སྤྱི་འཐུས་ཀྱི་སྤུས་ཀ་དང་བྱུང་རིམ། བསྟན་འཛིན་འཇམ་དབྱངས།

རྒྱལ་ཁབ་དང་། མི་རིགས། སྤྱི་སྒེར་གྱི་ཆབ་སྲིད་ཚོགས་པ། མདོར་དེད་ན་ཚོ་ཁག་རེ་རེར་ནས་སྤྱི་འཐུས་འདེམས་སྟངས་ཐད་ཀྱི་སྒྲིག་གཞི་གཅིག་མཚུངས་ཤིག་མེད་ཀྱང་།  སྤྱི་འཐུས་ཀྱི་མཚན་ཉིད་དང་ངོ་བོ་འདོད་ལུགས་ལ་མི་མཐུན་པ་མེད། འུ་ཚོའི་སྤྱི་འཐུས་ནི་ཡུལ་གྱར་བོད་མི་ཡོངས་ཀྱི་ཡིད་ཆེས་དང་མངོན་འདོད་དེ་མི་བུ་རེ་ཟུང་འགས་ཚབ་མཚོན་ཐུབ་པ་དང་འཐུས་གོ་ཆོད་པ་ཞིག་ལ་གོ་དགོས།      

སྤྱི་འཐུས་ཀྱི་སྔ་ཕྱིའི་བྱུང་རིམ་དང་འབྱུང་འགྱུར་བའི་འུ་ཚོའི་སྤྱི་འཐུས་ཀྱི་བྱུང་རིམ་ལ་རྟོག་ཞིབ་བྱེད་མཁན་མི་རེ་ཟུང་བྱུང་ཡོད་ཀྱང་མི་མང་གིས་དོ་སྣང་དེ་ཙམ་བྱེད་ཀྱིན་མི་འདུག 

བཙན་བྱོལ་གཞུང་གི་སྤྱི་འཐུས་སྤུས་གཙང་མི་འདུག་ཅེས་འུ་ཅག་གི་ཆབ་སྲིད་པ་དང་ཉམས་ཞིབ་པ་མང་པོ་ཞིག་བརྒྱུད་ནས་གླེང་གིན་ཡོད།  སྤྱི་འཐུས་ཀྱི་སྤུས་ཀ་ཡག་བཙོག་དེ་གཙོ་བོ་འབྱུང་ཁུངས་ལ་ཐུག་ཡོད་སྙམ།

ད་ལྟའི་ཆར་བཙན་བྱོལ་བོད་མི་མང་གི་སྤྱི་འཐུས་ཡོང་ས་དང་།  འབྱུང་ས།  གཙོ་རྒྱུགས་ཆེ་ཤོས་ཏེ་བརྒྱ་ཆ་བརྒྱད་ཅུ་གྱ་ལྔ་འབྱུང་ཁུངས་གཅིག་ལ་ཐུག་ཡོད། མི་འབོར་ཕོན་ཆེན་ཡོད་པའི་ལུང་ཚན་དང་།  མི་རྒྱུད་དང་། རྩོམ་པ་བོ།  དམིགས་གཏད་ས་འདི་གསུམ་གྱི་ངོས་ནས་བོད་མི་མང་གི་འཐུས་ཚབ་ཀྱི་རྩ་བའི་གནས་གཞི་ལྟ་བུར་གྱུར་འདུག  དབུས་གཙང་གི་སྤྱི་འཐུས་ཡོང་ཁུངས་ལ་གཞིག་ན། སྤྱི་འཐུས་ག་གེ་མོ་རེ་མ་གཏོགས།  གཙོ་རྒྱུགས་ཆེ་ཤོས་དེ་གཙང་དང།  སྟོད་མངའ་རིས་གཉིས་ནས་གདམས་ཐོན་བྱུང་ཡོད། མདོ་སྟོད་ཀྱི་སྤྱི་འཐུས་ཡོང་ས་དེ་མི་རྒྱུད་དང་།  མི་ཚང་ཆེན་པོ་ཁག་དང།  མདོ་སྨད་ནི་རྩོམ་སྒྲིག་པ་དང་རྩོམ་པ་བོ་ཞིག་ཡིན་ཕྱིན་སྤྱི་འཐུས་འོས་གཞི་དང་སྤྱི་འཐུས་ཀྱི་རྐུབ་སྟེགས་ཐོབ་ཀྱི་ཡོད། འབྱུང་ཁུངས་དེ་དག་གི་ནང་ནས་ཀྱང་སྤྱི་འཐུས་ལེགས་པོ་དང་ཡག་པོ་མེད་ཅེས་གཏན་ནས་བཤད་རྒྱུ་མེད་མོད་ཀྱང་། ཡོང་ས་དང་འབྱུང་ཁུངས་གཅིག་ནས་མུ་མཐུད་ནས་འདི་བཞིན་བྱུང་ན།  ལུང་ཚན་དང་། མི་ཚང་ཆེན་པོ། རྩོམ་པ་བོ་དེ་གསུམ་གྱི་ཆ་ཤས་ལེན་རྒྱུ་མེད་པས། ཁྲིམས་ལུགས་དང་། ཆབ་སྲིད། འཐབ་རྩོད་ཀྱི་གཞུང་ལུགས་རྒྱུན་འབྱམས་སུ་གྱུར་ཡོད་པའི་མི་དེ་ཚོའི་རིགས་ལ་སྤྱི་འཐུས་ཀྱི་རྐུབ་སྟེགས་ཐོབ་རྒྱུ་ཧ་ཅང་དཀོན་པོ་རེད་བསམ།           

