མི་རབས་གསར་བ་ཤི་ནའང་དཔའ་སྐད་ཀྱི་གླུ་སྒྲ་འཇགས་པ་མེད་པར་ཤི་དགོས།
བོན་རྒྱ་བསྟན་འཛིན་རབ་རྒྱས།
ད་ལྟ་ནི་འདྲ་མཉམ་དང་མཛའ་མཐུན་གྱི་དུས་རབས་ཤིག་རེད་ལ། ན་གཞོན་གྱི་གནམ་འོག་ཅིག་ཡང་རེད། གནམ་འོག་འདི་རྒན་རབས་པ་སུས་དོགས་པོར་བཟོས་ན་དེ་ལས་ནག་ཉེས་མེད་ཅེས་བཤད་མི་ཐུབ་ལ། རྒན་རབས་པ་སུས་བདག་གིར་བྱས་ན་དེ་མཁྲེགས་བཟུང་མ་རེད་ཅེས་ཀྱང་བཤད་མི་སྤོབས། ལྷག་པར་ན་གཞོན་གྱི་གནམ་འོག་ནས་རྒན་རབས་པས་ཧམ་སེམས་ཀྱི་ཁ་ཆེན་པོར་གདང་བ་ནི་ཐལ་ཆེས་པ་དང་། གནས་ལུགས་མིན་པ་ནི་ཐག་རིང་པོར་འདང་རྒྱག་དགོས་པ་ཞིག་མ་རེད། ངའི་སེམས་ལ་འདི་ལྟར་དྲན་གྱིན་འདུག དྲན་པ་འདི་བཞིན་གླེང་ཕོད་པ་ནི་ངའི་སྙིང་སྟོབས་ཤིག་ཡིན་ལ། གླེང་དགོས་པ་དེའང་རྩོམ་པ་པོའི་འགན་འཁྲི་ཡིན་ནོ། །
༡༽ འཁྲབ་སྟོན་སྙིང་རྗེ་བོ་དེ་ཀུན་པོ་ན་བཟའ་སེར་བོ་ཅན་གྱི་མཚོན་ཆ་ཤ་སྟག་རེད།
ཁ་གསལ་བོའི་བཤད་ན། “གཞོན་པའི་ཤེད་ལས་རྒན་པའི་ཇུས་བཟང་” ་ཟེར་བ་དང་། “ཉམས་མྱོང་ཉམས་མྱོང་”ཟེར་བའི་ཚིག་འདི་དག་ནི་རྒན་རབས་པའི་དབང་ཤུགས་རྟག་བརྟན་དུ་བྱེད་པའི་བསླུ་བྲིད་ཀྱི་ལག་ཆ་འབའ་ཞིག་རེད་ལ། བཀའ་ཁྲི་ལས་སྤྱི་འཐུས་གལ་ཆེ་བ་དང་། བཀའ་ཁྲི་ལས་བཀའ་བློན་གལ་ཆེ་བ། “ཕོ་རབ་གཅིག་གི་བློ་རྩེ་ལས་ཕོ་འབྲིང་གསུམ་གྱི་གྲོས་ཁ་ལེགས་པ”ཟེར་བ་སོགས་ནི་མང་ཚོགས་བསླུ་བྲིད་གཏོང་བྱེད་ཀྱི་གཡོ་ཚིག་འབའ་ཞིག་རེད། མི་རབས་གསར་བ་འབུར་འཇོམས་བྱེད་སྤྱད་ཀྱི་ན་བཟའ་སེར་བོ་ཅན་གྱི་མཚོན་ཆ་འབའ་ཞིག་རེད། ད་དུང་བློ་བཟང་སེང་གེ་ཁྲིམས་ཞིབ་པར་འོས་ལུགས་དང་། སྟག་འདྲ་གཟིག་འདྲ་ཤིན་ཏུ་མང་ལུགས་སོགས་ནི་མི་མང་གི་འོས་ཁ་འཐོར་དང་། བསམ་བློ་ཐེ་ཚོམ་ཅན་དུ་བྱེད་སྤྱད་ཀྱི་ཆབ་སྲིད་པའི་འཁྲབ་སྟོན་ཤ་སྟག་རེད། འདི་དག་གིས་འདི་ལྟར་ཞི་འཇམ་གྱི་འཁྲབ་སྟོན་སྙིང་རྗེ་ཞིང་བླ་སྲོག་གཏོར་བ་ཤ་སྟག་འཁྲབ་ནས། ཤེས་རྨོངས་དང་གོ་རྟོགས་མ་སད་པའི་མི་རིགས་ཤིག་རྩེད་སྤྱད་བྱེད་ཀྱིན་ཡོད། ཡིན་ནའང་། ད་ལྟ་ནི་གནམ་འོག་འདི་ན་གཞོན་གྱི་གནམ་འོག་དང་། དུས་རབས་འདི་རྟོགས་སད་ཀྱི་དུས་རབས་ཤིག་ལ་སླེབས་ཚར་བས། བོད་མི་རིགས་ཚོའང་ལོ་རེ་བཞིན་རྟོགས་སད་དང་རང་རྟོན་གྱི་འདུ་ཤེས་སྐྱེ་བཞིན་ཡོད་པས་སྐྱུག་བྲོ་བའི་འཁྲབ་སྟོན་དེ་འདྲར་ས་མིག་གཏན་ནས་མེད་པ་མ་ཟད། རྙིང་ཞེན་མཁྲེགས་བཟུང་དང་། དབང་ཤུགས་འཕྲོག་རྩོད། གོ་ས་བསླུ་འཛིན་སོགས་ནི་ང་ཚོ་མི་རབས་གསར་བས་བློ་ཐག་རྦད་བཅད་ཀྱིས་འཐབ་མོ་བྱེད་ས་ཤ་སྟག་ཡིན་པས། གཉིད་མ་ཁུགས་པར་རྨི་ལམ་སྐྱིད་པོ་མ་གཏོང་རོགས། དེ་ལས་འཁྲབ་སྟོན་མཚམས་འཇོག་དང་། དུས་རབས་ངོས་ལེན། ན་གཞོན་ལ་རྩིས་སྤྲོད་བཅས་བྱས་ན་གནམ་འོག་འདིའི་ལུགས་དང་མཐུན་པ་དང་། དུས་རབས་འདིའི་འགྲོས་དང་མཐུན་པ་རེད་ལ། ང་ཚོས་ཀྱང་ཁྱེད་ཅག་གི་འཇོན་ཐང་དང་བཀའ་དྲིན་ལ་ནམ་ཡིན་རུང་བརྩི་འཇོག་བྱེད་ངེས་པ་ཡིན།
༢༽ བཀའ་ཤག་ལ་ལྷན་པོ་རྒྱག་གི་ཡིན་ནམ། གྲོས་ཚོགས་ལ་ཞིག་གསོ་བྱེད་རྒྱུ་ཡིན།
“ལོ་ཆེ་ན་སྙིང་ཆུང་བ་དང་སྙིང་ཆུང་ན་ལམ་མེད་པ་”སོགས་ནི་ཆོས་ཉིད་ཀྱི་འཕེལ་རིམ་ལྡོག་ཏུ་མེད་པ་ཞིག་རེད་ལ། འགྱུར་བ་དེ་ཁྱེད་ཅག་རྒན་རབས་པའི་སྟེང་ནས་ཀྱང་མངོན་སུམ་དུ་མཐོང་ཐུབ་ཀྱི་འདུག དཔེར་ན། བོད་ཀྱི་རྩ་དོན་འཐབ་རྩོད་ཀྱི་འགྲིབ་རིམ་ཐད་ལ་བསམ་བློ་ཞིག་ཐོངས་དང་། ༸གོང་ས་མཆོག་གི་ཐུགས་རྗེ་དབྱིངས་དཔྱད་ཀྱིས་ཞི་བའི་དོན་ཚན་ལྔ་དང་སི་ཊ་སི་སྦག་གི་གསུང་བཤད་གནང་བ་རེད། དེ་བཞིན་རྒྱལ་སྤྱིའི་འགྱུར་བ་དང་། རྒྱ་བོད་ཀྱི་གནས་བབ། ༸གོང་ས་མཆོག་གི་རླབས་ཆེ་བའི་དགོངས་བཞེད་ཀུན་ཁྱབ་སེམས་ཁུར་བཅས་ཀྱི་རྒྱབ་རི་དང་རྨང་གཞི་བྱས་པ་ལས་དབུ་མའི་ལམ་གྱི་སྲིད་བྱུས་བྱུང་བ་རེད། ཡིན་ནའང་། ད་ལྟ་ནི་མངོན་པར་གསལ་ལ་མི་གསལ་བའི་སྒོ་ནས་དབུ་མའི་ལམ་གྱི་རྣམ་པ་ཡོངས་སུ་འགྱུར་ཏེ། རིག་གནས་རང་སྐྱོང་ཙམ་ཞིག་གི་ངོ་བོར་གྱུར་བ་མ་ཟད། རྒྱ་དམར་གྱི་རྩ་ཁྲིམས་འོག་ལ་འཛུལ་རྒྱུ་ཡིན་ལུགས་དང་། རྒྱ་དམར་གཞུང་གི་བདག་དབང་དང་ས་ཁོངས་གཅིག་གྱུར་ཟེར་བ་ལ་ཆ་འཇོག་ཡོད་ལུགས་ཀྱི་སྐད་ཆ་ཉམས་དམའ་བ་མང་པོ་གཉའ་ཞུམ་ཞུམ་གྱིས་ཤོར་གྱིན་ཡོད། འདི་ལྟར་ང་ཚོ་ལོ་རེ་ནས་ལོ་རེ་བཞིན་དཔའ་ཇེ་ཞུམ་དང་སྙིང་ཇེ་ཆུང་ལ་སོང་ནས་ང་ཚོའི་འཐབ་རྩོད་ལ་རྒས་རྟགས་ཤིག་ཁད་ཀྱིས་མངོན་པ་མ་ཟད། ད་ལྟ་ནི་དབུ་མའི་ལམ་གྱི་འགྲེལ་བཤད་ཐེངས་དང་པོ་སི་ཊ་སི་སྦག་གི་གསུང་བཤད་རྩིས་མེད་བཏང་བ་མ་ཟད། དེབ་ཆུང་དམར་རིལ་མ་ལའང་འགྱུར་བ་གཏོང་དགོས་པའི་གནས་བབ་ཞིག་ལ་འགྱུར་བཞིན་ཡོད། དོན་དངོས་སུ་འདི་དག་ཅི་ཞིག་རེད། འདི་ནི་ཁྱེད་བཀའ་ཤག་གིས་ལག་པས་བྲིས་པ་རྐང་པས་བསུབ་པ་མ་རེད་དམ། ཁྱེད་ཅག་ལོ་དང་ནམ་ཚོད་ཀྱིས་ཐུབ་སྟེ་སེམས་ཁ་ཇེ་གཉོམ་དང་། སེམས་ཁུར་ཇེ་ཆེར་ཕྱིན་ནས་སྙིང་སྟོབས་དང་དཔའ་སྤོབས་ཀྱིས་འདང་གིན་མེད་པ་ལས་བོད་ཀྱི་སྟོབས་ཤུགས་ཇེ་གཉོམ་ལ་གྱུར་བ་གཏན་ནས་མིན། རྒྱ་ནག་གིས་ཚུར་འཇིགས་སྐུལ་མ་བྱས། རེ་བ་མ་བཏོན་པར་ང་ཚོ་རང་ངོས་ནས་༸གོང་ས་མཆོག་གི་ཐུགས་རྗེ་དབྱིངས་དཔྱད་ཀྱི་གསུང་བཤད་གལ་ཆེན་ཞི་བའི་དོན་ཚན་ལྔ་ནི་སྔོན་འགྲོའི་འཆར་སྣང་ཙམ་ལས་དབུ་མའི་ལམ་ལ་འབྲེལ་བ་མེད་ལུགས་དང་། སི་ཊ་སི་སྦག་གི་གསུང་བཤད་ནི་རང་བཞིན་གྱིས་ནུས་མེད་ལ་གྱུར་ཏེ་དུས་ལས་ཡོལ་ལུགས་སོགས་ཅིའི་ཕྱིར་གླེང་གིན་ཡོད། ངས་བལྟས་ན་སི་ཊ་སི་སྦག་གི་གསུང་བཤད་དུས་ལས་ཡོལ་ཏེ་རྒས་པ་མ་ཡིན་པར་ཁྱེད་ཅག་རྒས་སོང་བ་ཡིན་པར་འདོད། ད་དུང་དབུ་མའི་ལམ་ནི་ལོ་༢༥༠ཡར་སྔོན་ནས་རྩ་བ་ཚུགས་པའི་གླེང་མོལ་གནང་གིན་ཡོད། འདི་དག་ནི་ཅི་ཞིག་རེད། བསམ་བཞིན་མང་ཚོགས་མགོ་རྨོངས་པར་བྱེད་ཀྱིན་ཡོད་དམ། ད་ནི་ཁྱེད་ཅག་གིས་མང་ཚོགས་རྒྱབ་ཤེད་དུ་ཁུར་ནས་་༸གོང་ས་མཆོག་དབུ་སྐོར་གཏོང་སྟངས་དང་། ༧གོང་ས་མཆོག་རྒྱབ་ཤེད་དུ་ཁུར་ནས་མང་ཚོགས་མགོ་སྐོར་གཏོང་ལུགས་ཀྱི་འཁྲབ་སྟོན་དེ་དག་ལ་སེམས་བསམ་པའི་གཏིང་ནས་སུན་གྱིན་འདུག ཟ་མ་ཞིག་ལ་དཔེ་བླངས་ནས་བཤད་ནའང་དུས་ལས་ཡོལ་དུས་ད་དུང་ཟོས་ན་གྲོད་ཁོག་ན་གི་རེད། ཚེ་སྲོག་ལའང་སྡང་གི་རེད། དེ་ནི་དུས་ལས་ཡོལ་བའི་ཉེས་བྱས་རེད། གནས་ལུགས་འདི་གང་ལ་སྦྱར་ནའང་འགྲིག་གི་རེད།
