བོད་རང་བཙན་གྱི་དྲ་དེབ་གསར་དུ་སྒོ་ཕྱེ་བ།

རྒྱལ་སྤྱིའི་བོད་རང་བཙན་ལས་འགུལ་ཁང་གིས་ད་ལོའི་ཕྱི་ཟླ་བདུན་པ་ནས་མགོ་འཛུགས་ཀྱིས་རང་བཙན་གོམ་བགྲོད་བྱ་རྒྱུ་ཡིན་པ་དང་། དེ་དང་མཉམ་དུ་རྒྱལ་སྤྱིའི་བོད་རང་བཙན་ལས་འགུལ་ཚོགས་པ་ཞེས་པའི་དྲ་དེབ་ཞིག་ཀྱང་གསར་དུ་སྒོ་ཕྱེ་འདུག 

རྒྱལ་སྤྱིའི་བོད་རང་བཙན་ལས་འགུལ་ཚོགས་པས་ད་ལོའི་ཕྱི་ཟླ་ ༧ པའི་ཚེས་ ༤ ཉིན་ནས་ཨ་རིའི་ཕེ་ལེ་ཌེ་ཕེ་ཡ་ན་ཡོད་པའི་རང་བཙན་ཁང་ཞེས་པ་ནས་མགོ་འཛུགས་ཀྱིས་རྒྱལ་ས་ཝ་ཤིན་ཊོན་གྱི་རྒྱ་ནག་གཞུང་ཚབ་ཁང་བར་དུ་ཉིན་བདུན་གྱི་རིང་རྒྱང་ཐག་མེལ་ལེ་ ༡༥༠ རང་བཙན་གོམ་བགྲོད་བྱ་རྒྱུ་རེད། འདི་ནི་རང་བཙན་གོམ་བགྲོད་ཐེངས་ ༡༥ པ་དེ་ཆགས་ཡོད་ལ། ཐེངས་འདིའི་རང་བཙན་གོམ་བགྲོད་ལས་འགུལ་དང་དུས་བསྟུན་གྱིས་བོད་དབྱིན་ཡིག་རིག་གཉིས་ཀྱི་ཐོག་རྒྱལ་སྤྱིའི་བོད་རང་བཙན་ལས་འགུལ་ཚོགས་པ་ཞེས་པའི་དྲ་དེབ་ཞིག་ཀྱང་སྒོ་འབྱེད་བྱས་འདུག  དྲ་དེབ་དེར་རྒྱལ་སྤྱིའི་བོད་རང་བཙན་ཚོགས་པ་ངོ་སྤྲོད་དང་རང་བཙན་གོམ་བགྲོད་དང་འབྲེལ་བའི་གསར་འཕྲིན་དང་པར་རིས་གཙོས།  སྤྱིར་བོད་རང་བཙན་གྱི་ལས་དོན་དང་འབྲེལ་བའི་གསར་འགྱུར་དང་། བཅར་འདྲི། འབོད་སྒྲ། ལས་འགུལ། རྩོམ་ཡིག་བཅས་རྣམ་གྲངས་ལྔར་དབྱེ་ནས་གནས་ཚུལ་རིགས་བསྡུ་འགོད་བྱས་ཡོད་པར་མ་ཟད། ཚོགས་པ་འདི་ཐོག་མར་གསར་འཛུགས་གནང་མཁན་སྐུའི་གཅེན་པོ་ལྟག་མཚེར་རིན་པོ་ཆེ་མཆོག་ནས། “བོད་བོད་པ་ལ་བདག་དགོས་ན་ཡིན་གཅིག་མིན་གཉིས་རང་བཙན་དགོས་པ་རེད། བོད་ཀྱི་ས་ཆ་འདི་བོད་པ་ལ་དབང་དགོས་པ་རེད། བོད་ཀྱི་ལས་དོན་བོད་པས་བྱེད་དགོས་པ་རེད།” ཅེས་བཀའ་སློབ་ལམ་སྟོན་གནང་མྱོང་བ་ལྟར། དྲ་དེབ་དེར་ཅིའི་ཕྱིར་བོད་རང་བཙན་དང་། ཅིའི་ཕྱིར་བོད་གལ་ཆེན་པོ་རེད། ངས་ཅི་ཞིག་བྱེད་ཐུབ་ཞེས་པ་གསུམ་གྱི་ཐད་ནས་རྒྱལ་སྤྱིའི་བོད་རང་བཙན་ལས་འགུལ་ཚོགས་པའི་དམིགས་ཡུལ་དང་ལངས་ཕྱོགས་སོགས་གསལ་སྟོན་བྱས་ཡོད་པ་རེད། 

དྲ་དེབ་འདི་ནི་རྒྱལ་སྤྱིའི་བོད་རང་བཙན་ལས་འགུལ་ཚོགས་པས་སྒྲིག་གཉེར་བྱེད་བཞིན་ཡོད་ལ། དྲ་གནས་ཁ་བྱང་ནི་ www.bodrangzen.org  དང་། དྲ་ངོས་ཡིག་གཟུགས་ནི་རྒྱལ་སྤྱིའི་ཚད་ལྡན་ཨང་སྒྲིག་བོད་ཡིག་ཧི་མ་ལ་ཡ་རེད། དྲ་དེབ་འདི་གསར་དུ་སྒོ་ཕྱེ་བ་མ་ཐག་ཡིན་པས་དྲ་ངོས་སུ་ད་དུང་གནས་ཚུལ་མང་པོ་འགོད་ཐུབ་མེད་ནའང་། དྲ་ངོས་སྤུས་དག་ལ་སྤྱོད་བདེ་བ་ཞིག་བཟོས་འདུག་པར་མ་ཟད། དྲ་བ་ཀློག་པ་པོ་སྒེར་ངོས་ནས་དྲ་ངོས་དེར་རང་དབང་གི་སྒོ་ནས་ཐོ་འགོད་ཀྱིས་མཆན་བུ་སོགས་རང་ཉིད་ཀྱི་བསམ་ཚུལ་སྤེལ་ཆོག་པ་རེད།  

གསར་འགྱུར་སྤེལ་མཁན། ཚེ་རིང་རྒྱལ།