སྤྱི་འཐུས་ཀྱི་འབྱུང་རྩ་ལ་གཙང་བཤེར་བྱེད་དགོས་ན། ལོ་གང་མང་ཞིག་ལ་སློབ་གསོའི་བྱ་བ་གཉེར་མྱོང་བ། སྤྱི་ཚོགས་སྟེང་གི་བྱ་བ་ཆེ་འབྲིང་ཆུང་གསུམ་ལ་གཞོལ་མྱོང་བ་དང་བྱ་བ་བསྒྲུབས་པའི་སྔ་གཞུག་ཀུན་ཏུ་ལས་རིགས་ཀྱི་རྒྱབ་ལྗོངས་གཙང་བ། རྩོད་ཉོག་ལྷག་མེད་པ། དོགས་གཞི་དང་སྤྱི་སྒེར་གྱི་སྒྲིག་གཞི་ལ་འགལ་ཟླར་སོང་མེད་པ། སྤྱི་སྒེར་གྱི་བྱ་བ་བསྒྲུབ་དུས། ཡུལ་མིའི་ཁྲིམས་ལུགས་དང་ལས་ཁུངས་ཀྱི་སྒྲིག་འཛུགས་སྐྱབས་མགོན་ཏུ་བརྩི་མཁན་ཞིག་ངེས་པར་དུདགོས།                     

དེ་ལས་ལྡོག་སྟེ། འདས་ཟིན་པའི་བྱ་བའི་རྒྱབ་ལྗོངས་མི་གཙང་བ་དང་།  ད་ལྟ་དང་མ་འོངས་པའི་ཐད་ལ་ཁ་མཆུ་དང་ཉོག་དྲ་མང་པོ་ཡོད་པའི་མི་དེ་ཚོ་སྤྱིའི་ རྐུབ་སྟེགས་སླེབས་ན་རང་ཉིད་ཀྱི་ལངས་ཕྱོགས་དང་བསམ་བློའི་དམིགས་འདུན་ལ་གཙོ་ བོ་བཟུང་སྟེ་མདུན་སྐྱོད་བྱ་རྒྱུ་ལས། མི་མང་གི་མངོན་འདོད་ལ་བསམ་གཞིག་གཏོང་གི་མེད་པ་སྔ་གཞུག་སྤྱི་འཐུས་འགས་བྱ་སྤྱོད་ལས་གསལ་ཞིང་དག་པ་ཤེས་རྟོགས་བྱ་ཐུབ།

སྤྱི་འཐུས་སྤུས་གཙང་ཞིག་ལ་འཁྲེང་ཞིང་ཡིད་རྟོན་བྱེད་དགོས་ན། སྤྱིའི་མི་རུ་མ་ཆག་པའི་ཡར་སྔོན་གྱི་བསྒྲུབས་ཟིན་བྱ་བའི་གྲུབ་འབྲས་དང་། བསམ་བློས་རྟོག་ཉུལ་བྱེད་སྟངས། མི་མང་གི་དཀའ་སྡུག་རྨེལ་མཁས་དང་། ལེགས་ཉེས་འབྱེད་ཕྱོགས་ཀྱི་བློ་རིག་ལ་གཡོ་གཟུར་མེད་པ་ཞིག་བཙག་གང་ཐུབ་བྱེད་དགོས། དེ་ཡང་སྐྱོན་ཡོན་གཉིས་ཀྱི་ཕྱོགས་ནས་རྟོག་ཞིབ་བསྲེག་བཅད་བརྡར་གསུམ་བགྱིས་ནས། སྒྲིག་གཞི་དང་། ཚད་འཛིན་ངེས་ཅན་གྱིས་མཐར་མི་མང་གི་རེ་འདུན་ཁེན་ས་བྱ་སའི་མི་ཞིག་བསྐོས་འཇོག་བྱ་རྒྱུ་ཚང་མའི་འོས་འགན་ཉག་གཅིག་ལ་བྲེལ་འདུག                                                        