སྤྱིར་བཏང་མི་རྒས་སོང་ན་སྙིང་ཇེ་ཆུང་ལ་འགྲོ་བ་ནི་ཁྱེད་ཅག་གཅིག་པུའི་སྐྱོན་མིན་པར་འགྲོ་བ་མི་སྤྱིའི་མི་སྤུས་ཀྱི་འགྱུར་བ་ཞིག་རེད་ལ། བོད་ཀྱི་ངག་རྒྱུན་སྡོམ་ཚིག་ཁྲོད་ནའང་”བྱིས་པ་དབང་ལོག་དང་། ལོ་ལོན་ཧོན་ལོག་”ཅེས་ཚད་གཞི་ཏག་ཏག་གཏན་འབེབས་བྱས་ཡོད། ད་དུང་རྒྱ་དཔོན་མའོ་ཙེ་ཏུང་ཡང་རྒས་ཁོག་ཆགས་དུས་རང་གི་ལངས་ཕྱོགས་བརྟན་སྲུང་བྱེད་མ་ཐུབ་པར་འགལ་ཟླའི་ཚིག་མང་དུ་ཤོར་ཡོད། དེའི་རྐྱེན་གྱིས་གུང་ཁྲན་ཏང་གིས་”མའོ་ཙེ་ཏུང་ལོ་ལོན་དུས་ཀྱི་སྐད་ཆ་མའོ་ཙེ་ཏུང་གི་སྐད་ཆ་མིན་”ཞེས་བཤད་དགོས་བྱུང་བ་རེད། འདི་ལྟ་བུས་ཀྱང་ལོ་རྒས་དུས་རང་གི་སྙིང་སྟོབས་རྒྱུན་འཁྱོངས་བྱེད་ཐུབ་ཀྱི་མེད་ན། གཞན་དག་ལྟ་ཅི་སྨྲོས་རེད། ཡིན་ནའང་། སྐྱེས་སྟོབས་ཀྱི་ལང་ཚོ་དང་རྣམ་དཔྱོད་ཀྱི་བློ་གྲོས་དར་བའི་མི་རབས་གསར་བ་ཡོད་བཞིན་དུ་བོད་ཀྱི་རྩ་དོན་འཐབ་རྩོད་ལ་རྒས་རྟགས་ཤར་ན་གཏན་ནས་མི་འགྲིག ཁྱེད་ཅག་གིས་ཀྱང་ལོ་དང་ནམ་ཚོད་ལ་རྩིས་བརྒྱབ་ནས་དུས་ཚོད་ལ་བསྟུན་རྒྱུ་ཧ་ཅང་གལ་ཆེན་པོ་རེད། རྒྱ་ཆེའི་མང་ཚོགས་ཀྱིས་ཀྱང་ཆོལ་ཞེན་དང་། རྙིང་ཞེན། བརྒྱུད་བསྐུལ་བཅས་ཀྱི་གཡོ་ཆེན་པོ་གསུམ་གྱི་འོག་ཏུ་མི་ཚུད་པར། མི་རེ་རེ་བཞིན་རང་ཉིད་ཀྱི་འོོས་ཤོག་ནི་རང་ཉིད་གཅིག་པུ་ཙམ་མིན་པར། མ་མཐའ་ཡང་གཞིས་ལུས་སྤུན་ཟླ་ ༦༠ རེའི་(6000000/100000=60)ཚབ་བྱས་ནས་འོས་འཕེན་གྱིན་ཡོད་པའི་ཁོག་རྩིས་ངོས་ཟིན་པར་བྱས་ནས་འོས་འཕེན་དགོས་པ་ཡིན།
འུ་ཚང་གི་རྒས་ཀོག་ཚོས་ཁ་ནས་མི་རབས་གསར་བ་དགའ་རབས་དང་། གཞོན་སྐྱེས་ཚོས་འགན་ཁུར་དགོས་རབས་བཤད་ཀྱིན་བཤད་ཀྱིན། འཇོན་ཐང་ཅན་གྱི་མི་རབས་གསར་བ་བློ་བཟང་སེང་གེ་ལྟ་བུ་ཡར་ལངས་ནའང་ཉམས་མྱོང་མེད་རབས་དང་། མི་འོས་མི་འགྲིག་རབས་ཀྱི་འབུར་འཇོམས་བྱེད་ཀྱིན་ཡོད་པ་རེད། ཁྱེད་ཅག་གི་ཕྱི་ནང་གཉིས་ལྡན་གྱི་སྐད་ཆ་དེ་དག་ནི་ཆབ་སྲིད་ཀྱི་སྐད་ཆ་ཟེར་བ་ཡིན་རྒྱུ་རེད་དེ། བདག་གིས་བྱིས་པའི་ལབ་བརྡོལ་འབའ་ཞིག་ལས་གཞན་དུ་མཐོང་གི་མི་འདུག མང་ཚོགས་ཀྱིས་ཀྱང་སྐད་ཆ་འདིའི་རིགས་ལ་ངེས་པར་དུ་གཟབ་དགོས་པའི་རིགས་ཡིན། ད་ལོར་ཡང་བཀའ་ཁྲི་རྒས་ཀོག་ཅིག་ལས་མ་རྙེད་ན༸གོང་ས་མཆོག་གིས་ཀྱང་ཟམ་གདོང་རིན་པོ་ཆེ་བསྐྱར་འདེམས་སྐབས་ཀྱི་གསུང་ཚིག་དེ་འདྲ་ཞིག་འབྱོན་སྲིད་པ་རེད་ལ། ང་ཚོས་ཀྱང་སྔར་གྱི་དགུང་ན་བགྲེས་པའི་བཀའ་ཤག་དང་རང་ཚུགས་མེད་པའི་གྲོས་ཚོགས་ར་བར་ཞིག་གསོ་ཆུང་ཆུང་ཞིག་དང་། ལྷན་པ་ཐེབས་ཆག་ཅིག་བརྒྱབ་པ་ཙམ་ལས་ཅི་ཡང་འཇོན་མེད་པ་ཡིན་ནོ། །
༣༽མི་སྤུས་ཀྱི་སྣང་བ་མཐོ་བའི་བཀའ་ཁྲི་ཞིག་འཚོལ་དགོས།
བྱ་བ་གང་ཞིག་སྒྲུབ་ནའང་འགྱུར་བ་མེད་པའི་ཆོད་སེམས་དང་སྙིང་སྟོབས་ནི་རྩ་བའི་ས་བོན་ཡིན་ལ། ས་བོན་དེའི་ལང་ཚོ་ཇི་ཙམ་དར་ན་དེ་མཐུན་གྱི་འབྲས་བུ་དུས་སུ་སྨིན་པ་ནི་ལྡོག་ཏུ་མེད་པའི་རྒྱུ་འབྲས་ཀྱི་ཆོས་ཉིད་ཅིག་རེད། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་ལྡོག་པར་ནུས། །ཞེས་པ་བཞིན། དེ་ནི་ང་ཚོའི་མི་ཐོག་འདི་ནས་བལྟས་ནའང་ཤིན་ཏུ་གསལ་བོ་རེད།
ཁྱེད་རྒན་རབས་པ་རྣམས་ལོ་ཤིན་ཏུ་གཞོན་དུས། རྒྱ་གར་ནས་ས་དང་གནམ་ལས་སུ་གང་ངོ་མི་ཤེས་ཤིང་། ཐ་ན་རྒྱ་གར་སྐད་དུ། ཨེ་ཀི། རྡོ། ཏུན་ཙམ་ཡང་ཟེར་ཤེས་ཀྱི་མེད་པའི་སྐབས་སུ། ཁྱེད་ཅག་གིས་ན་གཞོན་གྱི་སྣང་བ་སྙིང་སྟོབས་ཀྱིས་ངོམ་ནས་མཛའ་མཐུན་གྱི་ལག་རྡང་སྦྲེལ་ཏེ། བོད་རང་བཙན་སླར་གསོའི་རྩ་དོན་རྩོད་ལེན་བྱེད་རྒྱུར་གནས་མཆོག་རྡོ་རྗེ་གདན་དུ་མནའ་གན་མཐུ་མོ་ཆེ་བཞག་སྟེ་ཡར་ལངས་པ་རེད། སྔོན་གྱི་སྐུ་དྲག་ལམ་ལུགས་རྩད་རྫོགས་ཀྱིས་བོད་གཞུང་དེ་ཆོས་སྲིད་གཉིས་ལྡན་བོད་མང་གཙོའི་སྲིད་གཞུང་དུ་བསྒྱུར་བ་དང་། “ྋགོང་ས་མཆོག་དང་བཀའ་ཤག་གང་དུ་ཡོད་ས་དེར་བོད་རྒྱ་ཆེའི་མི་མང་གིས་བོད་གཞུང་ཡིན་པར་ངོས་ལེན་བྱེད་ཀྱི་ཡོད་པ་རེད་”ཅེས་གྲོས་མཐུན་དོན་ཚན་བཅུ་བདུན་རྩིས་མེད་ཀྱི་གསར་འགོད་བསྒྲགས་གཏམ་སྤེལ་བ་རེད། དེ་དུས་ཀྱི་ཁྱེད་ཅག་ནི་ང་ཚོས་སྨོན་ཡུལ་གྱི་ཁྱེད་ཅག་ཡིན་ལ། མི་རབས་གསར་བའི་སྙིང་སྟོབས་ཅན་གྱི་ཁྱེད་ཅག་ཡིན། དེ་དུས་ཀྱི་ཁྱེད་ཅག་ལ་ང་ངོ་མཚར་བཞིན་ཡོད། དེ་དུས་ཀྱི་ཁྱོད་ཚོ་ཡང་ད་སྐབས་ཀྱི་ཁྱོད་ཚོ་བཞིན་གནས་ཡུལ་རྒྱལ་ཁབ་ཀྱིས་འདུག་གི་འཇུག་མིན་ལ་སྐྲག་མཁན། རྒྱལ་སྤྱིའི་སྤྱི་ཚོགས་ཀྱིས་རྒྱབ་སྐྱོར་ཡོང་མིན་ལ་སྐྲག་མཁན། རྒྱ་དམར་གཞུང་གིས་ཁས་ལེན་མིན་ལ་སྐྲག་མཁན། ཚེ་ཐོག་འདིར་བོད་ཀྱིན་བདེན་མཐའ་སེལ་མིན་ལ་སེམས་ཁྲལ་གནང་མཁན་ཞེ་གཅིག་ཡིན་ཚེ། ད་ལྟའི་བཙན་བྱོལ་གཞུང་འདི་འདྲའི་ཚགས་ཚུད་ཅན་ཞིག་ཕར་ཞོག། རང་རང་གི་ལྟོ་རྒྱབ་ཙམ་ཡང་འགྲུབ་ཡོད་མེད་དོགས་པའི་གནས་ཡིན། དེའི་ཕྱིར། ཡ་གིའི་ལྷ་ལ་འཕོག་དོགས་དང་མ་གིའི་ཀླུ་ལ་གནོད་དོགས་ཀྱི་སྙིང་ཆུང་བྱིའུ་རྟུག་ཙམ་ཞིག་གིས་བོད་ཀྱི་རྩ་དོན་ག་ལ་རྩོད་དེ་གཏན་ནས་རྩོད་མི་ཐུབ་པོ། །དེས་ན་ང་ཚོ་ལ་དགོས་པའི་བཀའ་ཁྲི་ནི། ཡར་མར་དྲུག་གསུམ་བཅོ་བརྒྱད་ལ་དོགས་པ་དང་སེམས་ཁུར་ཅན་གྱི་བཀའ་ཁྲི་སྙིང་ཆུང་དེ་རིགས་མིན་པར། ཐག་གཅོད་ཀྱི་སྙིང་སྟོབས་དང་མི་སྤུས་ཀྱི་སྣང་བ་མཐོན་པོ་ཅན་གྱི་བཀའ་ཁྲི་ན་གཞོན་ཞིག་དགོས་པ་ཡིན།
༤༽ རྒྱ་བོད་ཀྱི་སྟོབས་ཤུགས་བསྡུར་ནས་བལྟས་ནའང་ང་ཚོ་སྡར་སྐད་ཤོར་དགོས་དོན་མི་འདུག
ང་ཚོ་ལ་འཚེ་བ་མེད་པའི་སྟོབས་ཤུགས། བདེན་པའི་སྟོབས་ཤུགས། ནང་བ་གཤེན་རབ་པ་དང་སངས་རྒྱས་པའི་ཆོས་ལུགས་ཀྱི་སྟོབས་ཤུགས། ༸གོང་ས་མཆོག་གི་དབུ་ཁྲིད་པའི་སྟོབས་ཤུགས། གཞིས་ལུས་རྒྱ་ཆེ་མི་མང་གི་ཞུམ་པ་མེད་པའི་རིགས་ཞེན་གྱི་སྟོབས་ཤུགས། རྒྱལ་སྤྱིའི་རྒྱབ་སྐྱོར་དང་རོགས་ཚོགས་ཀྱི་སྟོབས་ཤུགས། བཙན་བྱོལ་བོད་མི་འཇོན་ཐང་ཅན་རྒྱལ་ཁབ་གང་སར་ཁྱབ་པའི་སྟོབས་ཤུགས། མང་གཙོ་དང་ཆོས་སྲིད་གཉིས་ལྡན་གྱི་གཞུང་ཚད་ལྡན་དང་བཅས་པའི་སྟོབས་ཤུགས། རིག་གཞུང་རྩ་ལག་དང་བཅས་པ་སྲུང་སྐྱོབ་ཀྱི་ཁོར་ཡུག་ཕུན་སུམ་ཚོགས་པའི་སྟོབས་ཤུགས། ངེས་དོན་གྱི་ཉམས་མྱོང་དང་འཇོན་ཐང་གཉིས་ལྡན་གྱི་རྒན་རབས་པ་ཞལ་བཞུགས་པའི་སྟོབས་ཤུགས། རེ་བ་ཅན་གྱི་གཞོན་སྐྱེས་ཁྱུ་ཚོགས་ཤིག་ང་རྒྱལ་གྱིས་ཡར་ལངས་ཀྱིན་པའི་སྟོབས་ཤུགས། འཛམ་གླིང་ཁོར་ཡུག་སྲུང་སྐྱོབ་ཀྱི་གལ་ཆེའི་ཁོར་ཡུག་ལ་གྱུར་བའི་སྟོབས་ཤུགས་སོགས་བཙན་བྱོལ་བ་སུ་ལའང་མེད་པའི་སྟོབས་ཤུགས་སྣ་མང་ཞིག་ང་ཚོ་ལ་འཛོམས་ཡོད་པས། ང་ཚོ་རྒྱུ་མཚན་མེད་པར་སྡར་སྐད་ཤོར་དོན་ཞིག་གཏན་ནས་མེད་དོ། །ང་ཚོས་མེས་པོ་སྟག་འདྲ་གཟིག་འདྲ་དག་གི་བླ་སྒུལ་མི་ཉན། རེ་བ་དང་ཁ་ཆེམས་རླུང་ལ་སྐུར་མི་ཉན།
