་མེད། གལ་སྲིད་ཁྱོད་ལ་ཐུགས་འདུན་ཡོད་ན་མུ་མཐུད་དེ་བགྲོ་གླེང་བར་བྱ། ཡིན་ནའང་། ང་འདི་ཡང་ཁྱོད་ལྟར་ཅིག་བཤད་རྒྱུར་དགའ་བ་ཙམ་ལས་ཅང་ཤེས་མཁན་ཞིག་མིན་པས། འུ་གཉིས་ཀྱིས་མི་གཞན་གྱི་མིག་མདུན་ནས་མྱིག་ག་ལོས་སྟོན་བསམ་ན་སྐྲག་གི  དེ་ཐུགས་ལ་ཉར་རོགས།