སྤྱི་མི་དང་། སྒེར་མི་གང་ཡིན་ཀྱང་། ཆབ་སྲིད་པ་ཡིན་ཁུལ་དང་། རྒྱལ་ཁབ་ཤར་ནུབ་ཀྱི་ཆབ་སྲིད་ཀྱི་འཕོ་འགྱུར་ལ་མཁྱེན་རྟོགས་གཏིང་ཟབ་ཡོད་མདོག་ བགྱིས་པའི་མི་བུ་སྐོར་ཅིག་གིས། ཆབ་སྲིད་ཀྱི་ཟབ་སྦྱོང་། བསམ་བློའི་ཟབ་སྦྱོང་། མདོར་དེད་ན་རང་ཁོ་ནའི་མིང་གྲགས་ཀྱིས་ཆེད་དང་། གཡབ་རྒྱུགས་པ་འཚོལ་དོན་ཆེད།  ས་གནས་ཁག་སོ་སོར་ན་འཚོགས་འདུ་སྐོང་ནས་གཞུང་མང་དབར་ལ་སྐྱོན་འདོགས་མཚང་བྲུས་རྐྱེན་གྱིས་འུ་ཅག་ཆབ་སྲིད་ཀྱི་ཁོར་ཡུག་འདི་ལ། ཆབ་སྲིད་ནུས་པ།  གཅིག་སྒྲིལ་གྱི་ནུས་པ། ལྟ་གྲུབ་དང་། ལངས་ཕྱོགས་ཀྱི་ནུས་པའི་ཐད་ལ་སྔོ་ཡག་པོ་ཞིག་སྐྱེ་རུ་བཅུག་མེད། རྒྱུ་རྐྱེན་དེས་རྒྱ་ནག་གིས་ཀྱང་ལག་སྙོབ་བྱེད་ས་དང་། ལག་པ་འབྱིད་ས་རེ་རྙེད་ཀྱིན་ཡོད་པ་འདི་ཚོ་ལ་ཐུག་ཡོད། བསམ་བློ་འདིའི་རིགས་བཅིངས་གྲོལ་མ་ཐོབ་པའི་མི་བུ་དེ་དག་ལ། བཙན་བྱོལ་གཞུང་གི་རྐུབ་སྟེགས་ཡང་དང་བསྐྱར་ཏུ་བརྙེས་ན་ཆབ་སྲིད་ཁོང་བུ་གཅིག་ གྱུར་གྱི་ནུས་པའི་ཐད་ལ་ཐན་པ་མུ་མཐུད་དུ་འཁོར་རྒྱུ་ཡིན་པ་སྨྲས་ག་ལ་དགོས། སྒྲིག་གཞི་དང་། ཁྲིམས་ལུགས་ལ་བརྩི་སྲུང་མི་བྱེད་པའི་མི་བུ་དེ་ཚོའི་རིགས་ཀྱི་མི་མང་གི་བདེ་སྡུག་ལ་ནམ་ཡང་འགན་ཁུར་གཙང་ལེན་བྱ་མི་ཐུབ་ལ།  མི་མང་གི་མངོན་འདོད་དང་འཆར་ཟིན་ལའང་འཐུས་གོ་ནམ་ཡང་མི་ཆོད།

མཐར་གཏུགས་ནས་འཆད་ན་ཤེས་འཇོན་གཉིས་དེ་རྨང་གཞི་ཡིན་ཀྱང་། མི་མང་གི་འཐུས་ཚབ་ཡིན་པའི་ཆ་ནས་སྒྲིག་གཞི་དང་བཅའ་ཁྲིམས་གཉའ་ལ་ཁུར་ནས་འཐབ་རྩོད་འདིའི་ཐད་ནས་རྒྱང་ཤེད་ཤར་བསྐྱོད་ཕེབས་ཐུབ་མཁན་མི་རེ་ཟུང་རེ་ལ་ངེས་པར་དུ་འབད་པ་བརྩོན་དགོས། མཚམས་འདི་ནས་སྤྱི་འཐུས་ཤིག་གི་སྐད་ཆ་འདི་གཟིགས་རོགས།                    

{སྤྱི་འཐུས་གྲོས་ཚོགས་ནང་མ་སླེབས་སྔོན་ལ་ཆོལ་ཁ་དང་ཆོས་ལུགས་ཀྱི་ཕྱོགས་ཞེན་ནམ་ཡང་མི་གླེང་ཞེས་སེམས་ལ་རྒྱུད་དུ་དྲན་གྱི་འདུག་མོད་ཀྱང་། གྲོས་ཚོགས་ནང་ལ་ཐོན་ཚར་བའི་གཞུག་ལ་ཕྱོགས་ཞེན་གྱི་ཉོག་དྲ་ཞིག་མ་གླེང་རང་གླེང་རེད།  ཁྱེད་རང་ཚོ་ལ་དེའི་ཉམས་མྱོང་ད་ལྟ་གང་ཡང་མེད} ཅེས་སྐད་ཆ་འདིའི་དངོས་ཤུགས་ཡོངས་ནས་འུ་ཚོའི་ཆབ་སྲིད་ཀྱི་ནུས་པ་ལ་ད་དུང་ཐན་ པ་ནས་མུན་པ་ཡང་འཐིབས་ཡོད་པ་གསལ་པོར་རྟོགས།