དུར་ཐང་ན་སྤྱན་མིག་ཅེར་རེར་གཟིགས་པའི་རྒྱལ་གཅེས་དཔའ་བོ་དཔའ་མོ་དག་གི་ཟུངས་ཁྲག་གི་རིན་ཐང་ལ་ངོས་ཟིན་ཟབ་མོ་གནང་དགོས། ཁོང་ཚོས་གཅེས་པའི་སྲོག་དོར་ནས། དགའ་བའི་གྲོགས་བཞག་ནས། བརྩེ་བའི་གཉེན་བསྐྱུར་ནས་ཅིའི་ཕྱིར་བཞུད་པ་རེད། འདི་དག་ནི་ང་ཚོས་ཉིན་མཚན་མེད་པར་རང་ཉིད་ལ་གཏོང་དགོས་པའི་དྲི་བ་ཤ་སྟག་ཡིན། ང་ཚོས་ངེས་པར་དུ་ལོ་རྒྱུས་ལ་འགན་ཁུར་དགོས། དེང་སྐབས་རྒྱ་གུང་ཁྲན་ཏང་སྟོབས་ཆེན་གྱི་རྒྱལ་ཁབ་ཀྱི་གྲས་ན་ཡོད་པ་ཤིན་ཏུ་བདེན་ཚོད་རེད་དེ། ཁོ་ཚོའི་སྟོབས་ཤུགས་ནི་ཉམས་རྒུད་དང་འཇིགས་ཉེན་གྱི་གནས་བབ་ན་ཡོད་པའང་ཧ་ཅང་གསལ་བོ་རེད།
ཁོ་ཚོའི་སྟོབས་ཤུགས་ནི་དམག་གི་སྟོབས་ཤུགས་དང་། དཔལ་འབྱོར་གྱི་སྟོབས་ཤུགས། མི་མང་གི་སྟོབས་ཤུགས་བཅས་རེད། དམག་ཤུགས་ནི་དུས་རབས་དང་མིའི་ཤེས་རབ་ཀྱི་འཕེལ་རིམ་གྱིས་རྫོགས་ཚིག་འབྲི་ལ་ཉེ་བས་ཚེ་ཐག་རིང་བོར་གནས་ཐུབ་རྩ་བ་ནས་མེད། གཉིས་པ་ནི་དཔལ་འབྱོར་གྱི་སྟོབས་ཤུགས་རེད། དེ་ཡང་ཚོང་འབྲེལ་གྱི་འཁོར་རྒྱུག་ཆེ་བ་དང་། དེ་ནི་གཙོ་བོ་རྒྱ་མིའི་ཅ་ལག་གི་རིན་གོང་སླ་བ་དང་རྣམ་པ་མཛེས་པ་གཉིས་ལ་ཐུག་ཡོད་མོད། རྒྱ་ནག་གི་ཅ་ལག་ལ་རྣམ་པ་ལས་སྤུས་ཀ་མེད་པ་དང་། སྒོར་གྱི་འདུ་སྒོ་ལས་མི་སེར་གྱི་ཁེ་ཕན་གཙོ་བོར་བཟུང་མེད་པ་ཕྱི་གསལ་ནང་གསལ་ལ་གྱུར་ནས། དེང་སང་རྒྱལ་སྤྱིའི་སྤྱི་ཚོགས་སྟེང་རྒྱ་ནག་གི་ཅ་ལག་ཟེར་དུས་རྣམ་རྟོག་ལངས་ས་ཞིག་དང་། ཡིད་ཆད་ཀྱིས་སྣ་གཉེར་བྱེད་ས་ཞིག་ལ་འགྱུར་བཞིན་ཡོད་པ་མ་ཟད། རྒྱལ་ཁབ་ཁ་ཤས་ནང་རྒྱ་མིའི་ཅ་ལག་ཉོ་ཚོང་གཏན་འགོག་གི་ལས་འགུལ་རྩོམ་བཞིན་པའང་གོ་རྒྱུ་འདུག་པས། མི་རིང་བར་རྒྱ་མིའི་དཔལ་འབྱོར་སྟོབས་ཤུགས་ཀྱང་ཉམས་རྨས་སུ་འགྲོ་རྒྱུ་ཡིན་པ་ནི་གཏན་འཁེལ་ཐུབ་པ་ཞིག་རེད། གསུམ་པ་ནི་མི་མང་གི་སྟོབས་ཤུགས་རེད། དེ་ཡང་མི་རིང་བར་ཉམས་རྨས་སུ་འགྲོ་བ་ནི་གཏན་འཁེལ་བ་ཞིག་རེད། དེང་སང་མིའི་རིགས་ཀྱི་རྣམ་དཔྱོད་དར་བའི་རྩེ་མོར་སོན་པའི་སྐབས་ཡིན་ལ། གནས་བབ་འདི་འདྲ་ཞིག་ལ་མི་མང་དུང་ཕྱུར་མང་པོའི་མིག་བཀབ་ནས། ཐ་ན་དྲ་བ་ལས་འཛམ་གླིང་གི་འདྲ་རིས་ཙམ་ཡང་མཐོང་གི་མ་བཅུགས་པར་བཀག་ནས་ཡོད་པ་རེད། དུས་རབས་འདི་འདྲ་ཞིག་ལ་སྲིད་བྱུས་འདི་འདྲ་རྒྱུན་བསྲིང་འདོད་པ་ནི་རྨི་ལམ་ཁོ་ན་ཡིན་ལ། དེ་ལྟར་གྱི་རྟགས་མཚན་ཡང་མང་དུ་མངོན་གྱིན་ཡོད། ༸གོང་ས་མཆོག་གིས་རྒྱ་ནག་མི་མང་ལ་རེ་བ་གནང་གི་ཡོད་ལུགས་གསུངས་ཀྱིན་པའང་། རྒྱ་རིགས་མི་མང་ངེས་པར་དུ་གོ་རྟོགས་སད་རྒྱུ་ཡིན་པ་ལ་དགོངས་ཀྱིན་ཡོད་པ་རེད། དེའི་ཕྱིར་རྒྱ་བོད་གཉིས་ཀྱི་སྟོབས་ཤུགས་ཀྱི་རྒྱུ་སྤུས་དང་ནུས་ཤུགས་ལ་བལྟས་ན་བོད་པའི་སྟོབས་ཤུགས་བརྟན་པོ་དང་ནུས་ལྡན་ཡིན་པ་ཧ་ཅང་གསལ་བོ་རེད། དེའི་ཕྱིར། ཕྱོགས་གང་ནས་བལྟས་ནའང་ད་ལྟ་ནི་ང་ཚོ་སྡར་སྐད་ཤོར་དགོས་པའི་གནས་བབ་ཅིག་གཏན་ནས་མ་རེད། དེ་ལས་ལྡོག་སྟེ་རེ་བ་དང་སྙིང་སྟོབས་ཀྱིས་ཡར་ལངས་པའི་དུས་ཚོད་ཅིག་རེད། ཡིན་ནའང་། ད་ལྟ་ང་ཚོས་ངེས་པར་དུ་གཟབ་དགོས་པ་ཞིག་ནི་༸གོང་ས་མཆོག་གིས་དབུ་ཁྲིད་པའི་སྟོབས་ཤུགས་དང་། ངེས་དོན་གྱི་ཉམས་མྱོང་དང་འཇོན་ཐང་གཉིས་ལྡན་གྱི་རྒན་རབས་པ་ཞལ་བཞུགས་པའི་སྟོབས་ཤུགས་འདི་གཉིས་རྒྱུན་རིང་ལོངས་སྤྱོད་ཀྱི་བསོད་བདེ་ཡོད་མེད་ནི་བཤད་དཀའ་བ་ཞིག་རེད། དེའི་ཕྱིར་ཉམས་མྱོང་རྩིས་ལེན་ཧ་ཅང་གལ་ཆེན་ལ་གྱུར་ཡོད། ཁོང་དག་གི་གསེར་ཞལ་དངོས་སུ་བཞུགས་པའི་སྐབས་དང་བསྟུན་ནས་མི་རབས་གསར་བའི་བཀའ་ཁྲི་ཞིག་གསོ་སྐྱོང་བྱེད་རྒྱུ་ཆེས་གལ་ཆེ་བའི་རང་བཞིན་ལ་གྱུར་ཡོད། མི་རྒན་ཚོས་རྙིང་ཞེན་བརྒྱུད་སྐུལ་དང་མི་མང་ཆོལ་ཞེན་གྱི་དབང་དུ་མི་འགྲོ་བར་བཀའ་ཁྲི་ན་གཞོན་ཞིག་འཚོལ་རྒྱུ་ནི་ཁ་ཚ་དགོས་གཏུགས་ཀི་འགན་འཁྲི་ལྡོག་ཏུ་མེད་པ་དེ་ཡིན་ནོ། །
༥༽ ཡར་ལོངས་ཤོགས། བདག་གི་མི་རབས་གསར་བ།
བདག་གི་མི་རབས་གསར་བ། ཡར་ལོངས་ཤོགས། ད་ལྟ་ནི་ན་གཞོན་གྱི་གནམ་འོག་ལས། ཀླད་རྙིང་མཁྲེགས་བཟུང་གི་གནམ་འོག་གཏན་ནས་མིན། འདྲ་མཉམ་དང་རང་དབང་གི་གནམ་འོག་ལས། རྙིང་ཞེན་དང་བག་འཁུམ་གྱི་གནམ་འོག་གཏན་ནས་མིན། ང་ཚོས་རུལ་སུངས་ཀི་བསམ་བློ་དང་། བག་འཁུམ་གྱི་བསམ་བློ། ཆོལ་དཀྲུག་གི་བསམ་བློ། རྗེས་ལུས་ཀྱི་འདུ་ཤེས་དང་། རང་དམན་གྱི་འདུ་ཤེས་དག་གི་ངན་འཚང་བརྗོད་དགོས། ང་ཚོར་བདག་ཉིད་ལ་ཡིད་ཆེས་ཀྱི་བསམ་བློ་དང་། སྙིང་སྟོབས་ཀྱི་སྤོབས་པ་དགོས་པ་ཡིན། མི་རབས་གསར་བ་ནི་ནམ་ཡང་གསར་བ་ཡིན་དགོས་པ་ལས། གཏན་ནས་རྙིང་བར་འགྱུར་མི་རུང་། མི་རབས་གསར་བ་གསོན་ནའང་ང་རྒྱལ་གྱི་སྣང་བ་ར་རྩེར་ཁུར་ནས་གསོན་དགོས་ལ། མི་རབས་གསར་བ་ཤི་ནའང་དཔའ་སྐད་ཀྱི་གླུ་སྒྲ་འཇགས་པ་མེད་པར་ཤི་དགོས། ཡར་ལོངས་ཤོགས། བདག་གི་མི་རབས་གསར་བ། འབྲོང་རྒོད་ཟས་སུ་བྱ་བའི་སྲིན་པོ་མི་རིགས་ཤིག་འདི་ལྟར་གོ་མེད་གྲགས་མེད་དུ་ཤི་ན་ག་ལ་འགྲིག རྐྱང་རྒོད་བཞོན་པར་བཏུལ་བའི་དཔའ་བོའི་གདུང་རྒྱུད་ཅིག། འདི་ལྟར་ཤེས་མེད་ཚོར་མེད་དུ་འགྱེལ་ན་ག་ལ་འགྲིག
ཡར་ལོངས་ཤོགས། བདག་གི་མི་རབས་གསར་བ། མེས་པོའི་བླ་མ་སྒུལ་བར་ཡར་ལོངས་ཤོགས།
ཡར་ལོངས་ཤོགས། བདག་གི་མི་རབས་གསར་བ། ན་ཟླར་མཚང་མ་འཇོག་པར་ཡར་ལོངས་ཤོགས།
ཁྱེད་ཉིད་ཀྱི་འབོད་སྐུལ་དང་བརྗོད་དོན་ལ་དགའ་བསུ་ཞུ།
ཕྱིར་རྟོགས།་འདུ་ཤེས་ཆེ་ཙམ་སྲིང་སའི་རྒལ་སྟེགས
ཕུན་ཚོགས་ལགས། ངས་ཁྱེད་ལ་བོད་སྐད་ཀྱི་ཚབ་བྱས་ནས་མིང་གསར་པ་འདི་དག་གསར་བཟོ་བྱས་པར་ཐུགས་རྗེ་ཆེ་ཞུས་པ་ཡིན། ཡིན་ནའང་མིང་འགྲེལ་ཞིག་ཡོད་པར་མཁྱེན་ཞུས་པ་ཡིན། དེ་མེད་ན་ངོ་མ་སུན་སྣང་སྐྱེས་ཀྱིན་འདུག
ཕྱིར་རྟོགས།་ འདུ་ཤེས་ཆེ་ཙམ་སྲིང་སའི་རྒལ་སྟེགས་
ཕུན་ཚོགས་ལགས། ངས་ཁྱེད་ལ་བོད་སྐད་ཀྱི་ཚབ་བྱས་ནས་མིང་གསར་པ་འདི་དག་གསར་བཟོ་བྱས་པར་ཐུགས་རྗེ་ཆེ་ཞུས་པ་ཡིན། ཡིན་ནའང་མིང་འགྲེལ་ཞིག་ཡོད་པར་མཁྱེན་ཞུས་པ་ཡིན། དེ་མེད་ན་ངོ་མ་སུན་སྣང་སྐྱེས་ཀྱིན་འདུག
འདི་ནི་སུ་ཞིག་ལ་དད་པ་ཡོད་མེད་དང་།་སུ་ཞིག་དད་ལོག་ཡིན་མིན་ཀྱི་གནས་ཚུལ་ཐག་གཅོད་བྱེད་ས་ཞིག་ཏུ་འགྱུར་དགོས་རྒྱུ་དེ་མ་ཡིན་པར།དངོས་ཡོད་དང་གནས་ལུགས།ལོ་རྒྱུས་དང་ཕྱིར་རྟོགས།དཀྱེལ་ཡང་དང་དཔྱད་སྟོབས་ཀྱི་འདུ་ཤེས་ཆེ་ཙམ་སྲིང་སའི་རྒལ་སྟེགས་ཆེན་པོ་ཞིག་ཏུ་གྱུར་ན་འགྲིག་པ་དེ་ཡིན།
སྙིང་རྗེ། བླ་རྒན། བླ་རྒན་ཀླད་རྙིང་ཞིག་གིས་བསམ་བློ་གསར་བ་བཤད་ཤེས་ནི་མ་རེད། དེ་གཅིག་ཡིན། མི་རབས་གསར་བ་གསོན་ནའང་ང་རྒྱལ་གྱི་སྣང་བ་ར་རྩེར་ཁུར་ནས་གསོན་དགོས་ལ། མི་རབས་གསར་བ་ཤི་ནའང་དཔའ་སྐད་ཀྱི་གླུ་སྒྲ་འཇགས་པ་མེད་པར་ཤི་དགོས། ཞེས་པ་འདི་ནི་ཤར་དུང་རི་ལས་ཟུར་རྐུ་བྱས་པ་ཡིན་ལྟ་བུ་ཞིག་ཀྱང་མི་འབྲི་བ་དང་ཚིག་སྔ་ཕྱི་ཐོད་མི་ཐུག་པ་སོགས་ལ་བལྟས་ན། མི་རབས་གསར་བ་ནི་མགོ་ཆག་གི་ཁ་བསླ་བསླ་བྱེད་མཁན་ཞིག་ཡིན་ས་རེད། ཁྱེད་ཀྱི་ཚིག་བསྒྲིགས་འདི་དག་མགོ་ནས་མཇུག་བར་དུ་བཀླགས་ན་ནང་དོན་གཅིག་འདུག་པ་སྟེ། ཡར་ལངས་ནས་རྒྱུགས་ཡ་ཞེས་པ་འདི་མ་གཏོགས་ཅི་ཡང་མི་འདུག འདི་ལྟ་བུའི་ཀླད་རྙིང་ཡིན་ལ་བྱིས་པ་ཡང་ཡིན་པའི་བསྒྲགས་གཏམ་ཞིག་ཡོད་ནི་མ་རེད། ཁྱེད་ཀྱི་ཚིག་བསྒྲིགས་སྟངས་ལ་ཁྱད་ཆོས་འབུར་ཏུ་ཐོན་པ་ཞིག་ཡོད་པ་ནི་མི་ཤེས་ཤེས་ཁུལ་གྱི་ཧོལ་རྒྱུག ཨ་འདྲོགས་སྐྱ་འདྲོགས་ཀྱི་འུར་ཤོམས། ཤི་ཡང་ནོར་འཁྲུལ་ངོས་ལེན་མེད་པའི་གླེན་རྟགས་བཅས་རེད། འདི་དག་བསྒྱུར་པ་ཡིན་ན་ཚིག་སྒྲིག་ནས་རྩོམ་ཡིག་གི་ལམ་ལ་རེ་བ་བྱས་ན་འགྲིག་གི་རེད། ངོ་མ་ཡིན། སེམས་ཤུགས་བཅགས་པ་མིན་ལ་ཆག་སའང་མ་རེད།
““ལོ་ཆེ་ན་སྙིང་ཆུང་བ་དང་སྙིང་ཆུང་ན་ལམ་མེད་པ་”སོགས་ནི་ཆོས་ཉིད་ཀྱི་འཕེལ་རིམ་ལྡོག་ཏུ་མེད་པ་ཞིག་རེད་ལ། འགྱུར་བ་དེ་ཁྱེད་ཅག་རྒན་རབས་པའི་སྟེང་ནས་ཀྱང་མངོན་སུམ་དུ་མཐོང་ཐུབ་ཀྱི་འདུག”ཅེས་དང།
“སྤྱིར་བཏང་མི་རྒས་སོང་ན་སྙིང་ཇེ་ཆུང་ལ་འགྲོ་བ་ནི་ཁྱེད་ཅག་གཅིག་པུའི་སྐྱོན་མིན་པར་འགྲོ་བ་མི་སྤྱིའི་མི་སྤུས་ཀྱི་འགྱུར་བ་ཞིག་རེད་ལ། བོད་ཀྱི་ངག་རྒྱུན་སྡོམ་ཚིག་ཁྲོད་ནའང་”བྱིས་པ་དབང་ལོག་དང་། ལོ་ལོན་ཧོན་ལོག་”ཅེས་ཚད་གཞི་ཏག་ཏག་གཏན་འབེབས་བྱས་ཡོད།”
“སྐྱེས་སྟོབས་ཀྱི་ལང་ཚོ་དང་རྣམ་དཔྱོད་ཀྱི་བློ་གྲོས་དར་བའི་མི་རབས་གསར་བ་ཡོད་བཞིན་དུ་བོད་ཀྱི་རྩ་དོན་འཐབ་རྩོད་ལ་རྒས་རྟགས་ཤར་ན་གཏན་ནས་མི་འགྲིག ཁྱེད་ཅག་གིས་ཀྱང་ལོ་དང་ནམ་ཚོད་ལ་རྩིས་བརྒྱབ་ནས་དུས་ཚོད་ལ་བསྟུན་རྒྱུ་ཧ་ཅང་གལ་ཆེན་པོ་རེད།”
གོང་གི་འདི་དག་ཀྱང་བསམ་བློ་ཁོ་ནའི་ཁྱད་པར་ཞིག་འབྱེད་ཀྱི་རྒྱུ་མཚན་ཡིན་ནམ། ངས་བལྟས་ན་ཁྱོད་ཀྱིས་རང་གིས་བྲིས་པ་དེ་ཚོ་ཡང་བསྐྱར་གཅིག་བཀླག་ན་བཟང། ད་དུང་མའོ་ཙེ་ཏུང་དཔེ་མཚོན་ལ་བཞག་ནས་ཧོན་ལོག་གི་དོན་གསལ་བཤད་བྱས་ཡོད། དེ་བདེན་པ་རེད། འོན་ཀྱང་བཙན་བྱོལ་ནང་ལ་དེ་འདྲའི་དབང་འཛིན་པ་ཧོན་ལོག་ཡོད་དམ། ཁྱོད་ཀྱིས་གཟས་ས་དེ་བཀའ་ཁྲི་ཟམ་གདོང་རིན་པོ་ཆེ་ཚང་ཡིན་ན་དེ་ཧོན་ལོག་ཡིན་ཚུལ་གཅིག་ཤོད་དང།
ཡང་། ” “ལོ་ཆེ་ན་སྙིང་ཆུང་བ་དང་སྙིང་ཆུང་ན་ལམ་མེད་པ་”སོགས་ནི་ཆོས་ཉིད་ཀྱི་འཕེལ་རིམ་ལྡོག་ཏུ་མེད་པ་ཞིག་རེད་ལ། འགྱུར་བ་དེ་ཁྱེད་ཅག་རྒན་རབས་པའི་སྟེང་ནས་ཀྱང་མངོན་སུམ་དུ་མཐོང་ཐུབ་ཀྱི་འདུག”ཅེས་དང།” མི་རབས་གསར་བ་ནི་ནམ་ཡང་གསར་བ་ཡིན་དགོས་པ་ལས། གཏན་ནས་རྙིང་བར་འགྱུར་མི་རུང”ཟེར། འོ་ན་ཁྱོད་ཅག་ལོ་ལོན་རྒྱུ་ཡོད་དམ། ཡོད་ན་འགྱུར་རྒྱུ་ཡོད་དམ། ཁྱོད་ཀྱིས་”ཁྱེད་ཅག་གི་ཕྱི་ནང་གཉིས་ལྡན་གྱི་སྐད་ཆ་དེ་དག་ནི་ཆབ་སྲིད་ཀྱི་སྐད་ཆ་ཟེར་བ་ཡིན་རྒྱུ་རེད་དེ། བདག་གིས་བྱིས་པའི་ལབ་བརྡོལ་འབའ་ཞིག་ལས་གཞན་དུ་མཐོང་གི་མི་འདུག”ཅེས་པ་འདི་ཕྱིར་ཁྱོད་རང་ཉིད་ལ་བཤད་ན་འོས།
མི་རབས་གསར་བས་དྲང་བདེན་གྱི་ཐོག་ནས་དཔྱད་གཏམ་བརྗོད་གལ་ཆེ། ནོར་བ་སུ་ལའང་ཡོང་སྲིད་པས་ཡོ་བསྲང་བྱ་མིན་ནི་ཀུན་སྤྱོད་ཀྱི་ཚད་གཞི་ཁོ་ན་ཡིན།
བོན་རྒྱ་བའི་བསྒྲགས་གཏམ་གཉིས་ཀར་བཤད་རྒྱུ་ཞིག་མེད་ཀི། རྩོམ་མགོ་འཛིན་ཚུལ་དང་། ཚིག་སྦྱོར་སྤེལ་སྟངས་གང་གི་ཆ་ནས་ཀྱང་མི་རབས་གསར་བ་ཞིག་གི་བསྒྲགས་གཏམ་ལེ་ཡིན་འདོད་ཀི། ཕོ་སར་གྱི་སྣང་བ་དང་གཡག་སར་གྱི་རྭ་རྩེ་ཧ་ཅང་ངོམ་ཡོད་ཀི། དེའི་སྟབས་ཀྱིས་སྣང་བ་མི་འགྲོ་ནི་ཡང་ཡོད་ཚོད་རེད་དེ། ཅི་ཁག མི་སུམ་ཅུར་བསམ་པ་སུམ་ཅུ། མཛོ་སུམ་ཅུར་རྭ་ཁ་དྲུག་ཅུ་རེད། འོན་ཀྱང་སྣང་བ་དེའི་ཚོད་ཀྱི་དཔའ་ཅུང་ཟད་ཞུམ་ཐལ། དེ་སྣང་བ་འགྲོ་མ་སོང་། དངོས་གནས་ཡིན། བཤད་སྟངས་མ་འདྲ་བ་ཙམ་མ་གཏོགས་མི་རབས་གསར་བའི་ནང་ན་བགྲེས་པོ་དང་། མི་རབས་རྙིང་བའི་ནང་ན་ན་གཞོན་ཡོད་ན་འབབ་ས་གཅིག་པ་རེད། བསྒྲགས་གཏམ་གྱི་དགོས་པ་ཡང་འགྲུབ་ས་མ་རེད། ༢༠༡༡ལོའི་བཀའ་བློན་ཁྲི་བ་དང་སྤྱི་འཐུས་ཚོ་ན་གཞོན་རྐྱང་རྐྱང་ལ་རེ་བ་རྒྱག་གི་མི་འདུག་གཱ རྩོམ་གྱི་རྒྱུ་སྤུས་ལ་ལྟ་བཞིན་ཡོད་ཡིག་ནོར་ལ་རང་གིས་གཟབ་གཟབ་བྱོས་དང་། རྩོམ་སྒྲིག་པ་དཀའ་ལས་ལ་གཏད་དོན་མེད་ཀ རྩོམ་ཡོང་ན་ཡིག་ནོར་ལས་སླ་བོ་རེད་དཱ།
ད་སྐོར་ལོག་མོ་བཤད།
ཚེ་རིང་སྒྲོལ་མའི་མིང་ལ་དོན་འགྲུབ་སྒྲོལ་མ་བཏགས་ཀྱང་མི་གཞན་པ་ཞིག་ཏུ་འགྱུར་ཐུབ་ནི་མ་རེད། འདི་ནི་ཁྱོད་ཀྱི་རྩོམ་ཉོག་འདི་ལ་བལྟས་བའི་འཆར་སྣང་ཡིན།
ངའི་རྩོམ་སྔ་ཕྱི་གཉིས་ཀྱི་ནང་ནས་མི་རབས་གསར་བར་གོ་བ་ལོན་མེད་མཁན་ཚོར་གསལ་བཤད་བྱ་རྒྱུ་ཞིག་ལ།
མི་རབས་གསར་བ་ཟེར་བ་ལ་ལོ་ཚོད་ཀྱི་ཆ་ནས་མི་རབས་གསར་བ་ཡིན་ལ་བསམ་བློའི་ཆ་ནས་མི་རབས་གསར་བ་མ་ཡིན་པ། བསམ་བློའི་ཆ་ནས་མི་རབས་གསར་བ་ཡིན་ལ་ལོ་ཚོད་ཀྱི་ཆ་ནས་མི་རབས་གསར་བ་མ་ཡིན་པ། བསམ་བློ་དང་ལོ་ཚོད་གཉིས་ཐད་ནས་མི་རབས་གསར་བ་ཡིན་པ། གཉིས་ཐད་ནས་མི་རབས་གསར་བ་མ་ཡིན་པ་བཅས་མུ་བཞི་བཞག་ན་འགྲིག་གི་རེད།
ཁ་སང་ངས་མི་རབས་གསར་བ་ཡར་བཞེངས་སྟངས་དེ་སྙིང་སྟོབས་དང་། རང་སྣང་། དྲང་ཚུགས་སོགས་ཀྱི་ཆ་ནས་ཡར་ལངས་དགོས་པ་རེད་ཅེས་བསམ་བློའི་སྐོར་ཤ་སྟག་ནས་བཤད་ཡོད་མོད། དེ་ལ་གོ་བ་ལོན་ཡོད་པ་མ་རེད། མ་གཞི་ནས་ཁྱོད་ཚོ་ལ་རྒྱུན་ཤེས་འདི་ཙམ་ཞིག་དང་། རིགས་པ་འདི་ཙམ་ཞིག གོ་བ་འདི་ཙམ་ཞིག་ཡང་འཁོར་ཐུབ་གི་མེད་ན་ཕལ་ཆེར་འུ་ཚོ་བགྲོ་གླེང་ཐག་ཉེ་མོ་ཞིག་ཡོད་ཁེགས་པོ་རེད། ཡིན་ནའང་། སེམས་ཤུགས་མ་ཆག་པར་ཨུ་ཚུགས་ཀྱིས་ཕེབས་པ་ལ་དགའ་ཡོད།
རེད་རེད། ང་ཚོར་ངེས་པར་དུ་དགོས་པ་ནི་བོན་རྒྱ་ལགས་ཀྱིས་བཤད་པ་ལྟར་མི་རབས་གསར་བའི་དཔུང་ཁག་ཅིག་དང་། དེའི་སྒུར་ཤུགས་ཤིག་ངེས་པར་དུ་དགོས་གི་འདུག། དེ་ཡང་འཀའ་ཁྲི་གཅིག་བུར་ཐུགས་མེད་ལ་། འཀའ་ཁྲི་གཅིག་བུས་བསྒྲུབ་ཐུབ་པ་ཅིག་ཀྱང་རྩད་ནས་མ་རེད་། གཞུང་གི་སྲིད་འཛིན་ལས་མི། དགོན་པའི་སྒྲིག་ལམ་དོ་དམ་པ། དེ་བཞིན་མི་རིགས་ཀྱི་བླ་སྲོག་བཟོ་བསྐྲུན་དུ་འབོད་པའི་དགེ་རྒན་སོགས་ཕྱོགས་ཡོངས་ནས་གྲ་སྒྲིག་བྱེད་རྒྲུ་གལ་ཆེན་པོ་རེད།
ག་སྲིད་བློ་བཟང་སང་གེ་མི་རབས་གསར་བ་རེད་ཟེར་ནས་འཀའ་ཁྲི་ལ་འདེམས་པའི་དབང་དུ་བཏང་ཡང་འུ་ཚང་གི་རྒས་འཁོགས་ཀྱི་དཀྱིལ་འཁོར་དེ་ནས་བསྟུན་ཤས་འགྲོ་ཤས་བྱས་དུས་ཚོད་བསྐྱེལ་པ་མ་གཏོགས། ཁོས་མང་བོ་ཞིག་ལ་བརྒྱབ་འགལ་དང་། དགའ་རབས་ཤིག་ལ་ཐོད་བརྒལ་བྱ་རྒྱ་རེད་བསམ་ན་ཕལ་ཆེར་ནོར་གི་ཡོད་རེད་བསམ་གི ངས་ཁོང་གི་གཏམ་བཤད་ཤ་ཤས་ལ་ཉན་ནས་བསམ་ཚུལ་ཞིག་བྱུང་ནི་ཁོང་ཅི་འདྲའི་མི་འགོ་བདེ་ཞིག་རེད་ཨང་བསམ་པ་བྱུང་།
གོང་གི་རྩོམ་ཡིག་ལས་ཨ་ཁུ་བོན་རྒྱའི་འོག་གི་གསལ་འདི་ཁ་གསལ་བོ་དང་ཡག་པོར་མཐོང་སོང་། ཧ་ཧ་ཧ། རྩེད་མོ་ཡིན། ཨ་ཁུ་བོན་རྒྱས་བཤད་པ་ལྟར་རང་གིས་འོས་གཞི་ཞིག་བཏོན་པ་གཞན་གྱི་འོས་གཞིར་དམའ་འབེབས་རེད་ཟེར་ས་མི་འགྲོ དེ་གསལ་བཤད་གནང་བ་ཤིན་ཏུ་བཟང་།
ཁ་སང་ཁྱོད་ཀྱི་མི་རབས་གསར་བའི་བསྒྲགས་གཏམ་ནང་ལ་ལ་རྒས་ཀྱི་ཉི་མ་ཞེས་རྒན་རབས་དང་མི་རབས་གསར་བ་དེ་ལོ་ནའི་ཁྱད་པར་གྱིས་ཕྱེས་ཏེ་ངར་ངར་བཤད་ཡོད་ལ། འདིར་ཡང་དེ་ལྟར་བཤད་ཡོད། ཀློག་མཁན་ཚང་མས་དེ་ལྟར་གོ་ཡོད། འོན་ཀྱང་ད་ཡང་མཆན་ནང་ལ་མི་རབས་གསར་བ་ཟེར་བ་དེ་བསམ་བློའི་ཆ་ནས་བཤད་པ་ཡིན་ཚུལ་ཟེར། མི་རབས་གསར་བའི་བསྒྲགས་གཏམ་སྤེལ་མཁན་ཞིག་འདི་ལྟར་འགྱུར་སླ་བོ་དང་གཏད་སོ་མེད་པ་ཞིག་ཡིན་ན་ད་མི་རབས་གསར་བ་ཡང་ཚར་འདུག ངས་བལྟས་ན་ཁྱོད་ཀྱིས་གློ་བུར་བའི་འཆར་སྣང་རེ་འུད་ཀྱིས་སྒྲོག་བཞིན་པ་ཞིག་ལས་སྤྱི་ཚོགས་ཤེས་ཤིང་ལྟ་བའི་རྐང་ཚུགས་ནས་བརྗོད་མཁན་ཞིག་མ་རེད། ཁྱོད་ཀྱིས་སྐུ་ཞབས་བློ་བཟང་སེང་གེ་ལགས་ཡར་འགྱོག་རྒྱུ་ལས་མར་འདྲུད་ཉེན་འདུག རྗེས་མ་ནས་སྐད་ཆ་སོམས་ལ་ཤོད། རྩམ་པ་ལྡོད་ལ་མིད། འདི་ངས་གཞིས་ལུས་མི་དམངས་ཀྱི་ཚབ་བྱས་ནས་སྤུན་ཟླ་ལགས་ལ་ཁ་བརྡ་ཞིག་བྱས་པ་ཡིན།
ཕོ་རྒོད་པོ་ཨ་ཁུ་བོན་རྒྱ་བསྟན་འཛིན་རབ་རྒྱས་ལགས་ཁྱེད་ཀྱི་བསམ་བློ་གཏང་ནས་ འགན་ཞིག་འཁྱེར་ནས་སྐད་ཆ་བཤད་འདུག་རྒྱབ་སྐྱོར་ཡོད་ ཁྱེད་དང་ང་དང་ ང་ཚོའི་ བསམ་པ་ལྷུན་གྱི་སྒྲུབ་པར་སྨོན་།
དྲ་གྲོགས་རྣམས་ལ་གསལ་བོར་བཤད་འདོད་པའི་དོན་ཚན་དྲུག
༡༽ བརྩེ་བའི་དྲ་གྲོགས་རྣམ་པ་ལགས། རྩོམ་ཡིག་འདི་གཉིས་གླེང་སྐབས༸གོང་ས་མཆོག་ཆོས་ཅན་ལ་ཁྱེར་ནས་མ་འོངས་རོགས། འདི་ཞུ་བ་ཡིན་ལ་རེ་བའང་ཡིན། རྒྱུ་མཚན་ནི། གོང་ས་མཆོག་དང་ཁྱེད་རྒན་རབས་པ་རྣམས་རྩ་བ་ནས་འདྲ་གི་མ་རེད། ༸གོང་ས་མཆོག་སྐྱེས་པ་ནས་བཟུང་བོད་ཁ་བ་ཅན་གྱི་ལྷ་མི་གཉིས་ཀྱིས་སྐུ་དབང་དེ་ཁོང་ལ་ཕུལ་ཚར་བ་ཞིག་རེད། ཁོང་གིས་ངེས་པར་དུ་ཆོས་སྲིད་གཉིས་ཀྱི་དབུ་ཁྲིད་དགོས་པ་རེད། དེ་ལྟར་མ་གནང་བ་ཡིན་ན་ཐད་ཀར་བཤད་ན་རྒྱུ་འབྲས་ལ་རུང་གི་མ་རེད། ཁོང་གི་སྐུ་དབང་ལ་འགྱུར་བ་གཏོང་མིན་དེ་བོད་ཁ་བ་ཅན་གྱི་ལྷ་མི་གཉིས་དང་། དེའང་དོན་གྱི་བདག་པོ་གཞིས་ལུས་རྒྱ་ཆེའི་མི་མང་གིས་ལྟ་དགོས་པ་ཞིག་ལས། ང་ཚོ་བཙན་བྱོལ་བ་ཚོ་ཕར་ཞོགས། དབང་ཚད་དེ་༸གོང་ས་མཆོག་ཁོང་ལའང་ཡོད་པ་མ་རེད། དེའི་ཕྱིར་ཆེས་དམིགས་བསལ་གྱི་ཡུལ་རེད། དེའི་ཕྱིར་ངའི་རྩོམ་ཡིག་ཁག་གིས་༸གོང་ས་མཆོག་ལ་ཅི་ཡང་བཤད་ཀྱིན་མེད་ལ། ཡོད་རབས་ཟེར་བ་དག་གིས་ང་ལ་བསྙོན་འཛུགས་ཀྱིན་ཡོད། ད་དུང་ཚུར་རིགས་སྒྲུབ་བྱས་ནས་བཤད་རྒྱུ་ཡིན་དང་བཤད་ཀི་འདུག་ཟེར་ན་ཁྱོད་ཚོས་ལྟོས། ང་རང་གིས་མ་བསགས་པའི་ཉེས་པར་གཏན་ནས་མི་སྐྲག
༢༽ མི་རབས་རྒན་པ་འདི་རེད་ཅེས་ཆོས་ཅན་ལ་འཛུགས་དགོས་དོན་མེད་ཀི། ད་དུང་ངས་འདི་ལ་བཤད་ཀི་ཡོད་དང་། དེ་ལ་བཤད་ཀི་ཡོད་ཅེས་ཁྱོད་ཚོ་ར་སྤྲོད་དགོས་དོན་ནི་དེ་བས་ཀྱང་ཡོད་ནི་མ་རེད། ངས་དེ་ལྟར་བཤད་ས་ཁྱོད་ཚོ་ཡིན་ནི་མ་རེད་ལ། ང་ལ་འདྲི་མཁན་ཡང་ཁྱོད་ཚོ་ཡིན་མ་རེད། དེ་ཤེས་པ་གནང་རོགས།
༣༽ མི་རབས་གསར་བ་ནི་མཐའ་གཅིག་ཏུ་ལོ་ཚོད་ཀྱིས་ངོས་བཟུང་ན་འགྲིག་ནི་མ་རེད། ལོ་ཉི་ཤུ་ནང་གི་ཕོ་གསར་རྒན་ཞེན་ཅན་དག་ལོ་ཚོད་ཀྱི་ཆ་ནས་མི་རབས་གསར་བ་ཡིན་ནའང་མི་རབས་གསར་བའི་སྙིང་སྟོབས་དང་སྣང་བ་ཡོད་ནི་མ་རེད་ དེའི་ཕྱིར་རྒན་རབས་པ་རེད། དེ་དག་ལ་རྙིང་ཞེན་དང་བག་འཁུམས་ཀྱི་བསམ་བློ་ཡོད་པ་རེད། དེ་དག་ནི་ཆེས་སྡུག་ཤོས་ཚེ་ཐག་རིང་ཤོས་ཀྱི་རྒན་རབས་པ་རེད། ངས་འདི་རུ་མི་རབས་གསར་བ་ཟེར་བ་ནི་གཙོ་བོ་བསམ་བློ་ཞིག་བཤད་ཀྱིན་ཡོད། བསམ་བློ་དེ་ནི་བག་མི་འཁུམ་པའི་སྙིང་སྟོབས་ཤིག་དང་། ཡིད་ཆེས་ཀྱི་རང་རྟོན་འདུ་ཤེས་ཤིག་བཤད་ཀྱིན་ཡོད། དེ་གཉིས་ནི་གཙོ་བོ་ཡིན། ལོ་བགྲེས་ནའང་གཞོན་པའི་སྙིང་སྟོབས་དང་རང་རྟོན་འདུ་ཤེས། འགྱུར་བ་ལ་ངོས་ལེན་ཡོད་མཁན་དག་ནི་ནམ་ ཡང་མི་རབས་གསར་བ་ཡིན་ནི་རེད།
༤༽ བདག་གིས་གཞན་གྱི་འོས་མི་དག་ལ་སྐྱོན་རྒྱག་དང་དེ་ནི་དེ་ལ་མི་འོས་པ་དང་འདི་ལ་འོས་པ་སོགས་ཀྱི་སྐད་ཆ་སྔར་ཡང་བཤད་མེད་ལ་མ་འོངས་པར་ཡང་བཤད་རྒྱུ་མིན། དྲ་གྲོགས་བསྟན་འཛིན་ཚེ་དཔག་གིས་བཤད་པ་བཞིན། ཚང་མས་གོ་བ་ཡག་ཕྱོགས་དང་བསམ་བློ་དྲང་ཕྱོགས་ནས་གཏོང་ཐུབ་ན། མི་རབས་གསར་བ་ཞིག་ཧ་ཅང་གལ་ཆེན་ཡིན་ནི་རེད།
༥༽ བདག་གིས་བློ་བཟང་སེང་གེ་བདམས་རོགས་ཞེས་བཤད་དོན་ནི། གཙོ་བོ་ཁོང་གི་སྙིང་སྟོབས་དང་འགྲན་སེམས་ཀྱི་འདུ་ཤེས་དེས་ཡིད་འཕྲོག་པ་ཡིན་ལ། རྒྱལ་སྤྱིའི་སྤྱི་ཚོགས་དང་དམར་པོ་རྒྱ་ཡིས་བལྟས་ནའང་རེད་བསམ་པ་ཞིག་དང་། ངོམ་ཆོག་པ་ཞིག་ལ་ཁོང་ལས་ལྷག་ཅིག་མེད་པ་ནི་དངོས་ཡོད་ཡིན་པས་བདག་གིས་ཁོང་བདམས་པ་ཡིན། ཡིན་ནའང་ཁོང་ལ་ཐོབ་མི་ཐོབ་ཟེར་བ་ནི། རྒན་རབས་པ་རྣམས་དྲང་ཕྱོགས་ལ་བུད་མ་བུད་དང་རྒན་རབས་པས་མི་རིགས་ལ་བསམ་བློ་བཏང་མ་བཏང་གི་ཐག་གཅོད་ཅིག་རེད། དེའི་ཕྱིར་བདག་གིས་ད་ལོ་ཁྱེད་རྒན་རབས་པ་རྣམས་ཀྱི་དྲང་ཚུགས་ཀྱི་བསམ་བློ་དང་མི་རིགས་ཀྱི་བསམ་བློར་ལྟད་མོར་བལྟས་ནས་འདུག་རྒྱུ་ཡིན།
༦༽ བདག་གིས་བསྒྲགས་གཏམ་སྤེལ་བ་ལས་གཏོར་མ་བརྡབས་པ་མ་རེད། དེའི ཕྱིར་ཁྱོད་ཚོ་དེ་ཙམ་སྐྲག་དགོས་པ་མ་རེད། བསྒྲགས་གཏམ་ལས་རང་ཉིད་ཀྱིས་ཅིག་བྱེད་པ་གལ་ཆེན་རེད་ཟེར་བ་དག་ལ་ཤིན་ཏུ་བདེན་པ་རེད་ཅེས་ཞུ་བ་དང་ལྷན་དུ། གཞན་གྱི་དམོད་མགོར་བུད་ནས་བྲིས་པའི་རྩོམ་འདི་དག་ཆ་ཚང་ངས་ཅིག་བྱས་པའི་ཁུལ་ཡིན། ཞོགས་དུང་ཡང་ཉིས་སྟོང་བརྒྱད་ལོར་སྒོ་ཁར་བུད་ཡོད་ནི་མ་རེད། མདོར་ན། རྩོམ་པ་པོར་གནས་ལུགས་དྲང་ཐད་ནས་རྩོམ་འབྲི་བ་ལས་གཞན་དུ་བྱེད་རྒྱུ་ཞིག་ཡོད་ནི་མ་རེད། དེ་ལྟར་ཐུགས་ལ་འཛིན་རོགས།
ཕྱོགས་ཡོངས་ལ་བསམ་བློ་ཞིབ་ཙམ་བཏང་མཐར་བཀའ་ཁྲིའི་འོས་མི་གསུམ་རྙེད་པ་ནི་
༡ བཀྲས་མཐོང་བསྟན་རྣམ།
༢ ཚོགས་གཙོ་སྤེན་པ་ཚེ་རིང་།
༣ མཁས་དབང་བློ་བཟང་སེང་གེ་བཅས་ཡིན།
ངས་ཆོལ་ཁ་རེ་ནས་རེ་རེ་ཡོང་དགོས་པའི་ལྟ་ཚུལ་མ་བཟུང་བར་གོང་གི་མི་སྣ་འདེམས་པ་ཡིན་ཡང་། རང་བཞིན་གྱིས་ཆོལ་ཁ་རེ་རེ་ནས་མི་རེ་སླེབས་འདུག་པ་དེ་ཡང་འགྲིག་རྟགས་ཤིག་ཡིན་སྲིད། གང་ལྟར་ཁོང་རྣམས་སྔོན་འགྲོའི་འོས་གཞིར་སླེབས་པ་བྱས་ནས་མཐར་མི་མང་ལ་ཁོ་ཚོས་གཏམ་བཤད་པ་དང་མི་མང་གིས་ཁོང་ཚོའི་ལོ་རྒྱུས་བཀླགས་པ་སོགས་བརྒྱུད་ནས་དངོས་གཞིའི་འོས་བསྡུ་ཆེན་མོའི་རྒྱལ་ཁ་འགྲན་རྕོད་བྱེད་དགོས་གལ་ཆེ།
ད་སྔོན་བཀོད་པའི་མཆན་ནང་ལའང་ཡིག་ནོར་ཤོར་འདུག འདི་ནི་ཕལ་ཆེར་རྒན་པ་རྣམས་དང་རྒན་ཞེན་པ་རྣམས་ལ་གུས་མེད་ཀྱི་ཚིག་མང་པོ་ཤོར་སོང་བའི་ཆ་ནས་ཡིན་རྒྱུ་རེད། དགོངས་དག། རྗེས་མ་ནས་ཚིག་ཁ་ཇེ་འཇམ་ལ་ཨེ་ཐོངས་འབད་པ་བྱེད་ངེས་ཡིན། ཡིན་ནོར་ལ་སྔར་ནས་གཟབ་ཀྱིན་ཡོད་ནའང་། མཚམས་རེར་མི་ཤེས་ཀི། མཚམས་རེར་མི་རིག་གི། མཚམས་རེར་གཉན་པོ་རྣམས་ཀྱིས་གཉན་མངགས་ནས་བལྟས་བལྟས་ལ་ཤོར་འགྲོ་གི། གང་ལྟར་དགོངས་དག
ཚང་མ་ཀློག་ཚར། ཀློག་ཚར་བས་རྗེས་ལ་ང་ནི་ཅི་ཡང་བཤད་མི་ཤེས་པའི་ལྐུག་པ་ཞིག་དུ་གྱུར།
སྤྱིར་བཏང་མི་རབས་གསར་པ་ཞེས་པ་དེ་མཚམས་གང་ནས་བཟུང་དགོས་མིན་ངས་ཏག་ཏག་ཅིག་ཤེས་མ་སོང༌། འོན་ཀྱང་ངེད་རང་གིས་ལྟ་ཚུལ་བྱས་ན་ལོ་རྒན་དྲུག་ཅུ་མན་ཆད་ལ་མི་རབས་གསར་པ་ཟེར་ན་འགྲིགས་པ་མཐོང༌། བཀའ་ཁྲི་དང་སྤྱི་འཐུས། བཀའ་བློན་དང་དྲུང་ཆེ་སོགས་སུ་ཡིན་རུང་ཤེས་ཡོན་དང་འཇོན་ཐང་ལྷག་བསམ་རྣམ་དག་ཅིག་ཡོད་ན་ཆོག་པ་ལས་ངེས་པར་དུ་མི་རབས་གསར་པ་དང་གཞོན་སྐྱེས། ཕོ་ལས་མོ་དང་སྐྱ་བོ་ལས་གྲྭ་བཙུན་ཞིག་གཏན་ནས་ཡིན་མི་དགོས། ཨ་མའི་བུ་ལ་ཡོན་ཏན་ཡོད་ན། དགའ་ལྡན་ཁྲི་ལ་བདག་པོ་མེད་ཟེར་བ་ལྟར་སུས་འཇོན་ན་འགྲིགས་པ་འདོད། འོན་ཀྱང་བླ་རྒན་བོན་རྒྱས་རེ་འབོད་ལྟར་བྱས་ན་གཤམ་འོག་འོས་མི་རྣམས་བཀའ་ཁྲི་དང་བཀའ་བློན་གནང་ན་མི་འགྲིགས་ཞིག་མི་འདུག་སྙམ།
༡ བཀྲས་མཐོང་བསྟན་འཛིན་རྣམ་རྒྱལ།
༢ མཁས་དབང་བློ་བཟང་སེང་གེ།
༣ སྐུ་ཚབ་སྐལ་བཟང་རྒྱལ་མཚན།
༤ ཚོགས་གཙོ་སྤེན་པ་ཚེ་རིང༌།
༥ ཚོགས་གཞོན་རྒྱ་རི་སྒྲོལ་མ།
༦ ཚོགས་ཟུར་ཀརྨ་ཆོས་འཕེལ།
༧ བཀའ་ཟུར་བློ་བཟང་སྙན་གྲགས།
དྲ་གྲོགས་ཚོ།
མི་རབས་གསར་བའི་བཀའ་ཁྲི་དང་མི་རབས་གསར་བའི་བསམ་བློ་དུས་རབས་ཉེར་ཅིག་གི་སྦྱི་ཚོགས་དང་ཤིན་ཏུ་མཐུན།
མི་རབས་རྙིང་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་དུས་རབས་ཉེར་ཅིག་གི་སྦྱི་ཚོགས་དང་་་་་་་་་་་་་་་་་་་་་་་་་་།
ང་ཚོའི་རྒན་རབས་པ་དང་། ཕྱོགས་མཚུངས་སྲིད་དོན་དབྱེ་ཞིབ་པ་མང་པོས། རྒྱ་ནག་གི་ཆབ་སྲིད་ལ་འགྱུར་བ་འགྲོ་བའི་རེ་བ་རྒྱག་པ་དང་། ཡང་ན། རྒྱ་ནག་ལ་གཞི་རྩའི་འགྱུར་བ་ཞིག་འགྲོ་བ་ལ་ནི། མི་རབས་གསར་པའམ་མི་ཐོག་གསར་པའི་དབུ་ཁྲིད་ཅིག་སྲིད་སྟེགས་མཐོ་ཤོས་སུ་སླེབས་པར་དང་། དེའི་ལས་རོགས་དག་ཀྱང་གཞོན་སྐྱེས་ཁྲོད་ནས་སླེབས་ཐུབ་པས་མཚོན། མི་རབས་གསར་པའི་སེམས་ཁམས་དང་མི་རབས་གསར་པའི་སྟོབས་ཤུགས་དེར་རེ་བ་རྒྱག་གི་ཡོད་ཅིང་། རྒྱ་ནག་འདི་དམངས་གཙོར་འགྱུར་བའི་སྟོབས་ཤུགས་དེ་ཡང་མི་རབས་གསར་པའི་ངོས་ཤིག་ནས་མངོན་དགོས་པར་གླེང་གི་ཡོད་པ་དེར་གནས་ལུགས་ཡོད་པ་ཡིན་ན། བོད་ཀྱི་ཆབ་སྲིད་ལ་བལྟ་སྐབས་ཀྱང་གནས་ལུགས་ཇ་འཇུ་དགོས་པ་གལ་ཆེ་བར་འདུག་དྲན་ནོ།།
ད་ཆ་ང་ཚོའི་གཞུང་འཛིན་བཀའ་ཤག་གི་ཁྲི་པ་གཞོན་སྐྱེས་ཤིག་ཡིན་དགོས་པ་དང་། གཞོན་སྐྱེས་ཤིག་སླེབས་དགོས་པར་གླེང་སྐབས། རྒན་རབས་པའི་བསམ་བློའི་རིགས་དང་། དེ་ཁོ་ནའི་རྗེས་སུ་འབྲངས་མཁན་མང་དག་ཅིག་ནས། ཉམས་མྱོང་མེད་པར་ལས་དོན་ཅི་ལྟར་སྒྲུབ་ཅེས་བརྗོད་ཅིང་ཡོད་པར། གནས་ལུགས་ཀྱི་ལྗིད་ཀོག་ཁྱོན་ནས་མེད་པ་ག་ལ་ཡིན་ཏེ། མིན་པ་དེ་ལྟར་ནའང་། ད་ཡོད་རྒན་རབས་པ་ཉམས་མྱོང་གི་མཛོད་དུ་གྱུར་པ་འདི་དག་ཀྱང་དང་པོའི་གནས་སྐབས་ན། ད་ལྟའི་ཉམས་མྱོང་གི་ཆ་འདིའི་ཆ་ཤས་ཡང་ཤས་རེའང་མེད་པ་ནས། ཡོད་ཙམ་ནས་རིམ་པས་ཚད་འདིར་སླེབས་པ་ལས། གཞན་གང་ཡང་མིན་ན། ཛ་དྲག་དང་གནད་འགག་གི་དུས་སྐབས་འདིར། འདམས་ཀ་མ་ནོར་བ་དགོས་པ་དེ་གལ་ཆེན་མ་རེད་ཞུ་ག་ལ་རུང་སྙམ་དུ་འདོད་དོ།།
ས་བྱི་ལོའི་ཞི་རྒོལ་ཆེན་མོའི་སྐོར་གླེང་སྐབས། བརྒྱ་ཆ་བརྒྱད་ཅུ་མི་རབས་གསར་པ་ཡིན་པའི་ལས་འགུལ་ཞིག་ཡིན་པ་བོད་དོན་འདི་ལས་སླ་པོས་རྩ་མེད་བཟོ་མི་ཐུབ་པའི་རྒྱུ་མཚན་ཨང་དང་པོར་བགྲངས་པ་དེ་དང་།་ད་ཆ་གཞོན་སྐྱེས་ཚོར་ཉམས་མྱོང་མེད་པ་ཁོ་ནས་འགན་འཁྲི་མི་ཐེག་པར་སྒྲོག་མཁན་ཚོའི་བསམ་ཚུལ་དེ་ཏག་ཏག་ཅིག་མ་རེད་སྙམ་དུ་འདོད། རྒྱུ་མཚན་འདི་འདྲ་མང་དག་ཅིག་གི་ངོས་ནས་བལྟས་པ་ཡིན་ན། གཞོན་སྐྱེས་སམ་མི་རབས་གསར་པའི་སྟོབས་ཤུགས་འདིར། རྒན་རབས་པས་བྱུས་ཀྱི་བློ་འདོན་དང་། རྒན་རབས་པས་ཐབས་ཀྱི་བློ་འདོན་ཡོད་ན། གནང་དགོས་པའི་ཚོད་ཆགས་ཡོད་པ་ལས། རྒན་རབས་པ་ཚོ་ལས་གཞོན་རབས་པ་ཚོས་འཇོན་གྱི་མ་རེད་སྙམ་པའི་བློ་དོགས་དེས་ཕན་གྱི་མ་རེད། གལ་ཆེ་ཤོས་གཅིག་ནི། རྒན་རབས་པ་ཚོས་ལོ་ཤས་ཀྱི་ལས་བསྡོམས་ཀྱི་ཚབ་ཏུ། བཟོད་གསོལ་གྱི་ཐན་སྐད་རེ་བསྒྲགས་བསྡད་པས་ལྷག་ཏུ་ག་ལ་འགྲིག ད་ནི་གནང་སྟངས་དེ་རིགས་དུས་ཚོད་ཡོལ་ཟིན་པར་འདུག་གོ།
རྒན་རབས་པ་ཚོར་ཐབས་རྩལ་ལྷག་མ་དང་། བྱུས་གཞི་ལྷག་མ་འདྲ་ཡོད་པ་ཡིན་ན། ད་ནི་ཟུར་བཞུགས་ཀྱི་ངོ་བོ་ནས་གཞོན་སྐྱེས་ཚོར་ལེགས་སྐྱེས་སུ་གནང་རོགས། མ་གཞི་ནས་བོན་རྒྱས་བཤད་པ་ལྟར་རེད། དུས་ཚོད་ཡོལ་ལ་ཉེ་བའི་ཟས་རིགས་དེ་མགྱོགས་པོར་བེད་སྤྱོད་བྱེད་དགོས། དུས་ཚོད་རྫོགས་ཚར་བའི་ཟས་རིགས་ཀྱིས་གཟུགས་པོའི་འཕྲོད་བསྟེན་ལ་གནོད་ཀྱི་རེད། མ་མཐར་ཡང་རྒན་རབས་པ་དག་གིས་འདི་ཙམ་ནི་མཁྱེན་པའི་རེ་བ་ཞུ་ཡི་ཡོད་ཅེས་ཞུ་བར་ཐལ་ལོ།།
གྲོགས་ཨ་རིག་འགྱུར་མེད་ལགས། ངས་རྒན་ཞེན་ཅན་དག་གིས་ངའི་རྩོམ་འདི་མི་ཀློག་པར་ཤོགས་ཅེས་པའི་སྨོན་ལམ་དང་བཅས་ཁྱེད་རྩོམ་སྒྲིག་ཁང་ལ་བཏང་ཡོད་མོད། ཡིད་སྐྱོ་བ་ཞིག་ལ་ཁྱོད་ཀྱིས་མགོ་ཡི་དུམ་ཚན་དང་པོ་དེ་བཀླགས་ཚར་འདུག མཇུག་ལ་མི་གཟིགས་རྒྱུ་ངའི་རེ་བ་ཡིན། རྒྱུ་མཚན་མགོ་ནས་ཐུག་ཤར་གསུམ་བཀླགས་ནས་ཞེད་ཀི་ཡོད་པ་ཞིག ལྔ་དང་དྲུག་བཀླག་ན་རྨི་ལམ་འཁྲུག་པ་དང་། སྨྱོ་བ་སོགས་ཀྱི་ལྟས་ངན་མང་དུ་འབྱུང་སྲིད་པས་མི་ཀློག་རྒྱུ་ངའི་རེ་བ་ཡིན།
ཨོ། ཁྱོད་ཀྱིས་ཡིག་ནོར་བཟུང་བ་ལ་ཐུགས་རྗེ་ཆེ། ཡིན་ནའང་། གྲོགས་པོ་ནང་མོལ་གྱི་ཚུལ་དུ་བཤད་འདོད་པ་ཞིག་ལ། ཁྱོད་རྩོམ་སྒྲིག་པ་དང་དྲ་བདག་ཡིན་པའི་ཆ་ནས་ཡིག་ནོར་ཤེས་བཞིན་མཐོང་བཞིན་དུ་ཡིག་ནོར་དང་བཅས་ཏེ་རྩོམ་དྲ་ཐོག་ལ་བཀོད་པ་དང་། ད་དུང་བྱེད་སྟངས་འདི་ལྟར་བྱེད་པ་ནི་གླེན་རྟགས་དང་གསར་རྟགས་མཉམ་དུ་བསྟན་པ་རེད། རྗེས་ཕྱོགས་ནས་རིགས་འདི་ལ་གཟབ་པར་འཚལ། རེ་བ་གཞན་ཞིག་ལ་ངའི་རྩོམ་འཆལ་ནང་གི་ཡིག་ནོར་དག་བཟོ་ཞོར་དུ་ཁྱོད་ཀྱི་མཆན་ཐུང་འདི་རུའང་ཡིག་ནོར་ཤོར་འདུག་པས་དེ་ཡང་བཟོ་རོགས།
དྲ་གྲོགས་ཚོ་ཕེབས་ནས་བསམ་ཚུལ་བཤད་པར་དགའ་ཡོད། མུ་མཐུད་ནས་བསམ་ཚུལ་བཤད་རྒྱུ་གལ་ཆེན་པོ་རེད། དུས་རབས་འདི་བགྲོ་གླེང་གི་དུས་རབས་རེད། དེའི་ཕྱིར། མུ་མཐུད་ནས་བགྲོ་གླེང་གནང་རོགས། ཁྱེད་ཅག་གི་བསམ་ཚུལ་ལ་ཉན་གི་ཡོད།
བོན་རྒྱ་བསྟན་རབ་ལ་མི་རབ་གསར་པ་བཀའ་བློན་འོས་མི་བློ་བཟང་སེངྒེ་ལས་རྙེད་མིན་འདུག་པས་ངས་མི་རབ་གསར་པའི་བཀའ་བློན་བཀའ་ཁྲི་བ་ངེས་པར་དགོས་པ་མི་འདོད་ཀྱང་།
ངེས་པར་བཀའ་བློན་མི་རབ་གསར་པའམ་ན་གཞོན་ཞིག་དགོས་ཀྱི་ཡོད་ན་བློ་བཟང་སེངྒེ་ལས་ལྷག་པའི་ན་གཞོན་ཤེས་ཡོན་གཉིས་ལྡན་ཉམས་མྱོང་གསུམ་ལྡན་ལྷག་བསམ་བཞི་ལྡན་ང་ཚོའི་སྤྱི་ཚོགས་ནང་མང་རབ་ཡོད་པས་དེ་རྣམས་ལ་གཟིགས།
བཀའ་བློན་ཐུབ་བསྟན་ལུང་རིགས།
བཀའ་ཟུར་བློ་བཟང་སྙན་གྲགས།
སྤྱི་འཐུས་ཚོགས་གཙོ་སྤེན་པ་ཚེ་རིང་།
སྤྱི་འཐུས་ཚོགས་ཟུར་ཀརྨ་ཆོས་འཕེལ།
སྤྱི་འཐུས་ཚོགས་གཞོན་རྒྱ་རི་སྒྲོལ་མ།
སྐུ་ཚབ་སྐལ་བཟང་རྒྱལ་མཚན།
དེ་རྣམས་ངས་བལྟ་ཚུལ་ལ་བློ་བཟང་སེངྒེ་ལས་ཆ་རྐྱེན་ལེགས་པ་ཡོད་པ་མཐོང་།
དྲ་གྲོགས་བོན་རྒྱ་བསྟན་འཛིན་རབ་རྒྱལ་ལགས་སྐུ་ཉིད་ཀྱི་རྩོམ་ཡིག་ནང་ལ་
རྒན་གཞོན་གྱི་འཐབ་རྩོད་སྐོར་ཤུགས་ཆེ་བས་ཕྱི་ནས་རྩོམ་ཡིག་སྤེལ་བའི་སྐབས་རྒན་གཞོན་གྱི་འཐབ་རྩོད་སྐོར་གང་ཉུང་ན་ལེགས་
གང་ཡིན་ཟེར་ན་བཀའ་ཁྲིའི་འོས་མི་ལ་རྒན་གཞོན་གྱིས་དབྱེར་བ་མེད་ལ་ཕོ་མོ་དང་སྐྱ་གསེར་གྱིས་དབྱེར་བ་དེ་བས་མེད།།
བླ་རྒན་གྱིས་གནས་ལུགས་དང་རྒྱུ་མཚན་ཡོད་པ་ཞིག་བཤད་འདུག རྒྱབ་སྐྱོར་ཡོད། མི་རབས་གསར་བར་ཡར་ལངས་དགོས་པའི་འབོད་ཚིག་ཡོང་དུས་རང་ཉིད་ལ་མི་རིགས་ཤིག་གི་བདེ་སྡུག་ལ་འཁྲི་བའི་བྱ་བཞག་ཡོད་པར་ངེས་ཤེས་རྙེད་འདུག
ཁྱོད་ཀྱི་བསམ་ཚུལ་ལྟར་ན་རྒན་རབས་པས་རང་གི་འདོད་མོས་ཀྱི་འོས་མི་འདེམས་མི་ཆོག་པ་འདྲ། དེ་ཡང་ཁྱོད་ཀྱི་འོས་གཞི་ལས་གཞན་བདམས་ན་ལྷག་པར་མི་འགྲིགས་པ་འདྲ། འདི་འདྲའི་གུ་དོག་གི་དམངས་གཙོ་ནི་གྲ་སའི་ལམ་ལུགས་དག་དང་འབྲེལ་བ་ཡོད་པ་མིན་ནམ། “གནམ་འོག་འདི་རྒན་རབས་པ་སུས་དོགས་པོར་བཟོས་ན་དེ་ལས་ནག་ཉེས་མེད་”ཟེར། ཁྱོད་ཀྱིས་འདི་ལྟར་དོག་པོ་བཟོ་བ་བྱས་རྗེས་ཆེན་པོ་ཡིན་པར་སུས་ཁས་ལེན།
དོན་ངོ་མ་ཁྱོད་ཀྱིས་བཤད་ཀྱིན་པའི་དབང་ཆ་མཁྲེགས་འཛིན་ཟེར་བ་དེ་སུ་སུ་རེད། ༸གོང་ས་མཆོག་དང་བཀའ་ཁྲི་ཟམ་གདོང། བཀའ་བློན་རྣམ་པ། སྤྱི་འཐུས་ཚོགས་གཙོ་གཞོན་དག་ལ་ཟེར་བ་ལོས་ཡིན། དེ་མིན་ཧོན་ལོག་གི་དབུ་འཛིན་ཞིག་སུ་ཡོད་དམ། དེ་དག་གི་གོ་ས་ཁྱོད་ཚོ་ལ་གནང་དགོས་ཟེར་བ་ཡིན་ནམ།
གོང་གི་དབང་འཛིན་པ་རྒན་རབས་རྣམ་པས་ཁྱོད་ཀྱི་ཁ་གཡང་འདི་མ་བསྒྲགས་པའི་ལོ་མང་སྔོན་ནས་གཞོན་སྐྱེས་ཚོས་འགན་ལེན་ཐུབ་པ་དགོས་ཚུལ་མང་པོ་གསུངས་འདུག དམངས་གཙོ་ཡིན་ན་སུས་ཀྱང་དབང་ཆ་མཁྲེགས་འཛིན་བྱེད་ས་མི་འགྲོ དབང་ཆ་གནང་མཁན་རྒྱ་ཆེ་བའི་མི་དམངས་རེད། བཤད་རྒྱུ་ཡོད་ན་མར་འཁོར་ནས་མི་དམངས་ལ་ཤོད། ཨ་མའི་བུ་ལ་ཡོན་ཏན་ཡོད་ན་དགའ་ལྡན་ཁྲི་ལ་བདག་པོ་མེད་ཅེས་པ་བཞིན་དམངས་གཙོའི་གཙོ་འཛིན་རྣམ་པ་ཡང་དེ་རང་ཡིན། རང་རང་གིས་འབད་བརྩོན་བྱོས། སུས་ཀྱང་བཀག་མི་འདུག རྒན་རབས་པ་རྣམ་པས་གཞོན་སྐྱེས་ཚོར་ངན་བཤད་དང་ཁ་གཏོང་གི་མི་འདུག ཁྱོད་ཅག་ཁ་ཤས་ཤིག་གིས་འདི་ལྟར་དོན་རྒན་རབས་པ་ཚོར་ཁ་བཏང་ན་བཟང་པོ་མ་རེད།
ངོ་མ་ཁྱོད་ཀྱིས་བཤད་པ་ལྟར་ཡིན་ན། རྒྱ་ནག་གི་དབང་འཛིན་ལམ་ལུགས་དང་གཅིག་པ་ཡིན་ས་རེད། རྒྱ་ནག་གིས་ཀྱང་དམངས་གཙོ་ཡིན་ཟེར་གྱིན་ཡོད་པ་རེད། འོན་ཀྱང་མི་དམངས་ལ་འོས་འདེམས་ཀྱི་དབང་ཚད་ངོ་མ་མེད་པ་རེད། འདི་གནད་དོན་གཙོ་བོ་ཞིག་རེད།
རང་བཙན་ནས་དབུ་མའི་ལམ་དུ་ཕྱིན་པ་ནི་གུ་དོག་ནས་གུ་ཡངས་དང་བློ་སྤོབས་ཆེ་ནས་ཆེར་བསྐྱེད་ཀྱི་དགེ་མཚན་ཆེ་བའི་ཐབས་ལམ་ཞིག་ལས་སྡར་མའི་སྤྱོད་ཚུལ་ཞིག་ཅི་ལ་ཡིན། ལྷག་པར་དུ་ཡང་ཁོང་རྣམ་པ་རྒྱ་གཞུང་ལ་སྐྲག་དགོས་དོན་ཅི། ༸གོང་ས་མཆོག་དང་བཀའ་ཁྲི། སྐུ་ཚབ་ཚོགས་པ་བཅས་ཀྱི་སྲོག་ལ་ཉེན་ཁ་ཡོད་དམ། ཁོང་རྣམ་པའི་ཁེ་ཕན་གང་ཞིག་འཆོར་བར་སྐྲག་པ་རེད། གལ་ཏེ་བློ་བཟང་སེང་གེ་ལགས་ཁྲི་བར་བཞུགས་ན་དབུ་མའི་ལམ་ནས་ཕྱིར་རང་བཙན་འཐབ་རྩོད་ལ་ཞུགས་ངེས་ཡིན་ནམ། ཞུགས་མ་ཐུབ་ན་དེ་ཡང་སྡར་མའི་རྗེས་འཛིན་པ་ཞིག་ཏུ་གྱུར་བ་ལས་ཅི།
གཞོན་ནུ་གདོང་མཆོང་བ་ལགས། ང་ཚོས་མང་ཚོགས་ལ་ཆབ་སྲིད་ཀྱི་བསམ་ཚུལ་གླེང་དུས་སྐད་ཆ་གོ་བདེ། ཁ་གསལ། དོན་འདུས་རེ་གླེང་ན་ཕན་པ་ལས་ལང་ཚོའི་རྦབ་ཆུའི་ལད་ཟློས་འདྲ་བོའི་སྙན་ངག་གི་ཚིག་སྦྱོར་འདི་དག་སྤེལ་ནས་ཅི་བྱེད། ཁྱོད་ཀྱི་ང་རྒྱལ་གྱི་མགོ་འཕང་གནམ་ལས་མཐོ་བ་འདྲ། དོན་གྲུབ་རྒྱལ་དང་དགེ་ཆོས་ལྟ་བུའི་དོན་གྱི་ང་རྒྱལ་ཞིག་ཏུ་འགྱུར་བར་སྨོན།
རྒན་རབས་པ་རྣམས་མུ་མཐུད་ལོངས་ཤོག གཞོན་སྐྱེས་རྣམས་ཀྱང་མུ་མཐུད་ལོངས་ཤོག རྒན་གཞོན་ཚང་མ་མཉམ་དུ་ལངས་དགོས། གནམ་འོག་འདི་ང་ཚོ་ཚང་མའི་རེད། ང་ཚོ་འདི་ལྟར་ལངས་ན་དོན་ངོ་མའི་འདྲ་མཉམ་དང་མཛའ་མཐུན། རང་དབང་གི་དུས་རབས་རེད།
ད་ལྟ་ནི་འདྲ་མཉམ་དང་མཛའ་མཐུན་གྱི་དུས་རབས་ཤིག་རེད་ལ། ན་གཞོན་གྱི་གནམ་འོག་ཅིག་ཡང་རེད། གནམ་འོག་འདི་རྒན་རབས་པ་སུས་དོགས་པོར་བཟོས་ན་དེ་ལས་ནག་ཉེས་མེད་ཅེས་བཤད་མི་ཐུབ་ལ། རྒན་རབས་པ་སུས་བདག་གིར་བྱས་ན་དེ་མཁྲེགས་བཟུང་མ་རེད་ཅེས་ཀྱང་བཤད་མི་སྤོབས། ལྷག་པར་ན་གཞོན་གྱི་གནམ་འོག་ནས་རྒན་རབས་པས་ཧམ་སེམས་ཀྱི་ཁ་ཆེན་པོར་གདང་བ་ནི་ཐལ་ཆེས་པ་དང་། གནས་ལུགས་མིན་པ་ནི་ཐག་རིང་པོར་འདང་རྒྱག་དགོས་པ་ཞིག་མ་རེད། ངའི་སེམས་ལ་འདི་ལྟར་དྲན་གྱིན་འདུག དྲན་པ་འདི་བཞིན་གླེང་ཕོད་པ་ནི་ངའི་སྙིང་སྟོབས་ཤིག་ཡིན་ལ། གླེང་དགོས་པ་དེའང་རྩོམ་པ་པོའི་འགན་འཁྲི་ཡིན་ནོ། །
གོང་གི་དུམ་ཚན་འདི་བཀླགས་རྗེས་ཀློག་མཚམས་བཞག་པ་ཡིན། གཅིག་བྱས་ན་ངས་ཤེས་པ་ཉུང་དྲགས་པ་དང་ཨ་ཁུ་བོན་རྒྱས་མཁྱེན་པ་མང་དྲགས་འདུག གཅིག་བྱས་ན་ཨ་ཁུ་བོན་རྒྱས་ལབ་བརྒྱབས་པ་བཙན་དྲགས་པ་དང་ངས་གདེང་འཇོག་བྱས་པ་གཉོམ་དྲགས་པ་ཡིན་སྲིད། དེ་ཡང་མིན་ལ་ང་འུར་འགྲོགས་ལ་སྐྲག་པ་དང་ཨ་ཁུ་བོན་རྒྱས་དོན་མེད་ལ་འུར་བརྒྱབས་པ་ཡིན་སྲིད། གང་ལྟར་ཡང་། ངས་མུ་མཐུད་དེ་ཀློག་འདོད་མ་བྱུང་།
འགྲོ་ཞོར་དུ་བཤད་རྒྱུ་ཞིག་ལ་ཐེངས་འདིར་ཨ་ཁུ་བོན་རྒྱས་ཅིག་ཡང་བྲིས་འདུག་པས་རྗེས་ཕྱོགས་ནས་ཅིག་ཀྱང་འབྲི་བར་བསྐུལ་བ་ཡིན་ལ། ཡང་དོགས་པོར་བྲིས་འདུག་པར་དོག་པོ་དང་། ཐལ་ཆེས་བྲིས་པ་ཐལ་ཆེ་འབྲི་རྒྱུའི་རེ་སྐུལ་ཡང་ཞོར་ནས་ཞུ། འདི་ལྟར་བསམ་ན་ཨ་ཁུ་བོན་རྒྱས་བསྒྲགས་གཏམ་སྤེལ་རྒྱུར་རྔམ་ནས་དག་སྡེབ་ལ་གཟབ་མི་འདུག་གོ །
མི་རབས་གསར་བ་ཤི་ནའང་དཔའ་སྐད་ཀྱི་གླུ་སྒྲ་འཇགས་པ་མེད་པར་ཤི་བ་ལས་མི་རབས་གསར་པས་བསྒྲུབ་ནའང་དཔའ་སྐད་ཀྱི་གླུ་སྒྲ་འཇགས་པ་མེད་པར་བསྒྲུབ་ཐུབ་ན་ཅི་མ་རུང་།
ཡང་། མི་རབས་གསར་བ་ནི་ནམ་ཡང་གསར་བ་ཡིན་དགོས་པ་ལས། གཏན་ནས་རྙིང་བར་འགྱུར་མི་རུང་། འོན་ཀྱང་། ང་ལ་གསར་རྙིང་གི་དབྱེ་བ་མེད་ལ། རྒན་གཞོན་གྱི་དབྱེ་བ་དེ་ལས་ཀྱང་ག་ལ། སུའི་བོད་ཀྱི་རྩ་དོན་ལ་ཕན་ཐོག་ཐུབ་ན་དེ་རླབས་ཆེན་ཡིན།
ཕྱུག་པོ་གཏམ་ལ་དགའ། སྤྲང་པོ་ཟས་ལ་དགའ་ཞེས་ཟེར་སྲོལ་ཡོད་པ་ལྟར་བཙན་བྱོལ་ནང་གི་བཀའ་ཟུར་སྤྱི་ཟུར་རྒད་པ་ཚོ་ལ་དགོས་པ་ནི་མཚན་དང་སྙན་གྲགས་རེད།
ན་གཞོན་སློབ་མ་ཚོས་འདོད་ཆགས་བྱས་འདོད་པ་བཞིན་དུ་བཀའ་ཟུར་སྤྱི་ཟུར་མི་རྒན་ཚོས་དུས་ནམ་ཡང་བློའི་གཏོང་འདོད་མེད་པ་ནི་གོ་གནས་ཡིན། རྒྱུན་དུ་བྱ་འདོད་པ་ཡོད་ནི་དཔོན་གནས་ཡིན།
ཁོང་རྣམ་པ་ཚོས་ཉམས་མྱོང་རྩ་བ་ཆེ་པོ་ཡིན་པས་སྒྲུབ་བྱེད་བཀོད་བསྡད་འདི་ནི་ཁོང་རང་ཚོའི་གོ་གནས་མུ་མཐུད་ནས་བཟུང་ཐུབ་པའི་ཆེད་དུ་བཤད་བསྡད་པར་རེད།
མ་འོང་བཀའ་སྤྱི་ཕེབས་པར་ཉམས་མྱོང་དགོས་ཟེར་བསྡད་མཁན་ཚོས་ཡང་བསྐྱར་མི་རྒན་ཀླད་རྙིང་པ་དེ་ཚོ་འོས་འདེབས་དགོས་ཞེས་པའི་དོན་རེད།
ནུབ་ཕྱོགས་རྒྱལ་ཁབ་ཁག་ཏུ་ལས་བྱེད་པ་ཞིག་རང་ལོ་༦༧་ལ་ཕེབས་དུས་རྒད་ཡོལ་ཟེར་བ་ཞིག་ཆགས་ཀྱི་རེད། དེ་དུས་ལས་ཀ་བྱེད་མ་དགོས་པ་རྒད་གསོ་ཟ་ནས་སྡོད་ཀྱི་རེད། བཙན་བྱོལ་གཞུང་གིས་ལས་བྱེད་ཚོ་ལོ་ཚོད་ག་དུས་རྒད་ཡོལ་ཆགས་ཀྱི་ཡོད་དམ།
ནུབ་ཕྱོགས་རྒྱལ་ཁབ་ཁག་ཏུ་རང་ལོ་༦༧་བསླེབས་པའི་མི་ཞིག་ཡིན་དུས་མི་དེར་རྒད་ཁོག་ཆགས་པར་བརྩི་གི་རེད། རང་ལོ་༦༧་ཡོལ་འགྲོ་དུས་ལུས་ཀྱི་སྟོབས་ཤུགས་ཉམ་པ་དང་དབང་པོའི་རྩ་ཉམ་པ་རིག་པ་མི་གསལ་བ་སོགས་ཆགས་ཀྱི་ཡོད་པས་ལས་ཀ་བྱེད་མི་དགོས་པ་རེད།
མ་ཟད་རྒད་པོ་རང་ལོ་༨༠ལོན་པའི་མི་རྒན་དང་རང་ལོ་༡༨་མ་ལོན་པའི་བྱིས་པ་ཚོ་ནི་ཁྲིམས་ཀྱི་མདུན་ས་དཔང་རྟགས་བྱེད་མཁན་ཡང་མི་འགྲིག་པ་རེད།
བརྒྱད་བཅུ་ཧན་ལོག་ཟེར་བའི་དུས་ཚོད་གཅིག་དང་བྱིས་པ་བསམ་མེད་ཟེར་བའི་དུས་ཚོད་གཅིག་ལ་གནས་ཡོད་དུས་ལས་བྱེད་པ་འགྲིག་གི་མེད་པ་རེད།
ང་རང་ཚང་བཙན་བྱོལ་གཞུང་གི་ལུགས་སྲོལ་ལྟར་ན་བོད་རྒྱལ་ཁབ་ཀྱི་དབང་ཆ་ཆེ་ཤོས་ནི་མི་རྒན་རྒད་ཡོལ་ཆགས་ཚར་མཁན་རྣམས་རེད། མིག་གིས་མཐོང་ལ་མ་མཐོང་ལ་དང་རིག་པ་གསལ་ལ་མ་གསལ་བ་ཡོད་པའི་མི་རྒན་ཚོ་ལ་བོད་རྒྱལ་ཁབ་ཀྱི་དབང་ཆ་ཡོད་པ་མ་གཏོགས་ལོ་ཆུང་ཁ་མིག་རིག་པ་གསལ་པོ་ཡོད་མཁན་ཚོ་ལ་བོད་རྒྱལ་ཁབ་ཀྱི་མདུན་ལམ་ལམ་སྟོན་བྱེད་པའི་དབང་ཆ་ནམ་ཡང་ཐོབ་མྱོང་མེད།
ཐུགས་རྗེ་གཟིགས་དྲང་བཤད་ཤིག་ཤོར་སོང།
ངའི་བློ་ངོར་ཡོད་པའི་བཀའ་ཁྲིའི་འོས་མི་ནི་གཟབ་གདོང་རིན་པོ་མཆོག་དང་རྒྱ་རི་རིན་པོ་ཆེ་རྣམ་གཉིས་ཡིན་ཡང་། དེ་ལྟར་མ་བྱུང་ཚེ་། ༸གོང་ས་མཆོག་སྐུ་བཞུགས་སྐབས་ཉིད་ནས་གཞོན་སྐྱེས་ཚོར་བཀའ་ཁྲིའི་ལས་འགན་སྤྲད་ཐུབ་པ་ཡིན་ན་དགེ་མཚན་ཆེན་པོ་ཡོད་པ་མ་རེད་དམ།
མི་རབས་གསར་པར་གུས་བརྩི་ཡོད། ལ་ཞེན་ལ་དེ་བས་ཡིད་རང་ཡོད།
འོན་ཀྱང་རྩོམ་ཡིག་ཁྱོན་ཡོངས་ནས་བལྟས་ཡོང་དུས་དང་། ལྷག་དོན་ལམ་དབུ་མའི་འཕེལ་རིམ་སོགས་ལ་ཉན་ན། ཕལ་ཆེར་སྙན་ངག་པ་ད་དུང་ཡང་། དེང་གི་སྤྱི་ཚོགས་ཀྱི་གནས་བབ། ལྷག་དོན་ང་ཚོ་དང་རྒྱ་ནག་བཅས་ཀྱི་སྐོར་ལ་རྟོག་སད་ཐེབས་མེད་པ་འདྲ།
དེ་འདྲ་ཡིན་རྒྱུ་རེད། རི་མོ་བ་དང་། སྙན་ངག་པ། ཤིང་བཟོ་བ། ཆབ་སྲིད་པ། ཞིང་པ། སོགས་ཕལ་ཆེ་བ་སོ་སོའི་ལས་གནས་ཀྱི་རིམ་པ་ཙམ་ལས་རིག་ཚན་གཞན་ལ། གོ་རྟོགས་དང་རྒྱུས་མངའ་མེད་པ་ཡོང་ངེས་རེད།
གང་ལྟར་ཡང་རྗོད་སྟངས་ཀྱི་ཐད་ནས་འགྲིགས་འདུག གཞན་ད་དུང་ཚོད་དཔག་དང་། དངོས་ཡོད། འབྱུང་འགྱུར། ཆབ་སྲིད་ཀྱི་འཕེལ་འགྱུར་སོགས་མིག་འོག་ན་ལུས་ཡོད་པ་འདྲ།
སྙིང་སྟོབས་ཀྱི་ཁུ་ཚུར་བྲག་ལ་གཞུས་པའི་མི་རབས་གསར་བ་ཞིག་འདི་ལྟར་ལམ་ལ་བུད་བྱུང
ཀླད་རྙིང་གི་མཁྲེགས་བཟུང་ཐལ་བར་གཏོར་བའི་གནམ་ལྕགས་ངོ་མ་ཞིག་ཀྱང་འདི་ལྟར་ལམ་ལ་བུད་བྱུང
ལྐོག་གཡོ་ཐབས་ཇུས་ཀྱི་དཀྱིལ་འཁོར་རྣམ་པར་འཐག་པའི་རིག་པ་རྣལ་མ་ཞིག་འདི་ལྟར་ལམ་ལ་བུད་བྱུང
སྒེར་གཅོད་ཀྱི་བྱེ་ཕུག་རླུང་ལ་བསྐུར་མཁན་གྱི་དཔའ་བོའི་གད་རྒྱངས་ཤིག་འདི་ལྟར་སྒྲོག་བྱུང
བདག་གི་མི་རབས་གསར་བའི་ན་གཞོན་ཚོ ཡུལ་དང་དུས་ཀྱིས་བྱིན་པའི་དེ་རིང་གི་ཉིན་མོ་འདིར
ང་ཚོས་རང་ལྟ་མཆོག་འཛིན་གྱི་རུལ་སོང་གི་ལྟ་བ་དག་དོར་ནས་ལམ་ལ་ཆས་ཡ
ཞིབ་བཀླགས་ཟིན། སྙིང་རྗེ་བོ་དཔེ་རེད་འདུག རྒན་གཞོན་འཐབ་རྩོད་མེད་ན་བཟང་ལེ་རེད